သတင်းနှင့် လှုပ်ရှားမှုများ

   စားသုံးသူရေးရာဦးစီးဌာနသည် စားသုံးသူများအတွက် ဘေးအန္တရာယ်ကင်းစေရန်နှင့် ဘေးအန္တရာယ်ကင်းသောစားသောက်ကုန်များ ရွေးချယ်ဝယ်ယူစားသောက်နိုင်စေရန်  အတွက် ၂၀၂၅ခုနှစ်၊ ဧပြီလ(၂)ရက်နေ့တွင် မြိတ်မြို့၊ ဆိပ်ငယ်ရပ်၊ ကမ်းနားလမ်းရှိ ခရိုင်စားသုံးသူရေးရာ ဦးစီးဌာနတွင် လင်းအမှတ်တံဆိပ် ဘက်စုံသုံးဆပ်ပြာဆီလုပ်ကိုင်လျက်ရှိသော လုပ်ငန်းရှင်နှင့် တွေ့ဆုံပြီး ကုန်အညွှန်းအမှတ်အသားပြည့်စုံစွာပါရှိနိုင်ရေး အသိပညာပေးဆွေးနွေးပြောကြား ခဲ့ကြောင်း သတင်းရရှိပါသည်။

အသိပညာပေး ဆွေးနွေးပြောကြားရာတွင် စားသုံးသူကာကွယ်ရေးဥပဒေပါ ကုန်အညွှန်း အမှတ်အသားဖော်ပြချက်များနှင့်စပ်လျဉ်း၍ ဖော်ပြသင့်သောအချက်များ၊ အလေးချိန်ဂရမ်များ အား မြန်မာဘာသာဖြင့်ဖော်ပြရမည်ဖြစ်ကြောင်းအစရှိသဖြင့် ရှင်းလင်းပြောကြားခဲ့ပြီး စီးပွားရေး လုပ်ငန်းရှင်များ လိုက်နာရန်အချက်အလက်တို့ကို ရှင်းလင်းပြောကြားခြင်းနှင့် အသိပညာပေး လက်ကမ်း စာစောင်ဖြန့်ဝေပေးခြင်းများ ဆောင်ရွက်ခဲ့ကြောင်း သတင်းရရှိပါသည်။

DOCA(တနင်္သာရီ)

       ၂၀၂၅ ခုနှစ်၊ ဧပြီလ ၃ ရက်နေ့ ၊ နံနက် ၉း၀၀ နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှစစ်ဆေးရေးအရာရှိနှင့် ဝန်ထမ်းများသည် အစားအသောက် နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေး အဖွဲ့တို့နှင့်အတူ ထားဝယ်မြို့ပေါ်ရှိ ကုန်စုံဆိုင်များအား စျေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

          အဆိုပါ စျေးကွက်စောင့်ကြည့်စစ်ဆေးရာတွင် စားသုံးသူပြည်သူများ‌ ဘေးအန္တရာယ်ကင်းရှင်းစွာ ဝယ်ယူသုံးစွဲနိုင်စေရေးအတွက် ဦးစားပေးကုန်စည်များမှ စစ်ဆေးရန်လျာထားသည့် အသင့်စား မုန့်အမျိူးမျိုး၊ သောက်ရေသန့်အမျိုးမျိူး၊  အချိုရည်အမျိုးမျိုးတို့အား စျေးကွက်အတွင်း ရောင်းချ လျက်ရှိရာ မြန်မာဘာသာနှင့်ဖြစ်စေ၊ အခြားဘာသာတစ်ခုခုနှင့်ဖြစ်စေတွဲလျက် ဖော်ပြထားသော ကုန်အညွှန်းအမှတ်အသားများပြည့်စုံမှန်ကန်စွာပါရှိမှုရှိ/မရှိစစ်ဆေးခြင်း၊ သက်တမ်းလွန်စားသောက် ကုန်ပစ္စည်းများ ရောင်းချနေမှုရှိ/မရှိ စစ်ဆေးခြင်း၊ သက်ဆိုင်ရာဌာနဆိုင်ရာများ၏ ထောက်ခံချက် များမပါရှိသော တရားမဝင်ကုန်ပစ္စည်းများ ရောင်းချမှုများ ရှိ/မရှိ စစ်ဆေးခြင်းများ ဆောင်ရွက်ခဲ့ ကြောင်း သိရှိရပါသည်။

DOCA(တနင်္သာရီ)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်း ဒေသကြီးဦးစီးမှူး၏ လမ်းညွှန်မှုဖြင့် စားသုံးသူရေးရာဌာနခွဲ တာဝန်ခံသည် (၁.၄.၂၀၂၅)ရက်နေ့ နံနက် (၁၀:၃၀)နာရီအချိန်တွင် မုံရွာမြို့၊ ရက်ကန်းသင်တန်းကျောင်း၌ ဖွင့်လှစ်သည့် အခြေခံ စက်ချုပ်သင်တန်း၌ အွန်လိုင်းစနစ်ဖြင့် ရောင်းချခြင်း၊ Online Sale လုပ်ငန်းများ မှတ်ပုံတင် လျှောက်ထားခြင်းဆိုင်ရာ  အသိပညာပေးဟောပြောခဲ့ပါသည်။

          အဆိုပါ  ဆွေးနွေးပွဲတွင် စားသုံးသူရေးရာဦးစီးဌာန၊ စားသုံးသူရေးရာဌာနခွဲ တာဝန်ခံ ဦးစီးအရာရှိ ဒေါ်အေးမြင့်ငြိမ်းသည် Online Sale လုပ်ငန်းများ မှတ်ပုံတင်လျှောက်ထားခြင်းနှင့် ပတ်သက်၍ ရှင်းလင်းပြောကြားခဲ့ရာ အွန်လိုင်းစနစ်ရောင်းချခြင်းလုပ်ငန်းကို  အရေးကြီး ဝန်ဆောင်မှု လုပ်ငန်းအဖြစ် သတ်မှတ်သည့် အမိန့်အကြောင်း၊ ကုန်စည်နှင့်ဝန်ဆောင်မှုလုပ်ငန်းကို အွန်လိုင်း စနစ်ဖြင့် အရောင်းအဝယ် လုပ်ကိုင်နေသူ မည်သူမဆို မှတ်ပုံတင်လျှောက်ထားရရှိပြီးမှသာ လုပ်ကိုင် ရမည်ဖြစ်ကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းကို ဆောင်ရွက်လိုသူများအနေဖြင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေး ဦးစီးဌာနက သတ်မှတ်ထားသော လျှောက်လွှာပုံစံများတွင် ဖြည့်သွင်းပြီး အွန်လိုင်း(Online)စနစ်ဖြင့် ဦးစီးဌာနသို့ လျှောက်ထားရမည် ဖြစ်ကြောင်း၊ အွန်လိုင်း(Online) မှတ်ပုံတင်လျှောက်ထားရာတွင် အမျိုးအစား (၂)မျိုးရှိပြီး အမျိုးအစား(၁) ကုမ္ပဏီ(သို့မဟုတ်) စီးပွားရေးအဖွဲ့အစည်းအတွက်ဖြစ်ပြီး၊ အမျိုးအစား (၂)မှာ လူပုဂ္ဂိုလ်တစ်ဦးချင်းအတွက် ဖြစ်ကြောင်း၊ မှတ်ပုံတင်လျှောက်ထားရာတွင် ပေးသွင်းရမည့် မှတ်ပုံတင်ကြေးများ၊ လိုအပ်သည့်အချက်အလက်များ၊ လိုက်နာဆောင်ရွက်ရမည့် စည်းကမ်း ချက်များ၊ သက်တမ်းတိုးကြေးများ၊ ပြင်ဆင်ချက် တစ်ချက်ပြင်ဆင်လိုလျှင် သတ်မှတ်ထားသည့် ပြင်ဆင်ကြေးများအကြောင်းနှင့် မှတ်ပုံတင်လက်မှတ်ရရှိထားပြီး ရောင်းချနေသူများအတွက် ရရှိ နိုင်မည့် အခွင့်အရေးများအကြောင်းတို့ကို စားသုံးသူပြည်သူ စုစုပေါင်း(၂၀)ဦး တို့အား အကျယ်တဝင့် ရှင်းလင်းပြောကြားခဲ့ကြောင်းနှင့် သိလိုသည်များ မေးမြန်းခြင်းကို ပြည်လည် ဖြေကြားပေးခဲ့ပြီး ဆောင်ရွက်ရမည့်အချက်များ၊ မှတ်ပုံတင်လက်မှတ်ရရှိသူ၏ အခွင့်အရေးနှင့် တာဝန်များ၊ Online မှတဆင့်ဝယ်ယူရာတွင် လိမ်လည်မှုမခံရအောင် သိရှိရမည့်အချက်များကို  ရှင်းလင်းဆွေးနွေး အသိ ပညာပေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီးအတွင်း ကုန်ဈေးနှုန်းတည်ငြိမ်ရေးအတွက် ရှေးရှု၍ နိုင်ငံတော်က နိုင်ငံခြားငွေ ရင်းနှီးထုတ်ပေး၍ ပြည်သူများ သက်သာသောဈေးနှုန်းဖြင့် စားအုန်းဆီများ ဝယ်ယူနိုင်ရေးတို့အတွက် တိုင်းဒေသကြီးအစိုးရအဖွဲ့က ဖွဲ့စည်းတာဝန်ပေးလိုက်သော စားအုန်းဆီ လိုက်လံရောင်းချသည့် ဈေးကား(၇)စီးအား ကြီးကြပ်ရသည့် ဝန်ထမ်းများနှင့် တွေဆုံမှာကြားခြင်းကို ၂၀၂၅ ခုနှစ်၊ ဧပြီလ (၂)ရက်နေ့ နေ့လယ်(၁၃:၃၀) အချိန်တွင် စားသုံးသူ ရေးရာဦးစီးဌာန၊ တိုင်းဒေသကြီးဦးစီးမှူးရုံးခန်း၌ ကျင်းပပြုလုပ်ခဲ့ပါသည်။

     တွေ့ဆုံခြင်းအခမ်းအနားတွင် တိုင်းဦးစီးမှူးက သတ်မှတ်ထားသော အရေအတွက်တိုင်း အမှန်တကယ် ရောင်းချရေး၊  သတ်မှတ်ရည်ညွှန်းဈေးထက် ပိုမိုရောင်းချခြင်းများ မရှိစေရေး၊ စနစ်တကျ ကြီးကြပ်ဆောင်ရွက်ရေးနှင့် အခြားအခက်အခဲများရှိပါက အကြံပြု တင်ပြနိုင်ရေး၊ ဝန်ကြီးချုပ်မှလည်း အလေးထားဆောင်ရွက်ရေး မှာကြားထားကြောင်း ပြောကြားခဲ့ပြီး တွေ့ဆုံမှုကို အောင်မြင်စွာ ပြီးမြောက်ခဲ့ကြောင်း သိရသည်။

DOCA(စစ်ကိုင်း)

      ဧရာဝတီတိုင်းဒေသကြီး၊ ဖျာပုံခရိုင် ၊ ဘိုကလေးမြို့နယ် စားသုံးသူရေးရာဦးစီးဌာနမှ ဌာနခွဲစာရေး ၊ ဒေါ်ကြည်ကြည်စိုး၊ တိုင်းရုံး သတင်းဌာနခွဲမှ ဦးမင်းမင်းဦး တို့သည် ၂၀၂၅ ခုနှစ်၊ ဧပြီလ ၂ ရက်နေ့တွင် ဘိုကလေးမြို့ (၃) ရပ်ကွက်ရှိ “ဂွတ်ရှယ်” သုံးထောင့်မုန့်လုပ်ငန်းသို့ MSMEs လုပ်ငန်းများ ဖွံ့ဖြိုးတိုးတက်ရေး ကွင်းဆင်းစစ်ဆေး ခဲ့ကြပါသည်။

    “ဂွတ်ရှယ်” သုံးထောင့်မုန့်လုပ်ငန်းမှ သုံးထောင့်မုန့်၊ အငံမုန့်၊ ပဲဖရုံမုန့်၊ လေးထောင့်မုန့်များ ထုတ်လုပ်လျက်ရှိပါသည်။ ပါဝင်ပစ္စည်းများမှာ ဂျုံ၊ သကြား၊ ကြက်သွန်၊ ကြက်ဥ၊ ကုလားပဲများ ပါဝင်၍ မုန့်တစ်ဘူးကို (၆) ခုဖြင့် တစ်နေ့လျှင် မုန့်ဘူး ၂၀၀ ထုတ်လုပ်ပြီး မုန့်တစ်ဘူးကို ၂၇၀၀ ကျပ်ဈေးနှုန်းဖြင့် ရောင်းချလျက်ရှိပါသည်။ လုပ်သားအင်အားအနေဖြင့် ၈ဦးရှိပြီး တစ်ဦးကို တစ်လလျှင်(စားစရိတ်ငြိမ်း) လုပ်ခ ၁၅၀၀၀၀ ကျပ် ပေးရပြီး ဈေးကွက်အနေဖြင့် ဘိုကလေးမြို့ပေါ်ရှိ မုန့်ဆိုင်များနှင့် ဖျာပုံ၊ ‌မော်ကျွန်း၊ကဒုံဧရာ၊ စက်စုကျေးရွာများသို့ ဖြန့်ဖြူးရောင်းချလျက်ရှိပါသည်။

    စားသုံးသူရေးရာဦးစီးဌာန အနေဖြင့် ထုတ်လုပ်သော ကုန်စည်များ ဘေးအန္တရာယ် ကင်းရှင်းစေရေး၊ထုတ်ကုန်လုံခြုံစိတ်ချရမှုရှိစေရေး၊ အရည်အသွေး ပြည့်မီသော ထုတ်ကုန်များ ထုတ်လုပ်နိုင်ရေးနှင့် ထုတ်လုပ်သော ကုန်ပစ္စည်းများ အပေါ်တွင်  သတ်မှတ်ထားသော ကုန်အညွှန်းအမှတ်အသားများ ပြည့်စုံစွာ ဖော်ပြရန်နှင့် အသေးစား MSMEs လုပ်ငန်းများ ဖွံ့ဖြိုး တိုးတက်ရေး အလေးထားဆောင်ရွက်ရန် အသိပညာပေး‌ ဆွေးနွေးပြောကြားခဲ့ပါသည်။

DOCA(ဧရာဝတီ)