သတင်းနှင့် လှုပ်ရှားမှုများ

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ စက်ရုံ/ အလုပ်ရုံများသို့ စားသုံးသူကာကွယ်ရေးဥပဒေအား သိရှိလိုက်နာဆောင်ရွက်နိုင်ရန် လက်ထောက်ညွှန်ကြားရေးမှူး ဒေါ်ဖြူသဲနွယ်ဦးဆောင်သည့် စစ်ဆေးရေးအရာရှိများသည် (၉-၁၀-၂၀၂၄) ရက်နေ့တွင် ရှမ်းကြီးလက်ဖက်နှင့်ပဲကြော်လုပ်ငန်းသို့  အသိပညာပေးဟောပြောခြင်းနှင့် ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

          ရှမ်းကြီးလက်ဖက်နှင့်ပဲကြော်လုပ်ငန်းစက်ရုံသို့ သွားရောက်ကွင်းဆင်းစစ်ဆေးခဲ့ပြီး ကုန်အညွှန်းအမှတ်အသားပြည့်စုံစွာပါရှိရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအား သိရှိလိုက်နာဆောင်ရွက်ရန်နှင့် စီးပွားရေးလုပ်ငန်းရှင်ဖြစ်နေသော်လည်း အခြားတစ်ဖက်တွင် စားသုံးသူဖြစ်နေကြောင်း၊ စားသုံးသူ၏အခွင့်အရေးနှင့် တာဝန်များအားလည်းသိရှိ၍ နစ်နာဆုံးရှုံးမှုများရှိပါက စားသုံးသူအခွင့်အရေးများကိုတောင်းဆိုနိုင်ကြောင်း၊ သန့်ရှင်းလတ်ဆတ်သော ကုန်ပစ္စည်းများကိုထုတ်လုပ်သွားရန်နှင့် ဥပဒေအား လိုက်နာဆောင်ရွက်သွားရန် အသိပညာပေးခဲ့ပါသည်။

          ဆက်လက်၍ ရှမ်းကြီးလက်ဖက်နှင့်ပဲကြော်လုပ်ငန်းစက်ရုံရှိ ဝန်ထမ်းများအား စားသုံးသူကာကွယ်ရေးအသိပညာများဟောပြောဆွေးနွေးခဲ့ပြီး နစ်နာဆုံးရှုံးမှုများရှိပါက Consumer Call Center 1535 မှတစ်ဆင့် တိုင်ကြားနိုင်ကြောင်းနှင့် အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မန္တလေး)

    အထက်အကြီးအကဲကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ဗိုလ်တထောင်မြို့နယ်ပြည် သူ့ကျန်းမာရေးဦးစီးဌာနမှ ဒေါက်တာဟေမာဇော်တို့နှင့် ပူးပေါင်း၍ ၉.၁၀.၂၀၂၄ ရက်နေ့၊နေ့လယ် (၁၂:၃၀) နာရီတွင်  အမှတ် (၄၅)၊ လမ်း(၅၀)အောက်ဘလောက်ရှိ KMT Co., Ltd ရှိ ဆေး နှင့်ဆေးပစ္စည်းများကိုစစ်ဆေးရန်   တာဝန်ခံနှင့်သွားရောက်တွေ့ဆုံ၍ စစ်ဆေးမှုများပြု လုပ်ခဲ့ကြောင်း သိရှိရပါသည်။

    ထိုသို့စစ်ဆေးရာတွင် ကုမ္ပဏီသည် လက်ရှိကာလတွင်ဆေးဝါး(၆)မျိုးတည်းကိုသာ ပြည်ပမှ မှာယူတင်သွင်းဖြန့်ချိကြောင်း၊ ပစ္စည်းပြတ်လပ်မှုမရှိပါကြောင်း ဖြေကြားခဲ့ပြီး ဖြစ်သင့်ဖြစ်ထိုက်သည့်‌ ဈေးနှုန်းထက်ဈေးနှုန်းမြှင့်တင်ရောင်းချမှုကို စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူခံရမည်ဖြစ်ကြောင်း အသိပညာပေးပြောကြားခဲ့ကြောင်း သတင်းရရှိပါသည်။

DOCA(ရန်ကုန်)

          စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြောင်းမြခရိုင်၊ လပွတ္တာမြို့နယ်တာဝန်ခံဦးမြင့်ဌေးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့၊ ပြည်သူ့ကျန်းမာရေးအဖွဲ့၊ တိုင်းရင်းဆေးပညာဦးစီးဌာနတို့နှင့် ပူးပေါင်း၍ (၈.၁၀.၂၀၂၄) ရက်နေ့ နံနက် (၁၀:၃၀)အချိန်တွင် လပွတ္တာမြို့ပေါ်ရှိ  ဆေးဆိုင်များအား ဆေးဝါးပြတ်လပ်မှုရှိ/ မရှိနှင့် ဈေးနှုန်းအခြေအနေများအားကွင်းဆင်း စစ်ဆေးဆောင်ရွက်ခဲ့ပါသည်။

           ထိုသို့ကွင်းဆင်းစစ်ဆေးဆောင်ရွက်ရာတွင် မြို့နယ်တာဝန်ခံမှ လပွတ္တာမြို့ပေါ်ရှိ ဆေးဆိုင်ပိုင်ရှင်များအား ဆေးဆိုင်တွင်ရောင်းချနေသော ဆေးနှင့်ဆေးဝါးပစ္စည်းများကို စစ်ဆေးခဲ့ရာ ရောင်းချနေသောဆေးဝါးများကို ရန်ကုန်မြို့တွင်ရှိသောဆေးဝါးကုမ္ပဏီများမှဝယ်ယူရရှိပြီး ယခင်ဈေးနှုန်းများထက်(၅)ရာခိုင်နှုန်းခန့်သာ အနည်းငယ်မြင့်တက်ကြောင်းနှင့်ဝယ်ယူသူများ အနေဖြင့်ဆေးဝါးပြတ်လပ်မှုမရှိစေဘဲ မိမိတို့လိုအပ်လျှက်ရှိသောဆေးဝါးများကို အခက်အခဲမရှိဝယ်ယူရရှိနိုင်ကြောင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် ဆေးသိုလှောင်ထားရှိခြင်းများ စစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း ဆေးဆိုင်ပိုင်ရှင်များအား ရှင်းလင်းပြောကြားခဲ့ကြောင်း သိရှိရပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် (၉-၁၀-၂၀၂၄) ရက်နေ့၊ နေ့လယ်(၁၁:၀၀)နာရီအချိန်တွင် တိုင်းရင်းဆေးအမျိုးမျိုးအား ကွင်းဆင်း စစ်ဆေးမှုများ ဆောင်ရွက်ခဲ့ကြောင်းသိရှိရပါသည်။

        ထိုသို့ဆောင်ရွက်ရာတွင် သင်္ဃန်းကျွန်းမြို့နယ်၊ လေးထောင့်ကန်လမ်းမပေါ်ရှိ ဆေးဆိုင် (၅)ဆိုင်ရှိ အင်္ဂလိပ်အပါအဝင် တိုင်းရင်းဆေးအမျိုးမျိုးဖြစ်သော ဝါယောအဓိက၊ မှန်ချို၊ ဧကမ္ဘာ၊ ဦးအံ့၊ ရှမ်းပျိုမယ်သွေးဆေး၊ ဂြိုလ်ထု ဝမ်းနှုတ်ဆေး၊ ရွှေ(ခရမ်းဦးချစ်)နှလုံးအားဆေး၊ မဟာဖြေဆေး၊ ဆန္ဒမွန်၊ ထက်လင်းရင်လူးဆေး၊ မိဂသီ / ထွန်းရွှေဝါဒါဏ်ကြေလိမ်းဆေး၊ အစရှိသောဆေးများတွင် ကုန်အညွှန်းအမှတ်အသားပြဌာန်းခြင်းဆိုင်ရာ ဖော်ပြရမည့်အချက်များ ပြည့်စုံစွာပါရှိသည်ကို တွေ့ရှိရပြီး ခရိုင်ဦးစီးမှူးမှ ကုန်အညွှန်းအမှတ်အသားပြည့်စုံသော တိုင်းရင်းဆေးဝါးများကိုသာရောင်းချပေးရန်နှင့် စပ်ဆေးများရောင်းချခြင်းမပြုရန် အသိပညာပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

        ၉-၁၀-၂၀၂၄ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးနှင့် ဝန်ထမ်းများသည် မော်လမြိုင်ခရိုင်၊ မော်လမြိုင်မြို့နယ်၊ ဖက်ခင်းရပ်ကွက်ရှိ K - Mart သို့သွားရောက်၍ ငရုတ်ဆီနှင့်အချဉ်ရည်အမျိုးမျိုးတို့အား ဈေးကွက်စောင့်ကြည့်စစ်ဆေးခြင်းများပြုလုပ်ခဲ့ပါသည်။

       ထိုသို့ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချနေသော ငရုတ်ဆီနှင့်အချဉ်ရည်အမျိုးမျိုးတို့တွင် ကုန်အညွှန်းအမှတ်အသားပြည့်စုံမှန်ကန်စွာဖော်ပြထားမှုရှိ/ မရှိကို ကွင်းဆင်းစစ်ဆေးခဲ့ရာ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/ ၂၀၁၉) နှင့်အညီ ကုန်အညွှန်းအမှတ်အသားကို မြန်မာဘာသာဖြင့် ပြည့်စုံမှန်ကန်စွာဖော်ပြထားကြောင်းကိုစစ်ဆေးတွေ့ရှိရပြီး၊  ဆိုင်ရှင်အား စီးပွားရေးလုပ်ငန်းရှင်များ လိုက်နာရမည့်အချက်များနှင့် စားသုံးသူများ ဘေးအန္တရာယ်ကင်းသော အစားအသောက်များသာရောင်းချရန်  အသိပေးပြောကြားခဲ့ကြောင်းသိရှိရပါသည်။

DOCA(မွန်)