သတင်းနှင့် လှုပ်ရှားမှုများ

  ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ် ဘုရားကြီးကုန်းအုပ်စု၊ အနောက်ဘုရားကြီးကုန်းကျေးရွာ၌  ချမ်းချမ်းတံဆိပ်ဖြင့် ခါဂျာမုန့်လုပ်ငန်းကိုင်နေသော လုပ်ငန်းရှင် ဦးကျော်ရွှေသိန်းနှင့်စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်ရီရီရှိန်သည် (၁၀.၁၁.၂၀၂၅) ရက်နေ့တွင် ချမ်းချမ်းခါဂျာမုန့်လုပ်ငန်းအား ထုတ်လုပ်မှုအခြေအနေနှင့် ဈေးကွက်အခြေအနေ တို့အားသွားရောက်တွေ့ဆုံမေးမြန်းခဲ့ပါသည်။

          ချမ်းချမ်းခါဂျာမုန့်လုပ်ငန်းအား အိမ်တွင်းမိသားစု တစ်နိုင်တစ်ပိုင် လုပ်ကိုင်ခဲ့တာ(၁၀)နှစ်ခန့် ရှိပြီးဖြစ်ကြောင်း ခါဂျာမုန့်များပြုလုပ်ရာတွင် အဓိကပါဝင်ပစ္စည်းကုန်ကြမ်းများကတော့ ဂျုံ၊သကြား၊ ဆားအနည်းငယ် ရေတို့ဖြစ်ပြီး၊ထုတ်လုပ်မှု့ကတော့ တစ်နေ့လျှင် ဂျုံ(၅)ပိဿာကုန်ကြောင်း ၎င်းဂျုံကို ရေအနည်းငယ်၊ဆားအနည်းငယ်တို့ဖြင့် နှဲပြီး ပုံစံခွက်စက်ကလေးဖြင့် ဂျုံအပြားရိုက်ပြီး လိုအပ်သည့်အရွယ်အစားများ ပြုလုပ်၍ ဒယ်ပိုင်းထဲသို့ ဆီအချိန်(၃၀)ပိဿာနှင့် ထောပတ်ဆီအနည်း ငယ်ထည့်ပြီး လုပ်ပြီးသားမုန့်ပုံစံများအား ထည့်ကြော်ပြီး ဆီစစ်ဇကာထဲသို့ စစ်ထား၍ မုန့်ချပ်များအား ဖြန့်ခင်းကာ မုန့်ချပ်များပေါ်တွင် ကျိုထားသောသကြားရည်ပျစ်ပျစ်ကို လောင်းထည့်ပြီး ဗန်းဖြင့်ဖြန့် အအေးခံပေးရပါသည်။ရရှိလာသောမုန့်ချပ်ကလေးများကို (၅)ခုစီ ပလပ်စတစ်အိတ်ထဲတွင် တံဆိပ်ပါ ထည့်ပြီး ထုတ်ပိုးရပါသည်။

          တစ်နေ့ဂျုံ(၅)ပိဿာကြော်လျှင် အထုတ်ရေ (၁၄၀၀)ခန့်ရရှိကြောင်း တစ်ထုတ်လျှင် ၅၀၀ ရောင်းချရပါကြောင်း၊ဖောက်သည်ဈေး (၄၀၀) ကျပ်ပေးရကြောင်း၊ဈေးကွက်အနေဖြင့် ကြို့ပင် ကောက်မြို့ပေါ် နတ်တလင်း၊ပေါင်းတည်၊ဇီးကုန်းမြို့များသို့ ပေးပို့ရောင်းချရပါကြောင်း အလှူ အတန်းရှိလျှင်လည်း ခါဂျာမုန့်များကို မှာယူကြောင်းလည်း သိရပါသည်။

          ချမ်းချမ်းတံဆိပ်ခါဂျာမုန့်ထုတ်လုပ်သည့် လုပ်ငန်းရှင်အား စားသုံးသူကာကွယ်ရေးဥပဒေပါ ကုန်စည်ထုတ်လုပ်သည့်အခါ ကုန်အညွှန်းအမှတ်အသားများ ပြည့်စုံစွာပါရှိမှသာ ဈေးကွက်အတွင်း ရောင်းချရန်ဆွေးနွေးခဲ့ပြီး ကုန်အညွှန်းအမှတ်အသားများ ပြုလုပ်လိုလျှင် စားသုံးသူရေးရာ မြို့နယ်တာဝန်ခံရုံး၌ လာရောက်လျှောက်ထားနိုင်ကြောင်း ထုတ်ကုန်လုံခြုံစိတ်ချရမှု့ ရှိစေရေး ကွင်းဆင်းဆောင်ရွက်ခဲ့ပါသည်။

DOCA(ပဲခူး)

      စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းသော စားသုံးဆီများကို သင့်တင့်သောဈေးနှုန်းဖြင့်  ဝယ်ယူစားသုံးနိုင်စေရန်နှင့် ပြည်တွင်းလိုအပ် ချက်များကိုဖြည့်ဆည်းပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ဆောင်ရွက်ပေးလျက်ရှိ ကြောင်းသိရပါသည်။

          ပြည်တွင်းလိုအပ်ချက်ကိုဖြည့်ဆည်းပေးနိုင်ရေးစားအုန်းဆီကို ပြည်ပမှဝယ်ယူတင်သွင်း ရာတွင် စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်လျက်ရှိသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့် ဈေးနှုန်းဖြစ်ပေါ် မှုများအရ ၂၀၂၅ခုနှစ်၊ နိုဝင်ဘာလ  ၂၁ ရက်နေ့မှ ၂၇ ရက်နေ့အထိ ရန်ကုန်အထိုင်ဈေးအခြေခံ လက်ကားရည်ညွှန်းဈေးနှုန်းမှာစားအုန်းဆီတစ်ပိဿာလျှင် ငွေကျပ်၆,၃30 ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက အသိပေး ထုတ်ပြန်ကြေညာထားကြောင်း သိရှိရပါ​သည်။      

          ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက်   ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ကြောင်း သိရှိရသည်။

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ်ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

  စားသုံးသူရေးရာဦးစီးဌာနသည် မိတ်ဖက်ဌာနများနှင့်ပူးပေါင်း၍ စားသုံးသူပြည်သူများ ကုန်စည်နှင့် ဝန်ဆောင်မှုများသုံးစွဲရာတွင် ဘေးအန္တရာယ်ကင်းရှင်းစေရန်အတွက် ဈေးများ၊ ကုန်ပစ္စည်း အရောင်းဆိုင်များအား ကွင်းဆင်းစစ်ဆေးဆောင်ရွက်လျှက်ရှိရာ ၂၀၂၅ ခုနှစ်၊ နိုဝင်ဘာလ ၁၁ ရက်နေ့တွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးရှိ ဒု-ခရိုင်ဦးစီးမှူး ဦးမင်းဇော်၊ ဦးနေစိုးထက်၊ ဒုဦးစီးမှူးတို့သည် တောင်ငူခရိုင်အစားအသောက်နှင့် ဆေးဝါးကြီးကြပ်ကွပ်ကဲရေး ဦးစီးဌာန၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ တောင်ငူမြို့နယ်၊ ကေတုမတီမြို့အတွင်းရှိ ဆေးဆိုင်များအား ကွင်းဆင်းစစ်ဆေးဆောင်ရွက်ခဲ့ပါသည်။ အစားအသောက်နှင့်ဆေးဝါးကြီးကြပ်ကွပ်ကဲရေးဦးစီးဌာနမှ တောင်ငူမြို့နယ်၊ ကေတုမတီမြို့ အတွင်းရှိ ဆေးနှင့်ဆေးပစ္စည်းအရောင်းဆိုင်မျာတွင် တရားမဝင်ဆေးဝါးများရောင်းချမှုရှိ/မရှိ စစ်ဆေးခဲ့ပြီး တောင်ငူခရိုင် စားသုံးသူရေးရာဦးစီးဌာန၊ ဒု-ခရိုင်ဦးစီးမှူးမှ ဆေးနှင့်ဆေးပစ္စည်း အရောင်းဆိုင်များရှိ ဆရာဝန်ညွှန်ကြားချက် မလိုသော ဆေးဝါးများအားစစ်ဆေးခဲ့ပြီး ဆေးဈေးနှုန်း၊ ဆေးဝါးပြတ်လပ်မှုအခြေအနေ၊ ဆေးဝယ်ယူမှု အခြေအနေတို့အား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ပဲခူး)

  ပဲခူးတိုင်းဒေသကြီးစားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဝန်ထမ်းများသည် (၁၁.၁၁.၂၀၂၅)ရက်နေ့ နံနက် (၁၀:၀၀)နာရီအချိန်တွင် ပဲခူးမြို့ကတွင်းခြံ၊ အခြေခံပညာ အထက်တန်းကျောင်းခွဲသို့ သွားရောက်၍ စားသုံးသူကာကွယ်ပေးရေး အသိပညာပေး‌ဟောပြောပွဲ ပြုလုပ်ခဲ့ရာ တိုင်းဒေသကြီးဦးစီးမှူးရုံးမှ ဒေါ်ခိုင်ဇာနည်၊ အငယ်တန်းစာရေးမှ စားသုံးသူကာကွယ် ပေးရေးသမိုင်းကြောင်းကိုလည်ကောင်း၊ ဦးညီသူရဇော်၊ အငယ်တန်းစာရေးမှ စားသုံးသူအခွင့် အရေးနှင့် လိုက်နာရမည့် တာဝန်ဝတ္တရားများကိုလည်ကောင်း ၊ ဒေါ်ရွှေစင်လှိုင်၊ အငယ်တန်းစာရေးမှ အစားအသောက်နှင့်ပတ်သတ်၍ သိရှိသိထိုက်သည့် ဗဟုသုတများကိုလည်းကောင်း ၊ ဦးသန်းဇော် ဒုကြီးကြပ်ရေးမှူးမှ ကုန်အညွှန်းအမှတ်အသား ကုန်စည်ဝန်ဆောင်မှု၊ Online Shopဝယ်ယူ သုံးစွဲခြင်းဆိုင်ရာများအား အသီးသီးပညာပေးခြင်းများ ဆောင်ရွက်ခဲ့ရာ ဆရာ၊ ဆရာမ (၂၇)ဦး၊ ကျောင်းသား/ကျောင်းသူ(၂၇၅)ဦး တက်ရောက်ခဲ့ကြောင်း သိရှိရပါသည်။

          အဆိုပါ ဟောပြောပွဲသို့ ကျောင်းသား/ကျောင်းသူများအား စားသုံးသူကာကွယ်ပေးရေးနှင့် ပတ်သတ်၍ အသိပညာများ ပြန်လည်မေးမြန်းဆွေးနွေးခဲ့ရာ ဆုရကျောင်းသား/ ကျောင်းသူများအား ဆုပေးခြင်းများလည်း ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

        စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် (၁၃.၁၁.၂၀၂၅) ရက်နေ့ နေ့လယ်(၁၂:၃၀)နာရီအချိန်တွင် လူပျိုကြီးဂျပန်ကျပစ္စည်းအမည်ဖြင့် အွန်လိုင်းရောင်းချမှုနှင့် စပ်လျဉ်း၍ မှတ်ပုံတင်လျှောက်ထားသည့် အမှတ်(က/၃)၊ အိမ်အမှတ်(A-1)၊ ရွာမအရှေ့ရပ်ကွက်၊ အင်းစိန်မြို့နယ်ရှိ အွန်လိုင်းလုပ်ငန်းအား မြေပြင်စစ်ဆေးဆောင် ရွက်ခဲ့ပါသည်။

        ထိုသို့ဆောင်ရွက်ရာတွင် အွန်လိုင်းမှတ်ပုံတင်စနစ်တွင် မှတ်ပုံတင်ထားရှိသည့် အချက်အလက်များအား မြေပြင်စစ်ဆေးရာတွင် ကိုက်ညီမှုများရှိ/ မရှိနှင့် အခြားလိုအပ်သည့်အချက် အလက်များအား ပြည့်စုံမှန်ကန်မှုရှိ/ မရှိအား DOCA Application အသုံးပြု၍ စစ်ဆေးခြင်းနှင့် စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်များ လိုက်နာရမည့်တာဝန်များအကြောင်း အခန်း(၁၁)ပါ ကုန်စည်နှင့် စပ်လျဉ်း၍ အာမခံချက်ပေးခြင်းဆိုင်ရာ အချက်အလက်များအကြောင်း ဆွေးနွေးပြောကြားခဲ့ကြောင်း သိရှိရပါသည်။

DOCA (ရန်ကုန်)