သတင်းနှင့် လှုပ်ရှားမှုများ

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ နေပြည်တော် ဦးစီးမှူး၏လမ်းညွှန်ချက်ဖြင့် စားသုံးသူအခွင့်အရေးများနှင့် လုပ်ငန်းတာဝန်များအကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းများနှင့်စပ်လျဉ်း၍ အသိပညာပေး ရှင်းလင်းပြောကြားဆွေးနွေးခြင်းကို ဦးတင်စိုးနိုင်(ဒု-ဦးစီးမှူး)သည် (၆-၉-၂၀၂၄)ရက်နေ့၊ နံနက်(၁၀:၃၀) နာရီအချိန်တွင်  ပုဗ္ဗသီရိမြို့နယ်၊ ရွာတော်မင်္ဂလာဈေးတွင်လည်းကောင်း၊ ဦးမြင့်နိုင်(ဦးစီးအရာရှိ)သည် (၁၁-၉-၂၀၂၄)ရက်နေ့၊ နံနက် (၁၀:၀၀) နာရီအချိန်တွင် ပျဉ်းမနားမြို့နယ်၊ အခြေခံပညာအထက်တန်းကျောင်း ၊ အ-ထ-က(၂)တွင် လည်းကောင်း ဒေါ်အေးမြတ်သူ(လက်ထောက်ညွှန်ကြားရေးမှူး)သည် (၂၃-၉-၂၀၂၄)ရက်နေ့၊ နံနက် (၁၀:၃၀)နာရီအချိန်တွင်  လယ်ဝေးမြို့နယ်၊ သီရိရတနာမြို့မဈေးနှင့်(၃၀-၉-၂၀၂၄)ရက်နေ့၊ နံနက် (၁၀:၃၀) နာရီအချိန်တွင်  ဒက္ခိဏသီရိမြို့နယ်၊ ဒက္ခိဏသီရိဈေးတို့တွင်  လည်းကောင်း အသီးသီး အသိပညာပေး ဆွေးနွေးပြောကြားခဲ့ပါသည်။

   အဆိုပါဆွေးနွေးပွဲများတွင် စားသုံးသူအခွင့်အ‌ရေးများနှင့် လုပ်ငန်းတာဝန်များအကြောင်း၊ စီးပွားရေးလုပ်ငန်းရှင်များ လိုက်နာရမည့်အချက်များ၊  ထုတ်လုပ်ဖြန့်ဖြူးရောင်းချရာတွင် ဖော်ပြရ မည့် ကုန်အညွှန်းအမှတ်အသားများနှင့်စပ်လျဉ်း၍ သော်လည်းကောင်း  Online Sale လုပ်ငန်းများ မှတ်ပုံတင်လျှောက်ထားခြင်းနှင့်ပတ်သက်၍ ရှင်းလင်းပြောကြားဆွေးနွေးခဲ့ရာ အွန်လိုင်းစနစ်ဖြင့် ရောင်းချခြင်းလုပ်ငန်းကို  အရေးကြီးဝန်ဆောင်မှုလုပ်ငန်းအဖြစ်သတ်မှတ်ခဲ့ပါကြောင်း၊ ကုန်စည်နှင့် ဝန်ဆောင်မှုလုပ်ငန်းကို Website တည်ထောင်၍‌ရောင်းချသူများ၊ Social media URL မှ ရောင်းချ သူများ(Facebook၊ Instagram၊  tiktok၊  etc…… )နှင့် Mobile Application တို့တွင် ကုန်စည်နှင့် ဝန်ဆောင်မှုလုပ်ငန်းလုပ်ကိုင်/ရောင်းချသူမည်သူမဆို မှတ်ပုံတင်လျှောက်ထားရရှိပြီးမှသာ လုပ်ကိုင်/ ရောင်းချရမည်ဖြစ်ကြောင်း၊ မှတ်ပုံတင်လျှောက်ထားရာတွင် www.ecomreg.gov.mm မှတဆင့် အွန်လိုင်းစနစ်ဖြင့် လျှောက်ထားရမည်ဖြစ်ပြီး ငွေပေးချေရာတွင်လည်း အွန်လိုင်းစနစ်ဖြင့်သာ ပေးသွင်းရမည်ဖြစ်ပါကြောင်း၊ အွန်လိုင်း(Online) မှတ်ပုံတင်လျှောက်ထားရာတွင် အမျိုးအစား(၂)မျိုး ရှိရာ (၁) ကုမ္ပဏီ(သို့မဟုတ်)စီးပွားရေးအဖွဲ့အစည်းအတွက်ဖြစ်ပြီး၊ (၂) လူပုဂ္ဂိုလ်တစ်ဦးချင်းအတွက်ဖြစ်ကြောင်း၊ မှတ်ပုံတင်လျှောက်ထားရာတွင် ပေးသွင်းရမည့် မှတ်ပုံတင်ကြေးများ၊ သက်တမ်းတိုးကြေးများ၊ လိုအပ်သည့်အချက်အလက်များ၊ လိုက်နာဆောင်ရွက်ရမည့် စည်းကမ်းချက်များ၊ ပြင်ဆင်ချက်တစ်ချက်ပြင်ဆင်လိုလျှင် သတ်မှတ်ထားသည့် ပြင်ဆင်ကြေးများအကြောင်းနှင့် မှတ်ပုံတင်လက်မှတ်ရရှိထားပြီး ရောင်းချနေသူများအတွက် ရရှိနိုင်မည့် အခွင့်အရေးများအကြောင်း အကျယ်တဝင့် ရှင်းလင်းပြောကြားခဲ့ပါကြောင်း သိရှိရပါသည်။

DOCA(ပြည်ထောင်စုနယ်မြေ)

    ၃၀.၉.၂၀၂၄ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ သထုံခရိုင်၊ စားသုံးသူရေးရာဦးစီးဌာန၊ သထုံခရိုင်ဦးစီးမှူးရုံး၌ သထုံခရိုင်ရုံးဝန်ထမ်းများအား စစ်ဆေးရေးအရာရှိများ လုပ်ငန်းကျွမ်းကျင်မှုဆိုင်ရာ သင်တန်း(မွမ်းမံ) ၁/၂၀၂၄ ကို ဆင့်ပွားကျင်းပ ပြုလုပ်ခဲ့ပါသည်။

    စစ်ဆေးရေးအရာရှိများ လုပ်ငန်းကျွမ်းကျင်မှုဆိုင်ရာ အလုပ်ရုံဆွေးနွေးပွဲ(မွမ်းမံ) ၁/၂၀၂၄ တက်ရောက်ခဲ့သော ဦးစီးအရာရှိ ဦးအောင်ကျော်မင်းက စားသုံးသူကာကွယ်ရေးဥပဒေနှင့် နည်းဥပဒေများ၊ အွန်လိုင်းစနစ်ဖြင့်ရောင်းချခြင်းလုပ်ငန်းများနှင့် စပ်လျဉ်းသည့် အကြောင်းအရာများ၊ မြန်မာနိုင်ငံစားသုံးသူကာကွယ်ရေးကော်မရှင်များအကြောင်း၊ ကုန်သွယ်ရေး၊ မူပိုင်ခွင့်၊ အရေးကြီးကုန်စည်နှင့် ဝန်ဆောင်မှုဥပဒေ၊ FDA၊ Labelling of Goods အကြောင်းအရာများနှင့် စားသုံးသူအခွင့်အရေး (၈) ချက်၊ စစ်ဆေးရေးအရာရှိများ၏ လုပ်ငန်းတာဝန် (၁၁) ချက်နှင့် ဝန်ထမ်းအပေါ်အကဲဖြတ်ချက် (၁၀) ချက်၏ အတိုကောက်မှတ်သားနည်းများအား ဆွေးနွေးပြောကြားပြီး ဒုတိယဦးစီးမှူး ဦးစည်သူမှ သတင်းအချက်အလက်နှင့် အရည်အသွေး စီမံခန့်ခွဲမှုဘာသာရပ်အား ဆွေးနွေးပြောကြားခဲ့ပါသည်။

     အဆိုပါသင်တန်းသို့ စားသုံးသူရေးရာဦးစီးဌာန၊ သထုံခရိုင်မှ သင်တန်းသား၊ သင်တန်းသူ (၉) ဦးတက်ရောက်ခဲ့ပါကြောင်း သိရပါသည်။

DOCA(မွန်)

       ၂.၁၀.၂၀၂၄ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူရေးရာ ဦးစီးဌာန၊ ချောင်းဆုံမြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ချောင်းဆုံမြို့နယ်၊ အ.မ.က (စော်ကဲတောင်) ကျောင်း၌ စားသုံးသူကာကွယ်ရေး အသိပညာပေး ဟောပြောပွဲကျင်းပခဲ့ကြောင်း သိရှိရပါသည်။

    အဆိုပါ ဟောပြောပွဲတွင် ကျောင်းအုပ်ဆရာမကြီး ဒေါ်နော်ဝါဝါလင်းက အဖွင့်အမှာစကားပြောကြားပြီး စားသုံးသူရေးရာဦးစီးဌာနမှ ချောင်းဆုံမြို့နယ်တာဝန်ခံဒေါ်ထက်ထက်နွေဦးက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေး ဥပဒေ၊ စားသုံးသူအခွင့်အရေး (၈) ချက်နှင့် စားသုံးသူများလိုက်နာရမည့်တာဝန်များ၊ ကုန်စည်တစ်ခုကို ဝယ်ယူမည်ဆိုပါက စစ်ဆေးကြည့်ရှုရမည့် ကုန်အညွှန်းအမှတ်အသားပါ အချက်အလက်များ၊ စားသုံးသူများ နစ်နာဆုံးရှုံးမှုများပေါ်ပေါက်လာပါက တိုင်ကြားနိုင်သည့်နေရာ၊ Consumer Call Center (1535) သို့ဖုန်းခေါ်ဆို၍လည်း တိုင်ကြားနိုင်ကြောင်း၊ www.doca.gov.mm တွင်လည်းဝင်ရောက် တိုင်ကြားနိုင်ကြောင်း ဟောပြောဆွေးနွေးပြီး ဌာန၏လက်ကမ်းစာစောင်များ ဖြန့်ဝေပေးအပ်ခဲ့ကြောင်း သိရှိရပါသည်။

          အဆိုပါ ဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၈၆) ဦး တက်ရောက်ခဲ့ကြောင်း သိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်အရ လက်ရှိရာသီဥတုအခြေအနေများကြောင့် တိုင်းအတွင်းရှိ စားသုံးသူပြည်သူများ စားနပ်ရိက္ခာဖူလုံစေရေးနှင့် ကုန်ဈေးနှုန်းကြီးမြင့်မှုမဖြစ်ပေါ်စေရေးတို့အတွက် တိုင်းဒေသကြီးတချို့မှထွက်ရှိသည့် စားသောက်ကုန်များ၊  ရန်ကုန်တိုင်း‌ဒေသကြီးအတွင်းမှထွက်ရှိသော  ကုန်စည်များနှင့် တိုင်းပြင်ပမှ ဝင်ရောက်နေသည့် ကုန်စည်များ၏ နေ့စဉ်ဖြစ်ပေါ်နေသည့် ကုန်ဈေးနှုန်းအခြေအနေများကို စာရင်းကောက်ယူလျက်ရှိကြောင်းသိရှိရပါသည်။

      အဆိုပါစာရင်းကောက်ယူရာတွင် (၂-၁၀-၂၀၂၄)ရက်နေ့တွင် ဖြစ်ပေါ်လျက်ရှိသည့် ပုဇွန်တောင်ဈေးကွက်အတွင်းရှိ အခြေခံစားသောက်ကုန်ဈေးနှုန်းများကို အရှေပိုင်းခရိုင်၊ စားသုံးသူရေးရာဦးစီးဌာနမှ ဦးမင်းမင်းစိုး(ဌာနခွဲစာရေး)သည် ဈေးစည်ပင်သာယာရေးကော်မတီတို့နှင့်အတူ ပုဇွန်တောင်ဈေးအတွင်းရှိ အသားငါး၊ ဆန်၊ ဆီနှင့် ငါးပိ/ငါးခြောက်ပစ္စည်းအမျိုးမျိူးဈေးနှုန်းစာရင်းများကိုကောက်ယူခဲ့ရာ ဈေးအတက်/အကျမရှိဘဲ ဈေးငြိမ်လျက်ရှိကြောင်းသိရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ ညွှန်ကြားချက်အရ သာကေတမြို့နယ် အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး၊ စားသုံးသူရေးရာဦးစီးဌာနမှ အရှေ့ပိုင်းခရိုင်ဦးစီးမှူး၊ မြန်မာ့ဆိပ်ကမ်းအာဏာပိုင်မှ ကြီးကြပ်ရေးမှူး၊ အမှတ်(၃) ရေကြောင်းရဲကွက်ကဲမှုအဖွဲ့ခွဲမှ ရဲမှူး၊ ကုန်သွယ်ရေးဦးစီးဌာနမှ လက်ထောက်ညွှန်ကြားရေးမှူးနှင့် အကောက်ခွန်ဦးစီးဌာနမှ ဒု-အကောက်ခွန်မှူးတို့ပါဝင်သော အဖွဲ့များသည် ၂-၁၀-၂၀၂၄ ရက်နေ့၊ နံနက် (၁၀:၀၀)နာရီအချိန်တွင် သာကေတမြို့နယ် ( ယုဇန ) ဆိပ်ကမ်းအား ပုံမှန်သွားရောက်စစ်ဆေးလျက်ရှိကြောင်းသိရှိရပါသည်။

          ထိုသို့စစ်ဆေးရာတွင်  (ရန်ကုန်မှ ကော့သောင်း) သို့ထွက်ခွာမည့် ကမ်းရိုးတန်းသင်္ဘောဖြစ်သော   MV CITEA သင်္ဘောဖြင့်   Aluminium Scrap UBC ကုန်ပစ္စည်းတန်ချိန် (၈၂၅) တန်တင်ဆောင်နေကြောင်းကိုစစ်ဆေးတွေ့ရှိပြီး တရားမဝင်ကုန်ပစ္စည်းများနှင့် လက်နက်ခဲယမ်းများကို သိုဝှက်သယ်ဆောင်ခြင်းမရှိကြောင်းနှင့် ယင်းကုန်စည်များမှာ တရားဝင်ကုန်စည်များသာဖြစ်ကြောင်းသိရှိရပါသည်။

DOCA(ရန်ကုန်)