သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲ ရေးဌာနခွဲ၊ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှုဌာနစု (လှည်းကူး) ၏ ဓာတ်ခွဲခန်းများမှ ၂၀၂၆ ခုနှစ်၊ ဇူလိုင်လအတွင်း လုပ်ငန်းရှင် ၁၈ ဦးက အပ်နှံလာသော သီးနှံ ၏အမျိုး အစား ၁၅ မျိုး၊ စုစုပေါင်းနမူနာအရေအတွက် ၅၀ ခု၊ ဓာတ်ခွဲစမ်းသပ်မှုပေါင်း ၉၉ ခုကို ဓာတ်ခွဲ စမ်းသပ်စစ်ဆေးခြင်းများ ဆောင်ရွက်နိုင်ခဲ့ပါသည်။

      ၂၀၂၆ ခုနှစ်၊ ဇူလိုင်လအတွင်း လယ်ယာထွက်ကုန် ပို့ကုန်များအား ပြည်ပနိုင်ငံများသို့ တင်ပို့နိုင်ရေးအတွက် ဆန်ဖြူ၊ ဆန်ကွဲ၊ နှမ်းနက် (သိပ္ပံ)၊ နှမ်းဖြူ၊ ပဲလွန်း၊ ပဲယင်း၊ ပဲယင်းနီ၊ ပဲစဉ်းငုံ၊ မတ်ပဲ၊ နေကြာဖတ်၊ မြေပဲဖတ်တို့တွင် ပိုးသတ်ဆေးဓာတ်ကြွင်းပါရှိမှု၊ မှိုဆိပ်ပါရှိမှု၊ သီးနှံဓာတုနှင့် ရူပအရည်အသွေးစသည့် ဓာတ်ခွဲစမ်းသပ်စစ်ဆေးခြင်းများ ဆောင်ရွက်ခဲ့ပါသည်။

     ဓာတ်ခွဲခန်းအလိုက် ဓာတ်ခွဲစမ်းသပ်မှုအနေဖြင့် ပိုးသတ်ဆေးဓာတ်ကြွင်းဓာတ်ခွဲခန်းမှ ၃၅ ခု၊  မှိုဆိပ်ဓာတ်ခွဲခန်းမှ ၁၄ ခု၊ ဆီနှင့်ဆီထွက်သီးနှံဓာတ်ခွဲခန်းမှ ၃၈ ခု၊ သီးနှံဓာတု ဓာတ်ခွဲခန်းမှ ၉ ခု၊ သီးနှံရူပဓာတ်ခွဲခန်းမှ ၃ ခု စုစုပေါင်းဓာတ်ခွဲစမ်းသပ်မှု ၉၉ ခု ဆောင်ရွက်နိုင်ခဲ့ပါသည်။

               စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးတင်ဇော်ထွေး ဦးဆောင် ၍စစ်ဆေးရေးမှူးများသည် (၂၄.၇.၂၀၂၆)ရက်နေ့၊ နံနက် (၁၀:၃၀) နာရီအချိန်တွင်  မြင်းခြံမြို့ရပ်ကွက် များရှိ ဆေးနှင့်ဆေးပစ္စည်း အရောင်းဆိုင်များအား ကွင်းဆင်းစစ်ဆေးခြင်းကို ဆောင်ရွက်ခဲ့ကြပါသည်။

          မြင်းခြံဈေးကွက်၌ ဆေးဝါးပြတ်လပ်မှုရှိ/မရှိ၊ ဈေးနှုန်းမြှင့်တင်ရောင်းချခြင်းများရှိ/မရှိ၊ ကုန်အညွှန်းအမှတ်အသားများနှင့် သက်ဆိုင်ရာဌာနထောက်ခံ ချက်များပါဝင်မှုရှိ/မရှိ၊ ဈေးကစားရန် ရည်ရွယ်ချက်ဖြင့် သိုလှောင်ထားခြင်းများ မရှိစေရေးတို့အား ကွင်းဆင်းစစ်ဆေးခဲ့ရာ လက်ရှိအချိန်တွင် ဆေးဝါးပြတ်လပ်မှုများ၊ ဈေးနှုန်းအဆမတန်မြှင့်တင်ရောင်းချခြင်းများမရှိဘဲ သင့်တင့်သောဈေးနှုန်းများဖြင့်သာ ရောင်းချမှုရှိပြီး ဈေးနှုန်းများတည်ငြိမ်နေကြောင်း တွေ့ရှိရပါသည်။ စားသုံးသူပြည်သူများ ကုန်ပစ္စည်းများကို ဝယ်ယူသုံးစွဲရာတွင် လုံခြုံစိတ်ချရမှုရှိပြီး၊ ဘေးအန္တရာယ်ကင်းရှင်းစေရန်နှင့် ဖြစ်သင့်ဖြစ်ထိုက်သောဈေးနှုန်းများနှင့်သာ ဝယ်ယူသုံးစွဲနိုင်ရေး၊ ဆေးဝါးပြတ်လပ်မှုမဖြစ်ပေါ်စေရေး၊ ထိခိုက်နစ်နာဆုံးရှုံးမှုများ မဖြစ်ပေါ်စေရေးတို့အတွက် စဉ်ဆက်မပြတ်ဈေးကွက် စောင့်ကြည့်စစ်ဆေးမှုများ ဆောင်ရွက်လျက်ရှိကြောင်းနှင့် သိရသည်။DOCA(မန္တလေး)

             မြင်းခြံခရိုင်၊ တောင်သာမြို့နယ်သည် လယ်ယာစိုက်ပျိုးရေးလုပ်ငန်းများ လုပ်ကိုင်လျက်ရှိရာ အစေ့ထုတ်ပြောင်းသီးနှံများကို သာယာအေးရွာ၊ ရွာလေးကုန်းကျေးရွာ၊ ငါးပင်စင်ရွာ၊ ဆင်မင်း ကျေးရွာ၊ နန်တည်ရွာ၊ သံဘိုကျေးရွာနှင့် ရုံးပင်ရွာတို့တွင် စိုက်ပျိုးလျက်ရှိပြီး စိုက်ပျိုးရာတွင် ရာသီဥတုဒဏ် ခံနိုင်ရည်ရှိသော အထွက်နှုန်းကောင်းမွန်သည့် စီပီ(808)နှင့် (888)မျိုးများကို စိုက်ပျိုးထားကြောင်း သိရသည်။ ၂၀၂၅-၂၀၂၆ ခုနှစ်တွင် တောင်သာမြို့နယ်အနေဖြင့် အစေ့ထုတ်ပြောင်း စိုက်ဧက (၇၀၄)ဧက စိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏စာရင်းများ အရသိရှိရသည်။

     တောင်သာမြို့နယ်၌ ၂၀၂၆ ခုနှစ်၊ ဇူလိုင်လ စတုထ္တပတ်အတွင်း အရည်အသွေးကောင်းသော အစေ့ထုတ်ပြောင်း တစ်ပိဿာလျှင် (၁၅၇၀-၁၆၃၀) ကျပ်ခန့်၊ အရည်အသွေးညံ့သော အစေ့ထုတ်ပြောင်း တစ်ပိဿာလျှင် (၁၅၀၀) ကျပ်ခန့် ပေါက်ဈေးများဖြင့်  အရောင်းအဝယ်ဖြစ်လျက်ရှိကြောင်း၊ ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် အရည်အသွေးအမျိုးအစားကိုလိုက်၍ အစေ့ထုတ်ပြောင်း  တစ်ပိဿာလျှင် (၂၀၀-၂၅၀)ကျပ်ခန့် ဈေးနှုန်းမြင့်တက်လာကြောင်း၊ အရောင်းအဝယ်ဖြစ်မှုအနေဖြင့် တစ်ပတ်လျှင် (၂၅၀) အိတ် ခန့်အရောင်းအဝယ်ဖြစ်ကြောင်း၊  တင်ပို့မှုအနေဖြင့် ပခုက္ကူမြို့၊ မန္တလေးမြို့နှင့် ရန်ကုန်မြို့သို့ ရောင်းချကြောင်း၊ ဒေသတွင်းကုန်လက်ကျန်နည်းလာပြီ ဖြစ်သောကြောင့်  အစေ့ထုတ်ပြောင်း ဈေးနှုန်းအနည်းငယ် မြင့်တက်လာကြောင်း၊  အစေ့ထုတ်ပြောင်းများကို ပြည်တွင်း၌ မွေးမြူရေးလုပ်ငန်းများတွင် ကုန်ကြမ်းတိရိစ္ဆာန် အစာအဖြစ်အသုံးပြုကြသလို အပင်များကိုကျွဲ၊ နွားအစာအဖြစ်လည်းကောင်း၊ အစားသောက်ကုန်ကြမ်းအဖြစ် ဝယ်ယူမှုများ၍ ဈေးကွက် ခိုင်မာမှုရှိ ကြောင်း ဒေသတွင်း ပွဲရုံလုပ်ငန်းရှင်များထံမှ သိရှိရသည်။ 

DOCA(မန္တလေး)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊  မြောင်းမြခရိုင်၊  ဝါးခယ်မမြို့နယ်တာဝန်ခံ ဦးအောင်မိုးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍(၂၄.၇.၂၀၂၆)ရက်နေ့ နေ့လယ်(၁၂၀၀)နာရီအချိန်တွင် ဝါးးခယ်မမြို့၊ မြို့မဈေးရှိ  ကုန်စုံဆိုင်များအားကုလားလေးနှင့် မြန်မာရနံ့အမှတ်တံဆိပ် ဟင်းခတ်အမွှေးအကြိုင်များတွင် ကုန်အညွှန်းအမှတ်အသား ပြည့်စုံမှု ရှိ/ မရှိ ကွင်းဆင်းစစ်ဆေး ဆောင်ရွက်ခဲ့ကြောင်း သိရပါသည်။

          ထိုသို့ကွင်းဆင်းဆောင်ရွက်ရာတွင် မြို့နယ်တာဝန်ခံဦးအောင်မိုးမှ ဝါးခယ်မမြို့၊ မြို့မဈေးရှိကုန်စုံဆိုင်များတွင် ရောင်းချနေသောကုလားလေးနှင့်မြန်မာရနံ့အမှတ်တံဆိပ် ဟင်းခတ်အမွှေးအကြိုင်ထုပ်များတွင် ကုန်အညွှန်းအမှတ်အသား ပြည့်စုံမှု ရှိ/ မရှိ စစ်ဆေးခဲ့ပြီးဆိုင်ပိုင်ရှင်များအား စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော ဥပဒေ၂၀၁၉ပါ ပြဌာန်းချက်များမှ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆိုပုဒ်မ(၄၁)ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု (သို့)တစ်ခုထက်ပို၍တွဲ လျှက်ဖြစ်စေရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များနှင့် အညီ လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံစွာဖော်ပြထားမှုရှိ/ မရှိ၊ ဌာနမှဈေးကွက်စောင့်ကြည့်စစ်ဆေးမှုအား စဉ်ဆက်မပြတ်ဆောင်ရွက်သွားမည်ဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊ လပွတ္တာမြို့နယ် တာဝန်ခံဦးမြင့်ဌေးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့၊ မြို့နယ်ကျန်းမာရေးတို့နှင့် ပူးပေါင်း၍ (၂၄.၇.၂၀၂၆)ရက်နေ့  နံနက်(၁၁:၀၀)နာရီအချိန်တွင်  လပွတ္တာမြို့နယ်၊ မြို့ပေါ်ရှိအိမ်သုံး ဆေးဆိုင်များတွင် ဈေးနှုန်းမြှင့်တင်ရောင်းချခြင်းနှင့်  ဆေးဝါးပြတ်လပ်မှုရှိ/ မရှိ  ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရပါသည်။

          ထိုသို့ ကွင်းဆင်းဆောင်ရွက်ရာတွင် မြို့နယ်တာဝန်ခံမှ အိမ်သုံးဆေးအရောင်းဆိုင်ပိုင်ရှင်များအား စားသုံးသူ  ပြည်သူများ သက်သာသောဈေးနှုန်းဖြင့် ဝယ်ယူသုံးစွဲနိုင်ရေးအတွက် ဆောင်ရွက်ပေးနိုင်ပါရန်၊ ကာလကြာရှည်သုံးစွဲနေရသည့် ဆေးဝါးများ၊ သွေးကျဲဆေးများ၊ အကိုက်အခဲပျောက်ဆေး၊ ဆီးချိုဆေး၊ လေဆေး၊ အာရုံကြောဆေး၊ ဒါဏ်ကြေ လိမ်းဆေးအပါအဝင် ပုံမှန်သောက်သုံးနေသည့် ဆေးနှင့် ဆေးပစ္စည်းများ  ဈေးကွက်အတွင်း ပြတ်လပ်မှုမရှိစေရေး  ဈေးနှုန်းမြှင့်တင်ရောင်းချမှုမရှိစေရေး၊ အဓိကထားဆောင်ရွက်ရန် မေးမြန်းချက်များအရ အိမ်သုံးဆေးများအား ရန်ကုန်ကုမ္ပဏီများနှင့် ချိတ်ဆက်ဝယ်ယူရောင်းချနေရပြီး၊ ဆေးအမျိုးအစားအလိုက် ၅% ထိသာ ဈေးနှုန်းအနည်းငယ်  မြင့်တက်လျှက်ရှိကြောင်း ဝယ်ယူရာတွင် အခက်အခဲမရှိ ဝယ်ယူနိုင်ကြောင်းသိရှိရပါသည်၊ ဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း၊ဆိုင်ရှင်များသို့ အသိပေးဆွေးနွေး ဆောင်ရွက်ခဲ့ပါသည်။ သက်တမ်းလွန်ဆေးဝါးများနှင့် လိုင်စင်မဲ့ဆေးဝါးများ ဈေးကွက်အတွင်း ရောင်းချခြင်းမပြုရန်   သက်ဆိုင်ရာဌာနများ၏ အမိန့်ညွှန်ကြားချက်၊ ဥပဒေများအား လိုက်နာဆောင်ရွက်ကြရန် အသိပေးစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)