သတင်းနှင့် လှုပ်ရှားမှုများ

          ၁၆.၉.၂၀၂၆ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ကျိုက်ထိုခရိုင်၊ ခရိုင်းဦးစီးမှူး နှင့် မြို့နယ်တာဝန်ခံတို့သည် မြို့နယ်အထွေထွေအုပ်ချုပ်ရေးဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့် ပူးပေါင်း၍ ကျိုက်ထိုမြို့နယ်၊ တောင်ပိုင်းရပ်ကွက်ရှိ ကုန်စုံဆိုင်များတွင် ရောင်းချနေသော အေးခဲအစားအစာ အမျိုးမျိုးတို့အား ကွင်းဆင်းစစ်ဆေးခဲ့ပါသည်။

          ထိုသို့ ကွင်းဆင်းစစ်ဆေးရာတွင် အေးခဲအစားအစာအမျိုးမျိုးတို့၏ ပါကင်ထုပ်များ အပေါ်၌ ကုန်အညွှန်းအမှတ်အသားများအား မြန်မာဘာသာဖြင့် ပြည့်စုံစွာ ဖော်ပြထား ခြင်း ရှိ/မရှိကိုစစ်ဆေးခဲ့ရာ ကုန်အညွှန်းအမှတ်အသားပြည့်စုံစွာ ဖော်ပြထားပြီး စားသုံးသူများ ဘေးအန္တရာယ်ကင်းသော အေးခဲအစားအစာများကိုသာ ရောင်းချနေ ကြောင်း သိရှိရပါသည်။

DOCA (မွန်)

          ၁၆.၉.၂၀၂၆ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ ခရိုင်ဦးစီးမှူး ဦးအောင်ကျော်မင်းနှင့် ပေါင်မြို့နယ်တာဝန်ခံ ဦးအောင်မျိုးဦးတို့သည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ပြန်ကြားရေးနှင့်ပြည်သူ့ဆက်ဆံရေး ဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ပေါင်မြို့နယ်၊ ကဒုံစီရပ်ကွက် ရှိ “မိုးပွိုင့်” သောက်ရေသန့်စက်ရုံသို့ ဈေးကွက်မရောက်မီ ကွင်းဆင်းစစ်ဆေးပြီး လုပ်ငန်း ရှင်များအား အသိပညာပေး ဆောင်ရွက်ခဲ့ပါသည်။

        ထိုသို့ကွင်းဆင်းစစ်ဆေးရာတွင် သထုံခရိုင်ဦးစီးမှူးက လုပ်ငန်းရှင်အား မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)  ပါ ကုန်စည် အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ် အချက်များနှင့် ကိုက်ညီမှု ရှိ/မရှိ စစ်ဆေးခဲ့ပြီး စားသုံးသူကာကွယ်ရေး ဥပ‌ဒေပါ စီးပွားရေးလုပ်ငန်းရှင်၏  အဓိပ္ပါယ်နှင့် တာဝန်(၁၁)ချက်အကြောင်း၊ ကုန်စည်နှင့် စပ်လျဉ်း၍ အာမခံချက်ပေးရမည့်အချက်များ၊ ကုန်စည်နှင့်စပ်လျဉ်း၍ အာမခံပေးထားမှု အပေါ် စားသုံးသူကတောင်းဆိုနိုင်သည့် အခွင့်အရေးများအကြောင်း၊ စားသုံးသူသည် ကုန်စည်ကိုအသုံးပြုခြင်းကြောင့် နစ်နာဆုံးရှုံးမှုများ ဖြစ်ပေါ်လာပါက တာဝန်ရှိမှု အခြေအနေများနှင့် စားသုံးသူကာကွယ်ရေးဥပဒေပါ ပြစ်မှု၊ ပြစ်ဒဏ်အကြောင်းတို့အား အသိပညာပေးဆွေးနွေးခဲ့ကြောင်း သိရှိရပါသည်။

DOCA (မွန်)

    ၁၇.၉.၂၀၂၆ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင် ခရိုင်ဦးစီးမှူးသည် ဒိန်ချဉ်ထုတ်လုပ်မည့် လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ် အသားဆိုင်ရာများနှင့် ပတ်သက်၍ ဆွေးနွေးခဲ့ပါသည်။

          အဆိုပါ ကုန်အညွှန်းအမှတ်အသားပြုလုပ်ရာတွင် လိုအပ်သည်များကို မော်လမြိုင် ခရိုင်ဦးစီးမှူးက လုပ်ငန်းရှင်အား ၎င်းတို့၏ ထုတ်ကုန်ပစ္စည်းများပေါ်တွင် စားသုံးသူ ကာကွယ်ရေးဥပဒေ ၂၀၁၉ အခန်း (၁၈) တွင် ဖော်ပြထားသော ပြဌာန်းချက်အတိုင်း ကုန်အညွှန်းအမှတ်အသားကို ပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ဖြစ်စေ၊ မြန်မာဘာသာ (သို့မဟုတ်) အခြားဘာသာတစ်ခုဖြင့်ဖြစ်စေ ဖော်ပြရန် အသိပညာပေး ဆွေးနွေးခဲ့ကြောင်း သိရှိရပါသည်။

DOCA (မွန်)

   ကျောက်ဆည်ခရိုင်၊စားသုံးသူရေးရာဦးစီးဌာနမှ စစ်ဆေးရေးအရာရှိများသည် စက်တင်ဘာလ (၈)ရက်နေ့ ၊ နံနက်(၈း၃၀)အချိန်တွင် ကျောက်ဆည်မြို့နယ်အတွင်းရှိ အာကာကျော်စားအုန်းဆီ အရောင်းဆိုင်သို့ သွားရောက်ပြီးစစ်ဆေးခဲ့ရာ ကျောက်ဆည်မြို့နယ်အတွင်းရှိ  မုန့်ပေါင်းကျေးရွာရှိ အိမ်ထောင်စုအလိုက် အိမ်ထောင်စု တစ်စုလျှင် စားအုန်းဆီ(၂.၅)ပိဿာနှုန်းဖြင့် ရောင်းချနေမှု နှင့် စားအုန်းဆီများအား စာအုပ်များဖြင့် ထုတ်ပေးလျက်ရှိရာ အိမ်‌ထောင်စုအလိုက် ထုတ်ပေးထားသည့် စာအုပ်အဟောင်းများစိစစ်ခြင်း နှင့် စာအုပ်အသစ်များ ထုတ်ပေးခြင်းတို့အား ကွင်းဆင်းစစ်ဆေးခဲ့ပါ သည်။ ထိုသို့စစ်ဆေးရာတွင် ပြည်သူများအား စားအုန်းဆီရောင်းချသည့်စားအုန်းဆီအရောင်း ကိုယ်စားလှယ်များအနေဖြင့် စားအုန်းဆီရောင်းချရာတွင်ဈေးနှုန်းမှန်၊ အချိန်အတွယ်မှန်၊ အချိန်မှန်၊ နေရာမှန်၊ အလေးချိန်မှန်၊ အရည်အသွေးမှန် စသည့် (မှန်) ၆ (မှန်) ဖြင့် ရောင်းချပေးရေး၊ စာအုပ်များ၊ သန်းခေါင်စာရင်း၊ အိမ်ထောင်စုစာရင်းစသည်တို့ဖြင့်တိကျမှန်ကန်စွာရောင်းချပေးရေးစသည်တို့ကိုစားအုန်းဆီရောင်းချသည့် ကိုယ်စားလှယ်များအား ပြောကြားခဲ့ကြောင်း သတင်းရရှိ ပါသည်။

DOCA(မန္တလေး)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့၊ အမှတ်(၅)၊ (အ.လ.က)ကျောင်းရှိ ဆရာ/ဆရာမနှင့် ကျောင်းသား/ကျောင်းသူများအား  စားသုံးသူအခွင့်အရေးနှင့် ဘေးအန္တရာယ်ကင်း ရှင်းသော ကုန်စည်နှင့် ဝန်ဆောင်မှုများကို မှန်ကန်စွာရွေးချယ် ဝယ်ယူတတ်စေရန် ရည်ရွယ်၍ စက်တင်ဘာလ ၁၅ ရက် နံနက်ပိုင်းက စားသုံးသူကာကွယ်ရေးအသိပညာပေး ဟောပြောပွဲ ကျင်းပ ပြုလုပ်ခဲ့သည်။

    ဟောပြောပွဲတွင် ကန့်ဘလူခရိုင် စားသုံးသူရေးရာဦးစီးဌာနမှ ဒေါ်အိမွန်ကျော် အကြီးတန်းစာရေး က  စားသုံးသူတစ်ဦးအနေဖြင့် ရရှိရမည့် အခြေခံအခွင့်အရေးများနှင့် လိုက်နာရမည့် တာဝန်များ၊ ကုန်အညွှန်းအမှတ်အသားများကို စစ်ဆေးခြင်း၊ မုန့်နှင့် အစားအသောက်များ ဝယ်ယူရာတွင် ပါဝင်ပစ္စည်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးမည့်ရက်စွဲ၊ ထားသိုသိမ်းဆည်းပုံအညွှန်းနှင့် ကြိုတင်သတိပေးချက်များကို သေချာစွာဖတ်ရှု့ရန်လိုကြောင်း၊ စားသုံးသူများအနေဖြင့် နစ်နာဆုံးရှုံးမှုတွေရှိလာရင်လည်း တိုင်ကြားနိုင်တဲ့ နည်းလမ်းတွေကို သိရှိထားဖို့  အသိပညာ ပေးရခြင်းဖြစ်ကြောင်း၊ ဆက်လက်၍ တာဝန်ခံဦးမျိုးဝင်းသန်းက စားသုံးသူတွေအနေနဲ့ အစားအစာ အပြင် သုံးစွဲမှုပိုင်ကိုလည်း ဂရုစိုက်ရန်လိုအပ်ကြောင်း၊ ယနေ့အချိန်အခါသည် နည်းပညာများ ဖွံ့ဖြိုး တိုးတက်လာသည့်နှင့်အမျှ စားသုံးသူများကို အကျိုးပြုနေသော်လည်း တဖက်တွင်လည်း နစ်နာဆုံး ရှုံးမှုများနှင့် ကြုံတွေ့နေကြရကြောင်း၊ စားသုံးဆီနှင့်စပ်လျဉ်း၍ လူတစ်ဦးတစ်နှစ်လျှင် ဆီ (၅ ပိဿာမှ ၆ ပိဿာထိ)သာ စားသုံးသင့်ကြောင်း၊ ပိုမိုစားသုံးနေပါက ဆီစားသုံးမှု လျော့ချသင့်ကြောင်း၊ ဆီအလွန်အကျွံစားသုံးခြင်းကြောင့် အဝလွန်ခြင်း၊ အသည်းအဆီဖုံးရောဂါနှင့် ဆီချိုရောဂါ စသည့် ရောဂါများဖြစ်ပွားနိုင်ကြောင်း၊ ဟောပြောပွဲသို့ တက်ရောက်လာကြသော ဆရာ/ဆရာမနှင့် ကျောင်းသား/ကျောင်းသူများကို စားသုံးသူကာကွယ်ရေးအသိပညာပေး လက်ကမ်းစာစောင်များကို အခမဲ့ဖြန့်ဝေပေးခဲ့ပြီး ကျောင်းသား/ ကျောင်းသူများက သိရှိလိုသည်များကို မေးမြန်းရာ တာဝန်ရှိသူ များမှ ပြန်လည်ဖြေကြားပေးခဲ့ကြောင်း သိရသည်။

DOCA(စစ်ကိုင်း)