သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ဝန်ထမ်းနှစ်ဦးသည် (၁၃-၂-၂၀၂၃) ရက်နေ့(၁၄၀၀) နာရီချိန်တွင် ပျော်ဘွယ်မြို့နယ် မုန့်ကြွပ်လုပ်ငန်း လုပ်ကိုင်သူများနှင့် တွေ့ဆုံဆွေးနွေးခဲ့ပါသည်။

          ပျော်ဘွယ်မြို့ရှိ ဆင်နှစ်ကောင်မုန့်ကြွပ်လုပ်ငန်း၊ ရွှေငါး မုန့်ကြွပ်လုပ်ငန်း၊ ပဒေသာမုန့်ကြွပ်လုပ်ငန်းရှင်များနှင့် သွားရောက်တွေ့ဆုံရာတွင် မုန့်ကြွပ်လုပ်ငန်းကို နှစ်ပေါင်းများစွာကတည်းက လုပ်ကိုင်လာခြင်းဖြစ်ကြောင်း သိရှိရပါသည်။

          မုန့်ကြွပ်ကို အဆင့် (၁) ဂျုံ၊ သကြား၊ ထောပတ်တို့ကို ရောနယ်ခြင်း၊ အဆင့် (၂) အပွခံ ပုံစံသွင်း ခြင်း၊ အဆင့် (၃) မီးဖုတ်ခြင်း (အစိုတစ်ကြိမ်၊ အခြောက်တစ်ကြိမ်)၊ အဆင့် (၄) အအေးခံခြင်း ၊ အဆင့် (၅) ပက်ကင်ထုတ်ပိုးခြင်းဟူ၍ အဆင့်ဆင့်ဆောင်ရွက်ရပါသည်။ လုပ်သားဦးရေ ကျား (၈) ယောက်၊ မ (၄) ယောက်ရှိပြီး လုပ်ကိုင်ဆောင်ရွက်လျက်ရှိပါသည်။ကုန်ကြမ်းရရှိမှုအနေဖြင့် ထောပတ်ကို ဒေသတွင်းမှရရှိပြီး၊ ဂျုံ၊ နို့မှုန့်၊ မုန့်ပွဆေး၊ သကြားနှင့် ဆီများကို ရန်ကုန်မှ ဝယ်ယူကြပါသည်။

          (၁) ရက်လျှင် ဂျုံပိဿာ (၇၅) မှ (၈၀) ပိဿာ ကုန်ကြမ်းကုန်ကျပြီး၊ ကုန်ချောထွက်ရှိမှု အထုပ်သေး (၁၆၀) ထုပ်ခန့်၊ အထုပ်လတ် (၁၂၀) ထုပ်ခန့်၊ အထုပ်ကြီး (၈၀) ထုပ်ခန့် ထုတ်လုပ်နိုင် ကြောင်း ၊ စျေးနှုန်းအနေဖြင့် အခု (၂၀) ပါ အထုပ်သေး တစ်ထုပ်လျှင် (၂၅၀၀) ကျပ်၊ အခု (၂၀) ပါ အလတ်တစ်ထုပ်လျှင် (၄၀၀၀-၄၅၀၀) ကျပ်၊ အခု (၂၀) ပါ အကြီး တစ်ထုပ်လျှင် (၇၀၀၀) ကျပ် စျေးဖြင့် ရောင်းချရကြောင်း သိရှိရပါသည်။ စျေးကွက်အနေဖြင့် တစ်နိုင်ငံလုံးတင်ပို့ကြောင်း သိရှိရပါသည်။

DOCA(မန္တလေး)

       စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည်(၂၂.၄.၂၀၂၅)ရက်နေ့ နံနက်(၁၁:၃၀) နာရီအချိန်တွင် ကြံခင်းမြို့နယ်၊ မင်းသီရိ(၂)မြို့မရပ်ကွက်ရှိ စားသုံးသူရေးရာဦးစီးဌာန၊ မြို့နယ်ဦးစီးမှူးရုံးတွင် ကုန်စုံဆိုင်လုပ်ငန်းရှင်များနှင့်တွေ့ဆုံ၍ ကုန်အညွှန်းအမှတ်အသားဆိုင်ရာ အသိပညာပေးဆွေးနွေးခြင်းကို ဆောင်ရွက်ခဲ့ပါသည်။

         ထိုဆွေးနွေးပွဲတွင် မြို့နယ်တာဝန်ခံ ဦးကျော်နိုင်ဝင်းက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များအကြောင်း၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်)တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည့်အကြောင်း၊ ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း အသိပညာပေးဟောပြောခဲ့ပြီး လုပ်ငန်းရှင်များမှလည်း သိလိုသည်များကိုမေးမြန်း၍ ဆွေးနွေးခဲ့ကြကြောင်း သိရှိရပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံသည် (၂၃.၄.၂၀၂၅)ရက်နေ့ ၊ နံနက် (၀၉:၀၀) နာရီအချိန်တွင် သက်ဆိုင်ရာဌာနဆိုင်ရာများနှင့်ပူးပေါင်း၍ ဇလွန်မြို့နယ်အတွင်းရှိ မြို့ပေါ်ရပ်ကွက်နှင့် မြို့မဈေးအတွင်းရှိ  ကုန်စုံဆိုင်များ၊  စားအုန်းဆီ လက်လီ၊ လက္ကားအရောင်းဆိုင်များအား ဈေးနှုန်းမြှင့်တင်ရောင်းချမှုရှိ/ မရှိ ရှောင်တခင်ကွင်းဆင်းစစ်ဆေးခဲ့ပါသည်။

          ထိုသို့ကွင်းဆင်းစစ်ဆေးခဲ့ရာ ပူးပေါင်းအဖွဲ့သည် ဟင်္သာတခရိုင် ဆီထုတ်လက်ကား ကိုယ်စားလှယ်များမှတစ်ဆင့် ခွဲတမ်းရရှိသောဆီများအား လက်လီကုန်စုံဆိုင်များသို့လည်းကောင်း၊ လက်လီ ကုန်စုံဆိုင်များမှတဆင့် စားသုံးသူများထံသို့ ဖြန့်ဖြူးရောင်းချလျက်ရှိပြီး၊ ထိုသို့ရောင်းချရာတွင်လည်း စားအုန်းဆီ သတ်မှတ်ရည်ညွှန်းဈေးအပေါ်တွင် အဆင့်အလိုက်(၂)% အမြတ်ထက် ကျော်လွန်၍ ရောင်းချမှုမရှိကြောင်း၊ ရောင်းချမှုလက်ခံ ဘောက်ချာများထားရှိခြင်း၊ သတ်မှတ်ရည်ညွှန်းဈေးဖြင့် သာရောင်းချခြင်း၊ အခြားမသမာသော နည်းလမ်းများသုံး၍ ရောင်းချမှုမရှိခြင်းနှင့် ဈေးကစားရန်ရည်ရွယ်ပြီး သိုလှောင်ထားခြင်းများမရှိကြောင်းသိရှိရပြီး စားအုန်းဆီအရောင်းဆိုင် (၅)ဆိုင်အား ရှောင်တခင်ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန ၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင် သာယာရေးအဖွဲ့နှင့် စားသုံးသူရေးရာဦးစီးဌာနတို့ပါဝင်သော ပူးပေါင်းအဖွဲ့သည် ၂၀၂၅ ခုနှစ်၊ ဧပြီလ ၂၂ ရက်နေ့တွင်  ပျော်ဘွယ်မြို့နယ်ရှိ အိမ်ဆောက်ပစ္စည်းအရောင်းဆိုင်များအား ဆောက်လုပ်ရေးလုပ်ငန်းသုံးပစ္စည်းများ ဈေးနှုန်းမြှင့်တင်ရောင်းချခြင်းမရှိစေရေး ကွင်းဆင်းစစ်ဆေး ဆောင်ရွက်ခဲ့ပါသည်။

    ထိုသို့ကွင်းဆင်းစစ်ဆေးရာတွင် အိမ်ဆောက်ပစ္စည်းအရောင်းဆိုင်များ၌ ယခင်က  ဈေးကွက်တွင် အပါချီဘိလပ်မြေ၊ Alpha ဘိလပ်မြေ နှင့် ကြံ နှစ်ကောင်ဘိလပ်မြေတို့  အရောင်းသွက်လျက်ကြောင်း၊ ယခုအခါအဆိုပါ ဘိလပ်မြေတို့မှာလက်ကျန်နည်းလာခြင်း ၊ ဝယ်ရင်းဈေးမြှင့်တက်လာခြင်း၊ အချို့ဆိုင်များတွင် မှာယူမရခြင်းတို့ကြောင့် ပစ္စည်းများပြတ်လပ်မှုရှိပြီး ဈေးနှုန်းများမြင့်တက်ခြင်းများရှိကြောင်းသိရသည်။ ယခုအခါ ရှမ်းပြည်နယ်တောင်ပိုင်း ဟိုပုံးမြို့မှ ထုတ်လုပ်သည့် ရှမ်းရိုးမတံဆိပ် ဘိလပ်မြေနှင့် နဂါးစိမ်းဘိလပ်မြေ များဈေးကွက်၌ အရောင်းအဝယ်ဖြစ်လျက်ရှိပြီး ဈေးနှုန်းအနေဖြင့် ရှမ်းရိုးမဘိလပ်မြေ တစ်အိတ်(50 kg)လျှင် ၂၇၀၀၀/-၊နဂါးစိမ်းဘိလပ်မြေ တစ်အိတ်လျှင် ၃၁၀၀၀/-ကျပ်ရှိကြောင်း၊ လုပ်ငန်းရှင်များအား ဈေးကွက်အတွင်း ဖြစ်သင့်ဖြစ်ထိုက်သည့်ဈေးနှုန်းထက် ဈေးနှုန်းမြှင့်တင်ရောင်းချခြင်းမပြုရန် အသိပေးဆောင်ရွက်ခဲ့ပါသည်။

DOCA(မန္တလေး)

          ၂၀၂၅ ခုနှစ် ဧပြီလ ၂၂ ရက်နေ့ နံနက်(၈:၀၀) နာရီအချိန်တွင် မြို့နယ်စိုက်တိုးမြှင့် ဥက္ကဌနှင့် အဖွဲ့ဝင်များသည် ဟင်္သာတခရိုင်၊ ဟင်္သာတမြို့နယ်၊ လယ်ကြီးကွင်းအုပ်စုရှိ တောင်သူ ဦးအောင်ဌေး၏ လယ်မြေဧရိယာ၌ ကျင်းပပြုလုပ်သော ၂၀၂၅ ခုနှစ် မိုးစပါးရာသီတွင် မြေဆီလွှာဖွံ့ဖြိုးတိုးတက်ရေးအတွက် ပိုက်ဆံလျှော်မျိုးစေ့ပေးအပ်ခြင်းနှင့် ကြဲပက်ပွဲအခမ်းအနားသို့  တက်ရောက်ကြကာ ဟင်္သာတမြို့နယ် စိုက်တိုးမြှင့်အဖွဲ့ဝင်များနှင့်အတူ  စားသုံးသူရေးရာဦးစီးဌာန၊  ဟင်္သာတမြို့နယ်တာဝန်ခံမှ ထိုအခမ်းနားသို့ တက်ရောက်ခဲ့ကြပါသည်။

          အဆိုပါအခမ်းအနားကို ဟင်္သာတခရိုင်၊ ဟင်္သာတမြို့ လယ်ကြီးကွင်းအုပ်စုရှိ တောင်သူ ဦးအောင်ဌေး၏ လယ်မြေ(၅ ဧက)၌ သစ်စိမ်းမြေဩဇာ(ပိုက်ဆံလျှော်)များကြဲပက်လျက်ရှိကာ အဆိုပါ သစ်စိမ်းမြေဩဇာ ကြဲပက်ခြင်းကြောင့် မြေဆီလွှာဖွံ့ဖြိုးတိုးတက်စေရေး၊ မိုးစပါးအထွက်နှုန်းတိုးတက်လာစေရန်နှင့် ဓါတ်မြေဩဇာသုံးစွဲမှုကို လျော့ချနိုင်ကာ သဘာဝပတ်ဝန်းကျင်ရှိ မြေဆီလွှာ၊ ရေတို့တွင် ဓါတုအဆိပ်သင့်မှု လျော့နည်းစေ၍ မြေဆီလွှာ၏ ချဉ်ငံဓါတ်ကိုလည်း ထိန်းညှိပေးသည့်အကျိုးကျေးဇူးများ စွာရရှိနိုင်ကြောင်း မြို့နယ်စိုက်တိုးမြှင့်အဖွဲ့ တာဝန်ရှိသူမှ ရှင်းလင်းဆွေးနွေးခဲ့ပြီး ဒေသခံ တောင်သူ (၇၀)ဦး တက်ရောက်ကာ သစ်စိမ်းမြေဩဇာ(ပိုက်ဆံလျှော်)မျိုးစေ့များအား ပေးအပ်ခြင်းအခမ်းအနားကျင်းပခဲ့ပြီး နံနက်(၁၀:၃၀) နာရီအချိန်တွင် အခမ်းအနားကို ရုပ်သိမ်းခဲ့ကြောင်း သတင်းရရှိပါသည်။

DOCA(ဧရာဝတီ)