သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန၊ ဇလွန်မြို့နယ်ဦးစီးမှူးသည်(၅.၁၁.၂၀၂၄)ရက်နေ့ နံနက် (၁၁:၀၀) နာရီအချိန်တွင် ဇလွန်မြို့နယ်၊ လမ်းမတော်(တ)ရပ်ကွက်ရှိ အုပ်ချုပ်ရေးမှူးရုံး၌အလှကုန်နှင့်မုန့်မျိုးစုံ ရောင်းချသူလုပ်ငန်းရှင်များအား စားသုံးသူကာကွယ်ရေး အသိပညာပေးဟောပြောခြင်းများကို ဆောင်ရွက်ခဲ့ပါသည်။

          ဟောပြောပွဲတွင် မြို့နယ်ဦးစီးမှူး ဦးသန့်ဇင်ဦးက စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ(၁၅) ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ ကုန်အညွှန်းအမှတ်အသားအဓိပ္ပာယ်ဖွင့်ဆိုချက်၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ) နှင့်(ဆ) တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည့်ဖြစ်ကြောင်း၊ ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်း၊ စားသုံးသူမိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Websiteတွင် ဝင်ရောက်လေ့လာနိုင်ကြောင်း၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းများ ဖွင့်လှစ်ထားရှိမှုအခြေအနေတို့ကိုလည်းကောင်း အသိပညာပေးဆွေးနွေးခဲ့ပြီး၊ လုပ်ငန်းရှင် (၁၅)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်တာဝန်ခံ ဦးမိုးမင်းသန်းနှင့် ဝန်ထမ်းတို့သည် ၂၀၂၄ခုနှစ်၊ နိုဝင်ဘာလ(၆) ရက်နေ့၊ နံနက် (၁၁:၀၀) နာရီအချိန်တွင် ဌာနဆိုင်ရာပူးပေါင်းအဖွဲ့ဖြင့် အမှတ်(၉)၊ (၂)လမ်းရှိ “ထွန်း” စက်မှုလက်မှုလုပ်ငန်းသို့ MSMEs လုပ်ငန်းများဖွံ့ဖြိုးတိုးတက်ရေး သွားရောက်ကွင်းဆင်းစစ်ဆေးခဲ့ကြပါသည်။
အဆိုပါ ကွင်းဆင်းစစ်ဆေးမှုတွင် မြို့နယ်တာဝန်ခံ ဦးမိုးမင်းသန်းက “ထွန်း” စက်မှုလက်မှုပိုင်ရှင် ဦးတင်မောင်မြင့်အား ထုတ်လုပ်နေသောပစ္စည်းများနှင့်ပတ်သက်၍ မေးမြန်းရာတွင် အကျွံခံဘီးများ၊ အနိမ့်တင်ရေစက်များ၊ ရေတင်ပိုက်လုံးများကို အဓိကထား၍ ထုတ်လုပ်လျက်ရှိပြီး ကျိုက်လတ်မြို့ပေါ်နှင့် အနီးအနားရှိကျေးရွာများ၊ ဖျာပုံ-ဒေးဒရဲကျေးရွာများမှ လာရောက်ဝယ်ယူကြကြောင်းသိရှိရပါသည်။ ထို့နောက် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဌာနဆိုင်ရာပူးပေါင်းအဖွဲ့တို့သည် MSMEs လုပ်ငန်းများဖွံ့ဖြိုးတိုးတက်ရေးတို့အတွက် ထုတ်လုပ်နေမှုအခြေအနေများကို ကွင်းဆင်းစစ်ဆေးခဲ့ကြောင်းသိရှိရပါသည်။
DOCA(ဧရာဝတီ)

   စားသုံးသူရေးရာဦးစီးဌာန၊ စစ်ကိုင်းခရိုင်၊ ခေတ္တခရိုင်ဦးစီးမှူး ဦးဆောင်၍ ဝန်ထမ်း (၃)ဦးသည် ခရိုင်အထူးစုံစမ်းစစ်ဆေးရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့် အတူ ၂၀၂၄ ခုနှစ်၊ နိုဝင်ဘာလ(၆)ရက်တွင် စစ်ကိုင်းမြို့၊ မြို့မဈေးအတွင်းရှိ “မြစိမ်းတောင်” လက်ဖက်နှင့် ကုန်မျိုးစုံဆိုင်၊ “ဒေါ်နွဲ့နွဲ့အေး”ကုန်မျိုးစုံဆိုင်နှင့် “ဆွေဆွေသန်း” မုန့်မျိုးစုံဆိုင်၊ စုစုပေါင်း ဆိုင်(၃)ဆိုင် အား ဈေးကွက်စောင့်ကြည့်စစ်ဆေးခဲ့သည်။

   နို့နှင့်နို့ထွက်ပစ္စည်းအမျိုးမျိုးတွင် ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ညွှန်ကြားချက်(၂/၂၀၁၉)နှင့် ကိုက်ညီမှု ရှိ/မရှိ တတိယသုံးလပတ်အတွင်း ဈေးကွက်စောင့်ကြည့်စစ်ဆေး ရန် လမ်းညွှန်မှုပြုသဖြင့် စစ်ကိုင်းမြို့၊ မြို့မဈေးအတွင်းရှိ “မြစိမ်းတောင်” လက်ဖက် နှင့်ကုန်မျိုးစုံဆိုင်၊ “ဒေါ်နွဲ့နွဲ့အေး”ကုန်မျိုးစုံဆိုင်နှင့် “ဆွေဆွေသန်း”မုန့်မျိုးစုံဆိုင်၊ စုစုပေါင်းဆိုင်(၃)ဆိုင်အား ကွင်းဆင်း စစ်ဆေးခဲ့ရာ “OnE TEa” အမှတ်တံဆိပ် နို့ဆီဗူးများနှင့် “ရွှေဒိုးဝိုင်း”အမှတ်တံဆိပ် နို့ခရင်(မ်)မုန့်ထုပ်များသည် ညွှန်ကြားချက်(၂/၂၀၁၉)နှင့် ကိုက်ညီမှုရှိသည်ကို စိစစ်တွေ့ရှိရသည်။ စားသုံးသူရေးရာဦးစီးဌာနမှ တာဝန်ရှိသူက ကုန်အညွှန်းအမှတ်အသား ပြည့်စုံစွာဖော်ပြပါရှိသော ကုန်စည်များကို ရွေးချယ်ဝယ်ယူရောင်းချစေလိုကြောင်း၊ နို့နှင့်နို့ထွက်ပစ္စည်းအမျိုးမျိုး မိမိတို့ဆိုင်သို့ ဖောက်သည်သွင်းသည့် စားသောက်ကုန်ပစ္စည်းထုတ်လုပ်သော လုပ်ငန်းရှင်များကို  ကုန်အညွှန်း အမှတ်အသားပြည့်စုံစွာ ဖော်ပြရန် တစ်ဆင့်ပြန်လည် ပြောကြားပေးစေလိုကြောင်း  ဆွေးနွေးပြောကြားခဲ့ပြီး စားသုံးသူကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်၏ တာဝန်များ၊ ဥပဒေ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးခြင်းဆိုင်ရာ အချက်အလက်များကို ‌ရှင်းလင်းပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း)

ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ အိမ်မဲမြို့နယ်တာဝန်ခံ ဒေါ်ဇင်မာသန်းနှင့် ဝန်ထမ်းများသည် (၄-၁၁-၂၀၂၄)ရက်နေ့၊ ညနေ(၀၅း၀၀)နာရီအချိန်တွင် အိမ်မဲမြိုု့နယ်ရှိ ဆီကိုယ်စားလှယ်များထံသို့ ရန်ကုန်မြို့၊ တော်ဝင်ဧကရာဇ်ကုမ္ဗဏီမှ (ယာဉ်အမှတ် 8J-2937) မော်တော်ယာဉ်ဖြင့်စားအုန်းဆီ (၂၉)ပေပါရောက်ရှိလာခဲ့ကြောင်းသိရှိရပါသည်။
အဆိုပါစားအုန်းဆီများကို မြောင်းမြခရိုင်၊ အိမ်မဲမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံက သွားရောက်စစ်ဆေးခဲ့ပြီး ခွဲတမ်းရရှိသောစားအုန်းဆီများကို ရည်ညွန်းဈေး၊ သယ်ယူပို့ဆောင်ကုန်ကျစရိတ်နှင့် ၂% အမြတ်ဖြင့် လက်လီ/ လက်ကးဆိုင်ခွဲများသို့ ခွဲဝေရောင်းချပေးသွားမည်ဖြစ်ကြောင်း၊ လက်လီ/ လက်ကားဆိုင်များအနေဖြင့်လည်း စားသုံးသူပြည်သူများထံသို့ ၂% အမြတ်ဖြင့် ပြန်လည်ရောင်းချပေးသွားမည်ဖြစ်ကြောင်း စားအုန်းဆီရောင်းချရန် ခွဲတမ်းရရှိသော ကိုယ်စားလှယ်များထံမှသိရှိရပါသည်။
DOCA(ဧရာဝတီ)

              စီးပွားရေးနှင့်ကူးသန်းရောင်းဝယ်ဝန်ကြီးဌာန၊ စားသုံးသူရေးရာဦးစီးဌာနအနေဖြင့် ဌာနနှင့်ပတ်သက်၍ စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံး သိသင့်သိထိုက်သည့်အကြောင်းအရာများအား အသိပညာပေးလျက်ရှိရာ (၇.၁၁.၂၀၂၄)ရက်နေ့၊ နေ့လယ် (၁၄:၀၀) နာရီအချိန်တွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးအစည်းအဝေးခန်းမ၌ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး) သည် မြို့နယ်အတွင်းရှိ MSME လုပ်ငန်းရှင်များအား အွန်လိုင်းမှ(Online) ဝယ်ယူခြင်းနှင့် ပတ်သက်၍ အသိပညာပေးဟောပြောပွဲအား ဆောင်ရွက်ခဲ့ပါသည်။

                 ဟောပြောဆွေးနွေးမှုတွင် ဦးသန်းစိုး(လက်ထောက်ညွှန်ကြားရေးမှူး)သည် အွန်လိုင်းစနစ်ဖြင့်ရောင်းချခြင်းလုပ်ငန်းဆိုသည်မှာ ကုန်စည်ကိုဖြစ်စေ၊ ဝန်ဆောင်မှုကိုဖြစ်စေ အွန်လိုင်း (Online) စနစ်မှတစ်ဆင့်ဝန်ဆောင်မှုပေး၍ ရောင်းချသည့်လုပ်ငန်းကို ဆိုလိုတာဖြစ်ပါကြောင်း၊ အွန်လိုင်းမှဝယ်ယူသည့်အခါ ရယူသုံးစွဲသူများအနေဖြင့် သတိထားရမည့် လိမ်လည်နိုင်သည့် ပုံစံ(၂)မျိုးကို အထူးဂရုပြု၍ သိရှိထားရန်လိုအပ်ပါကြောင်း၊ ပထမအချက်အနေဖြင့် ငွေကြေးရယူသည့်လိမ်လည်မှုဖြစ်ပြီး ဥပမာအနေဖြင့် မှာယူသုံးစွဲသူမှငွေကြိုလွှဲပြီးနောက် Social Network Account များ ပိတ်သွားခြင်း၊ ဝယ်ယူသူအားဘလော့လိုက်ခြင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ထားမှု မရှိသည့်အတွက် မြေပြင်လိပ်စာရှာမရခြင်း၊ ဖုန်းနံပါတ်များအားဘလော့ပြုလုပ်သွားခြင်းနှင့် Deactivate ပြုလုပ်သွားခြင်း၊ ဒုတိယအချက်အနေဖြင့် ကုန်စည်/ ဝန်ဆောင်မှုအရည်အသွေးနှင့် စပ်လျဉ်းသည့် လိမ်လည်မှုမျိုးဖြစ်ပြီး၊ ဥပမာ ကုန်စည်/ ဝန်ဆောင်မှုကို အမှန်တကယ်ရောင်းချသော်လည်း ဝယ်ယူပြီးနောက် ပစ္စည်းများပို့သည့်အခါ(သို့မဟုတ်) ဝန်ဆောင်မှုပေးသည့်အခါ ဝယ်ယူစဉ်ကသဘောတူညီထားသည့်အချက်များနှင့် မကိုက်ညီခြင်း၊ ဝယ်ယူထားသည့် ကုန်စည်/ ဝန်ဆောင်မှုနှင့်စပ်လျဉ်း၍ နစ်နာဆုံးရှုံးမှုဖြစ်ပါ်လာပါက တာဝန်ယူမှု၊ တာဝန်ခံမှုမရှိခြင်း စသည့်ဖြင့် လိမ်လည်နိုင်သောကြောင့် ဝယ်ယူသုံးစွဲသူများအနေဖြင့် နစ်နာဆုံးရှုံးမှုများဖြစ်စေနိုင်ပါကြောင်း၊ သို့ဖြစ်ပါ၍ တက်ရောက်လာသောလုပ်ငန်းရှင်များအနေဖြင့် မိမိတို့မှာ အွန်လိုင်းစနစ်ဖြင့်ရောင်းဝယ်ယူမှုပြုလုပ်သော လုပ်ငန်းရှင်များရှိပါက အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ကြရန် လိုအပ်ပါကြောင်းနှင့် အွန်လိုင်းမှဝယ်ယူးသုံးစွဲသူများရှိလျှင်လည်း အထက်ပါဟောပြောဆွေးနွေးမှုများကို သတိပြုကြရန်လိုအပ်ပါကြောင်းနှင့်အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်လိုသူများသည် သတ်မှတ်ချက်များနှင့်ကိုက်ညီရမည်ဖြစ်ပြီး၊ သတ်မှတ်ချက်များအားလည်းကောင်း၊ မှတ်ပုံတင်လက်မှတ်ရရှိသူများအနေဖြင့် ပြင်ဆင်လျှောက်ထားခြင်း၊ သက်တမ်းတိုးလျှောက်ထားခြင်းများနှင့် ပတ်သက်သည့်အချက်များကိုလည်းကောင်း၊ မှတ်ပုံတင်လက်မှတ်ရရှိသူ၏တာဝန်များနှင့် အခွင့်အရေးများကိုလည်းကောင်း၊ အွန်လိုင်းရောင်းချခြင်းများ၏ အားသာချက်၊ အားနည်းချက်များ၊ ၊ စိစစ်သင့်သည့်အချက်များ၊ သက်ဆိုင်ရာဌာနများ၏ဆောင်ရွက်မှုများ၊ မှတ်ပုံတင်ထားသည့် အွန်လိုင်းရောင်းချမှုလုပ်ငန်းများမှ ရွေးချယ်ဝယ်ယူခြင်းဖြင့် ရရှိလာမည့်အကျိုးရလဒ်များ စသည်ဖြင့် အသိပညာပေးဟောပြောဆွေးနွေးခဲ့ရာ လုပ်ငန်းရှင် (၂၀)ဦးတက်ရောက်ခဲ့ကြောင်း သိရှိရပါသည်။

DOCA(မန္တလေး)