သတင်းနှင့် လှုပ်ရှားမှုများ

ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်၊ စားသုံးသူရေးရာမြို့နယ်တာဝန်ခံရုံးမှ ဝန်ထမ်းများသည် မြို့နယ်ကျန်းမာရေးမှူး၊ အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲ တပ်ဖွဲ့၊ စည်ပင်သာယာရေးအဖွဲ့တို့နှင့်ပူးပေါင်း၍ နတ်တလင်းမြို့ပေါ်ရှိ ဆေးပစ္စည်းအရောင်းဆိုင်များနှင့် မြို့မဈေးအတွင်း ရောင်းချနေသော ကုန်မျိုးစုံဆိုင်များနှင့် ဈေးကွက်အတွင်း စပ်ဆေးများ ရောင်းချနေမှုရှိ/ မရှိ (၄-၁၁-၂၀၂၄) ရက်နေ့တွင် ကွင်းဆင်းစစ်ဆေးဆောင်ရွက်ခဲ့ပါသည်။
သို့ဖြစ်ပါ၍ နတ်တလင်းမြို့ပေါ်ရှိ ဆေးပစ္စည်းအရောင်းဆိုင်များနှင့် မြို့မဈေးအတွင်းရောင်းချနေသော ကုန်မျိုးစုံဆိုင်များတွင် စပ်ဆေးများကို ဈေးကွက်အတွင်း ရောင်းချခြင်းမရှိကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပြည့်စုံစွာပါရှိစေရေးနှင့် ဆေးပစ္စည်းများပြတ်လပ်မှုမရှိစေရေး စားသုံးသူကာကွယ်ရေးဥပဒေနှင့်ကိုက်ညီမှုမရှိသော ကုန်စည်များအား ဝယ်ယူရောင်းချခြင်းမပြုရန် အသိပညာပေးဆောင်ရွက်ခဲ့ကြောင်းသိရှိရပါသည်။
DOCA(ပဲခူး)

စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာအသိပညာများ ကျယ်ကျယ်ပြန့်ပြန့်သိရှိနိုင်စေရေးရည်ရွယ်၍ ခရိုင်အတွင်းမြို့နယ်များရှိ ရပ်ကွက်/ ကျေးရွာများနှင့် အခြေခံပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက်လုပ်ဆောင်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ အောက်တိုဘာလ (၁၆)ရက်နေ့မှ (၃၁)ရက်နေ့အတွင်း ပြည်မြို့တွင် ပြည်ကုန်စည်ဒိုင်ပွဲရုံလုပ်ငန်းရှင်များသို့လည်းကောင်း၊ အ.ထ.က(၄) စာသင်ကျောင်းသို့လည်းကောင်း၊ မြို့နယ်တာဝန်ခံများနှင့် ဝန်ထမ်းများသည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးနှင့်ပူးပေါင်း၍ စားသုံးသူအသိပညာပေး (Talk Show) ပွဲပြုလုပ်ခြင်းကိုလည်းကောင်း၊ ရွှေတောင်မြို့ အ.မ.သ(ဖိုးသိန်းတန်)ကျောင်း၊ အ.မ.က(မီးလောင်)ကျောင်းနှင့် အ.မ.က (ဝါးတော)ကျောင်းများသို့လည်းကောင်း မြို့နယ်တာဝန်ခံများနှင့် ဝန်ထမ်းများသည် မြို့နယ်ပြန်ကြားရေးနှင့်ပြည်သူ့ဆက်ဆံရေးရုံးနှင့်ပူးပေါင်း၍ စားသုံးသူကာကွယ်ရေးဆိုင်ရာ အသိပညာပေး ဟောပြောခြင်းများဆောင်ရွက်ခဲ့ပါသည်။
အဆိုပါ အသိပညာပေးဟောပြောခြင်းများဆောင်ရွက်ရာတွင် သက်ဆိုင်ရာမြို့နယ်တာဝန်ခံများက စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများ၊ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေးဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ်ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန်၊ ကုန်အညွှန်းအမှတ်အသားပြည့်စုံစွာပါဝင်သော ကုန်စည်များကိုသာရွေးချယ်ဝယ်ယူကြရန် အသိပညာပေးဟောပြောခြင်းများဆောင်ရွက်ခဲ့ကြောင်းသိရပါသည်။
DOCA(ပဲခူး)

၃-၁၁-၂၀၂၄ ရက်နေ့၊ နေ့လယ် ၁၃:၀၀ နာရီအချိန်တွင် ဒဂုံဆိပ်ကမ်းမြို့နယ်၊ အထွေထွေအုပ်ချုပ်‌ရေးဦးစီးဌာနရုံးအစည်းအဝေးခန်းမ၌ အရှေ့ပိုင်းခရိုင်စားသုံးသူရေးရာဦးစီးဌာန၊ မြို့နယ်စီမံ အုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များ၊ သက်ဆိုင်ရာဌာနများမှ တာဝန်ရှိသူများ၊ စားသုံးဆီဖြန့်ဖြူးသည့် ကုမ္ပဏီတာဝန်ခံများ၊ လက်လီ/ လက်ကားကိုယ်စားလှယ်များ၊ ရပ်ကွက်အုပ်ချုပ်ရေးမှူးများနှင့် စားသုံးဆီရောင်းချခြင်းဆိုင်ရာ လုပ်ငန်းညှိနှိုင်းအစည်းအဝေးပြုလုပ်ခဲ့ကြောင်းသိရှိရပါသည်။
အဆိုပါအစည်းဝေးတွင် စားသုံးဆီဖြန့်ဝေရောင်းချမှုနှင့်ပတ်သက်၍ မြို့နယ်စီမံအုပ်ချုပ်ရေးမှူးက မြို့နယ်အတွင်းရှိ စားသုံးသူပြည်သူများ စားသုံးဆီမျှမျှတတရရှိစေရန် အိမ်ထောင်စုအလိုက် စာအုပ်စနစ်ဖြင့်ရောင်းချရန် စီစဉ်ဆောင်ရွက်ခြင်းကြောင်း၊ ကုမ္ပဏီများမှ ဖြန့်ဝေပေးသည့် ခွဲတမ်းရစားသုံးဆီများကို လက်လီ/ လက်ကားကိုယ်စားလှယ်များသို့ အလေးချင်တွယ်မှန်ကန်စွာပေးရန်နှင့် မသမာမှုများမရှိစေရေး ဝိုင်းဝန်းပူးပေါင်းဆောင်ရွက်ကြစေလိုကြောင်း၊ လစဉ်ဆောင်ရွက်နေသည့် လုပ်ငန်းများနှင့်ပတ်သက်သည်တို့ကို ရှင်းလင်းဆွေးနွေးခဲ့ကြောင်းသိရှိရပါသည်။
DOCA(ရန်ကုန်)

             မအူပင်ခရိုင် တရားမဝင်ကုန်သွယ်မှုတိုက်ဖျက်ရေး အထူးအဖွဲ့သည် အောက်တိုဘာ လကုန်ပိုင်းနှင့် နိုဝင်ဘာလ လဆန်းပိုင်းရက်တို့က မအူပင်မြို့နယ်အတွင်း တရားမဝင်ကုန်စည်များ သိုလှောင်ရုံများတွင် သိုလှောင်ထားရှိမှု ရှိ/မရှိနှင့် မအူပင် တိုးမြစ်ရေလမ်းတလျှောက် သယ်ယူပို့ဆောင်ခြင်း ရှိ/ မရှိကို (၅.၁၁.၂၀၂၄) ရက်နေ့ နံနက်(၁၀:၀၀) နာရီမှ နေ့လယ်(၁၅:၀၀) နာရီအချိန်အထိ ခရိုင်အဖွဲ့နှင့် အတူ ရှောင်တခင်ကွင်းဆင်း စစ်ဆေးခဲ့ပါသည်။

             မအူပင်ခရိုင်၊ မအူပင်မြို့နယ်ဒေသတွင်းရှိ အသေးစား၊ အလတ်စား၊ အငယ်စား စီးပွားရေးလုပ်ငန်းများ ဈေးကွက်ယှဉ်ပြိုင်ရာတွင်  မျှတမှုရှိစေရန် စားသုံးသူပြည်သူများအား ဘေးအန္တရာယ်ကင်းရှင်းသော ဘေးကင်းလုံခြုံစိတ်ချရမှုရှိသောကုန်စည်ကို သုံးစွဲနိုင်ရန်၊ စားသုံးသူအခွင့်အရေးနှင့် အကျိုးစီးပွားကာကွယ်ပေးနိုင်ရေး၊ တရားမဝင်ကုန်သွယ်မှုများ၏ အန္တရာယ်နှင့် တရားမဝင်ကုန်သွယ်မှုလမ်းကြောင်းပပျောက်စေရေးနှင့်  တရားမဝင်ကုန်သွယ်မှုကို ထိထိရောက်ရောက် အရှိန်အဟုန်မြှင့်တားဆီးနိုင်ရေး၊ တရားမဝင်တင်သွင်းလာသော  လူသုံးကုန် ပစ္စည်း၊ အိမ်သုံးကုန်ပစ္စည်းများသာမက နယ်ကျော် တရားမဝင်ဒေသထွက် လယ်ယာထွက်ကုန်များ စီးထွက်မှုမရှိစေရေး၊ ဒေသတွင်း ထိခိုက်မှုမရှိစေရေးရည်ရွယ်၍ မအူပင်ခရိုင် တရားမဝင် ကုန်သွယ်မှုတိုက်ဖျက်ရေး အထူးအဖွဲ့သည် အောက်တိုဘာလ၊ လကုန်ပိုင်းက မအူပင်မြို့နယ်အတွင်း တရားမဝင်ကုန်စည် သိုလှောင်ထားရှိမှုရှိ/ မရှိ သိုလှောင်ရုံများသို့ ကွင်းဆင်းစစ်ဆေးခြင်း၊ မအူပင်တိုးမြစ်ကမ်းဘေး တရာမဝင်ကုန်စည်များသယ်ယူနေမှုအခြေအနေများရှိ/ မရှိကို ကွင်းဆင်းစစ်ဆေးခဲ့ပြီး မအူပင်မြို့နယ်အတွင်း အသေးစား၊ အလတ်စား၊ အငယ်စား လုပ်ငန်းရှင့်များ ကုန်လမ်း/ ရေလမ်းကြောင်းများဖြင့် တရားမဝင် ကုန်စည်များသယ်ယူခြင်း/ သိုလှောင်ခြင်း မရှိကြောင်း သတင်းရရှိပါသည်။

DOCA(ဧရာဝတီ)

                ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်ဦးစီးမှူးရုံးမှ မြို့နယ်ဦးစီးမှူးနှင့် ဓနုဖြူစားသုံးဆီ ဖြန့်ဖြူးရောင်းချသူလုပ်ငန်းရှင်(၂၀)ဦးနှင့် စားသုံးသူရေးရာဦးစီးဌာန၊ မြို့နယ်ဦးစီးမှူးရုံးတွင် တွေ့ဆုံ၍ (၅.၁၁.၂၀၂၄) ရက်နေ့ နံနက်(၁၀:၀၀)နာရီအချိန်က စားသုံးဆီခွဲဝေဖြန့်ဖြူးမှုလုပ်ငန်းနှင့် စားသုံးသူအခွင့်အရေးနှင့် စီးပွားရေးလုပ်ငန်းရှင်၏ တာဝန်များအကြောင်းကို တွေ့ဆုံဆွေးနွေးခဲ့ကြောင်း သိရသည်။

              တွေ့ဆုံဆွေးနွေးရာတွင် မြို့နယ်ဦးစီးမှူးက ဓနုဖြူမြို့နယ်တွင် ဆီခွဲဝေဖြန့်ဖြူးရောင်းချသူ လုပ်ငန်းရှင်များအနေဖြင့် မိမိတို့ရရှိသောဆီခွဲတမ်းများကို စနစ်တကျထုတ်ယူပြီး၊ စားသုံးသူပြည်သူများကို ဆီထုတ်ယူခွင့်စာအုပ်နှင့်အတူ စနစ်တကျရောင်းချနိုင်ရေး၊ စားသုံးသူပြည်သူများ ၁လအတွင်း ၁၀ရက် တစ်ကြိမ် တစ်အိမ်ထောင် ၁ပိဿာ ၅၀ကျပ်သား ဆီဝယ်ယူခွင့်ကို အချိန်နှင့်အပြေးညီထုတ်ယူခွင့်ရရှိစေရန်ကို ဆောင်ရွက်ပေးရန်နှင့်၊ လ တစ်လ၏ နောက်ဆုံးရက်တွင် ဆီထုတ်ယူခွင့်အငြင်းပွားမှုမဖြစ်စေရန်၊ လကုန်ရက် ညနေ(၁၅း၀၀)နာရီအချိန်ထိ နောက်ဆုံးထားထုတ်ပေးရန် စားသုံးသူများသိရှိနားလည်နိုင်ဖို့ ကြိုတင်အသိပေးပြောကြားမှ အငြင်းပွားမှုလျော့နည်းမည်ဖြစ်ကြောင်းကို ဆွေးနွေးခြင်း၊ စားသုံးဆီရောင်းချသည့်လုပ်ငန်းရှင်များအနေဖြင့် ပြန်လည်ဖြန့်ဖြူးရောင်းချရာတွင် ဒေသအရောက် အခြေခံလက်ကားဈေးနှုန်းများအပေါ် လုပ်အားခအမှန်တကယ်ကုန်ကျမှု သယ်ယူစရိတ်ကိုတွက်ချက်ပြီး အပေါ် အမြတ်( ၂ ) ရာခိုင်နှုန်းအမြတ်ထက်မပိုစေသော ဈေးနှုန်းဖြင့်ဖြန့်ဖြူးရောင်းချကြကြောင်း၊ စားအုန်းဆီများအား ဈေးနှုန်းမြှင့်တင်ရောင်းချခြင်းများ မပြုလုပ်ပါကြောင်း၊ လုပ်ငန်းများအခက်အခဲရှိပါက စားသုံးသူရေးရာ ဦးစီးဌာနသို့ တင်ပြဆောင်ရွက်သွားမည်ဖြစ်ကြောင်းဆွေးနွေးပြီး၊ လုပ်ငန်းရှင်များကို စားသုံးသူကာကွယ်ရေးဥပဒေပါ အခန်း(၁၀) လုပ်ငန်းရှင်တာဝန်များအကြောင်း၊ တန်ဖိုးနှင့် အညီပေးချေဝယ်ယူမှုအပေါ် အလေးချိန်အပြည်အဝရောင်းချရပေးရန် စီးပွားရေးလုပ်ငန်းရှင် လုပ်ကိုင်ရာတွင် စီးပွားရေးကျင့်ဝတ်၊ စည်းကမ်း နှင့်အညီ ဖြောင့်မှတ်မှန်ကန်စွာ ဆောင်ရွက်ရန်နှင့် ပြစ်မှု ၊ပြစ်ဒဏ်များအကြောင်း ရှင်းလင်းဆွေးနွေးကြောင်း သိရှိရပါသည်။

DOCA(ဧရာဝတီ)