သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ ဟင်္သာတခရိုင်သည် လယ်ယာစိုက်ပျိုးရေးနှင့်ဥယျာဉ်ခြံမြေလုပ်ငန်း ကိုအဓိကထားလုပ်ကိုင်ကြပြီး၊ဒေသတွင်းကုန်ထုတ်လုပ်ငန်းများဖြစ်သည့် အသေးစားစက်မှု/လက်မှု လုပ်ငန်းများလည်း လုပ်ကိုင်ကြပါသည်။  ထိုလုပ်ငန်းများအထဲမှ ဟင်္သာတမြို့ ၊နတ်မော်တိုက်နယ်၊ ဂန့်ဂေါ်တောကျေးရွာတွင် ပလတ်စတစ်ခြင်းတောင်းလုပ်ငန်းကို အိမ်တိုင်းစေ့နီးပါး တစ်နိူင်တစ်ပိုင် လုပ်ကိုင်ကြရာ (၂၁.၆.၂၀၂၄)ရက်နေ့တွင် ဂန့်ဂေါ်တောကျေးရွာရှိ ဦးမြင့်စိုးပလတ်စတစ်ခြင်း တောင်း ထုတ်လုပ်သည့်လုပ်ငန်းသို့ စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူး ဦးမိုးကျော်မှ သွား ရောက်တွေ့ဆုံ၍ လုပ်ငန်းအခြေအနေများကို ကွင်းဆင်းလေ့လာခဲ့ပါသည်။  ပလတ်စတစ်ခြင်းတောင်း လုပ်ငန်းလုပ်ကိုင်ရာတွင် အသုံးပြုသော ကုန်ကြမ်းပစ္စည်း ပလတ်စတစ်ကြိုးပြားများကို  ရန်ကုန် စက်ရုံများမှ ဝယ်ယူပါသည်။ ကုန်ကြမ်းအဖြစ်သုံးရသော  ပလတ်စတစ် ကြိုးစ အချော တစ်ပိဿာ လျှင် (၂၅၀၀)ကျပ်နှင့် အကြမ်း တစ်ပိဿာလျှင် (၁၇၀၀) ကျပ်နှုန်းဖြင့် ဝယ်ယူရပါသည်။ ပလတ် စတစ် ကြိုးချော ၃ ပိဿာလျှင် ၅၀၀၀ ကျပ်တန် ခြင်းပလိုင်း ၁၀ လုံးခန့်ရရှိပြီး လုပ်သား(၂)ဦး အသုံးပြုရပါသည်။ လုပ်ငန်းရှင်အနေဖြင့် ပလတ်စတစ်ကြိုးချော ၃ ပိဿာ ကုန်လျှင် ဝင်ငွေ ၅၀၀၀၀ ကျပ် ရရှိပြီး၊  ကုန်ကျစရိတ်အဖြစ် ကြိုးချော ၃ပိဿာ ၇၅၀၀ ကျပ် နှင့် လုပ်သားခ(၂)ဦး ၂၀၀၀၀ ကျပ်နှုန်း ၊ စုစုပေါင်း (၂၇၅၀၀) ကျပ် ကုန်ကျပြီး၊ ခြင်းပလိုင်း(၁၀)လုံး ရောင်းရပါက အမြတ်ငွေ ၂၂၅၀၀ ကျပ် ဝင်ငွေရရှိပါသည်။ ထွက်ရှိလာသော ပလတ်စတစ်ခြင်းတောင်းများကို ပဲခူးတိုင်း ဒေသကြီး၊ ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးအတွင်းရှိ မြို့နယ်များသို့ အဝေးပြေး ကားဂိတ်များမှတစ်ဆင့် နေ့စဉ်ပို့ဆောင် ပေးလျက်ရှိပါသည်။ ပလတ်စတစ်ခြင်းတောင်းသည် လူသုံးများသော ပစ္စည်းဖြစ်၍ တစ်နှစ်ပတ်လုံး ရာသီမရွေး လုပ်ကိုင်ရသော လုပ်ငန်းဖြစ်သည့်အတွက်  ပုံမှန်ဝင်ငွေကောင်းသည်ဟု လုပ်ငန်းရှင်ထံမှ သိရှိရပါသည်။

DOCA(ဧရာဝတီ)

   စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည်  (၂၁.၆.၂၀၂၄) ရက်နေ့ နံနက်(၁၀:၃၀) အချိန်တွင် ကြံခင်းမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြု ဗဟိုဌာန(Community Centre) ခန်းမ၌ ကုန်အညွှန်းအမှတ်အသားဖော်ပြခြင်းဆိုင်ရာ Talk Show အစီအစဉ်ကို ဆောင်ရွက်ခဲ့ ပါသည်။

    အဆိုပါ အစီအစဉ်တွင်  မြို့နယ်တာဝန်ခံ ဦးကျော်နိုင်ဝင်းက   ၂၀၁၉ ခုနှစ် မတ်လ(၁၅) ရက်နေ့တွင်  ပြဌာန်းခဲ့သော စားသုံးသူကာကွယ်ရေးဥပဒေ၏  အခန်း(၁၈)ပါ  ကုန်အညွှန်းအမှတ်အသားဖော်ပြခြင်းဖြစ်သော  ပုဒ်မ ၄၁ အရ  စီးပွားရေးလုပ်ငန်းရှင်သည် ကုန်စည်များထုတ်ပိုးပြင်ဆင်မှုအပေါ်တွင် ကုန်စည်အမျိုးအစားအလိုက်  သတ်မှတ်ထားသော ကုန်စည်၏ တံဆိပ်အမှတ်အသား၊ ကုန်စည်၏အမျိုးအမည်၊ အရွယ် အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်းများ၊ ကုန်စည်များအပေါ်တွင် စတင်ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲအား သိသာထင်ရှားစွာ ဖော်ပြရန်၊ ကုန်စည်နှင့်စပ်လျဉ်း၍ ကျန်းမားရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော် ပြချက်များအား   စားသုံးသူများ သိရှိနိုင်စေရန် ကြိုတင်သတိပေးချက်များအားဖော်ပြရမည်ဖြစ်ကြောင်း၊ ပုဒ်မ ၄၃ အရ စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားဖော်ပြရာတွင် မြန်မာဘာသာ ဖြင့် ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသား ဖော်ပြရမည်ဖြစ်ပြီး၊ ထိုပြဌာန်းချက်နှင့် ကိုက်ညီမှုမရှိသည့် ကုန်စည်ကိုထုတ်လုပ်ခြင်း၊ ကုန်သွယ်ခြင်း သို့မဟုတ် ရောင်းချခြင်းမပြုစေရေး ပုဒ်မ ၆၈ အရ တားမြစ်ထားပြီး ဖောက်ဖျက်ကျုးလွန်ပါက နှစ် နှစ်ထက် မပိုသော ထောင်ဒဏ်ဖြစ်စေ၊ ကျပ်သိန်း ၂၀၀ ထက်မပိုသော ငွေဒဏ်ဖြစ်စေ ချမှတ်နိုင်ကြောင်းတို့အားလည်းကောင်း အကျယ်တဝင့်  ရှင်းလင်းဆွေးနွေးခဲ့ပါသည်။

DOCA(ဧရာဝတီ)

     မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူး(ကိုယ်စား) မော်လမြိုင်မြို့နယ်တာဝန်ခံ ဦးအောင်ညီညီခန့်နှင့် တာဝန်ရှိသူများသည် (၂၈-၆-၂၀၂၄) ရက်နေ့၊ နံနက်ပိုင်းတွင် ရေနံထွက်ကြီးကြပ်စစ်ဆေးရေးဦးစီးဌာနဦးဆောင်သော ပူးပေါင်းအဖွဲ့ဖြင့် မော်လမြိုင်မြို့အတွင်းရှိ စက်သုံးဆီအရောင်းဆိုင်များသို့သွားရောက်ကာ ဈေးကွက်စောင့်ကြည့်စစ်ဆေးခဲ့ကြောင်းသိရှိရပါသည်။ 

       စက်သုံးဆီဈေးကွက်စောင့်ကြည့်စစ်ဆေးရေးအဖွဲ့သည် မော်လမြိုင်မြို့အတွင်းရှိ PT power၊ New Day နှင့် Denko စက်သုံးဆီအရောင်းဆိုင်များသို့သွားရောက်၍ ရောင်းချနေမှုအခြေအနေများ၊ ဈေးနှုန်းနှင့် လက်ကျန်အခြေအနေများကိုကြည့်ရှုစစ်ဆေးပြီး ပူးပေါင်းအဖွဲ့မှ တာဝန်ရှိသူများက သက်ဆိုင်ရာဌာနများအလိုက် လိုအပ်သည်များမှာကြားခဲ့ပါသည်။

       စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံက စက်သုံးဆီရောက်ရှိမှုအခြေအနေ၊ အမှန်တကယ်ဖြန့်ဖြူးရောင်းချမှုရှိ/မရှိ၊ ရောင်းချရာတွင် အလေးချိန်၊ အချင်အတွယ်မှန်ကန်စွာရောင်းချမှုရှိ/မရှိနှင့် ဈေးနှုန်းမှန်ကန်စွာရောင်းချခြင်းဖြင့် စက်သုံးဆီဝယ်ယူသုံးစွဲသူများ ထိခိုက်နစ်နာမှုမရှိစေရေးဆောင်ရွက်ရန် ဆွေးနွေးမှာကြားခဲ့ကြောင်းနှင့် အဆိုပါပူးပေါင်းအဖွဲ့တွင် ရေနံထွက်ပစ္စည်းကြီးကြပ်ရေးဦးစီးဌာန၊ မီးသတ်ဦးစီးဌာန၊ ပြည်နယ်ရဲတပ်ဖွဲ့တို့မှတာဝန်ရှိသူများ ပူးပေါင်းပါဝင်ဆောင်ရွက်ခဲ့ကြကြောင်းသိရှိရပါသည်။

DOCA(မွန်)

       စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးနှင့် ဝန်ထမ်းများသည်  ၂၇-၆-၂၀၂၄ ရက်နေ့တွင် အထူးစုံစမ်းစစ်ဆေးရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ ပြည်တွင်းအခွန်များဦးစီးဌာန၊ စာရင်းစစ်ချုပ်ရုံး၊ မြန်မာနိုင်ငံရဲတပ်ဖွဲ့၊ ပြည်နယ်စည်ပင်သာယာရေးအဖွဲ့တို့နှင့်ပူးပေါင်း၍ မော်လမြိုင်မြို့ပေါ်ရှိ Ocean Super Center၊ K-Mart Mini Market နှင့်ဝံဈေးများသို့သွားရောက်၍ ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ကြောင်းသိရှိရပါသည်။

       ထိုသို့ကွင်းဆင်းစစ်ဆေးရာ Ocean Super Center၊ K-Mart Mini Market နှင့် ဝံဈေးများတွင် ပြည်တွင်းစားဆန်များကို ပြည်သူများသက်သာလွယ်ကူစွာဝယ်ယူစားသုံးနိုင်ရေးအတွက် ဆန်ကောင်တာများပုံမှန်ဖွင့်လှစ်ရောင်းချစေရေး၊ ကုန်စည်ပြတ်လပ်မှုမရှိအောင် ဝယ်ယူရောင်းချစေရေး၊ MRF ၏ သတ်မှတ်ထုတ်ပြန်ထားသည့် ရည်ညွှန်းဈေးအတွင်း ရောင်းချခြင်းရှိ/မရှိစစ်ဆေးခဲ့ရာ အဆိုပါဈေးဝယ်စင်တာများတွင် ဆန်ကောင်တာများဖွင့်လှစ်ပြီး 2 Kg, 5 Kg, 10 Kg, 25 Kg, Consumer Pack များ MRF ၏သတ်မှတ်ထုတ်ပြန်ထားသည့် ဈေးနှုန်းများအတိုင်း ရောင်းချလျက်ရှိကြောင်းသိရှိရပါသည်။

DOCA(မွန်)

   ဟင်္သာတခရိုင်၊ စားသုံးသူရေးရာဦးစီးဌာန ၊ ဒု-ခရိုင်ဦးစီးမှူးသည် (၂၁.၆.၂၀၂၄) ရက်နေ့ နံနက်(၁၀:၀၀)အချိန်တွင် ဟင်္သာတခရိုင်၊ လယ်တီကွင်းရပ်ကွက်၊ အင်္ဂပိုလမ်းရှိ မီးသတ်ဦးစီးဌာန၊ ခရိုင်မီးသတ်ဦးစီးမှူးရုံး၊ အစည်းအဝေးခန်းမတွင် ခရိုင်/မြို့နယ် မီးသတ်ဦးစီးဌာနရှိ ဝန်ထမ်းများအား  စားသုံးသူကာကွယ်ရေးအသိပညာပေး ဟောပြောခြင်းကို ဆောင်ရွက်ခဲ့ပါသည်။

    ဟောပြောပွဲတွင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူး ဦးမောင်မောင်မြတ်ခိုင်က စားသုံးသူရေးရာဦးစီးဌာန၏ သမိုင်းအကျဉ်း၊ မျှော်မှန်းချက်၊ ရည်မှန်းချက်များအကြောင်း၊ စားသုံးသူ ကာကွယ်ရေးဥပဒေပါ စားသုံးသူ၏ အဓိပ္ပါယ်ဖွင့်ဆိုချက်၊ စားသုံးသူအခွင့်အရေးနှင့်တာဝန်များ၊ စားသုံးသူများသည် ကုန်စည်ကို ရွေးချယ်ဝယ်ယူတတ်စေရန်၊ ကုန်အညွှန်းအမှတ်အသားနှင့် စပ် လျဉ်း၍ ဖော်ပြပါရှိသည့် အချက်အလက်များကို သေချာစွာစိစစ်ဝယ်ယူနိုင်ရန်၊ အစားအသောက်နှင့် ကုန်စည်တွေပေါ်မှာ ဖော်ပြရမည့် ကုန်အညွှန်းအမှတ်အသားများအကြောင်း၊ ဝယ်ယူအသုံးပြုခဲ့သော ကုန်စည်နှင့် ဝန်ဆောင်မှုများကြောင့် နစ်နာဆုံးရှုံးမှုများ ဖြစ်ပေါ်လာပါက ပြောဆိုတင်ပြ တိုင်ကြားခွင့်နှင့် ပြန်လည်ကုစားနိုင်ခွင့်များအကြောင်း၊  ပြစ်မှုနှင့် ပြစ်ဒဏ်များအကြောင်းနှင့် စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေး စင်တာ(Consumer Information and Complaint Center) CICC ဖွင့်လှစ်ထားရှိမှုအခြေအနေကိုလည်ကောင်း၊ စားသုံးသူရေးရာဦးစီး ဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်းနှင့် Consumer Call Center 1535 သို့ ဆက်သွယ်မေးမြန်းနိုင်ကြောင်းကိုလည်းကောင်းစသည်တို့ကို အသိပညာပေးဟောပြောဆွေးနွေးခဲ့ပြီး၊ စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ဧရာဝတီ)