သတင်းနှင့် လှုပ်ရှားမှုများ

            ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ ဝန်ထမ်း များသည်  ဇူလိုင်လ (၂၈) ရက်နေ့ ၊ နံနက် (၁၀:၃၀) နာရီအချိန်တွင် တောင်ကြီးမြို့၊ အမှတ်(၅) အခြေခံပညာအထက်တန်းကျောင်း၌ စားသုံးသူကာကွယ်ရေးဆိုင်ရာ အသိပညာပေး‌ဟောပြောပွဲ ကျင်းပခြင်းနှင့် ကျောင်းမုန့်ဈေးတန်း စစ်ဆေးခြင်းများ ဆောင်ရွက်ခဲ့ပါသည်။

         ရှေးဦးစွာ ကျောင်းအုပ်ဆရာမကြီး ကိုယ်စား တာဝန်ခံဆရာမ ဒေါ်ခင်စန်းက အဖွင့်အမှာစကားပြောကြားပြီး စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ ဦးခွန်ကျော်ဌေး (လက်ထောက်ညွှန်ကြားရေးမှူး)က စားသုံးသူကာကွယ်ရေးဆိုင်ရာ အသိပညာပေးဟောပြောပွဲ ကျင်းပပြုလုပ်ရသည့် ရည်ရွယ်ချက်များ ရှင်းလင်းပြောကြားပြီး ဒေါ်ထူးအိန္ဒြာဗိုလ် (အကြီးတန်းစာရေး) က စားသုံးသူအဓိပ္ပာယ်၊ စားသုံးသူကာကွယ်ရေးဥပဒေတွင် ပါရှိသော အခန်း (၉)ပါ စားသုံးသူ အခွင့်အရေးနှင့် တာဝန်များ၊ အခန်း (၁၀) ပါ စီးပွားရေးလုပ်ငန်းရှင်များ၏ တာဝန်များအကြောင်း၊ ကုန်အညွှန်းအမှတ်အသားဖော်ပြခြင်းအကြောင်းနှင့် စားသုံးသူထိခိုက်နစ်နာ ဆုံးရှုံးမှုဖြစ်ပေါ်လာပါက တိုင်ကြားနိုင်မည့် ပုံစံနည်းစနစ်များအကြောင်းကို ဟောပြောဆွေးနွေးခဲ့ပြီး တက်ရောက်လာသော ဆရာ/ ဆရာမများ၊ ကျောင်းသား/ ကျောင်းသူများက သိရှိလိုသည်များကို အပြန်အလှန်ဆွေးခဲ့ ကြောင်း သိရှိရသည်။

         အဆိုပါ အခမ်းအနားတွင် အမှတ်(၅) အခြေခံပညာအထက်တန်းကျောင်းရှိ ဆရာ/ ဆရာမ များနှင့် ကျောင်းသား/ ကျောင်းသူများ (၂၁၀) ဦးခန့် တက်ရောက်ခဲ့ကြောင်း သိရှိရသည်။

        ဆက်လက်၍  အမှတ်(၅) အခြေခံပညာ အထက်တန်းကျောင်း ကျောင်းဝင်းအတွင်းရှိ ကျောင်းမုန့်ဈေးတန်းတွင် အစားအသောက်၊ အချိုရည်များနှင့် မုန့်မျိုးစုံတို့ ရောင်းချလျက်ရှိသော ဆိုင်များရှိ ကုန်ပစ္စည်းများကို ဆရာ/ ဆရာမများ ၊ ကျောင်းသား/ ကျောင်းသူများ၊ စားသုံးသူ ပြည်သူများ ဘေးအန္တရာယ်ကင်းရှင်း၍ လုံခြုံစိတ်ချမှုရှိစေရေးအတွက် သက်တမ်းလွန် အစား အသောက်များ ဈေးကွက်အတွင်း ရောင်းချမှု ရှိ/ မရှိ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှု ရှိ/ မရှိ တို့ကို ဈေးကွက်စစ်ဆေးခြင်း လုပ်ငန်းများကိုပါ  ဆောင်ရွက်ခဲ့ကြောင်း သိရသည်။

DOCA(ရှမ်း)

        (၂၈-၇-၂၀၂၂)ရက်နေ့ နေ့လယ်(၁၀:၀၀)နာရီအချိန်တွင် မြို့နယ်စီမံအဖွဲ့ဝင်-၁ ဗိုလ်မှူးတင်ဝင်းထွဋ် ဦးဆောင်ပြီး မြို့နယ်ရဲတပ်ဖွဲ့၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ သစ်တောဦးစီးဌာန၊ အကောက်ခွန်ဦးစီးဌာန၊ ပြည်တွင်းအတွင်းများဦးစီးဌာန၊ ကုန်သွယ်ရေးဦးစီးဌာန၊ စားသုံးသူရေးရာဦးစီးဌာနနှင့် မောင်တောကုန်သည်ကြီးအသင်းမှ တာဝန်ရှိသူများပါဝင်သော မောင်တောမြို့နယ် တရားမဝင်ကုန်သွယ်မှုတိုက်ဖျက်ရေး အထူးအဖွဲ့သည် မောင်တောမြို့ ကညင်းချောင်း စီးပွားရေးဇုန်အတွင်း အဝင်/အထွက် ကုန်တင်မော်တော်ယာဉ်၊ စက်လှေများအား တရားမဝင်ကုန်ပစ္စည်းများ သယ်ဆောင်လာခြင်းရှိ/မရှိ စစ်ဆေးခြင်း ဆောင်ရွက်ခဲ့ပါသည်။

          မောင်တောမြို့နယ် ကညင်းချောင်းစီးပွားရေးဇုန်အတွင်းမှ ပြည်တွင်း/ပြည်ပမှ တရားမဝင် ကုန်ပစ္စည်းများ ဝင်ရောက်ခြင်းရှိ/မရှိ စစ်ဆေးခြင်းကို လစဉ်ပုံမှန်ဆောင်ရွက်ခြင်းဖြစ်ပြီး တရားမဝင် ကုန်ပစ္စည်းများ ဖမ်းဆီရရှိခြင်း မရှိခဲ့ပါကြောင်း သတင်းရရှိပါသည်။

DOCA(ရခိုင်)

နေပြည်တော်၊ (၁-၈-၂၀၂၂)

           တရုတ်နိုင်ငံ (GACC) သို့ SPS Protocol ပါ သတ်မှတ်ချက်များနှင့်အညီ ပြောင်းဆံတင်ပို့နိုင် ရေး အဆိုပြုလျှောက်ထားလာသည့် ကုမ္ပဏီများ၏ သိုလှောင်ရုံ/ အခြောက်ခံစက်/ နေလှန်းကွင်းများ စစ်ဆေးခဲ့မှုအပေါ် စိစစ်ရွေးချယ်ဆောင်ရွက်နိုင်ရေး Working Task Force အဖွဲ့ လုပ်ငန်းညှိနှိုင်း အစည်းအဝေးကို ၁-၈-၂၀၂၂ ရက်နေ့၊ နေ့လယ် ၁:၀၀ နာရီတွင် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူ‌ရေးရာဦးစီးဌာန၊ ရုံးအမှတ်(၅၂) အစည်းအဝေးခန်းမ၌ Virtual Meeting ဖြင့် ကျင်းပပြုလုပ်ခဲ့ပါသည်။ အဆိုပါ အစည်းအဝေးသို့ Working Task Force အဖွဲ့၏ အဖွဲ့ခေါင်းဆောင်၊ စိုက်ပျိုးရေးဦးစီးဌာနမှ ဒုတိယညွှန်ကြားရေးမှူးချုပ်၊ အဖွဲ့ဝင်များဖြစ်သည့် မြန်မာကုန်သွယ်မှုမြှင့်တင်ရေးအဖွဲ့တို့မှ ဒုတိယညွှန်ကြားရေးမှူးချုပ်နှင့် စားသုံးသူရေးရာဦးစီးဌာနနှင့် စိုက်ပျိုးရေးဦးစီးဌာနတို့မှ ညွှန်ကြားရေးမှူးများ၊ မြန်မာကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်း လီမိတက်(MITS) မှ အုပ်ချုပ်မှုဒါရိုက်တာ၊ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်းနှင့် မြန်မာနိုင်ငံပြောင်း လုပ်ငန်းအသင်းတို့မှ ဥက္ကဋ္ဌနှင့် ကိုယ်စားလှယ်များ တက်ရောက်ခဲ့ပါသည်။

            အဆိုပါအစည်းအဝေးတွင် Working Task Force အဖွဲ့၏ အဖွဲ့ခေါင်းဆောင်၊ စိုက်ပျိုးရေး ဦးစီးဌာနမှ ဒုတိယညွှန်ကြားရေးမှူးချုပ်က တရုတ်ပြည်သူ့သမ္မတနိုင်ငံ၊ (GACC) နှင့် မြန်မာနိုင်ငံစိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန (MOALI) တို့အကြား မြန်မာနိုင်ငံမှ ပြောင်းကို တရုတ်ပြည်သူ့ သမ္မတနိုင်ငံသို့ တင်ပို့ရန် အပင်ကျန်းမာရေးဆိုင်ရာ လိုအပ်ချက် သဘောတူစာချုပ်အရ မြန်မာနိုင်ငံမှ ပြောင်းကို တရုတ်နိုင်ငံ (GACC) သို့ တင်ပို့နိုင်ရေးအတွက် အဆိုပြုလျှောက်ထားလာသည့် ကုမ္ပဏီများ၏ သိုလှောင်ရုံ/ အခြောက်ခံစက်/ နေလှန်းကွင်းများစစ်ဆေးခဲ့မှုအပေါ် စိစစ်ခဲ့ ရာ ပထမအကြိမ်အဖြစ် သတ်မှတ်ချက်နှင့်ကိုက်ညီသည့် ကုမ္ပဏီ (၈၆) ခုအား စိုက်ပျိုးရေးဦးစီးဌာနမှ Registration Code အမှတ်များနှင့်အတူ  GACC သို့ပေးပို့ထားပြီးဖြစ်ပါကြာင်း၊ ဆက်လက်၍ ဒုတိယ အကြိမ် ထပ်မံစိစစ်ရွေးချယ်ထားသည့် ကုမ္ပဏီ (၂၂)ခုအား ဆက်လက်ပေးပို့နိုင်ရေး ဆောင်ရွက်လျက် ရှိပါကြောင်း၊ ရှမ်းပြည်နယ်အစိုးရအဖွဲ့က ပြန်လည်စိစစ်ပေးရန် ညှိနှိုင်းလာသည့် ကုမ္ပဏီ (၃) ခုနှင့် အသင်းမှ တင်ပြလာသည့် ကုမ္ပဏီ (၁) ခု၊ စုစုပေါင်း ကုမ္ပဏီ (၄) ခုတို့အား ပြန်လည်စိစစ်ရွေးချယ်ပေး နိုင်ရေး ဝိုင်းဝန်းအကြံပြုဆွေးနွေးပေးစေလိုကြောင်း ပြောကြားခဲ့ပါသည်။

            ထို့နောက် စားသုံးသူရေးရာဦးစီးဌာန၊ ညွှန်ကြားရေးမှူး ဦးဆန်းမြင့်က ပြန်လည်စိစစ် ရွေးချယ်ပေးရန် တင်ပြလာသည့် ကုမ္ပဏီ(၄)ခု၏ သိုလှောင်ရုံများနှင့် အခြောက်ခံစက်များ၏ ပြင်ဆင် ဆောင်ရွက်ပြီးမှုအခြေအနေအား ဓာတ်ပုံမှတ်တမ်းများဖြင့် ရှင်းလင်းတင်ပြခဲ့ရာ တက်‌ရောက်လာကြ သည့် Working Task Force အဖွဲ့ဝင်များက အပြန်အလှန် ဆွေးနွေးခဲ့ကြပြီး တရုတ်နိုင်ငံ (GACC) တွင် မှတ်ပုံတင်ခွင့်ရရှိရေး ဒုတိယအကြိမ်ပေးပို့မည့် ကုမ္ပဏီ(၂၂) ခုစာရင်းတွင် တစ်ပေါင်းတည်း ထည့်သွင်းသွားရန် ဆွေးနွေးခဲ့ကြပါသည်။

            တရုတ်နိုင်ငံ (GACC) သို့ ပထမအကြိမ်တွင် ကုမ္ပဏီ (၈၆) ခုစာရင်းအား ထားရှိပြီး ယခု ဒုတိယအကြိမ်ပေးပို့ရန် စီစဉ်ရွေးချယ်ထားသည့် ကုမ္ပဏီ (၂၆) ခုရှိသည့်အတွက် စုစုပေါင်းကုမ္ပဏီ (၁၂၂) ခုရှိကြောင်း သတင်းရရှိပါသည်။

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်၊ ဒု-ခရိုင်ဦးစီးမှူးနှင့်ဝန်ထမ်းများသည်၂၀၂၂ ခုနှစ် ၊ဇူလိုင်လ(၂၁)ရက်နေ့၊ နံနက်(၉:၃၀)အချိန်တွင် ပခုက္ကူမြို့၊ အ.ထ.က(၁)ကျောင်း၌ လည်းကောင်း၊ (၂၃)ရက်နေ့ နံနက်(၉:၀၀)အချိန်တွင် အ.ထ.က(၂)ကျောင်း၌လည်းကောင်း၊ (၂၅)ရက်နေ့ နံနက် (၁၁:၀၀)အချိန်တွင် အ.ထ.က(၃)၌လည်းကောင်း စားသုံးသူကာကွယ်ရေးအသိ ပညာပေးဟောပြောပွဲများ ကျင်းပပြုလုပ်ခဲ့ပါသည်။

          ခရိုင်ဦးစီးမှူးမှ ဆွေးနွေးရာတွင် ဌာန၏သမိုင်းကြောင်းနှင့်  လုပ်ငန်းဆောင်ရွက်ချက်များ ၊ ဌာန၏မျှော်မှန်းချက် ၊ရည်မှန်းချက်များ  စားသုံးသူကာကွယ်ရေးဥပဒေပါ အကြောင်းအရာများ၊ စားသုံးသူပြည်သူများအတွက် ကုန်စည်(သို့မဟုတ်)ဝန်ဆောင်မှုနှင့်စပ်လျဉ်း၍ ဘေးအန္တရာယ် ကင်းရှင်းစေရေးနှင့် ခွင့်မပြုဆိုးဆေးများ၏အန္တရာယ်များအကြောင်း၊ ထုတ်ကုန်များလုံခြုံစိတ်ချမှုရှိစေရေးတို့ကို ဆောင်ရွက်နေရုံသာမက စားသုံးသူနစ်နာဆုံးရှုံးမှုများအတွက် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေး စင်တာ(CICC) အားဖွင့်လှစ်ထားရှိမှုအား Power Point ဖြင့် အသေးစိတ်ရှင်းလင်း ဆွေးနွေးပါသည်။

          ဒု-ခရိုင်ဦးစီးမှူးမှ ဆွေးနွေးရာတွင် ကုန်စည်များဝယ်ယူသုံးစွဲရာတွင် သတိပြုရမည့် ကုန်အညွှန်း အမှတ်အသားများနှင့် စပ်လျဉ်းသည့်သိရှိရမည့်သတင်းအချက်အလက်များ၊  ထုတ်ကုန်လုံခြုံစိတ်ချ ရမှုရှိသောကုန်စည်များအား အသိတရား၊ သတိထား၍ သုံးစွဲစေလိုကြောင်း၊ စားသုံးသူ ထိခိုက်နစ်နာမှု နှင့်စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့် နေရာများနှင့် နည်းလမ်းများအကြောင်း၊ စားသုံးသူရေးရာ ကိစ္စများစုံစမ်းမေးမြန်းရန်အတွက် Consumer Call Center အားဖွင့်လှစ်ထားကြောင်း အကျယ်တဝင့်ဆွေးနွေးပါသည်။

          စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ ဆွေးနွေးရာတွင် စားသုံးသူများတွင် အခွင့်အရေးများရှိ၍ သိရှိရန်လိုအပ်ကြောင်း၊ အခွင့်အရေးကို ရယူနိုင်မှသာလျှင် နစ်နာဆုံးရှုံးမှုများ မရှိဘဲ နောင်အနာဂတ်တွင် ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ စားသုံးသူ၏ တာဝန်များ လည်းရှိ၍ တိကျစွာလိုက်နာရန်လိုအပ်ကြောင်း၊ ကုန်စည်များဝယ်ယူသုံးစွဲရာတွင် သတင်းအချက်အလက်များ ပြည့်စုံစွာရယူ၍  ဘေးအန္တရာယ်ကင်းရှင်းစွာအသုံးပြုနိုင်ပြီး စိတ်ကျေနပ်မှုများရရှိစေလိုကြောင်း၊ အမှန်တကယ် နစ်နာဆုံးရှုံးမှုများဖြစ်ပေါ်ပါက အထောက်အထား များနှင့်အတူ မိမိတို့ဌာနသို့ တိုင်ကြားစေခြင်းဖြင့် ကုစားခွင့်များရရှိမှာဖြစ်ကြောင်း၊ Online Shopping ဝယ်ယူသုံးစွဲခြင်းနှင့် ပတ်သက်၍ ဆိုးကျိုးများဖြစ်ပေါ်လာနိုင်သောကြောင့် စိစစ် အသုံးပြုစေလိုကြောင်း၊ စားသုံးရန်မသင့်သော အစားအစာများအကြောင်းအား ကျယ်ကျယ် ပြန့်ပြန့်ဆွေးနွေးခဲ့ပြီး စားသုံးသူကာကွယ်ရေးဥပဒေနှင့် ပတ်သက်၍ မေးမြန်းခြင်းအပေါ် ဖြေဆိုနိုင်သောကျောင်းသား/သူများအား ဆုချီးမြှင့်ခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များဖြန့်ဝေခဲ့ပါသည်။

DOCA(မကွေး)

ရက်စွဲ၊ ၂၇.၇.၂၀၂၂

            စီးပွားရေးနှင့်ကူးသန်းရောင်းဝယ်ရေးဦးစီးဌာန၊ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံး၊ ခရိုင်ဦးစီးမှူးဒေါ်သန်းသန်းတင်နှင့် ဝန်ထမ်း(၃)ဦးသည်မြို့နယ်စည်ပင်သာယာရေး အဖွဲ့၊ မြို့နယ်အထွေထွေအုပ်ချူပ်ရေးဦးစီးဌာနနှင့် ခရိုင်စီမံကိန်းရေးဆွဲရေး ဦးစီးဌာနတို့မှ တာဝန်ရှိသူများနှင့်အတူ ၂၀၂၂ခုနှစ်၊ ဇူလိုင်လ ၂၁ရက်နေ့က ထုတ်ကုန်လုံခြုံစိတ်ချရမှုရှိစေရန် ရည်ရွယ်၍ စစ်ကိုင်းမြို့၊ မိုးဇာရပ်ကွက်ရှိ နေလ စတိုး၊ မြို့မ စတိုးနှင့် ခိုင်ဆွေသန်း စတိုး၊ ပန်းဘဲတန်းရပ်ကွက်ရှိ မြကျွန်းသာ စတိုးဆိုင်များသို့ ကွင်းဆင်း၍  Mistine အလှကုန် ပစ္စည်းများတွင် မြန်မာဘာသာဖြင့် ကုန်အညွှန်းအမှတ်အသား ဖော်ပြထားခြင်း ရှိ/မရှိနှင့် ထိုင်းနိုင်ငံထုတ် Gano အမှတ်တံဆိပ်ကော်ဖီ ( 3 in 1)၊ သွားတိုက်ဆေးနှင့် ဖြည့်စွက်အစားအစာများ  ဈေးကွက်အတွင်း တရားမဝင် တင်သွင်းရောင်းချနေမှု  ရှိ/ မရှိ ဈေးကွက်စောင့်ကြည့်စစ်ဆေးခဲ့ရာ Mistine အလှကုန်ပစ္စည်းများတွင် စားသုံးသူကာကွယ်ရေးဥပဒေအခန်း(၁၈)အရ ကုန်အညွှန်း အမှတ်အသားနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာ ထင်ရှားစွာ ဖော်ပြထားကြောင်း စိစစ်တွေ့ရှိခဲ့ရပါသည်။ စစ်ကိုင်းမြို့တွင် ထိုင်းနိုင်ငံထုတ် Gano အမှတ်တံဆိပ် ကော်ဖီ(3 in 1) ၊ သွားတိုက်ဆေးနှင့် ဖြည့်စွက်အစားအစာများ ရောင်းချခြင်းမရှိကြောင်း တွေ့ရှိရပြီး စစ်ကိုင်းခရိုင်ဦးစီးမှူးက ဆိုင်ပိုင်ရှင်များအား တရားမဝင်တင်သွင်း ရောင်းချနေသည့် ထိုင်းနိုင်ငံထုတ် Gano အမှတ်တံဆိပ်ကို ဝယ်ယူရောင်းချခြင်းမပြုရန် အသိပညာပေး ဆွေးနွေးခဲ့ပါကြောင်း သတင်းရရှိပါသည်။

DOCA(စစ်ကိုင်း)