သတင်းနှင့် လှုပ်ရှားမှုများ

မုံရွာ၊ ဩဂုတ် ၃၁

     စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်း ရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက် အတွင်းမှ ပပျောက်သွားစေရေးနှင့် စားသုံးသူကာကွယ်ရေး ဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာဖော်ပြထားမှု အခြေအနေတို့နှင့်စပ်လျဉ်း၍   ဈေးကွက်စောင့်ကြည့်စစ်ဆေးခြင်းလုပ်ငန်းများအား တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ်ဆောင်ရွက်လျက်ရှိကြောင်းသိရှိရပါသည်။

   ထိုသို့စောင့်ကြည့်စစ်ဆေးနိုင်ရန် စားသုံးသူရေးရာဦးစီးဌာနမှ ဒုတိယဦးစီးမှူးအောက်မနိမ့်သူကို စစ်ဆေးရေးမှူးအဖြစ် ခန့်အပ်တာဝန်ပေး၍ စားသုံးသူကာကွယ်ရေးလုပ်ငန်းများကို ဆောင်ရွက်လျက် ရှိပါသည်။ ဈေးကွက်စောင့်ကြည့်စစ်ဆေးရာတွင် မိမိတို့ဌာနမှဦးဆောင်၍သော်လည်းကောင်း၊ မိတ်ဖက် ဌာနများဖြစ်သည့် အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျန်းမာရေး၊ စည်ပင်၊ စိုက်ပျိုးရေး၊ အထွေထွေအုပ်ချုပ်ရေးဦးစီးဌာနတို့ပါဝင်သော အဖွဲ့ဖြင့်သော်လည်းကောင်း စောင့်ကြည့်စစ်ဆေးခြင်း လုပ်ငန်းများ ဆောင်ရွက်လျက်ရှိပါသည်။

   စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်များလုံခြုံစိတ်ချရမှုရှိစေရေး၊ ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်း စွာအသုံးပြုခွင့်ရရှိစေရေး၊ ဘေးအန္တရာယ်ရှိသော ကုန်စည်များဈေးကွက်အတွင်းမှ ပပျောက်သွားစေရေး တို့အတွက် ၂၀၂၂ခုနှစ် ဩဂုတ်လတွင် ဈေးကွက်အတွင်းရောင်းချနေသော စားသောက်ကုန်များ၊ လူသုံးကုန်များအား ဈေးကွက်စောင့်ကြည့်စစ်ဆေးရေးလုပ်ငန်းများ (၃၀)ကြိမ် ဆောင်ရွက်ခဲ့ကြောင်း၊ ထိုသို့ဆောင်ရွက်ရာတွင် စစ်ကိုင်းတိုင်းဒေသကြီးအနေဖြင့် တစ်နှစ်စာအတွင်း ဦးစားပေးဆောင်ရွက်ရန် လျာထားသည့်  ကုန်စည် (၇) မျိုးဖြစ်သည့် အချိုရည်၊ စားသုံးဆီ၊ သွားတိုက်ဆေး၊ ဆပ်ပြာခဲ၊ ဆပ်ပြာမှုန့်၊ ဆပ်ပြာရည်၊ ခေါက်ဆွဲခြောက်၊ စက်သုံးဆီနှင့် အသားလုံး၊ အသားချောင်းများစစ်ဆေးခြင်း၊ မှတ်ပုံတင်ခြင်းမရှိသော ဆေးဝါးများ၊ အလှကုန်ပစ္စည်း၊ ခွင့်ပြုချက်မပါသော စားသောက်ကုန်များအား ဈေးကွက်စောင့်ကြည့်စစ်ဆေးခြင်းတို့ဆောင်ရွက်ခဲ့ကြောင်း၊ စားသုံးသူများအနေဖြင့်  ကုန်စည်များ ဝယ်ယူအသုံးပြုရာတွင် ယင်းကုန်စည်နှင့်ပတ်သက်သည့်သတင်းအချက်အလက်များ ပြည့်စုံစွာရရှိနိုင်ပြီး စားသုံးသူ၏လိုအပ်ချက်နှင့်ကိုက်ညီသည့်ကုန်စည်များအားရွေးချယ်ဝယ်ယူနိုင်စေရေးအတွက် စားသုံးသူ ကာကွယ်ရေးဥပဒေပါ မြန်မာဘာသာဖြင့် ကုန်အညွှန်း အမှတ်အသားပြည့်စုံစွာဖော်ပြနိုင်ရေး၊ ဌာန၏ အတည်ပြုချက်ရယူရန်တင်ပြလာပါက ဌာနမှ ဥပဒေနှင့်ကိုက်ညီမှု ရှိ/မရှိ စိစစ်ပြန်ကြားပေးနိုင်ရေးတို့ကို ဆွေးနွေးအသိပေးပြောကြားခဲ့ပြီး သက်ဆိုင်ရာဌာနများမှလည်း သတ်မှတ်လိုင်စင်များ ရှိ/မရှိ စစ်ဆေးပြီး၊ လိုင်စင် လျှောက်ထားနိုင်ရေး၊ သက်တမ်းကုန်လိုင်စင်များအား သက်တမ်းတိုးဆောင်ရွက် နိုင်ရေး၊ စားသုံးရန် သို့မဟုတ် အသုံးပြုရန် မသင့်သည့် ကုန်စည်များအား ရောင်းချခြင်းမပြုစေရေး အသိပညာပေးပြောကြားခဲ့ပါသည်။

DOCA(စစ်ကိုင်း)

      ရန်ကုန်တိုင်းဒေသကြီး တွံတေးခရိုင် ကွမ်းခြံကုန်းမြို့နယ် ဈေးပိုင်းရပ်ကွက် သုံးပန်လှလမ်းတွင် နေထိုင်သော ဦးမျိုးဝင်းနှင့် ဒေါ်လှအုန်းတင်တို့မှ လင်္ကာဒီပ ပဲမုန့်လုပ်ငန်းကို မိသားစု တစ်ပိုင်တစ်နိုင် လုပ်ငန်းအဖြစ် ယနေ့တိုင်လုပ်ကိုင်လျက်ရှိကြကြောင်း လေ့လာသိရှိရသည်။ ဦးမျိုးဝင်းနှင့် ဒေါ်လှအုန်း တင်တို့သည် ယခင်က လင်္ကာဒီပအမည်ဖြင့် လက်ဘက်ရည်ဆိုင် ဖွင့်လှစ်ရောင်းချလျက်ရှိရာ မိသားစုများသဖြင့် လက်ဘက်ရည်ဆိုင်တစ်ခုတည်းဖြင့် စားဝတ်နေရေး လုံလောက်မှုမရှိ၍ ပဲမုန့် လုပ်ငန်းကို ၂၀၀၉ခုနှစ်မှစတင်လုပ်ကိုင်ခဲ့ရာ ၂၀၁၅ခုနှစ် နောက်ပိုင်း ကာလများတွင် လူသိများ လူကြိုက်များ ရောင်းအားကောင်းသော လုပ်ငန်းတခုအဖြစ် ရပ်တည်နိုင်လာခဲ့ပါသည်။

     ပဲမုန့်လုပ်ရန် ပါဝင်သောအဓိက ကုန်ကြမ်းပစ္စည်းများမှာ ကုလားပဲ၊ ဂျုံ၊ သကြား၊ ဆီတို့ဖြင့်ပြုလုပ်ပြီး လင်္ကာဒီပဆိုင်မှ တစ်နှစ်ပတ်လည် ရောင်းအားအပေါ် တွက်ချက်ပါက ပျမ်းမျှ တစ်နေ့လျင် ပဲမုန့်အလုံး (၆၀၀၀)ခန့် ရောင်းချရကြောင်း သိရှိရပါသည်။ လင်္ကာဒီပအမှတ်တံဆိပ် ပဲမုန့်သည် ကွမ်းခြံကုန်း မြို့နယ်အတွင်း သာမက ၎င်းမြို့နယ်နှင့်ဆက်စပ်လျှက်ရှိသော အခြား မြို့နယ်၊ တိုင်းဒေသကြီးများ အထိပါ လူကြိုက်များ ရောင်းအားကောင်းသော မုန့်အမျိုးအစား ဖြစ်ပါသည်။ ကွမ်းခြံကုန်းမြို့နယ်သို့ အလည်လာသည့် ဧည့်သည်များ အိမ်အပြန်လက်ဆောင်အဖြစ်လည်း ပဲမုန့်ကို ဝယ်ယူသွားကြသူ များရှိပါသည်၊ ယခုအခါ တွင် အဆိုပါလုပ်ငန်းကို ဝန်ထမ်း(၁၇)ဦးဖြင့် ပုံမှန်လည်ပတ်လျက်ရှိပါသည်၊ အဆိုပါလုပ်ငန်းသည် မိသားစုစားဝတ်နေရေး ပြေလည်သည့်အပြင် တခြားအလုပ်သမား ဝန်ထမ်းများကိုသာ ဝင်ငွေရရှိအောင် စွမ်းဆောင် နိုင်သော လုပ်ငန်းအဖြစ် ရပ်တည်လျက်ရှိကြောင်း သိရှိရပြီး ဆယ်ခုပါတစ်ဘူးကိုငွေကျပ် ၂၀၀၀ဖြင့် ရောင်းချလျက်ရှိပါသည်၊ ထို့အပြင် လင်္ကာဒီပပဲမုန့် သည် စားသုံးသူကာကွယ်ရေးဥပဒေအရ ကုန်အညွှန်း အမှတ်အသား ပြည့်စုံစွာဖော်ပြထားသော ဒေသထွက်ကုန်ပဲမုန့်ဖြစ်ကြောင်း ရေးသားတင်ပြလိုက်ရပါသည်။

DOCA(ရန်ကုန်)

           (၂၉-၈-၂၀၂၂)ရက်နေ့ နေ့လည်(၁၀:၀၀)နာရီအချိန်တွင် မောင်တောမြို့နယ် တရားမဝင် ကုန်သွယ်မှုတိုက်ဖျက်ရေးအထူးအဖွဲ့မှ အကောက်ခွန်ဦးစီးမှူး ပြည့်ဖြိုးသိုက် ဦးဆောင်ပြီး မြို့နယ် ရဲတပ်ဖွဲ့၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ သစ်တောဦးစီးဌာန၊ အကောက် ခွန်ဦးစီးဌာန၊ ပြည်တွင်းအခွန်များဦးစီးဌာန၊ ကုန်သွယ်ရေးဦးစီးဌာန၊ စားသုံးသူရေးရာဦးစီးဌာနနှင့် မောင်တောကုန်သည်ကြီးအသင်းမှတာဝန်ရှိ သူများပါဝင်သော ပူးပေါင်းအဖွဲ့သည် မောင်တောမြို့ ကညင်တန်းရပ်ကွက် မြို့ဝင်ဂိတ်တွင် ကုန်တင်မော်တော်ယာဉ်များအား တရားမဝင်ပစ္စည်းများ သယ်ဆောင်လာခြင်းရှိ/မရှိ စစ်ဆေးဆောင်ရွက်ခဲ့ပါသည်။

       မောင်တောမြို့နယ်အတွင်းသို့ ကုန်ပစ္စည်းဝင်ရောက်ရာတွင် တရားမဝင်ကုန်စည်များ၏ အန္တရာယ်နှင့် တရားမဝင်ကုန်သွယ်မှုကြောင်း ဒေသတွင်းထိခိုက်မှုမရှိစေရေးအတွက် ရည်ရွယ်၍စစ်ဆေးဆောင်ရွက်ခဲ့ခြင်းဖြစ်ပြီး ကုန်ပစ္စည်းများသယ်ဆောင်လာသော မော်တော်ယာဉ်များအား သယ်ဆောင်လာသောကုန်ပစ္စည်းနှင့် ကုန်ပို့လွှာများ ကိုက်ညီမှုရှိ/မရှိ  စစ်ဆေးခဲ့ကြောင်း သတင်းရရှိ ပါသည်။

DOCA(ရခိုင်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ တာဝန်ပေးအပ်မှုအရ မြန်မာနိုင်ငံ ဆန်စပါးအသင်းချုပ်၏ စီစဉ်ကြီးကြပ်မှုဖြင့် သီရိလင်္ကာနိုင်ငံသို့ ဆန်တန်ချိန် (၁၀၀၀)အား ပေးပို့လှူဒါန်းနိုင်ရေးအတွက် Shwe Wah Yaung Agriculture Production Co.,Ltd. ၊ International Green Land Trading Co.,Ltd. ၊ Wilmar Myanmar Riceland Limited တို့မှ သင်္ဘောတင်ပို့ရန် စီစဉ်ဆောင်ရွက်လျက်ရှိရာ (၂၉.၈.၂၀၂၂)ရက်၊ တနင်္လာနေ့ နံနက်ပိုင်းတွင် ကုမ္ပဏီ(၃)ခုမှ သီရိလင်္ကာနိုင်ငံသို့ ပေးပို့လှူဒါန်းမည့်ဆန်များအား သင်္ဘောတင်နိုင်ရေးအတွက် ထုပ်ပိုးပြင်ဆင်ဆောင်ရွက်နေမှုများကို မြန်မာနိုင်ငံဆိုင်ရာသီရိလင်္ကာနိုင်ငံ သံအမတ်ကြီးနှင့်အဖွဲ့မှ လာရောက်ကြည့်ရှုခဲ့ရာ စားသုံးသူရေးရာဦးစီးဌာန၊ မြန်မာ့ကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်၊ မြန်မာနိုင်ငံဆန်စပါးအသင်းချုပ်တို့မှ တာဝန်ရှိသူများမှ လိုက်လံရှင်းလင်း ပြသခဲ့ကြောင်း သတင်းရရှိပါသည်။

DOCA(ရန်ကုန်)

          စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ခရိုင်ဦးစီးမှူးရုံးမှ ဦးစီးမှူး ဦးမြင့်နိုင်နှင့်ဝန်ထမ်းများဦးဆောင်၍ ၂၀၂၂ခုနှစ်၊ ဩဂုတ်လ စတုတ္ထပတ်တွင် စားသုံးသူကာကွယ် ရေးလုပ်ငန်းများဖြစ်သည့် ထုတ်ကုန်လုံခြုံစိတ်ချရမှုရှိစေရေးနှင့်ဈေးကွက်လေ့လာစောင့်ကြည့် စစ်ဆေးခြင်းကို ပျဉ်းမနားမြို့နယ်ရှိ အာဟာရသုခဈေးတွင် (၃၁-၈-၂၀၂၂)ရက်နေ့၊ နံနက် (၁၀း၀၀) နာရီအချိန်၌ ဆောင်ရွက်ခဲ့ရာ ဈေးအုပ်ချုပ်ရေးမှူး ဦးမောင်မောင်လွင်နှင့်အဖွဲ့မှ ပူးပေါင်းပါဝင်ခဲ့ပါသည်။ ဈေးကွက်အတွင်း ရောင်းချနေသော ကုန်စည်များပေါ်တွင် ကုန်အညွှန်းအမှတ်အသားများ ဖော်ပြခြင်းရှိ/မရှိ စိစစ်ဆောင်ရွက်ခဲ့ပြီး  “ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက် အမှတ် ၂/၂၀၁၉ "အား သိရှိလိုက်နာဆောင်ရွက်သွားရန် အသိပေးရှင်းလင်း ပြောကြားခြင်းများ ပြုလုပ်ခဲ့ပါသည်။ ထို့နောက် ဈေးဆိုင်များအား ကြည့်ရှုစစ်ဆေးပြီး နံနက် (၁၁း၃၀)  နာရီ အချိန်တွင် ပြီးစီးခဲ့ကြောင်း သတင်းရရှိပါသည်။

DOCA(ပြည်ထောင်စုနယ်မြေ)