သတင်းနှင့် လှုပ်ရှားမှုများ

  ရခိုင်ပြည်နယ်အစိုးရအဖွဲ့က ကြီးမှူးကျင်းပသော မူပိုင်ခွင့်ဥပဒေ၊ ယှဉ်ပြိုင်မှုဥပဒေနှင့် ကုန်အမှတ်တံဆိပ်များမှတ်ပုံတင်ခြင်းဆိုင်ရာ အသိပညာပေးဟောပြောဆွေးနွေးပွဲကို (၃၀-၄-၂၀၂၃) ရက်နေ့၊ နံနက် (၉:၀၀) နာရီအချိန်တွင် စစ်တွေမြို့၊ ဦးဥတ္တမခန်းမ၌ ကျင်းပပြုလုပ်ရာ ရခိုင်ပြည်နယ်ဝန်ကြီးချုပ် ဦးထိန်လင်း၊ ပြည်နယ်ဥပဒေချုပ် ဦးလှသိန်း၊ ပြည်နယ်တရားသူကြီးချုပ် ဒေါ်ဝါဝါထွန်း၊ ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ၊ အသင်းအဖွဲ့များက တာဝန် ရှိသူများ၊ စီးပွားရေးလုပ်ငန်းရှင်များ၊ MSME လုပ်ငန်းရှင်များ၊ အနုပညာရှင်များ၊ အခြားစိတ်ဝင်စားသူများတက်ရောက်ကြောင်း သိရှိရပါသည်။

    ရှေးဦးစွာ ရခိုင်ပြည်နယ်ဝန်ကြီးချုပ် ဦးထိန်လင်းက ယနေ့ဆွေးနွေးပွဲသို့ တက်ရောက်လာသူများအနေဖြင့် မူပိုင်ခွင့်ဥပဒေ၊ ယှဉ်ပြိုင်မှုဥပဒေနှင့် ကုန်အမှတ်တံဆိပ်များမှတ်ပုံတင်ခြင်းဆိုင်ရာ ဥပဒေနှင့်စပ်လျဉ်းပြီး အသိပညာဗဟုသုတများသိရှိလိုသည်များကိုမေးမြန်းနိုင်ပြီး ပွင့်လင်းစွာဆွေးနွေးစေလိုကြောင်း၊ မြန်မာနိုင်ငံ၏ ကုန်အမှတ်တံဆိပ်မူပိုင်ခွင့်မှတ်ပုံတင်စနစ် တည်ထောင်ခြင်းမှာလည်း ပေါ်ထွန်းလာပြီးဖြစ်၍ MSME လုပ်ငန်းရှင်များ၊ သက်ဆိုင်ရာကဏ္ဍအလိုက် ပြည်သူ့အကျိုးစီးပွားတိုးတက်ဖြစ်ပေါ်ရေးအတွက် အတူပူးပေါင်းပြီး အကောင်အထည်ဖော်ဆောင်ရွက်စေလိုကြောင်းပြောကြားပြီးနောက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ်က မူပိုင်ခွင့်ဥပဒေအာဏာသက်ဝင်ခြင်းနှင့်ပတ်သက်၍ ရှင်းလင်းပြောကြားပြီး မူပိုင်ခွင့်ဦးစီးဌာန၊ ညွှန်ကြားရေးမှူး ဒေါက်တာစိမ့်သန္တာထွန်းက မူပိုင်ခွင့်ဥပဒေ၊ ကုန်အမှတ်တံဆိပ်များမှတ်ပုံတင်ခြင်းဆိုင်ရာကိစ္စနှင့်စပ်လျဉ်း၍ ရှင်းလင်းပြောကြားပြီးနောက် ဥပဒေပညာရှင် ဦးသန်းမောင်က မူပိုင်ခွင့်ဥပဒေ၊ ယှဉ်ပြိုင်မှုဥပဒေများနှင့်စပ်လျဉ်း၍ အကျယ်တဝင့်ဆွေးနွေး၍ တက်ရောက်လာကြသည့်လုပ်ငန်းရှင်များက သိရှိလိုသည်များကိုမေးမြန်းကြရာ တာဝန်ရှိသူများက ပြန်လည်ဖြေကြားကြရာ အသိပညာပေး ဆွေးနွေးပွဲကို  ညနေ (၅:၃၀) နာရီအချိန်တွင်ရုပ်သိမ်းကြောင်း သတင်းရရှိပါသည်။

DOCA(ရခိုင်)

        ဧရာဝတီတိုင်းဒေသကြီး၊  စားသုံးသူရေးရာဦးစီးဌာန၊ ဝါးခယ်မမြို့နယ်တာဝန်ခံ ဦးအောင်မိုးသည် (၂၄.၄.၂၀၂၃)ရက်နေ့ ညနေ (၁၅:၃၀) နာရီအချိန်တွင် ပြန်ကြားရေးနှင့် ပြည်သူ့ဆက်ဆံရေး ဦးစီးဌာနတို့နှင့်ပူးပေါင်းကာ စားသုံးသူပြည်သူများအား ဝါးခယ်မမြို့နယ်၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ လူထုအခြေပြုဗဟိုဌာန(Community Centre) ခန်းမတွင် စားသုံးသူ အသိပညာပေး  Talk  Show  ပြုလုပ်ခဲ့ပါသည်။

          ထိုသို့ဟောပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးက စားသုံးသူအသိပညာပေး Talk Show ပြုလုပ်ရခြင်း၏ရည်ရွယ်ချက်အား ရှင်းလင်းပြောကြားခြင်း၊ စားသုံးသူရေးရာဦးစီးဌာန မြို့နယ်တာဝန်ခံမှ ဌာန၏မျှော်မှန်းချက်၊ ရည်မှန်းချက်များအား ရှင်းလင်းပြောကြားခဲ့ခြင်းတို့ဆောင်ရွက်ကာ၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူ၏ အခွင့်အရေးနှင့်တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏ တာဝန်များ နှင့် ပြစ်မှုပြစ်ဒဏ်များကိုသိရှိလိုက်နာရမည်ဖြစ်ကြောင်း၊ တားမြစ်ချက်များ စားသုံးသူကာကွယ်ရေး ဥပဒေအခန်း(၁၈)ပါ ကုန်အညွှန်း အမှတ်အသား ဖော်ပြခြင်းနှင့်စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ-၄၁ ပုဒ်မခွဲ (ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု(သို့) တစ်ခုထက်ပို ၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ ကုန်စည်အမျိုးအစားအလိုက် သတ်မှတ်ထားသည့် ဥပဒေများနှင့်အညီလိုက်နာဆောင်ရွက်ကြရန်ဖြစ်ကြောင်း ဥပဒေတားမြစ်ချက်များအား လိုက်နာဆောင် ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များသိရှိလိုပါက မြို့နယ်စားသုံးသူတာဝန်ခံရုံး တွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca. gov.mm website တွင် ဝင်ရောက်လေ့လာနိုင်ပါကြောင်း၊ စားသုံးသူများနစ်နာမှုရှိလာပါက စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ (CICC) သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

     ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်ရှိ ပဲမျိုးစုံရောင်းဝယ်ရေး ပွဲရုံများတွင် သင်္ကြန်အပြီး နောက်ရက်မှစ၍  မတ်ပဲများမှာ ပြန်လည်အရောင်းအဝယ် ဖြစ်လျက်ရှိသည်ကို တွေ့ရပါသည်။ ယခု၂၀၂၃ခုနှစ်၊ဧပြီလ (စတုတ္ထပတ်)တွင် ရောင်းဝယ်နေသောဈေးမှာ ပိဿာ(၂၀)တစ်တင်းလျှင် (၆၇၀၀၀-   ၆၈၀၀၀) ကျပ်ဈေး ဖြစ်ကြောင်း သိရပါသည်။

      ယခင် ဖေဖေါ်ဝါရီလနှင့် မတ်လအတွင်းဖြစ်ပေါ်ခဲ့သော ဈေးနှုန်းမှာ သိသိသာမြင့်တက်ခဲ့ပြီး ဈေးအမြင့်ဖြင့်သာ အရောင်းအဝယ်ဖြစ်ခဲ့ခြင်း ၊  ယခုဧပြီလ (တတိယပတ်)တွင် အရောင်းအဝယ် ပြန်လည်ပြုလုပ်ခဲ့ပြီး ဈေးအမြင့်ကို မျှော်မှန်းခဲ့ပါသော်လည်း ထင်ထားသလောက် ဈေးမြင့်တက်ခြင်း မရှိဘဲ ပိဿာ(၂၀) တစ်တင်းလျှင် (၆၇၀၀၀-၆၈၀၀၀) ကျပ်နှုန်း ဖြစ်ခြင်းကြောင့် ပြီးခဲ့သောမတ်လ ဈေးနှုန်းနှင့်နှိုင်းယှဉ်ပါက သိသိသာသာဈေးနှုန်းမြင့်တက်ခြင်းမရှိဘဲ  အနည်းငယ် ဈေးအမြင့်ဖြင့်သာ အရောင်းအဝယ်ဖြစ်နေကြောင်း သိရပါသည်။

DOCA(ပဲခူး)

     စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများအပြင် ကုန်စည်စီးဆင်းမှုမှန်ကန်မြန်ဆန်ရေးနှင့် ကုန်ဈေးနှုန်းတည်ငြိမ်ရေးလုပ်ငန်းများကိုလည်း ဆောင်ရွက်လျက်ရှိပါသည်။ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်ဦးဆောင်သော ဒု-ခရိုင်ဦးစီးမှူးနှင့် ဝန်ထမ်း(၃)ဦးသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၂၄-၄-၂၀၂၃) ရက်နေ့၊ နေ့လယ် (၁၃း၀၀) နာရီအချိန်တွင် “SPC” နှင့် “ရွှေဗျိုင်းဖြူ” စက်သုံးဆီအရောင်းဆိုင်(၂)ဆိုင်သို့သွားရောက်ကွင်းဆင်း၍ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက နေ့စဉ်သတ်မှတ်ပေးသည့် စက်သုံးဆီ ရည်ညွှန်းလက်လီဈေးနှုန်းများထက်ကျော်လွန်၍ ရောင်းချနေမှုရှိ/မရှိတို့ကို ( IT ) အဖွဲ့စုံဖြင့် ဈေးကွက်စောင့်ကြည့်စစ်ဆေးခဲ့ပါကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်ဦးဆောင်သော  ဒု-ခရိုင်ဦးစီးမှူးနှင့် ဝန်ထမ်း(၃)ဦးတို့သည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၂၄-၄-၂၀၂၃) ရက်နေ့၊ နံနက် (၁၁း၀၀) နာရီအချိန်တွင် စစ်ကိုင်းမြို့၊ ပန်းဘဲတန်းရပ်ကွက်ရှိ “ရွှေတိုးအောင်”ဆီဆိုင်နှင့် ဈေးကုန်းရပ်ကွက်ရှိ “သစ္စာ”ဆီဆိုင် (၂)ဆိုင်အား ဈေးကွက်စောင့်ကြည့်စစ်ဆေးခဲ့ပါသည်။

     စစ်ကိုင်းခရိုင်ဦးစီးမှူး ဒေါ်သန်းသန်းတင်က  ရွှေတိုးအောင်နှင့် သစ္စာဆီဆိုင်တို့မှ ပိုင်ရှင်များအား စားသုံးဆီတင်သွင်းသည့်ကုမ္ပဏီများက လက်ကားကုန်သည်များသို့ ဖြန့်ဖြူးထုတ်ပေးခဲ့သောစားအုန်းဆီများကို ရန်ကုန်အထိုင်ဈေး ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချသွားရမည်ဖြစ်ပြီး လက်လီဈေးကွက်အတွင်း ဖြစ်သင့်ဖြစ်ထိုက်သည့်ဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက် ကွင်းဆင်းကြပ်မတ်ဆောင်ရွက်ခဲ့ကြောင်း သတင်းရရှိပါသည်။

DOCA(စစ်ကိုင်း)