သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ပဲခူးတိုင်းဒေသကြီး၊ ပြည်ခရိုင်ဦးစီးမှူးသည် ပြည်ခရိုင်ဦးစီးမှူးရုံး အစည်းအဝေးခန်းမ၌ (၂၅.၈.၂၀၂၂) ရက်၊ နံနက် (၁၀:၀၀) နာရီတွင် ပြည်မြို့ပေါ်ရှိ အလှကုန်နှင့် လူသုံးကုန်ပစ္စည်း (လက်လီ/လက်ကား) ရောင်းချ သည့် လုပ်ငန်းရှင်များအား ဖိတ်ကြား၍ စားသုံးသူကာကွယ်ရေးဥပဒေ (၂၀၁၉) ပါ ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ အသိပညာပေး ဟောပြောဆွေးနွေးခြင်း ပြုလုပ်ဆောင်ရွက်ခဲ့ပါသည်။

        အဆိုပါ အသိပညာပေး ဟောပြောဆွေးနွေးပွဲတွင် ပြည်ခရိုင်ဦးစီးမှူးမှ မိမိတို့စားသုံးသူ ရေးရာဦးစီးဌာနသည် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနလက်အောက်တွင်ရှိပြီး ၂၀၁၉ ခုနှစ်တွင် စားသုံးသူကာကွယ်ရေးဥပဒေကို အခန်း (၂၅) ခန်း၊ ပုဒ်မ (၈၄) ခုဖြင့် ပြဋ္ဌာန်း ထားပါကြောင်း၊ ဥပဒေပြဋ္ဌာန်းထားပြီးဖြစ်သည့်အတွက် စီးပွားရေးလုပ်ငန်းရှင်များအနေဖြင့် စားသုံးသူ ကာကွယ်ရေးဥပဒေပါ ပြဋ္ဌာန်းချက်များအား လေးစားလိုက်နာရမှာဖြစ်သဖြင့် ယခုလို ခေါ်ယူ၍ စားသုံးသူကာကွယ်ရေးဥပဒေပါအကြောင်းအရာများကို တွေ့ဆုံရှင်းလင်းဆွေးနွေးရခြင်း ဖြစ်ပါကြောင်း၊ ဥပဒေတွင်ပါဝင်သည့်  စားသုံးသူ၊ စီးပွားရေးလုပ်ငန်းရှင်နှင့် ကုန်စည်/ ဝန်ဆောင်မှု တို့၏ အဓိပ္ပာယ်သတ်မှတ်ချက်များ၊ စားသုံးသူများရရှိမည့် အခွင့်အရေးနှင့် လိုက်နာရမည့် တာဝန်များအကြောင်း၊ စီးပွားရေးလုပ်ငန်းရှင်များ လိုက်နာရမည့် တာဝန်နှင့် တားမြစ်ချက်များ အကြောင်း၊ ဈေးကွက်အတွင်း ရောင်းချနေသော ကုန်စည်များ၏ ကုန်အညွှန်းအမှတ်အသား ရေးသားဖော်ပြခြင်းဆိုင်ရာအချက်များနှင့် ပြစ်မှုပြစ်ဒဏ်များအကြောင်းအား ဆွေးနွေးဟောပြော ခဲ့ပြီး တက်ရောက်လာသော အလှကုန်နှင့် လူသုံးကုန်ရောင်းချဖြန့်ဖြူးနေသည့် လုပ်ငန်းရှင်များ အနေနဲ့ အဓိကအားဖြင့် မိမိတို့ရောင်းချနေသည့် ကုန်စည်များတွင် ကုန်အညွှန်း အမှတ်အသား ပြည့်စုံစွာဖော်ပြပါရှိသည့် ကုန်စည်များကိုသာ ရောင်းချကြရန်လိုအပ်ကြောင်း၊ ကုန်စည်၏ အမျိုး အမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း သုံးစွဲပုံ နည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး (သို့) ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်စသည့်အချက်များကို ကုန်စည်များပေါ်တွင် မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာ တစ်ခု(သို့)တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ပြီး ယင်းသို့ မြန်မာဘာသာဖြင့် ဖော်ပြရမည့်အချက်များ ပြည့်စုံစွာဖော်ပြပါရှိမှသာ မိမိတို့ဆိုင်တွင် ရောင်းချကြရန် လိုအပ်မှာဖြစ်ကြောင်း၊  နောက်ပိုင်းကာလများတွင်  ကွင်းဆင်းစစ်ဆေးမှုများနှင့်   အရေးယူ ဆောင်ရွက်မှုများ ပြုလုပ်ဆောင်ရွက်သွားမှာဖြစ်သည့်အတွက် အထူးအလေးထား သိရှိ လိုက်နာ ဆောင်ရွက်ကြရန် ရှင်းလင်းဆွေးနွေးခဲ့ရာ တက်ရောက်လာသော လုပ်ငန်းရှင်များမှ လည်း စိတ်ဝင်တစားဖြင့် သိရှိလိုသည်များအား ပြန်လည်မေးမြန်းဆွေးနွေးခြင်းများ ဆောင်ရွက်ခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေပေးခဲ့ကာ အလှကုန်နှင့် လူသုံးကုန်ပစ္စည်းများရောင်းချသည့် လုပ်ငန်းရှင် (၂၇) ဦး တက်ရောက်ခဲ့ကြောင်း သတင်းရရှိ ပါသည်။

DOCA(ပဲခူး)

        ပြည်ခရိုင်တွင် စပါး/ဆန်ဈေးများ ယခုဩဂုတ်လ စတုတ္ထပတ်တွင် မြင့်တက်လာခဲ့ပါသည်။ နတ်တလင်းတောင်ပျံဈေးမှာ (၄၆)ပေါင် တင်း၁၀၀လျှင် ၁၂၅၀၀၀ကျပ်၊ မှော်ဘီစပါးဈေးမှာ တင်း၁၀၀လျှင် ၉၂၀၀၀၀ကျပ်၊ ကရင်မစပါးတင်း၁၀၀လျှင် ၉၀၀၀၀၀ကျပ်၊ ဧည့်မထစပါးတင်း ၁၀၀လျှင် ၈၅၀၀၀၀ကျပ်ဈေးဖြင့် မြင့်တက်လာခဲ့ပါသည်။ စပါးဈေးမြင့်လာသလို ဆန်ဈေးမှာလည်း မြင့်တက်လာသဖြင့် မှော်ဘီဆန် တစ်အိတ်လျှင် ၄၈၀၀၀ကျပ်၊ အင်းမဆန် တစ်အိတ်လျှင် ၄၀၀၀၀ ကျပ်၊ ကရင်မဆန်တစ်အိတ်လျှင် ၄၀၀၀၀ကျပ်၊ ဆင်းသွယ်တစ်အိတ်လျှင် ၄၀၀၀၀ကျပ်၊ ရတနာတိုး တစ်အိတ်လျှင် ၃၀၀၀၀ကျပ်၊ ကျော်ဇယျဆန် တစ်အိတ်လျှင် ၃၉၀၀၀ကျပ်၊ တောင်ပျံတစ်အိတ်လျှင် ၆၃၀၀၀ကျပ်ဖြင့် ဆန်ဈေးများမြင့်တက်နေပါသည်။ သယ်ယူခစရိတ်များ မြင့်တက်ခြင်း၊ စပါးလက်ကျန်နည်းလာသည့်အတွက် ဩဂုတ်လအတွင်းမှာ စပါး/ဆန် ဈေးများမြင့်တက်နေသည်ဟု သိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊စားသုံးသူရေးရာဦးစီးဌာန၊ တောင်ငူ ခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်သည် ဩဂုတ်လ ၂၆ ရက်နေ့ နံနက်ပိုင်းက တောင်ငူမြို့ အမှတ်(၂)အခြေခံ ပညာအထက်တန်းကျောင်း ဖိုးကွန်းခန်းမ၌ တောင်ငူမြို့နယ် အားကစားနှင့်ကာယပညာဦးစီးဌာနက ကြီးမှူးကျင်းပသည့် လူငယ်ရေး အသိပညာပေးဟောပြောပွဲသို့ တက်ရောက်၍ စားသုံးသူကာကွယ်ရေးဆိုင်ရာများကို အသိပညာပေး ဟောပြောခဲ့ပါသည်။

       အခမ်းအနားတွင် စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဦးစောသန်းထိုက်ကျော်က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးနှင့်တာဝန်များ၊ စားသုံးသူနစ်နာဆုံးရှုံမှုမရှိစေရေးအတွက် စစ်ဆေးရေးအရာရှိများက ဈေးကွက်အတွင်း ကွင်းဆင်း လေ့လာစောင့်ကြည့်နေမှုများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများ ဖတ်ရှု သင့်ပုံများနှင့် စားသုံးသူနစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်ခြင်းများကို ရှင်းလင်းဟောပြောပါသည်။

     ထို့အတူ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ခင်သူဇာဝင်း က စာဖတ်ခြင်း၏ အကျိုးကျေးဇူးနှင့် မူးယစ်ဆေးဝါး အန္တရာယ်များကိုလည်းကောင်း၊ အားကစားနှင့် ကာယပညာဦးစီးဌာနမှ အားကစားမှူး ဒေါ်သူဇာထွေးက အားကစားလှုပ်ရှားခြင်း၏ အကျိုးကျေးဇူးများကို လည်းကောင်း ဟောပြောခဲ့ကြောင်းနှင့် ဟောပြောပွဲသို့ ကျောင်းသားကျောင်းသူ ၂၅၀ ဦး တက်ရောက်ကြောင်း သိရှိရပါသည်။

DOCA(ပဲခူး)

       ပဲခူးတိုင်းဒေသကြီး အစိုးရအဖွဲ့၏ ကြီးကြပ်မှုဖြင့် ပဲခူးတိုင်းဒေသကြီး စားသုံးသူရေးရာဦးစီးဌာနနှင့် ပဲခူးတိုင်းဒေသကြီး ၊ ဆန်စက်လုပ်ငန်းရှင်များ အသင်းတို့၏ ပူးပေါင်းဆောင်ရွက်မှုအရ သနင်ပင် မြို့နယ်တွင် ဆင်းသွယ်လတ် ၊ ဆန်သား ၉၀ ရာနှုန်း အိတ် (၁၅၀)အား သနပ်ပင်မြို့နယ်အတွင်း အထွေထွေအုပ်ချုပ်ရေး ဦးစီးဌာန ၊ မြို့နယ်စည်ပင်သာယာရေးအဖွဲ့ ၊ စားသုံးသူရေးရာဦးစီးဌာနနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ တာဝန်ရှိ ဝန်ထမ်းများ ပူးပေါင်းပြီး (၁၅.၈.၂၀၂၂) ရက်နေ့မှ (၂၁.၈.၂၀၂၂) ရက်နေ့ထိ သနပ်ပင်မြို့မ ၊ စျေးပိုင်ရပ်ကွက် ၊ မြို့မစျေးနှင့် မြို့ပေါ်ရပ်ကွက်ရှိ အုပ်ချုပ်ရေးမှူးရုံးများတွင် ဆန်(၁)ပြည်လျှင် သက်သာသည့်စျေးနှုန်း (၁၆၀၀)ကျပ်ဖြင့် ရောင်းချ ပေးလျှက်ရှိပြီး အခြေခံစားသုံးသူများမှ ဝယ်ယူလျှက်ရှိကြောင်း သိရှိရပါသည်။ သနပ်ပင် မြို့နယ်အတွင်းရှိ စားသုံးသူပြည်သူများသို့ စုစုပေါင်း ဆန်အိတ် (၁၅၀) ရောင်းချပေးပြီး ဖြစ်ပါကြောင်း သိရှိရပါသည်။

DOCA(ပဲခူး)

             ကရင်ပြည်နယ်၊စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးဆောင်၍ ၂၈-၈-၂၀၂၂ ရက်နေ့၊ နေ့လယ် ၀၂:၀၀ နာရီအချိန်တွင် ဝန်ထမ်းများအား ဝန်ထမ်း စွမ်းဆောင်ရည်မြှင့်တင်ရေး အထောက်အကူပြု အသိပညာပေးဆွေးနွေးပွဲ ကျင်းပခဲ့ကြောင်း သိရှိရသည်။

            အဆိုပါသင်တန်းတွင် ပြည်နယ်ဦးစီးမှူး ဦးသန်းဦးက စားသုံးသူရေးရာဦးစီးဌာနသည် ဌာန၏ မျှော်မှန်းချက်ဖြစ်သော စားသုံးသူများလုံခြုံစိတ်ချရမှုရှိစေရန်အတွက် ဦးတည်နေရာ (၁၂)နေရာတွင် စားသုံးသူကာကွယ်ရေးဆိုင်ရာ အသိပညာပေးဆွေးနွေးဟောပြောခြင်း၊ ဈေးကွက် မရောက်မီကုန်စည်နှင့်ဈေးကွက်ရောက်ပြီးကုန်စည်များအား စစ်ဆေးခြင်း ဆောင်ရွက်လျက်ရှိပါ ကြောင်း၊ ယင်းကဲ့သို့ ဆောင်ရွက်ရာတွင် အသစ်ခန့်အပ်ထားသော ဝန်ထမ်းများနှင့် လက်ရှိဝန်ထမ်း များ၏ စွမ်းဆောင်ရည် မြင့်မားစေရန်အတွက် ဝန်ထမ်းစွမ်းဆောင်ရည်မြင့်တင်ရေး အထောက် အကူပြု အသိပညာပေးဆွေးနွေးခြင်းအား ရုံးလုပ်ငန်းမပျက်စေဘဲ နှစ်ပတ်တစ်ကြိမ် (ကြာသပတေး) နေ့တိုင်း Thursday Talk အသိပညာပေး ဆွေးနွေးခြင်းအား ကျင်းပ ဆောင်ရွက်ခြင်းဖြစ်ပါကြောင်း၊ ဝန်ထမ်းများအနေဖြင့် ဌာနခွဲအလိုက် မိမိတို့ လုပ်ဆောင် ရမည့်တာဝန်များအပြင် ဌာန၏မြေပြင်ကွင်းဆင်း အကောင်အထည်ဖော်ရသော အသိပညာ ပေးဟောပြောခြင်း၊ စစ်ဆေးခြင်းလုပ်ငန်းများ၌ ဘာသာရပ်အလိုက် ကျွမ်းကျင် ပိုင်နိုင်စွာဖြင့် အများပြည်သူအသိပညာပေးရန်လိုအပ်ပါကြောင်း၊ မိမိတို့ဌာနသည် အများပြည်သူတို့ ဝန်ဆောင်မှုပေးသည့်ဌာန အားလျော်စွာ အများပြည်သူသို့  အသိပညာပေး ကွင်းဆင်းရာ၌ ဦးတည်နေရာ(၁၂) ချမှတ်ထားပေးသည့်အပြင် အသိပညာပေး ဆွေးနွေးပြောကြားရာ၌ ဌာန၏ လုပ်ငန်းတာဝန်နှင့် စားသုံးသူကာကွယ်ရေးဉပဒေပါ အကြောင်းအရာ အခန်းအလိုက် ကဏ္ဍအလိုက် ခွဲခြား၍ ကျွမ်းကျင်ပိုင်နိုင်စွာလေ့လာပြီး ပိုမိုထိရောက်စွာ နည်းလမ်း အသစ် များ ရှာဖွေဖော်ထုတ်သွားရန်ဖြစ်ပါကြောင်းခြင်း ပြောကြားခဲ့ပါသည်။

      ထို့နောက် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင်က ပြောကြားရာတွင် အသိပညာပေးဟောပြောပွဲဆောင်ရွက်ရာတွင် ဆောင်ရန်၊ ရှောင်ရန်အချက်များကိုလည်းကောင်း၊ ဟောပြောရမည့်ခေါင်းစဉ်များကိုလည်းကောင်း ရှင်း လင်း ဆွေးနွေး၍ ဝန်ထမ်းများက ကျဘမ်းစနစ်ဖြင့် မဲနိုက်၍ ဟောပြော ဆွေးနွေး ကျင်းပခဲ့ပါသည်။

       အခမ်းအနားတွင် အငယ်တန်းစာရေး ဒေါ်ခင်သူဇာက ကုန်အညွှန်းအမှတ်အသား ဖတ်ရှုလို့ စိတ်ချယုံကြည်သုံးစွဲစို့ ခေါင်းစဉ်နှင့်လည်းကောင်း၊ အကြီးတန်းစာရေး ဒေါ်စုနွေးသီရိမောင်က ပြည်သူအများ စားသုံးသူအခွင့်အရေးသိရှိဖို့ ဌာနပုံရိပ်မြှင့်တင်စို့ ခေါင်းစဉ်နှင့်လည်းကောင်း ဆွေးနွေးပြောကြားခဲ့ပြီး ပြည်နယ်ဦးစီးမှူး ဦးသန်းဦးက နိဂုံးချုပ်စကား ပြောကြားခဲ့ကာ ဝန်ထမ်းအင်အား( ၁၄ )ဦး တက်ရောက်ခဲ့ကြောင်းနှင့် အခမ်းအနားကို (၁၆:၀၀) ရုတ်သိမ်းခဲ့ကြောင်း သတင်းရရှိပါသည်။

DOCA(ကရင်)