သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ မကွေးခရိုင်ဦးစီးမှူး၏လမ်းညွှန်မှုဖြင့် မြို့သစ်မြို့  မြို့နယ်တာဝန်ခံ ဦးဆယ်မောင် (ဒု-ဦးစီးမှူး)သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်းပြီး (၁၀-၂-၂၀၂၃)ရက်နေ့ နံနက်(၁၀း၀၀)နာရီအချိန်တွင် မြို့သစ်မြို့နယ်ရှိ  "ပန်းချယ်ရီ၊ ကသစ်ပန်းနှင့် သိဒ္ဓိလင်း"အမှတ်တံဆိပ် သောက်ရေသန့်လုပ်ငန်းရှင်များထံသို့ သွားရောက်၍ ကုန်အညွှန်းအမှတ်အသားများ ပြည့်စုံမှန်ကန်စွာပါဝင်မှုရှိ/မရှိနှင့် လုပ်ငန်းလိုင်စင်ရှိ/မရှိတို့အား ကွင်းဆင်းစစ်ဆေးခဲ့ပါသည်။

   ထိုသို့ ကွင်းဆင်းစစ်ဆေးရာတွင် မြို့သစ်မြို့နယ်တာဝန်ခံ ဦးဆယ်မောင်က သောက်ရေသန့်ကုန်အမှတ်တံဆိပ်များတွင်  မြန်မာနိုင်ငံစားသုံးသူကာကွယ်ရေးကော်မရှင်၏ လမ်းညွှန်ချက်အမှတ်( ၂/၂၀၁၉)၌ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းပုံအညွှန်းများကို မြန်မာဘာသာဖြင့် မဖြစ်မနေဖော်ပြရမည့်အပြင် သောက်ရေသန့်ဖြစ်သည့်အတွက် အစားအသောက်နှင့်ဆေးဝါးကွပ်ကဲရေးဦးစီးဌာန၏ထောက်ခံချက်ကိုလည်း ရယူထားရန်နှင့် မြို့နယ်စည်ပင်သာယာရေးအဖွဲ့ကလည်း လုပ်ငန်းလိုင်စင်များလျှောက်ထားကြရန် အသီးသီး အသိပေးရှင်းလင်းဆွေးနွေးခဲ့ပြီးနောက် ရေသန့်လုပ်ငန်းရှင်(၃)ဦးအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

    တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့်ဝန်ထမ်းများတို့သည် (၂၂.၂.၂၀၂၃)ရက်နေ့၊ နေ့လယ် (၁၄:၃၀) နာရီအချိန်တွင် မြိတ်မြို့၊ မြို့မ(၁)ရပ်၊ စာသင်ကျောင်းလမ်းရှိ မီးမီး အမှတ်တံဆိပ် ကိတ်မုန့်အမျိုးမျိုးထုတ်လုပ်သည့်လုပ်ငန်းရှင်အား တွေ့ဆုံ၍ စားသုံးသူ ကာကွယ်ရေးဥပဒေပါ ကုန်အညွှန်းအမှတ်အသားနှင့် ပတ်သက်၍ အသိပညာပေး ဆွေးနွေးခဲ့ကြောင်း သိရှိရပါ သည်။

     စားသုံးသူရေးရာဦးစီးဌာနက ထုတ်ပြန်ထားသော ဥပဒေအရ မြန်မာစာဖြင့်ပြည့်စုံစွာဖော်ပြစေနိုင်နှင့် ဘေးအန္တရာယ်ကင်းရှင်းစွာထုတ်လုပ်နိုင်ရေးတို့အတွက်၊ ကုန်အညွှန်းအမှတ်အသားများ လာရောက်လျှောက်ထားရန်နှင့် သန့်ရှင်းလတ်ဆတ်သောမုန့်ရရှိရေး အလေးထားဆောင်ရွက်ရန်၊ မိမိတို့၏ကုန်အမှတ်တံဆိပ်အား မူပိုင်ခွင့်ဦးစီးဌာနတွင်မှတ်ပုံတင်၍ လျှောက်ထားကြရန်တို့ကိုရှင်းလင်းဆွေးနွေးခဲ့ပြီးနောက် စီးပွားရေးလုပ်ငန်းရှင်များလိုက်နာဆောင်ရွက်ရမည့် အချက်များသက်ဆိုင်ရာဌာနများ၏ဥပဒေနှင့်  လုပ်ထုံးလုပ်နည်းများကိုလည်း လိုက်နာဆောင်ရွက်ကြ အသိပညာပေး ခဲ့မှုအား သတင်းရရှိပါသည်။

DOCA(တနင်္သာရီ)

      ဖျာပုံခရိုင်၊ ဘိုကလေးမြို့နယ် စားသုံးသူရေးရာဦးစီးဌာန၊ မြို့နယ်တာခံနှင့်ဝန်ထမ်းများသည် မြို့နယ်စည်ပင်သာယာရေးဦးစီးဌာနနှင့်ပူးပေါင်း၍ ၂၀၂၃ခုနှစ်၊ဖေဖော်ဝါရီလ (၁၇)ရက်နေ့၊နံနက် (၀၉:၀၀)နာရီအချိန်တွင်ဘိုကလေးမြို့၊စံပြဈေးသို့ကွင်းဆင်းစိစစ်ခဲ့ကြပါသည်။

          ထိုသို့ဆောင်ရွက်ရာတွင် စံပြဈေးအတွင်းရောင်းချနေသောစားသောက်ကုန်များဖြစ်သည့် ပဲပြား၊ ပဲသွေး၊ မုန့်ဟင်းခါးဖတ်များတွင် ဖော်မလင်ပါဝင်မှုရှိ/မရှိစစ်‌ဆေးပြီးနောက် အခြားရောင်းချနေသော သစ်သီးဝလံများတွင်လည်း ဘေးအန္တရာယ်ရှိသောဆိုးဆေးများ၊ ရက်လွန်အသီးအနှံများ၊ တာရှည်ခံအသုံးပြုထားသောကုန်စည်များကို ဈေးကွက်အတွင်းသို့ဝယ်ယူတင်သွင်း‌ရောင်းချခြင်းမပြုကြရန် အသိပညာပေးတိုက်တွန်းပြောကြားခဲ့ကြောင်း သတင်းရရှိပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်စားသုံးသူရေးရာဦးစီးဌာန၊ မြို့နယ်စစ်ဆေးရေးမှူး ဦးသိန်းမောင် ဦးဆောင်၍ မြို့နယ်စည်ပင်သာယာရေးအဖွဲ့နှင့်ပူးပေါင်း၍ ဖေဖော်ဝါရီလ (၁၇) ရက်၊နေ့လည်(၁၂:၀၀)နာရီအချိန်တွင် ဒေးဒရဲမြို့၊ မြို့မဈေးအတွင်းရှိ မုန့်မျိုးစုံဆိုင်များအား ဈေးကွက်စောင့်ကြည့်စစ်ဆေးခဲ့ပါသည်။

     ထိုသို့ကွင်းဆင်းစစ်ဆေးရာတွင် သတ်မှတ်ထားသော ကုန်အညွှန်းအမှတ်အသားများပြည့်စုံစွာဖော်ပြထားမှုရှိ/မရှိနှင့်တားမြစ်ကုန်ပစ္စည်းများ ရောင်းချမှုရှိ/မရှိတို့ကို စစ်ဆေးခဲ့ပြီးနောက် လုပ်ငန်းရှင်များအနေဖြင့် စားသုံးသူကာကွယ်ရေးဥပဒေပါအချက်များကို အလေးထားဆောင်ရွက်ရမည်ဖြစ်ပါကြောင်းနှင့်လိုက်နာမှုမရှိပါကစားသုံးသူကာကွယ်ရေးဥပဒေအရ  အရေးယူဆောင်ရွက်သွားမည်ဖြစ်ကြောင်း အသိပညာပေးပြောကြားခဲ့ပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး/ခရိုင်ဦးစီးမှူး၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဦးစီးအရာရှိ ဒေါ်မွန်မွန်စိုး၊ ဒုခရိုင်ဦးစီးမှူး ဦးဇော်ထွန်းဦးနှင့် ဝန်ထမ်းများသည် (၂၁-၂-၂၀၂၃)ရက်နေ့ နံနက်(၁၀:၀၀)နာရီအချိန်တွင် ပခုက္ကူမြို့ပေါ်ရှိ ဒေသတွင်းထုတ်လုပ်လျက်ရှိသော ပဲခွေကြော်၊ ကြက်သွန်ကြော်၊ အသားတုကြော်၊ ဆန်ချောင်းကြော်၊ အာလူးကြော်၊ ကွတ်ကီးမုန့် စသည့် မုန့်မျိုးစုံထုတ်လုပ်ရောင်းချသည့် လုပ်ငန်းရှင်(၄)ဦးထံသို့သွားရောက်၍ စားသုံးသူကာကွယ်ရေးဥပဒေပါပြဋ္ဌာန်းချက်များအား လိုက်နာဆောင်ရွက်ခြင်းဖြင့် စားသုံးသူများဘေးအန္တရာယ်ကင်းရှင်းပြီး မိမိတို့လုပ်ငန်းများ ထုတ်ကုန်လုံခြုံစိတ်ချရမှုရှိစေရန်နှင့် အကျိုးစီးပွားအောင်မြင်ဖြစ်ထွန်းစေရန်ရည်ရွယ်၍ အသိပညာပေးဆွေးနွေးခဲ့ကြပါသည်။

       ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များ၊ စီးပွားရေးလုပ်ငန်းရှင်၏တာဝန်များ၊ စီမံခန့်ခွဲရေးနည်းလမ်းအရ အရေးယူမှုများ၊ မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ညွှန်ကြားချက်(၂/၂၀၁၉)ပါကုန်စည်အုပ်စုအလိုက် မြန်မာဘာသာဖြင့် ထည့်သွင်းဖော်ပြရမည့်အချက်အလက်များကို ရှင်းလင်း၍ လုပ်ငန်းရှင်များကလည်း မိမိတို့ထုတ်လုပ်သောကုန်စည်အမျိုးအစားအလိုက် စားသုံးသူကာကွယ်ရေးဥပဒေ(၂၀၁၉)အခန်း(၁၈)ပါ ကုန်အညွှန်းအမှတ်အသားဖော်ပြချက်များနှင့်ကိုက်ညီသည့် ကုန်စည်များကို စားသုံးသူရေးရာဦးစီးဌာန၏ စိစစ်ခွင့်ပြုချက်ရရှိရန် လျှောက်ထားနိုင်ကြောင်း အသိပညာပေးဆွေးနွေးခဲ့ပါသည်။

    ဆက်လက်၍ ဒုခရိုင်ဦးစီးမှူး ဦးဇော်ထွန်းဦးက ဆွေးနွေးရာတွင် လုပ်ငန်းရှင်များအနေဖြင့် စားသုံးသူများက စားသောက်ကုန်တစ်ခုခုကို ရွေးချယ်ဝယ်ယူရာတွင် ကုန်အညွှန်းအမှတ်အသားပြည့်စုံစွာဖော်ပြမှုမှာ အရေးကြီးသောအခန်းကဏ္ဍတွင် ရှိကြောင်း၊ ကုန်အညွှန်းအမှတ်အသားပြည့်စုံ မှုမရှိသောထုတ်ကုန်များအား ဈေးကွက်အတွင်းမှ လျော့နည်းပပျောက်သွားစေရန် စားသုံးသူကာကွယ်ရေးဥပဒေအရ စောင့်ကြည့်စစ်ဆေးအရေးယူသွားမည်ဖြစ်သောကြောင့် တိကျစွာလိုက်နာဆောင်ရွက်ရန်လိုအပ်ကြောင်း ဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။

        ဆက်လက်၍ "ပြည်ချစ်"နှင့် "လမင်း" ကြက်သွန်ကြော်လုပ်ငန်းတွင် ကြက်သွန်ကြော်ပြုလုပ်ဆောင်ရွက်ပုံများကိုမေးမြန်းရာ ကြက်သွန်နီများကိုကြိတ်၍ ကော်မှုန့်ဖြင့် အရည်ဖျော်ရ ကြောင်း၊ ကြက်သွန်တစ်ပိဿာခွဲဆိုလျှင် ကော်မှုန့်(၁၅)ပိဿာခန့်ထည့်၍ အရည်ဖျော်ပြီး ပေါင်းဖိုတွင် ဗန်းများဖြင့် အဆင့်လိုက်တင်၍ တစ်နာရီခန့်ပေါင်းရကြောင်း၊ ပေါင်းပြီး ရရှိသောမုန့်သားများအား အချိန်တစ်ည တန်းပစ်၍လှန်းထားရကြောင်း သိရှိရပါသည်။

   မနက်ရောက်သည့်အခါ တန်းပစ်လှန်းထားသောမုန့်သားများကို လက်ဖြင့်(သို့)စက်ဖြင့် လိုသလိုအနေအထားကိုက်ယူခြင်း၊ ဖြတ်တောက်ခြင်းများပြုလုပ်၍ နေပူလှန်းရကြောင်း၊ နေပူလှန်းပြီး ခြောက်သွားသောမုန့်ခြောက်များကို ဆီဖြင့်ကြော်၍ အထုပ်များထုတ်ပြီး ရောင်းချကြကြောင်း၊ မိသားစုဝင်များ တစ်နိုင်တစ်ပိုင်လုပ်ကိုင်ဆောင်ရွက်ရောင်းချလျက်ရှိရာ လက်ကားအနေဖြင့် အထုပ်သေးတစ်ထုပ်လျှင် (၇၆)ကျပ်ရှိပြီး၊ (၂၅)ထုပ်တွဲ တစ်တွဲလျှင် (၁၉၀၀) ကျပ်ပေးရကြောင်း၊ လက်လီတစ်ထုပ်လျှင် (၁၀၀)ကျပ်ပေးရကြောင်း၊ ဈေးကွက်အနေဖြင့် ပခုက္ကူမြို့တွင်းသို့ ဖြန့်ဖြူးရောင်းချလျက်ရှိကြောင်း လုပ်ငန်းရှင်များထံမှ သိရှိရပါသည်။

DOCA(မကွေး)