သတင်းနှင့် လှုပ်ရှားမှုများ

           ပဲခူးတိုင်းဒေသကြီး သာယာဝတီခရိုင် ကြို့ပင်ကောက်မြို့နယ်အတွင်းရှိ ကျေးလက်နေပြည်သူ များ လှုမှုစီးပွားဘဝတိုးတက်စေရန်နှင့် အလုပ်အကိုင်အခွင့်အလမ်းများ ရရှိစေရန် ရည်ရွယ်၍ စိုက်ပျိုးရေး မွေးမြူရေးနှင့် ကုန်ထုတ်လုပ်မှု ကဏ္ဍဖွံ့ဖြိုးတိုးတက်ရေးအတွက် ကျေးရွာအုပ်စု ၄၉ အုပ်စု၊ ကျေးရွာခွဲ ၂၇၇ ရွာအနက် သတ်မှတ်ချက်နှင့် ကိုက်ညီသည့် ကျေးရွာ ၄၀ အား ( ဧပြီ၊ မေ၊ ဇွန်၊ ဇူလိုင်) လများတွင် သက်ဆိုင်ရာဌာနများမှ အသိပညာပေးလုပ်ငန်းများ ဆောင်ရွက်ပြီးစီးခဲ့ပါသည်။

          ယခု သြဂုတ်လ ပထမပတ် (၅) ရက်နေ့မှစ၍ ကျေးရွာအုပ်စု ၁၀ အုပ်စု၊ ကျေးရွာ ၁၀ ရွာအနက် အုပ်စု ၄ အုပ်စု၊ ကျေးရွာ ၄ ရွာတို့မှ တောင်သူ ၂၀၁ ဦးတို့အား သက်ဆိုင်ရာ ဌာနများနှင့်အတူ စားသုံးသူရေးရာဦးစီးဌာန မြို့နယ်တာဝန်ခံ ဒေါ်ရီရီရှိန်မှ ဌာန၏ လုပ်ငန်းဆောင်ရွက် ချက်များ အကြောင်း၊ ဌာန၏ သမိုင်းကြောင်းများ၊ စားသုံးသူကာကွယ်ရေးဉပဒေပါ အချက်များ၊ စားသုံးသူ အခွင့်အရေးများ၊ ကုန်စည်များဝယ်ယူသုံးစွဲရာတွင် ကုန်အညွှန်းအမှတ်အသား ပြည့်စုံစွာပါရှိမှ ဝယ် ယူသုံးစွဲကြရန် နမူနာပစ္စည်းများဖြင့် တစ်ချက်ချင်းရှင်းပြခဲ့ပြီး နစ်နာမှုရှိလျှင် တိုင်ကြားနိုင်သည့် အကြောင်းများ၊ ပြည်တွင်းကုန်သွယ်မှု အနေဖြင့် လက်ရှိလုပ်ဆောင်နေသည့် စားအုန်းဆီ၊ စက်သုံးဆီ၊ ဆေးဝါး တောင်သူအများဆုံးသုံးစွဲသည့် ဓာတ်မြေသြဇာ၊ ပိုးသတ်ဆေး၊ စပါး၊ ပဲနှမ်း၊ ဆန် စသည်ဖြင့် ဈေးနှုန်းဈေးကွက်အခြေအနေများကို နေ့စဉ်အပတ်စဉ် လုပ်ငန်းရှင်များနှင့် ချိတ်ဆက်ဆောင်ရွက် ရသည့်အခြေအနေများကို ပြောကြားခဲ့ပြီး တောင်သူများအနေဖြင့် ပြည်တွင်းဆီစားသုံးမှုဖူလုံရေးအတွက် ဆီထွက်သီးနှံများဖြစ်သော မြေပဲ၊ နှမ်း၊ နေကြာများကိုလည်း စိုက်ပျိုးကြရန်နှင့် ဆီစားသုံးမှုများလျှင် ဖြစ်ပေါ်လာနိုင်သည့် ရောဂါများအကြောင်းနှင့် ဆက်စပ်ပြီးဖြစ်လာနိုင်သည့် ကျန်းမာရေး အန္တရာယ်များကို အသိပညာပေးဟောပြောခဲ့ကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး ၊ နတ်တလင်းခရိုင် ၊ ဇီးကုန်းမြို့နယ်အတွင်းရှိ ကျေးရွာများ၌ ဆီထွက် သီးနှံ ဖြစ်သည့် မျိုးနေကြာများအား မိုးသီးနှံအဖြစ် စိုက်ပျိုးထားရှိပါသည်။  

          ဇီးကုန်းမြို့နယ်တွင် မိုးသီးနှံ မျိုးနေကြာ စိုက်ဧက (၁၅) ဧကအား ကျေးရွာအုပ်စု (၈) အုပ်စု၊ ကျေးရွာခွဲ (၉) ရွာ၊ တောင်သူ ၁၁ ဦးမှ ဇွန်လဒုတိယအပတ်ခန့်တွင် စတင်စိုက်ပျိုးခဲ့ပြီး ယခုအချိန်တွင် အဖူးအပွင့်များ ပွင့်နေပြီးဖြစ်ပါသည်။ မျိုးနေကြာများမှာ  ဆင်းရွှေကြာနေကြာမျိုးများဖြစ်၍  စိုက်ပျိုးပြီး ၄၅ ရက်တွင် အဖူး၊ အပွင့် များပွင့်ပါသည်။  ရက်ပေါင်း ၉၀-၉၅ ရက်တွင် ခူးဆွတ်ရသည်ဖြစ်ကြောင်းကို  စိုက်ပျိုးရေးဦးစီးဌာနဝန်ထမ်း တစ်ဦး၏ ပြောကြားချက်အရ သိရှိရပါသည်။

          ဆောင်းသီးနှံ စိုက်ပျိုးမှုအနေဖြင့်  လျာထားစိုက်ဧက (၂၇၆၀) ဧက ၊ သီးသန့် ဧက (၁၄၄) ဧက ၊ သီးညှပ် ဧက (၂၆၁၆) တို့ကို ဒေသတွင်း စားသုံးဆီဖူလုံရေးအတွက် ဆက်လက်စိုက်ပျိုးသွားမည် ဖြစ်ကြောင်း သိရှိရပါသည်။ ဆောင်းသီးနှံစိုက်ပျိုးရာတွင် စပ်မျိုးနေကြာမျိုးကိုလည်း စိုက်ပျိုးရန် ရှိကြောင်း သိရှိရပါသည်။

DOCA(ပဲခူး)

           စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူ ကာကွယ်ရေးအသိပညာပေးဟောပြောပွဲလုပ်ငန်းများဆောင်ရွက်ခြင်းနှင့်စားသုံးသူများဘေးအန္တရာယ် ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း လုပ်ငန်း များ လုပ်ဆောင်လျှက်ရှိရာ ၂၀၂၂ခုနှစ်၊ ဩဂုတ်လ ၂၃  ရက်နေ့ (၀၉း၃၀)အချိန်တွင် စားသုံးသူရေးရာဦးစီးဌာန ၊ မိတ္ထီလာခရိုင်၊ ခရိုင်ဦးစီးမှူးရုံး၊ ခရိုင်ဦးစီးမှုး၏ လမ်းညွှန်မှုဖြင့် စစ်ဆေးရေးအရာရှိနှင့် အဖွဲ့သည် မိတ္ထီလာမြို့ပေါ်ရှိ မုန့်မျိုးစုံဆိုင်များသို့ သွားရောက်၍ ကုန်အညွှန်းအမှတ်အသား ပြည့်စုံမှု ရှိ/မရှိ စစ်ဆေးခဲ့ပါသည်။

          ထိုသို့ကွင်းဆင်းစစ်ဆေးရာတွင် စစ်ဆေးရေးအရှိမှ မုန့်မျိုးစုံဆိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသည့် စားသုံးသူကာကွယ်ရေးဥပဒေ ၂၀၁၉ ပါ    ပြဌာန်းချက်များအရ ဥပဒေ အခန်း (၉) ပါ စားသုံးသူ၏ အခွင့်အ‌ရေးနှင့်တာဝန်များ၊ အခန်း(၁၀) ပါ စီးပွားရေးလုပ်ငန်းရှင်များ၏ တာဝန်များ ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေး ဥပဒေ (၁၈)ပါ ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ (၄၁) ပုဒ်မခွဲ (ခ)နှင့် (ဆ) တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖြစ်စေ၊ မြန်မာဘာသာနှင့်အခြား ဘာသာတစ်ခု (သို့) တစ်ခုထက်ပို၍ တွဲလျှက် ဖြစ်စေ ရေးသားဖော်ပြရမည်ဖြစ်ပြီး၊ ကုန်စည်အမျိုးအစားအလိုက် သတ်မှတ်ထားသည့် ဥပဒေပါ ပြဌာန်းချက်များအတိုင်း လိုက်နာဆောင်ရွက်ကြရန် လိုက်နာဆောင်ရွက်ခြင်းမရှိပါကအခန်း(၂၄)ပါ ပြစ်မှုပြစ်ဒဏ်များအရ ဆောင်ရွက်သွားမည်ဖြစ်ကြောင်း စျေးကွက်အတွင်းရောင်းချနေသော ကုန်စည် များတွင် ကုန်အညွှန်းအမှတ်အသား ဖော်ပြချက် ပြည့်စုံမှု ရှိ/မရှိကို ဌာနမှ စျေးကွက်စောင့်ကြည့် စစ်ဆေးမှုများ နေ့စဉ်ဆောင်ရွက်သွားမည်ဖြစ်ပြီး၊ ဆိုင်ရှင်များသို့ အသိပေးပြောကြား စစ်ဆေးခဲ့ ကြောင်း သိရှိရသည်။

DOCA(မန္တလေး)

             နေပြည်တော်ဆီကုန်သည်နှင့် ဆီလုပ်ငန်းရှင်များအသင်းမှ လုပ်ငန်းရှင်များနှင့် စားသုံးသူရေးရာဦးစီးဌာနမှဝန်ထမ်းများ ပူးပေါင်း၍ (၂၅-၈-၂၀၂၂) ရက်နေ့တွင် ဈေးကားများဖြင့်လှည့်လည်၍ ပြင်ပပေါက်ဈေးထက် သက်သာ‌သောဈေးနှုန်းဖြင့် စားသုံးဆီများကို ရောင်းချပေးခဲ့ပါသည်။

          ထိုရောင်းချမှုတွင် ဆီလုပ်ငန်းရှင်(၂)ဦးမှ ဇေယျာသီရိမြို့နယ်နှင့် ပျဥ်းမနားမြို့နယ်ရှိ ကျေးရွာ (၂)ရွာ၊ မြို့နယ်စာရင်းစစ်ရုံးတို့တွင် စားသုံးသူရေးရာဦးစီးဌာနမှ ဒေါ်စောမာလာနွယ်ဦးဆောင်၍ တစ်ဦးလျှင် တစ်ပိဿာနှုန်းဖြင့် ပိဿာချိန် (၁၃၂၀)ပိဿာကိုလည်းကောင်း၊ ဆီလုပ်ငန်းရှင်(၃)ဦးမှ ဒက္ခိဏသီရိမြို့နယ်ရှိ ကျေးရွာ(၃)ရွာတို့တွင် စားသုံးသူရေးရာဦးစီးဌာနမှ ဒေါ်စောမာလာနွယ် ဦးဆောင်၍ ပိဿာချိန် (၁၉၈၀)ပိဿာကိုလည်းကောင်း၊ ဆီလုပ်ငန်းရှင်(၁)ဦးမှ လယ်ဝေးမြို့နယ်ရှိ ကျေးရွာ(၂)ရွာတို့တွင် စားသုံးသူရေးရာဦးစီးဌာနမှ ဒေါ်စောမာလာနွယ် ဦးဆောင်၍ ပိဿာချိန် (၆၆၀)ပိဿာကိုလည်းကောင်း တစ်ပိဿာလျှင် (၅၂၀၀) ကျပ်နှုန်းဖြင့် ရောင်းချပေးခဲ့ပါတယ်။

          ဆက်လက်၍ ဆီလုပ်ငန်းရှင်(၂)ဦးမှ ပုဗ္ဗသီရိမြို့နယ်ရှိ ကျေးရွာ(၂)ရွာတို့တွင် စားသုံးသူရေးရာ ဦးစီးဌာနမှ ဦးခင်မောင်ဆွေဦးဆောင်၍ ပိဿာချိန်(၁၃၂၀)ကိုလည်းကောင်း၊ ဆီလုပ်ငန်းရှင်(၃)ဦးမှ တပ်ကုန်းမြို့နယ်ရှိ ကျေးရွာ(၅)ရွာတို့တွင် စားသုံးသူရေးရာဦးစီးဌာနမှ ဦးခင်မောင်ဆွေဦးဆောင်၍ ပိဿာချိန်(၁၉၈၀)ကိုလည်းကောင်း တစ်ဦးလျှင် တစ်ပိဿာနှုန်းဖြင့် ရောင်းချပေးခဲ့ပါတယ်။

           စားသုံးသူပြည်သူများမှ ယခုလိုကျေးရွာများအထိ ဈေးကားများဖြင့် ရောင်းချပေးသော နေပြည်တော်ဆီကုန်သည်နှင့် ဆီလုပ်ငန်းရှင်များအသင်းကိုလည်းကောင်း၊ စားသုံးသူရေးရာဦးစီးဌာန မှ ဝန်ထမ်းများကိုလည်းကောင်း ကျေးဇူးတင်ရှိသည်ဟု ပြောကြားခဲ့ကြောင်း သတင်းရရှိပါသည်။

DOCA(ပြည်ထောင်စုနယ်မြေ)

           စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊ ဓနုဖြူမြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် မိတ်ဖက်ဌာနများဖြစ်သော ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အားကစားနှင့် လူငယ်လေ့ကျင့်ရေးဦးစီးဌာနတို့နှင့်အတူ (၂၄.၈.၂၀၂၂) နေ့လယ် (၁၂:၀၀) အချိန်တွင် ဓနုဖြူမြို့  အမှတ်-၂ အ.ထ.က ရွှေကူကျောင်းအထက်တန်းကျောင်းတွင် ကျောင်းမုန့်ဈေးတန်းရှိ မုန့်ဆိုင် (၆)ဆိုင်ရှိ မုန့်များအား ကွင်းဆင်းစစ်ဆေးခြင်း ပြုလုပ်ခဲ့ပါသည်။

           ထိုသို့ စစ်ဆေးရာတွင် ကျောင်းမုန့်ဈေးတန်းရှိ မုန့်ဆိုင် (၆)ဆိုင်မှ ‌ရောင်းချနေသောမုန့်များအား စစ်ဆေးခဲ့ပြီး မုန့်ဈေးတန်းတွင် ရောင်းချနေသောမုန့်များသည် ကုန်အညွှန်းအမှတ်အသား ပြည့်စုံစွာပါဝင်သော မုန့်များကိုသာ ဦးစားပေးရောင်းချရန်နှင့် စားသုံးရန်မသင့်သော မုန့်များကို မရောင်း ချရန်နှင့် မသန့်ရှင်းသောမုန့်များ ဝမ်းပျက်ဝမ်းလျော့စေမည့်မုန့်များ ခြင်၊ ယင်မနားအောင် သန့်ရှင်းသပ်ရပ်စွာရောင်းချရန် အသိပညာပေးခဲ့ပြီး လက်ကမ်းစာစောင်ဖြန့်ဝေခဲ့ကြောင်း သတင်းရရှိပါသည်။

DOCA(ဧရာဝတီ)