သတင်းနှင့် လှုပ်ရှားမှုများ

     နတ်တလင်းခရိုင်၊ နတ်တလင်းမြို့နယ်၊ အခြေခံပညာအထက်တန်းကျောင်းရှိ မနောဟဒယခန်းမတွင် ဆရာ/ဆရာမ (၃၃၅)ဦးအား ၂၀၂၃ ခုနှစ်၊ ဖေဖော်ဝါရီလဆန်းတွင် ဖွင့်လှစ်သော ကျောင်းကျန်းမာရေးဆိုင်ရာသင်တန်း၌ စားသုံးသူကာကွယ်ရေးဆိုင်ရာ အသိပညာပေးဆွေးနွေးခြင်းကို ဆောင်ရွက်ခဲ့ပါသည်။

      အဆိုပါသင်တန်းတွင် မြို့နယ်ကျန်းမာရေးဦးစီးမှူး ဒေါက်တာအေးအေးသန့်က ကျောင်းကျန်းမာရေးဆိုင်ရာအကြောင်း ရှင်းလင်းပြောကြားခြင်း၊ မြို့နယ်ပညာရေးမှူးက ဆရာ/ဆရာမများအား အမှာစကားပြောကြားခြင်း၊ မြို့နယ်ကြက်ခြေနီတပ်ဖွဲ့မှူးက ကျောင်းအခြေပြု ရှေးဦးသူနာပြုစောင့်ရှောက်မှုအကြောင်းဆွေးနွေးခြင်း၊ စားသုံးသူရေးရာဦးစီးဌာနမှ စားသုံးသူရေးရာဌာနခွဲတာဝန်ခံ ဦးခင်မောင်ထွန်းက စားသုံးသူကာကွယ်ရေးဥပဒေအားလည်းကောင်း၊ မြို့နယ်တာဝန်ခံ ဒေါ်အေးအေးဆွေက ကုန်ညွှန်းအမှတ်အသားဆိုင်ရာအကြောင်းအားလည်းကောင်း၊ ကျန်းမာရေးမှူးက ကျောင်းတွင်းအစားအစာ အန္တရာယ်ကင်းဝေးစေရေးအကြောင်းအားလည်းကောင်း၊ သွားဆရာဝန် ဒေါက်တာဖြိုးထက်က သွားနှင့်ခံတွင်းကျန်းမာရေးအကြောင်းအားလည်းကောင်း၊ ဒေါ်သင်းသင်းဌေး (အမျိုးသမီးကျန်းမာရေးဌာန)က အာဟာရအခြေအနေတွက်ချက်မှုကို ဆန်းစစ်ဆွေးနွေးခြင်း၊ ကျောင်းကျန်းမာရေး မှတ်တမ်းသုံးစွဲခြင်းအခြေအနေများကိုလည်းကောင်း အသီးသီးဆွေးနွေးခဲ့ကြကြောင်း သတင်းရရှိပါသည်။

DOCA(ပဲခူး)

        မွန်ပြည်နယ်ကလေးအလုပ်သမား ပပျောက်ရေးဆိုင်ရာ အလုပ်အကိုင်အခွင့်အလမ်းများ ဖန်တီးပေးရေးလုပ်ငန်းကော်မတီမှ မွန်ပြည်နယ်အစိုးရအဖွဲ့၏ ပံ့ပိုးကူညီမှုဖြင့် အိမ်တွင်းလျှပ်စစ် ဝါယာသွယ်တန်းခြင်းသင်တန်း၊ ဂဟေဆက်သင်တန်း၊ အခြေခံအုတ်စီနှင့်ပန်းရံသင်တန်းဖွင့်ပွဲကို ၁၅.၂.၂၀၂၃ ရက်နေ့တွင် မော်လမြိုင်မြို့၊ လူငယ်သင်တန်းကျောင်း၌ ကျင်းပပြုလုပ်ခဲ့ရာ မွန်ပြည်နယ်ဝန်ကြီးချုပ်၊ ပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်အဆင့် ဌာနဆိုင်ရာ တာဝန်ရှိပုဂ္ဂိုလ်များ၊ ကော်မတီအဖွဲ့ဝင်များ၊ ဖိတ်ကြားထားသည့်ဧည့်သည်တော်များနှင့် သင်တန်းသားများ တက်ရောက်ခဲ့ကြောင်း သိရှိရပါသည်။  

          အဆိုပါ အခမ်းအနားတွင် မွန်ပြည်နယ်ဝန်ကြီးချုပ်က အဖွင့်အမှာစကားပြောကြားရာ၌ အန္တရာယ်ရှိသော အလုပ်နှင့်လုပ်ငန်းခွင်များတွင် ကလေးအလုပ်သမားများအား ဖယ်ရှားပြီး သင့်လျော်ကောင်းမွန်သော အလုပ်အကိုင်ရရှိရေးနှင့် အသက်မွေးပညာကျောင်းများ တက်ရောက်နိုင်ရေး စီမံဆောင်ရွက်ပေးရမည်ဖြစ်ကြောင်း၊ အလုပ်အကိုင်အခွင့်အလမ်း ဖန်တီးပေးရေးကော်မတီအနေဖြင့် အမျိုးသားအဆင့်လုပ်ငန်းစီမံချက်၏ ပထမ (၅) နှစ် စီမံချက်ဖြစ်သော ၂၀၁၉-၂၀၂၃ ထိတွင် အရည်အသွေးရှိသည့် လုပ်သားအင်အားရရှိစေရန်၊ ကလေး သူငယ်သင်တန်းကျောင်းများကို ပို့ဆောင်ပြီး သင်တန်းဆင်းများကို သင့်လျော်သော အလုပ်အကိုင်ရရှိရေး ဆောင်ရွက်ပေးခြင်း၊ အလုပ်အကိုင်ပေးလိုသော ဌာနများနှင့်ချိတ်ဆက် ပေးခြင်း၊ မြန်မာနိုင်ငံ ကလေးအလုပ်သမားပပျောက်ရေးဆိုင်ရာ အမျိုးသားကော်မတီ၏ အလုပ်အကိုင်အခွင့်အလမ်းဖန်တီးပေးရေးလုပ်ငန်းကော်မတီပဉ္စမအကြိမ် လုပ်ငန်းညှိနှိုင်းဆုံးဖြတ် ချက်အရ မိသားစုတိုင်းသင့်လျော်သည့်ဝင်ငွေရရှိရေး၊ အလုပ်အကိုင်အခွင့်အလမ်းများ ရရှိနိုင်ရန် သက်မွေးပညာကြိုသင်တန်းများ၊ သက်မွေးပညာသင်တန်းများကို တက်ရောက်နိုင်ရေး လုပ်ငန်း ကော်မတီဝင် သက်ဆိုင်ရာဝန်ကြီးဌာနများ၊ နေပြည်တော်ကောင်စီ၊ တိုင်းဒေသကြီး/ပြည်နယ် အလုပ်အကိုင်အခွင့်အလန်းဖန်တီးပေးရေး လုပ်ငန်းကော်မတီများ၊ အသင်းအဖွဲ့များက ဆောင်ရွက် ပေးရမည်ဖြစ်ကြောင်း ပြောကြားခဲ့ပါသည်။ ထို့နောက် မှတ်တမ်းတင်ဓာတ်ပုံရိုက်ကူးခဲ့ကြပြီး အခမ်းအနားအား ရုပ်သိမ်းခဲ့ကြောင်း သိရှိရပါသည်။

DOCA(မွန်)

         မွန်ပြည်နယ်အစိုးရအဖွဲ့မှ ကြီးမှူးကျင်းပသော အသေးစား၊ အငယ်စား၊ အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးအတွက်  MSME Talk Show စကားဝိုင်းဆွေးနွေးပွဲကို ၁၄.၂.၂၀၂၃ ရက်နေ့တွင် ချောင်းဆုံမြို့၊ ကျွန်းသာယာခန်းမ၌ ကျင်းပပြုလုပ်ခဲ့ရာ မွန်ပြည်နယ် ဝန်ကြီးချူပ်၊ အစိုးရအဖွဲ့ဝင်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ စီးပွားရေးလုပ်ငန်းရှင်များ တက်ရောက်ခဲ့ကြသည်။

          အဆိုပါဆွေးနွေးပွဲတွင် မွန်ပြည်နယ်ဝန်ကြီးချုပ်မှ အဖွင့်အမှာစကားပြောကြားခဲ့ပြီး အစိုးရအဖွဲ့ဝင်ဝန်ကြီးများက ၎င်းတို့ပံ့ပိုးပေးဆောင်ရွက်ပေးနေသည့် အကြောင်းအရာများအား ရှင်းလင်းဆွေးနွေးခဲ့ကြသည်။

       ထို့နောက် Moderator အဖြစ် မော်လမြိုင်ပညာရေးကောလိပ်ကျောင်းအုပ်ဆရာမကြီး၊ စက်မှုကြီးကြပ်ရေးနှင့်စစ်ဆေးရေးဦးစီးဌာန (ခေတ္တ) ပြည်နယ်ဦးစီးမှူးမှ စက်မှုနှင့် MSMEကဏ္ဍ၊မွန်ပြည်နယ် အသေးစားစက်မှုလက်မှုလုပ်ငန်း ဒုတိယညွှန်ကြားရေးမှူး မှMSME ဖွံဖြိုးတိုးတက်ရေးအတွက်ဌာနကဆောင်ရွက်ပေးလျက်ရှိသော လုပ်ငန်းများအကြောင်း ၊ မွန်ပြည်နယ် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနပြည်နယ်ဦးစီးမှူးက မြေယာရရှိရေးကဏ္ဍ၊ အစိုးရစက်မှုလက်မှု သိပ္ပံကျောင်းအုပ်ကြီးမှ နည်းပညာဖွံ့ဖြိုးတိုးတက်ရေးကဏ္ဍ နှင့်ပတ်သက်၍ ဆွေးနွေးခဲ့ကြောင်း သိရှိရပါသည်။

        ထို့နောက်တက်ရောက်လာသူတစ်ဦးကမှ ဈေးကွက်ရရှိရေးနှင့်ပတ်သက်၍ မေးမြန်းခဲ့ရာ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးက မိမိတို့ဝန်ကြီးဌာနက ဆောင်ရွက်လျက်ရှိသော ပြည်တွင်း၊ ပြည်ပ ဈေးကွက်ရရှိရေး ဆောင်ရွက်ပေးနေမှုအခြေအနေများအား ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

       ရှမ်းပြည်နယ်(တောင်ပိုင်း) လွိုင်လင်မြို့နယ်၊ ပင်လုံမြို့ရှိ ထောပတ်သီးစိုက်ပျိုးထုတ်လုပ်သည့် တောင်သူများနှင့်တွေ့ဆုံဆွေးနွေးခြင်းနှင့်အစုအဖွဲ့ ဖွဲ့စည်းခြင်းအခမ်းအနားကို ၁၄.၂.၂၀၂၃ ရက်နေ့ နံနက်(၁၀)နာရီအချိန်တွင် ပင်လုံမြို့၌ ကျင်းပပြုလုပ်ခဲ့ပါသည်။

          အဆိုပါအခမ်းအနားတွင် စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ ဦးခွန်ကျော်ဌေး (လက်ထောက်ညွှန်ကြားရေးမှူး)က စားသုံးသူကာကွယ်ရေးဆိုင်ရာသိကောင်းစရာများနှင့်ရှမ်းပြည်နယ်အတွင်း ဖွဲ့စည်းထားရှိသည့် ပုဂ္ဂလိကစီးပွားရေးအသင်းအဖွဲ့များ၊ အစုအဖွဲ့ များအကြောင်းကို ရှင်းလင်းဆွေးနွေးခြင်း၊ ရှမ်းပြည်နယ်(တောင်ပိုင်း) ထောပတ်သီးစိုက်ပျိုးတင်ပို့ထုတ်လုပ်ရောင်းချသူမျာအသင်း ဥက္ကဌ ဦးထွန်းထွန်းဝင်းမှ ထောပတ်သီးစိုက်ပျိုးထုတ်လုပ်ခြင်းနှင့်ပတ်သက်ပြီး မျိုးရွေးချယ်ခြင်း၊ ကိုင်းကူးကိုင်းဆက်ပြုလုပ်ခြင်း၊ ပိုးသတ်ဆေးနှင့်သွင်းအားစုများအသုံးပြုခြင်း၊ ဈေးကွက်သို့ တင်ပို့ရောင်းချခြင်းနှင့်ပတ်သက်သော အကြောင်းအရာများကို ဆွေးနွေးခြင်းများ ပြုလုပ်ခဲ့ပါသည်။

        ထို့နောက်ရှမ်းပြည်နယ်(တောင်ပိုင်း) ထောပတ်သီးစိုက်ပျိုးတင် ပို့ထုတ်လုပ်ရောင်းချသူမျာ အသင်းဥက္ကဌမှ ဦးဆောင်၍ ပင်လုံမြို့ ထောပတ်သီးစိုက်ပျိုးထုတ်လုပ်တင်ပို့ရောင်းချသူများအစုအဖွဲ့(ယာယီ)ကို အလုပ်မှုဆောင်(၁၅)ဦးဖြင့် ဖွဲ့စည်းဆောင်ရွက်ခဲ့ကြောင်း သိရပါသည်။ ထို့နောက်တက်ရောက်လာသော ထောပတ်သီးတောင်သူများမှ သိရှိလိုသည်များကို မေးမြန်းဆွေး နွေးခဲ့ကြပြီးအခမ်းအနားကို နေ့လည်(၁၂:၀၀)တွင် ရုပ်သိမ်းခဲ့ကြောင်း သိရှိရပါသည်။

DOCA(ရှမ်း)

       ဆိပ်ဖြူမြို့ ကြက်သွန်နီအရောင်းအဝယ်ဖြစ်လျက်ရှိသော ကုန်စည်ဒိုင်သို့ ဖေဖော်ဝါရီလ(၈)ရက် မှ(၁၄)ရက်ထိ (ဒုတိယ)ပတ်အတွင်း ကြက်သွန်နီ(အသစ်)များတစ်ရက်လျှင် ပျမ်းမျှကြက်သွန်နီ ကုန်ချိန်ပိဿာ(၃)သောင်းခန့်(၁)ပတ်အတွင်း စုစုပေါင်းပိဿာ(၂)သိန်းခန့်  ဝင်ရောက် လျက်ရှိ ကြောင်း သိရှိရသည်။

          ယခု(၁)ပတ်အတွင်း ကြက်သွန်နီ(၁)ပိဿာဈေးနှုန်းမှာ အမြင့်ဈေး ထိပ်စ(ရှယ်) ကျပ် (၁၁၅၀ မှ ၁၀၅၀)၊ အလတ်စ ကျပ်(၉၅၀ မှ ၈၅၀)၊ အသေးစ ကျပ်( ၈၀၀ မှ  ၇၀၀)ဈေးနှုန်းတို့ဖြင့် အရောင်း အဝယ်ဖြစ်ခဲ့ပါသည်။ ယခင် ဖေဖော်ဝါရီ(ပထမ)ပတ်တွင် ကြက်သွန်နီထိပ်စအမြင့်ဆုံးဈေး မှာ(၁)ပိဿာလျှင် ကျပ်(၁၃၀၀)ဈေးနှုန်းဖြင့် အရောင်းအဝယ်ဖြစ်ခဲ့၍ ယခု(၁)ပတ်တွင် ထိပ်စ(ရှယ်) ကျပ်(၁၅၀)၊ အလတ်စနှင့် အသေးစတို့မှာ ကျပ်(၁၀၀)စီခန့် ဈေးနှုန်း ကျဆင်းခဲ့သည်။

          ဆိပ်ဖြူမြို့မှ ကြက်သွန်နီများကို အခြားတိုင်းဒေသကြီးများသို့ စီးထွက်မှုမှာ ရန်ကုန်ဘုရင့် နောင်ပွဲရုံ၊ ပြည်မြို့၊ ဧရာဝတီတိုင်းဒေသကြီး၊ ပုသိမ်မြို့နှင့် မော်လမြိုင်မြို့၊ ပြည်ပပို့ကုန်အဖြစ် မြဝတီဝယ်လက်မှတဆင့် ဗီယက်နမ်နိုင်ငံ၊ မူဆယ်မြို့မှတဆင့်တရုတ်နိုင်ငံသို့ အများဆုံးတင်ပို့လျက် ရှိပြီး ယခု(၁)ပတ်အတွင်း စုစုပေါင်းပျမ်းမျှပိဿာ(၂)သိန်း၊ (၅၇၁၄)အိတ်၊ တန်ချိန်(၁) သောင်းခွဲခန့် ကုန်စည်စီးဆင်းခဲ့ကြောင်း ကုန်စည်ဒိုင်ဈေးကွက်မှ သိရှိရသည်။

          ဆိပ်ဖြူမြို့ ပတ္တမြားဈေးအတွင်းရှိ ဈေးတန်းများတွင် ကြက်သွန်နီ အရွယ်အစား အရည်အသွေးလိုက်၍ (၁)ပိဿာလျှင် လက်ကားဈေး  (၁၅၀၀မှ ၅၀၀)ကျပ်ဈေးဖြင့် အရောင်းအဝယ်ဖြစ် နေကြောင်း ကုန်စိမ်းရောင်းချသူ ဈေးသည်များမှတစ်ဆင့် သိရှိရသည်။

DOCA(မကွေး)