သတင်းနှင့် လှုပ်ရှားမှုများ

     ၁၅.၂.၂၀၂၃ ရက်နေ့၊ နံနက် (၁၀:၃၀) အချိန်တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံး၌ တိုင်ကြားခြင်းနှင့် စိစစ်ညှိနှိုင်းဖြေရှင်းဆောင်ရွက်ခြင်း ခေါင်းစဉ်ဖြင့် “Thursday Talk” အသိပညာပေး ဆွေးနွေးပွဲကျင်းပပြုလုပ်ခဲ့ပါသည်။

     အဆိုပါဆွေးနွေးပွဲ၌ ခရိုင်ဦးစီးမှူး ဦးဇော်မင်းလတ်က အဖွင့်စကားပြောကြားပေးပြီး၊ ထုတ်ကုန် လုံခြုံစိတ်ချရမှုဌာနခွဲမှ ဒု-ကြီးကြပ်ရေးမှူး ဦးနေလင်းမှ စားသုံးသူကာကွယ်ရေးဆိုင်ရာ တိုင်ကြားမှု နှင့်ပတ်သက်၍ စားသုံးသူကာကွယ်ရေးဥပဒေပါ အခန်း (၁၉)၊ ပုဒ်မ(၄၄) တွင် ပြဌာန်းထားသော တိုင်ကြားခြင်းနှင့် စိစစ်ညှိနှိုင်းဖြေရှင်းဆောင်ရွက်ချက်တွင် စားသုံးသူတစ်ဦးဦး(မည်သူမဆို) နစ်နာဆုံးရှုံးမှုရှိခဲ့ပါက တိုင်ကြားနိုင်ပါကြောင်း၊ တိုင်ကြားရာတွင် လူကိုယ်တိုင်သော်လည်းကောင်း၊ လူထုဆက်သွယ်ရေးနည်းလမ်းတစ်ခုခုဖြင့်သော်လည်းကောင်း သက်ဆိုင်ရာဦးစီးမှူးရုံးသို့ သက်သေခံအထောက်အထားနှင့်အတူ တိုင်ကြားနိုင်ပါကြောင်း၊ တိုင်ကြားစာတစ်စောင်ရရှိပါက တိုင်ကြားမှုပုံစံတွင် ဖြည့်စွက်ရမည့်အကြောင်းအရာများ ပြည့်စုံ မှန်ကန်မှု ရှိ/မရှိ စစ်ဆေးပြီးမှ မှတ်တမ်းတင်ထားရှိရမည်ဖြစ်ပါကြောင်း၊ တိုင်ကြားမှုများဖြေရှင်းရာတွင် လျှို့ဝှက်ရမည့်သတင်းအချက်အလက်များကို လျှို့ဝှက်အနေဖြင့် ဆောင်ရွက်ရပါကြောင်း၊ ပုဒ်မ(၁၅)၊ ပုဒ်မခွဲ(ဇ)အရ စစ်ဆေးရေးအရာရှိကတင်ပြလာသည့် စုံစမ်းစစ်ဆေးမှုများကို ဥပဒေနှင့်အညီ ဖြေရှင်းဆောင်ရွက်ရမည့် တိုင်ကြားမှုများကို သက်ဆိုင်ရာအစိုးရဌာနများနှင့် ပူးပေါင်းညှိနှိုင်းဆောင်ရွက်ပါဖြစ်ကြောင်း၊ တိုင်ကြားစာဖြေရှင်းဆောင်ရွက်နေစဉ် မရိုးမဖြောင့်၍ဖြစ်စေ၊ မတရားသောနည်းလမ်းဖြင့်ဖြစ်စေ၊ မဟုတ်မမှန်လိမ်လည်တိုင်ကြားမှုများ စိစစ်တွေ့ရှိခဲ့ပါက တိုင်ကြားသူအား တည်ဆဲဥပဒေနှင့်အညီ အရေးယူနိုင်ပါကြောင်း၊ တိုင်ကြားစာ ဖြေရှင်းရေး ကိစ္စနှင့် စပ်လျဉ်းသည့် ကုန်ကျစရိတ်များကို နစ်နာဆုံးရှုံးမှုဖြစ်ပေါ်စေသူဘက်မှ ကျခံရမည်ဖြစ်ပါကြောင်းတို့ကို အကျယ်တဝင့်ဆွေးနွေးခဲ့ကြပါသည်။

    ထို့နောက် ဝန်ထမ်းများမှလည်း သိရှိလိုသည်များကို  ပြန်လည်မေးမြန်းမှုများ ပြုလုပ်ခဲ့ပြီး “Thursday Talk” ဆွေးနွေးပွဲအား နေ့လယ် (၁၂:ဝဝ) အချိန်တွင် ရုပ်သိမ်းခဲ့ရာ ဆေးနွေးပွဲသို့ ဝန်ထမ်းစုစုပေါင်း (၁၅)ဦးတက်ရောက်ခဲ့ကြောင်း သတင်းရရှိပါသည်။

DOCA(ရန်ကုန်)

          ဧရာဝတီတိုင်းဒေသကြီး၊ ပုသိမ်မြို့တိုင်းအလုပ်သမားညွှန်ကြားမှုဦးစီးဌာန ညွှန်ကြားရေးမှူးဦးမျိုးနိုင်ဦးဆောင်၍အဖွဲ့ဝင်/တိုင်းအဆင့်ဌာနဆိုင်ရာများဖြစ်သော အကောက်ခွန်ဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ပတ်ဝန်းကျင်ထိန်းသိမ်းရေးဦးစီးဌာန၊ စားသုံးသူရေးရာဦးစီးဌာန၊ ရင်းနှီးမြှပ်နှံမှုနှင့်ကုမ္ပဏီများညွှန်ကြားမှုဦးစီးဌာန၊စီမံကိန်းရေးဆွဲရေးဦးစီးဌာနနှင့်ပြည်တွင်းအခွန်များ ဦးစီးဌာနတို့ ပူးပေါင်းပါဝင်သော CMP လုပ်ငန်းများ မြေပြင်ကွင်းဆင်းစစ်ဆေးရေးအဖွဲ့သည် ၁၆.၂.၂၀၂၃ ရက်နေ့တွင်၊ကန်ကြီးထောင့်မြို့နယ် Hua Meng (Myanmar) Co,Ltdနှင့် ပုသိမ်မြို့ စက်မှုဇုန်ရှိ He Shan (Myanmar) Garments Co,Ltd သို့ သွားရောက်၍ ကွင်းဆင်းစစ်ဆေးခဲ့ပါသည်။

      ထိုသို့သွားရောက်စစ်ဆေးခဲ့ရာတွင် စက်ရုံစာရင်းအချက်အလက်များမှန်ကန်စေရေး သက်ဆိုင်ရာဌာနများ၏ခွင့်ပြုမိန့်များပြည့်စုံမှုရှိစေရေး၊ အလုပ်သမားဥပဒေပါ အခွင့်အရေးများအားဆောင်ရွက် ပေးမှုရှိစေရေးနှင့်ဘေးအန္တရာယ်ကင်းရှင်းစေရေးအတွက် သက်ဆိုင်ရာဌာနများနှင့်ပူးပေါင်း၍ အသိပညာပေးဆောင်ရွက်ရန်ကိစ္စရပ်များ၊ OT ကိစ္စများ ၊လုံခြုံရေးကိစ္စများ၊ နိုင်ငံခြားသားများနေထိုင်ခွင့်ပုံမှန်သက်တမ်းတိုးရန်ကိစ္စများ၊ ကုမ္ပဏီ၏ထုတ် ကုန်အမျိုးအစားနှင့်အမှတ်တံဆိပ်မှန်ကန်မှုရှိစေရေးကိစ္စများ၊ ကုမ္ပဏီလိပ်စာခွင့်ပြုမိန့်များမှန်ကန်မှုရှိစေရေးကိစ္စများ၊ ကုမ္ပဏီ၏ရင်းနှီးမြှပ်နှံမှုပုံစံ၊ ကုန်ကြမ်းတင်သွင်းမှုကုန်ချောတင်ပို့မှုအသုံးပြုသည့်စက်ကိရိယာများ၊ အလုပ်သမားဆိုင်ရာအချက်အလက်များနှင့်စာချုပ်ချုပ်ဆိုထားရှိမှုငွေစာရင်းပိုင်းဆိုင်ရာကိစ္စရပ်များ၊သက်ဆိုင်ရာဌာနများမှထုတ်ပြန်ထားသောအမိန့်နှင့်ညွှန်ကြားချက်များအားလိုက်နာမှုရှိရှိလာစေရန်နှင့်လိုအပ်သည်များအား အသေးစိတ်ကွင်းဆင်းစစ်ဆေးခဲ့ပါကြောင်းသတင်းရရှိပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ် မြို့နယ်တာဝန်ခံဦးအောင်သန်းဌေးသည် (၁၄.၂.၂၀၂၃)ရက်နေ့ နံနက်(၀၉:၃၀)နာရီအချိန်တွင်  ပိန်းအင်းအုပ်စု၊ အလယ်စုကျေးရွာ၊ ရာအိမ်မှူးအိမ်၌ ကုန်မျိုးစုံအရောင်းဆိုင်လုပ်ငန်းရှင်(၇)ဦးအားတွေ့ဆုံ၍  စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့ပါသည်။

   ဟောပြောပွဲတွင် မြို့နယ်တာဝန်ခံက စားသုံးသူရေးရာဦးစီးဌာနဖြစ်ပေါ်လာပုံ၊ ဌာန၏မျှော်မှန်းချက်၊ ရည်မှန်းချက်၊ စားသုံးသူကာကွယ်ရေးဥပဒေပါ  စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့်အချက်များ၊ စီးပွားရေးလုပ်ငန်းရှင်အနေဖြင့်လည်း မိမိတို့ကုန်စည်အပေါ်ပေးရမည့် အာမခံချက်များနှင့်စားသုံးသူများဘေးအန္တရာယ်ကင်းရှင်းစေရန်အတွက် ဦးစားပေးဆောင်ရွက်ရမည့်အချက်များ၊ စားသုံး သူရေးရာဦးစီးဌာနမှ လက်ရှိဆောင်ရွက်နေသည့် လှုပ်ရှားမှုအခန်းကဏ္ဍများ၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းများ ဖွင့်လှစ်ထားရှိမှု အခြေအနေတို့ကို အသိပညာပေးဟောပြောခဲ့ပြီးနောက် တက်ရောက်လာသူများက သိရှိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များအား ဖြန့်ဝေပေးခဲ့ကြကြောင်း သတင်းရရှိပါသည်။

DOCA(ဧရာဝတီ)

      ကယားပြည်နယ်၊ နိုင်ငံ့စီးပွားမြင့်တင်ရေးရန်ပုံငွေမှ မတည်ထောက်ပံ့ငွေဖြင့် ဆောင်ရွက်နေသည့်လုပ်ငန်းများကို အကောင်အထည်ဖော်ရေးနှင့်ပတ်သက်၍ ပြည်နယ်ရန်ပုံငွေစီမံခန့်ခွဲမှု ကော်မတီအစည်းအဝေး(၁/၂၀၂၃)နှင့် စိုက်ပျိုးရေးနှင့်မွေးမြူရေးဆိုင်ရာ လုပ်ငန်းညှိနှိုင်းအစည်းအဝေးကို ၂၀၂၃ ခုနှစ်၊ ဖေဖော်ဝါရီလ(၂၁)ရက်နေ့၊ မွန်းလွဲပိုင်းတွင် ကယားပြည်နယ် အစိုးရအဖွဲ့ရုံး၊ အစည်းအဝေးခန်းမ၌ ကျင်းပပြုလုပ်ခဲ့ရာ ပြည်နယ်ဝန်ကြီးချုပ် ဦးဇော်မျိုးတင်၊ ပြည်နယ်အစိုးရအဖွဲ့ဝင်များ၊ ကယားပြည်နယ် စားသုံးသူရေးရာဦးစီးဌာန ဒု-ညွှန်ကြားရေးမှူး ဦးမြင့်အောင်အပါအဝင် ပြည်နယ်အဆင့်ဌာနဆိုင်ရာများနှင့် ခရိုင်၊ မြို့နယ်စီမံအုပ်ချုပ်ရေးအဖွဲ့ များတက်ရောက်ခဲ့ကြပါသည်။

    ရှေးဦးစွာ ကယားပြည်နယ်အစိုးရအဖွဲ့ ပြည်နယ်ဝန်ကြီးချုပ်က အဖွင့်အမှာစကားပြောကြားရာတွင် နိုင်ငံ့စီးပွားမြှင့်တင်ရေးရန်ပုံငွေမှ ကယားပြည်နယ်အတွက် မတည်ထောက်ပံ့ငွေ(၁၀)ဘီလီယံဖြင့် ဒေသဖွံ့ဖြိုးတိုးတက်ရေးလုပ်ငန်းများကို အကောင်အထည်ဖော်ဆောင်ရွက်လျက်ရှိကြောင်း၊ ပြည်နယ်အတွက် အမှန်တကယ်အကျိုးရှိပြီး ကျေးရွာလူထုကိုယ်တိုင်ပါဝင်သည့် ဒေသနှင့်ကိုက်ညီသောစိုက်ပျိုးရေး၊ မွေးမြူရေးနှင့် စိုက်ပျိုးမွေးမြူရေးကို အခြေခံသောကုန်ထုတ်လုပ်ငန်းများကို လျာထားသတ်မှတ်ချက်များထက်ကျော်လွန်အောင် ဒေသနှင့်ကိုက်ညီသည့်နည်းလမ်းများဖြင့် ဆက်လက်အကောင်အထည်ဖော်ဆောင်ရွက်ရမည်ဖြစ်ကြောင်း၊ သက်ဆိုင်ရာဌာနအသီးသီးက စိုက်ပျိုးမွေးမြူရေးလုပ်ငန်းများ၏အဓိကလိုအပ်ချက်များကို စဉ်ဆက်မပြတ်ဖြည့်ဆည်းပေးနိုင်သည့်နည်းလမ်းများဖြင့် ဆောင်ရွက်ပေးပြီး လုပ်ငန်းအောင်မြင်မှုအခြေအနေများကို လေ့လာဆန်းစစ်နေရမည်ဖြစ်ကြောင်း လမ်းညွှန်မှာကြားခဲ့ပါသည်။

       ထို့နောက် ပြည်နယ်အစိုးရအဖွဲ့ဝင်များက တတိယအကြိမ် ချေးငွေအဆိုပြုချက်များအပေါ်  စိစစ်ဆောင်ရွက်ထားရှိမှုများအားလည်းကောင်း၊  လွိုင်ကော်မြို့နယ်အတွင်းရှိ ကျေးရွာများ သို့ကွင်းဆင်းခဲ့စဉ်  ပြည်သူများ၏တင်ပြချက်များအပေါ် သက်ဆိုင်ရာဌာနများကစိစစ်ပြီး ပြန်လည်တင်ပြလာခြင်းများအားလည်းကောင်း၊ ဌာနဆိုင်ရာအသီးသီးက စိုက်ပျိုးရေး၊ မွေးမြူရေး လုပ်ငန်းများနှင့်စပ်လျဉ်း၍ လက်ရှိဆောင်ရွက်နေသည့်အခြေအနေများနှင့် ဆက်လက်ဆောင်ရွက်သွားမည့်အခြေအနေများအားလည်းကောင်း  ရှင်းလင်းတင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းပေးခဲ့ကြောင်းသိရှိရပါသည်။

DOCA(ကယား)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြန်အောင်ခရိုင်၊ အင်္ဂပူမြို့၊ မြို့နယ်တာဝန်ခံဦးဘိုဘိုသည် ကျန်းမာရေးဦးစီးဌာနနှင့် ပူးပေါင်း၍ ၂၀၂၃ ခုနှစ် ဖေဖော်ဝါရီလ ၁၃ ရက်နေ့ နံနက် (၁၀:၀၀)နာရီအချိန်တွင် အမှတ်(၃)ရပ်ကွက်ရှိ ဆေးမျိုးစုံအရောင်းဆိုင်များအား ဈေးကွက်စောင့်ကြည့် စစ်ဆေးခြင်းများဆောင်ရွက်ခဲ့ပါသည်။

     ထိုသို့ကွင်းဆင်းခဲ့ရာတွင် မြို့နယ်တာဝန်ခံက စားသုံးသူမိဘပြည်သူများအား ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ဆေးဝါးများသည် ကုန်အညွှန်းအမှတ်အသားပြည့်စုံမှုရှိ/မရှိနှင့် သတ်မှတ်စံချိန်စံညွှန်းပြည့်မီခြင်း၊ မှတ်ပုံတင်ထားခြင်းမရှိသော ဆေးဝါးများ ရောင်းချခြင်းရှိ/မရှိတို့ကိုစစ်ဆေးခဲ့ပြီး၊ တရားမဝင်ဆေးဝါးများ တင်သွင်းရောင်းချခြင်းမပြုရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင် ရွက်ရန်၊  ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရန်နှင့် သတ်မှတ်အရည် အသွေးပြည့်မီသောကုန်စည်များကိုသာ ရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ ၊တားမြစ်ချက်များနှင့် ပြစ်မှုပြစ်ဒဏ်များအား သိရှိလိုက်နာဆောင်ရွက်နိုင်ရန်စသည်တို့ကို အသိပညာပေးဆွေးနွေးခဲ့၍  ဆေးဆိုင်(၂)ဆိုင်အား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)