သတင်းနှင့် လှုပ်ရှားမှုများ

   ၂၀၂၄ ခုနှစ်၊ ဇူလိုင်လ (၂) ရက်နေ့၊ နံနက်(၀၉း၀၀)အချိန်တွင် တနင်္သာရီတိုင်းဒေသကြီး၊ မြိတ်မြို့ ရှိ မြိတ်ဆီကိုယ်စားလှယ်သို့ ရောင်းချပေးသော စားအုန်းဆီ ၄၆ ပေပါ (သို့) ပိဿာ ၅၀၆၀ သည် ရန်ကုန်မြို့မှ 8I-9035 မော်တော်ယာဥ်ဖြင့် မြိတ်မြို့၊ ရှမ်းချောင်းရပ်ရှိ အန်တီဝင်းကုန်စည်ပို့ဆောင်ရေးသို့ ရောက်ရှိလာခဲ့ကြောင်း သိရှိရပါသည်။

    အဆိုပါစားအုန်းဆီများကို မြိတ်ခရိုင်စားသုံးသူရေးရာဦးစီးဌာနမှ သွားရောက်စစ်ဆေးခဲ့ရာ ရည်ညွှန်း‌စျေးအား သယ်ယူပို့ဆောင်ကုန်ကျစရိတ်နှင့် ၂% အမြတ်တို့ဖြင့် လက်လီဆိုင်များသို့ ခွဲဝေ ရောင်းချပေးသွားမည်ဖြစ်ကြောင်း၊ လက်လီဆိုင်များမှ ပြည်သူများသို့ ၂% အမြတ်ဖြင့် ပြန်လည်ရောင်းချမည်ဖြစ်ကြောင်း ဆီကိုယ်စားလှယ်ထံမှ သိရှိရပါသည်။   

DOCA(တနင်္သာရီ)

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင်ဦးစီးမှူး ဦးမျိုးဝင်းနိုင်နှင့် ဝန်ထမ်းများသည် ၁-၇-၂၀၂၄ ရက်၊ နံနက် ၁၀:၀၀ နာရီအချိန်တွင် ကရင်ပြည်နယ်၊ ဘားအံမြို့ရှိ အ.မ.က မူလွန် (၁)၊ အခြေခံပညာမူလတန်းလွန်ကျောင်းရှိ (ကျောင်းသား၊ ကျောင်းသူ)များအား စားသုံးသူကာကွယ်‌ရေးဆိုင်ရာ သိကောင်းစရာအကြောင်းကို အသိပညာပေးဟောပြောခဲ့ကြောင်း သိရှိရသည်။

    အဆိုပါဟောပြောပွဲတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင် ဦးစီးမှူး ဦးမျိုးဝင်းနိုင်က  အွန်လိုင်းဈေးဝယ်ရာတွင် သတိပြုရမည့်အချက်များအကြောင်းသိကောင်းစရာနှင့် ထုတ်ကုန်လုံခြုံစိတ်ချရမှုရှိသော အစားအသောက်နှင့်ကုန်စည်များကို စနစ်တကျရွှေးချယ် ဝယ်ယူစားသောက်သုံးစွဲတတ်စေရန်အတွက် ကုန်ညွှန်းအမှတ်အသားအကြောင်းကို ကျောင်းသား၊ ကျောင်းသူများကို လွယ်ကူစွာသိရှိနိုင်ရန် ဥပမာ- မုန့်မျိုးစုံဖြင့် လက်တွေ့ရှင်းလင်းပြောကြားခဲ့ပါသည်။ဟောပြောပွဲသို့ ဆရာ၊ ဆရာမ (၁၆) ဦး၊  ကျောင်းသား၊ ကျောင်းသူများ (၁၀၈)ဦး စုစုပေါင်း ဦးရေ(၁၂၄) တက်ရောက်ခဲ့ပြီး  အသိပညာပေးလက်ကမ်းစာစောင်များလည်း ဖြန့်ဝေခဲ့ကြောင်း သိရှိရပါသည်။

    ထို့နောက် ခရိုင်ဦးစီးမှူးနှင့် ဆရာ၊ဆရာမတို့သည် ကျောင်းဝန်းအတွင်းရှိ ကျောင်းမုန့်ဈေးတန်းတွင် အစားအသောက်များ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေး အတွက်  ကျောင်းမုန့်ဈေးတန်းစစ်ဆေးခြင်းများလည်း ဆောင်ရွက်ခဲ့ကြောင်း သတင်းရရှိသည်။

DOCA(ကရင်)

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၌ ပြည်သူများ၊ ဝန်ထမ်းများ ဈေးနှုန်းသက်သာစွာဝယ်ယူနိုင်ရေးအတွက် ၂၀၂၄ခုနှစ်၊ ဇွန်လ  ၂၉ရက်နေ့၊ နံနက် ၀၇:၃၀ နာရီအချိန်တွင် ကန့်ဘလူခရိုင်စုပေါင်းရုံး၌ ရောင်းချပေးခဲ့ရာ သတ်မှတ်ဈေးနှုန်းအတိုင်းရောင်းချခြင်းရှိ/မရှိ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကွင်းဆင်းစစ်ဆေးခဲ့ကြောင်းသိရသည်။

      ထိုသို့ရောင်းချပေးရာတွင် ခရိုင်စီမံအုပ်ချုပ်ရေးအဖွဲ့၏အစီအမံဖြင့် မြို့နယ်စီမံအုပ်ချုပ်ရေးအဖွဲ့ဝင်များ၊ စားသုံးသူရေးရာဦးစီးဌာနနှင့် ဌာနဆိုင်ရာတာဝန်ရှိသူများက ခရိုင်ဆီလုပ်ငန်းရှင်များအသင်းနှင့်ပူးပေါင်း၍ လာရောက်ဝယ်ယူကြသည့် ဝန်ထမ်းများအလွယ်တကူဝယ်ယူနိုင်ရေး စီစဉ်ဆောင်ရွက်ပေးကာ ဝန်ထမ်းတစ်ဦးလျှင် စားအုန်းဆီ (၅၀)ကျပ်သားလျှင် ၃၀၅၀ကျပ်နှုန်းဖြင့် ၃၅၅ပိဿာကို ဈေးနှုန်းသက်သာစွာရောင်းချပေးခဲ့ကြောင်းသိရှိရပါသည်။

DOCA(စစ်ကိုင်း)      

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် သရက်ခရိုင်ရုံးမှ ဒုတိယခရိုင်ဦးစီးမှူး ဦးအုန်းမြင့်နှင့် ဝန်ထမ်းများသည် (၁.၇.၂၀၂၄)ရက်နေ့၊ နံနက် (၁၀း၃၀)နာရီအချိန်တွင် မြို့နယ်စည်ပင်သာယာရေးအဖွဲ့နှင့်အတူ သရက်မြို့ပေါ်ရှိ ဆန်လက်လီ၊လက်ကားအရောင်းဆိုင်များသို့ မြန်မာနိုင်ငံဆန်စပါးအသင်းချုပ် MRFမှ သတ်မှတ်ထုတ်ပြန်ထားသည့် ဈေးနှုန်းများအား ဝေငှပေးပြီး အသိပညာပေး ဆွေးနွေးခြင်းများ ‌ဆောင်ရွက်ခဲ့ကြောင်း သိရှိရပါသည်။

    ထိုသို့ အသိပညာပေးဆွေးနွေးရာတွင် ဒုတိယခရိုင်ဦးစီးမှူး ဦးအုန်းမြင့်က ဆန်လက်လီ၊ လက်ကားအရောင်းဆိုင်များအား စားသုံးသူပြည်သူများ သင့်တင့်မျှတသည့် ဈေးနှုန်းများဖြင့် ဝယ်ယူစားသုံးနိုင်ရေးအတွက် မြန်မာနိုင်ငံဆန်စပါးအသင်းချုပ် MRFမှ သတ်မှတ်ထုတ်ပြန်ထားသည့် ဈေးနှုန်းများအတိုင်း လိုက်နာရောင်းချကျရန်နှင့် ကွာဟမှုမရှိသည့် သင့်တင့်မျှတသော ဈေးနှုန်းများဖြင့် အများပြည်သူများသို့ရောင်းချစေရေး အသိပညာပေးဆွေးနွေး ပြောကြားခဲ့ကြောင်း သိရသည်။

DOCA(မကွေး)

    မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်အတွင်းရှိ ပြည်သူများ အခြေခံစားသောက်ကုန်များအား စျေးနှုန်းတည်ငြိမ်စွာ ဝယ်ယူစားသုံးနိုင်ရေး၊ သင့်တင့်မျှတသော စျေးနှုန်းဖြင့် ဝယ်ယူနိုင်ရေးအတွက် မြို့နယ်စီမံအုပ်ချုပ်ရေးအဖွဲ့ ဥက္ကဌ ဦးစိုးလွင် ဦးဆောင်၍ မြို့နယ် ရဲတပ်ဖွဲ့မှူး ရဲမှူးဝင်းသန်း၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးနှင့် ဆက်စပ်ဌာနများပူးပေါင်း၍ (၁.၇.၂၀၂၄)ရက်နေ့၊ နံနက် (၀၉:၃၀)အချိန်တွင် မြို့ပေါ်ရပ်ကွက်များတွင် မြို့နယ်ဆန်ကုန်သည်များအသင်းမှ ဆန်ရောင်းချနေမှုနှင့် မြို့ပေါ်ရှိဆန်ဆိုင်များအား ကွင်းဆင်းစစ်‌ဆေးခဲ့ကြောင်း သိရသည်။

     ထိုသို့ကွင်းဆင်းစစ်ဆေးရာတွင် ဆန်ဆိုင်များတွင် မြန်မာနိုင်ငံဆန်စပါးအဖွဲ့ချုပ်က သတ်မှတ်ထားသည့် စျေးနှုန်းဖြင့် ဆန်များရောင်းချမှုရှိ/မရှိ၊ မြို့နယ်ဆန်ကုန်သည်များအသင်းက မြို့ပေါ်ရပ် ကွက်များအတွင်း ဧည့်မထဆန် (၁)ပြည်လျှင် ကျပ်(၃၀၀၀)နှုန်းဖြင့် ရောင်းချပေးလျက်ရှိရာ အမှတ် (၁)ရပ်ကွက်၊ ဂတ်ကုန်းရပ်တွင် ပြည်သူများအား ဆန်ရောင်းချပေးနေမှုကို ကွင်းဆင်းကြည့်ရှု စစ်ဆေးခဲ့ပြီး ဆန်စျေးနှုန်းများအား ထင်သာမြင်သာရှိစေရေး ချိတ်ဆွဲရောင်းချပေးသွားရန် ဆွေးနွေး မှာကြားခဲ့ကြောင်း သိရသည်။

     ချောက်မြို့နယ်တွင် ဆန်များကို ပြည်သူများ သင့်တင့်မျှတသော စျေးနှုန်းဖြင့် အလွယ်တကူ ဝယ်ယူရရှိနိုင်စေရန်အတွက် မြို့နယ်ဆန်ကုန်သည်များအသင်းက ဇူလိုင်လ (၁)ရက်နေ့မှ ဇူလိုင်လ (၃၁)ရက်နေ့အထိ နေ့စဉ် ရပ်ကွက်အလိုက် ကားဖြင့် လှည့်လည်ရောင်းချပေးသွားမည်ဖြစ်ကြောင်းနှင့် မြို့နယ်ဆန်ကုန်သည်များအသင်းက ဆန်ဆိုင်များတွင်လည်း ရောင်းချပေးသွားမည်ဖြစ်ကြောင်း သိရှိရပါသည်။

DOCA(မကွေး)