သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီမှူးနှင့် သရက်ခရိုင် ဦးစီးမှူးတို့၏ လမ်းညွှန်မှုဖြင့် သရက်ခရိုင်ဦးစီးမှူးရုံးမှ ဒု-ခရိုင်ဦးစီးမှူးဦးအုန်းမြင့် ဦးဆောင်သော ဝန်ထမ်းများသည် (၁၃.၂.၂၀၂၃)ရက်နေ့ နေ့လယ် (၁၄:၃၀)နာရီအချိန်တွင် သရက်မြို့၊ ဇော်ဂျီရပ်ကွက်၊ မင်းတုန်းလမ်း၌ ဇာမဏီအမှတ်တံဆိပ်ဖြင့် ပဲကြော် ထုတ်လုပ်သည့် လုပ်ငန်းရှင်အား သွားရောက်တွေ့ ဆုံခဲ့ပြီး စားသုံးသူကာကွယ်ရေး ဥပဒေ (၂၀၁၉) အခန်း (၁၈)ပါ ကုန်အညွှန်းမှတ်အသားများ ပြည့်စုံစွာ ထည့်သွင်းဖော်ပြစေရေးအတွက် အသိပညာပေး ဆွေးနွေးခဲ့ပါသည်။

    သရက်ခရိုင်၊ ဒု-ခရိုင်ဦးစီးမှူး ဦးအုန်းမြင့်က ဆွေးနွေးရာတွင် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ပြည့်စုံစွာဖော်ပြ ခြင်းဖြင့် ဈေးကွက် အတွင်းရှိ  မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်း စေခြင်း၊ အာမခံချက်ပေးခြင်း၊ သတင်းအချက်အလက်များ ပြည့်စုံမှန်ကန်စွာ ထည့်သွင်းခြင်းတို့ကြောင့် စားသုံးသူများအနေဖြင့် စီးပွားရေးလုပ်ငန်းရှင်များအပေါ်  ယုံကြည်မှုများရရှိလာပြီး အကျိုးစီးပွားများ ပိုမိုရရှိ လာနိုင်မည်ဖြစ်ကြောင်း ရှင်းလင်းဆွေးနွေးပြီး ဒု-ကြီးကြပ်ရေးမှူး ဦးကျော်ရွှေက စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်(၂/၂၀၁၉)ပါ ကုန်စည်အုပ်စု(က)ရှိ အစားအသောက်တွင်  မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်း သိရှိလိုက်နာစေရန်ဆွေးနွေးခဲ့ပြီး စီးပွားရေးလုပ်ငန်းရှင်များသည် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့ တင်ပြစိစစ် လျှောက်ထားနိုင်ပါကြောင်း၊ ကုန်အမှတ်တံဆိပ်စိစစ်ခွင့်ပြုချက်များအား ပြုလုပ်ဆောင်ရွက်ထားစေလိုကြောင်း အသိပညာပေး ဆွေးနွေးခဲ့ရာ လုပ်ငန်းရှင်မှ သိရှိလိုက်ဆောင်ရွက်သွားမည်ဖြစ်ကြောင်း သိရှိရပါသည်။

DOCA(မကွေး)

    မန္တလေးတိုင်းဒေသကြီး၊ ညောင်ဦးမြို့နယ်ရှိ တောင်ဘကျေးရွာနှင့် လက်ပံတဲကျေးရွာတို့ရှိ အခြေခံပညာအထက်တန်းကျောင်းခွဲများ၌ (၆-၂-၂၀၂၃)ရက်နေ့တွင် ခရိုင်စားသုံးသူရေးရာဦးစီးဌာနနှင့် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အသိပညာပေးဟောပြောပွဲအား ကျင်းပပြုလုပ်ခဲ့ပါသည်။

        ဟောပြောဆွေးနွေးမှုများအနေဖြင့် တောင်ဘ အခြေခံပညာအထက်တန်းကျောင်းခွဲ၌ နံနက်ပိုင်း ၉:၀၀ နာရီအချိန်တွင်လည်းကောင်း၊ လက်ပံတဲ အခြေခံပညာအထက်တန်းကျောင်းခွဲ၌ နေ့လယ်ပိုင်း ၁၃:၀၀ နာရီအချိန်တွင်လည်းကောင်း ကျောင်းသား/ကျောင်းသူများနှင့် ဆရာ/ဆရာမများအား အသိပညာပေးဟောပြောဆွေးနွေးခဲ့ပါသည်။ ဟောပြောဆွေးနွေးမှုများတွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူး ဦးသန်းစိုးက စားသုံးသူကာကွယ်ရေးနှင့်ပတ်သက်၍ စားသုံးသူကာကွယ်ရေး၏အဓိပ္ပါယ်၊ စားသုံးသူ၏အဓိပ္ပါယ်၊ ကုန်စည်နှင့်ဝန်ဆောင်မှု၏အဓိပ္ပါယ်များ၊ နစ်နာဆုံးရှုံးမှု၏အဓိပ္ပါယ်နှင့် ကုန်အညွှန်းအမှတ်အသားများအကြောင်း၊ စားသုံးသူ၏အခွင့်အရေးနှင့်တာဝန်များအားလည်းကောင်း၊ ကျောင်းသား/ကျောင်းသူများအနေဖြင့် အစားအသောက်များဝယ်ယူစားသောက်ရာတွင် ကုန်အညွှန်းအမှတ်အသားများ ပြည်စုံမှန်ကန်စွာထည့်သွင်းဖော်ပြထားသော ကုန်စည်နှင့်အစားအသောက်များကိုသာ ရွေးချယ်ဝယ်ယူသုံးစွဲစားသောက်ကြရန်နှင့် ရွေးချယ်ဝယ်ယူသုံးစွဲတတ်စေရန် ဥပမာပေး၍လည်းကောင်း စားသုံးသူကာကွယ်ရေးနှင့်ပတ်သက်ပြီး အသိပညာပေးဟောပြောဆွေးနွေးရာ ကျောင်းသားကျောင်းသူများ၏ မေးမြန်းမှုများအပေါ် ပြန်လည်ရှင်းလင်း၍ ဖြေကြားဆွေးနွေးမှုများပြုလုပ်ခဲ့ပါသည်။ ဆက်လက်၍ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူး ဒေါ်စန်းယုမော်က ပြည်ထောင်စုနေ့အကြောင်းနှင့် စာကြည့်တိုက်အကြောင်းတို့ကို ရှင်းလင်းဟောပြောခဲ့ရာ တောင်ဘ အခြေခံပညာအထက်တန်း ကျောင်းခွဲတွင် ဆရာ/ဆရာမများနှင့်နှင့် ကျောင်းသား/ကျောင်းသူ စုစုပေါင်း(၁၃၅)ဦး၊ လက်ပံတဲ အခြေခံပညာအထက်တန်းကျောင်းခွဲတွင် ဆရာ/ဆရာမများနှင့် ကျောင်းသား/ကျောင်းသူ စုစုပေါင်း( ၁၁၇ )ဦး စသည်ဖြင့် အသီးသီးတက်ရောက်ခဲ့ကြပါသည်။

DOCA(မန္တလေး)

  မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၌ နိုင်ငံ့စီးပွားမြှင့်တင်ရေး ရန်ပုံငွေဖြင့် မြို့နယ်အတွင်းရှိ နွေစပါးစိုက်တောင်သူများစိုက်ဧကပြည့်မီစွာ စနစ်တကျစိုက်ပျိုးနိုင်စေရေးနှင့် စိုက်ပျိုးရေး သွင်းအားစုများ ထောက်ပံ့ဆောင်ရွက်ပေးမည့်အစီအစဉ်များကို ခရိုင်အုပ်ချုပ်ရေးမှူး ဦးထွန်းထွန်းဝင်းနှင့် ခရိုင်/ မြို့နယ်ဌာနဆိုင်ရာတာဝန်ရှိသူများက (၉.၂.၂၀၂၃)ရက်နေ့ နေ့လယ် (၁၄:၀၀) အချိန်တွင် ထိန်တောကျေးရွာ၊ ရွာလယ်ဓမ္မာရုံ၌ နွေစပါးစိုက်ပျိုးမည့် ဒေသခံတောင်သူ(၆၄)ဦးအား သွားရောက် တွေ့ဆုံ၍ အသိပေးရှင်းလင်းခဲ့ပြီး သွင်းအားစုများအား ပေးအပ်ခဲ့ကြောင်း သိရှိရပါသည်။

  နိုင်ငံတော်အစိုးရမှ နိုင်ငံ့စီပွားမြှင့်တင်ရေး ရန်ပုံငွေဖြင့် နွေစပါးစိုက်ပျိုးမည့် တောင်သူများအတွက် စိုက်ပျိုးရေးသွင်းအားစုများကို ထုတ်ချေးရာတွင် ငွေကျပ်နှစ်သိန်းနှုန်းဖြင့် ညီမျှသော တောင်သူများအဆိုပြုသည့် သွင်းအားစုများကို နွေစပါး(၁)ဧကလျှင် ယူရီးယားဓါတ်မြေဩဇာ(၅၀)ကီလိုဂရမ် (၂)အိတ်၊ ပေါင်းသတ်ဆေး (၃၀)ဂရမ်(၆)ထုတ်၊ ပိုးသတ်ဆေး(၂၅၀)ဂရမ်(၁)ထုတ်နှုန်းဖြင့် ကြိုတင်ထုတ်ပေးဆောင်ရွက်ပေးသွားမည်ဖြစ်ကြောင်း၊ နွေစပါးစိုက်တောင်သူများအတွက် မနောသုခ RS မျိုးသန့်စပါးတင်း(၈၀)ကို မြို့နယ်စိုက်ပျိုးရေးဦးစီးဌာနမှ ကြိုတင်ဖြန့်ဖြူးရောင်းချပေးထားပြီး ထွက်ရှိ လာမည့် နွေစပါးများကို ဖြန့်ဝေထုတ်ချေးပေးထားသည့် သွင်းအားစုတန်ဖိုးနှင့်ညီမျှသော ကာလပေါက် ဈေးနှုန်းအတိုင်း ဝယ်ယူကြိတ်ခွဲ၊ တင်ပို့ရောင်းချရေး အစုအဖွဲ့က ပြန်လည်ဝယ်ယူ စုဆောင်းပေးသွားမည်ဖြစ်ကြောင်း စိုက်ပျိုးရေးဦးစီးဌာန၊ မြို့နယ်ဦးစီးမှူး ဦးဇော်လင်းမှ ရှင်းလင်းပြောကြားခဲ့ပါသည်။

  မင်းဘူးမြို့နယ်၌ ယခုနှစ် နွေစပါးစိုက်ပျိုးရာသီတွင် နိုင်ငံ့စီးပွားမြှင့်တင်ရေးရန်ပုံငွေဖြင့် နွေစပါး ဧက(၁၀၀)စိုက်ပျိုးရန်လျာထားပြီး (၉.၂.၂၀၂၃)ရက်နေ့အထိ (၅၅)ဧကကျော်စိုက်ပျိုးပြီးစီးနေပြီဖြစ်ကာ နွေစပါးစိုက်ပျိုးရာတွင် လိုအပ်သောရေ ပြည့်ဝလုံလောက်စွာရရှိရေး မြို့နယ်ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန၊ ကမ်းနီလျှပ်စစ်မြစ်ရေတင်လုပ်ငန်းမှ စနစ်တကျဖြန့်ဝေဆောင်ရွက်ပေးလျက်ရှိကြောင်း သိရှိရပါသည်။

DOCA(မကွေး)

    ပဲခူးတိုင်းဒေသကြီး၊ စားသုံးသူရေးရာကော်မတီအစည်းအဝေး (၁/၂၀၂၃)ကို စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ၃၁-၁-၂၀၂၃ ရက်နေ့၊ နေ့လယ် (၁၃ : ၀၀) နာရီအချိန်တွင် ကျင်းပပြုလုပ်ခဲ့ပြီး တိုင်းဒေသကြီး၊ စားသုံးသူရေးရာကော်မတီ၊ ဒုတိယဥက္ကဋ္ဌဦးဆောင်သော အဖွဲ့ဝင် (၄) ဦးနှင့် ပဲခူးတိုင်းဒေသကြီးဦးစီးမှူးရုံးမှ ဝန်ထမ်း (၅) ဦးတက်ရောက်ခဲ့ကြပါသည်။

     အဆိုပါ အစည်းအဝေးတွင် ပဲခူးတိုင်းဒေသကြီး၊ စားသုံးသူရေးရာကော်မတီဥက္ကဋ္ဌကိုယ်စား အတွင်းရေးမှူးက အွန်လိုင်းမှရောင်းချနေမှုများတွင် စားသုံးသူများနစ်နာမှုမရှိစေရေး အလုပ်ရုံ ဆွေးနွေးပွဲမှ ဆွေးနွေးချက်များကို ပြန်လည်မျှဝေပေးခဲ့ပြီး ၂၀၂၃ ခုနှစ်၊ မတ်လ ၁၅ ရက်နေ့တွင်ကျရောက်မည့် ကမ္ဘာ့စားသုံးသူအခွင့်အရေးများနေ့အခမ်းအနားတွင် ဆောင်ရွက်မည့် လုပ်ငန်းစဉ်များအား ကော်မတီအဖွဲ့ဝင်များက ဆွေးနွေးပေးပါရန် အဖွင့်အမှာစကားပြောကြားခဲ့ကာ စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲတာဝန်ခံက အမှာစာ(၄)စောင်အပေါ် စားသုံးသူရေးရာကော်မတီက မှတ်တမ်းတင်အတည်ပြုပေးပါရန် တင်ပြဆွေးနွေးခဲ့ပြီး ကော်မတီအဖွဲ့ဝင်များက အမှာစာများအပေါ် ပြန်လည်ဆွေးနွေးခဲ့ပြီး  အစည်းအဝေးကို (၁၄ : ၃၀)နာရီအချိန်တွင် ရုပ်သိမ်းခဲ့ပါသည်။

DOCA(ပဲခူး)

       စားသုံးသူရေးရာဦးစီးဌာန ရခိုင်ပြည်နယ် တောင်ကုတ်ခရိုင်ဦးစီးမှူးနှင့် မာန်အောင်မြို့ နယ်တာဝန်ခံတို့သည် ၂၀၂၃ ခုနှစ် ဖေဖော်ဝါရီလ ၁၀ ရက်နေ့ နံနက် ( ၁၀:၀၀ )နာရီအချိန်တွင်  မာန်အောင်မြို့နယ်၊ ဘုန်းစိုးကြီးကျေးရွာသို့ သွားရောက်ပြီး “ရွှေတိုး” ဆီစက် မြေပဲဆီထုတ်လုပ် ရောင်းချသည့် လုပ်ငန်းရှင် ဦးညီဝင်းစိန်နှင့် တွေ့ဆုံဆွေးနွေးခဲ့ပါသည်။

     ထိုသို့ တွေ့ဆုံဆွေးနွေးရာတွင် ခရိုင်ဦးစီးမှူး ဦးမောင်ကျော်မြင့် (ဦးစီးအရာရှိ)က ထုတ်လုပ်ရောင်းချသည့် မြေပဲဆီများအား သတ်မှတ်အရည်အသွေးပြည့်မီရေး၊ ကျန်းမာရေးနှင့် ညီညွတ်ပြီး ဘေးအန္တရာယ်ကင်းရှင်းသည့် စားသုံးဆီများကို သုံးစွဲနိုင်ရေး၊ ဈေးကွက်အတွင်း ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးတို့အတွက် ဌာနမှ ကြီးကြပ်ဆောင်ရွက်လျက်ရှိသည့်အပြင် စီးပွားရေးလုပ်ငန်းရှင်များအား အထက်ဌာနမှ ထုတ်ပြန်ထားရှိသည့် အမိန့်နှင့်ညွှန်ကြားချက်များ သိရှိလိုက်နာဆောင်ရွက်နိုင်ရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်းများ ဆောင်ရွက်လျက်ရှိကြောင်း မိမိဆီစက်မှ ထုတ်လုပ်သည့် မြေပဲဆီများအား ဈေးကွက်အတွင်း ဖြန့်ဖြူးရောင်းချရာတွင် ကုန်စည်၏ ကုန်အညွှန်းအမှတ်အသားများအား စားသုံးသူကာကွယ်ရေးဥပဒေပြဌာန်းချက်များ၊ အမိန့်ညွှန်ကြားချက်များနှင့် ကိုက်ညီမှု ရှိ/မရှိ မိမိတို့ ဌာန၏ အတည်ပြုချက်ရယူနိုင်ရေး လာရောက်လျှောက်ထား ရန်လိုအပ်ကြောင်းနှင့် စားသုံးသူကာကွယ် ရေးဥပဒေပါ စီးပွားရေးလုပ်ငန်းရှင်များ၏ တာဝန်များအကြောင်း ဒေသတွင်း စီးပွားရေးလုပ်ငန်းရှင်များအား ထောက်ပံ့အားပေးနေမှု၊ ပြည်တွင်းကုန်သွယ်မှုဖွံ့ဖြိုးတိုးတက်ရေးနှင့် စားသုံးသူ ကာကွယ်ရေးလုပ်ငန်းများဖြင့်လည်း နိုင်ငံစီးပွားရေးတိုးမြှင့်ရေးဖော်ဆောင်အားပေးကူညီ ဆောင်ရွက်နေမှုအခြေအနေတို့အား ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ရခိုင်)