သတင်းနှင့် လှုပ်ရှားမှုများ

              ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်းရှိ အများပြည်သူတို့အနေဖြင့် စားသုံးသူရေးရာကိစ္စရပ်များအား ကျယ်ကျယ်ပြန့်ပြန့် သိရှိနားလည်နိုင်စေရေး ရည်ရွယ်၍ စားသုံးသူအသိပညာပေး ဆွေးနွေးဟောပြောပွဲများအား ကျင်းပပြုလုပ်လျက်ရှိရာ ပြည်ခရိုင်၊ ပေါက်ခေါင်းမြို့နယ် သပြေတောင်အုပ်စု၊ သပြေတောင်ကျေးရွာတွင် ဇွန်လ (၆) ရက်နေ့ မွန်းလွဲပိုင်းတွင်လည်းကောင်း၊ ရွာရှည်အုပ်စု၊ ရွာရှည်ကျေးရွာတွင် ဇွန်လ (၈) ရက်နေ့ နံနက်ပိုင်းတွင် လည်းကောင်း၊ အနောက်ကြို့ကုန်းအုပ်စု၊ အနောက်ကြို့ကုန်းကျေးရွာတွင် ဇွန်လ (၉) ရက်နေ့ မွန်းလွဲပိုင်းတွင်လည်းကောင်း၊ မိတ်ဖက်ဌာနဆိုင်ရာများ ပူးပေါင်း၍ စားသုံးသူအသိပညာပေး ဆွေးနွေးဟောပြောပွဲများ ကျင်းပပြုလုပ်ခဲ့ကြောင်း သိရှိရပါသည်။

          အဆိုပါ ဆွေးနွေးဟောပြောပွဲတွင် ပေါက်ခေါင်းမြို့နယ်တာဝန်ခံမှ စားသုံးသူတို့၏ အခွင့် အရေးများ၊ လိုက်နာရမည့်တာဝန်များနှင့် ထိခိုက်နစ်နာမှုများရှိပါက တိုင်ကြားနိုင်မှုနည်းလမ်းများ၊ ပြစ်မှုပြစ်ဒဏ်တို့အကြောင်းအား အကျယ်တဝင့် ရှင်းလင်းဆွေးနွေးဟောပြောခဲ့ပြီး ဆွေးနွေး ဟောပြောပွဲများသို့ ကျေးရွာနေပြည်သူ (၈၇) ဦး တက်ရောက်ခဲ့ကြကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပဲခူးတိုင်းဒေသကြီးဦးစီးမှူးရုံး၏ လမ်းညွှန်မှုအရ ပဲခူးတိုင်းဒေသကြီးအတွင်း ဈေးကွက်များတွင် ရောင်းချနေသော စားသုံးဆီများတွင် ကုန်အညွှန်းအမှတ်အသားများ ပြည့်စုံမှန်ကန်မှုရှိစေရေး ဈေးကွက်စောင့်ကြည့်စစ်ဆေးခြင်း လုပ်ငန်းများဆောင်ရွက်လျှက်ရှိရာ ဇွန်လ (၉) ရက်နေ့တွင် ပြည်ခရိုင်၊ သဲကုန်းမြို့နယ်မှ မြို့နယ်တာဝန်ခံနှင့် ဝန်ထမ်းများသည် သဲကုန်းမြို့ပေါ်ရှိ ကုန်မျိုးစုံဆိုင်များသို့ သွားရောက်၍ ရောင်းချနေသော စားသုံးဆီဘူးများပေါ်တွင် ရေးသားဖော်ပြထားသည့် ကုန်အညွှန်းအမှတ်အသားများ ပြည့်စုံမှုရှိ/မရှိ ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

          ယင်းသို့ ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် ဈေးဆိုင်ပိုင်ရှင်များ အနေဖြင့် ကုန်အညွှန်းအမှတ်အသားများ ပြည့်စုံမှန်ကန်မှုမရှိသော စားသုံးဆီများအား ဈေးကွက်အတွင်း ဝယ်ယူရောင်းချမှုမပြုလုပ်ရန် အသိပညာပေးပြောကြားခဲ့ပြီး စားသုံးသူအသိပညာပေး လက်ကမ်း စာစောင်များ ဝေငှခြင်းဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ သဲကုန်းမြို့နယ်တာဝန်ခံ ဦးခင်မောင်ထွန်းနှင့်ဝန်ထမ်းအဖွဲ့သည် (၈.၆.၂၀၂၂)ရက်နေ့ နေ့လည်(၁:၃၀)အချိန်တွင် သဲကုန်းမြို့နယ် ချားလျားကုန်းအုပ်စု၊ ချားလျားကုန်းကျေးရွာတွင် EM ဘိုကာချီ မြေဆွေး၊ မြေဩဇာပြုလုပ်နေမှုအား ကွင်းဆင်းလေ့လာခဲ့ပါသည်။ ထိုသို့လေ့လာရာ၌  EM ဘိုကာချီ မြေဆွေး၊ မြေဩဇာပြုလုပ်ပုံအဆင့်ဆင့်အား စိတ်ပါဝင်စားသူတောင်သူ (၃၅)ဦးခန့်အား တာဝန်ရှိသူများက လက်တွေ့စမ်းသပ်သရုပ်ပြရာတွင် ဝါးကပ် (၄)ချပ်ကို လေးဘက်လေးတန်ကာရံပြီး ကောက်ရိုး(၇)ခြင်း၊ နွားချေး(၃)တင်း၊ ဖွဲနု(၁)တင်းတို့ကိုဖြန့်ခင်းပြီး အပေါ်တွင် EM အရည်ကိုဖြန်းပေးရပါသည်။ ထိုသို့ တစ်ထပ်ခြင်းဖြန့်ခင်း၍ EM အရည်ပက်ဖြန်းပြီး လိုသလောက်အမြင့်ထား၍ EM ဘိုကာချီ မြေဆွေး၊ မြေဩဇာပြုလုပ်ရပါသည်။ ထိုသို့ပြုလုပ် ထားသော မြေဩဇာကို (၁)လမှ (၃)လထားပြီးမှ မြေဩဇာအဖြစ် စတင်အသုံးပြု၍ရကြောင်း သိရှိရပါသည်။

          ထိုသို့ ကိုယ်ပိုင်မြေဩဇာများပြုလုပ်ခြင်းဖြင့် သွင်းအားစုများစျေးကောင်းနေချိန်တွင် တောင်သူများအတွက် ပိုမိုထိရောက်မည်ဖြစ်ပါသည်။ တောင်သူများအဖို့ ကိုယ်တိုင်ပြုလုပ်သည့်  EM ဘိုကာချီ မြေဆွေး၊ မြေဩဇာများကို အသုံးပြုခြင်းဖြင့် သွင်းအားစုဘက်တွင် ကုန်ကျစရိတ်များ သက်သာလာပြီး အကျိုးအမြတ်များလည်း ပိုမိုရရှိလာမည်ဖြစ်ကြောင်း လေ့လာတင်ပြအပ်ပါသည်။

DOCA(ပဲခူး)

       ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ဖြူးမြို့နယ်တာဝန်ခံ ဒေါ်သန္တာစိုးနှင့်ဝန်ထမ်းများသည် ဇွန်လ ၁၀ ရက်နေ့ နံနက်ပိုင်းက ဖြူးမြို့ စည်ပင်သာယာဈေးအတွင်း စားသုံးဆီများရောင်းချလျက်ရှိသည့်ကုန်စုံဆိုင်များသို့ သွားရောက်၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/မရှိကိုလည်းကောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ နှင့်အညီ ဟင်းသီးဟင်းရွက်ဆီများတွင် ကုန်အညွှန်းအမှတ်အသားများဖော်ပြရန် ညွှန်ကြားချက်များအား လိုက်နာဆောင်ရွက်မှု ရှိ/မရှိကို ဈေးကွက်စောင့်ကြည့်လေ့လာခဲ့ပါသည်။

       ဖြူးမြို့ စည်ပင်သာယာဈေးအတွင်း ရောင်းချလျက်ရှိသော အမှတ်တံဆိပ်ပါ စားသုံးဆီများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ ကုန်အညွှန်းအမှတ်အသားများကို ပြည့်စုံစွာဖော်ပြထားသည်ကို တွေ့ရှိရပြီး စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ ကို လိုက်နာမှုအားနည်းသေးကြောင်း တွေ့ရှိရပါသဖြင့် ညွှန်ကြားချက်အမှတ် ၁/၂၀၂၁ သည် ယခုဇွန်လ ၂၀ ရက်နေ့တွင် အာဏာတည်မည်ဖြစ်ပါသဖြင့် လုပ်ငန်းရှင်များအနေဖြင့် အလေးထားလိုက်နာဆောင်ရွက်ကြရန် အသိပညာပေးခဲ့ကြောင်း သိရှိရပါသည်။

DOCA(ပဲခူး)    

ပဲခူးတိုင်းဒေသကြီး၊ စားသုံးသူရေးရာဦးစီးဌာန တောင်ငူမြို့နယ်တာဝန်ခံ ဦးမြင့်သူသည် တောင်ငူမြို့နယ်စီမံအုပ်ချုပ်ရေးအဖွဲ့ဝင်(၁) ဗိုလ်မှူးရဲနိုင်လွင်ဦးဆောင်၍ မြို့နယ်စီမံအုပ်ချုပ်ရေးအဖွဲ့ဝင် (၂) ဦးကျော်ဝင်း၊ အထွေထွေအုပ်ချုပ်ရေးဦးစီးဌာန၊ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေးဦးစီးဌာန၊ စိုက်ပျိုးရေးဦးစီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနတို့မှ တာဝန်ရှိသူများပါဝင်သောပူးပေါင်းအဖွဲ့ဝင်များနှင့်အတူ ဇွန် ၁၁ ရက်နေ့က တောင်ငူမြို့နယ်အတွင်းရှိ ရွှေလေးအင်း၊ မိုးကောင်း၊ ဆိပ်ဖူးတောင်နှင့် ဒိုးသောင် ကျေးရွာများရှိ တောင်သူလယ်သမားများအားတွေ့ဆုံ၍ စားသုံးသူကာကွယ်ရေးနှင့် ပြည်တွင်းကုန်သွယ်မှုဖွံ့ဖြိုးရေးဆောင်ရွက်ချက်များအား ရှင်းလင်းပြောကြားပါသည်။

                        မြို့နယ်တာဝန်ခံပါဝင်သော ပူးပေါင်းအဖွဲ့သည် နံနက် ၉:၃၀ နာရီတွင် ရွှေလေးအင်းကျေးရွာဓမ္မာရုံ၌ တောင်သူလယ်သမား ၄၅ ဦးအား လည်းကောင်း၊  နံနက် ၁၁ နာရီတွင် မိုးကောင်းကျေးရွာဓမ္မာရုံ၌ တောင်သူလယ်သမား ၂၅ ဦးအား လည်းကောင်း၊  မွန်းလွဲ ၁ နာရီတွင် ဆိပ်ဖူးတောင်ကျေးရွာဓမ္မာရုံ၌ တောင်သူလယ်သမား ၂၀ ဦးအား လည်းကောင်း၊  မွန်းလွဲ ၂:၃၀ နာရီတွင် ဒိုးသောင်ကျေးရွာ ဓမ္မာရုံ၌ တောင်သူလယ်သမား ၄၅ ဦးအား လည်းကောင်း တွေ့ဆုံပြီး သက်ဆိုင်ရာဌာနဆိုင်ရာများအလိုက် တောင်သူလယ်သမားအကျိုးပြုဆောင်ရွက်ချက်များကို ရှင်းလင်းပြောကြားကြပါသည်။

                        စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံဦးမြင့်သူက စားသုံးသူအခွင့်အရေးနှင့် စားသုံးသူနစ်နာဆုံးရှုံးမှုများမဖြစ်စေရေးအတွက် ဆောင်ရွက်ချက်များ၊ စားသုံးသူနစ်နာဆုံးရှုံးမှုများဖြစ်ပေါ်ပါက တိုင်ကြားနိုင်သည့်အကြောင်းများကို လည်းကောင်း၊ ပြည်တွင်းကုန်သွယ်မှုဖွံ့ဖြိုးရေးအတွက်  ဈေးနှုန်းဈေးကွက်သတင်းများ၊ သီးနှံများ၏စိုက်အောင်ထွက် စားသုံးပိုလျှံသတင်းအချက်အလက်များ ရယူစုဆောင်း၍ တင်ပြဆောင်ရွက်ပေးသည့်အခြေအနေများ၊ သီးနှံအစုအဖွဲ့များဖွဲ့စည်း၍ စုပေါင်းဆောင်ရွက်သည့်အလေ့အထများရှိစေရေးအတွက် ဆောင်ရွက်ပေးသည့် အခြေအနေများကို လည်းကောင်း၊ ကျန်းမာရေးဌာနက အကြံပြုထားသည့် လူတစ်ဦးစားသုံးသင့်သည့် ဆီပမာဏထက်ကျော်လွန်၍ စားသုံးခြင်းမပြုခြင်းဖြင့် ကျန်းမာရေးနှင့်ညီညွတ်သည့်အပြင် မိသားစုစီးပွားရေးကိုလည်း အထောက်အကူပြုမည့်အခြေအနေများ၊ နေကြာတိုးချဲ့စိုက်ပျိုးခြင်းဖြင့် ကျန်းမာရေးနှင့်ညီညွတ်သည့်စားသုံးဆီများကို စားရမည့်အပြင် ပြည်တွင်းစားသုံးဆီဖူလုံရေးအတွက်လည်း အထောက်အကူပြုမည့်အခြေအနေများကို ရှင်းလင်းပြောကြားခဲ့ကြောင်း သိရှိရပါသည်။

DOCA(ပဲခူး)