သတင်းနှင့် လှုပ်ရှားမှုများ

         ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဝန်ထမ်းများသည် ၁၇.၆.၂၀၂၂ နေ့တွင် ခရိုင်စိုက်ပျိုးရေးဦးစီးဌာန၊ မြို့နယ်စက်မှုလယ်ယာဦးစီးဌာနတို့နှင့်ပူးပေါင်း၍ မြစ်ကြီးနားမြို့၊ မန်ခိန်ရပ်ကွက်အတွင်းရှိ စားသုံးသူ(၂၅)ဦးအား စားသုံးသူကာကွယ်ရေး အသိပညာပေး ဟောပြောပွဲ ဆောင်ရွက်ခဲ့ပါသည်။

            စားသုံးသူကာကွယ်ရေး အသိပညာပေးဟောပြောရာတွင် ဦးဘောမ်ဇုန်း(ရုံးအုပ်)က စားသုံးသူအခွင့်အရေးများဖြစ်သော စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များအပေါ်တွင် စိတ်ကျေနပ်မှုရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ ကုန်စည် သို့မဟုတ် ဝန်ဆောင်မှုအပေါ် ရွေးချယ် ဝယ်ယူအသုံးပြုရာတွင် လိုအပ်သောသတင်းအချက်အလက်များ ပြည့်စုံမှန်ကန်စွာ သိရှိခွင့်နှင့်ပြေစာ သို့မဟုတ် အထောက်အထားများရယူခွင့်ရှိခြင်း၊ ဈေးကွက်အတွင်းရှိကုန်စည် သို့မဟုတ် ဝန်ဆောင်မှု နှင့်စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံးမှုနှင့် စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်စေခြင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့်ဖြစ်ပေါ်လာသည့် နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာ ဗဟုသုတများ၊ အခွင့်အရေးနှင့်လိုအပ်သော အချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့် အတန်းနှင့်ပတ်ဝန်းကျင်တွင် နေထိုင်နိုင်ခွင့်ရရှိစေခြင်းစသဖြင့် ဟောပြောခဲ့ပြီး  စားသုံးသူမျာအား စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေပေးခဲ့ပါသည်။

DOCA(ကချင်)

        စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် စားသုံးသူပြည်သူများမှ ကုန်အညွှန်းအမှတ်အသားများ ပြည့်စုံမှန်ကန်စွာ ဖေါ်ပြမှုရှိသည့် ကုန်စည်များကို ရွေးချယ်ဝယ်ယူသုံးစွဲနိုင်ရေး၊ ကုန်စည်/ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေရေးတို့အတွက် စားသုံးသူကာကွယ်ရေးဆိုင်ရာ အသိပညာဗဟုသုတများ ကျယ်ကျယ်ပြန့်ပြန့်သိရှိစေရန် ရည်ရွယ်၍ ပြည်ခရိုင်၊ ရွှေတောင်မြို့နယ်တွင် ဇွန်လ (၉)ရက်နေ့၌ ပေါင်းချုပ်အုပ်စု၊ အင်္ဂူကျေးရွာ၊ ဇွန်လ (၁၀)ရက်နေ့၌ ထန်းကုန်းအုပ်စု၊ မအူတိုင်းကျေးရွာ၊ ပြည်ခရိုင်၊ သဲကုန်းမြို့နယ်တွင် ဇွန်လ (၁၀)ရက်နေ့၌ လောင့်ကြီးအုပ်စု၊ လောင့်ကြီးရွာ၊ ဇွန်လ (၁၃)ရက်နေ့၌ အုပ်စွဲအုပ်စု၊ အုပ်စွဲရွာစသည်တို့တွင် သက်ဆိုင်ရာမြို့နယ်တာဝန်ခံတို့မှ မြို့နယ်ဌာနဆိုင်ရာ အဖွဲ့အစည်းများနှင့် ပူးပေါင်းကာ စားသုံးသူကာကွယ်ရေး အသိပညာပေး ဟောပြောဆွေးနွေးခြင်းများဆောင်ရွက်ခဲ့ပါသည်။

          အဆိုပါဟောပြောပွဲတွင် သက်ဆိုင်ရာမြို့နယ်တာဝန်ခံမှ စားသုံးသူကာကွယ်ရေး ဉပဒေပါ စားသုံးသူများ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ လိုက်နာရမည့် တာဝန်နှင့် တားမြစ်ချက်များ၊ ကုန်စည်ထုတ်လုပ်ရာတွင် သိသာထင်ရှားစွာ ဖေါ်ပြရမည့် ကုန်အညွှန်းအမှတ် အသားဖေါ်ပြခြင်းဆိုင်ရာအချက်များ၊ စားသုံးသူများ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များ၊ နည်းလမ်းများ၊ ဖုန်းနံပါတ်နှင့်လိပ်စာ၊ ဉပဒေအရချမှတ်နိုင်သည့် ပြစ်မှုပြစ်ဒဏ်များစသည့် အကြောင်းအရာတို့အား အသိပညာပေး ပြောကြားခဲ့ပြီး ကျေးရွာနေပြည်သူ (၁၉၃)ဦး တက်ရောက်ခဲ့ကာ စားသုံးသူကာကွယ်ရေးအသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်၊ ရွှေတောင်မြို့နယ်မှ မြို့နယ်တာဝန်ခံနှင့် ဝန်ထမ်းများသည် မြန်မာ့ရေနံနှင့် ရေနံထွက်ပစ္စည်းဆိုင်ရာ လုပ်ငန်းများ ကြီးကြပ်ရေးဆပ်ကော်မတီနှင့် ပူးပေါင်း၍ ဇွန်လ (၁၀)ရက်၊ နံနက် (၁၀:၀၀)နာရီအချိန်တွင် ရွှေတောင်မြို့နယ်အတွင်းရှိ စက်သုံးဆီ အရောင်းဆိုင်များသို့ သွားရောက်၍ စက်သုံးဆီအရောင်းဆိုင်များအနေဖြင့် စက်သုံးဆီဆိုင်များအား အကြောင်းမဲ့ရောင်းချခြင်းမပြုဘဲ သိုလှောင်ထားရှိခြင်း၊ ဆိုင်အရောင်းပိတ်ထားခြင်းနှင့် သတ်မှတ် ဈေးနှုန်းများထက် ပိုမိုရောင်းချခြင်းများမရှိစေရေး ကွင်းဆင်းစစ်ဆေးခြင်း ဆောင်ရွက်ခဲ့ကြပါသည်။

          ယင်းသို့ အဖွဲ့ဝင်များဖြင့် ကွင်းဆင်းစစ်ဆေးခြင်းဆောင်ရွက်ရာတွင် ရွှေတောင်မြို့နယ်အတွင်းရှိ စက်သုံးဆီအရောင်းဆိုင်ကြီး (၆)ဆိုင်အနေဖြင့် စက်သုံးဆီများအား အကြောင်းမဲ့ ရောင်းချခြင်းမရှိဘဲ သိုလှောင်ထားခြင်းများလည်း မတွေ့ရှိရကြောင်းနှင့် ဆိုင်ပိတ်ထားခြင်းမရှိဘဲ စက်သုံးဆီများအား သတ်မှတ်ဈေးနှုန်းများဖြင့်သာ ရောင်းချနေကြောင်း သိရှိရပါသည်။

DOCA(ပဲခူး)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ၊တိုင်းဒေသကြီးဦးစီးမှုးဦးဆောင်မှုဖြင့် (၁၅.၆.၂၀၂၂) ရက် (၃း၀၀) နာရီတွင် တိုင်းဒေသကြီး၊  စားသုံးသူရေးရာဦးစီးဌာန၊ အစည်းအဝေးခန်းမ၌ တိုင်းရုံးဝန်ထမ်းများ၊ မုံရွာခရိုင်ရုံးဝန်ထမ်းများကို အခမ်းအနားမှူးတာဝန်ပေးအပ်ရာတွင် ကျွမ်းကျင်ပိုင်နိုင်စွာ ဆောင်ရွက်နိုင်စေရန်အတွက် အခမ်းအနားမှူးသင်တန်းကို  ဖွင့်လှစ်လေ့ကျင့်ဆောင်ရွက်ရာ(၂၅) ဦး တက်ရောက်ခဲ့ပါသည်။

          ယင်းသို့ဆောင်ရွက်ရာတွင် တိုင်းဒေသကြီးဦးစီးမှူးက အဖွင့်အမှာစကားပြောကြားရာတွင် အရာထမ်းအမှုထမ်းဝန်ထမ်းများအနေဖြင့် မိမိတို့ဌာနမှအခမ်းအနားများဖြစ်စေ၊ အခြားဌာနများမှ ကျင်းပဆောင်ရွက်သည့် ပွဲအခမ်းအနားများတွင်ဖြစ်စေ၊ အစည်းအဝေး၊ ဆွေးနွေးပွဲ ၊ သင်တန်းဖွင့်ပွဲ၊ စားသုံးသူကာကွယ်ရေးအသိပညာပေးဟောပြောပွဲ၊ကုန်စည်ပြပွဲများတွင် အခမ်းအနားမှူးအဖြစ် ဆောင်ရွက်ရန်တာဝန်ပေးအပ်ပါက အခမ်းအနားမှူးတာဝန်ကို အောင်မြင်အောင် ဆောင်ရွက်နိုင်ရေး ရည်ရွယ်၍လေ့ကျင့်သင်ကြားပို့ချသည်ဖြစ်ကြောင်း၊ပွဲကျင်းပသည့်ရည်ရွယ်ချက်၊ ဦးတည်ချက်များကို လေ့လာရန်လိုအပ်ကြောင်း၊ဌာနအတွက်သော်လည်းကောင်း၊မိမိအတွက်သော်လည်းကောင်းအကျိုးရှိစေပြီး အတွေ့အကြုံဗဟုသုတများရှိစေခြင်း၊ အခမ်းအနားမှူးတာဝန်အရ ဆောင်ရွက်မည့်သူသည် သတိ နှင့် သတ္တိ"သ"နှစ်လုံးကိုသိရမည် ဖြစ်ကြောင်း၊ စိတ်လှုပ်ရှားမှုမရှိ တည်တည်ငြိမ်ငြိမ်၊ သတ္တိရှိရှိ ပြောဆိုတတ်ခြင်း၊ သတိထား၍စီစဉ်ဆောင်ရွက်နိုင်ခြင်းများ၊ ဝတ်စားဆင်ယင်မှု ကိုယ်နေဟန်ပန်၊ ပွဲစီစဉ်ကျင်းပသူ၏ဆိုလိုရင်း အချိတ်အဆက်မိစေရန် လေယူလေသိမ်း၊ စကားအသုံးအနှုန်းများ သိရှိ နားလည်စေရန်လိုအပ်ကြောင်း ၊မိမိပင်ကိုယ်သံဖြင့် ပီသညီမျှချိုသာသောအသံဖြင့် ပြောဆိုတတ်ရန်လိုကြောင်း၊ အခမ်းအနားကျင်းပပြုလုပ်ရာနေရာ "အတွင်း"နှင့်"အပြင်" အခမ်းအနားကျင်းပ ခြင်း(၂)မျိုးရှိ၍ အပြင်ကျင်းပရာတွင် လိုရင်းတိုရှင်းထိမိစွာ အသုံးပြုနိုင်ရန်၊ အတွင်းအခမ်းအနားပွဲများ ကျင်းပရာတွင် အစီအစဉ်များ ဖတ်ကြားရန်၊ နှုတ်ဆက်အခါတော်ပေးသုံးစွဲပုံ၊ နိဂုံးချုပ်၊ ပွဲပြီးမြောက်ကြောင်း၊ဆု‌ပေးဂုဏ်ပြုချီးမြှင့်ရာ ကြားဖြတ်အစီအစဉ်များဝင်ရောက်လာပါက အခမ်းအနားမှူးအနေဖြင့် သိရှိနားလည်ပြီး ကြေငြာတတ်မှုစသည်ဖြင့် ကျယ်ကျယ်ပြန့်ပြန့်ရှင်လင်းဆွေးနွေး သင်ကြားပို့ချ၍ အခမ်းအနားမှူးအတွေ့အကြုံများကို ဆွေးနွေးအပြီး အခမ်းအနားမှူးသင်တန်း လေ့ကျင့်မှုကို အောင်မြင်စွာဆောင်ရွက်ခဲ့ပါသည်။

DOCA (စစ်ကိုင်း)

        မကွေးတိုင်းဒေသကြီး၊ စားသုံးသူရေးရာဦးစီးဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုးနှင့် ဒေါ်ချိုဝေလွင်(ဒု-ဦးစီးမှူး)တို့သည် ကျေးလက်ဒေသဖွံ့ဖြိုးရေးဦးစီးဌာန၊ ကျေးလက်အုပ်ချုပ်ရေးမှူးတို့နှင့်ပူးပေါင်းပြီး (၁၁.၆.၂၀၂၂) ရက်နေ့ နံနက် (၁၀:၀၀)နာရီအချိန်တွင် ဂွေးပင်လေးကျေးရွာ၊ အုပ်ချုပ်ရေးမှူးနေအိမ်၌လည်းကောင်း၊ (၁၃.၆.၂၀၂၂)ရက်နေ့ နံနက် (၁၀:၃၀)အချိန်တွင် တုံရွာဓမ္မာရုံ၌လည်းကောင်း၊ စားသုံးသူကာကွယ်ရေးအသိပညာပေးဆွေးနွေးခဲ့ကြပြီး  ၎င်းကျေးရွာရှိ အိမ်ဆိုင်များတွင်လည်း စားသုံးရန်မသင့်တားမြစ်ထားသောအစားအစာများ၊ သက်တမ်းလွန်နှင့် မှိုတက်နေသောအစားအစာများ၊ စားသုံးသူကာကွယ်‌ရေး ဥပဒေ-၂၀၁၉၊ အခန်း(၁၈)ပါ ကုန်အညွှန်းအမှတ်အသားပြည့်စုံစွာမပါဝင်သောအစားအစာများ ကုန်ပစ္စည်းများရောင်းချမှု ရှိ/မရှိအား အဖွဲ့ဖြင့် စျေးကွက်စောင့်ကြည့်စစ်ဆေးခဲ့ကြပါသည်။

          ချောက်မြို့နယ်တာဝန်ခံမှ စားသုံးသူကာကွယ်ရေးဥပဒေ-၂၀၁၉ ပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏ တာဝန်နှင့်တားမြစ်ချက်များ၊ ပြစ်မှု၊ ပြစ်ဒဏ်များ၊ ကုန်စည်၊ ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူများက တောင်းဆိုနိုင်သည့် အခွင့်အရေးများအား ရှင်းလင်းဆွေးနွေးခဲ့ပါသည်။

          ဒေါ်ချိုဝေလွင်(ဒု-ဦးစီးမှူး)မှ စားသုံးသူများနစ်နာဆုံးရှုံးမှုများဖြစ်ပေါ်ပါက တိုင်းဒေသကြီးဦးစီးမှူးရုံး၌ ဖွင့်လှစ်ထားသော Consumer Information & Complaint Center (CICC)သို့ လည်းကောင်း ၊ MPT Sim Card အသုံးပြုသူများအနေဖြင့် 09-765481535 သို့လည်းကောင်း၊ Mytel Telenor, Oreedoo Sim Card အသုံးပြုသူများအနေဖြင့် 1535 သို့ခေါ်ဆိုတိုင်ကြားနိုင်သလို စားသုံးသူရေးရာဦးစီးဌာန၏ Website ဖြစ်သော  www.doca.gov.mm သို့လည်းကောင်း၊ မြို့နယ်တာဝန်ခံများထံလည်း တယ်လီဖုန်းဖြင့် ဆက်သွယ်တိုင်ကြားနိုင်ကြောင်း အသိပညာပေးဆွေးနွေးခဲ့ကြပါသည်။

DOCA(မကွေး)