သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန ၊ ကျောက်ဆည်ခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်သောအဖွဲ့သည်(၁၁.၂.၂၀၂၂)ရက်နေ့တွင် ကျောက်ဆည်မြို့နယ်ရှိ Denko(ကျောက်ဆည်)၊ စဉ့်ကိုင်မြို့နယ်ရှိ Denko(စဉ့်ကိုင်) နှင့် (၁၄-၂-၂၀၂၂)ရက်နေ့တွင် စဉ့်ကိုင်မြိုနယ် ၊ ပလိပ်ကျေးရွာရှိ Denko(ပလိပ်)နှင့် တံတားဦးမြို့နယ်ရှိ Denko(တံတားဦး) စက်သုံးဆီအရောင်းဆိုင်များအား ဈေးကွက်စောင့်ကြည့် စစ်ဆေးခြင်းလုပ်ငန်းများဆောင်ရွက်ခဲ့ပါသည်။ ထိုသို့စစ်ဆေးရာတွင် ကျောက်ဆည်ခရိုင် စားသုံးသူရေးရာဦးစီးဌာန၊ ခရိုင်ဦးစီးမှူးက နိုင်ငံတော်မှစက်သုံးဆီဈေးနှုန်းမြှင့်တက်မှုမရှိစေရေးနှင့် ဈေးနှုန်း တည်ငြိမ်မှုရှိစေရေးအတွက် မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့် ရောင်းချပေးသည့် နိုင်ငံခြားငွေရရှိသော စက်သုံးဆီကုမ္ပဏီများမှ စက်သုံးဆီများအား အထူးဈေးနှုန်းဖြင့် ရောင်းချလျက်ရှိကြောင်း ၊ ရောင်းချရာတွင် သုံးစွဲသူများအား နိုင်ငံတော်မှသတ်မှတ်ထားသည့် အထူးစျေးနှုန်းထက်ကျော်လွန်၍ မရောင်းချရန်နှင့် အချင်အတွယ်မှန်ကန်မှုရှိစေရေး အရည်အသွေးကောင်းမွန်သော စက်သုံးဆီများသာ ရောင်းချရန် အတွက် စျေးကွက်စောင့်ကြည့်စစ်ဆေးနိုင်ရန် တိုင်းဒေသကြီးအစိုးရအဖွဲ့မှ အဖွဲ့ဖွဲ့စည်း၍ တာဝန်ပေးထားသည့်အတွက် လာရောက်စစ်ဆေးရခြင်းဖြစ်ကြောင်း ပြောကြားခဲ့ပါသည်။ ထို့နောက် အထူးဈေးနှုန်းဖြင့်ရောင်းချနေသည့် စက်သုံးဆီများဖြစ်သော Diesel ၊ Premium Dieselများအား (၂၀)လီတာဝင်စံခွက်ဖြင့် ချင်တွယ်စစ်ဆေးပြီး မှန်ကန်မှုရှိ/မရှိ စစ်ဆေးခဲ့ပါသည်။

            အလားတူ (၁၅-၂-၂၀၂၂)ရက်နေ့တွင် ပြင်ဦးလွင်ခရိုင်၊စားသုံးသူရေးရာဦးစီးဌာန၊ ခရိုင်တာဝန်ခံမှ ဦးဆောင်ပြီး ပြင်ဦးလွင်မြို့နယ်ရှိ Black Gold စက်သုံးဆီအရောင်းဆိုင်အား နိုင်ငံတော်မှ သတ်မှတ်ထားသည့် အထူးစျေးနှုန်းထက်ကျော်လွန်၍ မရောင်းချရန်နှင့် အချင်အတွယ်မှန်ကန်မှုရှိစေရေး အရည်အသွေးကောင်းမွန်သော စက်သုံးဆီများသာ ရောင်းချရန်အတွက် စျေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ကြောင်း သိရှိရပါသည်။

DOCA(မန္တလေး)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန မကွေးတိုင်း ဒေသကြီး သရက်ခရိုင်၊ ကံမမြို့နယ်တာဝန်ခံနှင့်အဖွဲ့သည် (၂၁.၂.၂၀၂၂) ရက်နေ့ နံနက်(၁၀:၀၀)နာရီ အချိန်တွင် ကံမမြို့၊ အမှတ်(၄) စံပြရပ်ကွက်ရှိ စိုပြေစတား သောက်ရေသန့်လုပ်ငန်းသို့သွားရောက်၍ စီးပွားရေး လုပ်ငန်းရှင်များအနေဖြင့် စားသုံးသူကာကွယ်ရေးဥပဒေ-၂၀၁၉ အခန်း(၁၈)ပါ ကုန်အညွှန်း အမှတ်အသားများ မြန်မာဘာသာဖြင့် ပြည့်စုံစွာဖော်ပြလာရေး အသိပေးဆွေးနွေးခြင်း ဆောင်ရွက်ခဲ့ပါသည်။

       ထိုသို့တွေ့ဆုံဆွေးနွေးခဲ့ရာတွင် စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ် အသားများ ပြည့်စုံစွာဖော်ပြလာခြင်းဖြင့် ဈေးကွက်ပိုမိုရရှိလာမည်ဖြစ်ပြီး စားသုံးသူများမှလည်း ၎င်း တို့ဘေးကင်းလုံခြုံရေးအတွက် ကုန်အညွှန်းအမှတ်အသားကိုကြည့်၍ အလွယ်တကူရွေးချယ် ဝယ်ယူ လာနိုင်မည်ဖြစ်၍ နှစ်ဦးနှစ်ဖက်အကျိုးရှိနိုင်မည်ဖြစ်ပါကြောင်း ဆွေးနွေးပြောကြားခဲ့ပြီး စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ မိမိထုတ်လုပ်သည့် ကုန်စည်အပေါ် အာမခံပေးရမည့်အချက်များ၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသည့် ကုန်စည် များအား ဈေးကွက်အတွင်းရောင်းချခွင့် မရှိကြောင်းနှင့် အထူးသဖြင့် သောက်ရေသန့်မှာ ထိန်းချုပ် အစားအသောက်အဖြစ် အမိန့်ကြော်ငြာထုတ်ပြန်ထားရာ အစားအသောက်နှင့် ဆေးဝါးကွပ်ကဲရေး ဦးစီးဌာန၏ ခွင့်ပြုချက်ရရှိမှသာလျှင် ထုတ်လုပ်ခွင့်ရှိမည်ဖြစ်ပြီး FDA၏ ထောက်ခံချက်ရယူရာတွင် လည်း မိမိတို့ဌာန၏ စားသုံးသူကာကွယ်ရေးဥပဒေ-၂၀၁၉ပါ ကုန်အညွှန်းအမှတ်အသားဖော်ပြချက်ကို မြန်မာဘာသာဖြင့် ပြည့်စုံစွာဖော်ပြပေး ရမည်ဖြစ်ကြောင်း အသိပေးရှင်းလင်းဆွေးနွေးခဲ့ပါသည်။

       ရေသန့်စက်ရုံမှ (၂၀)လီတာဗူးများ၊ (၁)လီတာဗူးများ ထုတ်လုပ်ရာ ရေသန့်ထည့်သွင်းရန် အတွက် (၂၀)လီတာရေသန့်ဗူးခွံများအား ရန်ကုန်မြို့မှ မှာယူသုံးစွဲသော်လည်း (၁)လီတာရေသန့်ဗူးခွံ များကို ၎င်းကိုယ်ပိုင်စက်ရုံတွင် ထုတ်လုပ်ကြောင်း၊ တစ်ကြိမ်လျှင် ဗူးရေတစ်ထောင်ခန့် ထုတ်လုပ် နိုင်ပြီး မှာယူသူများရှိပါကလည်း ထုတ်လုပ်ရောင်းချပေးလျှက်ရှိရာ (၁)လီတာဗူးခွံမှာ တစ်လလျှင်ဗူးခွံ ၅ထောင်ခန့် ရောင်းချရကြောင်း၊ ကံမမြို့ပေါ် ရပ်ကွက်/ကျေးရွာများနှင့် သရက်မြို့များသို့ ဖြန့်ဖြူး ရောင်းချကြောင်း သိရှိရပါသည်။

       စိုပြေစတား သောက်ရေသန့်လုပ်ငန်း၏ ကုန်အမှတ်တံဆိပ်များအား မြန်မာနိုင်ငံ စားသုံးသူ ကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက် (၂/၂၀၁၉)နှင့် ကိုက်ညီမှုရှိ/မရှိ စီစစ် ဆောင်ရွက်ပေးနိုင်ရန်အတွက် ကုန်အမှတ်တံဆိပ် နမူနာ(၃)ခုအားရယူခဲ့ပြီး မိမိတို့ဌာနမှ လိုအပ် သည်များ ကူညီဆောင်ရွက်ပေးသွားမည်ဖြစ်ကြောင်း အသိပေးရှင်းလင်းပြောကြားခဲ့ပါသည်။

DOCA(မကွေး)

      စားသုံးသူရေးရာဦးစီးဌာန၊ မကွေးတိုင်း‌‌‌ဒေသကြီး၊ မင်းဘူးခရိုင်၊ ပွင့်ဖြူမြို့နယ် ဦးစီးမှူး ဒေါ်ဌေးဌေးဝင်းသည် (၁၆.၂.၂၀၂၂)ရက်နေ့ နံနက်(၁၀:၀၀)နာရီအချိန်၌ ပွင့်ဖြူမြို့ပေါ်ရှိ စားသုံးဆီ ရောင်းချဖြန့်ဖြူးလျက်ရှိသော လုပ်ငန်းရှင်(၅)ဦးအား ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကွင်းဆင်းအသိပေးဆွေးနွေးခဲ့ပါသည်။

         အဆိုပါ ကွင်းဆင်းအသိပေး ဆောင်ရွက်ရာတွင် ယခုအခါ ဈေးကွက်အတွင်းရှိ စားသုံးဆီများ အနက် အချို့သော စားသုံးဆီများကို ဟင်းသီးဟင်းရွက်ဆီ(Vegetable Oil, Cooking Oil)ဟု ဖော်ပြပြီး ထုတ်လုပ်ဖြန့်ဖြူးရောင်းချလျက်ရှိရာ အဆိုပါဖော်ပြချက်သည် ကုန်အညွှန်းအမှတ်အသား ဖော်ပြခြင်းဆိုင်ရာ ပြဌာန်းချက်အရ ကုန်စည်တစ်ခု၏ အမျိုးအမည်မဟုတ်သည့်အပြင် ပင်ရင်းပါဝင် ပစ္စည်းကို အခြေခံဖော်ပြထားခြင်းမရှိသော ယေဘုယျဆန်သည့် အမျိုးအမည်တစ်ခုသာ ဖြစ်၍ စားသုံးသူများ ထင်ယောင်ထင်မှားဖြစ်စေသောကြောင့် ဟင်းသီးဟင်းရွက်ဆီ(စားအုန်းဆီ)၊ ဟင်းသီး ဟင်းရွက်ဆီ (အဆင့်မြင့်စားအုန်းဆီ)ဟု ဖော်ပြရမည်ဖြစ်သည့်အပြင် မြန်မာနိုင်ငံစားသုံးသူကာကွယ် ရေးကော်မရှင်မှ ညွှန်းကြားချက်အမှတ်(၂/၂၀၁၉)ဖြင့် ထုတ်ပြန်ထားသည့် အမျိုးအမည်၊ အရွယ်အစား၊ အရေအတွက်၊ အသားတင်ပမာဏနှင့် ထားသိုသိမ်းဆည်းပုံအညွှန်းတို့ကို “မြန်မာဘာသာ ဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခုခု သို့မဟုတ် တစ်ခုထက်ပို၍ တွဲလျှက်ဖြစ်စေ” ဖော်ပြရမည် ဖြစ်ပြီး အသားတင်ပမာဏကိုဖော်ပြရာတွင် ပိဿာ/ကျပ်သားဖြင့် ဖော်ပြပေးရမည်ဖြစ်ကြောင်း၊ (၂၀.၁၂.၂၀၂၁)ရက်နေ့တွင် ညွှန်ကြားချက်ထုတ်ပြန်ခဲ့ပြီး (၆)လပြည့်မြောက်သည့်နေ့ (၂၁.၆.၂၀၂၂) ရက်နေ့တွင် စားသုံးဆီများတွင် ဖော်ပြရမည့် ကုန်အညွှန်းအမှတ်အသားကို ပြည့်စုံစွာ ဖော်ပြထားခြင်း မရှိပါက စားသုံးသူကာကွယ်ရေးဥပဒေအရ အရေးယူခံရမည်ဖြစ်ကြောင်း အသိပေး ရှင်းလင်းဆွေးနွေး ခဲ့ပါသည်။

        ထို့အပြင် အမှတ်တံဆိပ်ပါ စားသုံးဆီများကို ထိန်းချုပ်အစားအသောက်အဖြစ် သတ်မှတ်လိုက် သည့်အတွက် စီးပွားရေးလုပ်ငန်းရှင်များအနေဖြင့် ကျန်းမာရေးဦးစီးဌာန(FDA)ထောက်ခံချက်ပါရှိသော စားသုံးဆီများကိုသာ ရောင်းချဖြန့်ဖြူးသွားရန် အသိပေးဆွေးနွေးခဲ့ပါသည်။ ထိုသို့ စီးပွားရေးလုပ်ငန်း ရှင်များသို့ ကွင်းဆင်းအသိပေးဆွေးနွေးခြင်းများဖြင့် လုပ်ငန်းရှင်များအနေဖြင့် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထုတ်လုပ်လာမည်ဖြစ်သည့်အတွက် စားသုံးသူများအနေဖြင့် ဘေးကင်းလုံခြုံသည့် ကုန်စည်များကို ရွေးချယ်ဝယ်ယူစားသုံးလာနိုင်မည်ဖြစ်ပြီး ယုံကြည်စိတ်ချရမှု ပိုမိုရရှိလာစေမည်ဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)

          ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ဖေဖော်ဝါရီလ ၁၇ ရက်နေ့ နံနက်ပိုင်းက ရေတာရှည်မြို့ ရန်ကုန်-မန္တလေးလမ်းရှိ ကုန်စုံဆိုင်ကြီးများတွင် ရောင်းချလျှက်ရှိသော ကြက်အူချောင်းနှင့် ငါးသေတ္တာများတွင် မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ ကုန်အညွှန်းအမှတ်အသား ပြည့်စုံမှုရှိ၊ မရှိကို ဈေးကွက်စောင့်ကြည့် စစ်ဆေးခဲ့ပါသည်။

           ရေတာရှည်မြို့ ရန်ကုန်-မန္တလေးလမ်းရှိ ကုန်စုံဆိုင်ကြီးများတွင် ရောင်းချသော ဒေါ်စိန် အမှတ်တံဆိပ်၊ ပန်းကမ္ဘာ အမှတ်တံဆိပ်၊ ရွှေမုံရွာ အမှတ်တံဆိပ်နှင့် CP အမှတ်တံဆိပ် ကြက်အူချောင်းများနှင့် Three Lady Cooks အမှတ်တံဆိပ်၊ OK/A1 အမှတ်တံဆိပ်နှင့် Ready အမှတ်တံဆိပ် ငါးသေတ္တာများတွင် မြန်မာဘာသာဖြင့်ဖော်ပြရမည့် ကုန်အညွှန်းအမှတ်အသားများပြည့်စုံစွာဖော်ပြထားကြောင်း တွေ့ရှိရပါသည်။

          မြို့နယ်တာဝန်ခံသည် မြန်မာဘာသာဖြင့်ဖော်ပြရန် ညွှန်ကြားထားသည့် ကုန်အညွှန်းအမှတ်အသား ပြည့်စုံစွာ ဖော်ပြထားခြင်းမရှိသော ကုန်စည်များအား ရောင်းချခြင်းမပြုရန် ဆွေးနွေးအကြံပြုခဲ့ကြောင်း သတင်းရရှိပါသည်။

DOCA(ပဲခူး)

         စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်အတွင်း ရွှေတောင်မြို့ရှိ ကုန်မျိုးစုံဆိုင်များသို့ (၇.၂.၂၀၂၂) နေ့တွင်လည်းကောင်း၊ ပြည်မြို့နယ်ရှိ ပေါင်းတလည်မြို့ပေါ်ကုန်မျိုးစုံဆိုင်များသို့ (၈.၂.၂၀၂၂) နေ့တွင်လည်းကောင်း၊ သဲကုန်းမြို့နယ်ရှိ ဆင်မြီးဆွဲစည်ပင်သာယာဈေးသို့ (၉.၂.၂၀၂၂) နေ့တွင်လည်းကောင်း သက်ဆိုင်ရာမြို့နယ်တာဝန်ခံများဦးဆောင်၍ မြို့နယ်ဈေးကွက် စောင့်ကြည့်စစ်ဆေးရေးအဖွဲ့မှ မြို့ပေါ်ကုန်မျိုးစုံဆိုင်များနှင့် ဈေးအတွင်းရောင်းချလျှက်ရှိသော ကုန်စည်များလုံခြုံစိတ်ချရမှုရှိစေရေး၊ စားသုံးသူပြည်သူများ ကုန်စည်များကို ဘေးအန္တရာယ် ကင်းရှင်းစွာ အသုံးပြုနိုင်ရေး၊ ကုန်စည်များတွင် ဖော်ပြရမည့် ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြမှုရှိစေရေးတို့အတွက် ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြပါသည်။

          အဆိုပါ စောင့်ကြည့်စစ်ဆေးခြင်းများ ဆောင်ရွက်ရာတွင် ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြထားသော ကုန်စည်များကို ဦးစားပေးရောင်းချကြရန်၊ သက်ဆိုင်ရာ အစိုးရဌာနများမှ တားမြစ်ထားသော ကုန်စည်များအား ရောင်းချခြင်းမပြုကြရန်၊ စားသုံးသူများ နစ်နာဆုံးရှုံးမှုဖြစ်စေမည့် သက်တမ်းလွန်ကုန်စည်များအား သွယ်ဝိုက်ရောင်းချခြင်းများ ရှောင်ကြဉ်ကြရန် လုပ်ငန်းရှင်များသို့ အသိပေးပြောကြားခဲ့ကြောင်းနှင့် စားသုံးသူအသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)