သတင်းနှင့် လှုပ်ရှားမှုများ

  စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှ ပပျောက်သွားစေရေးနှင့် စားသုံးသူကာကွယ်ရေးဥပဒေပြဋ္ဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာဖော်ပြထားရှိစေရေး အခြေအနေတို့နှင့်စပ်လျဉ်း၍   လုပ်ငန်းရှင်များအား တွေ့ဆုံဆွေးနွေးကာ အသိပညာ‌ပေးခြင်းလုပ်ငန်းများကို တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ် ဆောင်ရွက်လျက်ရှိကြောင်းသိရှိရပါသည်။

   ထိုသို့ လုပ်ငန်းရှင်များအား တွေ့ဆုံဆွေးနွေးအသိပညာပေးရာတွင် စားသုံးသူကာကွယ်ရေးဥပဒေပါ စီးပွားလုပ်ငန်းရှင်များလိုက်နာရမည့်တာဝန်များ၊  ကုန်စည်ပေါ်တွင် ဖော်ပြရမည့် ကုန်အညွှန်းအမှတ်အသားဆိုင်ရာပြဋ္ဌာန်းချက်များနှင့်စပ်လျဉ်း၍ ရှင်းလင်းဆွေးနွေးအသိပညာ‌ပေးပြောကြားပြီးနောက် ကုန်အညွှန်းအမှတ်အသားဖော်ပြထားမှုအပေါ် စားသုံးသူကာကွယ်ရေးဥပဒေနှင့် ကိုက်ညီမှု ရှိ/မရှိကို စိစစ်ပြန်ကြားပေးစေလိုပါက သက်ဆိုင်ရာ မြို့နယ်၊ ခရိုင်၊ တိုင်း စားသုံးသူရေးရာဦးစီးဌာနများမှတစ်ဆင့် တင်ပြလျှောက်ထားနိုင်ပါကြောင်း၊ ကုန်အညွှန်းအမှတ်အသားတင်ပြလျှောက်ထားမှုနှင့်စပ်လျဥ်း၍ ဌာနက မည်သည့်စာရွက်စာတန်းကြေး၊ ဝန်ဆောင်ခ၊ စစ်ဆေးအတည်ပြုခ စသည့်ကုန်ကျစရိတ်များကို ကောက်ခံခြင်းမရှိဘဲ ဆောင်ရွက်ပေးနေမှုအား အသိပညာပေး‌ဆွေးနွေးခြင်းတို့ ဆောင်ရွက်ခဲ့ပါသည်။

          စားသုံးသူများဘေးအန္တရာယ်ကင်းရှင်းရေး၊ ထုတ်ကုန်များလုံခြုံစိတ်ချရမှုရှိစေရေးတို့အတွက် ဈေးကွက်မရောက်မီကုန်စည်များအား သွားရောက်စစ်ဆေးခြင်းနှင့် လုပ်ငန်းရှင်များအား အသိပညာပေးခြင်းများ ဆောင်ရွက်ရာတွင် ၂၀၂၃ခုနှစ် ဖေဖော်ဝါရီလတွင် ဆီလုပ်ငန်းရှင်၊ လက်ဖက်လုပ်ငန်းရှင်၊ မုန့်လုပ်လုပ်ငန်းရှင်၊ ခေါက်ဆွဲလုပ်ငန်းရှင်၊ ဆန်စက်လုပ်ငန်းရှင်၊ ရေသန့်လုပ်ငန်းရှင်၊ ကျောက်စိမ်း အချောထည်လုပ်ငန်းရှင်များနှင့် တွေ့ဆုံဆွေးနွေးအသိပညာပေးခြင်းကို (၃၆) ကြိမ်ဆောင်ရွက်နိုင်ခဲ့ကြောင်း သတင်းရရှိပါသည်။  

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် စားသုံးသူပြည်သူများ ဘေးအန္တရာယ်ကင်းရှင်းရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းများကို ဆောင်ရွက်လျက်ရှိရာ ၂၇-၂-၂၀၂၃ ရက်နေ့၊ နံနက် (၁၀:၀၀) နာရီအချိန်တွင် ရွှေဘိုမြို့၊ အမှတ်(၅)ရပ်ကွက်၊ မင်းရပ်ရှိ ကုန်မျိုးစုံအရောင်းဆိုင်(၂)ဆိုင်အား ရွှေဘိုခရိုင်ဦးစီးမှူးရုံးမှ ဒု-ခရိုင်ဦးစီးမှူးကဦးဆောင်၍ ရွှေဘိုမြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် စားသုံးသူရေးရာဌာနခွဲတာဝန်ခံတို့က ဈေးကွက်စောင့်ကြည့်စစ်ဆေးခဲ့ပါသည်။

     အဆိုပါ ကုန်မျိုးစုံရောင်းဝယ်ရေးဆိုင်တွင် ရောင်းချသည့်မုန့်မျိုးစုံများအား ကုန်အညွှန်းအမှတ်အသားများ ပြည့်စုံစွာဖော်ပြထားခြင်းရှိ/မရှိနှင့် သက်တမ်းလွန်ခြင်းရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ရာ ကုန်အညွှန်းအမှတ်အသားဖော်ပြခြင်းနှင့် ကိုက်ညီမှုရှိပြီး သက်တမ်းလွန်စားသောက်ကုန်များကို ရောင်းချမှုမရှိသော်လည်း ရောင်းချသည့် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေပါ စားသုံးသူနှင့်စီးပွားရေးလုပ်ငန်းရှင်၏  အဓိပ္ပါယ်ဖွင့်ဆိုချက်များ၊  အခန်း(၁၈)ပါ ကုန်အညွန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြ၍ ထုတ်လုပ်ဖြန့်ဖြူးသည့်ကုန်စည်များကိုသာ ရောင်းချကြရန်၊ ကုန်စည်ကိုထုတ်လုပ်သည့် စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားနှင့်ပတ်သက်၍ ဌာန၏အတည်ပြုချက်ရယူနိုင်ရေး ဆောင်ရွက်ကြရန်နှင့် ဥပဒေပါ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များအကြောင်းကို အသိပညာပေးဆွေးနွေးခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

    ဧရာဝတီတုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ အစည်းအဝေးခန်းမတွင် ၂၀၂၃ခုနှစ်၊ ဖေဖော်ဝါရီလ(၂၇)ရက်နေ့ နံနက်(၁၀:၀၀)နာရီအချိန်တွင် ဧရာဝတီတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ ညီနောင်အသင်း (၃၅)သင်း၊ ခရိုင်ကုန်သည်များနှင့် စက်မှုလက်မှုလုပ်ငန်းရှင်များအသင်း (၆)သင်း၊ ကုန်စည်ဒိုင် (၅)ခုမှ ဥက္ကဌ၊ အတွင်းရေးမှူးနှင့်  အဖွဲ့ဝင်များ စုစုပေါင်း(၄၆)ဦး တက်ရောက်ခဲ့ပါသည်။

   အစည်းအဝေးတွင် ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီး ဦးစီးမှူး ဦးစိုးအောင်က အသင်းအဖွဲ့နှင့် ကုန်စည်ဒိုင်များရှေ့ဆက်ဆောင်ရွက်ရမည့် အစီအစဉ်များ၊ ဥပဒေနှင့်အညီ သင်းဖွဲ့စည်းမျဉ်းများ ရေးဆွဲမှတ်ပုံတင်နိုင်ရေးနှင့် အသင်းများကျစ်လစ်ခိုင်မာစွာဖြင့် ဧရာဝတီတိုင်းဒေသကြီး၏ စီးပွားရေးတိုးတက်နိုင်ရေးတို့အား ပြောကြားခဲ့ပါသည်။ ဆက်လက်၍ ရင်းနှီးမြှုပ်နှံမှုနှင့် ကုမ္ပဏီများညွှန်ကြားသမှုဦးစီးဌာနမှ တိုင်းဒေသကြီးဦးစီးမှူး ဦးသက်ပိုင်က အသင်းအဖွဲ့၊ ကုန်စည်ဒိုင်များ ဥပဒေနှင့် အညီသင်းဖွဲ့စည်းမျဉ်းရေးဆွဲ၍ မှတ်ပုံတင်နိုင်ရေးကိစ္စများ အားလည်းကောင်း၊ စက်မှုကြီးကြပ်ရေးနှင့် စစ်ဆေးရေးဦးစီးဌာနမှ တိုင်းဒေသကြီးဦးစီးမှူး ဦးဝင်းဦးက ပုဂ္ဂလိကအလိုက် စက်မှုလုပ်ငန်းရှင်များ မှတ်ပုံတင်ခြင်းဆိုင်ရာကိစ္စရပ်များနှင့် လုပ်ငန်းအမျိုး အစားအလိုက် အသင်းအဖွဲ့ ဖွဲ့စည်းခြင်းဆိုင်ရာကိစ္စရပ်များအား ရှင်းလင်းပြောကြားခဲ့ပါသည်။

   ဆက်လက်၍ ဧရာဝတီတိုင်းဒေသကြီး ကုန်သည်များနှင့် စက်မှုလက်မှု လုပ်ငန်းရှင် များအသင်းချုပ် ဥက္ကဌ ဦးဝင်းမြင့်လှိုင်က ညီနောင်အသင်းများ၊ ကုန်စည်ဒိုင်များ၊ ခရိုင်ကုန်သည် များနှင့် စက်မှုလက်မှုလုပ်ငန်းရှင်များအသင်း အားလုံးပါဝင်သော (ARCCI)အသင်းကြီးအား အောင်မြင်အောင် ကြိုးစားဆောင်ရွက်လျက်ရှိပါကြောင်း၊ အကြောင်းအမျိုးမျိုးကြောင့် အခက်အခဲ များရှိခဲ့သော်လည်း ယခုအခါ အသင်းများတိုးတက်စေရန်နှင့် နိုင်ငံ့အကျိုး၊ တိုင်းဒေသကြီး အကျိုးများအား သက်ဆိုင်ရာ အာဏာပိုင်များနှင့် ပိုမိုပူးပေါင်း၍ အသင်းများ ကျစ်လစ်ခိုင်မာစွာဖြင့် နိုင်ငံတော်မှ ချမှတ်သော ဥပဒေ၊ လုပ်ထုံးလုပ်နည်းများနှင့်အညီ ဆောင်ရွက်နိုင်ရေးအတွက် အသင်းများ သင်းဖွဲ့စည်းမျဉ်းစည်းကမ်းများရေးဆွဲ၍ မှတ်ပုံတင်နိုင်ရေးတို့ကို ဆောင်ရွက်သွားမည်ဖြစ်ပါကြောင်း ဆွေးနွေးခဲ့ပါသည်။

 ဧရာဝတီတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် အတွင်းရေးမှူး ဦးမောင်မောင်ဦးက မိမိတို့အနေဖြင့် အောင်မြင်အောင် ဆောင်ရွက်လျက်ရှိပြီး၊ ဧရာဝတီတိုင်းဒေသကြီးတွင် ဈေးကွက် ရင်းနှီးမြှပ်နှံမှုများရရှိအောင် နိုင်ငံခြားတိုင်းပြည်များနှင့် ချိတ်ဆက်ဆောင်ရွက်လျက်ရှိပါကြောင်း၊ ပုသိမ်စက်မှုဇုံစီမံကိန်း ဒုတိယဥက္ကဌ ဦးစည်သူစိုးမှ ဧရာဝတီတိုင်းဒေသကြီးအတွင်း ကုန်စည်ဒိုင်များ ဖွံ့ဖြိုးတိုးတက်ရေးအတွက် မိမိတို့ စက်မှုစီမံကိန်း မြေတွင် Commodity Trade Center တည်ဆောက်၍ ကုန်စည်များကို သိုလှောင်ထိန်းသိမ်း ပေးမည်ဖြစ်ပြီး၊ သီးနှံအပေါင်ခံစနစ်ဖြင့် ဘဏ်များဖြင့်လည်း ချိတ်ဆက်ဆောင်ရွက်သွားမည်ဖြစ်ပြီး၊Digital Platform အဖြစ် တည်ဆောက်၍ နိုင်ငံတကာဈေးနှုန်းဈေးကွက်၊ တင်ပို့သည့်အပိုင်းများဆောင်ရွက်သွားမည်ဖြစ်ပါကြောင်း ရှင်းလင်းဆွေးနွေးခဲ့ပါသည်။

    နိဂုံးချုပ်အနေဖြင့် ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ ဒုတိုင်းဒေသကြီး ဦးစီးမှူး ဦးစိုးဦးက အသင်းအဖွဲ့များနှင့် ဧရာဝတီတိုင်းဒေသကြီး ကုန်သည်များနှင့် စက်မှု လက်မှုလုပ်ငန်းရှင်များအသင်းချုပ်၏ ဦးဆောင်မှုဖြင့် ဧရာဝတီတိုင်းဒေသကြီးတွင်  စိုက်ပျိုး မွေးမြူ ရေးနှင့် အခြားပို့ကုန်များအား ပြည်တွင်းသာမက ပြည်ပဈေးကွက်ရရှိနိုင်ရေး ဝိုင်းဝန်းကြိုးစား သွားရန်လိုအပ်ပါကြောင်း၊ ပုသိမ်စက်မှုဆိပ်ကမ်းသည်လည်း ဆန်တန်ချိန်(၃၀၀၀)ထိ သင်္ဘောများ ဝင်ထွက်နိုင်ပြီး၊ ယခုနှစ်တွင် ဘင်္ဂလားဒေ့ရှ်နိုင်ငံသို့ ဆန်တန်ချိန် (၃၀၀၀၀)တင်ပို့ခဲ့ပြီးဖြစ်ပါကြောင်း၊  မိမိတို့ဒေသထွက်ပစ္စည်းများကို ပုသိမ်စက်မှုဆိပ်ကမ်းမှ တဆင့် ပြည်ပသသို့တင်ပို့နိုင်သည့်အတွက် ဧရာဝတီတိုင်းဒေသကြီးပိုမိုဖွံ့ဖြိုးတိုးတက်လာမည်ဖြစ်ပါကြောင်း ပြောကြားခဲ့ပြီး တက်ရောက်လာသည့် အသင်းများမှ သိလိုသည်များ မေးမြန်းချက်များကို ပြန်လည်ဖြေကြားခဲ့၍ အစည်းအဝေးအား နေ့လယ်(၁၃:၀၀)နာရီတွင် ပြီးမြောက်ခဲ့ကြောင်း သိရှိရပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးက တိုင်းဒေသကြီးအတွင်းရှိ အရာထမ်း ၊ အမှုထမ်း ဝန်ထမ်း (၁၂၂) ဦးအား ပြည်ထောင်စုဝန်ကြီး၏ လမ်းညွှန်ချက်များကို ထပ်ဆင့်ရှင်းလင်းခြင်းအခမ်းအနားအား (၂၈.၁၂.၂၀၂၂) နေ့ ၊ နေ့လည် (၁၂:၀၀)နာရီ အချိန်တွင် ကျင်းပပြုလုပ်ခဲ့ပါသည်။

          ထပ်ဆင့်ရှင်းလင်းပွဲတွင် တိုင်းဒေသကြီးဦးစီးမှူးက နိုင်ငံတော်စီမံအုပ်ချုပ်ရေးကောင်စီ မှ (၁.၂.၂၀၂၃) မှစတင်၍ အစိုးရအသစ်ဖွဲ့စည်းပြီးဖြစ်ရာ စားသုံးသူရေးရာဦးစီးဌာနအနေဖြင့် မူဝါဒပိုင်းဆိုင်ရာ ပြောင်းလဲခြင်းမရှိပဲ ယခင်လုပ်ဆောင်ချက်များအတိုင်း အရာထမ်း / အမှုထမ်းများအားလုံး လုပ်ဆောင်သွားရန်ဖြစ်ပါကြောင်း၊ မိမိတို့တစ်နှစ်ပတ်လုံး ဆောင်ရွက်ရမည့်လုပ်ငန်းစဉ်များအား အပတ်စဉ် / လစဉ် / လေးလပတ်တစ်ကြိမ် ပြန်လည်သုံးသပ်၍ အားနည်းချက်များကို ရှာဖွေဖေါ်ထုတ်ပြီး ပြောင်းလဲအောင်မြင်အောင်ဆောင်ရွက်သွားရန်လိုအပ်ပါကြောင်း ၊ ပြောင်းလဲရာတွင်လည်း ဝေဖန်မှုများရှိပါက ပြင်ဆင်စရာများကို ရဲရဲဝံ့ဝံ့ပြင်ဆင်ရန်လိုအပ်ပြီး ရဲရဲဝံ့ဝံ့ဆောင်ရွက်ရန် လိုအပ်ပါကြောင်း ဝန်ကြီးဌာန ၏ ကောင်းကျိုးကိုရှေးရှု၍ စေတနာဖြင့် ဆောင်ရွက်လျက်ရှိရာ စေတနာ ကောင်းခြင်းသည် သဘောကောင်းခြင်း ၊ သက်ညှာခြင်း ၊ အုပ်ချုပ်မှုလျော့ရဲခြင်းမဟုတ် ကြောင်း ၊ ဝန်ထမ်းများ၏ လူမှုရေးကို ကြည့်သင့်သည်မှန်သော်လည်း အလုပ်တာဝန်နှင့်ပတ်သက်၍ လျော့ရဲမှုများရှိပါက တိတိကျကျ အရေးယူဆောင်ရွက်သွားမည်ဖြစ်ပါကြောင်း ၊ ဝန်ထမ်းများအားလုံး မိမိတို့ ၏  Mindset များကို ပြုပြင်ရန်လိုအပ်ပြီး အထက်အောက်ရိုသေချစ်ခင်စွာဆက်ဆံရမည်ဖြစ်ပါကြောင်း၊  ဝန်ကြီးဌာန၏ဆောင်ပုဒ်ကဲ့သို့ “ ဘယ်တော့လုပ်မလဲ”  ၊ “ အခုလုပ်မယ်” ဆိုသည့် စာသားအား နှလုံးသားထဲစွဲဝင်၍ လုပ်ငန်းများအောင်မြင်တိုးတက်အောင်လုပ်ဆောင်ရမည်ဖြစ်ပါကြောင်း ၊ မိမိဌာနရှိ မှတ်တမ်း ၊ ရုံးစာ အဝင် /  အထွက် ၊ စာကြည့်တိုက်များအား ရုံးချုပ်၏  ညွှန်ကြားချက်များနှင့်အညီ ဆောင်ရွက်သွားရန်လိုအပ်ပြီး စားသုံးသူကာကွယ်ရေးဥပဒေ ၊ ထွက်ရှိ လာမည့်ဆန်စပါး ဥပဒေများကို လိုက်နာကျင့်သုံး၍ ပြည်သူများ၏လိုအပ်ချက် ၊ နိုင်ငံတော်၏ လိုအပ်ချက်များကို ဖြည့်ဆည်း၍ ဌာနအကျိုး ၊ ဝန်ကြီးဌာနအကျိုးများကို ကြိုးစားဆောင်ရွက်သွားရန် မှာကြားပြီးနောက် ပြည်ထောင်စုဝန်ကြီး၏ လမ်းညွှန်ချက်များအားထပ်ဆင့်ရှင်းလင်းခြင်း အခမ်းအနားကို မွန်းလွဲ (၁၄:၀၀) နာရီအချိန်တွင်ပြီးမြောက်ခဲ့ကြောင်းသိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ၂၄-၂-၂၀၂၃ ရက်နေ့၊ နံနက် (၁၁:၃ဝ) နာရီအချိန်တွင် ဗိုလ်တထောင်မြို့နယ်၊ ဘိုကလေးဈေး၌ စားသုံးသူကာကွယ်ရေးခေါင်းစဉ်ဖြင့် ဟောပြောကျင်းပခဲ့ပါသည်။

          အဆိုပါဟောပြောပွဲတွင် စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဦးနေလင်း (ဒု-ကြီးကြပ်ရေးမှူး)က စားသုံးသူကာကွယ်ရေးဥပဒေပါ ရည်ရွယ်ချက်၊ စားသုံးသူများ၏ အခွင့်အရေးနှင့် တာဝန်များအကြောင်း၊ မိမိတို့ဦးစီးဌာနအနေဖြင့် ကုန်သည် သို့မဟုတ် ဝန်ဆောင်မှုလုံခြုံစိတ်ချရမှုရှိစေရေးအတွက် သက်ဆိုင်ရာအစိုးရဌာနများ၊ အစိုးရအဖွဲ့အစည်းများနှင့် ပူးပေါင်းဆောင်ရွက်ရပါကြောင်း၊ ကုန်စည်နှင့်ဝန်ဆောင်မှုများနှင့်ပတ်သက်၍ နစ်နာဆုံးရှုံးမှု၊ အငြင်းပွားမှုများရှိပါကလူကိုယ်တိုင်သော်လည်းကောင်း၊ လူထုဆက်သွယ်ရေးနည်းလမ်းတစ်ခုခု ဖြင့်သော်လည်းကောင်း၊ သက်ဆိုင်ရာဦးစီးမှူးရုံးများသို့ သက်သေခံအထောက်အထားနှင့်တကွတိုင်ကြားနိုင်ပါကြောင်းနှင့် ဥပဒေပါပြစ်မှု/ပြစ်ဒဏ်များအကြောင်းတို့ကို အသေးစိတ်ရှင်းလင်း ပြောကြားဆွေးနွေးခဲ့ကြောင်း သိရှိရပါသည်။

          အဆိုပါဟောပြောပွဲအား နေ့လည် (၁၃:ဝဝ) နာရီတွင် ရုပ်သိမ်းခဲ့ပြီး ဟောပြောပွဲတက်ရောက် သူ (၁၈)ဦးခန့်ရှိကြောင်းသိရပါသည်။

DOCA(ရန်ကုန်)