သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ အင်္ဂပူမြို့နယ်တာဝန်ခံသည်(၁၁.၁၁.၂၀၂၄)ရက်နေ့ နံနက်(၁၁:၀၀) နာရီအချိန်တွင် အင်္ဂပူမြို့နယ်၊ အမှတ်(၁)ရပ်ကွက်ရှိ စားသုံးသူရေးရာဦးစီးဌာန မြို့နယ်တာဝန်ခံရုံး၌ ကုန်စုံဆိုင်လုပ်ငန်းရှင်များအား စားသုံးသူကာကွယ်ရေး အသိပညာပေးဟောပြောခြင်း ဆောင်ရွက်ခဲ့ပါသည်။

     ဟောပြောပွဲတွင် စားသုံးသူ‌ရေးရာဦးစီးဌာန မြို့နယ်တာဝန်ခံ ဦးဘိုဘိုက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များအကြောင်း၊ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည့်အကြောင်း၊ ကုန်စည် (သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်း၊ စားသုံးသူမိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ (CICC) ရုံးခန်းများ ဖွင့်လှစ်ထားရှိမှု အခြေအနေတို့ကိုလည်းကောင်း အသိပညာပေးဟောပြောခဲ့ပြီး တက်ရောက်လာသူများမှလည်း သိလိုသည်များကို မေးမြန်း၍ အပြန်အလှန်ဆွေးနွေးခဲ့ကြကြောင်း သိရှိရပါသည်။

DOCA(ဧရာဝတီ)

      (၁၃.၁၁.၂၀၂၄) ရက်နေ့၊ နံနက်(၀၉:၃၀) အချိန်က ပန်းတနော်မြို့မဈေး၊ အရှေ့ပိုင်းရပ်ကွက်ဈေး၊ အနောက်ပိုင်းရပ်ကွက်ဈေးအတွင်း/အပြင်ရှိ အခြေခံစားသောက်ကုန် ရောင်းချသော ကုန်မျိုးစုံဆိုင် (၁၈) ဆိုင်သို့ ကွင်းဆင်းသွားရောက်၍ စားသုံးသူရေးရာဦးစီးဌာန၊ ပန်းတနော်မြို့နယ်တာဝန်ခံရုံးမှ ဝန်ထမ်းများသည် ဈေး၊ဈေးတန်းများရှိ အခြေခံစားသောက်ကုန်ဈေးနှုန်းများ ရောင်းချနေမှုအခြေအနေများကို သိရှိရန် မြို့နယ်စည်ပင်သာယာရေးအဖွဲ့နှင့်အတူ ကွင်းဆင်းစစ်ဆေးဆောင်ရွက်ခဲ့ပါသည်။
     ကွင်းဆင်းစစ်ဆေးရာတွင် ပန်းတနော်မြို့နယ်တာဝန်ခံရုံးမှ ဦးအောင်ကျော်သက်သည် ပန်းတနော် မြို့နယ်တွင်းရောင်းချလျက်ရှိသော အခြေခံစားသောက်ကုန်များဖြစ်သည့် ဆန်၊ ဆီ၊ ဆား၊ ငရုတ်၊ ကြက်သွန်ဈေးနှုန်းများ၊ သား၊ ငါး၊ ကြက်၊ ဝက်၊ ဆိတ်၊ ဈေးနှုန်းများ၊ ဟင်းသီးဟင်းရွက်ဈေးနှုန်းများကို သင့်တင့်သည့် ဈေးနှုန်းများအတိုင်း မြေပြင်တွင် အမှန်တကယ်ရောင်းချခြင်းရှိ/ မရှိ၊ ဈေးနှုန်းအတက်အကျရှိ/မရှိကို ကွင်းဆင်းမေးမြန်း၍ အပတ်စဉ် မြေပြင်အမှန်တကယ်ရောင်းချဈေးနှုန်းများကို စာရင်းကောက်ယူ၍ ခရိုင်ဦးစီးမှူးရုံးသို့ တင်ပြလျက်ရှိပြီး၊ ပန်းတနော်မြို့နယ် အတွင်းရောင်းချနေသော အခြေခံစားသောက်ကုန်နှင့် သား၊ငါးများ အလှူအတန်း ရက်ဖြစ်၍ အနည်းငယ်သာ ဈေးတက်၍ အခြေခံစားသောက်ကုန်စျေးနှုန်းများမှာ ယခင်လ အောက်တိုဘာလ ပထမပတ်နှင့်နှိုင်းယှဉ်လျှင် အနည်းငယ်တက်ကြောင်း၊ ကြက်သား၊ ဝက်သား၊ အမဲသား၊ စျေးနှုန်းအနည်းငယ် တက်ပြီး အလှူအတန်းရက်ဖြစ်၍ ဈေးအနည်းငယ်တက်ကြောင်း ကုန်မျိုးစုံများကိုလည်း  ပွင့်လင်းရာသီဖြစ်၍ ပိုမိုရောင်းချရကြောင်းသိရပြီး၊ ဈေးရောင်းချသူလုပ်ငန်းများကို ဈေးနှုန်းအဆမတန်မြှင့်တင် ရောင်းချခြင်းမပြုလုပ်ရန် အသိပညာပေးပြောကြားခဲ့ပြီး ဈေးနှုန်းကောက်ယူ ကွင်းဆင်းမေးမြန်းခဲ့ကြောင်း သိရှိရပါသည်။

DOCA(ဧရာဝတီ)

        စီးပွားရေးနှင့်ကူးသန်းရောင်းဝယ်ဝန်ကြီးဌာန၊ စားသုံးသူရေးရာဦးစီးဌာနအနေဖြင့် ဌာနနှင့်သက်ဆိုင်သည့် ဥပဒေပါအကြောင်းအရာများ၊ ပြဋ္ဌာန်းချက်များ၊ ညွှန်ကြားချက်များအား  နေရာပေါင်းစုံရှိ စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံးသိရှိလိုက်နာမှုရှိစေရန် မိမိတို့ဌာနက ဦးဆောင်၍သော်လည်းကောင်း၊ အခြားသက်ဆိုင်ရာဌာနများ၏ ဦးဆောင်ပြုလုပ်မှုများတွင် ပူးပေါင်းပါဝင်၍သော်လည်းကောင်း အသိပညာပေးလျက်ရှိရာ (၁၁-၁၁-၂၀၂၄)ရက်နေ့၊ နံနက် ၁၀:၀၀ နာရီအချိန်တွင် ငါန်းဇွန်မြို့ရှိ၊ အမှတ်(၁) အခြေခံပညာမူလတန်းကျောင်းရှိ ဆရာ/ ဆရာမများနှင့် ကျောင်းသား/ ကျောင်းသူများအား စားသုံးသူကာကွယ်ရေးနှင့်ပတ်သက်၍ အသိပညာပေးဟောပြောပွဲဆောင်ရွက်ခဲ့ပါသည်။

        အဆိုပါဟောပြောဆွေးနွေးပွဲအား မြို့နယ်စားသုံးသူရေးရာဦးစီးဌာနနှင့်အတူ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်အားကစားနှင့်ကာယပညာဦးစီးဌာနတို့ ပူးပေါင်း ဆောင်ရွက်ခဲ့ကြပြီး၊ ရှေးဦးစွာ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်နေခြည်ဦးက ကလေးသူငယ်နှင့်ကလေးအလုပ်သမားတို့၏ အဓိပ္ပါယ်ဖွင့်ဆိုချက်များ၊ ကလေးလုပ်သားဖြစ်ရခြင်းအကြောင်းအရင်းများ၊ ကမ္ဘာပေါ်နှင့် မြန်မာနိုင်ငံတွင် ကလေးလုပ်သားအရေအတွက်များ၊ မြန်မာနိုင်ငံတွင် ကလေးလုပ်သားပပျောက်ရေးနှင့်ပတ်သက်၍ ဥပဒေပြဋ္ဌာန်းချက်များ စသည်ဖြင့် ကလေးလုပ်သားပပျောက်ရေးခေါင်းစဉ်ဖြင့် အသိပညာပေးဟောပြောဆွေးနွေးခဲ့ကြောင်း၊ အားကစားနှင့်ကာယပညာဦးစီးဌာန၊ ဒေါ်မိုးမိုးစံ(အကြီးတန်းစာရေး)က လူငယ်နှင့်ကိုယ်လက်လှုပ်ရှားအားကစားခေါင်းစဉ်ဖြင့် ဟောပြောဆွေးနွေးခဲ့ကြောင်းနှင့် ဆက်လက်၍ စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်သင်းသင်းဆွေက ခေတ်စနစ်များတိုးတက်ပြောင်းလဲလာသည့်နှင့်အမျှ ခေတ်ကိုလိုက်၍ လူနေမှုပုံစံများ၊ စားသောက်မှုပုံစံများလည်းပြောင်းလဲလာသည့်အတွက် ကျန်းမာရေးချို့ယွင်းမှုများ များလာကြောင်း၊ ကျောင်းသား/ကျောင်းသူများမှာ ငယ်ရွယ်သူများဖြစ်သည့်အတွက် ယခုအရွယ်များမှစ၍ ကျန်းမာရေးအသိပညာများလိုက်စားမှု၊ ရရှိမှုများရှိရန်လိုအပ်ကြောင်း၊ ကျန်းမာစွာနေထိုင်ရေးတွင် နေ့စဉ်စားသုံးနေသော အစားအစာများမှာ အဓိကကျ၍ လုံခြုံစိတ်ချရမှုရှိသော အစားအစာများကို ဝယ်ယူသုံးစွဲစားသောက်ကြရန်နှင့် လုံခြုံစိတ်ချရမှုရှိသော အစားအစာများကို ရွေးချယ်ဝယ်ယူရာတွင် သိသင့်သိထိုက်သည့်အကြောင်းအရာများကိုလည်းကောင်း၊ စားသုံးသူကာကွယ်ရေးနှင့်ပတ်သက်သည့် အကြောင်းအရာများကိုလည်းကောင်း အကျယ်တဝင့်ဟောပြောဆွေးနွေးခဲ့ကြောင်းနှင့် အဆိုပါဟောပြောဆွေးနွေးပွဲသို့ ဆရာ/ ဆရာမများနှင့် ကျောင်းသား/ ကျောင်းသူစုစုပေါင်း (၈၅)ဦးတက်ရောက်ခဲ့ကြောင်းသိရပါသည်။

DOCA(မန္တလေး)

     စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲ၊ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှုဌာနစု (လှည်းကူး)၏ ဓာတ်ခွဲခန်းများမှ ၂၀၂၄ ခုနှစ်၊ အောက်တိုဘာလအတွင်း လုပ်ငန်းရှင်ပေါင်း (၄၈)ဦးက အပ်နှံလာသော သီးနှံအမျိုးအစား(၁၈)မျိုး၊ စုစုပေါင်းနမူနာအရေအတွက် (၈၉) ခု၊ ဓာတ်ခွဲစမ်းသပ်မှုပေါင်း (၂၄၂) ခုကို ဓာတ်ခွဲစမ်းသပ်စစ်ဆေးခြင်းများ ဆောင်ရွက်နိုင်ခဲ့ပါသည်။

    ၂၀၂၄ ခုနှစ်၊ အောက်တိုဘာလအတွင်း လယ်ယာထွက်ကုန်ပို့ကုန်များအား စင်္ကာပူနှင့် ဂျပန်နိုင်ငံများသို့ တင်ပို့နိုင်ရေးအတွက် ဆန်ဖြူ၊ ပေါင်းဆန်၊ ဆန်ကွဲ၊ နှမ်းနက်သိပ္ပံ၊ ပဲတီစိမ်း၊ မြေထောက်ပဲ၊ ပဲလွန်း၊ ငရုတ်သီး၊ မှိုခြောက်၊ တိရစ္ဆာန်အစာ၊ ပဲပိစပ်စာ၊ ငါးစာတို့တွင် ဓာတုအရည်အသွေး၊ပိုးသတ်ဆေးကြွင်းပါရှိမှု၊မှိုဆိပ်ပါရှိမှုစသည့်ဓာတ်ခွဲစမ်းသပ်စစ်ဆေးခြင်းကိုလည်းကောင်း၊ အင်ဒိုနီးရှားနိုင်ငံနှင့် မလေးရှားနိုင်ငံတို့မှ တင်သွင်းလာသည့် စားအုန်းဆီများ၏ အရည်အသွေးများ ကိုလည်းကောင်း ဓာတ်ခွဲစမ်းသပ်ခြင်းများ ဆောင်ရွက်ခဲ့ပါသည်။

    ဓာတ်ခွဲခန်းအလိုက် ဓာတ်ခွဲစမ်းသပ်မှုအနေဖြင့် ပိုးသတ်ဆေးဓာတ်ကြွင်းဓာတ်ခွဲခန်းမှ ၃၈ ခု၊  မှိုဆိပ်ဓာတ်ခွဲခန်းမှ ၁၀ ခု၊ ဆီနှင့် ဆီထွက်သီးနှံဓာတ်ခွဲခန်းမှ ၁၆၁ ခု၊ သီးနှံဓာတုဓာတ်ခွဲ ခန်းမှ ၃၂ ခု၊ သီးနှံရူပဓာတ်ခွဲခန်းမှ  ၁ ခု၊ စုစုပေါင်းဓာတ်ခွဲစမ်းသပ်မှု ၂၄၂ ခု ဆောင်ရွက်နိုင်ခဲ့ပါသည်။

       မန္တလေးတိုင်းဒေသကြီး၊ ငါန်းဇွန်မြို့တွင် (၁၁-၁၁-၂၀၂၄)ရက်နေ့၊ နံနက် ၀၈:၀၀ နာရီအချိန်၌ မြို့နယ်စားသုံးသူရေးရာဦးစီးဌာနမှဦးဆောင်၍ ငါန်းဇွန်မြို့ မြို့မဈေးအတွင်း/ အပြင်ရှိ စားသုံးဆီ ရောင်းချသောဈေးဆိုင်များအား စားသုံးဆီများနှင့်ပတ်သက်၍ စားသုံးဆီအမျိုးမျိုးတွင် ကုန်အညွှန်းအမှတ်အသားပြည့်စုံစွာပါဝင်မှုရှိ/ မရှိ၊ ထုတ်ပြန်ထားသော ညွှန်ကြားချက်များနှင့်အညီ ကိုက်ညီမှုရှိ/မရှိ ကွင်းဆင်းစစ်ဆေးဆောင်ရွက်ခဲ့ပါသည်။

          ထိုသို့ကွင်းဆင်းဆောင်ရွက်မှုတွင် စားသုံးသူရေးရာဦးစီးဌာန၊ မြို့နယ်တာဝန်ခံနှင့် မြို့နယ်စည်ပင်သာယာရေးအဖွဲ့မှ ဝန်ထမ်းများ၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိနှင့် ဝန်ထမ်းများနှင့်အတူ ပူးပေါင်းဆောင်ရွက်ခဲ့ကြပါသည်။ စားသုံးဆီအမျိုးမျိုးမှာ နေ့စဉ်ချက်ပြုတ်စားသောက်မှုတွင် မပါမဖြစ်ထည့်သွင်းအသုံးပြုရသည့် ကုန်စည်ဖြစ်သည့်အတွက် သတ်မှတ်စံချိန်စံညွှန်းများနှင့် ကိုက်ညီမှုမရှိသောဆီများနှင့် ပြန်လည်သန့်စင်ထားသည့်ဆီများကို ဈေးကွက်အတွင်းရောင်းချပါက  စားသုံးသူများကို ဘေးန္တရာယ်ဖြစ်ပွားစေခြင်း၊ ဘေးန္တရာယ်ဖြစ်စေနိုင်သည့်ဆီများကို ရေရှည်စားသုံးမိပါက စားသုံးသူများအနေဖြင့် ကျန်းမာရေးဆိုင်ရာဆိုးကျိုးများဖြစ်ပွားလာနိုင်ကြောင်း၊ ပင်ရင်းပါဝင်ပစ္စည်းကိုအခြေခံသော ကုန်စည်၏အမျိုးအမည်ကို မြန်မာဘာသာဖြင့် တိကျစွာဖော်ပြစေခြင်းကို လိုက်နာဆောင်ရွက်မှုရှိ/ မရှိနှင့် စီးပွားရေးလုပ်ငန်းရှင်များအနေဖြင့် ကုန်စည်များထုတ်လုပ်၍ အရောင်းအဝယ်ပြုလုပ်ရာတွင် သက်ဆိုင်ရာဌာနများ၏ ဥပဒေများပါ ပြဋ္ဌာန်းချက်အတိုင်း လိုက်နာဆောင်ရွက်သွားကြရန်နှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များလိုက်နာရမည့်တာဝန်များ၊ တားမြစ်ချက်များ၊ ကုန်အညွှန်း အမှတ်အသားဖော်ပြခြင်းများနှင့်ပတ်သက်၍ ထပ်ဆင့်အသိပေးကာ ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြောင်းသိရှိရပါသည်။  

DOCA(မန္တလေး)