သတင်းနှင့် လှုပ်ရှားမှုများ

       ပဲခူးတိုင်းဒေသကြီး၊ ပြည်မြို့နယ်တွင် စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှုမြင့်မားတိုးတက်ရေး အလုပ်ရုံဆွေးနွေးပွဲများကို တစ်လလျှင် ကျေးရွာ(၁၀)ရွာရွေးချယ်ပြီး ထွေ/အုပ်၊ စိုက်ပျိုးရေး၊ တိမွေးကု၊ ဆည်မြောင်း၊ မြေစာရင်း၊ ကျေးလက်ဖွံ့ဖြိုးရေးဦးစီးဌာန၊ ကျေးလက်လမ်း ဦးစီးဌာန၊ ပညာရေး၊ ဥပဒေနှင့် စားသုံးသူရေးရာဦးစီးဌာနတို့ ပူးပေါင်း၍ လစဉ်ဆွေးနွေးပွဲများ ဆောင်ရွက်လျှက်ရှိရာ ၉.၁.၂၀၂၃ ရက်နေ့ နေ့လည် (၁၂:၀၀)နာရီအချိန် ၊ ပြည်မြို့နယ် သဲကုန်း အုပ်စု၊ ကုန်းသာကျေးရွာ ဘုန်းကြီးကျောင်း ဓမ္မရုံတွင် စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှု မြင့်မားတိုးတက်ရေး အလုပ်ရုံဆွေးနွေးပွဲ ကျင်းပခဲ့ကြောင်း သိရှိရပါသည်။

      ဆွေးနွေးပွဲတွင် တက်ရောက်လာသော ဌာနဆိုင်ရာများမှ တာဝန်ရှိသူများက သက်ဆိုင်ရာ ကဏ္ဍအလိုက် ဟောပြောခဲ့ကြသလို စားသုံးသူရေးရာဦးစီးဌာနမှ ပြည်မြို့နယ်ဦးစီးမှူး ဦးထွန်းနိုင် လင်းမှဌာန၏ စားသုံးသူကာကွယ်ရေးဥပဒေပါ ပြဌာန်းချက်များ စားသုံးသူအခွင့်အရေး နှင့် တာဝန်များ၊ ကုန်စည်/ဝန်ဆောင်မှုပေါ်တွင် စားသုံးသူကတောင်းဆိုနိုင်သည့် အခွင့်အရေးများ စားသုံးသူနစ်နာဆုံးရှုံးမှုအပေါ် အရေးဆိုတိုင်တန်းနိုင်သည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းဖွင့်လှစ်ဆောင်ရွက်နေမှု အခြေအနေများအား အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပဲခူး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရခိုင်ပြည်နယ် ၊ စားသုံးသူရေးရာဦးစီးဌာန၊ သံတွဲခရိုင်ဦးစီးမှူး၊ ဦးဝင်းနိုင်(ဦးစီးအရာရှိ)နှင့် ဝန်ထမ်းများသည် အစားအသောက်နှင့်ဆေးဝါးကွပ်ကဲရေးဦးစီးဌာန(FDA)နှင့် ပူးပေါင်း၍ သံတွဲမြို့၊ ငပလီ အ.ထ.က စာသင်ကျောင်း၌  (၁၁-၁-၂၀၂၃) ရက်နေ့၊ နံနက်(၁၀:၀၀) နာရီအချိန်တွင်  စားသုံးသူကာကွယ်ရေး အစားအသောက် ဘေးအန္တရာယ် ကင်းရှင်းရေးနှင့်ပတ်သက်၍ အသိပညာပေးဟောပြောပွဲ ကျင်းပပြုလုပ်ခဲ့ပါသည်။

     အဆိုပါ အသိပညာပေးဟောပြောပွဲတွင် သံတွဲမြို့၊ ငပလီ အ.ထ.က ကျောင်းအုပ် ဆရာမကြီး ဒေါ်စိုးစိုးထွန်းမှ ကျောင်းသား/သူများအား အစားအသောက်နှင့်ပတ်သက်၍ ဆောင်ရန်၊ ရှောင်ရန် စားသုံးသူကာကွယ်ရေးဆိုင်ရာကိစ္စများကို ဌာနမှ ပြောကြားချက်များအား ကြားနာ မှတ်သားစေရေး အဖွင့်အမှာစကားပြောကြားပြီး၊ အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ ဒေါ်ရတီဦး (ဒု-ကြီးကြပ်ရေးမှူး)က အစားအသောက်၊ ဆေးဝါးနှင့် အလှကုန်ပစ္စည်းများအား စားသုံးသူ ဘေးအန္တရာယ်ကင်းရှင်းစေရေးအတွက် ဓာတ်ခွဲစစ်ဆေးဆောင်ရွက်နေမှုများ၊ စားသုံးသူအန္တရာယ် ဖြစ်စေနိုင်သော ကြာရှည်အထားခံ ဆေးဝါးအသုံးပြုမှုအန္တရာယ်၊ ဓာတုဆိုးဆေးအန္တရာယ်၊ ဆေးသကြား အသုံးပြုမှုအန္တရာယ်၊ FDA ဌာန အကြောင်းသိကောင်းစရာများအား ရှင်းလင်းပြောကြားပြီး ဆက်လက်၍ စားသုံးသူရေးရာဦးစီးဌာန၊ သံတွဲခရိုင်ဦးစီးမှူး၊ ဦးဝင်းနိုင် (ဦးစီးအရာရှိ) မှ စားသုံးသူ ရေးရာဦးစီးဌာန၏ ရည်မှန်းချက်(Vision)၊ မျှော်မှန်းချက် (Mission) အနက်အဓိပ္ပာယ် ဖွင့်ဆိုချက်နှင့် ကျောင်းသား/သူများအနေဖြင့် စားသုံးသူများဝယ်ယူသုံးစွဲရာတွင် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ (၄၁) ဖော်ပြချက်နှင့် ကုန်စည် သို့မဟုတ် ဝန်ဆောင်မှုနှင့်ပတ်သက်၍ စားသုံးသူ အခွင့်အရေး(၈) ချက်၊ စားသုံးသူတာဝန် (၄) ချက်တို့အား အကျယ်တဝင့် ချပြရှင်းလင်း ပြောကြားခြင်း၊ စားသုံးသူများ နစ်နာဆုံးရှုံးမှုများဖြစ်ပေါ်လာပါက ဌာနတွင် ဖွင့်လှစ်ထားသည့် Consumer Information Complaint Center(CICC) ရုံးခန်းသို့ လာရောက်တိုင်ကြားနိုင်ကြောင်း၊ စားသုံးသူ ရေးရာဦးစီးဌာနအနေဖြင့် လုပ်ငန်းဆောင်ရွက်ချက်များအား လေ့လာရန်နှင့် တိုင်ကြားလိုပါက ဌာန၏ website ဖြစ်သည့် www.doca.gov.mm နှင့် DOCA  Myanmar Mobile Application တွင် ဝင်ရောက်လေ့လာ ကြည့်ရှုနိုင်ပြီး Consumer Call Center 1535 ကိုခေါ်ဆို၍လည်း မေးမြန်းတိုင်ကြားနိုင်ကြောင်း ဟောပြောဆွေးနွေးမှုပြုလုပ်ခဲ့ပြီး တက်ရောက်လာသည့် ကျောင်းသား/ သူများ၏ မေးမြန်းချက်များအား ပြန်လည်ရှင်းလင်းဖြေကြားကာ ကျောင်းစာကြည့်တိုက်သို့ စားသုံးသူကာကွယ်ရေးဥပဒေ စာအုပ်အား ပေးအပ်လှူဒါန်းခဲ့ပါကြောင်း သတင်းရရှိပါသည်။

DOCA(ရခိုင်)

စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ ဒုတိယပြည်နယ်ဦးစီးမှူးရုံးမှ စစ်ဆေး ရေးမှူးများနှင့် တာဝန်ရှိသူများသည် ၂၀၂၃ ခုနှစ် ဇန်နဝါရီလ (၁၂)ရက်နေ့ ၊ နံနက်(၁၀:၀၀)အချိန် တွင် ကျိုင်းတုံမြို့၊ ရပ်ကွက်(၃)အတွင်းရှိ အမဲခေါက်၊ ဝက်ခေါက်လုပ်ငန်းတို့ကို ထုတ်ကုန်များလုံခြုံ စိတ်ချရမှုရှိစေရန်အတွက် ကွင်းဆင်းစစ်ဆေးခြင်း ဆောင်ရွက်ခဲ့ပါသည်။
ထိုသို့စစ်ဆေးရာတွင် အင်းပန်အမှတ်တံဆိပ်(အမဲခေါက်၊ ဝက်ခေါက်)လုပ်ငန်းသည် စားသုံးသူကာကွယ်ရေး ဥပဒေအခန်း(၁၈)ပါ “ကုန်အညွှန်းအမှတ်အသားဖော်ပြခြင်း”နှင့် ပတ်သက်၍ ပြည့်စုံစွာဖော်ပြထားပြီး ထုတ်ကုန်များကိုလည်းသန့်ရှင်းသပ်ရပ်စွာ ထုတ်လုပ်ဖြန့်ချီသည်ကို စစ်ဆေး တွေ့ရှိရပါသည်။ ထို့နောက် စစ်ဆေးရေးမှူးနှင့် တာဝန်ရှိသူများသည် အင်းပန်အမှတ်တံဆိပ် လုပ်ငန်းရှင်ကို စားသုံးသူဘေးအန္တရာယ်ကင်းရှင်းစေရေး အလေးထားဆောင်ရွက်ရန်၊ ကုန်ကြမ်းများ စနစ်တကျ သိုလှောင်ရန်နှင့် စားသုံးသူကာကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏ တာဝန်များ”ကို လိုက်နာဆောင်ရွက်ရန် ဆွေးနွေးခဲ့ကြပါသည်။
DOCA(ရှမ်း)

ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးဘောမ်ဇုန်း(ရုံးအုပ်) သည် ၁၂.၁.၂၀၂၃ ရက်နေ့(၁၀:၃၀)နာရီမှ (၁၁:၃၀)နာရီအချိန်ထိ မြစ်ကြီးနားမြို့၊ သီတာရပ်ကွက်ရှိ အမှတ်(၁၁)အခြေခံပညာမူလတန်းစာသင်ကျောင်းတွင် ဆရာ၊ဆရာမများနှင့် ကျောင်းသား၊ကျောင်းသူ များအား စားသုံးသူကာကွယ်ရေးဆိုင်ရာ အသိပညာပေးဟောပြောပွဲဆောင်ရွက်ခဲ့ပါသည်။
အဆိုပါဟောပြောရာတွင် ဦးဘောမ်ဇုန်း(ရုံးအုပ်)မှ စားသုံးသူကာကွယ်ရေးပေါ်ပေါက်လာပုံ သမိုင်းကြောင်းနှင့်စားသုံးသူ၏အဓိပ္ပါယ်ဖွင့်ဆိုချက်၊စားသုံးသူအခွင့်အရေး(၈)ချက်ဖြစ်သည့်စိတ်ကြိက် ရွေးချယ်ခွင့်၊ ဘေးအန္တရာယ်ကင်းရှင်းစွာသုံးစွဲခွင့်၊ မှန်ကန်သော သတင်းအချက်အလက်များရရှိခွင့်၊ အခြေခံလိုအပ်ချက်များကို စိတ်ကျေနပ်မှုရရှိခွင့်၊ နစ်နာဆုံးရှုံးမှုများကိုတိုင်ကြားခွင့်၊ နစ်နာဆုံးရှုံးမှုများ နှင့်စပ်လျဉ်း၍ပါဝင်ကြားနာခွင့်၊ အသိပညာဗဟုသုတများ၊ အခွင့်အရေးများနှင့် လိုအပ်သော အချက် အလက်များသိရှိလေ့လာနိုင်ခွင့်၊ ကျန်းမာဝပြောသည့် ပတ်ဝန်းကျင်ကောင်းတွင် ရှင်သန်နိုင်ခွင့်တို့ကို ရှင်းလင်းဟောပြောခြင်း၊ ကျောင်းသား၊ကျောင်းသူများသည် အသင့်စားအစားအစာများကို ဝယ်ယူ အသုံးပြုရာတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားသည့် အစားအစာများကို ရွေးချယ်ဝယ်ယူအသုံးပြုရန် နမူနာပစ္စည်းများဖြင့်ရှင်းလင်းခြင်း၊ သက်တမ်းကုန်ဆုံးရက်စွဲများ သေချာ သိရှိနားလည်စေရန် ပုံစံနမူနာပြသ၍ အပြန်အလှန်မေးမြန်းခြင်းတို့ကို အသိပညာ‌ပေးဟောပြောခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များနှင့် ထုတ်ကုန်လုံခြုံစိတ်ချရမှုရှိသော အသင့်စားမုန့်ထုတ်များကို ဖြန့်ဝေခဲ့ပါသည်။ အသိပညာပေးဟောပြောပွဲသို့ ဆရာ၊ဆရာမ (၇)ဦး နှင့် ကျောင်းသား၊ကျောင်းသူ (၁၂၈)ဦး ၊ စုစုပေါင်း (၁၃၅)ဦး တက်ရောက်ခဲ့ပါသည်။
DOCA(ကချင်)

ကျောက်ဆည်ခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးဦးဆောင်သော စစ်ဆေးရေး အရာရှိများသည် မြို့နယ်စိုက်ပျိုးရေးဦးစီးဌာနနှင့် ပူးပေါင်း၍ ကျောက်ဆည်ခရိုင် ဦးစီးမှူးရုံး လက်အောက်မြို့နယ်များရှိ စိုက်ပျိုးရေးသုံးပစ္စည်းအရောင်းဆိုင်များအား စျေးကွက်စောင့်ကြည့် စစ်ဆေးခဲ့ပါသည်။ထိုသို့ စစ်ဆေးရာတွင် ကျောက်ဆည်ခရိုင်စားသုံးသူရေးရာဦးစီးဌာန၊ ခရိုင်ဦးစီးမှူးက စျေးနှုန်းသက်သာသော အရည်အသွေးနိမ့်မြေသြဇာများကို ထိုင်းနိုင်ငံပြည်တွင်းသုံး မြင်းပျံအိတ်ခွံ များဖြင့် ပြန်လည်ထုပ်ပိုးပြီး အိုင်စီပီမြင်းပျံ မြေသြဇာအတုများ ပြုလုပ်လျက် စျေးကွက်ထဲတွင် လိမ်လည်ဖြန့်ဖြူးရောင်းချနေကြောင်း ICP Shwe Me Fertilizer Co.,Ltd မှ တိုင်ကြားလာမှုအရ လာရောက်ရခြင်းဖြစ်ကြောင်း ၊ မြေသြဇာအိတ်များအား ရောင်းချရာတွင် မြန်မာဘာသာဖြင့်ဖော်ပြထားသော ကုန်အညွှန်းအမှတ်အသားပါရှိသည့် မြေသြဇာများသာ ရောင်းချရန်လိုအပ်ကြောင်း ၊မြင်းပျံအမှတ်တံဆိပ်မြေသြဇာနှင့် ပတ်သက်၍ ICP Shwe Me Fertilizer Co.,Ltd မှ မြင်းပျံ အမှတ်တံဆိပ်မြေသြဇာများအား ရောင်းချရာတွင် ဆင်တူရိုးမှား အတုအပသတိထားနိုင်ရန်အတွက် မြင်းပျံမြေသြဇာ(အစစ်)အိတ်တွင် ပါဝင်သည့်အချက်များနှင့် မြင်းပျံမြေသြဇာ(အတု)အိတ်များတွင်ပါဝင်သည့်အချက်များအား ရှင်းလင်းပြောကြားခဲ့ပါသည်။ ကျောက်ဆည်ခရိုင်အတွင်းရှိ စိုက်ပျိုးရေးသုံး ပစ္စည်းအရောင်းဆိုင်များအား စျေးကွက်စောင့်ကြည့်စစ်ဆေးရာတွင် ( ၃-၁-၂၀၂၃ )ရက်နေ့၌ ကျောက်ဆည်မြို့ပေါ်ရှိ မြေသြဇာအရောင်းဆိုင်(၈)ဆိုင်နှင့် မတ္တရာမြို့နယ်ရှိ မြေသြဇာ အရောင်းဆိုင် (၆)ဆိုင်အားလည်းကောင်း ၊ (၆-၁-၂၀၂၃)ရက်နေ့တွင် မြစ်သားမြို့နယ်ရှိ မြေသြဇာအရောင်းဆိုင် (၆)ဆိုင်အား လည်းကောင်း ၊ (၉-၁-၂၀၂၃)ရက်နေ့တွင် စဉ့်ကိုင်မြို့နယ်ရှိ မြေသြဇာအရောင်းဆိုင် (၄)ဆိုင်နှင့်တံတားဦးမြို့နယ်ရှိ မြေသြဇာအရောင်းဆိုင်(၂)ဆိုင်အား စျေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။
DOCA(မန္တလေး)