သတင်းနှင့် လှုပ်ရှားမှုများ

        စားသုံးသူရေးရာဦးစီးဌာနအနေဖြင့် စားသုံးသူအခွင့်အရေးနှင့် စားသုံးသူအကျိုးစီးပွား ကာကွယ်ရေးဆောင်ရွက်ရန်၊ ထုတ်ကုန်လုံခြုံစိတ်ချရမှုရှိစေရေး ဆောင်ရွက်ရန်၊ ကုန်စည်နှင့် ဝန်ဆောင် မှုများ၏ အရည်အသွေးစီမံခန့်ခွဲမှုနှင့် သုတေသနလုပ်ငန်းများဆောင်ရွက်ရန် ရည်ရွယ်၍ စားသုံးသူပြည်သူများကို အသိပညာပေးခြင်းလုပ်ငန်းများ ဆောင်ရွက်လျက်ရှိရာ မြောင်းမြခရိုင်ဦးစီးမှူးရုံးအနေဖြင့် ၂၀၂၁ခုနှစ်၊ နိုဝင်ဘာလအတွင်း အိမ်မဲမြို့နယ်၊ အထက်ပိုင်းရပ်ကွက်ရှိ မုန့်မျိုးစုံဆိုင်များရှိ အညာသားမြေပဲကြွပ်၊ မော်ကျွန်းမြို့နယ်၊ ဆိပ်ကမ်းသာဈေးရှိ ယိုးဒယားမယ်အကြော်မှုန့်ထုပ်များ၊ ဝါးခယ်မမြို့နယ်၊ မြို့မဈေး အတွင်းရှိ ဦးဦးခေါက်ဆွဲခြောက်ထုပ်များ၊ မြောင်းမြမြို့နယ်၊ အမှတ် (၉) ရပ်ကွက်ရှိ ပြည့်ဝ ပူတင်းပေါင်မုန့်များတွင် ကုန်အညွှန်းအမှတ်အသား ဖော်ပြထားခြင်းရှိ/မရှိ နယ်မြေဈေးကွက်စောင့်ကြည့် စစ်ဆေးခဲ့ပါသည်။

        ကုန်အညွှန်းအမှတ်အသားပြည့်စုံခြင်းမရှိသည့် ကုန်စည်များကို မြို့နယ်စည်ပင်နှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာ ဖော်ပြထားခြင်း မရှိသည့် ပဲမုန့်များ၊ ဘီစကစ်မုန့်ထုပ်များ၊ ကွတ်ကီးမုန့်ဗူးများ၊ ဘီစကစ်မုန့်ထုပ်များ၊ ဂျယ်ရီထုပ်များကို စစ်ဆေးတွေ့ရှိရ၍ သတိပေး အရေးယူခြင်းများ ဆောင်ရွက်ခဲ့ပါသည်။ အသေးစား၊ အလတ်စား စက်ရုံ/ အလုပ်ရုံများတွင် ဈေးကွက်ဈေးနှုန်း အခြေအနေနှင့် ကုန် အညွှန်းအမှတ်အသားပြည့်စုံစွာဖော်ပြနိုင်ရေးအတွက် (၅.၁၂.၂၀၂၁) ရက်နေ့တွင် မော်ကျွန်းမြို့နယ်၊ လပြည့်ဝန်းမုန့်လုပ်ငန်းသို့လည်းကောင်း၊ (၆.၁၂.၂၀၂၁) ရက်နေ့တွင် အိမ်မဲမြို့နယ်၊ ပဲရစ်မုန့်လုပ်ငန်း၊ လပွတ္တာမြို့နယ်၊ မိသားစုမုန့်လုပ်ငန်း၊ ဝါးခယ်မမြို့နယ်၊ စိုးရတနာဆန်စက်၊ မြောင်းမြမြို့နယ် ပြည့်ဝ မုန့်လုပ်ငန်းများသို့လည်းကောင်း သွားရောက်ဆွေးနွေးခဲ့ပါသည်။ မြောင်းမြခရိုင်အတွင်းရှိ မြို့နယ်များအလိုက် စားသုံးသူကာကွယ်ရေးလုပ်ငန်းများကို အရှိန်အဟုန်မြှင့်တင်ဆောင်ရွက်လျှက်ရှိပြီး စားသုံးသူအသိပညာပေးလုပ်ငန်းများကို ဆက်လက် ဆောင်ရွက်သွားရန် စီစဉ်ထားရှိကြောင်း သတင်းရရှိပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

      ဧရာဝတီတိုင်းဒေသကြီး၊ ပုသိမ်ခရိုင်အတွင်းရှိ မြို့နယ်များတွင် စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေးဆောင်ရွက်ရန်၊ ထုတ်ကုန်လုံခြုံစိတ်ချရမှုရှိစေရေးဆောင်ရွက်ရန်၊ ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့်သုတေသနလုပ်ငန်းများဆောင်ရွက်ရန်ရည်ရွယ်၍ မြို့နယ်တာဝန်ခံနှင့်အဖွဲ့သည် သာပေါင်းမြို့နယ်၊ အမှတ် (၂) ရပ်ကွက်၊ ကုန်စုံဆိုင်များတွင် ရွေကသစ်သောက်ရေသန့်အား ကုန်အညွှန်းအမှတ်အသား ပြည့်စုံမှု ဖော်ပြထားမှုရှိ/မရှိ (၆.၁၂.၂၀၂၁) ရက်နေ့တွင် ကွင်းဆင်းစစ်ဆေးဆောင်ရွက်ခဲ့ပါသည်။ ထို့နောက် သာပေါင်းမြို့နယ်၊ လှေကြီးတက်ကျေးရွာ၊ သီဟိုဠ်လုပ်ငန်းရှင်အသင်းရုံးတွင် သီဟိုဠ်လုပ်ငန်းရှင်များအား အထွက် နှုန်းကောင်းမွန်စေရေး၊ ဈေးနှုန်းမှန်ကန်စေရေး တွေ့ဆုံဆွေးနွေး ဆောင်ရွက်ခဲ့ပြီးနောက် ကျောင်းကုန်းမြို့နယ်၊ မြို့နယ်အထွေထွေအုပ်ချုပ်ရေးမှူးရုံးတွင် ဆေးဆိုင်ပိုင်ရှင်များနှင့်တွေ့ဆုံ၍ ဈေးနှုန်းမှန်ကန်စေရေး၊ သက်တမ်းလွန်ဆေးဝါးများ ရောင်းချခြင်း မပြုရန် တိုက်တွန်းဆွေးနွေးခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

       စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ တာဝန်ရှိသူများသည် မြို့နယ်အထွေထွေအုပ်ချုပ်ရေး ဦးစီးဌာန၊ စည်ပင်သာယာရေးဦးစီးဌာန၊ မြို့နယ်မီးသတ်ဦးစီးဌာနတို့နှင့် ပူးပေါင်း၍ ၆.၁၂.၂၀၂၁ ရက်နေ့ နံနက်(၁၀:၀၀)နာရီတွင် ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်၊ မဲဇလီကျေးရွာ ကာလမ်းဘေးရှိ Kyaw San(023) စက်သုံးဆီအရောင်းဆိုင်များသို့သွားရောက် ကွင်းဆင်းစစ်ဆေးခဲ့ပါသည်။ အဆိုပါကွင်းဆင်းစစ်ဆေးဆောင်ရွက်မှုတွင် အရောင်းဆိုင်များ၌ (၂၀လီတာ) စံကွက်များနှင့်အညီ ကိုက်ညီစွာ ရောင်းချမှုရှိမရှိ ရောင်းဝယ်မှုအခြေအနေများအား တွေ့ဆုံမေးမြန်း စစ်ဆေးကြပ်မတ် ဆောင်ရွက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်တာဝန်ခံ ဦးမြတ်မင်းနှင့်အဖွဲ့သည် (၄.၁၂.၂၀၂၁)ရက်နေ့ (၁၀:၀၀)နာရီအချိန်တွင် ရေစကြိုမြို့နယ် စည်သာ ကျေးရွာရှိ ဝါသီးနှံစိုက်ပျိုးထုတ်လုပ်နေသည့် တောင်သူဦးထွန်းခိုင်၏ဝါစိုက်ခင်းသို့သွားရောက်၍ ဝါသီးနှံများစိုက်ပျိုးထုတ်လုပ်မှုအခြေအနေကို လေ့လာခဲ့ရာ စည်သာကျေးရွာတွင် ဝါစိုက်ဧကမှာ (၇၀)ဧကခန့်ရှိကြောင်း၊ မျိုးများမှာ ဒေသမျိုး ငွေချည်-၉၊ ငွေတောင်-၁၁၊ ကမ္ဘောဇမျိုးများအပြင် ရာကာ (၆၆၆)မျိုး ကိုလည်း စိုက်ပျိုးကြကြောင်း ဝါသီးနှံကို ဩဂုတ်လ၊ စက်တင်ဘာလတွင် စတင် စိုက်ပျိုးကြပြီး ရာကာ(၆၆၆)မျိုးမှာ သက်တမ်းငယ်သဖြင့် နိုဝင်ဘာလတွင် စတင်ခူးဆွတ်ရနိုင် ကြောင်း၊ ဒေသမျိုးများမှာ ဒီဇင်ဘာလမှ စတင်ခူးဆွတ်နိုင်မည်ဖြစ်ကြောင်း သိရှိရပါသည်။ ဒေသမျိုးများဖြစ်သည့် ငွေချည်-၉၊ ငွေတောင်-၁၁နှင့် ကမ္ဘောဇမျိုးများမှာ အပွင့်၊ အသီးသေးပြီး အသီးနည်းသဖြင့် ဝါကောက်ရာတွင် အချိန်ပေးရသလောက် ဝါအရနည်းကြောင်း၊ ရာကာ(၆၆၆)မျိုး မှာ အပွင့်၊ အသီးကြီးပြီး အသီးစိပ်သဖြင့်ဝါကောက်ရာတွင် အချိန်တိုအတွင်း ဝါ အရများကြောင်း၊ ဝါ သီးနှံ(၁)ဧကကို ဒေသမျိုး ပိဿာ(၃၀၀)ခန့် ထွက်လျှင် ရာကာ(၆၆၆)မျိုးက ပိဿာ(၃၅၀)ခန့် ထွက် ရှိကြောင်း၊ ရာကာ(၆၆၆)မျိုးသည် မိမိတို့ကျေးရွာမြေအနေအထားနှင့်လည်း ကိုက်ညီကြောင်း၊ဒေသ မျိုးထက် တွက်ခြေကိုက်ကြောင်း၊ ဒေသမျိုး(၂)ဧကနှင့် ရာကာ(၆၆၆)မျိုး (၅)ဧကခန့် စိုက်ပျိုးထား ကြောင်း၊ စိုက်ပျိုးပြီးအပင်သက်တမ်း(၁)လခွဲတွင် မြေဆီအာမိုအနီကွန်ပေါင်းကို (၁)ပင်လျှင် လက်ဖက်စားဇွန်း (၁)ဇွန်းခန့် ကျွေးပေးရကြောင်း စိုက်ပျိုးပြီးသက်တမ်း (၃)လဆိုလျှင် ဝါစတင် ကောက်ရပါကြောင်း၊ စိုက်ပျိုးပြီးသည့်အချိန်မှ ရိတ်သိမ်းချိန်ထိ (၁၀)ကြိမ်ခန့် ဝါကောက်ရကြောင်း၊ သိရှိရပါသည်။ ရာကာ(၆၆၆)မျိုး၏ (၁)ဧကခန့်မှန်းကုန်ကျစရိတ်မှာ (၁၈၀၀၀၀/-)ကျပ်ခန့် ကုန်ကျပါ ကြောင်း၊ ရာကာ(၆၆၆)မျိုးစေ့ (၄၅၀)ဂရမ် (၁)ထုပ်ကို (၂၉၀၀၀/-)ကျပ်ပေးရပါကြောင်း၊ ထွန်စက်ခ (၁)နာရီလျှင်(၃၀၀၀၀/-)ကျပ်၊ နွားတစ်ရှဉ်းတစ်မနက်လျှင် (၁၀၀၀၀/-)ကျပ်၊ စိုက်ခ၊ကောက်ခ လူတစ်ဦးလျှင် တစ်မနက်လုပ်အားခ(၂၀၀၀/-)ကျပ်ပေးရပါကြောင်း ၊ မြေ(၁)ဧကဆိုလျှင် ထွန်စက် ဖြင့်(၂)နာရီမြေပြုပြင်ရပြီး စိုက်ကြောင်းဆွဲရပါကြောင်း၊ ယခုဝါ(၁)ပိဿာပေါက်ဈေးနှုန်းမှာ ကျေးရွာ အထိုင်ဈေး(၁၂၀၀/-)ကျပ် ရရှိပါကြောင်း၊ ပခုက္ကူမြို့သို့သွားရောက်ရောင်းချလျှင် ရာကာ(၆၆၆)မျိုး ဆိုလျှင်(၁) ပိဿာ(၁၄၀၀/-)ကျပ်ရရှိပြီး ကားခမှာ(၁)ပိဿာလျှင်(၃၀/-)ကျပ်ပေးရကြောင်း၊ ဝါရောင်းချရာတွင် ပွဲခပေးစရာမလိုသဖြင့် တောင်သူများအတွက် ပို၍အဆင်ပြေကြောင်း၊ ဝါသီးနှံ သည် အခြားသီးနှံများလို ခူးဆွတ်ပြီးချိန်တွင်လည်း တလင်းမလို၊ ချွေလှေ့နေလှန်းစရာမလို၊ အပင်မှ ခူးဆွတ်ပြီးပါက ဈေးကွက်သို့ တိုက်ရိုက်ရောင်းချနိုင်သည့်အတွက် တောင်သူများ ပိုမိုတွက်ခြေကိုက်ကြောင်းလေ့လာသိရှိရပါသည်။

        ဝါသီးနှံသည် မိုးကောင်းသောနှစ်များတွင် ပိုမိုထွက်ရှိပါကြောင်း၊ သွင်းအားစုဖြစ်သည့် မြေဩဇာနှင့်ပိုးသတ်ဆေးများ စနစ်တကျသုံးစွဲမည်ဆိုလျှင် ပိုမိုထွက်ရှိနိုင်ပါကြောင်း၊ အခြားသီးနှံများကဲ့သို့ အလုပ်မရှုပ်ဘဲ သက်သာသောကြောင့် တောင်သူများ ပိုမိုစိုက်ပျိုးသင့်ပါကြောင်း၊ သိရှိခဲ့ရ ပါသည်။ ဝါသီးနှံ(၁)ဧက စိုက်ပျိုးမည်ဆိုလျှင် ပျှမ်းမျှကုန်ကျစရိတ်မှာ (၁၈၀၀၀၀/-)ကျပ်ခန့် ဖြစ်ပြီး၊ (၁)ဧကဝါအထွက် ပိဿာ(၃၀၀)ထွက်ရှိလျှင် (၁)ပိဿာဈေးနှုန်းမှာ (၁၂၀၀/-) ကျပ်ဖြစ်သည့်အတွက် (၃၆၀၀၀၀/-)ကျပ် ရရှိသဖြင့် ပျှမ်းမျှအကျိုးအမြတ်မှာ (၁၈၀၀၀၀/-)ကျပ်ခန့် ဖြစ်ပါကြောင်း လေ့လာမိသမျှ တင်ပြလိုက်ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

            စားသုံးသူရေးရာဦးစီးဌာန၏ www. doca. gov. mm website တွင် သတင်း/ဆောင်းပါးများ ရေးသားခြင်းဆိုင်ရာ ညှိနှိုင်းဆွေးနွေးပွဲကို ၈-၁၂-၂၀၂၁ ရက်နေ့၊ နေ့လယ် ၁:၀၀ နာရီတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရုံးမှတ်(၅၂) အစည်းအဝေးခန်းမ၌ Virtual Meeting ဖြင့် ကျင်းပပြုလုပ်ခဲ့ပါသည်။

        အဆိုပါ အစည်းအဝေးသို့ စားသုံးသူ‌ရေးရာဦးစီးဌာနမှ ဒုတိယညွှန်ကြားရေးမှူးချုပ်၊ စားသုံးသူရေးရာဦးစီးဌာန(ရုံးချုပ်) ဌာနခွဲများမှ တာဝန်ရှိသူများ၊ တိုင်းဒေသကြီး/ပြည်နယ်ဦးစီးမှူးရုံးများနှင့် ခရိုင်ဦးစီးမှူးရုံးအသီးသီးမှ အရာထမ်း၊ အမှုထမ်းများ စုစုပေါင်း(၂၄၀)ဦး တက်ရောက်ခဲ့ပါသည်။ ဆွေးနွေးပွဲတွင် စားသုံးသူ‌ရေးရာဦးစီးဌာနမှ ဒုတိယညွှန်ကြားရေးမှူးချုပ်က www. doca. gov. mm website တွင် သတင်းများ အချိန်နှင့်တပြေးညီ ပုံမှန် တင်ပြနိုင်ရန်အတွက် သတင်းလွှင့်တင်ရေးစီမံချက်ရေးဆွဲခဲ့ပြီး သတင်း/ဆောင်းပါးများ ဖော်ပြနိုင်ရေး ဆောင်ရွက်လျက်ပါကြောင်း၊ ၂၀၂၁ ခုနှစ် ဇန်နဝါရီလမှ နိုဝင်ဘာလအထိ ရုံးချုပ် ဌာနခွဲများနှင့် တိုင်းဒေသကြီး/ပြည်နယ်များမှ သတင်း/ဆောင်းပါး(၇၀၀)ခန့် လွှင့်တင်နိုင်ခဲ့ပါကြောင်း၊ သတင်း/ ဆောင်းပါးများ ရေးသားရာတွင် လိုက်နာရမည့်၊ ပါဝင်ရမည့်အချက်များကို အလေးထားရေးသား စေလိုပါကြောင်း၊ တိုင်းဒေသကြီး/ပြည်နယ်များတွင် သတင်း/ဆောင်းပါး ရေးသားရေးအဖွဲ့များ ဖွဲ့စည်း၍ စနစ်တကျဆောင်ရွက်သင့်ပါကြောင်း ဆွေးနွေးပြောကြားခဲ့ပါသည်။ ထို့နောက် သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲမှ ညွှန်ကြားရေးမှူးက www. doca. gov. mm website တွင် သတင်း/ဆောင်းပါးများ လွှင့်တင်ထားမှု အခြေအနေများ၊ သတင်း/ဆောင်းပါးများရေးသားရာတွင် လိုက်နာကျင့်သုံးရမည့်အချက်များနှင့် သတင်းများ ပုံမှန်ရေးသားပေးပို့တင်ပြနိုင်ရေးတို့နှင့် ပတ်သက်၍ ဆွေးနွေးပြောကြားခဲ့ပါသည်။ ဆက်လက်၍ ဒုတိယညွှန်ကြားရေးမှူးချုပ်က ယခုဆွေးနွေးပွဲသည် စားသုံးသူရေးရာဦးစီးဌာန Website တွင် သတင်းရေးသားဖော်ပြခြင်းနှင့်ပတ်သက်၍ ပထမအကြိမ်တွေ့ဆုံဆွေးနွေးခြင်းဖြစ်ပါကြောင်း၊ သတင်း/ဆောင်းပါးရေးသားရေးအဖွဲ့ကို စနစ်တကျဖွဲ့စည်းပြီး ပြန်လည်တင်ပြရန်လိုအပ်ပါကြောင်း၊ အစည်းအဝေးများအားပုံမှန် ကျင်းပ၍ ဌာန၏ လုပ်ငန်းဆောင်ရွက်ချက်များကို အများပြည်သူသို့ ထိရောက်စွာ သတင်းပေး နိုင်ရေးဆောင်ရွက်ကြရန်လိုအပ်ကြောင်း ပြောကြားခဲ့ပြီး ဆွေးနွေးပွဲအား နေ့လယ်(၂း၃၀)တွင် ရုပ်သိမ်းခဲ့ကြောင်းသတင်းရရှိပါသည်။

ITQM စားသုံးသူရေးရာဦးစီးဌာန