သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်ဦးစီးမှူးရုံးမှ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် တိုင်းဒေသကြီး FDA၊ မြန်မာနိုင်ငံရဲတပ်ဖွဲ၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့ တို့နှင့်အတူ (၆.၃.၂၀၂၃) ရက်နေ့တွင် နံနက် (၁၀:၀၀) မှ (၁၂:၁၅) နာရီအချိန်အထိ မြို့နယ်ကျန်းမာရေးဦးစီးဌာနရုံးခန်းမ၌ ညောင်တုန်းမြို့ပေါ် ဆေးဆိုင်ရောင်းချသူများအား စားသုံးသူကာကွယ်ရေး အသိပညာပေးဆွေးနွေးမှု ပြုလုပ်ခဲ့ကြပါသည်။

         အဆိုပါဆွေးနွေးပွဲတွင် အစားအသောက်နှင့် ဆေးဝါးကွပ်ကဲရေးဦးစီးဌာနက တာဝန်ရှိသူက အဖွင့်အမှာစကား ပြောကြားပြီးနောက် တားမြစ်ကုန်စည်ဆေးဝါးများကို ဈေးကွက်အတွင်းရောင်းချခြင်း၊ သိုလှောင်ဖြန့်ဖြူးခြင်းမပြုရန်နှင့် ဆေးဆိုင်ရောင်းချသောလုပ်ငန်းရှင်များအနေဖြင့် ဆေးဝါးအကြောင်းနားလည်အောင်လေ့လာထားရန်၊ မိမိလုပ်သော လုပ်ငန်းအကြောင်းကို လက်လှမ်းမှီသလောက် ဖတ်ရ၊မှတ်ရ၊ လေ့လာရ၊ သင်ယူရမည်ဖြစ်ကြောင်း ဈေးဝါးကျွမ်းကျင်အကူသင်တန်းများလည်း တက်ရောက်ရန် လိုအပ်ပါကြောင်း၊ ဌာနတို့မှ ထုတ်ပြန်လျက်ရှိသော လမ်းညွှန်ချက်များကိုလည်း အမြဲမပြတ် လေ့လာထားရမည်ဖြစ်ပါကြောင်းနှင့်  ကျန်းမာရေးဦးစီးဌာနကလည်း စံမမီဆေးဝါးများရောင်းချခြင်း၊ ဖြန့်ဖြူးခြင်းကိစ္စနှင့်ပတ်သက်၍ ဟောပြောဆွေးနွေးခဲ့ကြပါကြောင်း သိရှိရပါသည်။

         စားသုံးသူရေးရာဦးစီးဌာနက ဆွေးနွေးဟောပြောရာတွင် မိမိတို့ဖြန့်ဖြူးရောင်းချနေသော ဆေးဝါးများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့် ပတ်သက်၍ စီးပွားရေး လုပ်ငန်းရှင်များအနေဖြင့် မိမိတို့ ထုတ်လုပ်၊ တင်သွင်း၊ ဖြန့်ဖြူးရောင်းချသောကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခုထက်ပို၍တွဲလျက်ဖြစ်စေ ဖော်ပြရမည့်အချက်များအကြောင်း ရှင်းလင်းပြီးနောက် စားသုံးသူပြည်သူများ သောက်သုံးရန်မသင့်သော တားမြစ်ဆေးများ၊ သက်တမ်းလွန်ဆေးများ၊ စပ်ဆေးများ ရောင်းချခြင်းမပြုရန်နှင့် စီးပွားရေးလုပ်ငန်းရှင်လိုက်နာရမည့်တာဝန်များ၊ ကုန်စည်နှင့်စပ်လျဉ်း၍ အာမခံပေးနိုင်မှု၊ စားသုံးသူကာကွယ်ရေးဥပဒေ၏ ပြစ်မှု၊ ပြစ်ဒဏ်များအကြောင်းကို သိရှိနားလည်ရန် အကျယ်တဝင့်ရှင်းလင်း ဆွေးနွေးခဲ့မှုအား ဆေးဆိုင်လုပ်ငန်းရှင်များက သိရှိလိုသည်များမေးမြန်းမှုကို ပြန်လည်ဖြေကြားဆွေးနွေးခဲ့၍ လုပ်ငန်းရှင်(၂၁)ဦးတက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

    စားသုံးဆီများသတ်မှတ်အရည်အသွေး၊ စံချိန်စံညွှန်းများနှင့်ပြည့်မီစေရေး ၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများကို သုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူသုံးစွဲနိုင်စေရေးတို့အတွက်  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊  စားသုံးဆီတင်သွင်းသို လှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ ကြီးကြပ်မှုဖြင့် ပြည်ပမှတင်သွင်းလာသည့် စားအုန်းဆီများအား  စားသုံးဆီတင်သွင်းသည့်ကုမ္ပဏီများမှ  သတ်မှတ်ရည်ညွှန်းဈေးနှုန်းဖြင့် လက်ကားကုန်သည်များကို  ဖြန့်ဖြူးရောင်းချပေးစေခဲ့ရာ အဆိုပါစားအုန်းဆီများကို မန္တလေးတိုင်းဒေသကြီး၊ ညောင်ဦးခရိုင်၊  ကျောက်ပန်းတောင်းမြို့နယ်  ဆီကုန်သည်နှင့်ဆီလုပ်ငန်းရှင်ကြီးများအသင်းမှ  သတ်မှတ် ရည်ညွှန်းဈေးနှုန်းများဖြင့်   ဝယ်ယူ၍ မြို့နယ်အတွင်းနေ   စားသုံးသူပြည်သူများ ဈေးနှုန်းသက်သာစွာဝယ်ယူနိုင်ရေးအတွက်  စားသုံးဆီတစ်ပိဿာလျှင်(၅၀၀၀)ကျပ်နှုန်းဖြင့်  ရပ်ကွက်ကျေးရွာများသို့ Mobile စနစ်ဖြင့် လှည့်လည်၍ ရောင်းချပေးခဲ့ပြီး (၃.၃.၂၀၂၃)ရက်နေ့တွင် အိမ်ထောင်စု တစ်စုလျှင်(၁) ပိဿာနှုန်းဖြင့် စားအုန်းဆီ(၉၉၀)ပိဿာအား ရောင်းချပေးခဲ့ပြီးဖြစ်ပါကြောင်း၊ ယခုလို စားသုံးဆီလှည့်လည်ရောင်းချမှုအား စားသုံးသူရေးရာဦးစီးဌာန၊ ညောင်ဦးခရိုင်၊ခရိုင်ဦးစီးမှူးနှင့် တာဝန်ရှိသူများ၊ စားသုံးသူရေးရာဦးစီးဌာန၊ ကျောက်ပန်းတောင်းမြို့နယ်တာဝန်ခံနှင့် တာဝန်ရှိသူများက ကွင်းဆင်းကြီးကြပ်၍ လိုအပ်သည်များကို သက်ဆိုင်ရာရပ်ကွက်ကျေးရွာအုပ်စု အုပ်ချုပ်ရေးမှူးများ၊ ရပ်မိရပ်ဖများနှင့် ညှိနှိုင်းဆောင်ရွက်ပေးလျက်ရှိပါသည်။ ဆက်လက်၍လည်း ကျောက်ပန်းတောင်း မြို့နယ်အတွင်းရှိ ကျန်ရှိနေသေးသောရပ်ကွက်၊ ကျေးရွာများသို့ မြို့နယ်အတွက် ရည်ညွှန်းဈေးဖြင့် ရရှိသော စားအုန်းဆီများကို မြို့နယ်ဆီကုန်သည်နှင့် ဆီလုပ်ငန်းရှင်ကြီးများအသင်းဥက္ကဌ  ဦးဆောင်၍ ယခုလို Mobile စနစ်ဖြင့်  လှည့်လည်ရောင်းချပေးသွားမည် ဖြစ်ပါကြောင်း မြို့နယ်ဆီကုန်သည်နှင့် ဆီလုပ်ငန်းရှင်ကြီးများအသင်း ဥက္ကဌထံမှ သတင်းရရှိပါသည်။

DOCA(မန္တလေး)

         ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်၊ ဦးစီးမှူးရုံးမှ ဦးပိုးဖြူပိုင်မင်းနှင့်ဝန်ထမ်းများသည် ပန်းတနော်မြို့ပေါ်ရှိ ငါးလုပ်ငန်းရှင်(၅)ဦးအား (၇.၃.၂၀၂၃) ရက်နေ့ နံနက်(၁၀:၀၀)နာရီချိန်တွင်  ပန်းတနော်မြို့နယ်တာဝန်ခံရုံး၌ စားသုံးသူကာကွယ်ရေးအသိပညာပေးဟောပြောခဲ့ကြပါသည်။

         ဟောပြောဆွေးနွေးရာတွင် ပန်းတနော်ငါးလုပ်ငန်းရှင်များအား တွေ့ဆုံ၍ ငါးလုပ်ငန်းရှင်များကို ဈေးကွက်ရရှိမှု၊ မြစ်ချောင်းများမှ ငါးများ ရှာဖွေရရှိမှုနည်းပါးလာမှုနှင့်ငါးလုပ်ငန်းဦးစီးဌာန၏ လမ်းညွှန်မှုများကို လေးစားလိုက်နာပြီးရန် လိုအပ်ကြောင်းနှင့်ငါးကန်များအကောင်အထည်ဖော်မှု၊ ငါးဒိုင်များအတွက်ဈေးကွက်ရရှိမှုနှင့်အသင်းရေရှည် တည်တံခိုင်မြဲရေးအတွက်လုပ်ငန်းကဏ္ဍအလိုက် ဆောင်ရွက်မှုအခြေအနေများ၊ စားသုံးသူကာကွယ်ရေးဥပဒေပါ(၂၀၁၉)ပါ စီးပွားရေးလုပ်ငန်းရှင်တို့၏လုပ်ငန်းတာဝန်များ၊ စားသုံးသူကာကွယ်ရေးဥပဒေ၏ စားသုံးသူတို့၏အခွင့်အရေးများနှင့်စီးပွားရေးလုပ်ငန်းရှင်နှင့်စားသုံးသူတို့အကြား နစ်နာဆုံးရှုံးမှုရှိလာပါက တိုင်ကြားလာမှုနှင့်စပ်လျဉ်း၍ ဖြေရှင်းဆောင်ရွက်ပေးရသည့်ကိစ္စရပ်များအကြောင်း၊စားသုံးသူအခွင့်အရေးနစ်နာဆုံးရှုံးမှုများအတွက် တိုင်ကြားနိုင်မည့်လိပ်စာများအားရှင်းလင်းပြီး၊ စားသုံးသူကာကွယ်ရေးဥပဒေ၏ပြစ်မှု၊ပြဏ်ဒဏ်များအကြောင်းကို အကျယ်တဝင့်ဟောပြော ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

        အမျိုးသားအဆင့်ကုန်သွယ်မှုလွယ်ကူချောမွေ့စေရေးကော်မတီအောက်ရှိ အထောက်အကူပြု လုပ်ငန်းအဖွဲ့(၄)၊ စမ်းသပ်စစ်ဆေးမှုဆိုင်ရာလုပ်ငန်းများ အကောင်အထည်ဖော်ရေးအဖွဲ့၏ (၁/၂၀၂၃) ကြိမ်မြောက် လုပ်ငန်းညှိနှိုင်း အစည်းအဝေးကို ၉-၃-၂၀၂၃ ရက်နေ့၊ နံနက် ၁၀:၀၀ နာရီ တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူ‌ရေးရာဦးစီးဌာန၊ ရုံးအမှတ် (၅၂) အစည်းအဝေးခန်းမ၌ ကျင်းပပြုလုပ်ခဲ့ပါသည်။

      အဆိုပါအစည်းအဝေးသို့ အထောက်အကူပြု လုပ်ငန်းအဖွဲ့(၄)၏ ဥက္ကဋ္ဌဖြစ်သည့် စားသုံးသူရေးရာဦးစီးဌာနမှ ညွှန်ကြားရေးမှူးချုပ်က ဦးဆောင်လျက်ကျင်းပပြုလုပ်ခဲ့ပြီး အဖွဲ့ဝင်များ ဖြစ်သည့် အစားအသောက်နှင့် ဆေးဝါးကွပ်ကဲရေးဦးစီးဌာနမှ ဒုတိယညွှန်ကြားရေးမှူးချုပ်၊ အကောက်ခွန်ဦးစီးဌာန၊ ဥပဒေအကြံဉာဏ်ပေးရေးဦးစီးဌာန၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေး ဦးစီးဌာန၊ ငါးလုပ်ငန်းဦးစီးဌာန၊ ကုန်သွယ်ရေးဦးစီးဌာန၊ သုတေသနနှင့် တီထွင်ဆန်းသစ်မှုဦးစီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာနနှင့် မြန်မာနိုင်ငံကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် (UMFCCI) တို့မှ တာဝန်ရှိသူများ တက်ရောက်ခဲ့ကြပါသည်။

    အစည်းအဝေးတွင် လုပ်ငန်းအဖွဲ့(၄)၊ စမ်းသပ်စစ်ဆေးမှုဆိုင်ရာလုပ်ငန်းများ အကောင်အထည်ဖော်ရေးအဖွဲ့ ဥက္ကဋ္ဌ၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ်က လုပ်ငန်းအဖွဲ့ (၄) အနေဖြင့် ကုန်သွယ်မှုလွယ်ကူချောမွေ့စေရေး သဘောတူစာချုပ် (Trade Facilitation Agreement) ပါ Article 5.1: Notification for Enhanced Controls or Inspection အား အကောင်အထည်ဖော်ဆောင်ရွက်နိုင်ရေးအတွက် Competent Authority ဌာနများမှ လက်ရှိထုတ်ပြန်ထားပြီးဖြစ်သည့် ဥပဒေ၊ နည်းဥပဒေ၊ လုပ်ထုံးလုပ်နည်း၊ အမိန့်ကြော်ငြာစာ၊ အမိန့်ညွှန်ကြားချက်၊ လမ်းညွှန်ချက်၊ ကြေညာချက်များအား Myanmar National Trade Portal တွင် လွှင့်တင်နိုင်ရေးအတွက် ကုန်သွယ်ရေးဦးစီးဌာနနှင့် ညှိနှိုင်းထားရှိပြီးဖြစ်ကြောင်း၊ Article 5.3: Test Procedures အား အကောင်အထည်ဖော်ဆောင်ရွက်နိုင်ရေးအတွက် ပြည်ပမှ တင်သွင်းသည့် ကုန်ပစ္စည်း၏ ပထမအကြိမ် စမ်းသပ်စစ်‌ဆေးမှုရလဒ်အပေါ် ဒုတိယအကြိမ်စမ်းသပ်စစ်ဆေးခွင့်ပြုသည့်အမိန့် (မူကြမ်း) ကို ပြုစု ထားပြီးဖြစ်ရာ ၎င်းအမိန့် (မူကြမ်း) အပေါ် ဝိုင်းဝန်းအကြံပြုဆွေးနွေးကြရန် ဆွေးနွေးခဲ့ပါသည်။

    လုပ်ငန်းအဖွဲ့ (၄) အတွင်းရေးမှူး၊ စားသုံးသူရေးရာဦးစီးဌာန၊ သတင်းအချက်အလက်နည်း ပညာနှင့် အရည်အသွေးစီမံခန့်ခွဲမှုဦးစီးဌာနမှ ညွှန်ကြားရေးမှူးက လုပ်ငန်းအဖွဲ့ (၄) ၏လုပ်ငန်းဆောင်ရွက်ထားရှိမှု အခြေအနေများနှင့် အမိန့်(မူကြမ်း)ပြုစုထားရှိမှုအခြေအနေများကို PowerPoint ဖြင့် ရှင်းလင်းဆွေးနွေးခဲ့ပြီး ဆွေးနွေးတင်ပြသည့် အမိန့် (မူကြမ်း) အပေါ် အစည်းအဝေးသို့ တက်ရောက်လာကြသည့် လုပ်ငန်းအဖွဲ့ (၄) အဖွဲ့ဝင်များမှ ဥပဒေပိုင်းဆိုင်ရာ ရှုထောင့်၊ ဘာသာရပ်ဆိုင်ရာ ရှုထောင့်များမှ အကြံပြုဆွေးနွေးခဲ့ကြကြောင်း သတင်းရရှိပါသည်။

ITQM

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများကို လစဉ်စီမံချက်များ ပြည့်မီအောင်ဆောင်ရွက်လျက်ရှိရာ (၆.၃.၂၀၂၃) ရက်နေ့၊ နေ့လယ်(၁၄:၀၀) နာရီချိန်တွင် မုံရွာမြို့၊  ချမ်းမြဝတီရပ်ကွက်ရှိ သယံဇာတနှင့်သဘာဝပတ်ဝန်းကျင်ထိန်းသိမ်းရေး၀န်ကြီးဌာန၊ သဘာဝပတ်ဝန်းကျင်ထိန်းသိမ်းရေးဦးစီးဌာနတွင် စားသုံးသူကာကွယ်ရေးအသိပညာပေး ဟောပြောပွဲအား ဆောင်ရွက်ခဲ့ပါသည်။

အဆိုပါဟောပြောပွဲတွင် မုံရွာခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူး ဒေါ်တိုးတိုးချွန်က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်၊ စားသုံးသူများ၏အခွင့်အရေးများကို အပြည့်အဝကာကွယ်နိုင်ရန်အတွက် စားသုံးသူ ကာကွယ်ရေးဥပဒေကို ၂၀၁၉ ခုနှစ်၊ မတ်လ (၁၅) ရက်နေ့တွင် ပြည်ထောင်စုလွှတ်တော် ဥပဒေ အမှတ် ၉။ ဖြင့် အတည်ပြုပြဋ္ဌာန်းခဲ့ရာ အခန်းပေါင်း (၂၅) ခန်းနှင့် ပုဒ်မပေါင်း (၈၄) ခုအနက် ဥပဒေပါ စားသုံးသူ၏အဓိပ္ပါယ်ဖွင့်ဆိုချက်များ၊ စားသုံးသူအခွင့်အရေး (၈) ချက်အကြောင်းများကို ရှင်းလင်းဆွေးနွေးခဲ့ပါသည်။ ဆက်လက်၍ ခရိုင်ဦးစီးမှူး ဒေါ်ဇင်မာဦးက စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးနှင့်ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ဌာနဆိုင်ရာရုံးများ၊  ရပ်ကွက်၊ ကျေးရွာများ၊  တက္ကသိုလ်/ကောလိပ်များ၊ တပ်ရင်းတပ်ဖွဲ့များ တွင် စားသုံးသူကာကွယ်ပေးရေး အသိပညာပေးဟောပြောပွဲများအား ဆောင်ရွက်လျက်ရှိပါကြောင်း၊ စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများကို အသုံးပြုရာတွင် ဘေးအန္တရာယ်ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန် မိတ်ဖက်ဌာနဆိုင်ရာ အဖွဲ့အစည်းများနှင့် ပူးပေါင်း၍ ဈေးကွက်မရောက်မီနှင့် ဈေးကွက်ရောက်ပြီးသောကုန်စည်များကို ဈေးကွက်စောင့်ကြည့်စစ်ဆေးခြင်းကို ဆောင်ရွက်ရပါကြောင်း ၊  စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ စားသုံးသူများသည် ကုန်စည်နှင့်ဝန်ဆောင်မှု များသုံးစွဲရာတွင် စားသုံးသူအခွင့်အရေးနှင့် နစ်နာဆုံးရှုံးမှုများရှိပါက တိုင်ကြားနိုင်ပါကြောင်းနှင့် တိုင်ကြားနိုင်သည့်နေရာများ၊ ဌာနနှင့်သက်ဆိုင်သောအကြောင်းများကို မေးမြန်းစုံစမ်းနိုင်သည့် Consumer Call Center အား ဖွင့်လှစ်ထားပါကြောင်းနှင့် တိုင်ကြားစာများကို စိစစ်ညှိနှိုင်းဖြေရှင်းပေးပါကြောင်းတို့ကို ရှင်းလင်းဆွေးနွေးခဲ့ရာ ဝန်ထမ်း (၂၅) ဦး တက်ရောက်ခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များအား ဖြန့်ဝေခဲ့ပါကြောင်း သတင်းရရှိပါသည်။

DOCA(စစ်ကိုင်း)