သတင်းနှင့် လှုပ်ရှားမှုများ

         ရှမ်းပြည်နယ်(မြောက်ပိုင်း) စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ  ဦးစီးအရာရှိ ဒေါ်ခင်မာကြည်သည် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ စားသုံးသူကာကွယ်ရေး အသိပညာပေး Talk Showအား (၄.၅.၂၀၂၂) ရက်နေ့ နံနက်(၁ဝး၀၀)နာရီအချိန် လူထုအခြေပြုဗဟိုဌာန (Community Centre) ခန်းမတွင် ပြုလုပ်ခဲ့ကြောင်း သိရှိရပါသည်။

          ထိုအသိပညာပေး Talk Show မှတဆင့် စားသုံးသူများ ကုန်စည်နှင့်ဝန်ဆောင်မှုများကို ဝယ်ယူသုံးစွဲရာတွင် မိမိတို့၏အခွင့်အရေးများ သိရှိထားရန်လိုအပ်ပါကြောင်း၊ လုပ်ငန်းရှင်များ ထုတ်လုပ်ဖြန့်ဖြူးရောင်းချရာတွင် လိုက်နာရမည့် အချက်များ၊ ဌာနမှ စားသုံးသူ ဘေးအန္တရာယ်ကင်းရှင်းရေးအတွက် ဈေးကွက်အတွင်း ကွင်းဆင်းစစ်ဆေးဆောင်ရွက်နေခြင်းနှင့် စားသုံးသူအခွင့်အရေး နစ်နာဆုံးရှုံးမှုများရှိခဲ့ပါက တိုင်ကြားနိုင်သည့်နည်းလမ်းများအား အသိပညာပေး ပြောကြားခဲ့ကြောင်း သတင်းရရှိပါသည်။

DOCA(ရှမ်း)

             မွန်ပြည်နယ်၊ ကျိုက်မရောမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် မြို့နယ်စားသုံးသူရေးရာဦးစီးဌာနတို့ ပူးပေါင်း၍ စားသုံးသူအသိပညာပေး (Talk Show) ဆွေးနွေးပွဲကို ၆.၅.၂၀၂၂ ရက်နေ့ နံနက် ၁၀ နာရီက လူထုအခြေပြုဗဟိုဌာန၊ (Community Center) ခန်းမ၌ပြုလုပ်ခဲ့သည်။

            ရှေးဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်ချိုမြတ်မြတ်ထွေးက စားသုံးသူအကာကွယ်ပေးရေးအသိပညာပေး (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးပြီး မွန်ပြည်နယ် စားသုံးရေးရာဦးစီးဌာန၊ ကျိုက်မရောမြို့နယ်ရုံးတာဝန်ခံ  ဒုဦးစီးမှူး  ဦးအောင်ညီညီခန့်က  စားသုံးသူပြည်သူများအား ဝန်​ဆောင်မှုနှင့်ပတ်သက်၍ စားသုံးသူနစ်နာမှုအ​ပေါ် တိုင်ကြားနိုင်​သောနည်းလမ်းများနှင့် နစ်နာမှုရှိပါက Consumer Call Center 1535 သို့ ဖုန်းခေါ်ဆို၍လည်းကောင်း၊ စားသုံးသူရေးရာဦးစီးဌာန၏ website နှင့် facebook page တို့မှလည်းကောင်း တိုင်ကြားနိုင်ကြောင်း အသိပညာပေး ဆွေးနွေးခဲ့ကြောင်း သိရသည်။

            အဆိုပါ စားသုံးသူကာကွယ်ပေးရေး အသိပညာပေး (Talk.Show) အစီအစဉ်ကို ကျိုက်မရောမြို့နယ်၊ ပြည်သူ့စာကြည့်တိုက် Facebook page စာမျက်နှာတွင် ဝင်ရောက် ကြည့်ရူလေ့လာနိုင်ကြောင်း သိရှိရပါသည်။

DOCA(မွန်)

                 ပြည်တွင်းပြောင်းထုတ်လုပ်ရေးလုပ်ငန်းများကို ပြည်ပဈေးကွက်တိုင်အောင် ထိုက်ထိုက်တန်တန်အခြေချမိစေရေး၊ ပြည်တွင်းပြည်ပစားသုံးသူများ ယုံကြည်စိတ်ချစွာ ပိုမိုအလေးထား ဝယ်ယူလာစေရေး၊ ပြောင်းစိုက်တောင်သူများ၏ ကြုံတွေ့နေရသောအခက်အခဲများကို အသင်း၏ ဦးဆောင်မှုဖြင့် အမြန်ဆုံးဝိုင်းဝန်းကူညီဖြေရှင်းပေးနိုင်ရေး ရည်ရွယ်၍ ၂၀၂၂ခုနှစ်၊ မေလ ၅ ရက်နေ့ နံနက်၉:၀၀နာရီအချိန်တွင် မြစ်ကြီးနားမြို့၊ မြို့သစ်ရပ်ကွက်၊ တရုတ်ယူနန်ဘုံကျောင်းကြီး၌ ကချင်ပြည်နယ်ပြောင်းလုပ်ငန်းအသင်းဖွဲ့စည်းခြင်းအခမ်းအနားကို ကျင်းပခဲ့ရာ စားသုံးသူရေးရာ ဦးစီးဌာနမှ  ပြည်နယ်ဦးစီးမှူးနှင့်ဝန်ထမ်းများ၊  မြန်မာနိုင်ငံပြောင်းလုပ်ငန်းအသင်းမှတာဝန်ရှိသူများ၊ ကချင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်းမှ တာဝန်ရှိသူများ၊ ပြောင်းစိုက်ပျိုးထုတ်လုပ်တင်ပို့ရောင်းချသူလုပ်ငန်းရှင်နှင့် တောင်သူ(၁၀၈)ဦး တက်ရောက်ခဲ့ပါသည်။

                 အဆိုပါအခမ်းအနားတွင် ကချင်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးကိုကိုဦးက အဖွင့်အမှာစကားပြောကြားရာတွင် စားသုံးသူရေးရာဦးစီးဌာနသည် ပြည်တွင်းဈေးကွက်ဖွံ့ဖြိုးမှုနှင့် ကူးသန်းရောင်းဝယ်မှု တိုးတက်လာစေရေး၊ နိုင်ငံတကာဈေးကွက်ချိတ်ဆက်ရောင်းဝယ်မှုတိုးတက်လာစေရေး၊ လယ်ယာထွက်ကုန်စည်များ စဉ်ဆက်မပျက်ဖွံ့ဖြိုးတိုးတက်စေရေးအတွက် စီးပွားဖြစ်ထုတ်လုပ်နိုင်ရန်နှင့် ပုဂ္ဂလိကကဏ္ဍ စွမ်းဆောင်ရည်မြင့်မားစေရန် ရည်ရွယ်ပြီး အသင်းအဖွဲ့များ၊ ကုန်စည်ဒိုင်များ၊ အစုအဖွဲ့များ၊ သီးနှံဇုန်များကို သက်ဆိုင်ရာဌာနများနှင့် ပေါင်းစပ်၍ တိုးချဲ့စည်းရုံး ဖွဲ့စည်းဆောင်ရွက်လျက်ရှိပြီး လိုအပ်သည်များကို ကူညီဆောင်ရွက်ပေးလျက်ရှိကြောင်း၊ မြန်မာနိုင်ငံတွင်  ပြောင်းကိုပြည်တွင်းစားသုံးမှုထက် နှစ်စဉ်ပိုလျှံစွာထုတ်လုပ်နိုင်ခဲ့ပြီး ပြည်ပတင်ပို့မှုတွင် အာဆီယံဒေသအတွင်း ဒုတိယအများဆုံးတင်ပို့သော နိုင်ငံဖြစ်ကြောင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ရှမ်းပြည်နယ်(မြောက်ပိုင်း)(တောင်ပိုင်း)၊  ဧရာဝတီတိုင်းဒေသကြီးနှင့် နေပြည်တော်မှ ထွက်ရှိသည့်ပြောင်းများကို တရုတ်ဈေးကွက်သို့ အများဆုံးတင်ပို့လျက်ရှိကြောင်း၊ မိမိတို့ဌာနအနေဖြင့် အသင်းအဖွဲ့၊ အစုအဖွဲ့များကို တောင့်တင်းခိုင်မာစေရေးအတွက် ဆောင်ရွက်ပေးလျက်ရှိရာ အသင်းအဖွဲ့၊ အစုအဖွဲ့များအနေဖြင့်လည်း အချင်းချင်းပူးပေါင်းဆောင်ရွက်ခြင်းဖြင့် ကုန်သွယ်မှုအခက်အခဲများကို ကျော်လွှားသွားနိုင်မည်ဖြစ်ပါကြောင်း၊ မြန်မာနိုင်ငံတွင် ပြောင်းသီးနှံကဏ္ဍ ဖွံ့ဖြိုးတိုးတက်စေမည့် အခြေအနေကောင်း အခွင့်အလမ်းကောင်းများ ရှိနေပြီးဖြစ်ရာ ပြောင်းသီးနှံကဏ္ဍ ဖွံ့ဖြိုးတိုးတက်စေရေး အတွက်အားလုံးစိတ်ပါဝင်စားစွာဖြင့် လက်တွဲဆောင်ရွက်သွားကြရန်နှင့် လုပ်ငန်းရှင်များအနေဖြင့်လည်း  နိုင်ငံတော်နှင့်ပြည်သူတစ်ရပ်လုံးက အားကိုးအားထားပြုရမည့် လုပ်ငန်းရှင်များဖြစ်အောင် ကြိုးပမ်းဆောင်ရွက်သွားရန် ပြောကြားခဲ့ပါသည်။

                ထို့နောက် အခမ်းအနားသို့တက်ရောက်လာသည့် ပြောင်းစိုက်ပျိုးထုတ်လုပ်တင်ပို့ရောင်းချသူ စီးပွားရေးလုပ်ငန်းရှင်များ၊ တောင်သူများမှ ကချင်ပြည်နယ်ပြောင်းလုပ်ငန်းအသင်း၏ ဗဟိုအလုပ်အမှုဆောင်၊ အလုပ်အမှုဆောင်နှင့်စီမံခန့်ခွဲရေးကော်မတီ ရွေးချယ်တင်မြောက်ခြင်းနှင့် အတည်ပြုခြင်း၊ နာယက(၃)ဦးတင်မြောက်ခြင်း၊ ကချင်ပြည်နယ်ပြောင်းလုပ်ငန်းအသင်းမှ မြန်မာနိုင်ငံပြောင်းလုပ်ငန်းအသင်းအတွက် ဗဟိုအလုပ်အမှုဆောင်(၅)ဦးနှင့် အလုပ်အမှုဆောင်(၅)ဦးအမည်စာရင်းအား ဖတ်ကြားတင်ပြခြင်းများ ဆောင်ရွက်ခဲ့ပြီး ကချင်ပြည်နယ်ပြောင်းလုပ်ငန်းအသင်းအား အဖွဲ့ဝင်(၂၈)ဦးဖြင့် ရွေးချယ်တင်မြောက်ဖွဲ့စည်းခဲ့ကြောင်း သတင်းရရှိပါသည်။

DOCA(ကချင်)

             ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေး ရေးမှူးများနှင့် ဝန်ထမ်းများသည် ကျိုင်းတုံမြို့မဈေးတာဝန်ခံရုံး(စည်ပင်)တို့နှင့် ပူးပေါင်း၍ (၄.၅.၂၀၂၂) ရက်နေ့ နံနက် (၁၀:၀၀) မှ (၁၁:၀၀) နာရီအချိန်ထိ မြို့မဈေးအတွင်းရှိ ဆေးဆိုင်များသို့ Bella plus plaster ရောင်းချမှု ရှိ/မရှိ စစ်ဆေးခဲ့ပါသည်။ ကွင်းဆင်းစစ်ဆေးခဲ့ရာ အဆိုပါပစ္စည်းများ ရောင်းချမှုမရှိကြောင်း တွေ့ရှိခဲ့ရပြီး ဆေးဆိုင်ပိုင်ရှင်များအား ယင်းကဲ့သို့ပစ္စည်းများ ရောင်းချမည်ဆိုပါက ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့်ကုမ္ပဏီ၊ ဆေးဝါးမှတ်ပုံတင်အမှတ်နှင့် Import Registration No. (IR) များ ဖော်ပြပါရှိသော ဆေးဝါးပစ္စည်းများကိုသာ ဈေးကွက်အတွင်း ဖြန့်ဖြူးရောင်းချကြရန် ကွင်းဆင်းအသိပညာပေးခဲ့ပါသည်။

          ဆက်လက်၍ စားသုံးသူပြည်သူများ စားသုံးသူအခွင့်အရေးနှင့် တာဝန်များအပေါ် အသိပညာ ဗဟုသုတနှင့်ပတ်သက်၍ စားသုံးသူစွမ်းဆောင်နိုင်မှုအညွှန်းကိန်းစစ်တမ်းကောက်ယူသည့် မေးခွန်းလွှာများ ဝေမျှခြင်း၊ မရှင်းလင်းသည်များကို အပြန်အလှန်ဆွေးနွေးခြင်း၊ ထပ်မံသိရှိလိုသည့် မေးမြန်းချက်များအပေါ်  ပြန်လည်ဖြေကြားခြင်းစသည့်အချက်များအား ကွင်းဆင်းအသိပညာပေး စစ်တမ်းကောက်ယူခဲ့ကြောင်း သိရှိရပါသည်။

DOCA(ရှမ်း)

          ရန်ကုန်တိုင်းဒေသကြီးနှင့် အခြားတိုင်းဒေသကြီး/ပြည်နယ်များသို့ ပြည်ပမှတင်သွင်းလာသည့် စားအုန်းဆီများဖြန့်ဖြူးရာ၌ ကျန်းမာရေးနှင့်ညီညွှတ်ပြီး စားသုံးသူများ ဘေးအန္တရယ်ကင်းရှင်းနိုင်စေရန်အတွက် စားအုန်းဆီဖြန့်ဖြူးမှုလုပ်ငန်းစဉ်များ အကောင်အထည်ဖော်ဆောင်ရွက်သည့် အဖွဲ့ဝင်များ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း တာဝန်ရှိသူများနှင့် ပြည်တွင်းစားအုန်းဆီဖြန့်ဖြူးနေသည့် ကုမ္ပဏီလုပ်ငန်းရှင်များဖြင့် (၂၂-၄-၂၀၂၂ )ရက်နေ့တွင် ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၌ ခေါ်ယူတွေ့ဆုံ၍ ဆက်လက်ဆောင်ရွက်သွားမည့် လုပ်ငန်းစဉ်များအား ညှိနှိုင်းဆုံးဖြတ်ခဲ့ကြပြီးဖြစ်ပါသည်။ယင်းညှိနှိုင်းဆုံးဖြတ်ချက်များအရ (၁.၅.၂၀၂၂) ရက်နေ့မှစ၍ Clean Drum ဖြင့်သာထည့်သွင်းဖြန့်ဖြူးရေး၊ သက်ဆိုင်ရာကုပ္မဏီ၏ ကုန်အမှတ်တံဆိပ် (Logo) ပါဝင်သော Cap seal များဖြင့် ချိတ်ပိတ်သယ်ဆောင်ရေးနှင့် (၁၅-၅-၂၀၂၂) ရက်နေ့မှစ၍ စားသုံးဆီ ဖြန့်ဖြူးရာတွင် Food Grade အဆင့်ရှိ အဝါရောင် ပေပါ(New Drum/Clean/Drum/Jelly Can/ Consumer Pack) များအသုံးပြု၍ ဖြန့်ဖြူးသွားရန်နှင့် ကုန်အညွှန်းအမှတ်အသားနှင့် ပတ်သက်၍ လည်း စားသုံးဆီဗူးများတွင် အလေးချိန်ဖော်ပြရာ၌ ပိဿ၊ ကျပ်သားဖြင့်လည်း ထည့်သွင်းဖော်ပြပေးရန်တို့ကို (၁-၅-၂၀၂၂) ရက်နေ့တွင် စားသုံးဆီဖြန့်ဖြူးမှုလုပ်ငန်းစဉ်များ အကောင်အထည်ဖော်ဆောင်ရွက်နိုင်ရေးလုပ်ငန်းအဖွဲ့ အဖွဲ့ခေါင်းဆောင်နှင့် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးတို့မှ ရန်ကုန်တိုင်းဒေသကြီးအတွင်း ပြည်တွင်းဖြန့်ဖြူးနေသည့် စားအုန်းဆီကန်များသို့ လည့်လည်ကြည့်ရှု့ စစ်ဆေးဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)