သတင်းနှင့် လှုပ်ရှားမှုများ

ပဲခူးတိုင်းဒေသကြီး ၊ ပြည်ခရိုင်အတွင်းရှိ ပန်းတောင်းမြို့နယ်တွင် ပဲတီစိမ်းများစတင် ရိတ်သိမ်းနေပြီဖြစ်ပါသည်။ ပြည်ခရိုင်အနေဖြင့် ပဲတီစိမ်းစိုက်ဧကမှာ (၅၉၉၅) စိုက်ပျိုးနိုင်ခဲ့ပြီး ပန်းတောင်းမြို့အနေဖြင့် (၁၈၀၂) ဧက စိုက်ပျိုးကြောင်း သိရှိရပါသည်။ ပန်းတောင်း မြို့နယ် တာဝန်ခံ နှင့် အဖွဲ့သည် (၉ . ၁၁ .၂၀၂၁ ) ရက်နေ့တွင် ဒေါင်းမြတ်နားအုပ်စု ၊ ‌ဒေါင်းမြတ်နား ကျေးရွာရှိ ပဲတီစိမ်း စိုက်ဧက (၃.၅) ဧက စိုက်ပျိုးသော တောင်သူ ဦးခင်မောင်ဌေး၏ လယ်သို့ ကွင်းဆင်းရာတွင် ပဲတီစိမ်း ထွက်ရှိမှု အထွက်နှုန်း အနေဖြင့် တစ်ဧကလျှင် (၉-၁၀) တင်းထွက်ရှိပြီး စုစုပေါင်းအထက်မှာ ၃၁ တင်းမှ ၃၅ တင်းကြား ထွက်ရှိကြောင်း သိရှိရပါသည်။ စိုက်ပျိုးသော ပဲတီစိမ်းမျိုးမှာ ကျောက်စိမ်းမျိုးဖြစ်ပြီး မျိုးတစ်ပြည်လျှင် ၂၅၀၀ ကျပ်ဖြင့် ဝယ်ယူစိုက်ပျိုးခဲ့ရကြောင်း သိရှိရပါသည်။
စျေးနှုန်းများအနေဖြင့် ယခုအချိန်ထွက်ရှိသော မိုးပဲတီစိမ်းစျေးနှုန်းမှာ တစ်တင်းလျှင် (၄၃၀၀၀)ကျပ်ဖြစ်ပြီး ယခင်နှစ်တွင်လည်း တစ်တင်းလျှင် (၄၃၀၀၀) ကျပ်စျေးဖြင့် စျေးနှုန်းတူနေကြောင်း တွေ့ရှိရပါသည်။ ယခင်နှစ်အတိုင်း စျေးတူသော်လည်း ယခုနှစ်အနေဖြင့် သွင်းအားစုများ ဖြစ်သည့် ပိုးသတ်ဆေး ၊ အပင်အားဆေးများ စျေးနှုန်းမြင့်တက်မှုကြောင့် ယခုထက်ပိုမို၍ စျေးကောင်းရရှိနိုင်ရေး ပဲစိုက်တောင်သူများမျှော်လင့်လျှက်ရှိပါကြောင်းသတင်းရရှိပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး၊ အစည်းအဝေးခန်းမတွင် အသစ်ခန့်အပ်ထားရှိသော ဝန်ထမ်းများနှင့် လက်ရှိဝန်ထမ်းများ၏ လူ့စွမ်းအား အရင်းအမြစ်များ ဖွံ့ဖြိုးတိုးတက်စေရေးအတွက်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေး သင်တန်း(၁/၂၀၂၁) ကြိမ်မြောက်ကို ၂၀၂၁ ခုနှစ်၊ နိုဝင်ဘာလ (၂.၁၁.၂၀၂၁) ရက်နေ့မှ (၄.၁၁.၂၀၂၁) ရက်နေ့ထိ ကျင်းပခဲ့ပြီး သင်တန်သား/သူ စုစုပေါင်း(၂၂)ဦးတက်ရောက်ခဲ့ပါသည်။
သင်တန်းဖွင့်ပွဲတွင် တိုင်းဒေသကြီးဦးစီးမှူးမှ အဖွင့်အမှာစကားပြောကြားရာ၌ အနာဂတ် ကာလမှာ ဌာနအတွက် ဦးစီးဦးဆောင်ပြုမည့် မျိုးဆက်သစ်ဝန်ထမ်းများကို အရည်အသွေး မြှင့်တင်ပေးသော သွေးသစ်လောင်းပေးသည့် သင်တန်းဖြစ်ပါကြောင်း၊ ယနေ့ ဝန်ထမ်းငယ်များသည် နောင်တစ်ချိန်တွင် ဌာန၏လုပ်ငန်းတာဝန်များကို ပခုံးပြောင်းထမ်းဆောင်ကြရမှာဖြစ်ပါကြောင်း၊ ဌာနရဲ့ ရည်မှန်းချက် တာဝန်တွေကို အကောင်အထည်ဖော်မည့် ခေါင်းဆောင်ကောင်း၊ ဝန်ထမ်းကောင်း တွေဖြစ် လာအောင် ကြိုးစားကြရမှာဖြစ်ပါကြောင်း၊ သင်ယူချင်တဲ့စိတ်၊ ကြိုးစားချင်တဲ့စိတ်၊ တတ်မြောက်ချင်တဲ့ စိတ်ကို စာတွေ့၊ လက်တွေ့ ကိုယ်တိုင်လုပ်မှ တတ်သိနိုင်တဲ့ ပညာရပ်တွေကို သိရှိမှာ ဖြစ်ပါကြောင်း၊ သင်တန်းတွင် စီးပွား/ကူးသန်းဝန်ကြီးဌာနအကြောင်းနှင့် မိမိတို့ဌာန၏ လုပ်ဆောင်ချက်များ အကြောင်းကို ကျယ်ကျယ်ပြန့်ပြန့်သိရှိစေရန်နှင့် မိတ်ဖက်ဌာနများ၏ ဘာသာရပ်များကိုလည်း ထည့်သွင်းထားပါကြောင်း၊ သင်တန်းသား/သူများမှလည်း မိမိလက်ရှိ လုပ်ငန်းပိုင်းဆိုင်ရာ အရည်အသွေးကို မြင့်မားလာအောင် ကိုယ်တိုင်သေချာကြိုးစားကြဖို့ တိုက်တွန်းပါကြောင်း ပြောကြားခဲ့ပါသည်။
အဆိုပါ သင်တန်းတွင် သင်တန်းနည်းပြအဖြစ် FDA မှ တိုင်းတာဝန်ခံ(၁)ဦး၊ ဒုတိယတိုင်းဒေသကြီးဦးစီးမှူး၊ ဒုတိယညွှန်ကြားရေးမှူး၊ ဌာနခွဲတာဝန်ခံ(၆)ဦးတို့မှ သက်ဆိုင်ရာ ဘာသာရပ်အလိုက် သင်ကြားပို့ချခဲ့ကြပြီး သင်တန်းသား/သူများကလည်း အပြန်အလှန်ဆွေးနွေးခဲ့ကြကြောင်းသိရှိပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)

စစ်ကိုင်းတိုင်းဒေသကြီး၊ ကသာခရိုင်၊ ကောလင်းခရိုင်များရှိ ဆီစက်လုပ်ငန်းများသည် ယခင် နှစ် ၂၀၂၀-ပြည့်နှစ်ထက် ယခုနှစ် ၂၀၂၁-ခုနှစ် စက်တင်ဘာလမှစ၍ ပိုမိုကြိတ်ခွဲထုတ်လုပ်ရပြီး ဒေသတွင်း ဆီသန့်စားသုံးမှုမှာလည်း များပြားလာကြောင်း ဆီစက်လုပ်ငန်းရှင်များထံက သိရပါသည်။
ကသာခရိုင်တွင် ဆီထွက်သီးနှံ မိုး၊ ဆောင်း စိုက်ဧက (၃၀၀၀၀) ကျော်နှင့် ကောလင်းခရိုင် တွင် ဧက(၁၀၀၀၀) ခန့် ရှိပါသည်။ ဆီကြိတ်စက်များအနေဖြင့် ကသာခရိုင်တွင် (၁၃၀)စက်နှင့် ကောလင်း ခရိုင်တွင် (၅၆)စက် ရှိကြောင်း သက်ဆိုင်ရာဌာနများ၏ စာရင်းများအရ သိရပါသည်။
ဆီထွက်သီးနှံကုန်ကြမ်းထွက်ရှိမှု၊ ဆီစက်များကြိတ်ခွဲထုတ်လုပ်မှုအရ ကသာခရိုင်နှင့် ကောလင်းခရိုင်များအတွင်း ဆီလိုအပ်ချက်ကို ပြည့်မီပြီး စားသုံးမှုပိုလျှံလျက်ရှိကြောင်း သိရှိရပါသည်။ သို့ရာတွင် ဆီထွက်သီးနှံများအား တရုတ်နိုင်ငံ၏ ဝယ်လိုအားမြင့်မားမှုကြောင့် ဒေသခံ ဆီစက်လုပ်ငန်းရှင်များအနေဖြင့် ဈေးကွက်ယှဉ်ပြိုင်ဝယ်ယူရာတွင် အခက်အခဲများ အတွေ့အကြုံများရပြီး ဆီစက်လုပ်ငန်းများ ရပ်ဆိုင်းလုနီးပါး ဖြစ်လာခဲ့ရကြောင်း သိရှိရပါသည်။ ဈေးကွက်တွင်း တန်ဖိုးနည်းစားအုန်းဆီများ အများအပြား ဝင်ရောက်လျက်ရှိပြီး အခြေခံလူတန်းစားများအနေဖြင့် စားအုန်းဆီကို ရွေးချယ်ဝယ်ယူစားသုံးကြပြီး ဆီသန့်ကို လူနည်းစုတစ်ရပ်ကသာ ဝယ်ယူစားသုံးမှုများလာကြသည်။ ၂၀၂၁-ခုနှစ် စက်တင်ဘာလနောက်ပိုင်းတွင် စားအုန်းဆီဈေးနှုန်းမြင့်မားလာပြီး ဒေသထွက်ပဲဆီသန့်ဈေးနှုန်းနှင့် ကွာဟမှုအနည်းငယ်သာရှိသောကြောင့် အခြေခံလူတန်းစားများပင် ကျန်းမာရေးနှင့်ညီညွတ်သော ဆီသန့်ကို ဝယ်ယူစားသုံးလာနိုင်သည်ကို လေ့လာတွေ့ရှိရပါသည်။
အောက်တိုဘာလနှင့် နိုဝင်ဘာလတို့တွင် ဆောင်းမြေပဲထွက်ရှိပြီး ယခုနှစ်တွင် တရုတ်ဈေးကွက်သို့ မြေပဲဆံတင်ပို့မှုမရှိသည့်အတွက် ဆီစက်လုပ်ငန်းရှင်များအနေဖြင့် ကုန်ကြမ်းလုံလောက်စွာ ရရှိခြင်း၊ ဒေသတွင်းဆီသန့်စားသုံးမှု မြင့်မားလာခြင်း၊ စားအုန်းဆီဈေးနှုန်းနှင့် ဆီသန့်ဈေးနှုန်း ကွာဟမှု ကြီးကြီးမားမားမရှိခြင်း၊ ဝယ်ယူစားသုံးမှုများပြားလာခြင်း စသည်တို့ကြောင့် ဆီစက် လုပ်ငန်းရှင်များအနေဖြင့် ယခင်နှစ်များထက် ပိုမိုကြိတ်ခွဲထုတ်လုပ်ရောင်းချလျက်ရှိကြောင်း သိရပါသည်။
၂၀၂၁-ခုနှစ် နိုဝင်ဘာလ ပထမပတ်တွင် လူသုံးများသည့် စားအုန်းဆီ ၁၀ ပိဿာတစ်ပုံး ၅၅၀၀၀ ကျပ်၊ မြေပဲဆီသန့် ၁၀ ပိဿာတစ်ပုံး ၆၅၀၀၀ ကျပ်ဖြစ်သည်။ ကုန်ကြမ်းမြေပဲဆံ တစ်ပိဿာ ၂၆၀၀ ကျပ် ဈေးရရှိပြီး ပဲဆံ ၂၅ ပိဿာကြိတ်ပါက ပုံမှန်ဆီသန့် (၁၀)ပိသာရပါသည်။ ပဲဖတ်များကို ရန်ကုန်၊ မန္တလေး၊ ပုသိမ်၊ တွံတေးမြို့များက အဓိကဝယ်ယူကြပြီး ပဲဖတ်တစ်ပိဿာ ၁၃၅၀ ကျပ်ဈေးရှိသည့်အတွက် ဆီပိဿာ ၁၀၀ ကြိတ် လျှင် ပဲဖတ်မှာ ၆၇၅၀၀ ကျပ် ရရှိသည်ဟု သိရပါသည်။
မြေပဲဆီသန့်ကြိတ်ရာတွင် နွားထိုးကြီး၊ မကွေး၊ ကျောက်ပန်းတောင်း၊ ချောက်၊ စလေ၊ မုံရွာ၊ ကနီမြို့များက မြေပဲဆံသည် ဆီထွက်နှုန်းကောင်းကြပြီး ချောက်မြို့၊ စလေမြို့များမှ မြေပဲဆံသည် အရည်အသွေးပါကောင်းသည်ဟု မုံရွာမြို့၊စိန်ဝေလျံဆီစက်လုပ်ငန်းရှင် ဦးအောင်ခင်ထံမှ သိရသည်။
မြန်မာနိုင်ငံတွင် ဆီစားသုံးမှုမြင့်မားသည့်အတွက် ပြည်ပမှ စားအုန်းဆီများကို နိုင်ငံခြားငွေ ဘီလီယံနှင့်ချီ၍ ဝယ်ယူတင်သွင်းနေရကြောင်း၊ စားအုန်းဆီများကို လျှော့ချစားသုံး ခြင်းဖြင့် ကျန်းမာရေးညီညွတ်မှုရရှိနိုင်သလို ပြည်ပငွေကိုလည်း ချွေတာသုံးစွဲရာရောက်ကြောင်း နိုင်ငံ တော်အကြီးအကဲများက အသိပညာပေးလျက်ရှိသည်။
ပြည်ပသို့ မြေပဲဆံတင်ပို့မှုအား ပြည်တွင်း၌ ပိုလျှံမှသာ တင်ပို့ရောင်းချသင့်ကြောင်း၊ သို့မှသာ ပြည်တွင်းရှိ အခြေခံလူတန်းစားများ ဝယ်ယူစားသုံးနိုင်သည့် ဆီသန့် ဈေးနှုန်းဖြစ်ပေါ်နိုင်ပြီး စားအုန်းဆီ တင်သွင်းမှုကိုလည်း လျှော့ချနိုင်မည်ဖြစ်ပါကြောင်း၊ ပြည်သူများအနေဖြင့် စားအုန်းဆီအား မလွှဲသာ၍ စားသုံးနေရ ပြီး ကျန်းမာရေးနှင့်ညီညွတ်သော ဆီသန့်ကိုသာ ဝယ်ယူစားသုံးရန်ဆန္ဒရှိကြောင်း စားသုံးသူမိဘ ပြည်သူများထံမှ သိရပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းခရိုင် ဦးစီးမှူးရုံးမှ ခရိုင်ဦးစီးမှူးနှင့် တာဝန်ရှိသူများသည် စစ်ကိုင်းမြို့၊ ကျောက်ဆည်ကျေးရွာ ကောင်းထက် ကျော် ဝါစက်/ဆီစက်သို့ အောက်တိုဘာလ ၂၈ ရက်နေ့က ကွင်းဆင်း၍ ဈေးကွက်ဈေးနှုန်း အခြေ အနေများ ဆွေးနွေးမေးမြန်းမှတ်တမ်းတင်ခဲ့ပါသည်။
စစ်ကိုင်းမြို့၊ ကျောက်ဆည်ကျေးရွာ ကောင်းထက်ကျော် ဝါစက်/ဆီစက်သည် ဝါသီးနှံကုန်ကြမ်းမှ ဝါဂွမ်း၊ ဝါစေ့၊ဝါစေ့ဆီနှင့် ဆီကြိတ်ဖတ်များ ထုတ်လုပ်ပြီး ဘေးထွက်ပစ္စည်းဖြစ်သည့် ဆီကြိတ်ဖတ်များကို တိရိစ္ဆာန်အစားအစာအဖြစ် သုံးစွဲကြောင်း၊ ဝါသီးနှံကို မေ၊ဇွန်၊ ဇူလိုင်လများတွင် စိုက်ပျိုးပြီး စက်တင်ဘာ၊ အောက်တိုဘာ၊ နိုဝင်ဘာနှင့် ဒီဇင်ဘာလများတွင် ထွက်ပေါ်လာပါကြောင်း၊ ယခုနှစ် ဝါသီးနှံ စတင်ထွက်ပေါ်ချိန်တွင် (၁)ပိဿာလျှင် (၁၇၀၀) ကျပ် ပေါက်ဈေးရှိပြီး အောက်တိုဘာလ နောက်ဆုံးပတ်တွင် (၁၄၀၀) ကျပ် ထိဈေးကျသွားကြောင်း၊ ဝါသီးနှံ၏ ပေါက်ဈေးနှုန်းသည် မူဆယ်(တရုတ်) ဈေးကွက်ပေါ်တွင် မူတည်ကြောင်း၊ ဝါသီးနှံများကို ဝါကြိတ်စက်များသို့ သွားရောက်ရောင်းချကြောင်း၊ ကျေးရွာများသို့ ကုန်သည်/ပွဲစားများမှ လာရောက်ဝယ်ယူခြင်းများရှိပါကြောင်း၊ စစ်ကိုင်းခရိုင်တွင် ဝါကြိတ်စက်(၁၆) စက်ရှိပြီး စက်ကြီးအနေဖြင့် အုန်းတောကျေးရွာတွင် (၂)စက်နှင့် ကျောက်ဆည် ကျေးရွာတွင် (၂)စက် ရှိပါကြောင်း၊ ကျေးလက်ဒေသများမှ ထွက်ရှိသော ဝါများကို ဝယ်ယူသန့်စင်ပြီး ဝါဂွမ်းကို မန္တလေးသို့ တင်ပို့ရောင်းချခြင်းနှင့် တရုတ်ကုန်သည်များမှ လာရောက်စာချုပ်ချုပ်ဆို ဝယ်ယူခြင်းများလည်းရှိကြောင်း၊ ဝါစက်အနေဖြင့် ဝါသီးနှံကို နှစ်စဉ်ထွက်ပေါ်သည့် ရာသီချိန် (၅)လခန့် ဝယ်ယူပြီး ဝါစေ့များကို သိုလှောင် ထား၍ တစ်နှစ်ပတ် လုံး ဝါစေ့ဆီကြိတ်ခွဲကြောင်း၊ (၁)ပိဿာပေါက်ဈေးနှုန်းများမှာ ဝါဂွမ်း(၄၅၀၀)ကျပ်၊ ဝါစေ့ (၁၄၀၀)ကျပ်နှင့် ဝါစေ့ဆီ (၄၃၀၀)ကျပ်၊ ဝါစေ့ဖတ် (၆၀၀) ကျပ် ရှိကြောင်းသိရှိရပါသည်။ စစ်ကိုင်းခရိုင်အနေဖြင့် ပြည်ပသို့ တိုက်ရိုက်တင်ပို့မှု မရှိသော်လည်း မန္တလေးမြို့မှ လာရောက်ဝယ်ယူသည့် ကုန်သည်များမှတဆင့် တရုတ် (မူဆယ်) ပြည်ပသို့ တင်ပို့ရောင်းချမှုရှိပြီး ဝါနှင့်ဝါအခြေခံပစ္စည်း Supply Chain တစ်လျှောက်လုံး သက်ဆိုင်သူများအားလုံး စုပေါင်းဆောင်ရွက်မှသာ ဝါသီးနှံ စိုက်ပျိုးထုတ်လုပ်မှုကဏ္ဍတစ်ခုလုံး ဖွံ့ဖြိုးတိုးတက်လာမည်ဖြစ်ပါကြောင်း တင်ပြအပ်ပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)

(၁၀.၁၁.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။