ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ သရက်မြို့မှထွက်ရှိသည့် ပဲကြီးနှင့်ကုလားပဲများသည် နေ့စဉ်ဈေးကွက်အတွင်းသို့ ဝင်ရောက်လျှက်ရှိရာ ဧပြီလကုန်အပတ်တွင် ပဲကြီးသီးနှံဈေးအနည်းငယ်မြင့်တက်လာပြီး နေ့စဉ်အိတ် (၁၀၀-၁၅၀)ခန့် အရောင်အဝယ်ဖြစ်လျှက်ရှိကြောင်း သိရှိရပါသည်။ သရက်မှထွက်ရှိသည့် ပဲမျိုးစုံကို မြစ်တစ်ဖက်ကမ်း အောင်လံမြို့ရှိ ဝယ်လက်သမားများမှ နေ့စဉ်ဝယ်ယူလျှက်ရှိပြီး လက်ရှိဈေးနှုန်းအနေဖြင့် ပဲကြီး(၁)တင်းလျှင် (၆၀၀ဝဝိ/-)၊ သင်္ကြန်မတိုင်မီက (၅၆၀၀ဝိ/-)သာရ၍ (၄၀၀ဝိ/-)ဈေးမြင့်လာကြောင်း၊ ကုလားပဲသီးနှံကို ပြည်မြို့ရှိ ပဲခွဲစက်များမှ လာရောက်ဝယ်ယူလျှက်ရှိပြီး အိတ်(၂၅၀-၃၀၀)အရောင်းအဝယ် ဖြစ်ကြောင်း၊ ကုလားပဲ(၁)တင်းလျှင် (၄၄၀၀ဝိ/-)ကျပ်ဖြင့် ဈေးပြောင်းလဲမှုမရှိဘဲ အရောင်းအဝယ်ဖြစ်လျှက်ရှိကြောင်း သိရှိရပါသည်။

DOCA(မကွေး)

          ရန်ကုန်တိုင်းဒေသကြီး၊ လှိုင်မြို့နယ် သီရိမင်္ဂလာဈေးတွင် ဧပြီလ(၁၉) ရက်နေ့မှ ဧပြီလ(၂၅) ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ကျိုက်ကော် မှ နာနတ်သီး အလုံးကြီး ၁ လုံးလျှင် ကျပ် ၁၅၀၀၊ အလုံးလတ် ၁လုံး လျှင် ကျပ် ၁၀၀၀ ၊ အလုံးသေး ၁လုံး လျှင် ကျပ် ၈၀၀ မှ ၆၀၀၊ သီပေါ မှ ဖရဲသီး (855) အလုံးကြီး  ၁လုံး လျှင် ကျပ် ၁၀၀၀၀၊ အလုံးလတ် ၁လုံး လျှင် ကျပ် ၈၀၀၀၊ အလုံးသေး ၁လုံး လျှင် ကျပ် ၄၀၀၀၊ ဝမ်းတွင်း မှ ဖရဲသီး (211) ၁လုံး လျှင် အလုံးကြီး ကျပ် ၆၀၀၀၊ အလုံးလတ် ၁လုံး လျှင် ကျပ် ၄၀၀၀၊ အလုံးသေး ၁လုံး လျှင် ကျပ် ၂၀၀၀၊ မှော်ဘီ၊ တိုက်ကြီးမှ မာလကာသီး အလုံးကြီး ၁လုံး လျှင် ကျပ် ၆၀၀၊ အလုံးလတ် ၁လုံး လျှင် ကျပ် ၅၀၀၊ အလုံးသေး ၁လုံး လျှင် ကျပ် ၄၀၀၊ မအူပင် (ရွှေတောင်ပေါ်) မှ သရက်သီး (မချစ်စု) အလုံးကြီး ၆၅ လုံး တစ်ခြင်းလျှင် ကျပ် ၂၈၀၀၀၊ အလုံးလတ် ၇၅ လုံး တစ်ခြင်း လျှင် ကျပ် ၂၀၀၀၀၊ အလုံးသေး ၉၀လုံးပါ တစ်ခြင်းလျှင် ကျပ် ၁၅၀၀၀၊ တွံတေးမှ သရက်သီး (ရင်ကွဲ) အလုံးကြီး ၈၀ မှ ၉၀ လုံး ပါ တစ်ခြင်းလျှင် ကျပ် ၁၃၀၀၀၊ အလုံး လတ် အလုံး ၁၀၀ ပါ တစ်ခြင်းလျှင် ကျပ် ၁၀၀၀၀၊ အလုံးသေး ၁၂၀ ပါ တစ်ခြင်းလျှင် ကျပ် ၈၀၀၀၊ ဧရာဝတီတိုင်းမှ သရက်သီး (စိန်တစ်လုံး) လုံးကြီး ၃၆ လုံးပါ ဂျပ်ဖာ ၁ဖာ လျှင် ကျပ် ၃၀၀၀၀၊ အလုံးလတ် ၄၅ ပါ ၁ဖာလျှင် ကျပ် ၂၃၀၀၀၊ အလုံးသေး ၅၀ ပါ ၁ဖာလျှင် ကျပ် ၁၆၀၀၀၊ ပြင်ဦးလွင်မှ စတော်ဘယ်ရီ ၅ ပိဿာတစ်ခြင်း လျှင်ကျပ် ၃၅၀၀၀၊ (၁၈) ကျပ်သားဗူး ၁ဗူးလျှင် ကျပ် ၈၀၀ ဈေးတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

        ကယားပြည်နယ်အတွင်း အခြားဒေသများမှ ကုန်စည်စီးဆင်းမှုများနှင့် ပြည်နယ်မှ အခြားဒေသများသို့ ကုန်စည်တင်ပို့မှုများဖြင့် ကုန်သွယ်မှုပြုလုပ်ရောင်းချလျက်ရှိပြီး ဧပြီလ တတိယပတ်အတွင်း  ပြည်နယ်အတွင်း ကုန်စည်အဝင်များမှာ အချိုရည်ကား(၅)စီး၊ ကုန်စုံ(၂၉)စီး၊ အရက် ကား(၂)စီး၊ ဘိလပ်မြေ(၇)စီး၊ ကြက်သွန်နီ(၁၃၅၀)စီး၊ ကြက်ဥ(၁)စီး၊ ဆား(၄၆၂)စီး၊ ဘီယာကား (၂)စီး တို့ကိုလည်းကောင်း၊ ပြည်နယ်မှအခြားဒေသသို့ ပြောင်း(၂၀၉၀)စီး၊ ပဲကြီး(၁၀၀)စီး၊ ငှက်ပျော(၃)စီး၊ မကျဉ်း(၂)စီး၊ ဆန်(၂၂၀)စီး၊ သံတိုသံစ(၆)စီး၊ ဖွဲနု(၃၃၀)စီး တို့ဖြင့် ကုန်စည် စီးဝင်/စီးထွက်လျက်ရှိပြီး ရောင်းဝယ်ဖောက်ကားလျက်ရှိကြောင်း သိရှိရပါတယ်။

DOCA(ကယား)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်သော ဝန်ထမ်းများနှင့်အဖွဲ့သည် ဝါလုပ်ငန်းကဏ္ဍဖွံ့ဖြိုးတိုးတက်စေရန်အတွက်  ရည်ရွယ်၍ ဧပြီလ (၂၁)ရက်၊ နံနက်(၁၀:၀၀)နာရီ အချိန်တွင် ပခုက္ကူမြို့၊ အမှတ်(၆)ရပ်ကွက်နှင့် စက်မှုဇုန်ရှိ ဝါလုပ်ငန်းရှင်များနှင့် တွေ့ဆုံမေးမြန်းဆွေးနွေးခဲ့ကြောင်းသိရှိရပါသည်။

          ခရိုင်ဦးစီးမှူးမှ ဝါလုပ်ငန်းရှင်များအား ဝါသီးနှံ၊ ဝါဂွမ်းလက်ကျန်များ၊ ဈေးနှုန်း၊ ဈေးကွက်များ၊ လက်ရှိကုန်သွယ်ရောင်းဝယ်မှုအခြေအနေများအား မေးမြန်းရာတွင် ဝါသီးနှံသည် ယခုအချိန်မှာ သီးနှံပေါ်ပြီးအချိန်ဖြစ်သောကြောင့် သိုလှောင်မှုအနည်းဆုံး ဖြစ်နေကြောင်း၊ ပခုက္ကူခရိုင်တွင် ဝါသီးနှံစိုက်ပျိုးမှုနည်းပါးသောကြောင့် ဝါထွက်ရှိနှုန်း‌လည်း နည်းပါကြောင်း၊ ယခင်အချိန်က ဝါကိုစိုက်ပျိုးကြသော်လည်း ယခုမှာ ဈေးကောင်းမရသဖြင့် ဝါစိုက်ပျိုးမှုနည်းကြောင်း၊ မြေပဲ၊ နှမ်းနှင့် အခြားပဲများသည် ဈေးကောင်းရရှိနေသောကြောင့် ပဲမျိုးစုံကို ပြောင်းလဲစိုက်ပျိုးကြသည်ကို တွေ့ရှိရကြောင်း၊ ပခုက္ကူမြို့နယ်အတွင်းရှိ ဝါစိုက် တောင်သူများသည် အပင်အားတိုးဆေးများ မသုံးစွဲနိုင်သည့်အတွက် ဝါအရည်အသွေး ကောင်းမွန်မှုနည်းပြီး A အဆင့်မမှီပဲ B, C, D အဆင့်သာရှိကြောင်း၊ မိထ္ထီလာဈေးကွက်မှာ အရည်အသွေး ကောင်းမွန်ပြီး A အဆင့်ရှိမှသာ ဝယ်ယူပါကြောင်း၊  အောင်လံ၊ မင်းဘူး၊ သရက်၊ တောင်တွင်းကြီး၊ မင်းလှမြို့နယ်များတွင် ဝါကိုကျယ်ကျယ်ပြန့်ပြန့်စိုက်ပျိုးပြီး အရည်အသွေးမှာလည်း အဆင့်မြင့်ကောင်းမွန်သည်ကိုတွေ့ရှိရပါကြောင်း၊ ၎င်းနယ်မှ ဝါစိုက် တောင်သူများသည် အပင်အားတိုးဆေးအတွက် ကုန်ကျစရိတ်အများအပြားကုန်ကျခံပြီး ပက်ဖျန်းကြောင်း သိရှိရပါသည်။

           ဆက်လက်၍ ဝါအဝယ်ဒိုင်မှ မိမိတို့ထံသို့ ပခုက္ကူ၊ ကမ္မ၊ မြစ်ခြေနယ်များမှ လာရောက် ရောင်းချကြောင်း၊ ချည်မျှင်တိုဝါ ဝါဂွမ်းတစ်ပိဿာလျှင်(၄၀၀၀/၄၅၀၀)ကျပ် ပေး၍ ဝယ်ရ ကြောင်း၊ ချည်မျှင်ရှည်ဝါကို (၂၀၀/၃၀၀)ကျပ် ဈေးပိုပေး၍ ဝယ်ယူရကြောင်း၊ ဝါတစ်ပိဿာ ကို (၁၅၀၀/၁၇၀၀)ကျပ်ဈေးရှိပြီး  ဈေးကွက်အနေဖြင့် မန္တလေးမြို့ ဝါပွဲစားများနှင့်အထည် စက်ရုံများသို့ အများဆုံးရောင်းချပါကြောင်း၊ မိထ္ထီလာမြို့နှင့် ဝါဇီမှ ဝါအဝယ်ဒိုင်များအထိ လာရောက် ဝယ်ယူသည်များလည်းရှိကြောင်း၊ ချည်မျှင်ရှည်ဝါကို အထည်စက်ရုံများမှ အသုံးပြုပြီး ချည်မျှင်တိုဝါကို ခေါင်းအုံး၊ ဖက်လုံး၊ မွေ့ယာများတွင် အသုံးပြုကြကြောင်း၊ လက်ရှိအချိန် သင်္ကြန်ပြီးကာလဖြစ်သောကြောင့် ကုန်သွယ်ရောင်းဝယ်မှုမှာ နည်းပါးနေ ကြောင်း၊ ဝါဂွမ်းလက်ကျန်အနေဖြင့်  ယခုအချိန်သည်  ဝါထွက်နှုန်းနည်းနေပြီ ဖြစ်သော ကြောင့် သိုလှောင်မှုနည်းနိုင်ပါကြောင်း၊ နိုဝင်ဘာ၊ ဒီဇင်ဘာ၊ ဇန်နဝါရီ၊ ဖေဖေါ်ဝါရီလများတွင် ဝါလှိုင်လှိုင်ထွက်ချိန်ဖြစ်သောကြောင့် လက်ကျန်ရှိသော်လည်း ယခုအချိန်တွင် ဝါ၊ ဝါဂွမ်း လက်ကျန်မရှိသလောက်နည်းပါးပါကြောင်း၊ ပခုက္ကူမြို့ပေါ်တွင် ချည်ထည်စက်ရုံနှင့် ဝါအဝယ်ဒိုင် (၂)ဦးသာရှိသောကြောင့် ဝါဂွမ်းလက်ကျန်ခန့်မှန်းရ လွယ်ကူပါကြောင်း၊ ကမ္မ၊ မြစ်ခြေနယ်တွင် ဝါစိုက်ပျိုးမှုအများဆုံးရှိပြီး တောင်သူအိမ်တွင် ဗမာခုံဝါကြိတ်စက်လေးများဖြင့် ကြိတ်ခွဲသည်ဟုသိရပါကြောင်း၊ ကြိတ်ခွဲရရှိလာသော ဝါဂွမ်းများကို နွေရာသီမီးဘေးအန္တရာယ်ကြောင့် သိုလှောင်မထားပဲ  မြို့ပေါ်ရှိ ဝါအဝယ်ဒိုင်သို့ စုပေါင်း၍ လာရောက်ရောင်းချပါကြောင်း၊ ဝါလုပ်ငန်းရှင်မှလည်း မန္တလေး၊ မိထ္ထီလာရှိ ပွဲရုံကြီးများသို့ ရောင်းချပါကြောင်း ဝါလုပ်ငန်းရှင် ဦးဝင်းဇော်၏ ပြောကြားချက်အရ သိရှိရပါသည်။

DOCA(မကွေး)

             ကိုဗစ်-၁၉ရောဂါအခြေအနေများကြောင့် ရှမ်းပြည်နယ်(အရှေ့ပိုင်း)၊ မိုင်းယောင်းမြို့နယ်နှင့်  မိုင်းယုဒေသရှိ တရုတ်-မြန်မာကုန်သွယ်မှုများပြုလုပ်သည့် ကျိန်းရဲတံတားကို (၁၉.၇.၂၀၂၁) ရက် နေ့မှစတင်၍ ပိတ်ထားခဲ့သည်မှာ တစ်နှစ်နီးပါးခန့်ရှိခဲ့ပါပြီ။ သို့ဖြစ်ပါ၍ ဒေသထွက်ရွှေဖရုံသီးများ ဆွတ်ခူးရောင်းချချိန်တွင် နယ်စပ်ကုန်သွယ်မှုများ ပြန်လည်ဖွင့်လှစ်နိုင်ခြင်းမရှိသည့်အတွက် တရုတ်ဈေးကွက်ကို အဓိကအားထားနေရသော ရွှေဖရုံစိုက်တောင်သူများ အခက်တွေ့နေကြောင်း သိရှိရပါ သည်။

            ရှမ်းပြည်နယ်(အရှေ့ပိုင်း)၊ မိုင်းယောင်းမြို့နယ်နှင့် မိုင်းယုဒေသတွင် ယခုနှစ်ရွှေဖရုံစိုက် ဧက (၅၀၀) ကျော်ရှိပြီး တစ်ဧကအထွက်နှုန်းမှာ (၆) တန်ခန့်ထွက်ရှိ၍ တစ်ဧက စိုက်ပျိုးကုန်ကျ စရိတ်မှာ (၇၅၀၀၀၀) ကျပ်ခန့်ရှိပါသည်။ ရွှေဖရုံသီးကို နှစ်စဉ် နိုဝင်ဘာလတွင် စတင်စိုက်ပျိုးပြီး မတ်လနှင့် ဧပြီလများတွင် စတင်ဆွတ်ခူးရောင်းချကြသည်။

          ရွှေဖရုံစိုက်တောင်သူများသည် နိုင်ငံတော်သို့ ပေးသင့်ပေးထိုက်သော အခွန်အခများ ပေးသွင်းကြပြီး တင်ပို့မှုအနေဖြင့် ၂၀၁၉-၂၀၂၀ ဘဏ္ဍာနှစ်အတွင်း (၁၁၂၉) တန်၊ ၂၀၂၀-၂၀၂၁ ဘဏ္ဍာနှစ် အတွင်း (၂၃၆၆) တန်ချိန်အထိ မိုင်းယောင်းမြို့နယ်၊ မိုင်းယုမြို့နယ်ခွဲ အထူးဒေသ (၄) မှတဆင့် တရုတ် နိုင်ငံ ယူနန်ပြည်နယ်၊ ကျိုင်းဟုန်မြို့သို့ အများဆုံးတင်ပို့နိုင်ခဲ့ပါကြောင်း ကုန်သွယ်ရေးသတင်းအချက်များအရ သိရှိရပါသည်။

           ယခုအခါ ရွှေဖရုံသီးများ ဆွတ်ခူးရောင်းချချိန်ဖြစ်သော်လည်း  ကိုဗစ်-၁၉ရောဂါအခြေအနေများကြောင့် တရုတ်နိုင်ငံသို့ ကုန်သွယ်မှု အဝင်/အထွက်များ ရက်အကန့်အသတ်မရှိ ပိတ်ထားသောကြောင့်  ရွှေဖရုံစိုက်တောင်သူများသည် တာချီလိတ်မြို့နယ် ကျိုက်လတ်မြို့မှတဆင့် လာအိုနိုင်ငံသို့ တင်ပို့နေရသောကြောင့် လမ်းပန်းဆက်သွယ်ရေး ရှည်လျားခြင်း၊ သယ်ယူစရိတ်၊ လုပ်သား စရိတ်များ ပိုမိုကုန်ကျခြင်းနှင့် အဆင့်ဆင့်သယ်ယူရသောကြောင့် ပျက်စီးဆုံးရှုံးမှုများစွာရှိသည့်အတွက် ယခင်နှစ်က ရွှေဖရုံသီး တစ်ကီလိုလျှင် (၈၀၀)ကျပ် ရရှိသော်လည်း ယခုနှစ်တွင် တစ်ကီလို (၂၅၀) ကျပ်သာရရှိပါသည်။ သို့ဖြစ်ပါ၍ ရွှေဖရုံစိုက်တောင်သူများသည် တရုတ်-မြန်မာနယ်စပ်  ကျိန်းရဲတံတား ပိတ်ထားသောကြောင့် ရွှေဖရုံသီးများကို တရုတ်နိုင်ငံသို့ လာအိုနိုင်ငံမှ တဆင့်တင်ပို့နေရသဖြင့် ကုန်ကျစရိတ်များပြားပြီး အမြတ်အစွန်းနည်းပါးကာ အခက်အခဲတွေ့ ကြုံနေရကြောင်း လေ့လာသိရှိမှုအား ရေးသားလိုက်ရပါသည်။

DOCA(ရှမ်း)