ပြည်တွင်းကုန်သွယ်မှုသတင်း

               ကော်ဖီသောက်ခြင်း အလေ့အထသည် အနောက်နိုင်ငံများတွင်သာမက တစ်ကမ္ဘာလုံးကို ပျံ့နှံ့နေပါသည်။ မြန်မာနိုင်ငံတွင်လည်း မြို့ကြီးများတွင်သာမက တောရွာများတွင်ပါ ကော်ဖီသောက်ခြင်းဓလေ့သည် ပေါ်ပြူလာဖြစ်နေပါသည်။ ဆွမ်းကျွေး၊ အလှူများတွင် ထမင်းကျွေးပြီး ကော်ဖီ၊ လက်ဖက်ရည်ကို အချိုပွဲများအဖြစ် တည်ခင်းဧည့်ခံနေကြပါသည်။

              ၁၉၀၁ ခုနှစ်တွင် ဂျပန်လူမျိုး ဆာတိုရီကီဆိုသူက Instant Coffee ကို အမေရိကန်နိုင်ငံ ချီကာဂိုမြို့တွင် စတင်တည်ထွင်ခဲ့ပါသည်။ ၁၉၃၈ ခုနှစ်တွင် Nescafe ဆိုသောနာမည်ဖြင့် တစ်ကမ္ဘာလုံးသို့ ထိုးဖောက်နိုင်ခဲ့ပါသည်။ ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့တွင်လည်း Linn Coffee ၊ ပဒေသာကော်ဖီ၊ ဖိုးလမင်းကော်ဖီမှုန့်လုပ်ငန်းများသည် တောင်ငူမြို့ထွက် ကော်ဖီမှုန့်များအဖြစ် လူသိများကြပါသည်။

              ကော်ဖီမှုန့်ကြိတ်ရန် ကော်ဖီစေ့ကုန်ကြမ်းများကို ကရင်ပြည်နယ် သံတောင်ကြီး၊ လိပ်သို၊ ချင်းပြည်နယ် မင်းတပ်နှင့် ရှမ်းပြည်နယ် ရွာငံဒေသတို့မှ မှာယူရသည်ဟု သိရှိရပါသည်။ ကော်ဖီသီးများကို ဒီဇင်ဘာလတွင် စတင်ဆွတ်ခူးပြီး ဖေဖော်ဝါရီ၊ မတ်လများသည် ကော်ဖီလှိုင်လှိုင်ပေါ်သည့်လများအဖြစ် သိရှိရပါသည်။

              အခြောက်ခံပြီး သံတောင်ဒေသထွက် ကော်ဖီသီး တစ်ပိဿာလျှင် ၄၅၀၀ ကျပ်မှ ၆၅၀၀ ကျပ်၊ ရွာငံဒေသထွက် အလုံးကြီးကော်ဖီသီးဆိုလျှင် ကုန်ကြမ်းတစ်ပိဿာ ၇၀၀၀ ကျပ်ထိ ဝယ်ယူရကြောင်း၊ သံတောင်ကြီးဒေသ ကော်ဖီခြံရှင်များက ကော်ဖီမှုန့်ကြိတ်သည့် နေရာများသို့ တိုက်ရိုက်လာရောက်ရောင်းချသူများလည်းရှိကြောင်း၊ ကော်ဖီမှုန့်ကြိတ်ရန် လိုအပ်သည့် ကုန်ကြမ်းများကိုလည်း ပွဲရုံများမှ ဝယ်ယူရကြောင်း၊ ကော်ဖီမှုန့်ကြိတ်ရန် ကော်ဖီစေ့ကုန်ကြမ်း လိုအပ်ချက်မှာ လုပ်ငန်းရှင်တစ်ဦးလျှင် ၁၀ တန်ခန့်ရှိကြောင်း၊ ဒေသအလိုက် ကုန်ကြမ်းဝယ်ယူရာတွင်လည်း ခက်ခဲမှုမရှိကြောင်း သိရပါသည်။

              ကော်ဖီကြိတ်ရန် အခြောက်ခံထားပြီးသော ကော်ဖီစေ့များကို ပြန်လှော်ရကြောင်း၊ ကော်ဖီစေ့ တစ်ပိဿာလှော်လျှင် အမှုန့်ကြိတ်ရန် ကော်ဖီ ၇၀ ကျပ်သား ရရှိကြောင်း၊ ၃၀ ကျပ်သားခန့်မှာ လှော်လိုက်သည့်အတွက် အခွံများကျွတ်သွားကြောင်း၊ လှော်ပြီးသား ကော်ဖီစေ့ ၇၀ ကျပ်သားကို ကြိတ်စက်ထဲထည့်ကြိတ်လျှင် လျော့နည်းမှုမရှိဘဲ ၇၀ ကျပ်သားခန့် ပြန်လည်ရရှိကြောင်း၊ ထွက်ရှိလာသည့် ကော်ဖီမှုန့်များကို တစ်ပိဿာလျှင် ၁၅၀၀၀ ကျပ် ရောင်းရကြောင်း၊ ကြိတ်ခွဲထားသည့် ကော်ဖီမှုန့်ကုန်ချောများကို ရန်ကုန်၊ ပြည်၊ မန္တလေး၊ ဘားအံ၊ မြဝတီ၊ ပုသိမ်၊ လွိုင်ကော်မြို့များသို့ တင်ပို့ရောင်းချရကြောင်း၊ လုပ်သားခ၊ လျှပ်စစ်မီတာခ၊ ထုပ်ပိုးခများစသည့် ကုန်ကျစရိတ်များရှိသော်လည်း ထိုက်သင့်သည့် အကျိုးအမြတ်ရရှိပါကြောင်း ကော်ဖီမှုန့်လုပ်ငန်းရှင်တစ်ဦး၏ ပြောပြချက်အရ သိရပါသည်။

DOCA(ပဲခူး)

            မော်လမြိုင်မြို့ ဘိလပ်မြေဈေးကွက်၌ တည်ဆောက်ရေးလုပ်ငန်းများကြောင့်  အရောင်းအဝယ်ကောင်းနေကြောင်း အိမ်ဆောက်ပစ္စည်းဆိုင်မှ တာဝန်ရှိသူတစ်ဦးက ပြောသည်။ ယခုတစ်ပတ် ဆင်(ထိုင်း) ဘိလပ်မြေက ကျပ် (၁၀၀၀)ဈေးတက်လာကြောင်း သိရှိရသည်။  ဈေးကွက်ထဲအရောင်းအဝယ်  ဖြစ်နေတဲ့ဈေးမှာ  ယခုအပတ်တွင် ကြံ့နှစ်ကောင်(အနီ) ကျပ်၉၈၀၀၊ ဆင်(ထိုင်း) ကျပ် ၁၁၅၀၀၊ ကြံ့တံဆိပ်(အဝါ) ကျပ် ၉၅၀၀ဖြင့် အရောင်းအဝယ်ဖြစ်နေပြီး၊ မော်လမြိုင်မြို့၌ ဓါတ်မြေဩဇာ ထုတ်လုပ်ရာတွင်ကုန်ကြမ်းများ ဈေးနှုန်းတက်လာသောကြောင့် ဓါတ်မြေဩဇာမှာ ဈေးနှုန်းတက်လာပြီး၊  အရောင်းအဝယ်အေးနေကြောင်း သိရှိရသည်။

             အရောင်းအဝယ်ဖြစ်နေသောဈေးမှာ ယခင်အပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါ တစ်အိတ်မှာ ကျပ် ၁၀၅၉၀၀၊ကွန်ပေါင်း ၂၀:၁၂:၁၂ 50kg ပါ တစ်အိတ်မှာ ကျပ် ၁၀၈၀၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါ တစ်အိတ်မှာ ကျပ် ၁၀၂၀၀၀၊ ပုလဲ(အသေး) ၄၆%  မြန်မာ (MPE) 50kg ပါ တစ်အိတ် မှာ ကျပ်၆၂၀၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါ တစ်အိတ်မှာ ကျပ်၉၆၀၀၀၊ ရှိခဲ့ပြီး ယခုပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါ တစ်အိတ်မှာ ကျပ် ၁၁၇၀၀၀၊ကွန်ပေါင်း ၂၀:၁၂:၁၂ 50kg ပါ တစ်အိတ်မှာ ကျပ် ၁၁၃၂၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါ တစ်အိတ်မှာ ကျပ် ၁၁၀၀၀၀၊ ပုလဲ(အသေး) ၄၆%  မြန်မာ (MPE) 50kg ပါ တစ်အိတ်မှာ ကျပ်၆၅၀၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါ တစ်အိတ်မှာ ကျပ်၉၈၀၀၀၊ ဖြင့် ဈေးနှုန်းပေါက်နေပီး ဝယ်ယူမှုနည်းပါးနေကြောင်း ဈေးကွက်အတွင်း ဓါတ်မြေဩဇာဆိုင်များမှ သိရှိရသည်။

DOCA(မွန်)

        မော်လမြိုင်မြို့၌ ယခုလ မေစတုတ္ထအပတ်တွင် ဘိလပ်မြေဈေးကွက်မှာ အရောင်းအဝယ် ပုံမှန်ရှိနေပြီး ဈေးနှုန်းတည်ငြိမ်နေကြောင်းသိရှိရသည်။ ဈေးကွက်ထဲ အရောင်းအဝယ်ပုံမှန်ဖြစ်နေသည့် ဈေးမှာ  ယခုအပတ်တွင် ကြံ့နှစ်ကောင်(အနီ) ကျပ်၁၀၃၀၀၊ ဆင်(ထိုင်း) ကျပ် ၁၀၅၀၀၊ ကြံ့တံဆိပ်(အဝါ) ကျပ်၉၅၀၀ ဖြင့် အရောင်းအဝယ်ဖြစ်နေပြီး၊ မော်လမြိုင်မြို့၌ ဓါတ်မြေဩဇာမှာ ဈေးနှုန်းတည်ငြိမ်နေပြီး အရောင်းအဝယ်အေးနေကြောင်း သိရှိရသည်။

      အရောင်းအဝယ်ဖြစ်နေသောဈေးမှာ ယခုအပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါ တစ်အိတ်လျှင် ကျပ် ၁၁၉၀၀၀၊ ကွန်ပေါင်း ၂၀:၁၂:၁၂ 50kg ပါ တစ်အိတ်လျှင် ကျပ်၁၂၀၀၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါ တစ်အိတ်လျှင် ကျပ် ၁၁၀၀၀၀၊ ပုလဲ(အသေး) ၄၆%  မြန်မာ (MPE) 50kg ပါ တစ်အိတ်လျှင် ကျပ်၆၈၀၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါ တစ်အိတ်လျှင် ကျပ် ၉၅၀၀၀ ဖြင့် အရောင်းအဝယ်ဖြစ်နေကြောင်း သိရှိရသည်။

DOCA(မွန်)

              ရန်ကုန်တိုင်းဒေသကြီး၊ လှိုင်မြို့နယ်၊ သီရိမင်္ဂလာဈေးတွင် မေလ (၁၇) ရက်နေ့မှ မေလ (၂၃) ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ကျိုက်ထို၊ တောင်စွန်းမှ ကနစိုးသီး ၁၅ ပိဿာ တစ်ခြင်းလျှင် ကျပ် ၁၅၀၀၀၊ ဘီးလင်း၊ တောင်စွန်းမှ ပိန္နဲသီး  အလုံးကြီး  ၁လုံးလျှင် ကျပ် ၁၅၀၀၀ ၊အလုံးလတ် ၁လုံးလျှင် ကျပ် ၁၀၀၀၀ ၊ အလုံးသေး ၁လုံးလျှင် ကျပ် ၅၀၀၀ မှ ၃၀၀၀၊ ကျိုက်ကော် မှ နာနတ်သီး အလုံးကြီး ၁လုံးလျှင် ကျပ် ၁၂၀၀ မှ ၁၀၀၀၊ အလုံးလတ် ၁လုံးလျှင် ကျပ် ၈၀၀ ၊ အလုံးသေး ၁လုံးလျှင် ကျပ် ၆၀၀ မှ ၄၀၀၊ ကောလင်း မှ ဖရဲသီး (855) အလုံးကြီး ၁လုံးလျှင် ကျပ် ၇၀၀၀၊ အလုံးလတ် ၁လုံးလျှင် ကျပ် ၆၀၀၀၊ အလုံးသေး ၁လုံးလျှင် ကျပ် ၅၀၀၀ မှ ၄၀၀၀ ၊ ဝမ်းတွင်း မှ ဖရဲသီး (211) အလုံးကြီး ၁လုံးလျှင် ကျပ် ၃၅၀၀၊ အလုံးလတ် ၁လုံးလျှင် ကျပ် ၂၅၀၀၊ အလုံးသေး ၁လုံးလျှင် ကျပ် ၂၀၀၀ မှ ၁၀၀၀ ၊  မှော်ဘီ၊ တိုက်ကြီးမှ မာလကာသီး အလုံးကြီး ၁လုံးလျှင် ကျပ် ၄၀၀၊ အလုံးလတ် ၁လုံးလျှင် ကျပ် ၃၀၀၊ အလုံးသေး ၁လုံးလျှင် ကျပ် ၂၀၀၊ ပုပ္ပါး၊ ဟင်္သာတ မှ သရက်သီး (စိန်တလုံး)အိပ်စွပ် အလုံး ၃၆ ပါ ၁ဖာလျှင် ကျပ် ၁၅၀၀၀၊ အလုံး လတ် အလုံး ၄၄ ပါ ၁ဖာလျှင် ကျပ် ၁၃၀၀၀၊ အလုံးသေး အလုံး ၄၈ ပါ ၁ဖာလျှင် ကျပ် ၉၀၀၀ ၊ တွံတေး မှ သရက်သီး (ရင်ကွဲ) အလုံးကြီး အလုံး ၈၀ လုံးပါ တောင်းတစ်တောင်းလျှင် ကျပ် ၁၄၀၀၀၊ အလုံးလတ် အလုံး ၁၀၀ ပါ တောင်းတစ် တောင်းလျှင် ကျပ် ၁၀၀၀၀၊ အလုံးသေး အလုံး ၁၂၀ ပါ တောင်းတစ်တောင်းလျှင် ကျပ် ၈၀၀၀၊ ဆွာ၊ မဒေါက် မှ သရက်သီး (မချစ်စု)  အလုံးကြီး အလုံး ၅၀ လုံးပါ တောင်းတစ်တောင်းလျှင် ကျပ် ၂၀၀၀၀၊ အလုံးလတ် အလုံး ၆၅ ပါ တောင်းတစ်တောင်းလျှင် ကျပ် ၁၆၀၀၀၊  အလုံးသေး အလုံး ၇၅ ပါ တောင်းတစ်တောင်းလျှင် ကျပ် ၁၄၀၀၀၊ ပြင်ဦးလွင်မှ စတော်ဘယ်ရီ ၅ ပိဿာ တစ်ခြင်းလျှင် ကျပ် ၂၅၀၀၀၊ ဈေးတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန်ဟင်းသီးဟင်းရွက်စိုက်ပျိုး ထုတ်လုပ်တင်ပို့ရောင်းချသူများအသင်း (MFVP) မှ သိရှိရပါသည်။

DOCA(ရန်ကုန်)

         ရှမ်းပြည်နယ်(တောင်ပိုင်း)၊ ရွှေရွာငံကုမ္ပဏီမှ ဒေသထွက်ကော်ဖီများကို ၂၀၂၂ ခုနှစ်၊ ဇန်နဝါရီလမှစ၍ ဧပြီလကုန်အထိ ထိုင်းနိုင်ငံသို့ ကော်ဖီ (၃၄၀) တန် တင်ပို့နိုင်ခဲ့ကြောင်း  သိရှိရပါသည်။ ဈေးနှုန်းအနေဖြင့် Polish Wash တစ်တန်လျှင် ကျပ်သိန်း (၁၂၀ မှ ၁၃၀) ဖြင့် (၁၃၆) တန်ကို လည်းကောင်း၊ Natural Dry တစ်တန်လျှင် ကျပ်သိန်း (၆၅ မှ ၇၀) ဖြင့် (၂၀၄) တန်ကိုလည်းကောင်း တင်ပို့ခဲ့ကြောင်း သိရှိရပါသည်။ လက်ရှိဒေသတွင်းတွင် Polish Wash တစ်ပိဿာ (၁၂၀၀၀  မှ ၁၃၀၀၀) ကျပ်၊ Green Bean တစ်ပိဿာ (၈၅၀၀ မှ ၁၀၀၀၀) ကျပ်၊ Natural Dry တစ်ပိဿာလျှင် (၆၀၀၀ မှ ၈၅၀၀) ကျပ်ရရှိခဲ့ကြောင်း ရွှေရွာငံကုမ္ပဏီထံမှ သိရှိရပါသည်။ ရွာငံမြို့နယ်သည် ရှမ်းပြည်နယ်(တောင်ပိုင်း)တွင် ကော်ဖီစိုက်ပျိုးမှုအများဆုံးမြို့နယ်တစ်ခုဖြစ်ပါသည်။  ယခင်နှစ်တွင် ကော်ဖီဈေးနှုန်းမှာ အနိမ့်ဆုံး (၃၀၀၀) ကျပ်မှ အမြင့်ဆုံး (၅၀၀၀) ကျပ်သာ ရှိခဲ့ကြောင်း သိရှိရပါသည်။

DOCA(ရှမ်း)