ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် မိသားစု တပိုင်တနိုင် မှို စိုက်ပျိုးမှုလုပ်ငန်း လုပ်ကိုင်ကြသူများ ဈေးကောင်းရရှိ၍ အဆင်ပြေလျက်ရှိကြောင်းသိရသည်။
ဓနုဖြူမြို့နယ် အမှတ်(၁၂)ရပ်ကွက်နှင့် အမှတ်(၁၇) ရပ်ကွက်အကြား ရေကာတာအနီးတွင် စိုက်ပျိုးထားသော မှိုစိုက်ပျိုးရေးခြံသို့ စိုက်ပျိုးရေးဦးစီးဌာန၊ ပြန်ကြားရေးနှင့် ပြည်သူဆက်ဆံရေး ဦးစီးဌာန၊ စားသုံးသူရေးရာဦးစီးဌာနတို့ ပူးပေါင်း၍ ၂၀၂၃ခုနှစ်၊ ဇန်နဝါရီလဆန်းပိုင်းတွင် ကွင်းဆင်း မေးမြန်းလေ့လာမှုများပြုလုပ်ခဲ့ကြသည်။ မှိုစိုက်ပျိုးရေးခြံ တာဝန်ခံဦးလှစိုးမှ မှိုစိုက်ပျိုးရာတွင် ပုံမှန်အပူချိန် ၂၅ဒီဂရီ ရရှိရန်လိုအပ်ကြောင်း၊ မှိုစိုက်ပျိုးမည်ဆိုလျှင် နွေ၊မိုး၊ ဆောင်း စိုက်ပျိုး၍ ရနိုင်ကြောင်း လိုအပ်သောအပူချိန်ကိုလည်းချိန်ညှိပေးရန် လိုအပ်ပါကြောင်း၊ မှိုစိုက်ပျိုးရာမှ လိုအပ်တာတွေကတော့ ဗေဒါ၊ စက္ကူချပ်၊ ကောက်ရိုးတို့ပဲဖြစ်ပါတယ်၊ အဓိကလိုအပ်တာကတော့ ဗေဒါပဲဖြစ်ပါတယ်၊ ဗေဒါဟာဆိုရင် မှိုဖြစ်ထွန်းမှုအတွက် အကောင်းဆုံးဓါတ်မြေဩဇာဖြစ်ကြောင်း သိရသည်။
ယခုမှိုစိုက်ခင်းမှာတော့ မှိုမျိုးစေ့ ၁၅၀၀ စိုက်ပျိုးထားရှိပြီး စတင်စိုက်ပျိုးသည့်ရက်မှ ၁၅ရက် နှင့် ၂၀ ရက်အတွင်း တစ်ပတ်လျှင် ၂ ကြိမ် ၃ ကြိမ်မက ခူးဆွတ်နိုင်ကြောင်း၊ မှိုစိုက်ရာတွင် အရင်းအနှီး တစ်သိန်းရင်းလျှင် အမြတ်အစွန်း ၂သိန်းကျော်ခန့် ကျန်ရှိကြောင်း တင်ပို့ရောင်းချရာတွင်လည်း မှိုအရွယ်အစား၊ အဖူးအပွင့် ပေါ်မူတည်၍ ဈေးနှုန်းအပြောင်းအလဲရှိကြောင်း၊ ဒေသတွင်းသာမက ရန်ကုန်သို့ တင်ပို့ရောင်းချကြောင်း မှို ၁ပိဿာကို ငွေ ၁၀၀၀၀ ကျပ်ဖြင့် ရောင်းချကြောင်း၊ တစ်ရက် လျှင် ပျမ်းမျှ ၁၉၀၀၀၀ကျပ် ဝင်ငွေရရှိလျှက်ရှိကြောင်း၊ ယခုလိုမှို စိုက်ပျိုးမှုကြောင့် ပုံမှန်ဝင်ငွေ ရရှိပါတယ်ဟု မှိုစိုက်ပျိုးရေး ခြံပိုင်ရှင်၏ ပြောကြားချက်အရသိရပါသည်။
ဆက်လက်၍ ဌာနဆိုင်ရာများမှ စိုက်ပျိုးရေးနည်းစနစ်များကို ပညာပေးဆွေးနွေးရာ မှိုသီးနှံသည် မြန်မာလူမျိုးတို့နှစ်သက်စွာ စားသုံးသောသီးနှံဖြစ်ပြီး မှိုစိုက်ပျိုးခြင်းသည် မြန်မာ လူမျိုးတို့နှင့်မစိမ်းပါ။ သဘာဝအလျှောက် တောင်ဘို့များတွင်လည်းကောင်း၊ ကောက်ရိုးပြတ်ပုံ တို့တွင် မှိုများပွင့်ထွက်လာသည်ကို တွေ့ရလေ့ရှိပါသည်။ ယင်းကိုအခြေခံ၍ ကျေးလက်တော များတွင် ကောက်ရိုးပုံများကို သီးသန့်ပုံ၍ ရေလောင်းပေးခြင်းဖြင့် ကောက်ရိုးမှိုစိုက်ပျိုးခြင်း ပေါ်ပေါက်လာခြင်းဖြစ်ကြောင်း မှိုသီးနှံသည် စိုက်ပျိုးရလွယ်၍ တစ်ပိုင်တနိုင်စိုက်ပျိုးပြီး ဝင်ငွေရှာဖွေ နိုင်ကြောင်းပြောကြားခဲ့ပါသည်။
မှိုစိုက်ပျိုးရာတွင် အရည်အသွေးပြည့်ဝသော မှိုမျိုးထုတ်များရွေးချယ် ဝယ်ယူစိုက်ပျိုးမှ သာလျှင် အထွက်နှုန်းကောင်းပြီး အောင်မြင်မှုရရှိနိုင်ပေမည်။ မှိုမျိုးထုတ်များကိုဖြည်သောအခါ မှိုနံ့သင်းနေရမည်။ အချဉ်ထွက်နေသော မှိုမျိုးထုတ်များကိုအသုံးမပြုသင့်ပါ။ မှိုစိုက်ရာတွင် လိုအပ်သောကုန်ကြမ်းဖြစ်သည့် ရှင်းသန့်ခြောက်သွေ့သော ကောက်ရိုးထုံး၊ ဗေဒါများကို စုဆောင်းပြီး ရေစိန်ရမည်။ ရေစိမ်ချိန် ရိုးပြတ်နှုတ်ပင် ၃နာရီကြာ၊ ကောက်ရိုးရေစိမ်ချိန် ၆နာရီကြာရမည်ဖြစ်ပြီး ရေစိမ်ပြီး ကုန်ကြမ်းများကို မှိုပုံမပြုလုပ်မီ ရေစစ်ပြီး အသင့်အနေအထားဖြစ်အောင် ပြုလုပ်ထားရမည်။ မှိုစိုက်ပျိုးရန်အတွက် ညီညာ၍ ရေမဝတ်သောနေရာကို ရွေးချယ်၍ အရိပ်ရပြီး လေဝင်၊ လေထွက် ကောင်းသောနေရာမျိုးတွင် ပိုမိုသင့်လျှော်သည်။ နွေရာသီဖြစ်ပါက အရိပ်ပြုလုပ်ပေးရမည်။ မှိုမျိုးထုတ်ကိုဖြည်၍ နှပ်စာများကို ခွက်တစ်ခုထဲတွင် ထည့်ကာ အလုံးအခဲ မကျန်အောင် ချေမွထားရမည်။ မှိုပုံအတွက် အာဟာရဓါတ် ထောက်ပံရန် အပူနှင့် အစိုဓါတ်ကို ထိန်းထားနိုင်ရန် နုပ်နုပ်စင်းအခြောက်ခံထားသည့် ဗေဒါ ၊ နေကြာ၊ လဲမှိုအူတိုင် (သို့မဟုတ်) အလေအလွင့်၊ ပဲပင်အမျိုးမျိုး၊ ငှက်ပျောအူ စသည့်တို့မှ တစ်မျိုးမျိုး (၂)ပြည်ခန့် နှင့် တိရိစ္ဆာန်ချေး (ဝက်၊ကြက်၊နွား၊ မြင်း၊ ကျွဲ) အခြောက်မှုန့် (၁)ပြည်၊ ဖွဲနု၊ နို့ဆီဗူး (၃)လုံးကို သမအောင်ရောစပ်ကာ ဖြည့်စွက်စာအဖြစ် ကျွေးမွေးရနိုင်ပါကြောင်း၊ ဇယားပုံစံခွက် ကောက်ရိုး၊ ဗေဒါများ ကိုအောက်ခြေအနံ (၁)ပေခွဲ၊ အပေါ်ဖက်အနံ (၁)ပေ၊ အမြင့်(၁)ပေခွဲ နှင့် အလျား (၄)ပေထုရှိသော ဇယားပုံစံခွက်ထဲသို့ ဖြန့်ခင်းရမည်။ ကောက်ရိုးများပေါ်တွင် ရေဖြန်းပြီး အထု (၃)လက်မခန့် အထိရှိအောင် တင်နင်းပေးရမည်။ မှိုမျိုးထုတ်ကို ဖြည်၍ နှပ်စာများကို ခွက်တစ်ခုထဲတွင်ထည့်ကာ အလုံးအခဲမကျန်အောင် ချေမွထားရမည်။ ဖြည့်စွက်စာများအပေါ်မှ အသင့်ချေမွထားသော မှိုများကို အတွင်းဘက် မရောက်လွန်း၊ အပြင်ဘက်ရောက်လွန်းခြင်း မရှိအောင် သတိပြု၍ ဖြူးထည့်ရန်ဖြစ်ပါကြောင်း၊ အထက်ပါအတိုင်း ကောက်ရိုးထုံးစီခြင်း၊ ရေဖြန်းနင်းခြင်း၊ ဖြည်စွက်စာနှင့် မှိုမျိုးထည့်ခြင်းတို့ကို ဆောင်းနှင့် မိုးရာသီတွင် (၅)လွှာမှ (၇)လွှာအထိ နွေတွင် (၃)လွှာမှ (၅)လွှာအထိပြုလုပ်ပါရန်၊ အပေါ်ဆုံးအလွှာတွင် ဖြည့်စွက်စာနှင့် မှိုများကို တစ်ပြင်လုံးဖြူးထည့်၍ အပေါ်မှ ကောက်ရိုးအကြေခပ်ပါးပါးအုပ်ပါရန်၊ ပလတ်စတစ်စ ကိုခေါင်မိုးပုံချိုး၍ လေလုံအောင်ဖုံး အုပ်ထားပါရန်၊ နေရောင်ခြည်တိုက်ရိုက်မကျစေရန်၊ ပလတ်စတစ် စပေါ်မှ သင့်တော်ရာပစ္စည်းတစ်ခုခုနှင့်ဖုံးအုပ်ပါ။ ရေလောင်းလျှင်ယူရီယားမြေဩဇာ စတီးဇွန်း (၂)ဇွန်းထည့်၍ ရေဖြန်းပုံးဖြင့် ၃ပုံးလောင်းပါ။စိုက်ပျိုးပြီး ၄-၅ ရက်သားတွင် ရေလောင်းနည်း အတိုင်းရေလောင်းပါ၊ (၇-၁၀) ရက်သားတွင် ဆန်ကွဲစေ့သဏ္ဍာန် မှိုသန္ဓေခဲလေးများကို မြင်ရပြီးနောက် နေ့စဉ်နေအေးသောအချိန်တွင် ပလတ်စတစ်ကို (၁၅)မိနစ် လှပ်ပေးရန်၊ မှိုသန္ဓေစ မြင်ရပြီး (၄-၅)ရက်အတွင်း ခူးဆွတ်နိုင်သော မှိုငုံကြီးများ အဆင့်သို့ရောက်ရှိမည်။ (၃) ရက်ခန့် ဆက်တိုက်နှုတ်ယူပြီး (၃-၅) ပိဿာအထိ ထွက်နိုင်ပါသည်။ ပထမအကြိမ်မှိုခူးပြီး အားကောင်းသည့် မှိုငုံမရှိတော့ပါက ကျန်မှိုငုံအားလုံးကိုပါ နှုတ်ယူပြီး ရေလောင်းလျှင် ဒုတိယအကြိမ် (၁-၂) ပိဿာအထိ မှိုထွက်နိုင်ပါကြောင်း၊ မှိုသီးနှံသည် စိုက်ပျိုးရလွယ်၍ ဈေးကွက်လည်းရရှိသဖြင့် စိုက်ပျိုးသင့်သောသီးနှံဖြစ်ကြောင်းနှင့် ငွေနှင်းမှိုကိုလည်းစိုက်ပျိုး၍ တပိုင်တနိုင် စီးပွားဖြစ် စိုက်ပျိုး ၍ရနိုင်ကြောင်း ဈေးကွက်လည်းရှိကြောင်းကို ပညာပေးဆွေးနွေးခဲ့ကြောင်း သိရပါသည်။
DOCA(ဧရာဝတီ)
