ပြည်တွင်းကုန်သွယ်မှုသတင်း

            စားသုံးသူရေးရာဦးစီးဌာန၊ မန္တလေးတိုင်း‌ဒေသကြီး၊ မိတ္ထီလာခရိုင်ဦးစီးမှူးရုံးမှ ဝန်ထမ်းများသည် (၂၇.၁.၂၀၂၂)ရက်နေ့ (၁၁:၀၀)နာရီအချိန်တွင် မိတ္ထီလာမြို့နယ် အင်းပက်လက်ကျေးရွာနှင့် ရေချို ကျေးရွာ တို့ရှိ ဆိတ်မွေးမြူရေးလုပ်ငန်းရှင် တောင်သူများနှင့် သွားရောက်တွေ့ဆုံမေးမြန်းခဲ့ပါသည်။

            မိတ္ထီလာမြို့နယ်၊ အင်းပက်လက်ကျေးရွာနှင့် ‌ရေချိုကျေးရွာရှိတောင်သူများသည် လယ်ယာစိုက်ပျိုးရေး လုပ်ငန်းကို အဓိက လုပ်ကိုင်ကြပြီး အများအားဖြင့် စပါး၊နှမ်း၊မြေပဲ၊ကုလားပဲ၊ ပဲစဉ်းငုံ၊ ဝါသီးနှံများကို အများဆုံး စိုက်ပျိုးကြသည်။ ယခုအခါတွင် စိုက်ပျိုးရေးလုပ်ငန်းအပြင် ဆိတ်မွေးမြူရေးလုပ်ငန်းကို အဓိကထား၍ တွဲဖက် လုပ်ကိုင်လာကြသည်ကို တွေ့ရကြောင်း သိရှိရပါသည်။ အင်းပက်လက်ကျေးရွာတွင် အိမ်ခြေ(၃၅၀)ရှိပြီး ဆိတ် မွေးမြူကြသည့် တောင်သူ (၅၃)ဦးနှင့် ရေချိုကျေးရွာတွင် အိမ်ခြေ(၅၀၁) ရှိပြီး ဆိတ်မွေးမြူသည့် တောင်သူ (၄၀)ဦးခန့်ရှိကြောင်း၊ ထိုကျေးရွာများတွင် ဆိတ်မွေးမြူရေးလုပ်ငန်းကို အများအားဖြင့် တစ်ပိုင်တစ်နိုင်မွေးမြူ ကြပြီး အစာဝယ်မကျွေးရပဲ တောထဲလွှတ်ကျောင်းသည့်စနစ်ဖြင့် မွေးမြူကြပြီး၊ မွေးမြူသူ (၁)ဦးတွင်အနည်းဆုံး ဆိတ်အကောင် ရေ(၂၀မှ ၅၀ထိ) မွေးမြူကြကြောင်း သိရှိရသည်။ ဆိတ်မွေးမြူရေးလုပ်ငန်းကို အစာဝယ်ကျွေး သည့် စနစ်ဖြင့် စီးပွားဖြစ်လုပ်ကိုင်သည့် မွေးမြူရေးလုပ်ငန်းရှင် တောင်သူ(၃)ဦးရှိကြောင်း၊ ၁ ဦးလျှင် ဆိတ် အကောင်ရေ (၂၀၀မှ ၃၀၀ထိ) မွေးမြူကြကြောင်း သိရှိရပါသည်။

            ဆိတ်မွေးမြူရာတွင် အသားတိုးဆိတ်နှင့် မျိုးပွားဆိတ်ဟူ၍ ခွဲခြားမွေးမြူထားကြကြောင်း၊ အသားတိုး ဆိတ်များကို မွေးမြူရာတွင် ဆိတ်ထီးနှင့် ဆိတ်မများကို သီးသန့်ခွဲခြားထားမွေးမြူကြကြောင်း တွေ့ရှိရပြီး၊ တစ် နှစ်မွေးမြူပါက ၃၅ ပိဿာအထိကြီးထွားမှုရှိကြောင်း၊ မျိုးပွားဆိတ်အဖြစ်မွေးမြူထားသော ဆိတ်များမှာ ၁ နှစ်လျှင် ၂ သား ပုံမှန် မွေးဖွားကြောင်းသိရပြီး တစ်ခါမွေးလျှင် (၁ ကောင်မှ ၂ ကောင် ၃ ကောင်အထိ) သားပေါက်များ မွေး ဖွားနိုင်ကြောင်း သိရှိရပါသည်။ အသားတိုးဆိတ်ကြီး (ကစီး)မျိုး ၁ နှစ်ခွဲ အရွယ်ကို (၁၀၀၀၀၀) ကျပ် စျေးပေး၍ ပခုက္ကူ၊ ညောင်ဦးမြို့နယ်များဘက်မှ မျိုးအဖြစ်ဝယ်ယူမွေးမြူကြပြီး မျိုးပွားဆိတ်သေး ၁ နှစ်သား အရွယ်ကို (၇၅၀၀၀) ကျပ်စျေးဖြင့် မြို့နယ်တွင်းမှ ဝယ်ယူမွေးမြူကြရကြောင်း သိရှိရပါသည်။ ဆိတ်အကောင်ရေ (၅၀)ခန့် မွေးမြူနိုင်သော ဆိတ်ခြံ (၁) ခြံ တည်ဆောက်ရန် (၁၅)သိန်းကျပ်ခန့် ကုန်ကျမှာဖြစ်ကြောင်း၊ အသားတိုးဆိတ် ကြီးမျိုးများ စတင်မွေးမြူလျှင် ဆိတ်တန်ဖိုးနှင့်ခြံတန်ဖိုးပေါင်း (၆၅) သိန်းကျပ်ခန့် ကုန်ကျနိုင်ပြီး ဆိတ်သေးမျိုး (မျိုးပွား) စတင် မွေးမြူလျှင် ဆိတ်တန်ဖိုးနှင့် ခြံတန်ဖိုးပေါင်း (၅၂) သိန်းကျော်ကုန်ကျနိုင်ကြောင်း ဆိတ်မွေးမြူ ‌ရေးလုပ်ငန်းရှင်များထံမှ သိရှိရပါသည်။

            အစာဝယ်ယူကျွေးမွေးရသော မွေးမြူ‌ရေးဆိတ်များအတွက် အစာအဖြစ် ဇီးသီးကြိတ်ဖက်၊ ဝါစေ့ကြိတ် ဖက်၊  ပဲအနှစ်နှင့် ကုလားပဲအခွံများကို ရောနယ်၍ကျွေးရပါသည်။ ဇီးကြိတ်ဖက်နှင့် ဝါစေ့ကြိတ်ဖက်များကို ပခုက္ကူမြို့နယ်ဘက်မှ ဝယ်ယူရပြီး ပဲအနှစ်နှင့် ကုလားပဲအခွံများကို မိတ္ထီလာမြို့နယ်နှင့် မလှိုင်မြို့နယ်ရှိ ပဲခွဲ စက်များမှ ဝယ်ယူကြရကြောင်း သိရှိရပါသည်။ ဇီးကြိတ်ဖက် ၁ အိတ်လျှင် ၂၀၀၀ ကျပ်၊ ဝါစေ့ကြိတ် ဖက် ၁ အိတ်လျှင် ၁၅၀၀၀ ကျပ်၊ ပဲအနှစ် ၁ ပိဿာလျှင် ၁၀၀၀ ကျပ်၊ ကုလားပဲအခွံ ၁ ပိဿာလျှင် ၇၅၀ ကျပ် စျေးနှုန်း ဖြင့် ဝယ်ယူကြရကောင်း သိရှိရပါသည်။

            ဆိတ်များသည် မိုးတွင်းကာလတွင် ရာသီဥတုဒဏ်မခံနိုင်၍ ပိုမို ဂရုစိုက်ရကြောင်း၊ ဆိတ်များရောင်းချ ရာတွင်အကောင်ပြတ်စနစ်ဖြင့် ၁ ပိဿာလျှင် ၆၀၀၀ ကျပ်စျေးဖြင့်ရောင်းချကြကြောင်းသိရှိရပါသည်။ မိတ္ထီလာ မြို့ (နွားပွဲ/ဆိတ်ပွဲ)စျေးသို့လည်းကောင်း ရန်ကုန်၊ မော်လမြိုင်၊ မန္တလေးမြို့များသို့လည်းကောင်း တင်ပို့ရောင်းချ ကြောင်း သိရှိရပါသည်။ ဆိတ်တစ်ကောင်သည် ၁ နှစ်လျှင် (၄ ကောင်မှ ၆ ကောင်အထိ) မျိုးပွားနိုင်၍ တွက်ခြေ ကိုက်သဖြင့် အချို့မိသားစုများသည် ဆိတ်မွေးမြူရေးလုပ်ငန်းဖြင့် အသက်မွေးဝမ်းကျောင်းပြုကြကြောင်း သိရှိရ ပါသည်။

            မိတ္ထီလာမြို့နယ်၊ အင်းပက်လက်ကျေးရွာနှင့် ရေချိုကျေးရွာရှိ ဆိတ်မွေးမြူရေးလုပ်ငန်းသည် ယခုလို Covid-19 ကာလအတွင်းနှင့် Covid-19 အလွန်ကာလများတွင် အခြားစီးပွား‌ရေးလုပ်ငန်းများနှင့် နှိုင်းယှဉ်ပါက ရင်းနှီးမြှပ်နှံချိန်ကာလ တိုတောင်းပြီး အချိန်တိုအတွင်း တွက်ခြေကိုက်၍ ဝင်ငွေရရှိနိုင်သော လုပ်ငန်းတစ်ခုဖြစ် သည့်အတွက်ကျေးရွာနေပြည်သူများသည် တိုးချဲ့မွေးမြူလုပ်ကိုင်လာကြသည်ကိုတွေ့ရှိရပြီး နိုင်ငံတော်အတွက် စီးပွားရေးအလားအလာကောင်းသော လုပ်ငန်းတစ်ခုဖြစ်ကြောင်း တင်ပြလိုက်ရပါသည်။

DOCA(မန္တလေး)

၁.၂.၂၀၂၂ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်-

             မန္တလေးတိုင်းဒေသကြီး၊ညောင်ဦးခရိုင်၊ကျောက်ပန်းတောင်းမြို့နယ်အနေဖြင့် မန်ကျည်းအများဆုံးစိုက်ပျိုးထွက်ရှိရာ မြို့နယ်ဖြစ်သည့်အလျောက် စိုက်ပျိုးဧက(၁၅၆၀) ဧက၊အိမ်ခြံမြေ ဥယျာဉ် စိုက်ဧကမှာ(၇၈၉)ဧက၊ အလေ့ကျပေါက်ပင်ဧကမှာ(၇၇၁)ဧကဖြစ်၍ စုစုပေါင်း(၃၁၂၀)ဧက ရှိကြောင်း သိရှိရပါသည်။ကမ္ဘာပေါ်တွင် မန်ကျည်းကို အိန္ဒိယနိုင်ငံမှ အများဆုံးစိုက်ပျိုးထွက်ရှိပြီး မြန်မာနိုင်ငံသည် ဒုတိယ အများဆုံးထွက်ရှိသော နိုင်ငံဖြစ်ပါသည်။မကျီးပင်သည် ပူပြင်းခြောက်သွေ့သော ရာသီဥတုကို ကြိုက်နှစ်သက်ပြီး ရာသီဥတုအရမ်းပူပြင်းခြင်း၊ မိုးဦးနောက်ကျခြင်းတို့ကြောင့်လည်း အသီးအထွက်နှုန်း လျော့ကျတတ်ကြောင်း သိရပါသည်။မန္တလေးတိုင်းဒေသကြီးအတွင်း မကျီးအများဆုံးထွက်ရှိသောမြို့များမှာ ကျောက်ပန်းတောင်း၊ မိတ္ထီလာ၊ ရမည်းသင်း၊ ပျော်ဘွယ် စသည့်မြို့များဖြစ်ကြပြီး ကျောက်ပန်းတောင်းမြို့နယ်အတွင်း အဓိက ထွက်ရှိသော ကျေးရွာများမှာ ပုပ္ပား၊သံဘို၊ဆည်ပေါက်၊ညောင်ကန်၊မြောက်တော၊ချိုင်း၊ပုပ္ပားလွင်၊ဆုံကုန်း စသည့် ကျေးရွာတို့မှာ အများဆုံးထွက်ရှိကာ ပုပ္ပားကျေးရွာမှထွက်ရှိသော မန်ကျည်းမှာ အရည်အသွေး အကောင်းမွန်ဆုံး ဖြစ်ကြောင်းသိရပါသည်။ကျောက်ပန်းတောင်းမြို့နယ်အနေဖြင့် ဇန်နဝါရီလ နောက်ဆုံးပါတ်မှစတင်၍ မန်ကျည်းကို အသား၊အလုံး၊ဓားဆင်း အဖြစ်စတင်ကာ ဈေးကွက်အတွင်း အရောင်းအဝယ် ပြုလုပ်ကြပါသည်။

          ၂၀၂၀ ခုနှစ်တွင် ကျောက်ပန်းတောင်းမြို့နယ်အနေဖြင့် မန်ကျည်းအထွက်ပိဿာပေါင်း (၂၅၀၀၀၀၀)ကျော်သာ ထွက်ရှိခဲ့ကြောင်း သိရပါသည်။မကျီးများစတင်ပေါ်ထွက်ချိန်ဖြစ်သည့် ဇန်နဝါရီလတွင် မန်ကျည်းအသား အစေ့လွတ်(ထိပ်စ) တစ်ပိဿာလျှင်(၃၅၀၀)ကျပ် ၊အလတ်စ တစ် ပိဿာလျှင်(၃၂၀၀)ကျပ်၊အောက်စ တစ်ပိဿာလျှင် (၃၀၀၀)ကျပ်၊ မကျီးအလုံး(အကြောပါ) တစ်ပိဿာလျှင် (၁၆၀၀)ကျပ်၊အလုံး(အကြောမပါ)တစ်ပိဿာလျှင် (၁၂၅၀)ကျပ်ဖြင့် စတင်အရောင်းအဝယ်ဖြစ်ခဲ့ပြီး နှစ်ကုန်ဒီဇင်ဘာလ၌ မန်ကျည်းအသား အစေ့လွတ် (ထိပ်စ)တစ်ပိဿာလျှင် (၃၅၀၀) ကျပ်၊အလတ်စ တစ်ပိသာလျှင် (၃၂၀၀)ကျပ်၊အောက်စ တစ်ပိဿာလျှင် (၃၀၀၀)ကျပ်နှင့် အကြော မပါအလုံးတစ်ပိဿာလျှင် (၁၉၅၀)ကျပ်တို့ဖြင့် ဈေးပိတ်ခဲ့ပါသည်။

          ၂၀၂၁ ခုနှစ်တွင် ကျောက်ပန်းတောင်းမြို့နယ်အနေဖြင့် မန်ကျည်းအထွက်ပိဿာ (၃၅၀၀၀၀၀)  ခန့်ထွက်ရှိခဲ့ကြောင်း သိရှိရပြီး စတင်ပေါ်ချိန်တွင် မန်ကျည်းအသား အစေ့လွတ် (ထိပ်စ) တစ်ပိဿာ (၂၃၀၀)ကျပ်၊အလတ်စ တစ်ပိဿာ (၂၂၅၀)ကျပ်နှင့် အောက်စတစ်ပိဿာ (၂၂၀၀) ကျပ်တို့ဖြင့် စတင်၍အရောင်းအဝယ်ဖြစ်ခဲ့ပါသည်။ဒီဇင်ဘာလတွင် အသားအစေ့လွတ်ထိပ်စ တစ်ပိဿာ(၂၇၅၀) ကျပ် ၊ အလတ်စ (၂၆၀၀) ကျပ်၊  အောက်စ (၂၂၀၀) ကျပ် တို့ဖြင့် ရောင်းချခဲ့ပြီး ၂၀၂၁ ခုနှစ်၏ မန်ကျည်းအသားအစေ့လွတ်လက်ကျန်ပိဿာမှာ(၆၀၀၀၀၀)နှင့် မန်ကျည်းအလုံး (အကြောမပါ) မှာ (၄၀၀၀၀၀) ပိဿာခန့် ကျန်ရှိကြောင်းသိရှိရပြီး ယနေ့ဈေးကွက်အတွင်း မန်ကျည်းအဟောင်း အသား (ထိပ်စ) တစ် ပိဿာလျှင် (၂၈၀၀)ကျပ်၊ အလတ်စ(၂၅၀၀)ကျပ် ၊အောက်စ (၂၄၀၀) ကျပ်တို့ဖြင့် အရောင်းအဝယ် ဖြစ်နေကြောင်း သိရပါသည်။၂၀၂၂ ခုနှစ် ဈေးကွက်အတွင်း မန်ကျည်းများ ဝင်ရောက်နေပြီဖြစ်ရာ ပုပ္ပား မန်ကျည်းအသစ်မှာ ထိပ်စတစ်ပိဿာ(၄၀၀၀)ကျပ်၊ အလတ်စတစ်ပိဿာ(၃၅၀၀) ကျပ်တို့ဖြင့် အရောင်းအဝယ်စတင်ပြုလုပ်လျက်ရှိပြီး တစ်ရက်လျှင် အဝင်ပိဿာ (၂၀၀-၃၀၀)ခန့် ဝင်ရောက်နေပြီဖြစ် ကြောင်း သိရှိရပါသည်။ မကျီးအရောင်း အဝယ်မှာလည်း ယနေ့ချိန်တွင် ပြည်ပသို့တင်ပို့ ရောင်းချနိုင်ခြင်း မရှိသေးကြောင်း၊ပြည်တွင်း ဈေးကွက်များဖြစ်သည့် ရန်ကုန်၊ မန္တလေး၊ နေပြည်တော် မြို့များသို့ အဓိကတင်ပို့ကြပြီး တစ်ပါတ်လျှင် ကုန်ချိန်ပိဿာ(၇၀၀၀) မှ (၁၀၀၀၀) ပိဿာထိသာ တင်ပို့ရောင်းချနေကြောင်း သိရှိရပြီး အရောင်းအဝယ်အေးလျက်ရှိကြောင်း ဒေသခံ မန်ကျည်းကုန်သည် တစ်ဦးထံမှ သိရှိရပါသည်။ မန်ကျည်းအား တန်ဖိုးမြှင့် ထုတ်ကုန် (value added) အနေဖြင့် ထုတ်လုပ် တင်ပို့ရောင်းချမည်ဆိုပါက ဒေသတွင်း အလုပ်အကိုင်များ ဖန်တီးပေးနိုင်သလို ဝင်ငွေမှာလည်း တိုးတက်ရရှိနိုင်ပြီး ပြည်ပများမှဝင်ရောက်နေသော မန်ကျည်းအနှစ်၊မန်ကျည်းဖျော်ရည်၊ မန်ကျည်းတော်ဖီ၊ မန်ကျည်းပလိပ်ပြား စသည့်မန်ကျည်းထုတ် ကုန် ပစ္စည်းများအား အစားထိုးသုံးစွဲလာခြင်းဖြင့် နိုင်ငံခြားငွေ သုံးစွဲရာတွင် ချွေတာရာရောက်မည် ဖြစ်၍ ကုန်သည်များမှ စိတ်ဝင်စားလျက်ရှိကြောင်း သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

           ပြည်ထောင်စုနယ်မြေအတွင်း ၂၀၂၂ခုနှစ်၊ ဇန်နဝါရီလ ပထမပတ်အတွင်း မြေပဲဆံ(၁)ပိဿာ (၂၄၅၀)ကျပ်နှုန်းရှိခဲ့ပြီး မြေပဲဆီဈေးမှာ ဆီစက်ရှိ အရောင်းဆိုင်များတွင် (၁)ပိဿာ (၆၅၀၀)ကျပ်၊ အခြားကုန်စုံနှင့်တွဲဖက်ရောင်းဆိုင်များတွင် (၁)ပိဿာ (၇၀၀၀) ကျပ်ဈေးဖြစ်ပြီး ဒုတိယပတ်တွင် မြေပဲဆံ (၁)ပိဿာ (၂၆၀၀)ကျပ်နှုန်း ဖြစ်လာကြောင်း၊ ဆီဈေးတွင် ဆီစက်ရှိအ‌ရောင်းဆိုင်များတွင်(၁)ပိဿာ (၇၀၀၀)ကျပ်၊ အခြားဆိုင်များတွင် (၇၂၀၀)ကျပ်၊ တတိယပတ် တွင် မြေပဲဆံဈေး (၂၈၀၀)ကျပ်ဈေးအထိ မြင့်တက်လာသည်ကိုတွေ့ရပြီး မြေပဲဆီဈေးမှာ ဆီစက်ရှိအရောင်းဆိုင်များတွင် (၇၂၀၀)ကျပ်၊ အခြားဆိုင်များတွင် (၇၅၀၀) ကျပ်ဈေးတို့ဖြစ်ပေါ်ခဲ့ပါသည်။ ဇန်နဝါရီလ၏ နောက်ဆုံးပတ်အတွင်း (၂၈.၁.၂၀၂၂)နေ့တွင် မြေပဲဆံဈေး (၁)ပိဿာ(၂၉၅၀)ကျပ်ဈေးနှုန်း ရှိနေသည့်အနေအထားကို တွေ့ရှိရသော်လည်း မြေပဲဆီဈေး မြင့်တက်လာမှု မရှိခြင်းမှာ ပဲဖတ်ရောင်းချရမှုဈေးနှုန်း(၁)ပိဿာ (၁၀၀၀)ကျပ်မှ (၁၃၀၀)ကျပ်ဈေးနှုန်း ရရှိခြင်းကြောင့် ဖြစ်ပါကြောင်း သိရှိရပါသည်။

          ဈေးကွက်အတွင်းဝင်ရောက်မှုရှိနေသည့် ထုပ်ပိုးပုံစံလှပမှုရှိသော ပဲဆီဈေးနှုန်းတို့သည် (၁)ပိဿာ (၈၀၀၀)ကျပ်အထက်တွင်ရှိ၍ ဒေသတွင်းကြိတ်ခွဲမှုမှရရှိသော မြေပဲဆီများကို အသုံးပြုမှုပိုမိုလာသည်ကို တွေ့ရှိရပါသည်။ မြေပဲဆီ စားသုံးမှုအခြေအနေကြောင့် မြေပဲဆံဈေးကွက်ဖြစ်ပေါ်မှုတွင် ဇန်နဝါရီလ၊ တတိယပတ် ‌တွင်း (၂၈၀၀)ကျပ်ဈေးနှုန်းဖြစ်ပေါ်နေသည့်အချိန် မန္တလေးတင်ပို့မှုများမှ (၂၇၀၀)ကျပ် ဈေးသာရရှိသဖြင့် တင်ပို့ခနှုတ်လျှင် (၁)ပိဿာ (၂၆၂၅)ကျပ်သာ ရရှိခဲ့ပါသည်။ ယခုလ၏ နောက်ဆုံးပတ်တွင်လည်း ဒေသတွင်း မြေပဲဆံ (၁)ပိဿာ(၂၉၅၀)ကျပ် ဈေးနှုန်းဖြစ်ပေါ်ချိန် မန္တလေးဈေးကွက်တွင် (၁)ပိဿာ (၃၀၀၀)ကျပ်ဈေးနှုန်းသာရှိနေ၍ မြေပဲဆံတင်ပို့ရောင်းချမှုအခြေအနေမှာ ဒေသတွင်း ဆီကြိတ်ခွဲမှုအတွက်သာ ရောင်းဝယ်မှုဖြစ်နေကြောင်း သိရှိရပါသည်။

          မတ်လအတွင်းတွင်လည်း နွေရေသွင်းမြေပဲများ ထွက်ရှိလာမည်ဖြစ်သဖြင့် မြေပဲဆံဈေး တည်ငြိမ်နေမည်ဟု ခန့်မှန်းရပါသည်။

စားသုံးသူ‌ရေးရာဦးစီးဌာန

ပြည်ထောင်စုနယ်မြေ

                 ရှမ်းပြည်နယ်(အရှေ့ပိုင်း) တာချီလိတ်ခရိုင်၊ တာချီလိတ်မြို့နယ်အတွင်းရှိ ဖန်မင်အုပ်စု၊ ဝမ်ကောကျေးရွာနှင့် တာလေမြို့နယ်ခွဲတို့တွင် GAP-Good Agriculture Practices စနစ်ဖြင့် (သီးနှံများစတင် စိုက်ပျိုးရန် မြေစတင်ရွေးချယ်ချိန်မှစ၍ စားသုံးသူများ လက်ဝယ်ရောက်ရှိသည် အထိ စိုက်ပျိုးထုတ်လုပ်မှုအဆင့်တိုင်းကို သီးနှံများ၌ ဓာတုဆေးများ၊ ကူးစက်မှုများစသည့် ဘေးအန္တရာယ်ကင်းရှင်းရေးကို အထူးဂရုပြုဆောင်ရွက်ခြင်း အလေ့အကျင့်ကောင်း) စိုက်ပျိုးထား ရှိသော ပျားလိမ္မော်ဧက(၅၀၀)ကျော်ပိုင်ဆိုင်သော ရွှေရှင်းပျားလိမ္မာ်ခြံ၏ စိုက်ဧက၊ သွင်းအားစု၊ သီးနှံထွက်ရှိမှုအခြေအနေနှင့် ဈေးနှုန်း/ဈေးကွက်အခြေအနေတို့အား သိရှိနိုင်ပါရန် ရွှေရှင်းပျား လိမ္မော်ခြံ လုပ်ငန်းရှင်နှင့် တွေ့ဆုံမေးမြန်းခဲ့ပါသည်။

                ပျားလိမ္မော်သည် အေး၍ စိုစွတ်သော ရာသီဥတုကို နှစ်သက်၍ ရေသွင်းစိုက်ပျိုးရသော သီးနှံအမျိုးအစားဖြစ်သော်လည်း ရေဝပ်မှုဒဏ်ကိုမခံနိုင်သော အပင်မျိုးဖြစ်ပါသည်။ လေဝင် လေထွက်ကောင်းရန်အတွက် ပင်ခြားတန်းခြား (၉'×၁၈') ခြား၍ စိုက်ပျိုးရသော အပင်မျိုး ဖြစ်ပြီး တစ်နှစ်သားအောက်အပင်များကို သဘာဝမြေဩဇာဖြစ်သော နွားချေးကို(၃)လတစ်ကြိမ် ထည့်သွင်း ပေးရပါသည်။ အပင်သုံးနှစ်သားအရွယ်မှသာ အသီးစတင်ခူးစွတ်ပြီး အသီးမခူးစွတ်မီ(၃)ပတ်အလို တွင် ပိုးသတ်ဆေးပက်ဖြန်းခြင်း မပြုလုပ်တော့ကြောင်း သိရှိရပါသည်။

              အသီးခူးစွတ်ချိန်မှာ ဒီဇင်ဘာလမှ မတ်လအထိဖြစ်ပြီး အသီးခူးစွတ်ရာတွင် အသီးအတွဲလိုက် ရှိသော အကိုင်းအခက်များကို ကတ်ကြေးဖြင့် ဖြတ်တောက်ပြီးနောက် အသီးတစ်လုံးခြင်းစီ ဖြစ်အောင် ပြန်လည်ဖြတ်တောက်ကာ ၎င်းအသီးများကို သန့်ရှင်းအောင်ပြုလုပ် ထုပ်ပိုးကြပါသည်။ ပျားလိမ္မော် တစ်ပင်လျှင် အထွက်နှုန်းကီလို (၅၀) မှ (၆၀)အထိ ထွက်ရှိကြောင်း ယခုနှစ်တွင် တစ်ကီလိုဈေးနှုန်းမှာ ကျပ်(၂၅၀၀) မှ ကျပ်(၃၀၀၀)အထိ ပေါက်ဈေးရှိပြီး ယခင်နှစ် တစ်ကီလို ဈေးနှုန်းမှာ ကျပ်(၂၀၀၀)မှ ကျပ်(၃၀၀၀)အထိ ရှိသဖြင့် ဈေးပိုမိုရရှိကြောင်း တွေ့ရှိရပါသည်။

                 ရွှေရှင်းပျားလိမ္မော်ခြံအနေဖြင့် ဒေသအတွင်းဖြစ်သော ကျိုင်းတုံခရိုင်၊ တာချီလိတ်ခရိုင်နှင့် မိုင်းဆတ်ခရိုင်များရှိ မြို့နယ်များသို့ ဖြန့်ဖြူးရောင်းချလျက်ရှိပါသည်။ ပြည်မ (ရန်ကုန်-မန္တလေး)မြို့ များသို့ တင်ပို့ရန်ဆန္ဒရှိသော်လည်း လမ်းပန်းဆက်သွယ်ရေးကွာဝေးခြင်းနှင့် သယ်ယူစရိတ်ကြီးမြင့် ခြင်းစသည့်အခက်အခဲများကြောင့် နယ်စပ်ဒေသဖြစ်သည့်အလျောက် အိမ်နီးချင်းနိုင်ငံများသို့ တင်ပို့ ရန်သာ အဓိကထားဆောင်ရွက်လျက်ရှိပါသည်။ ယခင်နှစ်က ထိုင်းနိုင်ငံသို့ ပျားလိမ္မော် တန်ချိန် (၁၀၅၆)တန် တင်ပို့နိုင်ခဲ့ပြီး ယခုနှစ်တွင် ဒေသအတွင်းစားသုံးရန်အတွက်သာ ဖြန့်ဖြူးရောင်းချနိုင်ပါသည်။ ထိုင်းနိုင်ငံမှ ဝယ်ယူမည်ဆိုပါက လက်ရှိတွင် တန်ချိန်(၂၀၀)ခန့်တင်ပို့နိုင်ရန် အဆင်သင့်ရှိ ကြောင်းသိရှိရပါသည်။

          ရွှေရှင်းပျားလိမ္မော်ကို ယခုနှစ်တွင် ယခင်နှစ်ကဲ့သို့ ပြင်ပတင်ပို့ရန် နှောင့်နှေးကြန့်ကြာနေရ ခြင်းမှာ ထိုင်းနိုင်ငံအနေဖြင့် ၎င်းနိုင်ငံတွင် စိုက်ပျိုးထွက်ရှိသည့် ပျားလိမ္မော်များကိုသာ အဓိကထား ဖြန့်ဖြူးရောင်းချလျက်ရှိပြီး နိုင်ငံအတွင်းဖြန့်ဖြူးရောင်းချရန် မလုံလောက်သည့် အခြေအနေမှသာ တင်သွင်းခွင့်ကို လက်ခံဆောင်ရွက်မည်ဖြစ်ခြင်း၊ ထိုင်းနိုင်ငံ၏ ပုဂ္ဂလိကဓာတ်ခွဲခန်းထောက်ခံချက်ရ မှသာ တင်သွင်းခွင့်ပြုသည့်အတွက် ထောက်ခံချက်ရရှိရန်ခက်ခဲခြင်း၊ ကမ္ဘာ့ကပ်ရောဂါ Covid-19 ရောဂါဖြစ်ပွားလျက်ရှိခြင်းတို့ကြောင့် ရွှေရှင်းပျားလိမ္မော်အနေဖြင့် ထိုင်းနိုင်ငံသို့ တင်ပို့ရောင်းချရန် အဆင်သင့် ဖြစ်နေပြီဖြစ်သော်လည်း တင်ပို့နိုင်ခြင်းမရှိသေးကြောင်း သိရှိရပါသည်။

DOCA(ရှမ်း)