ပြည်တွင်းကုန်သွယ်မှုသတင်း

        မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ဘွဲ့ကျေးရွာအုပ်စုရှိ ဇီးတောကျေးရွာ၌  ပဲစဉ်းငုံသီးနှံကို သီးညှပ်အဖြစ်စိုက်ပျိုးကြပြီး ယခုနှစ်တွင် အထွက်နှုန်းအနေဖြင့် ပိုမိုထွက်ရှိပြီး ဈေးကောင်းရရှိကာ ပဲစဉ်းငုံစိုက်တောင်သူများအနေဖြင့် အကျိုးအမြတ်များစွာ ရရှိခဲ့ကြောင်းသိရှိရပါသည်။

         ဇီးတောကျေးရွာ၌ ပဲစဉ်းငုံစိုက်တောင်သူ(၅၀)ဦးခန့်ရှိပြီး စိုက်ဧကမှာ (၁၀၀)ဧကဝန်းကျင်ရှိကြောင်း၊ မိမိအနေဖြင့် (၁)ဧကစိုက်ပျိုးခဲ့ကြောင်း၊ စိုက်ပျိုးရာတွင် ထွန်တုံးဖြင့်ကြောင်းဆွဲ၍ စိုက်ပျိုး ကြောင်း၊ မျိုးကို ယခင်နှစ်ကပဲစဉ်းငုံစိုက်ခင်းမှထွက်ရှိသည့် ပဲစဉ်းငုံပဲများကိုမျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ (၁)ဧကလျှင် မျိုး(၄)ပြည်ခန့်ကုန်ကျကြောင်း၊  စိုက်ပျိုးရာတွင် နယုန်လ တွင် စတင်စိုက်ပျိုးပြီး နတ်တော်လတွင် ရိတ်သိမ်းကြောင်း၊ ကုန်ကျစရိတ်အနေဖြင့် ယခင်နှစ်က (၁)ဧကလျှင် ကျပ်(၁၀၀၀၀၀)ခန့်သာကုန်ကျပြီး ယခုနှစ်တွင်မှု သွင်းအားစုစရိတ် မြင့်တက်လာ၍ ကျပ်(၁၅၀၀၀၀)ခန့်ကုန်ကျခဲ့ပါကြောင်း၊ အထွက်နှုန်းအနေဖြင့် ယခင်နှစ်က(၁)ဧကလျှင် တင်း(၂၀) ထွက်ရှိပြီး ယခုနှစ်တွင် (၂၅)တင်းခန့်ထွက်ရှိကြောင်း၊ ယခင်နှစ်က (၁)တင်းလျှင် ကျပ်(၅၅၀၀၀) သာရရှိခဲ့ပြီး ယခုနှစ်တွင် ကျပ်(၁၁၁၀၀၀)ထိရရှိခဲ့ပါကြောင်း၊ တစ်ရွာလုံးစုစုပေါင်း ပဲစဉ်းငုံစိုက်ဧက (၁၀၀)ဧကမှ ပဲစဉ်းငုံတင်း (၃၀၀) ကျော်ထွက်ရှိခဲ့ပါကြောင်း၊ ထွက်ရှိသည့်ပဲစဉ်းငုံ များကို အထက်မင်းလှမြို့ပွဲရုံများသို့ တိုက်ရိုက်တင်ပို့ရောင်းချပါကြောင်း၊ ယခုနှစ်တွင် အထွက်နှုန်းအနေဖြင့် ပိုမိုထွက်ရှိပြီး  ဈေးကောင်းလည်းရရှိသဖြင့် ပဲစဉ်းငုံစိုက်တောင်သူများအနေဖြင့် အကျိုးအမြတ်များ စွာရရှိခဲ့ပါကြောင်း ဇီးတောကျေးရွာနေ ပဲစဉ်းငုံစိုက်တောင်သူ ဦးအောင်ဆန်းထံမှ သိရှိရပါသည်။

DOCA(မကွေး)

  မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်တွင် ဆီထွက်သီးနှံဖြစ်သော မြေပဲနှင့်နှမ်းကို အဓိကစိုက်ပျိုးကြပါ သည်။ ယခုအခါတွင်  မြေပဲဆံဈေးနှုန်းမှာ ဆက်လက်မြင့်တက်နေကြောင်း၊ ပခုက္ကူခရိုင်အတွင်းသို့ မြိုင်မြို့နယ်ရှိရွာများ၊ ရေတောင်ဘက်ရှိရွာများ၊ ပခုက္ကူမြို့၏ အနောက်ဘက်ရှိရွာများမှ လာရောက်အရောင်းအဝယ်ဖြစ်နေပါသည်။  မြေပဲအခွံပါအတောင့် ဈေးနှုန်းမှာ တစ်ပိဿာလျှင် ကျပ်(၄၂၀၀-၄၃၅၀)၊ ၂၀၂၄ခုနှစ်၊ ဇန်နဝါရီလ(ပထမပတ်)တွင် မြေပဲ(ပြန့်ဆံ) တစ်ပိဿာလက်ကားဈေးမှာ မြေပဲဆံအလုံး/ အသေးအကြီးပေါ်မှုတည်၍  တစ်ပိဿာလျှင်  ကျပ် (၅၉၀၀-၆၂၀၀-၆၃၀၀)၊ ဒုတိယအပတ်တွင် မြေပဲ(ပြန့်ဆံ) တစ်ပိဿာလျှင်  ကျပ်(၆၃၅၀-၆၄၀၀-၆၅၀၀)ဖြစ်ခဲ့ပြီး တတိယအပတ်တွင် မြေပဲ(ပြန့်ဆံ) တစ်ပိဿာလက်ကားဈေးမှာ တစ်ပိဿာလျှင်  ကျပ် (၆၆၀၀-၆၇၀၀-၆၈၀၀)ဖြင့်အရောင်းအဝယ်ဖြစ်နေပြီး တစ်ပိဿာလျှင်  ကျပ် (၄၀၀မှ ၅၀၀)ထိဈေးနှုန်းမြင့်တက်ကာ အရောင်းအဝယ်သွက်နေကြောင်း  ကုန်သည်များထံမှသိရှိရပါသည်။

      ထိုသို့ မြေပဲဆံဈေးနှုန်းမြင့်တက်လာသည်နှင့်အမျှ မြေပဲဆုံဆီဈေးနှုန်းမှာလည်း ဆက်လက်မြင့်တက်နေပြီး ယခင်ဇန်နဝါရီလ(ပထမပတ်)တွင် မြေပဲဆုံဆီဈေးနှုန်းမှာ ကျပ်(၁၃၅၀၀- ၁၄၀၀၀)၊ မြေပဲဖတ်ဈေးနှုန်းမှာ တစ်ပိဿာလျှင် ကျပ်(၂၂၀၀) ရှိခဲ့ပြီး ယခုဇန်နဝါရီလ (တတိယပတ်)တွင် မြေပဲဆုံဆီဈေးမှာ ကျပ်(၁၄၅၀၀- ၁၅၀၀၀)၊ မြေပဲဖတ်ဈေးမှာ တစ်ပိဿာလျှင် ကျပ်(၂၃၀၀) ဖြစ်ကြောင်း၊ ဆုံဆီတစ်ပိဿာလျှင် ကျပ်(၁၀၀၀-၁၅၀၀)၊ ပဲဖတ်တစ်ပိဿာလျှင် ကျပ်(၁၀၀)ခန့်ဈေးနှုန်းမြင့်တက်နေကြောင်း၊ တင်ပို့မှုမှာလည်း ယခင်လများထက် ဝယ်ယူမှုများပြားနေကြောင်း၊ ဈေးနှုန်းမြင့်တက်လာသည်နှင့် အမျှ အရောင်းအဝယ်လည်းသွက်နေကြောင်း ကုန်သည်များထံမှသိရှိရပါသည်။

DOCA(မကွေး)

   မကွေးတိုင်းဒေသကြီးအစိုးရအဖွဲ့၏ လမ်းညွှန်မှာကြားချက်ဖြင့် သရက်ခရိုင်၊ စီမံအုပ်ချုပ်ရေးအဖွဲ့ဥက္ကဋ္ဌနှင့် ဆီကုန်သည်ကြီးများအသင်းတို့၏ စီမံပေးမှုအရ (၁၇-၁-၂၀၂၄)ရက်နေ့၊ နေ့လယ်(၁၄း၀၀)နာရီအချိန်တွင်  ကံမမြို့၊ အမှတ်(၂)ရပ်ကွက်ရှိ အိမ်ထောင်စုများနှင့် ရေနံ့သာ၊ စပယ်ခြုံ၊ ကျွန်းကလေး၊ ကညင်တိုင်း၊ ကျောက်ပဒေါင်း၊ ကျေးရွာအုပ်စုများမှ အိမ်ထောင်စုများအား သက်သာသောဈေးနှုန်းဖြစ်သည့်  စားအုန်းဆီ(၁)ပိဿာလျှင် ကျပ်(၅၇၀၀) ဈေးနှုန်းဖြင့် ရောင်းချပေးခဲ့ပါသည်။

    ထိုသို့ရောင်းချပေးမှုအား ကံမမြို့နယ်၊ စီမံအုပ်ချုပ်ရေးအဖွဲ့ ဥက္ကဋ္ဌ၊ အတွင်းရေးမှူးနှင့် အဖွဲ့ဝင်များဦးဆောင်၍ မြို့နယ်အထွေထွေအုပ်ချုပ်ရေး၊ မြို့နယ်ရဲတပ်ဖွဲ့၊ မြို့နယ်စည်ပင်၊ မြို့နယ် မီးသတ်ဦးစီးဌာန၊ မြို့နယ်အဆင့်ဌာနဆိုင်ရာအရာရှိများက ပူးပေါင်းဆောင်ရွက်ခဲ့ကြပြီး ဒေသကုန်သည်လုပ်ငန်းရှင်များအား စားအုန်းဆီများကို သက်မှတ်ရည်ညွှန်းဈေးအပေါ် သယ်ယူခပေါင်း၍ အမြတ်နည်းနည်းထက်မပိုသော ဈေးနှုန်းဖြင့်ရောင်းချရန်၊ ဈေးကစားရန်ရည်ရွယ်ချက်ဖြင့် သိုလှောင်ထားပြီး ဈေးနှုန်းမြှင့်တင်ရောင်းချခြင်းမပြုရန်တို့ကို အသိပေးရှင်းလင်းဆွေးနွေးခဲ့ကြောင်းသိရှိရပါသည်။

DOCA(မကွေး)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ဘွဲ့ကျေးရွာအုပ်စုရှိ ညှင်းသွန်း၊ ကွန်းသွန်း၊ ဘွဲ့၊ ဇီးတော၊ မင်းဂံ စသည့်ကျေးရွာများသည် စပါး၊ ကုလားပဲ၊ ပဲကြီး၊ ပဲစဉ်းငုံ၊ မြေပဲ၊ ဝါ သီးနှံများအပြင် ချဉ်ပေါင်၊ ကျောက်ဖရုံ၊ ဘူး၊ ရွှေဖရုံ၊ သခွား၊ ပြောင်း၊ ငရုတ်၊ ရုံးပတီ စသောမီးဖို ချောင်သုံးသီးနှံများကိုလည်း ရာသီအလိုက်စိုက်ပျိုးကြကြောင်း သိရှိရပါသည်။

          ဇီးတောကျေးရွာ၌ ကုလားပဲစိုက်တောင်သူ(၅၀)ဦးခန့်ရှိပြီး စိုက်ဧကမှာ (၁၀၀)ဧကဝန်းကျင်ရှိ ကြောင်း သိရပါသည်။ စိုက်ပျိုးရာတွင် ကုလားပဲ(မြကြေး)မျိုးကိုအများဆုံးစိုက်ပျိုးကြပြီး တန်ဆောင်မုန်းလတွင်စတင်စိုက်ပျိုးကာ စိုက်ပျိုးပြီး(၃)လခွဲအကြာတွင်ရိတ်သိမ်းရကြောင်း၊ မိမိအနေဖြင့် ကုလားပဲ(၃)ဧကစိုက်ပျိုးထားကြောင်း၊ (၁)ဧကလျှင် မျိုး(၃)တင်းခန့်ကုန်ကျပြီး ထွန်တုံးဖြင့်ထွန်ကြောင်းဆွဲကာ မျိုးစေ့ချ၍စိုက်ပျိုးကြောင်း၊ မျိုးကိုယခင်နှစ်ကကုလားပဲစိုက်ခင်းမှ ထွက်ရှိသည့် ကုလားပဲကို မျိုးအဖြစ်ဖယ်ချန်ကာ စိုက်ပျိုးခြင်းဖြစ်ကြောင်း၊ ဆောင်းသီးနှံကုလားပဲမှာ နှင်းအစိုဓါတ်၊ မြေအစိုဓါတ်ဖြင့် စိုက်ပျိုးရသောသီးနှံဖြစ်ကြောင်း၊  စိုက်ပျိုးစဉ်တလျှောက် မည်သည့် ပိုးသတ်ဆေးမှအသုံးမပြုဘဲ သဘာဝမြေသြစာကိုသာအသုံးပြု၍ စိုက်ပျိုးခြင်းဖြစ်ကြောင်း၊ ကုန်ကျ စရိတ်အနေဖြင့် ယခင်နှစ်က (၁)ဧကလျှင် ကျပ်(၃၅၀၀၀၀)ခန့်ကုန်ကျပြီး ယခုနှစ်တွင်မှု သွင်းအားစု စရိတ်မြင့်တက်လာမှုနှင့်အတူ မြေပြုပြင်ခ၊ လုပ်အားခအပါအဝင် စုစုပေါင်းကုန်ကျ စရိတ်မှာ ကျပ် (၄၀၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်က ကုလားပဲစိုက်ခင်း(၁)ဧကလျှင် တင်း(၂၀)နီးပါးထွက်ရှိပြီး (၁)တင်းလျှင် အမြင့်ဆုံးဈေး ကျပ်(၉၇၀၀၀)အထိရရှိကာ ကုလားပဲစိုက် တောင်သူများအနေဖြင့် ထိုက်သင့်သည့်အကျိုးအမြတ်များရရှိခဲ့ပါကြောင်း၊ ထွက်ရှိသည့်ကုလားပဲများကို အထက်မင်းလှမြို့ပွဲရုံများသို့တိုက်ရိုက်တင်ပို့ရောင်းချကြောင်း၊ ယခုနှစ်တွင်မှု စိုက်ပျိုးပြီးစီး ရုံသာရှိသေး၍ အထွက်နှုန်းအနေဖြင့်မသိရှိရသေးပါကြောင်း ဇီးတောကျေးရွာတွင် နေထိုင်သည့် ကုလားပဲစိုက်တောင်သူ ဦးအောင်ဆန်းထံမှ သိရှိရပါသည်။

DOCA(မကွေး)

    မကွေးတိုင်းဒေသကြီး၊ သရက်ခရိုင်၊ ကံမမြို့၊ မြို့မစည်ပင်ဈေးတွင် (၁၂-၁-၂၀၂၄)ရက်နေ့မှ (၁၈-၁-၂၀၂၄) ရက်နေ့အတွင်း ရောင်းချလျက်ရှိသော အခြေခံစားသောက်ကုန်များ၏ လက်လီဈေးနှုန်းများမှာ ပုသိမ်ပေါ်ဆန်းမွှေးတစ်အိတ်လျှင် ကျပ်(၁၄၅၀၀၀)၊ ရွှေဘိုပေါ်ဆန်းမွှေးတစ်အိတ်လျှင် ကျပ်(၁၈၀၀၀၀)၊ မနောသုခတစ်အိတ်လျှင် ကျပ်(၉၀၀၀၀)၊ မှော်ဘီတစ်အိတ်လျှင် ကျပ်(၉၀၀၀၀)၊ ရိုးနီတစ်အိတ်လျှင် ကျပ် (၁၂၀၀၀၀)၊ နှမ်းဆီတစ်ပိဿာလျှင် ကျပ် (၁၅၀၀၀)၊ ပဲဆီတစ်ပိဿာလျှင် ကျပ် (၁၆၀၀၀)၊ စားအုန်းဆီတစ်ပိဿာလျှင် ကျပ်(၅၇၀၀)၊ Lotus တစ်ပိဿာလျှင် ကျပ်(၉၀၀၀)၊ ကြက်သွန်နီတစ်ပိဿာလျှင် ကျပ် (၂၅၀၀)၊ ကြက်သွန်ဖြူတစ်ပိဿာလျှင် ကျပ်(၁၂၀၀၀)၊ ကုလားပဲတစ်ပိဿာလျှင် ကျပ်(၆၅၀၀)၊ အာလူးတစ်ပိဿာလျှင် ကျပ်(၃၀၀၀)၊ ချင်းတစ်ပိဿာလျှင် ကျပ်(၆၀၀၀)၊ ဆားတစ်ပိဿာလျှင် ကျပ် (၅၀၀)၊ ငရုတ်သီးခြောက်တစ်ပိဿာလျှင် ကျပ် (၁၅၀၀၀)၊ ငရုတ်သီးစိမ်းတစ်ပိဿာလျှင် ကျပ်(၂၅၀၀)၊ ခရမ်းချဉ်သီးတစ်ပိဿာလျှင် ကျပ်(၁၂၀၀)၊ ကြက်သား(စီပီ)တစ်ပိဿာလျှင် ကျပ်(၇၀၀၀)၊ ကြက်သား (ဗမာ)တစ်ပိဿာလျှင် ကျပ် (၁၅၀၀၀)၊ ဝက်သားတစ်ပိဿာလျှင် ကျပ် (၁၃၀၀၀)၊ အမဲသားတစ်ပိဿာလျှင် ကျပ် (၁၃၀၀၀)၊ ဆိတ်သားတစ်ပိဿာလျှင် ကျပ် (၁၆၀၀၀)၊ ငါးကြင်းတစ်ပိဿာလျှင် ကျပ် (၁၀၀၀၀)၊ ငါးမြစ်ချင်းတစ်ပိဿာလျှင် ကျပ်(၈၀၀၀)၊ ကြက်ဥတစ်လုံးလျှင် ကျပ်(၂၀၀)ဈေးနှုန်းဖြင့် ရောင်းချလျက်ရှိကြောင်းသိရှိရပါသည်။

    ယခင်အပတ်နှင့်နှိုင်းယှဉ်လျှင် ယခုအပတ်တွင် ပုသိမ်ပေါ်ဆန်းမွှေးတစ်အိတ်လျှင် ကျပ်(၅၀၀၀)၊ မနောသုခတစ်အိတ်လျှင် ကျပ်(၃၀၀၀)၊ မှော်ဘီတစ်အိတ်လျှင် ကျပ်(၃၀၀၀)၊ ရိုးနီတစ်အိတ်လျှင် ကျပ်(၅၀၀၀)အသီးသီးဈေးနှုန်းမြင့်တက်လာပြီး ငရုတ်သီးစိမ်း ကျပ် (၃၀၀)၊ ခရမ်းချဉ်သီးတစ်ပိဿာလျှင် ကျပ်(၃၀၀)၊  ငရုတ်သီးခြောက်တစ်ပိဿာလျှင် ကျပ်(၂၀၀၀)၊ ကြက်သား (စီပီ) တစ်ပိဿာလျှင် ကျပ် (၃၀၀၀) စသည်ဖြင့် ဈေးနှုန်းအသီးသီးဈေးကျဆင်းလျက်ရှိကြောင်း၊ ဆန်၊ ဆီ၊ ကြက်သွန်ဖြူ၊ အာလူး စသည့်ကုန်ပစ္စည်းအခြောက်များကို ပြည်ခရိုင်မှဝယ်ယူရကြောင်း၊ ခရမ်းချဉ်သီး၊ ငရုတ်သီးစိမ်း၊ ကြက်သွန်နီများကို ကံမမြို့နယ်၊ ကျေးရွာများနှင့် သရက်မြို့နယ်တို့မှဝယ်ယူ၍ ရောင်းချရကြောင်း ဈေးရောင်းချသူ ဒေါ်သန်းထွေးထံမှသိရှိရပါသည်။

DOCA(မကွေး)