ပြည်တွင်းကုန်သွယ်မှုသတင်း

          ပြည်ခရိုင်အတွင်းရှိ ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်လျှက်ရှိပြီး ဇူလိုင်လ ပထမပတ်တွင် မတ်ပဲဈေးများတက်နေသော်လည်း ဒုတိယပတ်မှာတော့ဈေးကျနေပြီး ကုလားပဲ၊ စားတော်ပဲ၊ ပဲကြီး ဈေးများတက်လျှက်ရှိပါသည်။

          ဇူလလိုင်လဆန်းပိုင်းတွင်  မတ်ပဲတစ်တင်းကို ၅၆၀၀၀-၅၆၅၀၀ကျပ်ဖြင့် အဝယ်ပုံမှန် ရှိခဲ့ပါသည်။  ဇူလိုင်ဒုတိယပတ်မှာ မတ်ပဲဈေးကျလာပြီး ပဲတစ်တင်းကို ၅၂၀၀၀-၅၂၅၀၀ကျပ်ဖြင့် ရန်ကုန် အဝယ်တစ်ရက်ကို ၁၅၀/၂၀၀ခန့် အရောင်းအဝယ်ဖြစ်လျှက်ရှိပါသည်။

          ဇူလိုင်လပထမပတ်တွင် ပဲစင်းငုံအရောင်းအဝယ်ရှိပြီး ပဲစင်းငုံတစ်တင်းကို ၄၆၅၀၀ကျပ်ဖြင့် အရောင်းအဝယ်ရှိပြီး ဇူလိုင်ဒုတိယပတ်တွင် ပဲစင်းငုံတစ်တင်းကို ၄၆၀၀၀ကျပ်ဖြင့် ရန်ကုန်အဝယ် တစ်ရက်ကို အိတ် ၂၀၀/၃၀၀ခန့် အဝယ်ရှိခဲ့ပါသည်။

ပြည်ကုန်စည်ဒိုင်တွင် ဇူလိုင်ပထမပတ် ကုလားပဲ(ဟော်လန်)တစ်တင်းကို ၅၀၅၀၀-၅၁၀၀၀ ကျပ်၊ ကုလားပဲ(မြကြေးမှုံ) တစ်တင်းကို ၅၁၅၀၀ကျပ်ဖြင့် ဇွန်လကထက် ဈေးတက်လာခဲ့ပါသည်။ ဇူလိုင်ဒုတိယပတ်မှာ ကုလားပဲ(ဟော်လန်)တစ်တင်းကို ၅၁၀၀၀ကျပ်၊ ကုလားပဲ(မြကြေးမှုံ) တစ်တင်းကို ၅၁၅၀၀-၅၂၀၀၀ကျပ်ဖြင့် မြို့တွင်းခွဲစက်သမားများ ရန်ကုန်အဝယ်နှင့် နယ်စုံ တင်ပို့မှုရှိပြီး တစ်ရက်ကို အိတ် ၃၀၀/၄၀၀ခန့် အဝယ်ရှိပါသည်။

          ဇူလိုင်ပထမပတ်တွင် ပဲကြီးသီးနှံဈေးမှာ ပဲကြီး(ရွှေကျွန်း)တစ်တင်းကို ၇၀၀၀၀ကျပ် ပဲကြီး (ကမ်းနား)တစ်တင်းကို ၇၀၀၀၀ကျပ်ဖြင့် တစ်ရက်ကိုအိတ် ၂၀၀/၃၀၀ခန့် မြို့တွင်းအဝယ် ရှိခဲ့ပါသည်။ ဇူလိုင် ဒုတိယပတ်တွင် ပဲကြီးဈေးအေးနေခဲ့ပြီး ပဲကြီး(ကမ်းနား)တစ်တင်းကို ၇၀၀၀၀ကျပ်ဖြင့် မြို့တွင်း ပဲကြော်သမားများတစ်ရက်ကိုအိတ်  ၂၀၀/၃၀၀ခန့် အရောင်းအဝယ် ဖြစ်ခဲ့ပါသည်။

          ဇူလိုင်လဆန်းပိုင်းတွင် စားတော်ပဲ(ကျွန်း)သီးနှံတစ်တင်းကို ၉၅၀၀၀-၁၀၀၀၀ကျပ်ဖြင့် အရောင်း အဝယ်ရှိပြီး၊ ဇွန်လကထက်ဈေးတက်လာကြောင်း သိရပါသည်။ ဇူလိုင်ဒုတိယပတ်မှာ စားတော်ပဲ (ကျွန်း)တစ်တင်းကို ၉၅၀၀၀-၁၀၀၀၀၀ကျပ်ဖြင့် မြို့တွင်းအဝယ်ရှိခဲ့ပြီး တစ်ရက်ကို အိတ် ၂၀၀/ ၃၀၀ခန့်အရောင်းအဝယ်ရှိခဲ့ပါသည်။

          ဇူလိုင်လပထမပတ်မှာ ဘိုကိတ်ပဲတစ်တင်းကို ၃၅၀၀၀ကျပ်ဈေးဖြင့် မြို့တွင်းအဝယ်နှင့် ရန်ကုန်အဝယ် တစ်ရက်ကို အိတ် ၁၀၀/၁၅၀ခန့် အဝယ်ရှိပြီး ဇူလိုင်လဒုတိယပတ်မှာ ပဲဈေးအေးနေပြီး ဘိုကိတ်တစ်တင်းကို ၃၅၀၀၀ကျပ်ဖြင့် မြို့တွင်းအဝယ်ရှိခဲ့ပါသည်။

ပြည်ကုန်စည်ဒိုင်တွင် အရောင်းအဝယ်ဖြစ်လျှက်ရှိသောပဲများတွင် ကုလားပဲ၊ ပဲကြီး၊ ဘိုကိတ်၊ စားတော်ပဲ(ကျွန်း)ပဲများမှာ မြို့တွင်းအဝယ်ရှိ၍ အရောင်းအဝယ်သွက်လျှက်ရှိပြီး မတ်ပဲ ရောင်းဝယ်မှုမှာ အနည်းငယ်အေးလျှက်ရှိကြောင်းသိရှိရပါသည်။

DOCA(ပဲခူး)

           နာနတ်သီးများကို ပြည်မြို့စည်ပင်သာယာဈေးကြီးသို့ ပြည်မြို့ အနီးအနားရှိ မြို့နယ်များနှင့် မန္တလေး မြို့ဘက်မှ  တင်ပို့ရောင်းချလျှက်ရှိပါသည်။  နာနတ်သီးများအဝင်လှိုင်လာသည့်အတွက် စားသုံးသူများ အနေဖြင့် ဈေးနှုန်းချိုသာစွာဖြင့် ဝယ်ယူစားသုံးကြသလို ရောင်းချသူများအနေဖြင့်လည်း အရောင်း အဝယ် သွက်လျှက်ရှိပါသည်။ နာနတ်သီးဈေးနှုန်းများမှာ အလုံးအကြီး အသေးပေါ်မူတည်၍ ဈေးနှုန်းများ ကွာခြားလျှက်ရှိပါသည်။ နာနတ်သီးအလုံးကြီး တစ်လုံးလျှင် ၁၅၀၀-၂၀၀၀ကျပ်၊ အလတ် တစ်လုံးလျှင် ၁၀၀၀-၁၅၀၀ကျပ်၊ အသေးတစ်လုံးလျှင် ၅၀၀-၁၀၀၀ကျပ်ဈေးများဖြင့် ပြည်ဒေသရှိ ဈေးများတွင် ရောင်းချလျှက်ရှိပါသည်။

          ပြည်ခရိုင်အတွင်း နွေစပါးဈေးမှာ ယခင်ဇွန်လနောက်ဆုံးပတ်တွင် တင်း၁၀၀လျှင် ၇၅၀၀၀၀ ကျပ်ရှိခဲ့ရာ ယခုဇူလိုင်လဒုတိယပတ်မှာဖြင့် ပြည်မြို့နယ်တွင် စပါးတင်း၁၀၀လျှင် ၇၇၀၀၀ကျပ်၊ ပေါက်ခေါင်း မြို့နယ်တွင် ၇၅၀၀၀၀ကျပ်၊ သဲကုန်းမြို့နယ်တွင် ၇၆၀၀၀၀ကျပ်ဈေးဖြင့် မြင့်တက် လာခဲ့ပါသည်။ ဆန်ဈေးမှာ ယခင်အတိုင်း မြင့်တက်ခြင်းမရှိဘဲ ဈေးငြိမ်နေခဲ့ပါသည်။ အရောင်းအဝယ်အနေဖြင့် ဒေသတွင်းသာ အရောင်းအဝယ်ရှိပြီး စပါးဈေးသာမြင့်တက်လာခဲ့ကြောင်း သိရှိရပါသည်။

DOCA(ပဲခူး)

           ပြည်ချင်း (ပွဲရုံ)များသို့ ချင်းအိတ်အဝင်ပုံမှန်ဝင်ရောက်နေပြီး ယခုတစ်ပတ် ချင်းဈေး အနည်းငယ်တက်လာပါသည်။ ပြည်ခရိုင်အတွင်း ချင်းအရောင်းအဝယ်ရှိနေပြီး ဒါးလှီးချင်းသမား တို့လည်း အဝယ်ရှိသောကြောင့် ယခုအပတ် ချင်းအရောင်းအဝယ်ဖြစ်သည်ဟု သိရပါသည်။ ယခု အပတ်(ပွဲရုံဈေး) ချင်းတစ်ပိဿာလျှင် ၁၀၀၀ကျပ်၊ အိတ်စွဲဈေးနှင့် သန့်စင်ပြီး ချင်းဈေးမှာဖြင့် ၁၂၀၀-၁၄၀၀ကျပ်တို့ဖြစ်ပါသည်။ လက်လီဈေးများမှာ  ချင်းတက် တစ်ပိဿာကို ၁၇၀၀ကျပ် ဈေးတို့ဖြင့် ရောင်းချနေသည်ကို တွေ့ရပါသည်။ ဒါးလှီးချင်းဖတ် တစ်ပိဿာလျှင် ၂၀၀၀ကျပ်ဈေးဖြစ်ပြီး တစ်ပတ် အတွင်းချင်းအိတ် (၂၅၀)ကျော်အရောင်းအဝယ်ဖြစ်ကြောင်း သိရှိရပါသည်။

              ယခုအချိန်ဝါဆိုအခါတွင် ပြည်ဈေးကွက်၌ ကြက်သွန်နီသီးနှံများ အလှူအတန်း ပြုလုပ်ချိန် ဖြစ်သဖြင့် အရောင်းသွက်လျှက်ရှိနေကြောင်း သိရှိရပါသည် ။  ယခင်အပတ်ထက် အရောင်းအဝယ် သွက်ခဲ့ပြီး အဝင်မှာလည်း ရေနံချောင်း၊ အောင်လံ၊ ပခုက္ကူ နှင့် ဆိပ်ဖြူဘက်မှ ပိဿာ(၃၀)ဝင်အိတ် ၃၀၀ခန့် နေ့စဉ်အဝင်ရှိသဖြင့် ယခင်အပတ်ကထက် အိတ် ၁၀၀ ဝန်းကျင်းခန့် ပိုမိုဝင်ရောက်မှု ရှိနေကြောင်းလည်းသိရှိရပါသည်။ ဈေးနှုန်းမှာ အမြင့်ဈေးဖြင့် ဈေးငြိမ်လျှက်ရှိနေပြီး ပွဲရုံဈေး တစ်ပိဿာ (ကြီး/လတ်/သေး)ကျပ် ၁၉၀၀/၁၈၀၀-၁၇၀၀/၁၆၀၀ နှင့် လက်ကား ဈေးအသေးများတွင် ကျပ် ၂၁၀၀/၂၀၀၀/၁၉၀၀-၁၈၀၀ နှုန်းတို့ဖြင့် အသီးသီးရောင်းချလျှက်ရှိနေကြကြောင်း သိရှိရပါသည်။

DOCA(ပဲခူး)

             ပြည်ဈေးကွက်သို့ ယခုဇူလိုင်လဒုတိယပတ်တွင် မြေပဲဆန်များဝင်ရောက်မှုမရှိသော်လည်း လှောင်မြေပဲဆန်များဖြင့်သာ အရောင်းအဝယ်ဖြစ်လျှက်ရှိပါသည်။ မြေပဲဆန် လုံးဆန်(အဖြူ)ကို မြဝတီဘက်သို့ တင်ပို့ရန်အဝယ်ရှိသလို၊ မြေပဲဆန်လုံးဆန်(အနီ)ကို ဒေသတွင်း မြေပဲလှော်ဖို သမား များက ဝယ်ယူမှုရှိပါသည်။ ဆီကြိတ် မြေပဲဆန်ဖြစ်သော ရွေးဆန်များကို မြေပဲဆီကြိတ်သော ဆီစက်များနှင့် ဆုံဆီကြိတ်သောဆီစက်များက အဝယ်ရှိသလို မလုံလောက် ပါက မကွေးမြို့နှင့် ပခုက္ကူဘက် မှဝယ်ယူ၍ ကြိတ်ခွဲရပါသည်။ ယခုဇူလိုင်လ ဒုတိယပတ်ရှိ မြေပဲဆန်ဈေးနှုန်းများမှာ ဆီကြိတ်မြေပဲဆန် (အဖြူ၊ အနီ) ၂မျိုးစလုံးမှာ ဈေးတူနေပြီး တစ်ပိဿာလျှင် ၄၂၀၀ကျပ်၊ လုံးဆန်(အဖြူ၊ အနီ) တစ်ပိဿာလျှင် ၄၄၀၀ကျပ်ဖြင့် ဇွန်လ နောက်ဆုံးပတ်ကအတိုင်း ဈေးငြိမ်နေသည်ကို တွေ့ရှိရပါသည်။ မြေပဲဆီတစ်ပိဿာလျှင် ၉၅၀၀ကျပ်၊ ဆုံဆီတစ်ပိဿာလျှင် ၁၁၀၀၀ကျပ်ဖြင့် အရောင်းအဝယ် ဖြစ်လျှက်ရှိကြောင်း သိရှိရပါသည်။

DOCA(ပဲခူး)

          ပြည်ပဲဈေးကွက်သို့ မိုးပဲတီစိမ်းသစ်များ ဇူလိုင်လဆန်းရက်မှစ၍ ဝင်ရောက်လာခဲ့ရာ ယခုအချိန်ထိနေ့စဉ် ဝင်ရောက်မှုတဖြည်းဖြည်းများလာပြီး ပြည်အနီးတဝိုက် မင်းတုန်း၊ ကံမ၊ ပေါင်းတလည်၊ ပေါက်ခေါင်း ဒေသများမှ ဝင်ရောက်လာခဲ့ကြောင်း သိရှိရပါသည်။ ပဲတီစိမ်းသစ်ဈေးမှာ ပဲအရည်အသွေး ပေါ်မူတည်၍ ဈေးကွာခြားမှုရှိခဲ့ပါသည်။ ပဲသစ်အဖွင့်ဈေးမှာ တစ်တင်း ၄၆၀၀၀ ကျပ်ဖြင့် ဝယ်ယူခဲ့ကြပြီး ရိုးရိုးတစ်တင်း ၄၆၀၀၀ကျပ်၊ ထိပ်စတစ်တင်း ၄၇၀၀၀ကျပ်ဖြင့် အသီးသီးရောင်းဝယ်လျှက်ရှိရာ မန္တလေးလိုင်းသမားများ အဓိကထား ဝယ်ယူမှုရှိခဲ့ကြပါသည်။ ယခုနှစ်မိုးပဲတီစိမ်းဝင်ရောက်မှုစော ခဲ့သောကြောင့် ဇူလိုင်လအတွင်း နေ့စဉ်ဝင်ရောက်လျှက်ရှိနေသလို လကုန်ပတ်၊ ဩဂုတ်လဆန်းပိုင်း များတွင် ပဲအထွက်လှိုင်ချိန် ပဲဝင်ရောက်မှု ပိုများလာနိုင်သည်ဟု သိရှိရပါသည်။ ယခင်နှစ်က ဇူလိုင်လအတွင်း ပဲသစ်ဝင်ရောက်ခြင်းမရှိဘဲ ဩဂုတ်လ ဆန်းပိုင်းမှသာ ဝင်ရောက်ခဲ့ကာ ပဲတစ်တင်း ၃၅၀၀၀ကျပ်ဖြင့် အရောင်းအဝယ်ဖြစ်ခဲ့သည့်အတွက် ယခုနှစ် ပဲတီစိမ်းသစ်ဈေးမှာ ပဲသစ်ပေါ်စ အချိန်ကတည်းက ဈေးကောင်းရနေသော ပဲသီးနှံ ဖြစ်ခဲ့ပါသည်။

DOCA(ပဲခူး)