ပြည်တွင်းကုန်သွယ်မှုသတင်း

       ပြည်ဈေးကွက်သို့ မိုးမြေပဲဆန်များကို ပြည်-အောင်လံ ကြားရှိကျေးရွာများနှင့် ပေါက်ခေါင်း၊ ကြံခင်း၊ မြန်အောင်ဘက်မှ နေ့စဉ်အိတ် (၁၅၀၀-၂၀၀၀)ခန့် ဝင်ရောက်မှုရှိပြီး ဈေးနှုန်းများ ကျဆင်း လာသည်ကို တွေ့ရှိရပါသည်။ ယခင်စက်တင်ဘာလ တတိယပတ်တွင် မြေပဲဆန်ဈေးများမှာ ဆီဆန် တစ်ပိဿာလျှင် (၅၃၀၀)ကျပ်၊ ရွေးဆန် တစ်ပိဿာလျှင် (၅၇၀၀)ကျပ် နှင့် လုံးဆန် တစ်ပိဿာ လျှင် (၆၀၀၀-၆၁၀၀)ကျပ်ဈေးဖြစ်ခဲ့ပြီး  ယခု အောက်တိုဘာလဆန်းပိုင်းတွင် မြေပဲဆီ ဆန် တစ်ပိဿာလျှင် (၅၀၀၀-၅၁၀၀)ကျပ်ဖြင့် တစ်ပိဿာလျှင် ၃၀၀ကျပ် ဈေးကျခဲ့သလို မြေပဲလုံး ဆန်တစ်ပိဿာလျှင် (၅၃၅၀-၅၄၀၀)ကျပ်ဖြင့် တစ်ပိဿာလျှင် ၅၀၀ကျပ်ခန့် ဈေးကျလာတာသည်ကို တွေ့ရှိရပါသည်။ ဆီဆန်ကို မြို့တွင်းဆီစက်သမားများနှင့် မကွေးရှိ ဆီစက်သမားများက အဝယ်ရှိသလို လုံးဆန်ကို မြဝတီသို့တင်ပို့ရန်နှင့် ဒေသတွင်း ပဲလှော်ဖိုသမားများက အဝယ်ရှိသဖြင့် တစ်နေ့လျှင် အိတ် ၁၅၀၀ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

       ပြည်ဈေးကွက်သို့ ရှမ်းအာလူးများ ပိဿာ ၃၀ ဝင်ဆံ့သောအိတ် တစ်ပတ်လျှင်အိတ် ၁၀၀မှ ၁၅၀အတွင်း အဝင်ရှိပါသည်။ အရောင်းအဝယ်အနေဖြင့် ဒေသတွင်းရှိ လက်လီဝယ်ယူသူများဖြင့် အနည်းငယ်အရောင်းအဝယ်ရှိသလို လက်ကားဝယ်ယူသူ အဝယ်ပါးလျှက်ရှိပါသည်။ ဈေးနှုန်း အနေဖြင့် အာလူးတစ်ပိဿာလျှင် လက်ကား(ပွဲရုံ)ဈေး ကျပ် ၂၀၀၀-၂၂၀၀-၂၃၀၀ဈေးရှိပြီး လက်လီ တစ်ပိဿာလျှင် ကျပ် ၂၄၀၀-၂၈၀၀ဈေးဖြင့် အရောင်းအဝယ်ပါးလျက်ရှိကြောင်း သိရှိရပါသည်။

          ယခုအပတ် ချင်းပွဲရုံများသို့ ချင်းဝင်ရောက်မှုမှာ ပုံမှန်ရှိနေသော်လည်း ချင်းအိတ် အဝင်နည်း လာကြောင်း  သိရှိရပါသည်။ ယခင်အပတ်တွင် အဝင်လှိုင်နေပြီး၊ ယခုအပတ် အဝင်နည်းသော ကြောင့် ချင်းဈေးလည်း တစ်ပိဿာပေါ်တွင် ၄၀၀-၅၀၀ ကျပ် ထိုးတက်လာသည်ကို တွေ့ရှိ ရပါသည်။ ယခုအပတ်တွင် ချင်း(ပွဲရုံ)ဈေး တစ်ပိဿာလျင် ၁၉၀၀-၂၀၀၀ကျပ် နှင့် လက်လီဈေးမှာ ၂၅၀၀-၂၆၀၀ကျပ် တို့ဖြင့် ရောင်းချနေကြောင်း သိရှိရပါသည်။

DOCA(ပဲခူး)

        တောင်ငူခရိုင်အတွင်းရှိ တောင်ငူ၊ ရေတာရှည်၊ ထန်းတပင်၊ အုတ်တွင်းနှင့် ဖြူးမြို့နယ် (၅)ခုတို့တွင် မိုးစပါး ၄၅၂၁၇၀ ဧက စိုက်ပျိုးထားရှိရာ ယခုအခါ စတင် ရိတ်သိမ်းနေပြီဖြစ်ပါသည်။

        ပြီးခဲ့သည့် ရက်များက မုန်တိုင်းအရှိန်ကြောင့် မိုးများ အဆက်မပြတ်ရွာသွန်းနေသဖြင့်  ရိတ်ခြွေစက်များမှ ထွက်ရှိလာသော စပါးများကို လယ်ကွင်းပြင်တွင် နေလှန်းရန် အခက်အခဲရှိခြင်းကြောင့် ဆန်စက်များမှ ဝယ်ယူပြီးအခြောက်ခံခြင်းဖြစ်ပါသည်။

         စပါးအစိုဓာတ်များပြားသဖြင့် ဆန်စက်များက စပါးများကို တစ်တင်းလျှင် ၅၄ ပေါင်ဖြင့် ဝယ်ယူပါသည်။ စပါးအမျိုးအစားနှင့် အရည်အသွေးပေါ်မူတည်၍ ဆန်စက်အရောက် စပါးတင်း ၁၀၀လျှင် ကျပ် ၁၀၀၀၀၀၀ မှ ကျပ် ၁၁၀၀၀၀၀ အထိ အရောင်းအဝယ်ဖြစ်လျှက်ရှိပါသည်။

       ယခင်နှစ်စပါးပေါ်ခါစတွင် စပါးဈေးနှုန်းမှာ တင်း ၁၀၀ လျှင် ၆၃၀၀၀၀ ကျပ်မှ ၆၅၀၀၀၀ ကျပ် အထိသာရှိခဲ့သဖြင့် ယခင်နှစ်ကထက် အကျိုးအမြတ်ပိုမိုရရှိမည်ဟု ထင်ရသော်လည်း သွင်းအားစုဈေးနှုန်းများ မြင့်တက်ခြင်း၊ လုပ်သားစရိတ်များမြင့်တက်ခြင်းနှင့် ရိတ်သိမ်းခြွေလှေ့ခ မြင့်တက်ခြင်းတို့ကြောင့် ယခင်နှစ်ကထက် အကျိုးအမြတ်အနည်းငယ်သာ ပိုမိုရရှိမည် ဖြစ်ပါသည်။

         ယခုအခါတွင် ရာသီဥတု ပြန်လည်ကောင်းမွန်လာပြီး စပါးများလည်း လှိုင်လှိုင်ပေါ်တော့မည်ဖြစ်သဖြင့် စပါးအရည်အသွေးမြင့်မားလာကာ စပါးဈေးလည်း ကျဆင်းလာမည်ဖြစ်ကြောင်း သိရှိရပါသည်။

DOCA(ပဲခူး)

     မန္တလေးတိုင်းဒေသကြီး၊ စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူး၏ ကြီးကြပ်မှုဖြင့် သာစည်မြို့နယ်တာဝန်ခံ ဦးဆောင်သော ဝန်ထမ်းများသည် ၂၀၂၂ခုနှစ်၊ စက်တင်ဘာလ (၂၈)ရက်နေ့၊နံနက် (၀၉း၀၀) အချိန်တွင်သာစည်မြို့၊ အ.ထ.ကမယ်ဇလီကန်ကျောင်းတွင် စားသုံးသူအကာအကွယ်ပေးရေး ဆိုင်ရာ အသိပညာပေး ဟောပြောပွဲ ကျင်းပပြုလုပ်ခဲ့ပါသည်။

     ဟောပြောပွဲတွင် သာစည်မြို့နယ်တာဝန်ခံ ဦးသက်ချိုဦး စားသုံးသူရေးရာဦးစီးဌာနသည် ယခင်နှစ်များက  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့ သော်လည်း Covid-၁၉ ရောဂါကူးစက်မှု အခြေအနေများကြောင့်CICC Meiktila Facebook Pageတွင် Onlineမှ လည်းကောင်း၊ ပြန်ကြားရေးနှင့်ပြည့်သူဆက်သွယ်ရေးဦးစီးဌာနနှင့် ပူးပေါင်း၍ Talk Show အစီအစဉ်များဖြင့်လည်းကောင်း၊ စားသုံးသူအသိပညာပေးရေး လုပ်ငန်းများ ဆောင်ရွက် ပေးခဲ့ပါကြောင်း၊ စားသုံး သူများအနေဖြင့် မိမိတို့အခွင့်အရေးများဆုံးရှုံးနစ်နာမှုများ ဖြစ်ပေါ်လာပါက တိုင်ကြားနိုင်ပါ‌ကြောင်း၊ တိုင်ကြားမှုများကိုလည်း စားသုံးသူကာကွယ်ရေးဥပဒေနှင့်အညီ ဖြေရှင်း ဆောင်ရွက်ပေးလျှက်ရှိ ကြောင်း ဆွေးနွေးပြောကြားပေးခဲ့ပြီး ဟောပြောပွဲကိုဖွင့်လှစ်ပေးခဲ့ပါသည်။ 

     ဆက်လက်၍ စားသုံးသူရေးရာဦးစီးဌာန၊မိတ္ထီလာခရိုင်ဦးစီးမှူးရုံးမှ ဦးစန်းအောင် ဒု-ဦးစီးမှူး က စားသုံးသူကာကွယ်ရေး ဥပဒေကိုမြန်မာနိုင်ငံတွင်၂၀၁၄ခုနှစ်၊မတ်လ(၁၄)ရက်နေ့တွင် စတင် ပြဌာန်းခဲ့ပြီး ၊စားသုံးသူ ကာကွယ်ရေးဥပဒေသစ်ကို ၂၀၁၉ခုနှစ်၊မတ်လ(၁၅)ရက်နေ့တွင် အခန်း (၂၅)ခန်း၊ ပုဒ်မ(၈၄)ခုပါဝင်သော ဥပဒေအသစ်ကိုပြင်ဆင်အတည်ပြုပြဌာန်းခဲ့ကြောင်း၊ စားသုံးသူများ အနေဖြင့်မိမိအခွင့်အရေးများသိရှိမှသာ ကုန်စည်(သို့)ဝန်ဆောင်မှုများအပေါ်ဆုံးရှုံးနစ်နာမှုများ ဖြစ်ပေါ်‌လာပါကအရေးဆို တိုင်ကြားနိုင်မည် ဖြစ်ပါကြောင်း၊ အခန်း(၉)ပါစားသုံးသူအခွင့်အရေးနှင့် တာဝန်များ၊ အခန်း(၂၄)ပါ ပြစ်မှုပြစ်ဒဏ်များကို တိုင်ကြားမှုဥပမာများဖြင့် စားသုံးသူများ သိရှိနား လည်စေရန် စားသုံးသူကာကွယ်ရေးဥပဒေပါ စားသုံးသူအခွင့်အရေး ၊ လိုက်နာရမည့် တာဝန်များ နှင့်ပတ်သက်၍ အကျယ်တဝင့်ဆွေးနွေး ပြောကြားခဲ့ပါသည်။ ၎င်းအပြင်အခန်း(၁၈)၊ပုဒ်မ(၄၁)ပါ ကုန်အညွှန်းအမှတ်အသား ပြဌာန်းချက်နှင့် ပတ်သက်၍ မြန်မာဘာသာဖြင့် ပြည့်စုံစွာဖော်ပြထား သည့် ကုန်ပစ္စည်းများကိုသာ ရွေးချယ်ဝယ်ယူအသုံးပြုသင့်ကြောင်းနှင့် ကုန်အညွှန်းအမှတ်အသားနှင့် ပတ်သက်၍ သိသင့်သိထိုက်သည့်ဗဟုသုတများကိုပြောကြားခဲ့ပြီး စားသုံးသူအခွင့်အရေး နစ်နာဆုံးရှုံး မှုများရှိပါက DOCA Applicationeနှင့် www.doca.gov.mmတွင် ဝင်ရောက်တိုင်ကြားနိုင်ကြောင်းဆွေးနွေးခဲ့ပါသည်။ ဟောပြောပွဲတွင် ကျောင်းသား၊ ကျောင်းသူ၊ဆရာဆရာမ စုစုပေါင်း (၁၁၅)ဦးတက်ရောက်ခဲ့ပြီး လက်ကမ်းစာစောင်များလည်း ဖြန့်ဝေခဲ့ပါသည်။ ဟောပြောပွဲကို နံနက်(၁၀း၃၀) နာရီတွင် ရုတ်သိမ်းခဲ့ပါသည်။   

DOCA(မန္တလေး)

     စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် မေလ လဆန်းပိုင်းမှ စတင်၍ ကုန်စည်ဒိုင်စတင်ပြန်လည်လည်ပတ်ခဲ့ကြောင်းသိရပါသည်။ အောက်တိုဘာလ ပထမပတ်တွင်  ဖြစ်ပေါ်နေသောပဲဈေးနှုန်းများမှာ ပဲတီစိမ်း(ကြီး)တစ်တင်းကျပ်၄၅၀၀၀၊ ပဲစဉ်းငုံတစ်တင်းကျပ် ၆၂၅၀၀၊ မတ်ပဲ တစ်တင်းကျပ် ၅၉၀၀၀၊ ကုလားပဲ ထိုင်ဝမ် တစ်တင်း ကျပ် ၅၈၀၀၀၊ ကုလားပဲ 929 တစ်တင်းကျပ် ၆၀၀၀၀၊ ကုလားပဲ V2 တစ်တင်းကျပ် ၆၂၀၀၀၊ ကုလားပဲ V3,7 တစ်တင်းကျပ် ၆၂၅၀၀ ဈေးနှုန်းများဖြင့် အရောင်းအဝယ် ဖြစ်နေကြောင်း သိရပါသည်။

       ဂျုံဖြူသန့်တစ်တင်း ကျပ် ၆၂၀၀၀၊ ပဲကြီး(သစ်) တစ်တင်း ကျပ် ၇၄၀၀၀-၇၅၀၀၀၊ ပဲနီလုံးရိုးရိုး တစ်တင်း ကျပ် ၄၅၀၀၀-၄၇၀၀၀၊ ပဲနီလုံးကြား တစ်တင်းကျပ် ၄၈၀၀၀၊  ပဲပုတ်စေ့ (ဗမာ) တစ်တင်း ကျပ် ၈၀၀၀၀၊ ထောပတ်ပဲ တစ်တင်းကျပ် ၄၈၀၀၀-၅၀၀၀၀၊  မြေထောက်ပဲ တစ်တင်း ကျပ် ၇၀၀၀၀-၇၅၀၀၀-၈၀၀၀၀၊ ပုဂံပဲ တစ်တင်းကျပ် ၆၇၀၀၀-၇၀၀၀၀၊ ပဲလွန်းဖြူ တစ်တင်း ကျပ် ၄၅၀၀၀၊ ပဲလွန်းပြာ တစ်တင်း ကျပ် ၃၇၀၀၀-၄၀၀၀၀၊ အစေ့ထုတ်ပြောင်း(CP) တစ် တင်း ကျပ် ၁၈၅၀၀၊ ပြောင်းနီ တစ်တင်း ကျပ် ၁၇၀၀၀၊ ပြောင်းဖြူ တစ်တင်းကျပ် ၁၈၅၀၀၊ ဆီထွက် သီးနှံများဖြစ်သော နှမ်းသီးနှံ ပေါက်ဈေးနှုန်းများ မှာ နှမ်းညို တစ်တင်းကျပ် ၇၃၀၀၀၊ နှမ်းနက် တစ်တင်း ကျပ် ၇၂၀၀၀-၈၀၀၀၀-၉၀၀၀၀၊ နှမ်းဖြူ တစ်တင်း ကျပ် ၇၅၀၀၀-၈၅၀၀၀-၈၉၀၀၀၊ နေကြာစေ့ တစ်တင်း ကျပ် ၄၀၅၀၀၊ မြေပဲလုံးဆံနီ တစ်ပိဿာ ကျပ် ၅၃၀၀၊ မြေပဲလုံး ဆံဖြူ တစ်ပိဿာကျပ် ၅၁၀၀-၅၂၀၀၊ ပဲဖတ်တစ်ပိဿာ ကျပ်၂၇၀၀-၂၈၀၀၊ နှမ်းဖတ် တစ်ပိဿာ ကျပ် ၂၀၅၀-၂၁၅၀၊ နေကြာဖတ် တစ်ပိဿာကျပ် ၁၇၂၀ ဈေးနှုန်း အသီးသီးဖြင့် အရောင်းအဝယ် ဖြစ်နေကြောင်း သိရပါသည်။

        ယခုအပတ်ဈေးနှုန်းများမှာ ယခင်အပတ်နှင့်နှိုင်းယှဉ်လျှင် ကုလားပဲသီးနှံဈေးနှုန်းများနှင့် တရိစ္ဆာန် အစားအစာများဖြစ်သော ပဲဖတ်ဈေးနှုန်းများ အနည်းငယ်ဈေးတက်နေပြီး၊ ကျန်ပဲဈေးနှုန်းများနှင့် ဆီထွက်သီးနှံဈေးနှုန်းများ အနည်းငယ်ကျဆင်နေပါကြောင်း  သိရှိရပါသည်။

DOCA(စစ်ကိုင်း)