ပြည်တွင်းကုန်သွယ်မှုသတင်း

             မန္တလေးတိုင်းဒေသကြီး၊ သပိတ်ကျင်းခရိုင်၊ စဉ့်ကူးမြို့၊အမှတ်(၂)ရပ်ကွက်ရှိ HZ ကောက်ညှင်းကျည်တောက်လုပ်ငန်းအားကျောက်ဆည်ခရိုင်၊စားသုံးသူရေးရားစီးဌာန၊ဝန်ထမ်း များမှ သွားရောက် လေ့လာခဲ့ပါသည်။ ၄င်းလုပ်ငန်းအား ရှေးယခင် ဘိုးဘွားလက်ထက်မှစ၍ ယခုအချိန်ထိ မိသားစု အသက်မွေးဝမ်းကြောင်းလုပ်ငန်းအဖြစ် လုပ်ကိုင်လျှက်ရှိပြီး ပေါင်းတင်းဝါး (ခ) ကောက်ညှင်းကျည်တောက်ပြုလုပ်ရန်အတွက် ကောက်ညှင်းအဖြူ (သို့) ကောက်ညှင်းငချိတ် ကြိုက်နှစ်သက်ရာ တို့ဖြင့်ပြုလုပ်နိုင်ကာ အများအားဖြင့် ကောက်ညှင်းအဖြူကို အဓိကပြုလုပ်ကြပါသည် ။ ပြုလုပ်မည့် ကောက်ညှင်းကျည်တောက် အရည်အတွက်ပေါ်မူတည်ပြီး ကောက်ညှင်းများကို သန့်စင်ကာရေမြုပ်အောင်ထည့်ရပြီး ကောက်ညှင်းဆန်များ ရေပေါ်တွင်မပေါ်စေရန် အရေးကြီးကြောင်း ၊ သို့မှသာ ကောက်ညှင်းပေါင်းရာတွင် ကောက်ညှင်းသားအနပ်ညီစေပါမည်။ပြီးလျှင် ထင်းမီးဖြင့်(၂) နာရီခွဲ(၃)နာရီပေါင်းပေးရပြီး ပေါင်းပြီးကောက်ညှင်းအား တင်းဝါးတွင်ထည့်ပြီး မီးပြန်ဖုတ်ပေးရပါသည်။ ကောက်ညှင်းဆန်(၅)ပြီးလျှင် အုန်းသီး(၁)လုံးထည့်နိုင်ပါသည် ။ ကောက်ညှင်းတင်းဝါး တစ်ချောင်းလျှင် အရှည်(၂၂)လက်မဝန်းကျင်ရှိပြီး အလေးချိန်အနေဖြင့်(၅၀)ကျပ်သားခန့်ရှိပါသည်။ ပေါင်းတင်းဝါး(ခ)ကောက်ညှင်းကျည်ထောက် (၁)ချောင်းလျှင် ကောက်ညှင်း၊အုန်းသီး၊နှီး၊တင်းဝါး၊ လုပ်အားခအပါအဝင် စုစုပေါင်း ကုန်ကျငွေ(၁၅၀၀/-)ကျပ်ခန့်ရှိပြီး စျေးသို့ပြန်ရောင်းလျှင်(၁)ချောင်း လျှင်(၂၀၀၀/-)ကျပ်ရရှိကြောင်း၊ အမြတ်အစွန်းအနေဖြင့် ကောက်ညှင်းကျည်တောက် (၁)ချောင်းလျှင် (၅၀၀/-)ကျပ် အကျိုးအမြတ်ရရှိပါသည် ။ ကောက်ညှင်းကျည်တောက်ကို နွေရာသီတွင်(၂)ရက် အထားခံပြီး ဆောင်းရာသီတွင်(၃)ရက်အထိ အထားခံပါသည်။ ၄င်းလုပ်ငန်းတွင် မိသားစု(၅)ယောက် လုပ်ကိုင်ပြီး တစ်ဦးလျှင် တစ်ရက်ဝင်ငွေ (၅၀၀၀-၈၀၀၀)ကျပ်ရရှိပြီး လက်ရှိအလုပ်အကိုင်အဆင်ပြေလျှက်ရှိကြောင်း၊ ပြုလုပ်ပြီးသော ကောက်ညှင်းကျည်တောက်များကို စဉ့်ကူးမြို့ပေါ်ရှိ စျေးများ ၊ ဆိုင်များ ၊လက်ပန်လှစျေး ၊ကားဂိတ်များနှင့် မန္တလေးမြို့များသို့ ရောင်းချလျှက်ရှိပါသည် ။ စဉ့်ကူးမြို့နယ်တွင် ပေါင်းတင်းဝါး(ခ) ကောက်ညှင်းကျည်တောက် လုပ်ငန်းလုပ်ကိုင်သူ အိမ်ထောင်စု(၇) စုရှိပြီး မိသားစုစီးပွားရေးအဆင်ပြေလျှက်ရှိပါသည်။အခြားသောဒေသများတွင်လည်း ကောက်ညှင်းကျည်တောက်ပြုလုပ်ရောင်းချမှုများ ရှိသော်လည်းစျေးကွက်တွင် လူကြိုက်များသော ကောက်ညှင်းကျည်တောက်မှာ စဉ့်ကူးဒေသထွက် ကောက်ညှင်းကျည်တောက်များဖြစ်ကြောင်း ရေးသားတင်ပြအပ်ပါသည်။

DOCA(မန္တလေး)

           စစ်ကိုင်းတိုင်းဒေသကြီးသည် မြန်မာနိုင်ငံ၏ တတိယစပါးကျီဖြစ်ပြီး ရွှေဘိုခရိုင်သည် စစ်ကိုင်းတိုင်းဒေသကြီး၏ ပထမစပါးကျီဖြစ်သဖြင့် နှစ်စဉ်မိုးစပါးဧက(၆)သိန်းကျော် စိုက်ပျိုးလျက်ရှိပြီး မိုးရွာသွန်းမှု များပြီး ဆည်ရေရရှိသည့်အပေါ်မူတည်၍ နွေစပါးများ စိုက်ပျိုးလျက်ရှိပါသည်။ ရွှေဘိုခရိုင်အနေဖြင့် ၂၀၂၁-၂၀၂၂ခုနှစ်ထွက် မိုးရာသီတွင် ရွှေဘိုပေါ်ဆန်း(၃၅၄၇၈၅)ဧက၊ ဧရာမင်း(၂၀၇၃၄၃)ဧက၊ ရွှေသွယ်ရင် (၅၈၇၇၇)ဧက၊ မနော်ဟရီ(၂၆၈၀၅)ဧက၊ IR-747 (၁၉၆၉၉)ဧက၊ မနောသုခ(၂၅၃၇)ဧက၊ ဆင်းသုခ (၁၈၇)ဧက၊ စုစုပေါင်း(၆၇၀၁၃၃)ဧကစိုက်ပျိုးခဲ့ပြီး ရွှေဘိုပေါ်ဆန်းစပါးသည် ခရိုင်ချုပ်စိုက်ဧက၏ (၅၂%)ကျော် စိုက်ပျိုးခဲ့ပါသည်။ ရွှေဘိုပေါ်ဆန်းစပါးကို ရာခိုင်နှုန်းအများဆုံးစိုက်ပျိုးရခြင်းမှာ ရွှေဘိုဒေသ၏ ရေ၊ မြေ၊ ရာသီဥတုနှင့် ကိုက်ညီသည့်အပြင် စပါးပေါ်ချိန်မှ သိုလှောင်ထားချိန်ကာလ တစ်လျှောက်လုံးတွင် ဈေးကွက်ခိုင်မာပြီး စပါးနှင့်ဆန်ဈေးကွက်အတွင်း အမြင့်ဆုံးဈေးဖြင့်ရောင်းချရ၍ အခြားသောစပါးနှင့်ဆန်များထက် ဈေးကောင်းရရှိသဖြင့် ပိုမိုစိုက်ပျိုးကြခြင်းဖြစ်ကြောင်း၊ ရွှေဘိုပေါ်ဆန်း စပါးမျိုးသည် ရာသီစပါးမျိုးဖြစ်ပြီး ပုံမှန်အားဖြင့် ဇူလိုင်လ (တတိယပတ်)တွင် ပျိုးထောင်စိုက်ပျိုးပါက အောက်တိုဘာလ(တတိယပတ်)တွင် သန္ဓေကပ်ပြီး နိုင်ဝင်ဘာလ(တတိယပတ်)တွင်ပန်းပွင့်၍ ဒီဇင်ဘာလ (တတိယပတ်)တွင် ရိတ်သိမ်းနိုင်သဖြင့် သက်တမ်း (၁၅၀)ရက်ရှိကြောင်း၊ ပုံမှန်ထက်စော၍ စိုက်ပျိုးပါက သက်တမ်းရှည်ပြီး အပင်အရပ်မြင့်သဖြင့် သီးပွင့်ရင့်မှည့်ချိန်တွင် လေဒဏ်၊ မိုးဒဏ်မခံနိုင်သောကြောင့် အပင်ယိုင်လဲ ပျက်စီးတတ်ကြောင်း၊ ပျိုးထောင်ချိန်ပုံမှန်ထက် အလွန်နောက်ကျပါက ပန်းပွင့်ချိန် နောက်ကျပြီး ဆောင်းရာသီ၏ ရာသီဥတု ဖောက်ပြန်မှုနှင့်ကြုံတွေ့နိုင်၍ ဝတ်မှုန်ကူးမှုကို ထိခိုက်နိုင်သဖြင့် အဖျင်း၊ အမှော်များပြီး အထွက်နှုန်းနှင့် အရည်အသွေးကိုထိခိုက်စေနိုင်ကြောင်း၊ပျိုးထောင်စိုက်ပျိုးချိန်ကို မှန်ကန်စွာဆောင်ရွက်မှသာ အထွက်နှုန်း ကောင်းမွန်ပြီး အရည်အသွေး ကောင်းစပါးများရရှိမည် ဖြစ်ပါကြောင်း တောင်သူဦးကြီးများထံမှ သိရှိရပါသည်။ ရွှေဘိုခရိုင်၌ ၂၀၂၂-၂၀၂၃ခုနှစ်တွင် မိုးစပါး (၄၈၅၈၈၁)ဧက စိုက်ပျိုးရန် လျာထားကြောင်း သက်ဆိုင်ရာဌာန၏ စာရင်းများအရ သိရှိရပါသည်။ ၂၀၂၁ခုနှစ်မိုးရာသီတွင် မိုးရွာသွန်းမှုများ၍ ဆည်ရေလုံလောက်စွာရရှိသဖြင့် ၂၀၂၂ခုနှစ်တွင် နွေစပါး (၁၀၀၇၅၂)ဧကနှင့် နွေသီးနှံ(၁၂၈၄၅၉)ဧက စိုက်ပျိုးခဲ့ပါသည်။ ယခုအချိန်တွင် နွေသီးနှံအားလုံး ရိတ်သိမ်း ပြီးစီးပြီး နွေစပါးကို ဇွန်လမှစတင်ရိတ်သိမ်းခဲ့ရာ ရာနှုန်းပြည့်နီးပါးရိတ်သိမ်းပြီးစီးပြီဖြစ်သဖြင့် မိုးစပါး အချိန်မီပျိုးထောင်စိုက်ပျိုးနိုင်ရန်အတွက် ထွန်ယက်မြေပြုပြင်ခြင်း၊ မျက်ကောက်ခြင်း၊ ကန်သင်းပြုပြင်ခြင်းနှင့် ပျိုးဘောင်ဆွဲခြင်း၊ ပျိုးထောင်ခြင်းများကို ဆောင်ရွက်လျက်ရှိကြောင်း တွေ့ရှိရပါသည်။

DOCA(စစ်ကိုင်း)

              စစ်ကိုင်းတိုင်းဒေသကြီးသည် ဇူလိုင်လ(စတုတ္တ)ပတ်၌ စပါး/ဆန်ဈေးနှုန်းများမှာ ဆန်ပိုဒေသ များဖြစ်သော ရွှေဘိုခရိုင်တွင် စပါးဈေး အနည်းငယ်ဈေးတတ်နေပြီး၊ ကျန်ခရိုင်များတွင် ဈေးအေးနေပါ သည်။

           စစ်ကိုင်းတိုင်းဒေသကြီးအတွင်းဇူလိုင်လ(စတုတ္တပတ်)တွင်ဖြစ်ပေါ်နေသောအခြေခံစားကုန်ဈေးနှုန်းများမှာ ရွှေဘိုခရိုင်တွင် ရွှေဘိုပေါ်ဆန်း(စပါး) တင်း၁၀၀လျှင် ကျပ်(၁၆၅၀၀၀၀)၊ ပေါ်ဆန်း (ဆန်)၂၄ ပြည်ပါ တစ်အိတ်လျှင်ကျပ်  ၅၇၀၀၀၊ ဧရာမင်း(စပါး)တင်း ၁၀၀လျှင် ၁၁၀၀၀၀၀၊ ဧရာမင်း(ဆန်) ၂၄ ပြည် ပါ တစ်အိတ် ကျပ် ၄၇၀၀၀၊ ရေဦးမြို့မှ ပေါ်ဆန်း (စပါး) တင်း ၁၀၀လျှင် ကျပ် ၁၆၀၀၀၀၀၊ ပေါ်ဆန်း (ဆန်) တစ်အိတ်လျှင်ကျပ် ၅၅၀၀၀၊  ဧရာမင်း (စပါး) တင်း၁၀၀ လျှင် ၁၁၀၀၀၀၀၊ ဧရာမင်း (ဆန်)၂၄ ပြည် ပါ တစ်အိတ်  ၄၅၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။

         ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၈၅၀၀၀၀၊ ဧည့်မထ(ဆန်)‌ ၂၄ ပြည်ပါ တစ်အိတ်မှာ ကျပ် ၂၇၀၀၀၊ ငစိန်(စပါး) တင်း ၁၀၀ လျှင် ၈၀၀၀၀၀ ၊ ငစိန်(ဆန်)၂၄ပြည်ပါ တစ် အိတ်မှာ ၂၆၅၀၀၊ ဧရာမင်း (စပါး)တင်း ၁၀၀ လျှင် ကျပ် ၁၀၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ် မှာကျပ် ၃၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

           ကသာခရိုင်၊ အင်းတော်မြို့နယ်မှ မှော်ဘီ(၂)(စပါး) တင်း ၁၀၀လျှင် ကျပ်၈၀၀၀၀၀၊ မှော်ဘီ(၂) ဆန် ၂၄ပြည် တစ်အိတ် လျှင် ကျပ် ၃၅၀၀၀၊ ဆင်းဧကရီ(၃)(စပါး) တင်း၁၀၀ လျှင် ကျပ် ၇၅၀၀၀၀၊ ဆင်းဧကရီ-၃ဆန် ၂၄ပြည်တစ်အိတ်မှာကျပ် ၃၂၀၀၀၊ ဧရာမင်း (စပါး) တင်း ၁၀၀ လျှင် ကျပ် ၁၀၀၀၀၀၀၊ ဧရာမင်းဆန် ၂၄ ပြည်ဆန်တစ်အိတ်လျှင် ကျပ် ၄၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

             မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၁၁၀၀၀၀၀၊  ဧရာမင်း(ဆန်) ၂၄ပြည် တစ်အိတ်မှာ ကျပ် ၄၅၀၀၀၊ ပေါ်ဆန်း(စပါး) တင်း ၁၀၀လျှင် ကျပ် ၁၄၅၀၀၀၀၊ ပေါ်ဆန်း(ဆန်) ၂၄ပြည် တစ်အိတ်လျှင် ကျပ် ၅၅၀၀၀၊ မနောသုခ (စပါး)တင်း ၁၀၀လျှင် ကျပ် ၈၀၀၀၀၀၊ မနောသုခ(ဆန်) ၂၄ ပြည် တစ်အိတ်လျှင် ကျပ်၃၀၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

            ကန့်ဘလူခရိုင်၊ ကန့်ဘလူမြို့တွင် ဧရာမင်း(စပါး)တင်း ၁၀၀ လျှင် ကျပ် ၉၅၀၀၀၀၊  ဧရာမင်း (ဆန်)၂၄ပြည် တစ်အိတ်မှာ ကျပ် ၃၇၀၀၀၊ ပေါ်ဆန်း(စပါး) တင်း ၁၀၀လျှင် ကျပ် ၁၄၀၀၀၀၀၊ ပေါ်ဆန်း (ဆန်) ၂၄ပြည် တစ်အိတ်လျှင် ကျပ် ၄၈၀၀၀ဖြင့် အရောင်းအဝယ် ဖြစ်နေကြောင်း သိရပါသည်။

           စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ဇူလိုင်လ(တတိယ) ပတ်တွင် စစ်ကိုင်းတိုင်းဒေသကြီးမှ အခြား တိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၃၇၀၀၀၊ မန္တလေးသို့ အိတ်ရေ ၄၄၉၀၀၊ မကွေး သို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း (တောင်)သို့ အိတ်ရေ ၇၅၀၀၊ ရှမ်း (မြောက်)သို့အိတ်ရေ ၇၅၀၀၊ စုစုပေါင်းအိတ်ရေ (၁၀၇၉၀၀) အိတ်၊ တန်အားဖြင့် (၅၃၉၅) စီးထွက်ခဲ့ပြီး၊ ယခု ဇူလိုင်လ(စတုတ္တ)ပတ်တွင် စစ်ကိုင်းတိုင်းဒေသကြီးမှ အခြား တိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၄၄၀၀၀၊ မန္တလေးသို့ အိတ်ရေ ၄၈၈၀၀၊ မကွေး သို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၁၀၀၀၊ ရှမ်း (တောင်)သို့ အိတ်ရေ ၁၀၀၀၀၊ ရှမ်း (မြောက်)သို့အိတ်ရေ ၁၀၀၀၀၊ စုစုပေါင်းအိတ်ရေ (၁၂၄၈၀၀) အိတ်၊ တန်အားဖြင့် (၆၂၄၀) စီးထွက်ခဲ့သည့်အတွက် ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၁၆၉၀၀) တန်အားဖြင့် (၈၄၅) ပိုမို စီးထွက်ခဲ့ပါကြောင်း သိရှိရပါသည်။            

DOCA(စစ်ကိုင်း)

            မကွေးတိုင်း‌ဒေသကြီး၊ စားသုံးသူရေးရာဦးစီးဌာန၊ မကွေးခရိုင်၊ ဒု-ခရိုင်ဦးစီးမှူး ဦးမျိုးဝင်း (မကွေးမြို့နယ်တာဝန်ခံ) နှင့် ဦးလင်းကိုကိုဖြိုး (ရုံးအကူ) တို့သည် (၂၅.၇.၂၀၂၂) ရက်နေ့ နံနက် (၁၀း၀၀) အချိန်တွင် မကွေးကုန်စည်ဒိုင်၌ တောင်သူနှင့်ကုန်သည်များ၏ ဒေသထွက်ကောက်ပဲသီးနှံများ ရောင်းဝယ်ဖောက်ကားနေမှုကို သွားရောက်တွေ့ဆုံမေးမြန်းခဲ့ပါသည်။ ယခင်က တောင်သူတစ်ဦး ကုန်ပစ္စည်းရောင်းချင်လျှင် ပွဲရုံသို့သွား၍ စျေးစုံစမ်းပြီးမှ ရောင်းချရကြောင်း၊ အချိန်ကုန်၊ လူပင်ပန်းပြီး ယခုအခါ ကုန်စည်ဒိုင်တွင် စုဝေးရောင်းချနိုင်ပြီးဖြစ်သဖြင့်  စျေးနှုန်း၊ အလေးချိန်  စိတ်ချလာရပြီဖြစ်ကြောင်း၊ ကုန်စည်ဒိုင်တွင်  စျေးကွက်ပေါက်စျေးများအား  လေ့လာနိုင်ပါကြောင်း၊  မှန်ကန်သောစျေးနှုန်းများဖြင့်  ဝယ်ယူနိုင်အောင်  စီစဉ်ထားကြောင်းနှင့်  ယခင်နှစ်က Covid-19 ကပ်ရောဂါကြောင့်  ကျင်းပနိုင်ကြောင်း မကွေး ကုန်စည်ဒိုင်ဥက္ကဋ္ဌ ဦးကျော်ထွန်းမှ ပြောကြားခဲ့ပါသည်။

            ကုန်စည်ဒိုင်၌ ကုန်သည်များသည် ကောက်ပဲသီးနှံပစ္စည်းများကို စျေးနှုန်းနှင့်ရောင်းလိုသည့်အိတ်၊ အရေအတွက်များဖြင့် နမူနာများဖြင့် ခင်းကျင်းပြသထားပါသည်။ ယနေ့အရောင်းအဝယ်ဖြစ်သောကောက်ပဲသီးနှံများမှာ နှမ်း (၉၂၅) အိတ်၊  ကုလားပဲ (၃၀) အိတ်၊ ကုလားပဲ (929) (၃၅၀) အိတ်၊ ကုလားပဲ (HL) (၅၀၀) အိတ် ရောင်းချရကြောင်း သိရှိရပါသည်။ အရောင်းအဝယ်ဖြစ်သော နှမ်းမျိုးများမှာ ပွင့်ဖြူ၊ စလင်း၊ ဆင်ဖြူကျွန်းဒေသတို့မှ ထွက်ရှိသည့် ရေသွင်းနှမ်းမျိုးဖြစ်ကြောင်း သိရှိရပါသည်။

            ယနေ့ မကွေးကုန်စည်ဒိုင်၌ နှမ်းစျေးနှုန်းများမှာ နှမ်းနက်စမုံ (အဟောင်း) (၁) တင်းလျှင် (၆၄၉၅ဝိ/-)၊ နှမ်းဖြူ (အဟောင်း) (၁) တင်းလျှင် (၆၄၉၅ဝိ/-)၊ နှမ်းနီ (အညို) (၁) တင်းလျှင် (၆၄၅၀ဝိ/-)၊ နှမ်းဖြူ (ဂျပန်) (၁)တင်းလျှင် (၇၅၆၀ဝိ/-) ‌စျေးနှုန်းများရှိ‌ကြောင်းသိရှိရပါသည်။ နှမ်းများကိုဝယ်ယူရာတွင် အက်စစ်ဓာတ်တိုင်းတာခြင်းနှင့် အစိုဓာတ်များရှိ/ မရှိ ကြည့်ရှု၍ဝယ်ယူကြောင်း းသိရှိရပါသည်။ ယနေ့အရောင်းအဝယ်ပွဲကို ပွဲစားကုန်သည်လူဦးရေ (၅၀) ခန့် တက်ရောက်ကြောင်း သိရှိရပါသည်။

DOCA(မကွေး)

                ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်၊ အင်ငါးခွကျေးရွာအုပ်စု၊ အင်ငါးခွ ကျေးရွာတွင် မိုးမြေပဲများစတင်စိုက်ပျိုးနေပြီဖြစ်သဖြင့် မိုးမြေပဲများစိုက်ပျိုးသူ တောင်သူနှင့် တွေ့ဆုံ၍ ကွင်းဆင်း လေ့လာခဲ့ပါသည်။

          စားသုံးသူရေးရာဦးစီးဌာန၊ ပြည်ခရိုင်၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် ဝန်ထမ်းများသည် (၂၀.၇.၂၀၂၂)ရက်နေ့ နံနက် (၁၀:၀၀) အချိန်တွင် ပေါက်ခေါင်းမြို့နယ်၊ အင်ငါးခွကျေးရွာအုပ်စု၊ အင်ငါးခွကျေးရွာရှိ မိုးမြေပဲစိုက်ပျိုးသူတောင်သူ ဦးတင်ဇော်မျိုးနှင့် တွေ့ဆုံ၍ မေးမြန်းရာ ပေါက်ခေါင်းမြို့နယ်အနေဖြင့် မိုးမြေပဲစိုက်ပျိုးဧက (၁၅၃၃၄) ဧကစိုက်ပျိုးပြီး ဖြစ်ပါသည်။ အဆိုပါတောင်သူမှ မိုးမြေပဲ (၅)ဧကကို မေလဒုတိယပတ်တွင် စတင်စိုက်ပျိုးပြီး စိုက်ပျိုးပြီး ရက်၉၀/၁၀၀ အကြာတွင် စတင်နှုတ်သိမ်းရမည်ဟု သိရပါသည်။ မိုးမြေပဲများ စိုက်ပျိုးရာတွင် တစ်ဧက လျှင် မြေပဲဆန်ဒေသမျိုး (၁၀)ပြည်နှုန်းဖြင့် စိုက်ပျိုးကြောင်း သိရပါသည်။ မျိုးမြေပဲဈေးနှုန်းများမှာ တစ်တင်းလျှင် (၆၅၀၀၀)ကျပ်ဖြင့် ဝယ်ယူ၍စိုက်ပျိုးရသည်ဟု သိရပါသည်။ ယခုနှစ် မိုးမြေပဲများ စိုက်ပျိုးရာတွင် သွင်းအားစုများဖြစ်သော မြေဩဇာနှင့် ပိုးသတ်ဆေး ဈေးနှုန်းများ မြင့်မား နေသည့်အတွက် တစ်ဧကကုန်ကျစရိတ်များမြင့်မည်ဟုသိရပါသည်။ မိုးမြေပဲများ မနှုတ်သိမ်းခင်အထိ တစ်ဧကကုန်ကျစရိတ်မှာ ခန့်မှန်းခြေ (၂၁၅၀၀၀)ကျပ်အထိ ကုန်ကျကြောင်း သိရပြီး၊ မြေပဲနှုတ်သိမ်းချိန်တွင် နှုတ်သိမ်း၊ ရိတ်သိမ်းခများထည့်လျှင် ဒီထက်မက ကုန်ကျစရိတ်များ မြင့်မားလာမည် ဖြစ်ကြောင်း သိရပါသည်။

             မိုးမြေပဲများ ထွက်ပေါ်ချိန်တွင် တစ်ဧကအထွက်များကောင်းပြီး၊ ဈေးနှုန်းများ ကောင်းမည် ဆိုပါက တောင်သူများအတွက် အကျိုးအမြတ်များ ပိုမိုရရှိမည်ဖြစ်ကြောင်း လေ့လာသိရှိရပါသည်။

DOCA(ပဲခူး)