ပြည်တွင်းကုန်သွယ်မှုသတင်း

            မကွေးတိုင်းဒေသကြီး၊ မကွေးမြို့ပတ်ဝန်းကျင်ကျေးရွာများမှ ထွက်ရှိသည့် နှမ်းမျိုးစုံကို ရန်ကုန်-မန္တလေး ဝယ်လက်နှင့် ဆီစက်များမှ ဝယ်ယူလျက်ရှိကြောင်း သိရှိရပါသည်။ ယခုနှစ်တွင် မိုးနှမ်းစိုက်ဧကမှာ (၅၈၉၅၆၂)ဧက စိုက်ပျိုးပြီး ရာသီဥတုအခြေအနေအရ (၁)ဧက(၆)တင်းမှ (၁၈)တင်းခြားထွက်ရှိကြကြောင်း လေ့လာသိရှိရပါသည်။

        မကွေးကုန်စည်ဒိုင်သို့ ‌ရေနံချောင်း၊ ပွင့်ဖြူ၊ စလင်း၊ ဆင်ဖြူကျွန်း၊ တောင်တွင်းကြီးမြို့နယ်များမှ နေ့စဉ်အဝင်ရှိနေပြီး ဝင်သလောက်လည်း အရောင်းအဝယ်ဖြစ်နေသည်ကို သိရှိရပါသည်။ အရောင်းအဝယ်အနေဖြင့် ဇူလိုင်လ(၁၇)ရက်မှ (၂၁)ရက်အတွင်း နှမ်းဖြူ (၁၅)ပိဿာ (၁)တင်းလျှင်(၇၀၀၀ဝိ/-)မှ (၇၈၅၀ဝိ/-)၊ နှမ်းညို (၅၅၀၀ဝိ/-)မှ (၆၁၅၀ဝိ/-)၊ နှမ်းနက်(စမုံ)(၈၂၅၀ဝိ/-) နှင့် နှမ်းနက် (၅၈၅၀ဝိ/-)စျေးနှုန်းဖြင့်  အရောင်းအဝယ်ဖြစ်လျက်ရှိပြီး အက်စစ်ဓါတ်ပါဝင်မှုအနည်းအများ၊ အဖျင်း၊ အမှော်၊ ဖုံ၊ သဲ၊ ခဲ ပါဝင်မှုနှင့် အစိုဓာတ်ပေါ်မှုတည်၍ ဈေးနှုန်းကွာခြားလျက်ရှိကြောင်းလည်း သိရှိရပါသည်။ ပြည်ပသို့နှမ်း၊ မြေပဲ တင်ပို့မှုရပ်ဆိုင်းထားသော်လည်း ပြည်တွင်းဈေးကွက်အနေဖြင့် ဈေးကောင်းလျက်ရှိသည့်အတွက် တောင်သူများအနေဖြင့် ရာသီဥတုဖောက်ပြန်မှုကြောင့် သီးနှံအထွက် လျှော့နည်းမှုရှိသော်လည်း ဈေးကောင်းရ၍ တွက်ခြေကိုက်ကြောင်း လေ့လာသိရှိရပါသည်။

DOCA(မကွေး)

            မုံရွာမြို့တစ်ဖက်ကမ်း ချင်းတွင်းမြစ်ရိုးတစ်လျှောက်  မြေနုကျွန်းများပေါ်တွင်မေလဆန်းပိုင်းက စိုက်ပျိုးခဲ့သည့်နွေနှမ်းများ ယခုလဆန်းပိုင်းမှ စတင်ရိတ်သိမ်းနေပြီဖြစ်ကြောင်း ဒေသခံတောင်သူများထံမှ သိရှိရပါသည်။ ဆားလင်းကြီးမြို့နယ်အတွင်းရှိ ချင်းတွင်းမြစ်ရေဝင်ဒေသများဖြစ်သည့် ရွာရှည်အုပ်စု၊ လက်ပန်တောင်းအုပ်စု၊ တုံးအုပ်စု၊ ထန်းစင်အုပ်စုရှိကျေးရွာများမှတောင်သူများသည် နှစ်စဉ်နွေနှမ်းကို မြေနူကျွန်းများပေါ်၌ ရေပေးသွင်း၍ စိုက်ပျိုးကြကြောင်း သိရှိရသည်။ ယခုနှစ် နွေနှမ်းစိုက်ပျိုးချိန် မေလဆန်းကတည်းက မိုးရွာသွန်းခဲ့သည့်အတွက် ယခုနှစ်နွေနှမ်းကို ရေပေးသွင်းခြင်း မပြုခဲ့ရဘဲ မိုးရေဖြင့်စိုက်ပျိုးအောင်မြင်ခဲ့ကြောင်း သိရှိရသည်။

          ယခုနှစ်နွေနှမ်းစိုက်ပျိုးဧက (၁၀၀၀)ကျော်ရှိပြီးစိုက်ပျိုးချိန်မှစ၍ မိုးပုံမှန်ရွာသွန်းခဲ့သည့်အတွက် ရေသွင်းစရိတ်သက်သာခဲ့ကြောင်း မိုးပုံမှန်ရွာသွန်းခဲ့သည့်အတွက် အပင်ဖြစ်ထွန်းမှု အားကောင်းပြီး သီးရှဉ်းနည်းခဲ့ကြောင်း၊ နှစ်စဉ်ရေသွင်းစိုက်ပျိုးမှုထက် ကုန်ကျစရိတ်သက်သာသော်လည်းအထွက်နှုန်း လျော့နည်းခဲ့ကြောင်း ဒေသခံတောင်သူများထံမှ သိရှိရပါသည်။ နှစ်စဉ်နွေနှမ်းကို ရေသွင်းစိုက်ပျိုးခဲ့ရာ တစ်ဧက( ၂.၅ )သိန်းခန့်ကုန်ကျပြီး (၁၅)တင်းခန့်ထွက်ရှိခဲ့ကြောင်း ယခုနှစ်တွင် မိုးဖြင့် စိုက်ပျိုး ခဲ့ရသည့်အတွက် တစ်ဧက (၁.၅)သိန်းခန့်သာကုန်ကျခဲ့သော်လည်း အထွက်နှုန်းအနေဖြင့် (၈)တင်းခန့်သာထွက်ရှိခဲ့သည်အတွက် တစ်ဧကကျပ်(၂)သိန်းဝန်းကျင်ခန့်သာ အကျိုးအမြတ်ရရှိခဲ့ ကြောင်း၊ အပင်ဖြစ်ထွန်းမှုဖက်အားကောင်းသွားပြီး အသီးရှဉ်းနည်းသွားခဲ့သည့်အတွက် အထွက်နှုန်း လျော့နည်းသွားခဲ့ကြောင်း နှမ်းစိုက်တောင်သူ ဦးဘိုအောင်၏ သုံးသပ်ပြောပြချက်အရ သိရှိရပါသည်။

          ယခုလက်ရှိဒေသတွင်း၌ နွေနှမ်းများလှိုင်လှိုင်ရိတ်သိမ်းလျက်ရှိပြီး စနစ်တကျစုပုံခြင်း၊ နှမ်းစည်းခြင်း၊ နှမ်းထောင်နေလှန်းခြင်းနှင့် နှမ်းခါယူခြင်းများဆောင်ရွက်လျှက်ရှိရာ လက်ရှိနွေနှမ်း ရိတ်သိမ်းနေချိန်တွင် နေပူပြင်း၍ မိုးရွာသွန်းမှုမရှိသေးသည့်အတွက် အရည်အသွေးထိခိုက်မှုမရှိသေးကြောင်း၊ ခါယူရရှိသည့်နှမ်းများကို ခြောက်သွေ့အောင်နေလှန်းသန့်စင်ပြီးမှ မုံရွာဈေးကွက်သို့ တိုက်ရိုက်တင်ပို့ရောင်းချလျှက်ရှိကြောင်း လေ့လာသိရှိရပါသည်။

          လက်ရှိမုံရွာဈေးကွက်အတွင်း၌လည်း နှမ်းများနေ့စဉ်နယ်အဝင်များလျှက်ရှိပြီး နှမ်းအမျိုး အစားနှင့် အရည်အသွေးပေါ်မူတည်၍ ဈေးပေးဝယ်ယူလျှက်ရှိကြောင်း၊ တစ်ရက်လျှင် နှမ်းတင်း (၅၀၀) ခန့် နယ်အစုံမှဝင်ရောက်မှုရှိပြီး နယ်အဝင်ရှိသလောက် အရောင်းအဝယ်ဖြစ်ခဲ့ကြောင်း၊ လက်ရှိမုံရွာဈေးကွက်၌ နှမ်းညိုတစ်တင်း (၅၇၀၀၀)ကျပ်မှ(၅၉၀၀၀)ကျပ်၊ နှမ်းဖြူတစ်တင်း (၆၇၀၀၀)ကျပ်မှ (၆၉၀၀၀)ကျပ်နှင့် နှမ်းနက်တစ်တင်း(၇၃၀၀၀)ကျပ်မှ (၇၅၀၀၀)ကျပ်ပေါက်ဈေး ရှိခဲ့ကြောင်း၊ ယခင်နှစ်ကာလတူနှင့် နှိုင်းယှဉ်ပါက တစ်တင်း(၁၀၀၀၀)ကျပ်ခန့် မြင့်တက်ခဲ့ကြောင်းနှင့် ရန်ကုန်၊ မန္တလေးမြို့ကြီးများသို့ အဓိကတင်ပို့လျှက်ရှိကြောင်း ကုန်သည်အသိုင်းအဝိုင်းမှ သတင်းရရှိပါသည်။

DOCA(စစ်ကိုင်း)

                 ချင်းပြည်နယ်တွင် ချင်းလူမျိုးတို့၏ ရိုးရာအစားအစာအဖြစ် ဆာဗူးသီးသည် ယခုအခါ ချင်းတိုင်းရင်းသားများသာမက  အခြားတိုင်းရင်းသားများကပင် အဆာပြေအဖြစ် စားသုံးမှုပိုမို များလာသည့် အစားအစာတစ်မျိုးဖြစ်ပါသည်။

              ဆာဗူးသီးစားသုံးသောဓလေ့မျာ တစ်နေရာနှင့် တစ်နေရာ အခေါ်ဝေါ်ခြင်း မတူညီကြပေ။ တီးတိန်စကားဖြင့် ဘိုင်မကျင်း ဟုသော်လည်းကောင်း၊ ချင်းတောင်ပိုင်းဒေသ မင်းတပ်၊ မတူပီ၊ ကန်ပက်လက်နှင့် ပလက်ဝဒေသများတွင် ဒေတွီဟုလည်းကောင်း၊ ဟားခါးစကားဖြင့် ဆာဗူးသီးဟု အမျိုးမျိုးခေါ်ဝေါ်ကြကြောင်း လေ့လာသိရှိရပါသည်။

              ပထဝီအနေအထားအရ ချင်းတောင်ဒေသများတွင် ရှေးအခါက ဆန်စပါးထက် ပြောင်းသီးနှံကို ပိုမိုစိုက်ပျိုးကြပြီး ပြောင်းဖူးနှင့်ဆက်နွှယ်သော အစားအစာများ ပေါ်ပေါက်ခဲ့လာခဲ့ခြင်း ဖြစ်ပါသည်။

              ဆာဗူးသီးချက်ပြုတ်ရန်အတွက် ပြောင်းဖူးဆံခြောက်များကို သစ်သားဆုံကြီးများဖြင့် ထောင်းကာ အခွံချွတ်ရပြီး ရရှိသည့် ပြောင်းဖူးကြမ်းအဆံများကို အသား၊ ရေတို့ဖြင့် ရောပြုတ်ကာ ဟင်းခတ်မှုန့်မပါသော်လည်း ပြောင်းဖူးပြုတ်ရည်ပျစ်ပျစ်၏ ချိုဆိမ့်သောအရသာနှင့် အသား၏ အချိုဓါတ်တို့ဖြင့် သဘာဝ အစားအစာတစ်မျိုးဖြစ်ပါသည်။ ယင်းဆာဗူးသီး စားသုံးရာတွင်  ငရုတ်သီးထောင်းမှာ မပါမဖြစ် တွဲဖက်လျက် စားသောက်ကြပြီး အသားခြောက်ကြော်နှင့် တွဲဖက်စားသောက်လေ့ ရှိကြပါသည်။ ဆာဗူးသီး ပွဲကြီးတစ်ပွဲလျင် ( ၈၀၀ ) ကျပ်နှင့် ပုံမှန်ပွဲ တစ်ပွဲလျှင် ( ၅၀၀ ) ကျပ် ဈေးနှုန်းများဖြင့် ရောင်းချလျက်ရှိပါသည်။

              ယခုအခါတွင် ဆာဗူးသီးကို မိမိစိတ်တိုင်းကျ ချို၊ ချဉ်၊ ငံ၊ စပ် အရသာအဖြစ် ရောစပ်စားကြပြီး ချင်းရိုးရာအစားအစာအဖြစ် စားသုံးမှုပိုများပြီး ချင်းပြည်နယ် တစ်ခုတည်းသာမက  မြေပြန့်ဒေသများနှင့် အောက်ပိုင်းဒေသများတွင်ပါ စားသုံးမှုပိုများကြောင်း သိရသည်။  ဒေသ အစားအစာတစ်မျိုးဖြစ်၍  ချင်းပြည်နယ်တွင် တစ်နိုင်တစ်ပိုင်စီးပွားရေးလုပ်ငန်း လုပ်ကိုင်သူများအနေဖြင့် ရောင်းအားကောင်းပြီး ဝင်ငွေရရှိနေသောကြောင့် ဆာဗူးသီး ချတ်ပြုတ် ရောင်းချသူများ အဆင်ပြေလျက်ရှိကြောင်း သတင်းရရှိပါသည်။

DOCA(စစ်ကိုင်း)

နေပြည်တော် ဇူလိုင် ၂၄

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံ နှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်း တွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်း ဈေးနှုန်းကို ထုတ်ပြန်ပေးလျက်ရှိပါသည်။

              ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများ၌ ဈေးနှုန်း တည်ငြိမ်နေသဖြင့် ၂၀၂၂ ခုနှစ်၊ဇူလိုင်လ ၂၅ ရက်နေ့မှ ဇူလိုင်လ ၃၁ ရက်နေ့အထိ ရန်ကုန် အထိုင်ဈေး အခြေခံလက်ကားရည်ညွှန်းဈေးနှုန်းမှာ ယခင်ရက်သတ္တပတ် ဈေးနှုန်းအတိုင်း ပြောင်းလဲမှုမရှိဘဲ စားအုန်းဆီ တစ်ပိဿာလျှင် ၃၆၆၅ ကျပ် ဖြစ်ကြောင်း ထုတ်ပြန်ကြေညာ ထားသည်။

              ထို့အပြင် ပြည်တွင်း ဈေးကွက်အတွင်းဈေးနှုန်းမြှင့်တင်ရောင်းချခြင်း၊ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

              အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www. doca. gov. mm ၊ Facebook Page နှင့် မြန်မာနိုင်ငံဆီကုန်သည်နှင့် ဆီ လုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

                                                                                                            သတင်းစဉ်

               အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဇူလိုင်လ (၁၅) ရက်နေ့မှ ဇူလိုင်လ (၂၁) ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့်သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ) ကျပ် ၁၂၀၀ မှ ၁၅၀၀ အတွင်း၊ ဂေါ်ဖီထုပ် (တစ်ထုပ်) ကျပ် ၆၀၀ မှ ၁၀၀၀ အတွင်း၊ ပန်းဂေါ်ဖီ (ထုပ်) ကျပ် ၅၀၀ မှ ၁၀၀၀ အတွင်း၊ အာလူး(ပိဿာ)ကျပ် ၁၇၀၀ မှ ၂၀၀၀ အတွင်း၊ မုန့်လာဉနီ (ပိဿာ) ကျပ် ၁၃၀၀ မှ ၁၇၀၀ အတွင်း ရွှေဖရုံသီး(လုံး) ကျပ် ၂၅၀၀ မှ ၃၅၀၀ အတွင်း၊ ဗူးသီးး(လုံး) ကျပ် ၈၀၀ မှ ၁၂၀၀ အတွင်း၊ မုန်ညှင်း(ထုပ်) (ပိဿာ)ကျပ် ၁၃၀၀ မှ ၁၅၀၀ အတွင်း၊ ကြက်သွန်နီ(ဆိပ်ဖြူ) ကျပ် ၁၂၀၀ မှ ၂၀၀၀ အတွင်း၊ ကြက်သွန်ဖြူ(ရှမ်း) (ပိဿာ) ၂၁၀၀ မှ ၃၆၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၅၀၀ မှ ၃၂၀၀ အတွင်း၊ ချင်း(ပိဿာ) ကျပ် ၈၀၀ မှ ၁၀၀၀ အတွင်း၊ ဆလပ်ရွက် (စီး) ကျပ် ၁၀၀ မှ ၁၅၀ အတွင်း၊ ချဉ်ပေါင်ရွက်(စီး) ကျပ် ၅၀ မှ ၁၀၀ အတွင်း၊ ခရမ်းသီး(ရှည်)(ပိဿာ) ကျပ် ၁၃၀၀ မှ ၁၇၀၀ အတွင်း၊ သံပရာသီး(လုံး) ကျပ် ၂၀ မှ ၁၀၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ) ၁၅၀၀ မှ ၂၀၀၀ အတွင်း၊ ဖရဲသီး (အကြီး၊ အလတ်၊ အသေး) ကျပ် ၂၅၀၀ မှ ၃၅၀၀ အတွင်းဖြစ်ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၁၁၀၅၀၀)ကျော်၊ ခရမ်းသီး(ရှည်)(ပိဿာ) (၈၁၆၄) ကျော်၊ ဗူးသီးအလုံးပေါင်း (၂၅၇၀) ကျော်၊ ရွှေဖရုံသီးအလုံးပေါင်း (၅၉၅၀) ကျော်၊ ဂေါ်ဖီထုပ်ပေါင်း (၃၀၂၀၀) ကျော်၊ ပန်းဂေါ်ဖီထုပ်ပေါင်း (၁၀၇၀၀) ကျော်၊ မုန်ညှင်းထုပ်(ပိဿာ)ပေါင်း (၁၂၄၀၀) ကျော်၊ ဖရဲသီးလုံး ပေါင်း (၆၀၀၀) ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)