ပြည်တွင်းကုန်သွယ်မှုသတင်း

          ယနေ့ နေပြည်တော်ကောင်စီနယ်မြေအတွင်းရှိ ကျေးရွာအချို့၌ နေပြည်တော်ဆီကုန်သည်နှင့် ဆီလုပ်ငန်းရှင်များအသင်းမှဦးဆောင်၍ အထူးဈေးနှုန်းဖြင့် စားအုန်းဆီများ ဆက်လက်ဖြန့်ဖြူး ရောင်းချပေးလျက်ရှိပါသည်။

        “ ပျဉ်းမနားမြို့နယ်၊ ရှမ်းစုကြီးကျေးရွာနှင့် လဲလူးအိုင်ကျေးရွာတို့တွင် ဦးခင်မောင်မြင့် (ရွှေမင်းသားကုန်မျိုးစုံရောင်းဝယ်ရေး)မှ ဦးဆောင်၍ စားသုံးသူရေးရာဦးစီးဌာနမှ ဝန်ထမ်းများနှင့် ပူးပေါင်း၍ ဆီပိဿာချိန်(၆၆၀)အား စျေးကားတစ်စီးဖြင့် လှည့်လည်ရောင်းချပေးခဲ့ကြောင်း၊ တပ်ကုန်းမြို့နယ်၊ ရေအေးအုပ်စု၊ ရေအေးကျေးရွာတွင် ဆီပိဿာချိန် (၃၃၀)အား ဦးဇော်ဇော်လတ် (ဝင်းသီရိကုန်စုံဆိုင်)မှ ဌာနဆိုင်ရာဝန်ထမ်းများနှင့်အတူ ရောင်းချပေးခဲ့ကြောင်း၊ ထို့အပြင် တပ်ကုန်းမြို့နယ်၊ အောင်မြေရိပ်သာကျေးရွာ၊ ပြိုင်အင်းကျေးရွာတို့တွင် ဦးမျိုးမင်း ( ဦးမျိုးမင်း+ မခက် ကုန်မျိုးစုံရောင်းဝယ်ရေး)မှ ဆီပိဿာချိန် (၃၃၀)အားစားသုံးသူရေးရာဦးစီးဌာနမှ ဝန်ထမ်းများနှင့်အတူ စျေးကားဖြင့်လှည့်လည်ရောင်းချပေးခဲ့ကြောင်းနှင့် ဦးအေးထွန်း(ပြည်လုံးချမ်းသာဆီစက်ပွဲရုံ)မှ စားသုံးသူရေးရာဦးစီးဌာနမှ ဝန်ထမ်းများနှင့်အတူ လယ်ဝေးမြို့နယ်၊ ငှက်ပျောတောကျေးရွာနှင့် ကြံခင်းစုကျေးရွာတို့တွင် ဆီတစ်ပိဿာလျှင် ၃၉၀၀ ကျပ်နှုန်းဖြင့် ပိဿာချိန် (၆၆၀)အား စားသုံးသူ ပြည်သူများ လက်ဝယ်အရောက် ဈေးကားဖြင့် လှည့်လည်ရောင်းချလျက်ရှိသည်”ဟု ဆီလုပ်ငန်းရှင်များထံမှ သတင်းရရှိပါသည်။

           ယခုလိုရောင်းချပေးနေမှုများကြောင့် စားသုံးသူပြည်သူများ အဆင်ပြေမှုများစွာရှိနေကြောင်းသိရှိရသဖြင့် နေပြည်တော်ဆီကုန်သည်နှင့် ဆီလုပ်ငန်းရှင်များအသင်းမှ အထူးဈေးနှုန်းဖြင့် ဖြန့်ဖြူးရောင်းချပေးမှုများကို အ‌ကောင်းဆုံးဆက်လက်လုပ်‌ဆောင်သွားမည်ဟု သိရှိရပါသည်။

DOCA(ပြည်ထောင်စုနယ်မြေ)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊မင်းဘူးခရိုင်၊ စလင်းမြို့နယ်ဦးစီးမှူးရုံးမှ ဦးဆန်းလင်းမောင်(ဦးစီးမှူး) နှင့်အဖွဲ့သည်  စလင်းမြို့နယ်၊ ဆင်ကျုံးကျေးရွာသို့ (၂၆.၇.၂၀၂၂)ရက်နေ့ နေ့လယ်(၁၄:၀၀)နာရီ အချိန်တွင် ပြည်တွင်းကုန်သွယ်မှုလုပ်ငန်း ဖွံ့ဖြိုးတိုးတက်ရေးအတွက် မိုးစပါးစိုက်တောင်သူနှင့်တွေ့ဆုံ၍ စိုက်ပျိုးထုတ်လုပ်မှုကုန်ကျစရိတ်နှင့် အကျိုးအမြတ်ရရှိမှုတို့ကို ကွင်းဆင်းတွေ့ဆုံမေးမြန်းခဲ့ပါသည်။

          ဆင်ကျုံးကျေးရွာသည် စလင်းမြို့၏ အနောက်ဘက်တွင် ကပ်လျက်ရှိပြီး နှစ်စဉ် စပါး၊ ကုလားပဲ၊ နှမ်းသီးနှံများ စိုက်ပျိုးလျက်ရှိရာ ယခုနှစ်တွင် ဆင်ကျုံးကျေးရွာတောင်သူများအနေဖြင့် မိုးစပါးဧက (၄၆၀)ခန့် စိုက်ပျိုးမည်ဖြစ်ပြီး မနောသုခ၊ ဆင်းရတနာတိုး၊ ဧရာပဒေသာ စသည့် စပါးအမျိုးအစား (၃)မျိုး အနက် တောင်သူများအနေဖြင့် ဈေးကွက်ဝင်၍ ဈေးနှုန်းရရှိသော ဧရာပဒေသာစပါးကိုသာ အဓိကစိုက်ပျိုးကြကြောင်း သိရှိရပါသည်။

          စိုက်ပျိုးရာတွင် မိုးစပါးကိုနှစ်စဉ် ဇူလိုင်လတွင် ပျိုးထောင်၍ ဩဂုတ်လတွင်စိုက်ပျိုးပြီး နိုဝင်ဘာလတွင် အပြီးရိတ်သိမ်းကြပါသည်။ စိုက်ပျိုးမှုမှာ ပျိုးထောင်စိုက်ပျိုးခြင်းနှင့် တိုက်ရိုက် အစေ့ချစိုက်ပျိုးခြင်းဟူ၍ (၂)မျိုးရှိပြီး တိုက်ရိုက်အစေ့ချစိုက်ပျိုးခြင်းသည် အထွက်နှုန်းမြင့်မားမှု မရှိသော်လည်း ကုန်ကျစရိတ်သက်သာ၍ အကျိုးအမြတ်ပိုမိုရရှိကြောင်း သိရှိရပါသည်။ မိုးစပါး စိုက်ပျိုးရာတွင် မြေပြုပြင် ချိန်မှစ၍ စိုက်ပျိုးပြီးသည်အထိ (၁၇၀၀၀ဝိ/-) ကုန်ကျကြောင်း ယခင်နှစ် က မျိုး(၂)တင်း၊ ကွန်ပေါင်းမြေဩဇာထည့်သွင်းခြင်း ၊ ပိုးသတ်ဆေး၊ ပေါင်းသတ်ဆေး၊ အားဆေး စသည့် သွင်းအားစု များအနေဖြင့် (၁၈၀၀၀ဝိ/-) ခန့်နှင့် ရိတ်သိမ်းစရိတ် (၅၀၀၀ဝိ/-) ခန့် စုစုပေါင်း (၁)ဧကကုန်ကျစရိတ် (၄၀၀၀၀ဝိ/-) ခန့် ကုန်ကျကြောင်း (၁)ဧကလျှင် ဧရာပဒေသာ (၈၀)တင်း ထွက်ရှိကာ (၁)တင်းလျှင် (၁၀၀၀ဝိ/-) ရောင်းချရ၍ ဝင်ငွေ (၈၀၀၀၀ဝိ/-) ရရှိကာ အကျိုးအမြတ် အနေဖြင့် (၄၀၀၀၀ဝိ/-)ခန့် ရရှိခဲ့ကြောင်း သိရှိရပါသည်။ ဆင်ကျုံးဒေသသည် လင်းဇင်းရေလွှဲ ဆည်မှ ရေကိုအသုံးပြုပြီး ယခုနှစ်တွင် ရေရရှိမှု အကြိမ်ရေလျော့နည်းသည့်အပြင် ပိုးသတ်ဆေး၊ မြေဩဇာ၊ အားဆေးအမျိုးမျိုးနှင့် ဓာတ်ဆီ၊ ဒီဇယ် သွင်းအားစုများ ဈေးနှုန်းမြင့်မားခြင်းတို့ကြောင့် ယခင်နှစ်ကထက် စိုက်ပျိုးထုတ်လုပ်မှုကုန်ကျ စရိတ်များလာနိုင်ကြောင်း တောင်သူ၏ပြောကြား ချက်အရ သိရှိရပါသည်။

         စပါး(၁)ဧက စိုက်ပျိုးရာတွင် အထွက်နှုန်းမှာ မြေကွာခြားမှု၊ သွင်းအားစုထည့်သွင်းမှု မတူညီခြင်း၊  ရေသွင်းအကြိမ်ရေ ကွာခြားမှုတို့ကြောင့် (၁)ဧက  ထုတ်လုပ်မှုစရိတ် မတူညီသလို အထွက်နှုန်းလည်း မတူညီနိုင်ကြောင်း ယခင်နှစ်က သီးနှံပေါ်ချိန်တွင် စပါးတင်း(၁၀၀)လျှင် (၁၀၀၀၀၀ဝိ/-) ခန့်ဈေးရရှိပြီး  စပါးတင်း(၁၀၀) ကြိတ်ခွဲလျှင် ဆန်အိတ် ရှယ်ထိပ်စ (၂၅)  လုံးထွက်ကြောင်း (၁)အိတ်လျှင် (၄၂၀၀ဝိ/-) ရောင်းချရ၍ ဆန်ကုန်သည်များအနေဖြင့်လည်း စပါးတင်း (၁၀၀)လျှင် (၅၀၀၀ဝိ/-) ခန့် အကျိုးအမြတ်ရရှိခဲ့ကြောင်း ဆန်စက်ပိုင်ရှင် ဦးဝင်းထိုက်၏ ပြောကြားချက်အရ သိရှိရပါသည်။

        စလင်းမြို့နယ်၊ ဆင်ကျုံးကျေးရွာသည် လူဦးရေနည်းပါးပြီး စပါးစိုက်ဧကများသောကြောင့် စားသုံးပြီး ပိုလျှံသောစပါးကို ဒေသတွင်းစပါးကုန်သည်များနှင့် ဆန်စက်များသို့ရောင်းချကြောင်းနှင့် ထွက်ရှိသည့်ဆန်ကို ကုန်ချောအဖြစ် ဆန်ကြာဆံ၊ မုန့်ဟင်းခါးမုန့်ဖတ် စသည်ဖြင့် စားသောက် ကုန်လုပ်ငန်းများတွင် တွင်တွင်ကျယ်ကျယ် လုပ်ကိုင်ဆောင်ရွက်လျက်ရှိကြောင်း ဆင်ကျုံးကျေးရွာရှိ မိုးစပါး စိုက်တောင်သူတစ်ဦးထံမှ သိရှိရပါသည်။

DOCA(မကွေး)

            မြန်မာ့လက်မှုပညာဖြင့် ကြိမ်ထည်ပစ္စည်းမျိုးစုံ ထုတ်လုပ်ရောင်းချနေသော စစ်ကိုင်းမြို့ မကျည်းစဉ်ရပ်ကွက်ရှိ စစ်ကိုင်းမြို့နယ် ကြိမ်ထည်လုပ်ငန်းရှင်များအသင်းဥက္ကဌဖြစ်သည့် ဦးသန်းထွန်း ထံသို့ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးနှင့် ဝန်ထမ်းများသည် ဇူလိုင်လ ၂၅ ရက်နေ့က သွားရောက်တွေ့ဆုံ၍ ထုတ်လုပ်ရောင်းဝယ်မှု အခြေအနေများနှင့် ဈေးနှုန်း/ဈေးကွက် အခြေအနေများကို ဆွေးနွေးမေးမြန်းခဲ့ပါသည်။

          စစ်ကိုင်းမြို့တွင် ကြိမ်ထည်လုပ်ငန်းပညာကို ဦးထွန်းရွှေ (ရန်ကုန်) ထံမှ ဦးသန်းထွန်းက သင်ယူခဲ့ပြီး (၁၉၇၄-၇၉) ခုနှစ်က ကြိမ်ထည်လုပ်ငန်းစတင်ခဲ့ကြောင်း၊ စစ်ကိုင်းမြို့နယ် ကြိမ်ထည် လုပ်ငန်းအသင်းကို (၂၈.၁၀.၂၀၁၁) ရက်နေ့တွင် အလုပ်အမှုဆောင် (၅) ဦး၊ အသင်းသား (၈၉) ဦးဖြင့် စတင်ဖွဲ့စည်းခဲ့ကြောင်း၊ ယခုလက်ရှိ အချိန်ကာလ၌ မကျည်းစဉ်ကျေးရွာတွင် ကြိမ်လုပ်ငန်း လုပ်ကိုင်သူ (၃၅) ဦးခန့်ရှိကြောင်း၊ ကြိမ်ကုန်ကြမ်းအား ယခင်က ဗန်းမော်မြို့မှ ဝယ်ယူပြီး ယခုအခါ မန္တလေးမြို့မှ ဝယ်ယူကြောင်း၊ ကုန်ချောကြိမ်ထည်များအား ပြည်တွင်းတွင် မော်တော်ကားနှင့် လှည့်လည်ရောင်းချသော ပရိဘောဂပစ္စည်းရောင်းချသူများအား ပြန်လည်ရောင်းချကြောင်း၊ ဈေးနှုန်းများအနေဖြင့် ဦးထုပ် (၁) လုံး ၃၀၀ဝိ/-၊ ဗန်း (၁) ချပ် အမျိုးအစား၊ အရွယ်အစားအလိုက် ၁၀၀၀ဝိ/- မှ ၂၅၀၀ဝိ/-၊ တစ်ရှူးဗူး လေးထောင့် (၁) ဗူး ၅၀၀ဝိ/- နှင့် အဝိုင်းဗူး (၁) ဗူး ၄၀၀ဝိ/-၊ ခေါင်းအုံးကြီး (၁) လုံး ၅၀၀ဝိ/- နှင့် ခေါင်းအုံးလတ် (၁) လုံး ၂၀၀ဝိ/-၊ ရေအိုးအုပ်ဆောင်း (၁) ခု ၂၀၀ဝိ/-၊ ထမင်းအုပ်ဆောင်း (၁) ခု ၆၀၀ဝိ/-၊ ဆရာမဆွဲခြင်း (၁) ခု ၈၀၀ဝိ/- မှ ၉၀၀ဝိ/-၊ အမှီပါ ကုလားထိုင် (၁) ခု ၅၀၀၀ဝိ/- နှင့် စားပွဲဝိုင်း (၁) ခု ၈၀၀၀ဝိ/- ဖြင့် အသီးသီး ရောင်းချပါကြောင်း၊ အလုပ်သမားများ၏ တစ်နေ့လုပ်အားခမှာ ကျား (၁) ဦးလျှင် (၅၀၀ဝိ/- မှ ၆၀၀ဝိ/-)၊  မ (၁) ဦးလျှင် (၃၅၀ဝိ/- မှ ၅၀၀ဝိ/-) ရရှိကြောင်း သိရှိရပါသည်။

DOCA(စစ်ကိုင်း)

           ပြည်တွင်းစားသုံးရန်အတွက် ဒေသတွင်းစျေးကွက်ဝယ်လိုအားရှိသော မိုးကြိုပိန်းဥ စိုက်ပျိုးသည့် တောင်သူများ စျေးကောင်းရလျှက်ရှိကြောင်း၊ ကျောင်းကုန်းမြို့နယ်၊ ကညင်သုံးဆင့်ကျေးရွာအုပ်စု၊ တူးမြောင်းကျေးရွာနေ မိုးကြိုရေလောင်း စိုက်ပျိုးသည့် တောင်သူများထံမှ သိရသည်။

          ယခင်နှစ်က မိုးကြိုပိန်းစိုက်ပျိုးသော တောင်သူ (၁၀)ဦးခန့်ရှိပြီး စျေးကောင်းရသည့် အတွက် ယခုနှစ်တောင်သူ (၂၀)ဦးခန့် စိုက်ပျိုးလျှက်ရှိကြောင်း၊ ယခင်နှစ်ပိန်းဥ (၄၅)ပိဿာဝင် တစ်အိတ်ကို ကျပ် (၄၀၀၀၀)ဝန်းကျင်စျေးရပြီး ယခုနှစ်တစ်အိတ်ကို ကျပ် (၅၀၀၀၀)မှ (၆၀၀၀၀) စျေးအတွင်း ရရှိပြီး ပိန်းဥအရွယ်ကြီးလျှင် စျေးပိုရသဖြင့် ယခုနှစ်စျေးနှုန်းပိုမိုရရှိ ကြောင်း၊ ပိန်းစိုက်တောင်သူများထံမှသိရသည်။ မိုးကြိုပိန်းကို ဖေဖော်ဝါရီလတွင် ပျိုးထောင်၍ မတ်လတတိယပတ်အတွင်း စိုက်ခင်းသို့ ပြောင်းရွေ့ကာ (၇)ရက် တစ်ကြိမ်၊ မိုးမှန်သည့် အထိ ရေလောင်းပေးရပြီး (၁)လအကြာ မြေသြဇာကျွေး၊ ပေါင်းနှုတ်၊ စိုက်ဘောင်မြေတင်ခြင်းများ ပြုလုပ်ပေးရကြောင်း၊ (၄)လ၀န်းကျင် ပိန်းဥတူးဖော်၍ စျေးကွက်သို့ တင်ပို့ရောင်းချပြီး (၁)ဧက ကုန်ကျစရိတ်မှာ (၁၁)သိန်း၀န်းကျင်ကုန်ကျ၍ (၁)ဧကပျမ်းမျှ အထွက်နှုန်းမှာ (၄၅)ပိဿာ၀င် အိတ်ရေ (၇၀)ခန့်ရရှိပြီး ပိန်းဥရောင်းချရငွေ (၃၅)သိန်း၀န်းကျင် ရရှိသောကြောင့် (၁)ဧကလျှင် ကျပ် (၂၅)သိန်းကျပ်ခန့် အကျိုးအမြတ်ရရှိ၍ တွက်ခြေကိုက်လျှက်ရှိကြောင်း စားသုံးသူရေးရာ ဦးစီးဌာန မြို့နယ်တာ၀န်ခံ ဦးတင်ကိုမှ ကွင်းဆင်းမေးမြန်းခဲ့ရာ ပိန်းစိုက်ပျိုးသူ တောင်သူ ဦးမြင့်ကြိုင်ထံမှ သိရသည်။

DOCA(ဧရာဝတီ)

              ဇွန်၊ ဇူလိုင်လ၊ ဩဂုတ်၊ စက်တင်ဘာလများသည် မြန်မာနိုင်ငံ၏ မုတ်သုန်မိုးဝင်၍ မိုးရာသီသို့ ရောက်ရှိပြီး၊ တောင်သူလယ်သမားများအနေဖြင့် မိုးရေကို အဓိကထား၍ လယ်ယာစိုက်ပျိုးရေးကို လုပ်ကိုင်လျက်ရှိပါသည်။ စိုက်ပျိုးသည့်စပါးပင်များ အထွက်နှုန်း ကောင်းရန်အတွက် လိုအပ်လျက်ရှိသော မြေပြုပြင်ခြင်း၊ သဘာဝမြေဩဇာများထည့်ခြင်းဖြင့် ဓါတ်မြေဩဇာများကိုလည်း လိုအပ်သလို အသုံးပြု၍ စိုက်ပျိုးလျက်ရှိကြောင်း တွေ့ရှိရပါသည်။

          လယ်ယာစိုက်ပျိုးရေးလုပ်ငန်းများတွင် အသုံးပြုရန်အတွက် လိုအပ်လျက်ရှိသော ဓါတ်မြေဩဇာဈေးနှုန်းများကို စိုက်ပျိုးရေးအရောင်းဆိုင်များမှ စုံစမ်းမေးမြန်းစာရင်း ကောက်ယူ၍ ရန်ကုန်တိုင်းဒေသကြီးဦးစီးမှူးရုံးသို့ အပတ်စဉ်ဈေးနှုန်းစာရင်းများ ပေးပို့လျက် ရှိပါသည်။ ၂၈.၆.၂၀၂၂ ရက်နေ့တွင် စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် မင်္ဂလာတောင်ညွန့်မြို့နယ်ရှိ မာလာမြိုင်စိုက်ပျိုးရေးအရောင်းဆိုင်ကြီးမှ ဈေးနှုန်းကောက်ယူရရှိသော ဓါတ်မြေဩဇာအမျိုးအစားအလိုက် ဈေးနှုန်းများမှာ နေရွက်လှေ (50 Kg) တစ်အိတ်လျှင် (15 : 15 : 15)၉၇၀၀၀/-၊ Urea (50 Kg)တစ်အိတ်လျှင် ၉၇၀၀၀/-၊ T.S.P (50 Kg) တစ်အိတ်လျှင် ၉၈၀၀၀/- နှင့် M.O.P (50 Kg)တစ်အိတ်လျှင် ၉၄၅၀၀/- ဖြစ်၍ ယခင်လများနှင့် ဈေးနှုန်းများ နှိုင်းယှဉ်ကြည့်လျှင် ဈေးနှုန်းအနည်းငယ်မြင့်တက်လျက်ရှိကြောင်း သိရှိရပြီး၊ စိုက်ပျိုးရေးလုပ်ငန်းလုပ်ကိုင်နေသူများအတွက် လိုအပ်ပါကလည်း စိုက်ပျိုးရေး လုပ်ငန်းသုံးပစ္စည်းများ၊ ဓါတ်မြေဩဇာများနှင့် ပိုးသတ်ဆေးများကို ဈေးနှုန်းမှန်ကန်စွာဖြင့် လက်လီ/လက်ကား ရောင်းချပေးနေကြောင်း သတင်းရရှိပါသည်။

DOCA(ရန်ကုန်)