ပြည်တွင်းကုန်သွယ်မှုသတင်း

              ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် မုန့်ဟင်းခါးဖို ၂၀ ခန့်၊ မုန့်ဖတ်ခြောက်လုပ်ငန်းလုပ်ကိုင်သူ ၉ ဦးခန့်ရှိကြောင်း သိရှိရပြီး မုန့်ဟင်းခါးသည် ဒေသအလိုက် စားသုံးကြသောအစားအစာများတွင် တစ်မျိုးအပါအဝင်ဖြစ်ပါသည်။ စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံသည် မတ်လ ၁၇ ရက်နေ့ နံနက်ပိုင်းက တောင်ငူမြို့တွင် သရဖူအမှတ်တံဆိပ် မုန့်ဟင်းခါးခြောက်ထုတ်လုပ်သူ ဦးသိန်းနိုင်မြင့်နှင့်တွေ့ဆုံပြီး မုန့်ဟင်းခါးခြောက် ထုတ်လုပ်ဖြန့်ဖြူးရောင်းချနိုင်မှုအခြေအနေများကို မေးမြန်းခဲ့ပါသည်။

              တွေ့ဆုံမေးမြန်းမှုအရ မုန့်ဟင်းခါးဖတ် ထုတ်လုပ်ရာတွင် ဆန်လတ်ဆန်များကို အဓိကကုန်ကြမ်းအဖြစ် အသုံးပြုရကြောင်း၊ ယခုအချိန်တွင် ဒေသထွက် ဆန်တစ်အိတ်လျှင် ၂၆၅၀၀ ကျပ် ဝယ်ယူရကြောင်း၊ သရဖူမုန့်ဖတ်ခြောက်စက်ရုံတွင် တစ်ရက်လျှင် ဆန်အိတ် ၄၀ ခန့် မုန့်ဖတ်ထုတ်လုပ်နိုင်ကြောင်း၊ စက်ရုံတွင် လုပ်သား ၂၀ ဦးရှိကြောင်း သိရပါသည်။

              မုန့်ဟင်းခါးခြောက် ထုတ်လုပ်ရာတွင် ပထမဦးစွာ ဆန်လတ်များကို တစ်ရက်စာ ထုတ်လုပ်မှုအတွက် ဆန်အိတ် ၄၀ အား ၂ နာရီခန့် ရေစိမ်ထားရပါသည်။ ရေစိမ်ထားပြီး ဆန်အိတ်များကို နှစ်ကြိမ်မှ သုံးကြိမ်အထိ ရေဆေးရပါသည်။ ရေဆေးပြီး ဆန်များကို မုန့်ကြိတ်ရပါသည်။ ထွက်ရှိ လာသည့် မုန့်နှစ်များအား ရေစစ်ပြီး မုန့်ဟင်းခါးဖတ်ထွက်လာအောင် ညှစ်ရပါသည်။ ရလာသည့် မုန့်ဖတ်များကို လျှော်ရပါသည်။ လျှော်ပြီးသားမုန့်ဖတ်များကို တစ်ရက်နေလှန်းရပါသည်။ မုန့်ဖတ်နေလှန်းရန် စင်များဆောက်ရပါသည်။ ခြောက်သွေ့လာသော မုန့်ဖတ်ခြောက်များကို တပိုင်တနိုင်မယူ၍ ထုတ်ပိုးသည့်နေရာသို့ ပေးပို့ရပါသည်။ ထုပ်ပိုးပြီးသောမုန့်ဖတ်ခြောက်များသည် ဈေးကွက်သို့ပို့ရပါသည်။

              လုပ်သားခငွေရှင်းရာတွင် ကုန်ကြမ်းမှ ကုန်ချောထုပ်ပြီးသည်အထိ ဆန်တစ်အိတ်လျှင် ၃၀၀၀ ကျပ် ပေးရကြောင်း၊ ဆန်လတ်ကြီး တစ်အိတ်လျှင် မုန့်ဖတ်ခြောက် ၂၀ ကျပ်သားထုပ် ၁၁၀ ထုပ်မှ ၁၃၀ ထုပ်အထိရရှိကြောင်း၊ ယခင်နှစ်က မုန့်ဟင်းခါးခြောက် ၂၀ ကျပ်သား တစ်ထုပ်လျှင် ၂၅၀ ကျပ် ရောင်းရကြောင်း၊ ယခုနှစ်တွင် ပီနန်အိတ်ဈေး၊ ပလပ်စတစ်ဈေး၊ ဆီဈေးများတက်လာကြောင်း၊ မုန့်ဖတ်ခြောက်အဖြစ်မရောက်ခင် စက်မှထွက်လာသည့် မုန့်ဖတ်များ မကပ်အောင် စားဆီသုတ်ပေးရကြောင်း၊ ကုန်ကြမ်း ၁၀ အိတ်တွင် စားဆီတစ်ပိဿာ အသုံးပြုရကြောင်း၊ အသုံးပြုရသည့် ကုန်ကြမ်း၊ ဆက်စပ်ပစ္စည်း၊ လုပ်သားခ၊ မီတာခပေါ်အခြေခံ၍ တစ်ထုပ်လျှင် ၂၉၀ ကျပ် ရောင်းချကြောင်း၊ မုန့်ဟင်းခါးခြောက်များကို ရန်ကုန်ဈေးကွက်သို့ အဓိကပို့ကြောင်း၊ မုန့်ဟင်းခါးခြောက် ထုတ်လုပ်ရာတွင် အလေအလွင့်များလည်းရှိကြောင်း၊ အလေအလွင့်ဖြစ်သွားသော မုန့်ဖတ် ခြောက်များကို တစ်ပိသာလျှင် ၄၀၀ ကျပ်နှုန်းဖြင့် ဝက်မွေးမြူသူများက ဝက်စာအဖြစ် ဝယ်ယူကြောင်း လုပ်ငန်းရှင်က ရှင်းပြပါသည်။

           လုပ်ငန်းအခက်အခဲအနေဖြင့် လျှပ်စစ်မီးကို အားထား၍ လုပ်ငန်းဆောင်ရွက်ရသဖြင့် လျှပ်စစ်မီးရရှိမှု နည်းပါးသည့်အခါ အခက်အခဲရှိကြောင်း၊ ဆန်များရေစိမ်ပြီး မီးလုံးဝမလာသဖြင့် ဆန်ပြန်လည်လှန်းရသည့် ရက်များရှိကြောင်း၊ ဈေးကွက်အမှာရှိသလောက် မပို့နိုင်သေးကြောင်း လည်း လုပ်ငန်းရှင်ဦးသိန်းနိုင်မြင့်၏ ပြောပြချက်အရ သိရှိရပါသည်။

DOCA(ပဲခူး)

                ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ တာဝန်ရှိသူများနှင့်အတူ မတ်လ ၁၅ ရက်နေ့ နံနက်ပိုင်း က မြန်မာနိုင်ငံဆီကုန်သည်များအသင်းမှ တောင်ငူမြို့တွင် သက်သာသောနှုန်းထားဖြင့် စားအုန်းဆီရောင်းချနေမှုများကို ကွင်းဆင်းစစ်ဆေးခဲ့ပါသည်။ ထိုသို့ရောင်းချရာတွင် ဆိုင်ထိုင်၍ ရောင်းချခြင်းအပြင် မော်တော်ယာဉ်ဖြင့် တောင်ငူမြို့ပေါ်ရှိ ရပ်ကွက်ဈေးများဖြစ်သော ရွှေဆံတော်ဘုရားဈေး၊ ဝက်ကုန်းဈေး၊ ဓါတုကလျာဈေး၊ ညောင်ပင်ဈေးများသို့လှည့်လည်၍ ရောင်းချကြောင်း သိရှိရပါ သည်။

            ခရိုင်ဦးစီးမှူးက ရောင်းချနေသည့် စားအုန်းဆီများ၏ အလေးချိန်နှင့်ဈေးနှုန်းမှန်ကန်ရေး၊ စားသုံးသူစိတ်ကျေနပ်မှုရှိစေရေးကို စစ်ဆေးဆောင်ရွက်ခဲ့ပါသည်။ တောင်ငူခရိုင်တွင် ယခုလအတွင်း မြန်မာနိုင်ငံဆီကုန်သည်များအသင်းက ဆီတစ်ပိဿာလျှင် ၆၈၀၀ ကျပ်နှုန်းဖြင့် ဆီပိဿာ ၃၃၀၀၀ ကို တောင်ငူမြို့နယ်၊ ရေတာရှည်မြို့နယ်နှင့် ဖြူးမြို့နယ်ရှိ ပြည်သူများသို့ ရောင်းချပေးမည် ဖြစ်ပါသည်။

               ဈေးကွက်အတွင်း စားသုံးဆီဈေးနှုန်းကြီးမြင့်မှုကို လျှော့ချနိုင်ရေးအတွက် တိုင်းဒေသကြီး အစိုးရအဖွဲ့၏ လမ်းညွှန်ချက်ဖြင့် ပြည်ပမှ စားသုံးဆီတင်သွင်းသည့် ကုမ္ပဏီများထံမှ စားသုံးဆီများ တိုက်ရိုက်ဝယ်ယူနိုင်ရေးအတွက် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းသို့ တိုင်း ဒေသကြီးစားသုံးသူရေးရာဦးစီးဌာနမှ ချိတ်ဆက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးရေးလုပ်ငန်း ကြီးကြပ်ရေးကော်မတီက ထုတ်ပြန်ထားသော ရည်ညွှန်းဈေးများဖြင့် စားသုံးသူပြည်သူများအား ရောင်းချပေးခြင်းဖြစ်ကြောင်း သိရှိရပါသည်။

DOCA(ပဲခူး)

              စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်၊ ပန်းတောင်းမြို့နယ် တာဝန်ခံနှင့်အဖွဲ့သည် (၁၁.၃.၂၀၂၂)နေ့ နံနက် (၉:၃၀)အချိန်တွင် ဥသျှစ်ပင်မြို့ လမ်းမတော်လမ်းရှိ လမင်း ပဲ/နှမ်းပွဲရုံသို့ ကွင်းဆင်း၍ ပဲမျိုးစုံဈေးနှုန်းဈေးကွက်အခြေအနေအား သိရှိနိုင်ပါရန် ကွင်း ဆင်းလေ့လာခဲ့ပါသည်။

          ပန်းတောင်းမြို့နယ်၊ ဥသျှစ်ပင်မြို့ရှိ၊ လမင်းပဲနှမ်းပွဲရုံပိုင်ရှင် ဦးကျော်သူစိုးနှင့်တွေ့ဆုံ၍ ပဲမျိုးစုံဈေးနှုန်းဈေးကွက်အခြေအနေများအား မေးမြန်းခဲ့ရာ ယင်းပွဲရုံသို့ မြို့နယ်တွင်းရှိ ကျေးရွာ များမှ ပဲမျိုးစုံများ လာရောက်ရောင်းချသလို ထိုပွဲရုံမှတစ်ဆင့် ပြည်မြို့ရှိ ပွဲရုံများသို့ တင်ပို့ရောင်း ချကြောင်း သိရှိရပြီး ယခုဖြစ်ပေါ်လျှက်ရှိသော ပဲဈေးနှုန်းများမှာ ပဲကြီး တစ်တင်းလျှင် ၆၃၀၀၀ကျပ်၊ ပဲတီစိမ်း (ဝါးခယ်မမျိုး) တစ်တင်းလျှင် ၄၄၂၀၀ကျပ်၊ မတ်ပဲတစ်တင်းလျှင် ၄၆၀၀၀ကျပ်၊ ကုလားပဲ တစ်တင်းလျှင် ၄၅၀၀၀ကျပ်၊ မြေပဲဆီဆန်တစ်ပိဿာလျှင် ၃၆၀၀ကျပ်နှင့် မြေပဲလုံးဆန် တစ်ပိဿာလျှင် ၃၈၅၀ကျပ်ဖြင့် အရောင်းအဝယ်ဖြစ်လျှက်ရှိပါသည်။

              ယခင်နှစ်တွင် ဖြစ်ပေါ်ခဲ့သောပဲဈေးနှုန်းများမှာ ပဲကြီးတစ်တင်းလျှင် ၃၃၀၀၀ကျပ်၊ ပဲတီစိမ်း တစ်တင်းလျှင် ၃၅၀၀၀ကျပ်၊ မတ်ပဲတစ်တင်းလျှင် ၂၆၂၀၀ကျပ်၊ ကုလားပဲတစ်တင်းလျှင် ၂၄၇၀၀ကျပ်၊ မြေပဲဆီဆန် တစ်ပိဿာလျှင် ၂၆၀၀ကျပ် နှင့် မြေပဲလုံးဆန် တစ်ပိဿာလျှင် ၂၉၀၀ကျပ်ဖြစ်ခဲ့သဖြင့် ယခုနှစ်တွင် ဈေးကောင်းရလျှက်ရှိကြောင်းတွေ့ရှိရပါသည်။

           ယခုနှစ်တွင် ပဲစိုက်တောင်သူများအနေဖြင့် သွင်းအားစုများဈေးမြင့်လျှက်ရှိသော်လည်း ပဲဈေးများ ဆက်လက်မြင့်တက်လျှက်ရှိသဖြင့် အကျိုးအမြတ်ပိုမို ရရှိလျှက်ရှိကြောင်း သိရှိရပါသည်။

DOCA(ပဲခူး)

             စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်းများသည် မတ်လ ၂၂ ရက်နေ့ နံနက် ၁၀နာရီအချိန်တွင် မုံရွာမြို့၊ ချမ်းမြဝတီရပ်ကွက်ရှိ “ပင်လုံ” သောက်ရေသန့်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များ သိရှိလိုက်နာ ဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

                  ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါစားသုံးသူ၏ အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှု ပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေး ဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက် တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးခဲ့ပါသည်။

                 “ပင်လုံ” သောက်ရေသန့်လုပ်ငန်းကို ၂၀၁၆ ခုနှစ်မှ စတင်တည်ထောင်ခဲ့ကြောင်း ၊ ရေသန့်ပြုလုပ်ရာတွင် ပထမဦးစွာ‌ရေကြမ်းကို အဆင့်လေးဆင့်ဖြင့် စစ်ထုတ်ပြီး ရရှိလာ‌သော ဒုတိယပေါင်းခံရည်ကို ပြန်လည်သန့်စင်ရာတွင် စွန့်ပစ်ရေ ၆၀% နှင့် ရေသန့် ၄၀% ထွက်ရှိကြောင်း၊ ရေသန့်ဗူးများ ဆေးကြောရာတွင်လည်း ပထမအကြိမ်နှင့်ဒုတိယအကြိမ် ဗူးကြမ်းဆေးခြင်းနှင့် တတိယအကြိမ်တွင် သောက်ရေသန့်ဖြင့် ဗူးချောဆေးပြီး ရေသန့်များထည့်ခြင်း၊ ပါကင်ပိတ်ခြင်များ အဆင့်ဆင့်ဆောင်ရွက်ရကြောင်း၊ လုပ်သားအင်အား (၁၅)ဦးဖြင့် လည်ပတ်လျက်ရှိကြောင်း၊  တစ်နေ့လျှင် ရေသန့်(၂၀)လီတာဗူး (၆၀၀)ခန့် ထုတ်လုပ်ရရှိကြောင်း၊ သောက်ရေသန့် (၂၀)လီတာဗူး တစ်ဗူးကို ‌(၆၀၀) ကျပ်ဖြင့် မြို့တွင်း၌သာဖြန့်ဖြူးရောင်းချပြီး  သိရှိရပါသည်။

DOCA(စစ်ကိုင်း)

           ပြည်ထောင်စုနယ်မြေ၊ တပ်ကုန်းမြို့နယ်၊ ခရမ်းစပ်ကုန်းကျေးရွာအုပ်စု၊  ပေတောအနောက်ကွင်းရှိ “ပေတောဥစားကြက်မွေးမြူရေးခြံ”၊ သပြေကုန်းကျေးရွာအုပ်စု၊ အောင်မြေရိပ်သာအရှေ့ကွင်းရှိ “အောင်မြေရိပ်သာဝက်မွေးမြူရေးခြံ”နှင့် ဇေယျာသီရိမြို့နယ်၊ ကျည်တောင်ကျေးရွာအုပ်စု၊ ခေါမတောင်ကွင်းရှိ “ကျည်တောင်ဝက်မွေးမြူ‌ရေးခြံ”တို့သည် နိုင်ငံခြားရင်းနှီးမြှုပ်နှံမှုတစ်ခုဖြစ်သည့် ထိုင်းနိုင်ငံအခြေစိုက်ကုမ္ပဏီတစ်ခုဖြစ်သော Myanmar C.P Livestock Co.,Ltd ၊ နိုင်ငံတော်အစိုးရ၊ ပြည်တွင်းဘဏ်နှင့် ကျေးရွာတို့၏ လေးပွင့်ဆိုင်မွေးမြူ‌ရေးစီမံကိန်းဖြစ်ကြောင်း သိရှိရပါသည်။

          “ပေတောဥစားကြက်မွေးမြူရေးခြံ”သည် ၂၀၁၉ ခုနှစ်တွင်စတင်တည်ထောင်ခဲ့ရာ ဥစားကြက်ကောင်ရေ(၇၅၀၀၀) မွေးမြူထားရှိပြီး တစ်ရက်လျှင် ကြက်ဥလုံး‌‌ရေ (၇၀၀၀၀) ခန့်ထွက်ရှိကြောင်း၊ ထွက်ရှိလာသောကြက်ဥများကို ဒေသတွင်းစားသုံးခြင်းအပြင် ရန်ကုန်မြို့သို့ တင်ပို့‌ရောင်းချလျက်ရှိပြီး ကြက်ခြံမှစွန့်ပစ်ပစ္စည်းတစ်ခုဖြစ်သည့် ကြက်ချေးများကို သဘာဝမြေဩဇာအဖြစ် ပတ်ဝန်းကျင်ရှိကျေးရွာများမှ စိုက်ပျိုးမြေများတွင် ပြန်လည်အသုံးပြုကြကြောင်း သိရှိရပါသည်။

         “အောင်မြေရိပ်သာဝက်မွေးမြူရေးခြံ”သည် ၂၀၂၀ ခုနှစ်တွင် စတင်တည်ထောင်ခဲ့ပြီး အသားတိုးဝက်ကောင်ရေ(၄၈၀၀)မွေးမြူထားကြောင်း၊ ဝက်တစ်ကောင် အလေးချိန်(၈၀)kg ‌ရောက်ရှိပါက စတင်ရောင်းချရပါကြောင်း၊ ဝက်တစ်ကောင်လျှင် (၄၅၀၀၀၀/ ၅၀၀၀၀၀)ကျပ်ခန့် ရရှိပါကြောင်း၊ အဆိုပါ ဝက်များကို ဒေသတွင်းစားသုံးခြင်းအပြင် မန္တလေး၊ လောက်ကိုင်၊ လားရှိုး၊ ရန်ကုန်မြို့များသို့ တင်ပို့ရောင်းချလျှက်ရှိကြောင်း၊ အလားတူ ဝက်ခြံကို ဇေယျာသီရိမြို့နယ်၊ ကျည်တောင်ကျေးရွာအုပ်စု၊ “ ကျည်တောင်ဝက်မွေးမြူရေးခြံ ”တွင်လည်း အသားတိုးဝက်ကောင်ရေ(၄၈၀၀) မွေးမြူထားကြောင်း သိရှိရပါသည်။

         ယခုကဲ့သို့ မွေးမြူရေးစီမံကိန်းများ တည်ထောင်ထားခြင်းသည် ကျေးရွာနေပြည်သူများအတွက် အလုပ်အကိုင်အခွင့်အလမ်းများ ပိုမိုရရှိပြီး ကျန်းမာ‌ရေးနှင့် ညီညွတ်သည့် သန့်ရှင်းလတ်ဆတ်သော ကြက်ဥနှင့် အသားများ စားသုံးရသည့်အကျိုးကျေးဇူးများ ရရှိနေပါကြောင်း၊  ယင်းစီမံကိန်းကို နေပြည်တော်အတွင်း ကျေးရွာ(၆)ရွာတွင် ပြုလုပ်ရန်လျာထားထားသော်လည်း လက်ရှိကျေးရွာ(၃)ရွာသာ အကောင်အထည်ဖော်ဆောင်ရွက်နေပြီဖြစ်သဖြင့် ကျန်ကျေးရွာ(၃)ရွာအား ဆက်လက်အကောင်အထည်ဖော်ဆောင်နိုင်မည်ဆိုပါက ကျေးရွာနေပြည်သူများ၏ အကျိုးစီးပွားပိုမို ခံစားရမည် ဖြစ်ပါကြောင်း၊ အဆိုပါ စီမံကိန်း၏ လုပ်ငန်းစဉ်များသည် ကျေးလက်နေပြည်သူများအတွက် ရေရှည်တည်တံ့ခိုင်မြဲမှုစီမံကိန်းဖြစ်သဖြင့် တစ်နိုင်ငံလုံးလွှမ်းခြုံ၍ ကျေးရွာပေါင်း (၅၁)ရွာတွင် အကောင်အထည်ဖော်ဆောင်ရွက်သွားရန် လျာထားပါကြောင်း ၎င်းစီမံကိန်း၏ တာဝန်ရှိသူတစ်ဦးထံမှ သိရှိရပါသည်။

DOCA(ပြည်ထောင်စုနယ်မြေ)