ပြည်တွင်းကုန်သွယ်မှုသတင်း

          ပြည်ထောင်စုနယ်မြေ၊ တပ်ကုန်းမြို့နယ်အတွင်းရှိ ဆင်သေချောင်းလွင်ပြင်တစ်လျှောက်တွင် ရာသီအလိုက် မီးဖို‌ချောင်သုံးသီးနှံများ စိုက်ပျိုးကြပါသည်။ ယခုအချိန်တွင် ပန်းဂေါ်ဖီ၊ ‌ဂေါ်ဖီထုပ်၊ အာလူး၊ ခရမ်းသီး စသော သီးနှံများ စိုက်ပျိုးကြပြီး ဖူးစားပြောင်းစိုက် တောင်သူများ ပိုမိုအဆင်ပြေ တွက်ခြေကိုက်ကြောင်း လေ့လာတွေ့ရှိရပါသည်။ ပုံမှန်စိုက်နေကြဖြစ်သော ဖရဲစိုက်ခင်းနေရာများ တွင် ဖူးစားပြောင်းများ ပိုမိုစိုက်ပျိုးလာသည်ကို တွေ့ရှိရပါသည်။ ယနေ့တွင် စားသုံးသူ‌‌ရေးရာဦးစီး ဌာန၊ ခရိုင်ဦးစီးမှူးရုံးမှ ဝန်ထမ်းများ ကွင်းဆင်းလေ့လာခဲ့ရာ တပ်ကုန်းမြို့နယ်၊ စံပြကျေးရွာဖြစ်သည့် ဂွေးပင်ကျေးရွာမှ တောင်သူ ဦးစန်းလွင်၏ ဖူးစားပြောင်းစိုက်ခင်းသို့ ကွင်းဆင်းလေ့လာခဲ့ရာ လက်ရှိအနေအထားအရ ခူးဆွတ်ရန် အသင့်အနေအထားဖြစ်နေပြီး စိုက်ပျိုးထုတ်လုပ်မှု ကုန်ကျ စရိတ်အနေဖြင့် မျိုးစေ့တစ်ထုတ်လျှင် ၂၀၀၀ဝိ/- နှုန်းဖြင့် တစ်ဧက (၄)ထုတ် စိုက်ပျိုးရကြောင်း၊ ထိုင်းနိုင်ငံမှ တင်သွင်းသည့် မျိုးစေ့များဖြစ်ပြီး အပင်ပေါက် (၈၀) ရာခိုင်နှုန်း ပေါက်ကြောင်း၊ မြေဩဇာအနေဖြင့် (၁၅း၁၅း၁၅) ပတ်လည်တစ်အိတ် ၉၀၀၀ဝိ/- နှင့် ပုလဲမြေဩဇာတစ်အိတ် ၆၀၀၀ဝိ/-၊ အပင်အားဆေး ၂၅၀၀ဝိ/- ကုန်ကျကြောင်း၊ မြေပြင်၊ ပေါင်းကောက်၊ ဘောင်ဆွဲ၊ မျိုးစေ့ချ၊ လုပ်သားခ များအပါအဝင် စုစုပေါင်းတစ်ဧက (၆) သိန်းခန့် ကုန်ကျကြောင်းနှင့် စိုက်ခင်းတွင်ပင် အခင်းပြတ် စနစ်ဖြင့် ရောင်းချရကြောင်း၊ ယခုစိုက်ခင်း တစ်ဧကအတွက် ပုတ်ပြတ် (၁၉)သိန်းဖြင့် ရောင်းချရန် စရံငွေ (၁၀)သိန်း လက်ခံရရှိပြီးဖြစ်ကြောင်းနှင့် မနက်ဖြန်တွင် လာရောက်ခုတ်သိမ်းမည် ဖြစ်ကြောင်း လေ့လာတွေ့ရှိရပါသည်။

          ဆင်သေချောင်းတလျှောက်တွင် ယခုနှစ် ဖရဲစိုက်ခင်းများ မစိုက်ကြတော့သဖြင့် ဝင်ငွေ သေချာသည့် ဖူးစားပြောင်းများကို နေပြည်တော်အာဟာရသုခဈေး လက်ကားပွဲရုံများမှ ပွဲစားများ လာရောက်ပြီး အကျိုတူပူးပေါင်းဆောင်ရွက်လျက်ရှိသဖြင့် နောက်ပိုင်းတွင် စိုက်ဧကများလာမည် ဖြစ်ပြီး ဖူးစားပြောင်းဈေး ကျလာနိုင်ချေရှိကြောင်း တောင်သူဦးစန်းလွင် သုံးသပ်ပြောကြားချက် အရ သိရှိရပါသည်။

DOCA(နေပြည်တော်ကောင်စီ)

          စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ ဒုတိယပြည်နယ်မှူး ဦးဆောင်သည့်  တာဝန်ရှိသူများသည် (၇.၃.၂၀၂၂၂)ရက်နေ့ (၁၄း၀၀)နာရီအချိန်တွင် ကျိုင်းတုံမြို့၊ ရပ်ကွက်(၂)ရှိ ထက်အာကာမင်းကုမ္ပဏီ၏ ထိုင်းနိုင်ငံထုတ် အေးခဲအသား တင်သွင်း/ ရောင်းချမှုအား သိရှိနိုင်ရန် ကွင်းဆင်း လေ့လာမေးမြန်းခဲ့ပါသည်။ အဆိုပါ ကုမ္ပဏီသည် ၂၀၁၄ ခုနှစ်တွင် စတင်တည်ထောင်ပြီး မြန်မာနိုင်ငံနှင့် ထိုင်းနိုင်ငံတို့၏ သက်ဆိုင်ရာဌာန ထောက်ခံချက်များရရှိ ထားကြောင်း၊ ယင်း ကုမ္ပဏီသည် အေးခဲအသားမျိုးစုံကို ရှမ်းပြည်နယ်(အရှေ့ပိုင်း) သံလွင်အရှေ့ဘက်ခြမ်းထိ ဖြန့်ဖြူး ရောင်းချခွင့်ရှိကြောင်း သိရှိရပါသည်။

          အေးခဲအသားမျိုးစုံကို ထိုင်းနိုင်ငံ မယ်ဆိုင်မြို့တွင် ထုတ်လုပ်သော စက်ရုံမှ တိုက်ရိုက် ဝယ်ယူ တင်သွင်း/ဖြန့်ဖြူးခြင်းဖြစ်ကြောင်း၊ ထိုင်းနိုင်ငံ(မယ်ဆိုင်)မှ တဆင့် တာချီလိတ်မြို့ ချစ်ကြည်ရေး တံတားအမှတ်(၂) သို့ သတ်မှတ်ထားသည့် စည်းကမ်းချက်နှင့်အညီ သယ်ယူပြီး ကျိုင်းတုံမြို့သို့ အဲကွန်းပါသောကားဖြင့် တိုက်ရိုက် သယ်ဆောင်၍ အအေးခန်းတွင် သိုလှောင်သိမ်းဆည်းကြောင်း၊ အေးခဲအသားမျိုးစုံကို သိုလှောင်အခန်းအတွင်းတွင် စင်များဖြင့်စနစ်တကျထားရှိသိုလှောင်ပြီး ဖြန့်ဖြူးရောင်းချခြင်းဖြစ်ကြောင်း၊ ဖြန့်ဖြူးရောင်းချသော မြို့များမှာ ကျိုင်းတုံမြို့အတွင်း/ပြင်နှင့် မိုင်းပျဉ်းမြို့တို့ ဖြစ်ကြောင်း သိရှိရပါသည်။

          ထက်အာကာမင်းကုမ္ပဏီမှ တင်သွင်းသော ကုန်ပစ္စည်းအချို့တွင် စားသုံးသူရေးရာဦးစီးဌာန မှ ချမှတ်ထားသော စားသုံးသူကာကွယ်ရေးဥပဒေ ၂၀၁၉၊ အခန်း(၁၈)ပါ ကုန်အညွှန်းအမှတ် အသားဖော်ပြပါရှိရေးနှင့် စပ်လျဉ်းသည့် အချက်အလက်များ ထည့်သွင်းဖော်ပြထားသည်ကို တွေ့ရှိရပြီး ကျန်ရှိနေသော ကုန်ပစ္စည်းများတွင်လည်း ကုန်စည်များတွင် ဖော်ပြရမည့် အသေးစိတ် အချက်အလက်များကို ထည့်သွင်းဖော်ပြနိုင်ရန် ဆက်လက်ဆောင်ရွက်နေကြောင်း သိရှိရပါသည်။

          စားသုံးသူရေးရာဦးစီးဌာနအနေဖြင့် ထက်အာကာမင်းကုမ္ပဏီအား အေးခဲအသားများ သိုလှောင်သိမ်းဆည်းရာတွင် ကျန်းမာရေးနှင့်ညီညွတ်ပြီး ပိုမိုစနစ်ကျစေရေး၊ အအေးခန်းကားမှ သိုလှောင်ရုံသို့ ပစ္စည်းများ သယ်ဆောင်သိမ်းဆည်းသော အလုပ်သမားများနှင့် အအေးခန်းအတွင်းသို့ ဝင်ရောက်မည့်သူများအား လက်အိတ်၊ မိုးကာ၊ ဘွတ်ဖိနပ် အရှည်ဝတ်ဆင်ပြီး Covid-၁၉ စည်းကမ်းချက်နှင့်အညီ ဝင်ရောက်ရန် အသိပညာပေးမှုများ ပြုလုပ်ခဲ့ပြီး စားသုံးသူအသိပညာပေးလက်ကမ်းစာစောင်များ ဖြန့်ဝေပေးခဲ့ပါသည်။

DOCA(ရှမ်း)

          ကတွတ်ပင်သည် သဘာဝပေါက်ပင်တစ်မျိုးဖြစ်ပြီး မြန်မာနိုင်ငံအနှံ သစ်တောတိုင်းလိုလိုမှာ ပေါက်ရောက်တက်ပါသည်။ အထူးသဖြင့် မြန်မာနိုင်ငံအောက်ပိုင်းဒေသများတွင် ပိုမိုတွေ့ရတက်ပြီး ပဲခူးတိုင်းဒေသကြီး (အနောက်ပိုင်း) ပြည်မြို့နယ်အတွင်းအနောက်ရွာသစ်ကျေးရွာနှင့် ပျဉ်းပင်ကိုင်း ကျေးရွာအနီး သစ်တောကြိုးဝိုင်းများတွင် အလေ့ကျပေါက်ရောက်နေကြောင်း သိရှိရပါသည်။

          ကတွတ်ပင်သည်နှစ်ရှည်ပင်ဖြစ်ပြီး ညောင်ပင်မျိုးတွင်ပါဝင်၍ အမြဲစိမ်းလန်းသော အပင်မျိုး ဖြစ်ပါသည်။ အသီးမှာအဝါရောင်ရှိပြီး အညိုရောင်အမွှေးနုများ ဖုံးအုပ်ထားပါသည်။ ကတွတ်သီးမှာ အချိုသီးနှင့်အချဉ်သီးဟူ၍ နှစ်မျိုးရှိတက်ပါသည်။

          ကတွတ်သီးကို ရှေးနှစ်ပေါင်း ၅၀၀၀ကျော်ကတည်းက လူတို့စတင်စားသုံးခဲ့ကြပြီး လူ့ခန္ဓာ ကိုယ်အတွက် လိုအပ်သော အာဟာရဓါတ်များ ဖြည့်ဆီးပေးသလို ကျန်းမာရေးအတွက် များစွာ အကျိုးပြုသော အသီးတစ်မျိုးဖြစ်ကြောင်း လေ့လာတွေ့ရှိချက်များအရ သိရှိရပါသည်။

          ကတွတ်သီးတွင် အမျှင်ဓါတ်များ ကြွယ်ဝစွာပါဝင်၍ အစာချေစနစ်ကို ကောင်းမွန်စေသည့် အတွက် ဝမ်းချုပ်ခြင်းကိုကာကွယ်ပေးနိုင်ကြောင်းသိရှိရပါသည်။ ဖျားနာမှုကို တိုက်ဖျက်ပေးနိုင် သည့် Bioactive ကွန်ပေါင်း ကင်ဆာဆဲများကိုသေစေနိုင်သလို အမျှင်ဓါတ်ကလည်း ကင်ဆာ ဖြစ်ပွားမှုကို ကာကွယ်ပေးနိုင်ခြင်း၊ ဆီးချိုရောဂါကို ထိန်းချုပ်ပေးနိုင်ခြင်း၊ ပိုတက်ဆီယမ်ဓါတ် မြင့်မားစွာပါဝင်သည့်အတွက် သွေးတိုးသမားများ စားသုံးသင့်သလို ကိုယ်ခံအားစနစ်ကို ကောင်း မွန်စေသည့်အတွက် အအေးမိဖျားနာ အလွယ်တကူမဖြစ်နိုင်စေနိုင်ကြောင်း သိရပါသည်။

          သို့သော်လည်း အစားအစာစားသုံးရာတွင် "တန်ဆေးလွန်ဘေး" ဆိုရိုးအတိုင်း ကတွက်သီး ကို အလွန်အကျွံစားသုံးမိပါက အစာအိမ်နာကျင်သည့်ဝေဒနာခံစားနိုင်သလို အစေ့ကလည်း အသည်းကိုထိခိုက်စေနိုင်ပါသည်။ ပိုတက်ဆီယမ်ဓါတ်များ၍ သွေးတိုးဆီးချိုသမားများအတွက် သင့်လျှော်သော်လည်း သွေးအတွင်းသကြားဓါတ်နည်းသူများနှင့် အရေပြားဓါတ်မတည့်သူများအနေ ဖြင့် ချင့်ချိန်စားသုံးသင့်ကြောင်း လေ့လာသိရှိိရပါသည်။

          ကတွက်သီးမှာနှစ်ပတ်လည်သီးသော အသီးမျိုးဖြစ်သော်လည်း ကဆုန်လနှင့် နယုန်လများ တွင် ပထမအကြိမ်အသီးအများဆုံးသီးပြီး ဝါဆို၊ ဝါခေါင်လများတွင် ဒုတိယအကြိမ် အများဆုံးသီး ကြောင်းနှင့် ကျန်လများတွင် အနည်းငယ်သာသီးသလို အရည်အသွေးလည်းမကောင်းကြောင်း သိရှိရပါသည်။

          ကတွက်သီးကို တစ်ချို့က အလုံးလိုက်စားကြသလို တစ်ချို့ကလည်း ထန်းလျှက်၊ ကြံသကာ၊ သကြားတို့ဖြင့် ယိုထိုး၍ ရိုးရာအစားအစာဖြင့်စားသုံးကြကြောင်းသိရပါသည်။ တစ်ချို့ကလည်း ယိုမျိုးစုံလုပ်ငန်းလုပ်ကိုင်၍ ဘုရားဖူးခရီးသွားများအတွက် ဒေသထွက်ကုန် ရိုးရာအစားအစာအဖြစ် စီးပွားဖြစ်ထုတ်လုပ်ရောင်းချနေကြကြောင်း သိရှိိရပါသည်။

          ပဲခူးတိုင်းဒေသကြီး(အနောက်) ပြည်မြို့နယ်အတွင်း ယိုလုပ်ငန်းထုတ်လုပ်ရောင်းချသည့် စီးပွားရေးလုပ်ငန်းရှင် ၁၃ ဦးခန့်ရှိကြောင်းသိရပါသည်။ စာရေးသူမှ ကတွက်ယိုလုပ်ငန်း လုပ်ကိုင်သူ တစ်ဦးနှင့်တွေ့ဆုံ၍ ပြည်တွင်းကုန်သွယ်မှုဖွံ့ဖြိုးတိုးတက်ရေး ကျေးရွာတစ်ရွာထုတ်ကုန်တစ်မျိုး တိုးတက်စေရေးအတွက် ကတွက်ယိုထုတ်လုပ်သည့် လုပ်ငန်းအခြေအနေ၊ ဈေးနှုန်းဈေးကွက် အခြေအနေများအား စုံစမ်းမေးမြန်းခဲ့ရာ ကတွက်ယိုသည် နှစ်ပေါက်အောင်နှပ်ထား၍ရသည့် ဓါတုဗေဒကင်းလွတ်စားဖွယ်ရာဖြစ်သဖြင့် အသီးရသမျှ ယိုလုပ်ငန်းမပျက်လုပ်ကိုင်နေရကြောင်း သိရှိရပါသည်။

          ကတွတ်ယိုထိုးရာတွင် ရရှိလာသော အသီးများကို ရေစင်အောင်ဆေးပြီး အသီး၏ အောက်ခြေပိုင်းနှင့် ထိပ်ပိုင်းကိုဓါးဖြင့်လှီး၍ လေးစိတ်စိတ်ပြီး တစ်ဒယ်စာအတွက် အလုံးကြီးလျှင် ၁၁၀၀ ဝန်းကျင်၊ အလုံးသေးလျှင် ၁၅၀၀ ဝန်းကျင်၊ သကြား(၈)ပိဿာခန့်နှင့် ဆားအနည်းငယ် ထည့်၍ ယိုထိုးရမှာဖြစ်ပြီး တစ်ဒယ်လျှင် ကတွက်ယိုအချိန် ၁၀ပိဿာခန့် ရရှိကြောင်း သိရပါသည်။

          ကတွတ်ယိုတစ်ဒယ်စာကုန်ကျမှုအနေဖြင့် ကတွတ်သီး၊ သကြား၊ ပလပ်စတစ်ဘူးနှင့် လုပ်သားခအတွက် ၃၀၀၀၀ကျပ်ဝန်းကျင် ကုန်ကျပြီး အကျိုးအမြတ်အနေနဲ့ တစ်ဒယ်အပေါ် ၃၅၀၀ကျပ် ဝန်းကျင်ရရှိကြောင်း သိရပါသည်။ ထုတ်လုပ်မှုအနေနဲ့ ယခင်က တစ်နှစ်လျှင် ကုန်ချိန် ၁၅၀၀-၂၀၀၀ ပိဿာကျော် ထုတ်လုပ်နိုင်သော်လည်း ယခုကိုဗစ်-၁၉ ကာလအတွင်း ပိဿာချိန် ၅၀၀ခန့်သာထုတ်လုပ်ရောင်းချနိုင်ကြောင်းသိရပါသည်။

          ကတွတ်ယိုလုပ်ငန်းသည် အလေ့ကျပေါက်ပင်မှ ရရှိသောအသီးကို တန်ဖိုးမြှင့်ထုတ်ကုန် အဖြစ် စီးပွားဖြစ်လုပ်ကိုင်၍ ရသော လုပ်ငန်းဖြစ်သဖြင့် အသီးခူးရောင်းချသူများအနေဖြင့် စိုက်စရိတ်၊ အရင်းအနှီးမလိုဘဲ မိသားစုအပိုဝင်ငွေရသလို စီးပွားရေးလုပ်ငန်းရှင်ဘက်ကလည်း အရင်းအနှီးနည်းနည်းဖြင့် အကျိုးအမြတ်ရရှိစေသော လုပ်ငန်းဖြစ်သည့်အပြင် အနီးပတ်ဝန်းကျင်ရှိ လူများကိုလည်း အလုပ်အကိုင်အခွင့်အလမ်းများ ဖန်တီးပေးနိုင်သော လုပ်ငန်းတစ်ခုဖြစ်ပါကြောင်း လေ့လာတင်ပြပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

         ရခိုင်ပြည်နယ်၊ ကျောက်ဖြူခရိုင်တွင် (၂၀၂၁-၂၀၂၂)ခုနှစ် မိုးစပါး(၁၆၂၁၉၄)ဧက စိုက်ပျိုးပြီး ရိတ်ဧက (၁၆၁၄၉၅)ဧကရှိရာ အထွက်နှုန်းအားဖြင့် တစ်ဧကလျှင် (၅၇.၉၅) အထက်ရှိသဖြင့် စုစုပေါင်း (၉၃၅၈၀၀၀)တင်း ရှိပါသည်။ လူဦးရေး (၄၈၀၀၀၀) ကျော်ရှိပြီး မျိုးဝမ်းစာ အလေအလွှင့် (၆၄)သိန်းကျော်တင်းရှိပြီး ပိုလျှံစပါးတင်း (၂၉)သိန်းခန့်တင်းရှိမှာ ဖြစ်ပါသည်။

           ဖေဖော်ဝါရီလနောက်ဆုံးအပတ်တွင် စပါးဈေးနှုန်းများမှာ (၄၆)ပေါင်ကိုက်တင်း  ဧည့်မထ (၁၀၀)လျှင် ကျပ်(၅၆၀၀၀၀) ၊ ငစိန် (၁၀၀)လျှင် ကျပ်(၅၅၀၀၀၀) ၊ မြီးဒုံး (၁၀၀)လျှင် (၅၇၀၀၀၀)ကျပ်၊ ဈေးနှုန်းများဖြစ်ပေါ်နေပြီး ဆန်ဈေးနှုန်းမှာ တစ်အိတ်လျှင် ဧည့်မထကျပ်(၂၆၀၀၀) ၊ ငစိန်တစ်အိတ်လျှင် ကျပ် (၂၅၀၀၀) ၊ မြီးဒုံး တစ်အိတ်လျှင် ကျပ် (၂၇၀၀၀) ဖြစ်ပေါ်လျှက်ရှိပြီး ဈေးနှုန်းတည်ငြိမ်နေပါသည်။

           မြို့ပေါ်နေလူများမှာ အများအားဖြင့် ဆန်ချောများဖြစ်သည့် ပေါ်ဆန်းမွှေးဆန်ကိုသာ စားသုံးသည်ကို တွေ့ရှိရပါသည်။ ပေါ်ဆန်မွှေးများကို ကျောက်တော်၊ မြောက်ဦး မြို့နယ်များတွင် ရွှေဘိုမျိုးကို မိုးတော်ရေတော်ကွင်းမှာ စိုက်ပျိုးပြီး ရခိုင်ရွှေဘို ပေါ်ဆန်းမွေးစပါးများအား ခေတ်မီစက်ကြီးများဖြင့် ကြိတ်ခွဲပြီး ရခိုင်ပြည်နယ်နှင့် ပြည်မသို့ တင်ပို့ရောင်းချပါသည်။ တချို့ကလည်း ဧရာဝတီမှ ပုသိမ်ပေါ်ဆန်းမွေးများကို မှာယူတင်သွင်းရောင်းချကြပါသည်။ ရခိုင်ရွှေဘိုပေါ်ဆန်းမွေး တစ်အိတ်လျှင် ကျပ်(၄၂၀၀၀) ၊ ပုသိမ်ပေါ်ဆန်းမွေး တစ်အိတ်လျှင် ကျပ်(၄၃၀၀၀)ဖြင့် ရောင်းချနေသည်ကို တွေ့ရှိရပါသည်။

DOCA(ရခိုင်)

               ပြည်ခရိုင်၊ ပြည်မြို့ရှိ ပြည်ကုန်စည်ဒိုင်အနေဖြင့် နှစ်စဉ်မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ သီးနှံများမှာ အများဆုံးအရောင်းအဝယ်ဖြစ်လျှက်ရှိပြီး ယခင်လနှင့် ယခုလ အရောင်းအဝယ်ဖြစ်မှု နှင့် ဈေးနှုန်းအခြေအနေများအား အောက်ပါအတိုင်းလေ့လာသိရှိရပါသည်။

မတ်ပဲ

          ပြည်မြို့ရှိကုန်စည်ဒိုင်တွင် ယခင်လဇန်နဝါရီလ ပထမပတ်တွင် ပဲတစ်တင်းကို ၄၁၅၀၀ကျပ်၊ ဒုတိယပတ်တွင် ၄၃၈၀၀ - ၄၄၅၀၀ကျပ်ဖြင့် တစ်နေ့လျှင်အိတ် ၂၀၀/၂၅၀ခန့် အရောင်း အဝယ် ဖြစ်ခဲ့ပါသည်။ တတိယပတ်တွင် ၄၅၀၀၀-၄၅၅၀၀ကျပ်ထိ ဈေးမြင့်ခဲ့ပြီး စတုတ္တပတ်တွင် ၄၂၅၀၀-၄၃၅၀၀ကျပ်ဖြင့် တစ်နေ့လျှင်အိတ် ၂၀၀/၂၅၀ခန့် ရန်ကုန်ဝယ်လက်ရှိခဲ့ပါသည်။ ဖေဖော်ဝါရီ ပထမပတ်တွင် ဈေးကျလာပြီး ပဲတစ်တင်းလျှင် ၄၀၀၀၀-၄၁၀၀၀ကျပ်ဖြင့် အရောင်းအဝယ်ဖြစ်ခဲ့ ပါသည်။ ဒုတိယပတ်တွင် ပဲတစ်တင်းလျှင် ၃၈၀၀၀-၃၉၀၀၀-၃၉၅၀၀ကျပ်ထိ ဈေးကျခဲ့ပြီး တစ်နေ့လျှင် အိတ် ၁၅၀/၂၀၀ခန့် ရန်ကုန်အဝယ်ရသည့်အတွက် တတိယပတ်တွင် ၄၀၃၀၀-၄၁၈၀၀ ကျပ်ထိ ဈေးပြန်တက်လာခဲ့ပါသည်။ နောက်ဆုံးပတ်တွင် ၄၁၅၀၀-၄၁၇၀၀ကျပ် ဈေးဖြင့် အရောင်း အဝယ် ဖြစ်ပြီး တစ်နေ့လျှင် အိတ် ၂၀၀/၂၅၀ခန့် ရန်ကုန်သို့တင်ပို့မှုရှိခဲ့ပါသည်။

ပဲတီစိမ်း

          ယခင်လ ဇန်နဝါရီလတွင် ပုံမှန်ဈေးပဲတစ်တင်းကို ၃၈၀၀၀-၃၉၀၀၀-၄၀၀၀၀ကျပ်၊ ထိပ်စ ဈေး ၄၁၀၀၀- ၄၂၀၀၀ကျပ်ခန့်ဖြင့် အရောင်းအဝယ်ရှိပြီး တစ်နေ့လျှင် အိတ် ၁၅၀/၂၀၀ခန့်၊ မန္တလေး အဝယ်ရှိခဲ့ပါသည်။ ဒုတိယပတ် ပုံမှန်တစ်တင်းကို ၃၉၀၀၀ကျပ်ဈေးဖြင့် ဈေးအေးနေခဲ့ပြီး တတိယ ပတ်တွင်    ထိပ်စတစ်တင်းကို    ၄၂၀၀၀ကျပ်ဈေးဖြင့်    အရောင်း  အဝယ်ရှိခဲ့ပါသည်။ ဖေဖော်ဝါရီ လပထမပတ်တွင် ပုံမှန်တစ်တင်းကို  ၃၈၀၀၀-၃၉၀၀၀ကျပ်၊ ထိပ်စ ၄၂၀၀၀ ကျပ်ဖြင့် ဖေဖော်ဝါရီလ ဈေးငြိမ်နေခဲ့ပြီး လက်ကျန်လည်းနည်းနေပြီဖြစ်ပါသည်။ ရန်ကုန် မန္တလေး အဝယ်ရှိပြီး တစ်နေ့လျှင် အိတ် ၁၅၀/၂၀၀ခန့်သာရှိ၍ အရောင်းအဝယ်လည်းနည်းနေပြီ ဖြစ်ပါသည်။

ပဲစင်းငုံ

          ပြည်ကုန်စည်ဒိုင်ရှိ ပဲစင်းငုံသီးနှံမှာ ယခင်လဇန်နဝါရီလပထမပတ်တွင် ပဲသစ်များလည်း ဝင်စပြုနေပြီး ပန်းတောင်း၊ ကံမ၊ မင်းတုန်းဘက်မှ အဝင်ရှိသည့်အတွက် ပဲတစ်တင်းကို ၃၆၅၀၀ကျပ်ဈေးဖြင့် ဈေးစဖွင့်ခဲ့ပါသည်။ တစ်နေ့လျှင်အိတ် ၂၀၀/၃၀၀ခန့် အဝင်ရှိပြီး ဝင်သလောက် အရောင်းအဝယ်ဖြစ်ခဲ့၍ တစ်နေ့လျှင် အိတ် ၂၀၀/၃၀၀ခန့် ရန်ကုန်အဝယ်ရှိခဲ့ပါသည်။ ဒုတိယပတ်တွင် ပဲဈေးတက်ခဲ့ပြီး ပဲတစ်တင်းကို ၄၂၀၀၀-၄၃၀၀၀ကျပ်ထိ ဈေးမြင့်ခဲ့ပြီး တတိယ ပတ်တွင် ၄၂၀၀၀ကျပ်ဖြင့် အရောင်းအဝယ် ဖြစ်ခဲ့ပါသည်။ စတုတ္ထပတ်တွင် ပဲတစ်တင်းကို ၄၂၀၀၀-၄၂၂၀၀ကျပ်ဖြင့် ဈေးငြိမ်နေခဲ့ပြီး တစ်နေ့လျှင်အိတ် ၃၀၀/၄၀၀ခန့် ရန်ကုန်ဝယ်လက်နှင့် လှောင်လက်သမားများ အဝယ်ရှိခဲ့ပါသည်။ ယခုလ ဖေဖော်ဝါရီလ ပထမတ်တွင် ပဲစင်းငုံသီးနှံတစ်တင်းကို ၄၃၀၀၀ကျပ် ဒုတိယပတ်တွင်  ၄၁၀၀၀ ကျပ်ဈေးဖြင့် ဈေးကျခဲ့ပါသည်။ တတိယပတ်တွင် ၄၂၀၀၀ကျပ်ဈေးဖြင့် ဈေးပြန်တက်ခဲ့ပြီး ရန်ကုန်ဝယ်လက်အဝယ်ရှိ၍ တစ်ရက်ကိုအိတ် ၃၀၀/၄၀၀ခန့် အရောင်းအဝယ်ဖြစ်ခဲ့ပါသည်။ စတုတ္ထပတ်တွင် ပဲတစ်တင်းကို ၄၃၀၀၀ကျပ်ထိ ဈေးမြင့်လာခဲ့ပြီး အရောင်းအဝယ်မှာ အိတ် ၃၀၀/၄၀၀ခန့်သာ ရန်ကုန်တင်ပို့မှုရှိခဲ့ပါသည်။

ကုလားပဲ

          ယခင်လ ဇန်နဝါရီလ ပထမပတ်တွင် ကုလားပဲဈေးမြင့်ခဲ့ပြီး ပဲတစ်တင်းကို  ၄၆၅၀၀ကျပ်၊ ဒုတိယပတ်တွင် ၄၆၀၀၀ကျပ်ဖြင့် အရောင်းအဝယ်ဖြစ်ခဲ့ပြီး တစ်ရက်ကိုအိတ် ၂၀၀/၃၀၀ခန့် ခွဲစက်သမားနှင့် ရန်ကုန်ဝယ်လက်အဝယ်ရှိခဲ့ပါသည်။ တတိယပတ်တွင် ပဲတစ်တင်းလျှင် ၄၆၀၀၀ကျပ်၊ စတုတ္ထပတ်တွင် ၄၆၀၀၀ကျပ်ဈေးဖြင့် ဈေးငြိမ်နေခဲ့ပါသည်။ နောက်ဆုံးပတ်တွင် ကုလားပဲသစ်များ စတင်ဝင်စပြုနေပြီး မင်းတုန်း၊ ကံမနှင့် ပန်းတောင်းဘက်မှ အဝင်ရှိပြီး ပဲသစ်အဖွင့်ဈေးမှာ တစ်တင်းကို ၄၆၀၀၀ကျပ်ဖြင့် ဈေးဖွင့်ခဲ့ပါသည်။ ဖေဖော်ဝါရီ ပထမပတ်တွင် ဈေးအနည်းငယ်ကျခဲ့ပြီး တစ်တင်းကို ၄၄၅၀၀-၄၃၀၀၀ကျပ်ထိ ဈေးကျလာခဲ့ပါသည်။ ဒုတိယပတ်တွင်ပဲတစ်တင်းကို ၄၀၀၀၀ကျပ်ထိ ဈေးကျလာခဲ့ပြီး တတိယပတ်တွင် ၄၁၀၀၀ကျပ်ဖြင့် ဈေးပြန်တက်ခဲ့၍ ဝယ်လက်မှာ ခွဲစက်သမားများ၊ ရန်ကုန်ဝယ်လက်များ တစ်ရက်ကို အိတ် ၃၀၀/၄၀၀ခန့် အဝယ်ရှိပါသည်။ ပဲခွဲခြမ်းများကို နယ်စုံအဝယ်ရှိခဲ့ကြောင်း သိရှိရပါသည်။

ဘိုကိတ်ပဲ

          ယခင်လ ဇန်နဝါရီလတွင် ဘိုကိတ်တစ်တင်းကို ၃၇၅၀၀ကျပ်၊ ယခုလ ဖေဖော်ဝါရီတွင် ပဲတစ်တင်းကို ၃၁၅၀၀ကျပ်ဖြင့် လက်လီ/လက်ကားပါ အရောင်းအဝယ်ရှိခဲ့ပါသည်။ ယခုလ အရောင်းအဝယ်ဖြစ်မှုမှာ ယခင်လထက် ပိုကောင်းခဲ့ကြောင်း သိရှိရပါသည်။

DOCA(ပဲခူး)