ပြည်တွင်းကုန်သွယ်မှုသတင်း

စားသုံးဆီတင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီ ၏ အပတ်စဉ် ရည်ညွှန်းဈေးနှုန်း(၁၄.၃.၂၀၂၂) ရက်နေ့မှ (၂၀.၃.၂၀၂၂) ရက်နေ့အထိ-

-

           မွန်ပြည်နယ်သည် နေလှန်းဆား ထုတ်လုပ်ထွက်ရှိသော ပြည်နယ်တစ်ခုဖြစ်ရာ အဆိုပါ နေလှန်းဆားကို ပေါင်၊ သံဖြူဇရပ်နှင့် ရေးမြို့နယ်တို့တွင် အဓိကထုတ်လုပ်ကြပြီး နှစ်စဉ် ဆားတန်ချိန် ၄၀၀၀၀ ကျော် ထွက်ရှိကြောင်း သိရှိရသည်။ ထွက်ရှိသော ဆားများကို ရန်ကုန်၊ မန္တလေးအပါအဝင် တိုင်းနှင့် ပြည်နယ်အချို့ကို တင်ပို့ရောင်းချကြောင်း သိရှိရသည်။

          ပြီးခဲ့သည့် ဖော်ဖော်ဝါရီလ ၁၈ ရက်နှင့် ၁၉ ရက်နေ့တို့တွင် အချိန်အခါမဟုတ် မိုးရွာသွန်းမှုကြောင့် ဆားကွင်းအများစု ထိခိုက်ပျက်စီးခဲ့ပြီး ဆားပိဿာချိန် သောင်းနဲ့ချီ ဆုံးရှုံးမှုရှိခဲ့ကြောင်း၊ လက်ရှိတွင် ဆားတောင်သူများသည် ဆားကွင်းဖျက်မိုးကြောင့် ဆားထုတ်လုပ်မှုများကို အစက ပြန်စလုပ်နေရသဖြင့် ဆားထွက်ကာလနောက်ကျနိုင်ကြောင်း၊ ထို့ပြင် စက်သုံးဆီဈေးနှုန်း အဆမတန်မြင့်တက်လာမှုနှင့်အတူ အထွေထွေကုန်ကျစရိတ် ကြီးမြင့်လာခြင်းတို့ကြောင့် ဆားထုတ်လုပ်သူတောင်သူများအနေဖြင့် အခက်အခဲများနှင့် ရင်ဆိုင်နေရကြောင်း ဆားထုတ်လုပ်သူတောင်သူတစ်ဦးထံမှ သိရှိရသည်။

          ဆားကွက်ဖျက်မိုးကြုံရပြီးနောက် ဆားဈေးနှုန်းမြင့်တက်လာခဲ့သော်လည်း ဆားလက်ကျန်မရှိခြင်းကြောင့် အရောင်းအဝယ်အေးနေကြောင်း၊ လက်ရှိဆားဈေးနှုန်းမှာ ဆားကြမ်း တစ်ပိဿာလျှင် ၁၂၀ မှ ၁၉၅ ကျပ်ထိ ဈေးနှုန်းမြင့်တက်လျှက်ရှိကြောင်း သိရှိရပါသည်။

DOCA(မွန်)

            စီးပွားရေးနှင့်ကူးသန်းရောင်းဝယ်ဝန်ကြီးဌာန၊ စားသုံးသူရေးရာဦးစီးဌာန၊ ရန်ကုန်အရှေ့ ပိုင်းခရိုင်ဦးစီးမှူးရုံးသည် “မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း”နှင့် ပူးပေါင်း၍ (၃.၃.၂၀၂၂) ရက်နေ့မှ (၇.၃.၂၀၂၂) ရက်နေ့အထိ အရှေ့ပိုင်းခရိုင်အတွင်းရှိ စားသုံးသူပြည်သူများသို့ ရာသက်ပန်ကုန်အမှတ်တံဆိပ်ဆီဘူးများကို ဈေးနှုန်းသက်သာစွာဖြင့် ရောင်းချပေးခဲ့ပါသည်။

          ထိုကဲ့သို့ စားသုံးသူပြည်သူများ လက်ဝယ်အရောက် ကားဖြင့် လှည့်လည်၍ မင်္ဂလာတောင်ညွှန့်၊ ဒဂုံ(ဆိပ်ကမ်း)၊ ဒေါပုံမြို့နယ်များအတွင်း ရောင်းချပေးရာတွင် ဟင်းသီးဟင်းရွက်ဆီ ၅၀ သား ၁ ဘူး လျှင် ၃၀၀ဝိ/- ၊ ၁ ပိဿာ ၁ ဘူးလျှင် ၆၀၀ဝိ/- ၊ နေကြာဆီ ၅၀သား ၁ ဘူးလျှင် ၃၈၀ဝိ/- ၊ ၁ ပိဿာ ၁ ဘူးလျှင် ၇၆၀ဝိ/- ၊ ပဲပိစပ် ၅၀ သား ၁ ဘူးလျှင် ၄၀၀ဝိ/- ၊ ၁ ပိဿာ ၁ ဘူးလျှင် ၈၀၀ဝိ/-  ဖြင့် အသီးသီးရောင်းချပေးခြင်းကြောင့် ဝယ်ယူသုံးစွဲသူများပြားကြောင်း သိရှိရပါသည်။

DOCA(ရန်ကုန်)

          အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ မတ်လ (၄)ရက်နေ့မှ မတ်လ (၁၀)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၄၀၀ မှ ၈၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၇၀၀ မှ ၁၃၀၀ အတွင်း၊ ပန်းဂေါ်ဖီ(ထုပ်)ကျပ် ၅၀၀ မှ ၈၀၀ အတွင်း၊ အာလူး(ပိဿာ)ကျပ် ၁၁၀၀ မှ ၂၅၀၀ အတွင်း၊ မုန်လာဥနီ(ပိဿာ) ကျပ် ၉၀၀ မှ ၁၅၀၀ အတွင်း၊ ရွှေဖရုံသီး(လုံး)ကျပ် ၆၀၀ မှ ၁၈၀၀ အတွင်း၊ ဗူးသီး(လုံး) ကျပ် ၅၀၀ မှ ၁၁၀၀ အတွင်း၊ မုန်ညှင်း(ထုပ်)(ပိဿာ)ကျပ် ၅၀၀ မှ ၁၂၀၀ အတွင်း၊ ကြက်သွန်နီ(ဆိပ်ဖြူ)ကျပ် ၆၀၀ မှ ၁၄၀၀ အတွင်း၊ ကြက်သွန်ဖြူ(ရှမ်း)(ပိဿာ) ၂၂၀၀ မှ ၃၈၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၄၀၀ မှ ၇၀၀၀ အတွင်း၊ ချင်း(ပိဿာ)ကျပ် ၅၀၀ မှ ၂၁၀၀ အတွင်း၊ ဆလပ်ရွက်(စီး)ကျပ် ၉၀ မှ ၁၅၀ အတွင်း၊ ချဉ်ပေါင်ရွက်(စီး) ကျပ် ၆၀ မှ ၁၅၀ အတွင်း၊ ခရမ်းသီး(ရှည်)(လုံး)ကျပ် ၁၀၀ မှ ၂၀၀ အတွင်း၊ သံပရာသီး(လုံး)ကျပ် ၅၀ မှ ၂၀၀ အတွင်း၊ ငရုတ်သီးစိမ်း(ကျောက်စိမ်း)(ပိဿာ) ၅၀၀ မှ ၁၃၀၀ အတွင်း၊ ဖရဲသီး(အကြီး၊ အလတ်၊ အသေး)ကျပ် ၁၂၀၀ မှ ၂၀၀၀ အတွင်းဖြစ်ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီး အလုံးပေါင်း (၈၇၁၀၀)ကျော်၊ ခရမ်းသီး(ရှည်)(လုံး) (၁၁၆၀၀)ကျော်၊ ဗူးသီးအလုံးပေါင်း (၂၀၉၀၀) ကျော်၊ ရွှေဖရုံသီးအလုံးပေါင်း (၁၃၉၀၀)ကျော်၊ ဂေါ်ဖီထုပ်ပေါင်း (၁၇၈၀၀)ကျော်၊ ပန်းဂေါ်ဖီထုပ်ပေါင်း (၁၆၂၀၀)ကျော်၊ မုန်ညှင်းထုပ်(ပိဿာ)ပေါင်း (၈၃၀၀)ကျော်၊ ဖရဲသီးလုံးပေါင်း (၂၆၇၀၀) ကျော် အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

       မန္တလေးတိုင်းဒေသကြီး၊ ကျောက်ဆည်ခရိုင်၊တံတားဦးမြို့နယ်တွင် ကွမ်းစိုက်ပျိုးမှုလုပ်ငန်း အားရှေးယခင်ကပင် စိုက်ပျိုးလျက်ရှိပြီး “တံတားဦးကကွမ်းနုဝါ၊ငါးမျှာကဆေး၊ကွမ်းသီးတောင်ငူနှင့် ကိုင်းထုံးဖြူ၊ပြည်ရှား၊အသာဝါးလို့ထွေး”ဟု ဆိုရိုးစကားပင်ရှိခဲ့ပါသည်။တံတားဦးဒေသထွက် ကွမ်းမှာ စျေးကွက်အတွင်းတွင် လူသိများထင်ရှားပါသည် ။ ကျောက်ဆည်ခရိုင် စားသုံးသူရေးရာဦးစီးဌာနမှ တံတားဦးမြို့နယ်၊ ချောင်းခွကျေးရွာရှိ ကွမ်းစိုက်ပျိုးသူခြံပိုင်ရှင်နှင့်တွေ့ဆုံပြီး စိုက်ပျိုးထွက်ရှိမှု ၊ စျေးကွက်အခြေအနေအား မေးမြန်းခဲ့ပါသည်။ ကွမ်းစတင်စိုက်ပျိုးမည်ဆိုပါက မြေကို ထယ်ထိုး ၊ ထွန်မွှေပြီး ဆိတ်ချေး လှည်း(၅)စီးခန့်နှင့်  မြစ်ကိုက်ပိုးများမလာစေရန် ကျောက်မှုန့်(ဂျစ်ပဆန်) ထည့်၍ သမအောင်မွှေပြီး မြေခံကောင်းအောင် သေချာစွာပြုပြင်ပေးရပါသည်။

          ကွမ်းအပင်(၁၀၀၀)စိုက်လျှင် ကွမ်းခြံအတွက် လိုအပ်သောပစ္စည်းများဖြစ်သည့် တိုင်ဝါး (၂၅၀) လုံး၊ ငြမ်းဝါး(၂၅၀၀)လုံး၊ အုန်းလက်(၅၀၀)၊ပိုက်စိမ်းလိပ် (၃၀၀)ပေ (၃)လိပ်၊ အမိုးအကာပြုလုပ်ရန် ကြေးနန်းခွေ(၆)ပိဿာ၊ ကွမ်းမျိုးအပင်(၁၀၀၀) အသုံးပြုရပါသည် ။ ကွမ်းအပင်(၁၀၀၀)စိုက် ကွမ်းခြံတစ်ခြံတွင် အကန့်(၄)ကန့်(၆)ဇယားပါရှိပြီး ၊ အကန့်တစ်ကန့်လျှင် ကွမ်းအပင်(၂၅၀)ဝင်ပါသည်။အကန့်(၄)ကန့်(၆)ဇယားဖြစ်သည့်အတွက် ကွမ်းပင်(၁၀၀၀)စိုက်ပျိုးပြီးဖြစ်ပါသည်။ ကုန်ကျ စရိတ်အနေဖြင့် ကွမ်းမျိုးတစ်ပင်လျှင်(၅၀၀/-)ကျပ်ဖြင့် ကွမ်းပင်(၁၀၀၀)လျှင် (၅၀၀၀၀၀/)ကျပ် ကုန်ကျမည်ဖြစ်ပြီး၊ တိုင်ဝါး၊ ငြမ်းဝါး၊ အုန်းလက်၊ ပိုက်စိမ်းလိပ်၊ ကြေးနန်းခွေနှင့် လုပ်သားခအပါအဝင် စုစုပေါင်း(၁၅၀၀၀၀၀-၂၀၀၀၀၀၀)ကျပ်ဝန်းကျင်ခန့် ကုန်ကျကြောင်း ၊ ကွမ်းစိုက်ပျိုးမှုအနေဖြင့်(၁)နှစ်ပတ်လုံး စိုက်ပျိုး၍ရသော်လည်း ယခုအခါ ကွမ်းစိုက်ပျိုးသူ ကွမ်းခြံပိုင်ရှင်များမှ ဇွန်၊ဇူလိုင်လများတွင် အစိုက်များသည်ကိုတွေ့ရှိရပြီး မိုးတွင်းကာလဖြစ်သည့်အတွက် အပင်အမြစ် စွဲလွယ်ပြီး ကြီးထွားနှုန်းမြန်၍ အောင်မြင်ဖြစ်ထွန်းသောကြောင့် ဖြစ်ပါသည်။ကွမ်းမျိုးအနေဖြင့် အထွက်တိုးမျိုး(ဥဓမ)နှင့် ကွမ်းနုဝါမျိုးဟူ၍စိုက်ပျိုးကြပြီး  ခြံပိုင်ရှင်များ အဓိကစိုက်ပျိုးသောမျိုးမှာ ကွမ်းနုဝါမျိုးဖြစ်ပါသည်။ကွမ်းနုဝါမျိုးသည် စျေးကွက်ကောင်းမွန်ပြီး ကွမ်းစားသူများမှကြိုက်နှစ်သက်ပြီး ပွဲရုံများမှအရောင်းအဝယ်ကောင်းသောကြောင့် ကွမ်းနုဝါမျိုးကို အဓိကစိုက်ပျိုးရခြင်းဖြစ်ပါသည်။ ကွမ်းစတင်စိုက်ပျိုးချိန်မှစ၍ (၇)ရက်ခန့် ရွက်ဖြန်းရေ နံနက်/ညနေ တစ်ကြိမ်စီရေးလောင်းပေးရကြောင်း၊ရေများများလောင်းရန်မလိုဘဲ ရွက်ဖြန်းရေသာလောင်းပေးရမှာဖြစ်ကြောင်း၊တစ်ပတ်ကျော်လာသောအခါ ကွမ်းပင်များအမြစ်စွဲပြီး ရှင်သန်လာမည်ဖြစ်ပါသည်။ အမြစ်စွဲပြီးရက် ( ၂၀ - ၃၀ ) အတွင်း ပိုးသတ်ဆေးနှင့် မှိုသတ်ဆေးများကို အပင်အခြေအနေပေါ် မူတည်ပြီးဖြန်းပေးရပါသည် ။ ကွမ်းစိုက်ပျိုးပြီး (၃)လအကြာတွင် စတင်ခူးဆွတ်နိုင်ပြီး ကွမ်းစတင်ခူးသည့်အပတ်တွင် ကွမ်းပင် (၁၀၀၀)ခူးလျှင် အချိန်(၁၅-၂၀)ပိဿာအထိ ထွက်ရှိကြောင်း ၊ တစ်လလျှင်(၂)ကြိမ်(၁၅)ရက်ခြားပြီးခူးဆွတ်ရပါသည်။ ကွမ်းခူးပြီး အပင်အခြေအနေပေါ်မူတည်၍ လိုအပ်လျှင် အားဆေး၊မှိုသတ်ဆေး၊ ပိုးသတ်ဆေးများကိုဖြန်းပေးရပါသည်။ နွေရာသီဆိုလျှင် တစ်လလျှင်(၂)ကြိမ် ရေသွင်းပေးရပါသည် ။ မြေခံအခြေအနေကိုကြည့်၍ လိုအပ်လျှင်လိုအပ်သလို ရေသွင်းပေးရပါသည် ။ နွေရာသီနှင့်မိုးရာသီများတွင် ကွမ်းအထွက်နှုန်းကောင်းပြီး ဆောင်းရာသီတွင် အထွက်နှုန်းကျဆင်းလာကြောင်း၊ နွေရာသီနှင့်မိုးရာသီများတွင် ကွမ်း(၁၀၀၀)စိုက်လျှင် အချိန်(၇၀-၈၀)ပိဿာ ထွက်ရှိပြီး ဆောင်းရာသီ တွင်ပိဿာချိန်(၂၀-၂၅)ပိဿာထွက်ရှိပါသည်။ ကွမ်းစျေးနှုန်းအနေဖြင့် နွေရာသီနှင့်မိုးရာသီများတွင် တစ်ပိဿာလျှင်(၂၅၀၀-၃၀၀၀)ကျပ် စျေးနှုန်းများရှိပြီး ဆောင်းရာသီတွင် တစ်ပိဿာလျှင်(၁၁၀၀၀-၁၂၀၀၀)ကျပ်စျေးနှုန်းများဖြင့် အရောင်းအဝယ်ဖြစ်ကြောင်း ၊ ဆောင်းရာသီတွင် ကွမ်းအထွက်နှုန်းလျော့သော်လည်း စျေးကောင်းရရှိကြောင်း၊ နွေရာသီနှင့်မိုးရာသီများတွင် ကွမ်းစျေးနှုန်းနိမ့်သော်လည်း အထွက်နှုန်းကောင်းသောကြောင့် ဆတူအကျိုးအမြတ်ရရှိမှာဖြစ်ပြီး စျေးကွက်အနေဖြင့် တံတားဦးဒေသမှ ထွက်ရှိသော ကွမ်းများအား မန္တလေး၊မိတ္ထီလာမြို့များသို့ အဓိကတင်ပို့ရောင်း ချလျက်ရှိပါသည်။ တစ်နှစ်ပတ်လုံး ခြုံကြည့်လျှင် ကွမ်း(၁၀၀၀)စိုက်ပျိုးထားသော ကွမ်းခြံပိုင်ရှင်အနေဖြင့် တစ်လလျှင်( ၂၅၀၀၀၀ - ၃၀၀၀၀၀)ကျပ် ပျမ်းမျှဝင်ငွေရှိပြီး တစ်နှစ်လျှင်(၂၅၀၀၀၀၀-၃၀၀၀၀၀၀)ကျပ်ဝန်းကျင်ဝင်ငွေရရှိမှာဖြစ်ပါသည်။ ကွမ်းခြံတစ်ခြံ၏ သက်တမ်းမှာ ပြုစုကောင်းပါက (၁၀-၁၂)နှစ်အထိသက်တမ်းရှိသောကြောင့် မိသားစုအပိုဝင်ငွေရရှိပြီး အကျိုးအမြတ်များရရှိသောကြောင့် ကွမ်းပင်စိုက်ပျိုးပြီး စီးပွားရေးအောင်မြင်ဖြစ်ထွန်းသည့် ကွမ်းနုဝါကို စိုက်ပျိုးသင့်ပါကြောင်း ရေးသားတင်ပြလိုက်ပါသည်။

DOCA(မန္တလေး)