ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ ရေစကြိုမြို့နယ်တာဝန်ခံ ဦးမြတ်မင်းနှင့် ပခုက္ကူခရိုင်ရုံးမှ ဒေါ်ကြည်ကြည်စိုး တို့သည် (၃.၅.၂၀၂၂)ရက်နေ့၊ နေ့လည် (၁:၃၀)နာရီ အချိန်တွင် ကျေးရွာတစ်ရွာ၊ ထုတ်ကုန်တစ်မျိုးထုတ်လုပ်မှုနှင့် ပြည်တွင်းကဏ္ဍမြှင့်တင်နိုင်ရေးအတွက် ရေစကြို မြို့နယ်၊ပခန်းကြီးကျေးရွာအုပ်စု၊ သက်ရွာကျေးရွာရှိ အိုးထုတ်လုပ်နေသည့် လုပ်ငန်းရှင် ဦးဆင်နှင့် တွေ့ဆုံပြီး အိုးထုတ်လုပ်ရောင်းဝယ်မှုအခြေအနေနှင့် ဈေးနှုန်း၊ ဈေးကွက်အခြေအနေများကို မေးမြန်းဆွေးနွေးခဲ့ပါသည်။

          အိုးတစ်လုံး စတင်ပြုလုပ်မည်ဆိုလျှင် အိုးပြုလုပ်မည့် မြေစီးမြေရရှိနိုင်ရန်အတွက် အနက် ပေ(၂၀) ခန့်ထိတူးရကြောင်း တူးယူရရှိသည့်မြေစီးများကို မောင်းဆုံဖြင့် (၃) နာရီခန့်ထောင်းရ ကြောင်း၊ ထောင်းရသည့် မြေများအား ဇကာဖြင့်ချကာ အိစက်နေသည့်‌မြေများကိုသာပြုလုပ်၍ ရကြောင်း၊ အိုးပြုလုပ်ရန် မြေစီးနှင့် ကုန်းသဲရော၍နှပ်ထားရကြောင်း၊ သောက်ရေအိုးနှင့် ပန်းအိုး ဆိုလျှင် မြေစီးနှင့် ကုန်းသဲ (၂) ချိုး (၁) ချိုးရောရကြောင်း၊ ထန်းမြူအိုးနှင့် ကျန်အိုးများဆိုလျှင် (၃) ချိုး (၁) ချိုး ရောရကြောင်း ပြောပြချက်အရသိရှိရပါသည်။

          မြေစီးနှင့်ကုန်းသဲ ရောထားသည့်မြေများအား နွားသားရေပေါ်တွင် အစေးပေါက်အောင် (၁၅/ ၂၀)မိနစ်ခန့်နယ်ရကြောင်း၊နယ်ထားသောမြေများအား အိုးလုပ်မည့်နေရာသို့ပို့ပြီး မခြောက်စေရန် ပလတ်စတစ်စဖြင့် အုပ်ထားရကြောင်း၊ စတင်ပြုလုပ်ရာတွင် မြေကျင်းတူး၍ ဝါးလုံးတိုင်စိုက်ပြီး အပေါ်မှ ပျဉ်ပြားတင်ထားသည့် စက်ပေါ်၌ အိုးစတင်ပြုလုပ်ရာတွင် အိုးခေါင်းမှ စတင်ပြုလုပ်ပြီး နှုတ်ခမ်းဖော်ရကြောင်း၊ နောက်မှကိုယ်ထည်များကို အဆင့်ဆင့်ပြုလုပ်ရကြောင်း၊ ပုံကြမ်းပြီးပြီ ဆိုလျှင် အနည်း ငယ်ခြောက်အောင်ထားရကြောင်း၊ ပြီးမှလူပေါ်တင်ခါ ပုံဖော်ရကြောင်း၊ အိုးကောင်း ရစေရန် လက်ခတ်နှင့်နာနာပုတ်ရကြောင်း၊ နောက်မှ မိမိလိုချင်သည့် ပုံစံအပွင့်ဖော်ရကြောင်း၊ ဖင်မကပ်စေရန်အတွက် ဖင်ကိုပြာမှုန့်ကပ်ရကြောင်း၊ အရိပ်ထဲတွင်(၃/၄)နာရီခန့်ထားရကြောင်း၊ ဖင်ခြောက်သွားလျှင် နေပူထဲသို့(၂)ရက်ခန့် ထုတ်လှန်းရကြောင်း၊ ခြောက်သွားသည့်အိုးများကို အရောင်လှစေရန်အတွက် မြေနီမှုန့်ကို ရေဖျော်၍သုတ်ပေးရကြောင်း၊ ပြီးလျှင် အိုးဖုတ်ဖိုထဲသို့ အိုးအလုံးရေ (၁၀၀)ခန့်ကို နွားချီး (၁၀) တောင်း၊ ထန်းသီးစေ့အခြောက်(၄၀)ခုနှင့် ကောက်ရိုး အထုံးအသေး (၅၀၀)တို့ထည့်၍ (၅)ရက်ခန့် မီးဖုတ်ရကြောင်းသိရှိရပါသည်။

          အိုးပြုလုပ်ရသည်မှာ လက်ဝင်ပြီး အဆင့်ဆင့်အချိန်ပေး၍ ပြုလုပ်ရကြောင်း အိုးမကွာ အိမ်မ ကွာပြုလုပ်ရခြင်းနှင့် မိရိုးဖလာလုပ်ငန်းဖြစ်သည့်အတွက် ဆက်လက်လုပ်ဆောင်နေခြင်းဖြစ် ကြောင်း၊ အိုးလုပ်ငန်းကို ပြုလုပ်လာသည်မှာ အဖိုး၊ အဘွား လက်ထက်တည်းကပြုလုပ်ခဲ့သည့် လုပ်ငန်းဖြစ်ပြီး အိုးလုပ်ငန်းလုပ်ကိုင်ခဲ့သည်မှာ နှစ်တစ်ရာကျော်လောက်ရှိပြီဖြစ်ကြောင်းများကိုလည်း လုပ်ငန်းရှင်မှ ပြောပြခဲ့၍ သိရှိရပါသည်။ အိုးပြုလုပ်သည့် ကုန်ကြမ်းပစ္စည်းများအနေဖြင့် နှုန်းမြေထော်လာဂျီ (၁) စီးကျပ် (၁၂၀၀၀/-) ၊ ကုန်းသဲထော်လာဂျီ(၁)စီး ကျပ်(၂၅၀၀၀/-)ပေးရကြောင်း၊ ထော်လာဂျီ(၁)စီးလျှင် ထန်းခေါက် တောင်း(၃၅)တောင်းခန့်ရကြောင်း၊ မြေနီမှုန့်(၁)ပြည်လျှင် ကျပ်(၃၀၀/-) ပေးရကြောင်း၊ မီးဖုတ်ရန် လိုအပ်သည့် နွားချီး(၁) တောင်းကို ကျပ် (၁၀၀၀/-) ပေးရပြီး ထန်းသီးစေ့အခြောက်(၁) တောင်းကို ကျပ်(၂၀၀/-)ပေးရကြောင်းနှင့် ထန်းခေါက်တောင်း(၃)လုံးစာကို သောက်ရေအိုး(၁၅) လုံးခန့်ရ ကြောင်းနှင့် ထန်းမြူအိုးနှင့် အတာအိုးဆိုလျှင် (၅၀) လုံးခန့်ရရှိကြောင်း ပြောပြခဲ့ပါသည်။

         လုပ်အားခအနေဖြင့်ဆိုလျှင် မောင်းထောင်းခမှာ ထန်းခေါက်တောင်း (၃)တောင်းလျှင် ကျပ် (၅၀၀/-) ပေးရကြောင်း၊ အိုးကြီးလုပ်ခ (၆၀၀/-)ကျပ်နှင့် အသေးဆုံးလုပ်ခမှာ (၇၀/-)ကျပ်ပေးရ ကြောင်း၊တနေ့လျှင် တစ်ဦးကို အိုးအလုံး(၂၀)ခန့် ပြီးကြောင်းသိရပြီး သောက်ရေအိုး(၁)လုံး ကို(၁၇၀၀/) ကျပ်၊ ပန်းအိုး(၁)လုံးကို (၁၂၀၀/-)ကျပ်၊ ထန်းမြူအိုး (၁) လုံးကို (၃၀၀/-) ကျပ်၊ အတာ အိုး(၂၅၀/-)ကျပ်၊ ဟင်းချက်အိုး(၇၀၀/၅၀၀)ကျပ်၊ ငရုတ်ဆုံ(၁)လုံးကို(၁၀၀၀/-)ကျပ်နှင့် အင်တုံ (၂၅၀၀/-)ကျပ်တို့ဖြင့် ဖောက်သည်ပေးရကြောင်း၊ မကွေးတိုင်းဒေသကြီး ပခုက္ကူမြို့နယ်၊ ရေစကြို မြို့နယ်နှင့် စစ်ကိုင်းတိုင်းဒေသကြီး မြောင်မြို့နယ်တို့မှ အများဆုံး လာရောက်ဖောက်သည်ယူကြကြောင်း ပြောပြခဲ့ပါသည်။

          အကျိုးအမြတ်အနေဖြင့် သိပ်မကျန်ကြောင်း ကိုယ်တိုင်လုပ်လျှင် အိုးကြီး (၁)လုံးကို (၃၀၀/-) ကျပ်ခန့်နှင့် အိုးသေး (၁) လုံးကို (၁၀၀/-) ကျပ်ခန့် မြတ်ကြောင်း အိုးမကွာအိမ်မကွာပြုလုပ်ရခြင်း နှင့်မိရိုးဖလာလုပ်ငန်းဖြစ်သည့်အတွက် ဆက်လက်လုပ်ကိုင်သွားမည်ဖြစ်ကြောင်းများကို လုပ်ငန်း ရှင်ဦးဆင်၏ပြောကြားချက်အရ လေ့လာသိရှိရပါသည်။

DOCA(မကွေး)         

             ရန်ကုန်တိုင်းဒေသကြီး လှိုင်မြို့နယ် သီရိမင်္ဂလာဈေးတွင် ဧပြီလ (၂၆) ရက်နေ့မှ မေလ ( ၂ ) ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ကျိုက်ကော် မှ နာနတ်သီး အလုံးကြီး ကျပ် ၁၂၀၀ မှ ၁၀၀၀၊ အလုံးလတ် ကျပ် ၈၀၀ မှ ၆၀၀ ၊ အလုံးသေး ကျပ် ၅၀၀ မှ ၄၀၀၊ ဘီးလင်းမှ ပိန္နဲသီး အလုံးကြီး ကျပ် ၈၀၀၀၊ အလုံးလတ် ကျပ် ၆၀၀၀၊ အလုံးသေး ကျပ် ၄၀၀၀၊ ဗန်းမော်၊ ကသာ မှ ဖရဲသီး (855) အလုံးကြီး ကျပ် ၁၀၀၀၀၊ အလုံးလတ် ကျပ် ၈၀၀၀၊ အလုံးသေး ကျပ် ၆၀၀၀ မှ ၄၀၀၀၊ ဝမ်းတွင်း မှ ဖရဲသီး (211) အလုံးကြီး ကျပ် ၄၀၀၀၊ အလုံးလတ် ကျပ် ၃၀၀၀၊ အလုံးသေး ကျပ် ၂၀၀၀ မှ ၁၀၀၀၊ မှော်ဘီ၊ တိုက်ကြီးမှ မာလကာသီး အလုံးကြီး ကျပ် ၅၀၀၊ အလုံးလတ် ကျပ် ၃၅၀၊ အလုံးသေး ကျပ် ၂၅၀၊ မအူပင် (ရွှေတောင်ပေါ်) မှ သရက်သီး (မချစ်စု) အလုံးကြီးတစ်ခြင်း အလုံး ၅၅ ပါကျပ် ၃၀၀၀၀၊ အလုံး လတ်တစ်ခြင်း အလုံး ၆၅ ပါကျပ် ၂၅၀၀၀၊ အလုံးသေး တစ်ခြင်း အလုံး ၇၅ ပါ ကျပ် ၁၉၀၀၀ နှင့် အလုံး ၁၀၀ ပါ ကျပ် ၁၅၀၀၀၊ သရက်သီး (ရင်ကွဲ) အလုံးကြီး တစ်ခြင်း အလုံး ၁၁၅ လုံးပါ ကျပ် ၁၁၀၀၀၊ အလုံးလတ်တစ်ခြင်း အလုံး ၁၃၀ ပါ ကျပ် ၈၀၀၀၊ ပြင်ဦးလွင်မှ စတော်ဘယ်ရီ ၅ ပိဿာတစ်ခြင်း ကျပ် ၃၀၀၀၀၊ (၁၈) ကျပ်သားဗူး ကျပ် ၁၂၀၀ ဈေး တို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန်ဟင်းသီးဟင်းရွက်စိုက်ပျိုး ထုတ်လုပ် တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

               ရန်ကုန်အရှေ့ပိုင်းခရိုင်အတွင်းရှိ မြို့နယ်များ၏ အခြေခံစားသောက်ကုန် ကုန်ဈေးနှုန်းများသည် မြို့နယ်ဒေသအလိုက် ဈေးနှုန်းများ မတူညီသော်လည်း မြို့နယ်တစ်ခုနှင့် တစ်ခုကွာဟမှုအနည်းငယ်မျှသာ ရှိပါသည်။

             အရှေ့ပိုင်းခရိုင်ဦးစီးမှူးရုံးအနေဖြင့် အရှေ့ပိုင်းခရိုင်အတွင်းရှိ အခြေခံစားသောက်ကုန် ကုန်ဈေးနှုန်းများကို နေ့စဉ်ရန်ကုန်တိုင်းဒေသကြီးဦးစီးမှူးရုံးသို့ ပေးပို့လျက်ရှိရာ (၂.၅.၂၀၂၂)ရက်နေ့ရှိ ဈေးနှုန်းစုံစမ်းကောက်ယူရရှိမှုအရ ပုဇွန်တောင်မြို့နယ်ရှိ အခြေခံစားသောက်ကုန် ဈေးနှုန်းများမှာ ပေါ်ဆန်းမွှေး ဆန်တစ်အိတ် (၆၄၅၀၀/-)ကျပ်၊ ဧည့်မထ ဆန်တစ်အိတ် (၃၈၀၀၀/-)ကျပ်၊ ငစိန် ဆန်တစ်အိတ် (၃၁၀၀၀/-)ကျပ်၊ စားအုန်းဆီ တစ်ပိဿာ (၆၃၀၀/-)ကျပ်၊ ပဲဆီသန့် တစ်ပိဿာ (၉၅၀၀/-)ကျပ်၊ ကြက်သွန်နီ တစ်ပိဿာ (၈၀၀/ ၁၃၀၀)ကျပ်၊ ကြက်သွန်ဖြူ(ကြူကုတ်) တစ်ပိဿာ (၇၀၀၀/-)ကျပ်၊ အာလူး တစ်ပိဿာ (၂၀၀၀/ ၂၅၀၀)ကျပ်၊ ဂျင်း တစ်ပိဿာ (၂၀၀၀/ ၂၅၀၀)ကျပ်၊ ကုလားပဲ ပဲခြမ်း တစ်ပိဿာ (၃၅၀၀/-)ကျပ်၊ ပဲနီလေး တစ်ပိဿာ (၅၅၀၀/ ၆၀၀၀)ကျပ်၊ ပဲဝါလေး တစ်ပိဿာ (၃၇၀၀/-)ကျပ်၊ ခရမ်းချဉ်သီး တစ်ပိဿာ (၁၀၀၀/-)၊ ဂေါ်ဖီထုပ် တစ်ထုပ် (၇၀၀/-)ကျပ် တို့ဖြင့် ရောင်းချလျက်ရှိပါကြောင်း သိရှိရပါသည်။

DOCA(ရန်ကုန်)

           ကယားပြည်နယ်အတွင်း အခြေခံစားကုန်စားဖိုဆောင် သီးနှံတစ်မျိုးဖြစ်သည့် ကြက်သွန်နီကို ပြည်နယ်အတွင်း စိုက်ပျိုးမှုအနည်းငယ်သာရှိသဖြင့် စားသုံးမှုလိုအပ်ချက်အရ အခြားဒေသဖြစ်သည့် မိတ္ထီလာမှအများဆုံး ဝင်ရောက်ပြီး ဧပြီလမှ မေလပထမပတ်အတွင်း ကြက်သွန်နီ(၄၃၉၅)အိတ်၊ (၁၃၁၈၅၀)ပိဿ ဝင်ရောက်လျှက်ရှိပြီး ဈေးကွက်အတွင်း ကြက်သွန်နီဈေးနှုန်းမှာ အလုံးကြီး တစ်ပိဿလျှင်(၁၂၀၀) ကျပ်နှင့် အလုံးသေးတစ်ပိဿာလျှင်(၁၀၀၀) ကျပ်ဈေးဖြင့် အရောင်းအဝယ်ဖြစ်လျက်ရှိကြောင်း သိရပါတယ်။

DOCA(ကယား)

                 ပဲခူးတိုင်းဒေသကြီး၊ ပဲခူးခရိုင်၊ ကဝမြို့နယ်အတွင်းရှိဒေသခံတောင်သူများသည် ဆောင်းသီးနှံအဖြစ် ပဲအမျိုးမျိုးနှင့်နေ့စဉ် ဝင်ငွေရရှိသည့် ဟင်းသီးဟင်းရွက်များကို စိုက်ပျိုးကြပြီး ယင်းသီးနှံများ ရိတ်သိမ်းပြီးနောက် ဆီစားသုံးမှုဖူလုံစေရန် သီးထပ်စနစ်ဖြင့် တနိုင်တပိုင်ဆီ နေကြာများကို စိုက်ပျိုးကြရာ အောင်မြင်ဖြစ်ထွန်းလျက်ရှိကြောင်း သိရသည်။

                 သီးထပ်စနစ်ဖြင့် စိုက်ပျိုးကြရာတွင် မြေ၏ ပကတိ အစိုဓာတ်အတိုင်း စိုက်ပျိုးလေ့ရှိကြပြီး  မြေအစိုဓာတ်လျော့နည်းခြင်းမရှိစေရန် အတန်းလိုက် အစေ့ချ စိုက်ပျိုး မည်ဆိုပါက အပင်ခြား ခြောက်လက်မမှကိုးလက်မခန့်၊ အတန်းခြား နှစ်ပေခန့်ခြား၍ မြောင်းပေးစိုက်ပျိုးကြောင်း၊ ပတ်ကြဲ၍ စိုက်ပျိုးမည်ဆိုပါက ထယ်ရေးတစ်စပ် ထိုးကာ မျိုးစေ့ပတ်ကျဲပြီး ထွန်ရေးဖြင့် မျိုးစေ့အား ပြန်လည်ဖုံးဖိပေးရကြောင်း သို့မှသာ မျိုးစေ့အပေါက်စုံနိုင်မည်ဖြစ်ကြောင်း သိရသည်။

                အဆိုပါ နေကြာစိုက်ပျိုးသည့်သက်တမ်းမှာ  သုံးလခွဲခန့် ရှိကြောင်းနှင့် ၎င်းမျိုးစေ့များကို  နီးစပ်ရာစိုက်ပျိုးရေးသုံးပစ္စည်းအရောင်းဆိုင်များမှ ဝယ်ယူစိုက်ပျိုးကြပြီး တစ်ဧကလျှင် ၃ကီလိုပါ ရှိသည့် မျိုးစေ့ထုပ်၃ထုပ်စိုက်ပျိုးကြောင်း၊ တစ်ဧကအထွက်နှုန်းမှာ တင်း၂၀မှ၂၅ တင်းအထိ ထွက်ရှိကြောင်း ၊ လာမည့်နှစ်အတွက် မျိုးစေ့များအားလည်း ပြန်လည်ရယူထားနိုင်ကြောင်း နေကြာတနိုင်တပိုင် စိုက်ပျိုးသူ တောင်သူတစ်ဦးထံမှ သိရပါသည်။

DOCA(ပဲခူး)