ပြည်တွင်းကုန်သွယ်မှုသတင်း

၁၄.၁.၂၀၂၂ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်-

         မကွေးတိုင်းဒေသကြီး၊ မကွေးခရိုင်၊ ချောက်မြို့နယ်စားသုံးသူရေးရာဦးစီးဌာနမှ မြို့နယ်ဦးစီးမှူး ဒေါ်မြတ်မြတ်မိုးနှင့် ဒေါ်ချိုဝေလွင်တို့သည် ၂၀၂၂ခုနှစ်၊ ဇန်နဝါရီလ (၁၀)ရက်(၁၁:၀၀)နာရီချိန်၌ ချောက်မြို့နယ်၊ ကိုးဆူကျေးရွာရှိ ဇီးပန်းသီးခြံ (၅)ဧက စိုက်ပျိုးသော တောင်သူ(ဦးစံသိန်း)နှင့်တွေ့ဆုံ၍ ခြံစိုက်တောင်သူများ၏ သစ်သီးဝလံရောင်းချမှုအကျိုးအမြတ်ရရှိမှု အခြေအနေအား တွေ့ဆုံမေးမြန်းခဲ့ပါသည်။အဆိုပါမေးမြန်းခဲ့ရာ       ဒေသခံတောင်သူမှ မေ၊ ဇွန်၊ ဇူလိုင်လမှစ၍ ကိုင်းကူးပျိုးပင်ကို တစ်ပင်(၃၀၀)ကျပ်နှုန်းဖြင့် ဝယ်ယူစိုက်ပျိုးပြီး နိုဝင်ဘာလ၊ ဒီဇင်ဘာလ၊ ဇန်နဝါရီလများတွင် ရောင်းချကြကြောင်း၊ (၁)ဧကလျှင် (၁၅)ပေ×(၁၅)ပေအကျယ်ဖြင့် အပင်(၁၀၀) စိုက်ပျိုးပြီး(၅)ဧကအတွက် ကုန်ကျစရိတ်(၁၅)သိန်းခန့်ရှိကြောင်း၊ ခူးဆွတ်သောအချိန်၌ တစ်နေ့လျှင်ဇီးပန်းသီးအရွယ်စုံပြည်(၅၀)ခန့်ရှိပြီး လုပ်သားခမှာ လုပ်သား(၈)ဦးအတွက် တစ်နေ့ (၃၅၀၀၀) ကျပ်ပေးရပါကြောင်း၊ ရောင်းချရာတွင် တစ်ပြည်(၁၀၀၀)ကျပ်နှုန်းဖြင့်ရပြီး မကွေး-ချောက် ကားလမ်းမကြီးဘေးတွင် ဆိုင်ခင်းရောင်းချပြီး တောင်ကြီး၊ ပြင်ဦးလွင်၊ ကျောက်ပန်းတောင်း၊ ညောင်ဦးမြို့များသို့လည်း တင်ပို့ကြောင်း၊ အကျိုးအမြတ်အနေဖြင့် တစ်လလျှင်(၄၅၀၀၀၀)ကျပ်ဖြင့် သုံးလ (၁၃၅၀၀၀၀)ကျပ်ဝင်ငွေရရှိကာ စီးပွားရေးတွက်ချေကိုက်ကြောင်း၊ ဒေသခံခြံစိုက်တောင်သူများအနေဖြင့် စိုက်ပျိုးသည့်ဇီးပန်းသီးများ အောင်မြင်ဖြစ်ထွန်းကာ အထွက်နှုန်းကောင်း၍ စီးပွားရေးလုပ်ငန်းများ အဆင်ပြေလျက်ရှိကြကြောင်း သိရှိခဲ့ရပါသည်။

          ချောက်မြို့နယ်၊ စားသုံးသူရေးရာဦးစီးဌာနအနေဖြင့် မြို့နယ်အတွင်း ပြည်တွင်းကုန်သွယ်မှု ဖွံ့ဖြိုးရေးအတွက် စပါး၊ ပဲ၊ နှမ်းစိုက်တောင်သူများနှင့်တွေ့ဆုံဆွေးနွေး၍လည်းကောင်း၊ သစ်သီးဝလံ၊ ပန်းမန်စိုက်တောင်သူများနှင့် တွေ့ဆုံဆွေးနွေး၍လည်းကောင်း၊ စျေးနှုန်း၊ စျေးကွက်စိုက်ပျိုးထုတ် လုပ်မှု အကျိုးအမြတ်အခြေအနေများအား မေးမြန်းဆွေးနွေးခဲ့ပြီး စားသုံးသူမိဘပြည်သူများ အစားအသောက်လုံခြုံစိတ်ချရမှုရှိစေရေးအတွက် စျေးကွက်အတွင်း ကွင်းဆင်းခြင်း၊ လုပ်ငန်းရှင်များအား အသိပညာပေးခြင်းများ၊ စဉ်ဆက်မပျက်ဆောင်ရွက်လျက်ရှိကြောင်း သတင်းရရှိပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

ထွက်ခွာသွားလေသော ချစ်သူရည်းစားတစ်ယောက်ကို မျှော်လင့်ရင်းနဲ့ အပျိုကြီးဘဲ ဖြစ် သွားလေသလား? ဒါမှမဟုတ်ရင် ရရာလူကိုဘဲ သူယူလိုက်လေသလား ? အဖြစ်ကဒီလိုဗျ စိုက် ပျိုးထုတ်လုပ်သူ တောင်သူဆိုတာ မိမိအသက်မွေးလုပ်ကိုင်လာတဲ့အလုပ်ပေါ်မှာ မပြောင်းလဲဘဲ အစဉ်တစ်စိုက်လုပ်ကိုင်နေကြသည်ဆိုတာ စာဖတ်သူ တော်တော်များများလဲ သတိထားမိကြမှာပါ။ ဒါကြောင့်လဲ သက်ဆိုင်ရာဌာနအဖွဲ့အစည်းများအနေနဲ့ မပြောင်းလဲတဲ့ရှေးရိုးစွဲစိုက်စနစ်တွေကို တတ်နိုင်သမျှပြောင်းလဲနိုင်ရေး ဒေသနဲ့လျော်ညီတဲ့မျိုး ၊ ပြောင်းလဲလာတဲ့ရာသီဥတုနဲ့ ကိုက်ညီသော သီးနှံနှင့်စိုက်ပျိုးမှု အလေ့အကျင့်ကောင်းများကိုလည်း အသိပညာပေး ဆောင်ရွက်လျှက်ရှိတာကိုလဲ ကြားသိကြမှာပါ။ ဒီထဲမှာမှ မြင်းခြံခရိုင် ၊မြင်းခြံမြို့နယ်ဆိုတာ ကြက်သွန်ကို အဓိက စီးပွားရေးတစ်ရပ်အနေနဲ့ စိုက်ပျိုးလုပ်ကိုင်ကုန်သွယ်နေကြသည် ဆိုတာလဲ ကြက်သွန်နဲ့ မစိမ်း သူတိုင်းသိပြီးသားဖြစ်မှာပါ ကြက်သွန်နီဟာအတက်လဲကြမ်းသလို အမြတ်လဲကြမ်းတတ်ပါတယ် ဒါပေမဲ့လည်း ဒီလိုအခြေအနေနဲ့ဝေးခဲ့သည်မှာ ၂ နှစ် ၊ ၃ နှစ်တောင်ရှိခဲ့ပြီလို့ တောင်သူ ၊ လုပ်ငန်းရှင်တစ်ဦး၏ ညဉ်းတွားမှုအရ သိရပါသည်။ ဒါဆိုဘာလို့ ဈေးကွက်မမျှော်မှန်းနိုင်တဲ့ သီးနှံကို သူတို့ဘာကြောင့်ဆက်လက်စိုက်ပျိုးလုပ်ကိုင်နေကြတာလည်းလို့ မေးမြန်းရာမှာတော့ တစ်နေ့၊တစ်နှစ် ပြောင်းလဲလို့ ဈေးနှုန်းများတက်လာလေမလား ၊ ပြည်ပဈေးကွက်တွေများ အဝယ်လိုက်လို့ ကြိုက်ဈေးတွေများရလေမလားဆိုတဲ့ မျှော်လင့်ချက်တွေနဲ့ ရှိရာလက်ငုတ် အလုပ်ကလေးကိုဘဲ ခုံမင်ဖက်တွယ်လုပ်ကိုင်နေကြတယ်လို့ ကြားသိခဲ့ရ ပါသည်။ ဈေးကွက်နဲ့ စိုက်ပျိုးမှုကိုလေ့လာကြည့်ရာမှာတော့ ၂၀၁၉ - ၂၀၂၀ ဘဏ္ဍာနှစ် မြင်းခြံခရိုင်၏မိုးကြက်သွန်နီ စိုက်ပျိုးထုတ်လုပ်မှုသည် ၂၇၆၃ ဧက ၊ တစ်ဧကအထွက်ပိဿာ ၁၉၅၀ ရှိခဲ့ပြီး ၂၀၁၉ ခုနှစ် ဒီဇင်ဘာလစတုတ္တတပတ်ဈေးသည် လက်ကားဈေးနှုန်းအနေဖြင့် တစ်ပိဿာလျှင် ကျပ် (၃၀၀-၁၇၅၀) အတွင်း ဈေးနှုန်းအမျိုးမျိုးရှိခဲ့ပြီး ရာသီကုန်ဈေးမှာတော့ လက်ကားအနိမ့်ဈေးတစ်ပိဿာ ၃၅၀/- ကျပ် မှအမြင့်ဈေးတစ်ပိဿာ ၅၂၅/- ကျပ်ရှိခဲ့ပါကြောင်း ၊ ၂၀၂၀ - ၂၀၂၁ ခုနှစ် ၊ စိုက်ပျိုးချိန်မှာ တော့ မြင်းခြံခရိုင်၏ မိုးကြက်သွန်နီ စိုက်ပျိုးမှုသည် ၁၇၆၈ ဧက ၊ တစ်ဧကအထွက်ပိဿာ ၁၉၇၀ ရရှိခဲ့ပြီး ၂၀၂၀ ခုနှစ် ၊ ယခုလိုဒီဇင်ဘာလ စတုတ္တတပတ်ဈေးကွက်ပေါက်ဈေးမှာ လက်ကား အနိမ့်ဈေး ၁၀၀/- ကျပ်မှအမြင့်ဈေး ၆၅၀/- ကျပ် ရှိခဲ့ပြီး ရာသီကုန်ပိတ်ဈေးမှာ လက်ကား အနိမ့်ဈေး ၁၀၀/- ကျပ်မှအမြင့်ဈေး ၂၅၀/- ကျပ်သာရှိခဲ့ပါကြောင်း ၊ ယခု ၂၀၂၁ - ၂၀၂၂ ခုနှစ် ၊ မိုးကြက်သွန်နီစိုက်ပျိုးထုတ်လုပ်ချိန်တွင်လည်း မြင်းခြံခရိုင်အနေဖြင့် ၁၄၆၃ ဧကစိုက်ပျိုးခဲ့ပြီး ၊ တစ်ဧက အထွက်ပိဿာ ၂၁၀၀/- ထွက်ရှိကြောင်းသက်ဆိုင်ရာဌာန၏ ကိန်းဂဏန်းများအရ သိရှိရပြီး စိုက်ပျိုးမှုလည်းတစ်နှစ်ထက်တစ်နှစ်လျော့နည်းလာတာကိုတွေ့ရပါသည်။၂၀၂၁ ခုနှစ် ၊ ဒီဇင်ဘာပထမပတ်မှစ၍ မြင်းခြံမြို့ပေါ်ဈေးကွက်သို့ ကုန်ချိန် ၁၅၀၀ ပိဿာဖြင့် ကနဦးဝင် ရောက်ခဲ့ပြီး လက်ကားအနိမ့်ဈေး တစ်ပိဿာ ၁၅၀/- ကျပ်မှ အမြင့်ဈေး ၆၅၀/- ကျပ်ရှိခဲ့ပါသည်။ ၂၀၂၁ ခုနှစ် ၊ ဒီဇင်ဘာ ၂၀ ရက်မှစ၍ ကုန်ချိန်ပိဿာ ၁၂၀၀၀၀ ခန့်ဝင်ရောက်လျှက်ရှိပြီး ဈေးနှုန်းအနေဖြင့်ဈေးတန့််နေပြီး ကြက်သွန်အရည်အသွေးပေါ်မူတည်၍ ၅၀/- ၊ ၁၀၀/- အနိမ့်အမြင့်ရှိခဲ့တယ်လို့သိရပါသည်။ သို့သော်ငြားလည်း ဈေးကွက်ကြက်သွန် ဝင်ရောက်မှုသည် တစ်ရက်လျှင် ပိဿာ ၂ သိန်း နှင့် ၃ သိန်းအဝင်ရှိပါကြောင်း ၊ ယခုလို ဈေးကွက်အတွင်း တင်သွင်းရောင်းချသူများပြားလာသော်လည်း ဈေးနှုန်းအနေဖြင့် ကျဆင်း သွားခြင်းမရှိဘဲ လက်ကား အနိမ့်ဈေး ၁၀၀/- ကျပ်မှ အမြင့်ဈေး ၆၀၀/- ကျပ်ဖြင့်သာ ဈေးတန့် ဈေးငြိမ်နေကြောင်းတွေ့ရပါသည်။ လက်ရှိဖြစ်ပေါ်နေသောဈေးနှုန်းများအရ စိုက်ပျိုးထုတ်လုပ်သူတောင်သူများသို့ ဆက်လက်မေးမြန်းကြည့်ရာမှာတော့ ယခုကာလသည် ယခင်ယခင်နှစ်များနှင့်မတူဘဲ အခြေအနေအရပ်ရပ်ကွာခြားပါကြောင်း ၊ ထည့်သွင်းရသည့် စရိတ်စကဖြစ်သော စက်သုံးဆီစရိတ် ၊ ဓါတ်မြေဩဇာစရိတ်ဆိုလျှင် နှစ်ဆခွဲ ၊ သုံးဆနီးပါးကြီးမြင့်ပါကြောင်း ၊ မိုးကြက်သွန်ဆိုသော်ငြားလည်း ရာသီမမှန်၍ စိုက်ပျိုးရေကို ပို၍ခုတ်မောင်းရေသွင်းရပါကြောင်း ၊ ကုန်ချိန်ထွက်ရှိမှုမှာလည်း တစ်ဧက မျိုးဥပိဿာ ၃၀၀ သွင်းလျှင် ၄ ဆ ၊ ၅ ဆ ၁၂၀၀ / ၁၅၀၀ ပိဿာ သာရရှိပါကြောင်း ၊ ထိပ်စဥကြီးလဲနည်းပါကြောင်း ၊ ၆ ဆ ၊ ၇ ဆ ၁၈၀၀ / ၂၀၀၀ ပိဿာ ရရှိသူကနည်းပါကြောင်း တစ်ဧကထုတ်လုပ်မှုစရိတ်သည် ၈ သိန်းနှင့် ၉ သိန်း အထက်တွင်ရှိသည့်အတွက် ယခုရောင်းချနေရသောဈေးသည် တောင်သူကြိက်ဈေး မဟုတ်သေး
ကြောင်း ၊ ဒါဆို ဘာလို့တက်ဈေးကိုမမျှော်ဘဲ ဈေးမကိုက်ဘဲနဲ့ ဈေးကွက်မှာ ကုန်ချိန်တွေ တစ်ရက်ထက်တစ်ရက် အဝင်များနေရတာလဲ? သမီးကညှာ အခါမလင့်စေနှင့်ဆိုတဲ့ စကားလဲ ကြားဖူးမှာပါ ကြက်သွန်က ကုန်စိမ်းလေဗျ အချိန်လွန် ၊ အရွယ်လွန်လို့ မရဘူးလေ တက်ဈေးကိုဘယ်မမျှော်ချင်ဘဲရှိမလဲဗျာ မျှော်တော့မျှော်ချင်တာပေါ့ သို့ပေမယ့်လဲ သူမလာရင် ဘယ်လိုလုပ်မလဲဗျ ရောင်းလိုက်လို့ငွေပေါ်တော့လဲ အခြားအစားထိုးဝယ်စရာရှိတာလေးတွေ ဝယ်ရတာပေါ့ဗျာ...လို့ဘဲ အဆုံးသတ်ရင်း လေ့လာမိသမျှ ရေးသားဖော်ပြလိုက်ရပါသည်။
စားသုံးသူရေးရာဦးစီးဌာန
မန္တလေးတိုင်ဒေသကြီး

         ပုသိမ်ခရိုင်၊ ကျောင်းကုန်းမြို့နယ်အနေဖြင့် ယခုနှစ်တွင် ဖရဲသီးစိုက်တောင်သူ(၄၀)ဦးရှိပြီး စိုက်ဧကမှာ (၁၅၀)ဧက စိုက်ပျိုးလျှက်ရှိပါသည်။ ဖရဲသီးတစ်ဧက(၁၂၀၀)လုံးခန့်ထွက်ရှိပြီး တစ်ဧက ကုန်ကျစရိတ်မှာ (၁၈)သိန်းခန့်ရှိကြောင်းနှင့် ဒီဇင်ဘာလတွင်စတင်စိုက်ပျိုးပြီး မတ်လနောက်ဆုံး ပတ်တွင်း ဖရဲသီးစတင်ခူးဆွတ်နိုင်မည်ဖြစ်ပါသည်။ ဈေးကွက်အနေဖြင့်မူဆယ်သို့ တင်ပို့ရောင်းချကြောင်း သိရှိရပါသည်။ ဒုတိယညွှန်ကြားရေးမှူးချုပ်(၁)၏ ကျောင်းကုန်းခရီးစဉ်တွင် စစ်ကိုင်းတိုင်းဒေသကြီးအတွင်း ဖရဲသီးနှံစိုက်ပျိုးသော တောင်သူများအနေဖြင့် ဖရဲစိုက်ဘောင်များတွင် စိုက်ပျိုး ထားသောဖရဲ(၂)ပင်ကြား ငရုပ်သီးနှံ(၁)ပင်စီ စိုက်ပျိုးကြောင်းနှင့် ဖရဲစိုက်ခင်းတစ်ဧကတွင် ငရုပ်သီး တန်ဘိုး(၆)သိန်းခန့်အပိုဝင်ငွေရရှိကြောင်း မြို့နယ်တာဝန်ခံမှအကြံပြုဆွေးနွေးရာတွင် ဖရဲစိုက်တောင်သူများမှ စိတ်ပါဝင်စားမှုရှိပြီး ငရုပ်သီးနှံအား နောက်နှစ်တွင် စမ်းသပ်စိုက်ပျိုးသွားမည်ဖြစ်ပါကြောင်း သိရှိရပါသည်။

          ယခင်နှစ်တင်ပို့ရောင်းချမှုမှာ (၁၀)ဘီးကားတစ်စီးလျှင် ဖရဲသီး(၁၂၀၀)လုံးခန့် ဝင်ဆံ့ပြီး မူဆယ်အရောက်ကားတစ်စီးတန်ဆာခ (၂၆)သိန်းပေးဆောင်ရကြောင်းနှင့် မူဆယ်ဖရဲဈေးကွက်သို့ ရောက်ရှိပါက (၁၀)ဘီးကားတစ်စီးလျှင် သိန်း(၈၀)ခန့်ဈေးနှုန်းရရှိသဖြင့် ဖရဲစိုက်တောင်သူများအနေ ဖြင့် တစ်ဧကလျှင်ပျမ်းမျှ(၃၆)သိန်းခန့် အကျိုးအမြတ်ရရှိကြောင်း သိရှိရပါသည်။

စားသုံးသူရေးရာဦးစီးဌာန ဧရာဝတီတိုင်းဒေသကြီး

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူး၏ လမ်းညွှန်မှုဖြင့် ပေါက်မြို့နယ်တာဝန်ခံ ဒု-ဦးစီးမှူး ဦးကျော်စိုးသည် (၆.၁.၂၀၂၂) ရက်နေ့၊ နံနက်(၀၉:၀၀)နာရီအချိန်တွင် ပြည်တွင်းကုန်သွယ်မှုဖွံ့ဖြိုး တိုးတက်စေရေးအတွက် ပေါက်မြို့နယ်၊ ယာကြီးပြင်ကျေးရွာ၊ ပဲစဉ်းငုံသီးနှံ စိုက်ပျိုးသော တောင်သူ ဦးမောင်ရွှေနှင့် သွားရောက်တွေ့ဆုံပြီး မိုးသီးနှံပဲစဉ်းငုံစိုက်ပျိုးထွက်ရှိမှုအခြေအနေကို ကွင်းဆင်းလေ့လာမေးမြန်းခဲ့ပါသည်။ ပေါက်မြို့နယ်သည် မြန်မာနိုင်ငံ အလယ်ပိုင်း မကွေးတိုင်းဒေသကြီး၊ ပခုက္ကူ ခရိုင်အတွင်းတွင်တည်ရှိပြီး မြို့နယ်လူဦးရေနေထိုင်မှုမှာ(၂၀၄၆၈၅)ဦးခန့် နေထိုင်ကြောင်း၊ စိုက်ပျိုးရေးကို အဓိကထားလုပ်ကိုင်၍ ကြက်သွန်နီ၊ စပါး၊ အာလူး၊ မြေပဲနှင့် သီးနှံမျိုးစုံကို နှစ်စဉ်မပြတ်စိုက်ပျိုးကြကြောင်း၊ ပဲစဉ်းငုံသီးနှံကို သီးညှပ်အဖြစ် စိုက်ပျိုးလျှက်ရှိကြောင်း၊ (၂၀၂၀-၂၀၂၁)ဘဏ္ဍာနှစ်တွင် တစ်မြို့နယ်လုံး ပဲစဉ်းငုံစိုက်ဧက (၈၅၀၀)ခန့် စိုက်ပျိုးကြောင်း၊ ယခုနှစ်တွင် ယာကြီးပြင်ကျေးရွာတွင် ပဲစဉ်းငုံ(သီးညှပ်) စိုက်ဧက(၁၀၀)ခန့် စိုက်ပျိုးကြောင်း၊ ရာသီဥတုအနေအထားကောင်းမွန်မှုကြောင့် သီးနှံအထွက်နှုန်းမှာ ကောင်းမွန်ကြောင်းသိရှိရပါသည်။ ယခုနှစ်တွင် စိုက်တောင်သူဦးမောင်ရွှေသည် ပဲစဉ်းငုံ(သီးညှပ်) (၅)ဧကခန့် စိုက်ပျိုးထားရှိကြောင်း၊ အဓိကစိုက်ပျိုးသီးနှံမဟုတ်ဘဲ ကြားညှပ်ပြီး စိုက်ပျိုးခြင်းဖြစ်ပါသောကြောင့် မြေပြုပြင်စရာမလိုဘဲ ကုန်ကျစရိတ်နည်းပါးကြောင်း၊ မြေပဲ၊ ပဲတီစိမ်းအခင်းများကြားတွင် သီးညှပ်စိုက်ပျိုးမှု များပြားပြီး မြေဖျင်းမြေညံ့များတွင်လည်း စိုက်ပျိုးကြကြောင်း၊ တစ်ဧကစိုက်ပျိုးလျှင် မျိုးစေ့(၂) ပြည်ခန့်ကုန်ကျကြောင်း၊ မျိုးစေ့(၁) ပြည်လျှင် ငွေကျပ်(၄၀၀၀)နှုန်းဖြင့် ဝယ်ယူစိုက်ပျိုးရကြောင်း၊ (၅)ဧကစိုက်ပျိုးခြင်းဖြစ်၍ (၁၀)ပြည်ခန့် ဝယ်ယူရပြီးမျိုးစေ့ဝယ်ယူစရိတ်မှာ (၄၀၀၀၀) ဝန်းကျင်ခန့် ကုန်ကျကြောင်း၊ ဇူလိုင်လတွင် စတင်စိုက်ပျိုးပြီး စက်တင်ဘာလအထိ (၂)လသား ခန့်အရွယ်တွင် မြေကြီးအတွင်းရှိ အစိုဓါတ်ထိန်းနိုင်စေရန်နှင့် အပင်ကြီးထွားစေရန်အတွက် ကျောက်မှုန့်(၂) အိတ်ခန့် ဝယ်ယူပြီး အပင်ခြေသို့ တစ်ပင်ချင်းလိုက်၍ တူးဆွပြီး ထည့်ရကြောင်း၊ (၂)လခွဲသားအရွယ်တွင် အပွင့်အသီးလိုက်စေရန်အတွက် ပိုးသတ်ဆေးနှင့် အားဆေးဝယ်ယူပက်ဖျန်းရကြောင်း၊ ဒီဇင်ဘာလ တွင်စတင်ရိတ်သိမ်းရကြောင်း၊ စိုက်ပျိုးသက်တမ်းမှာ (၄)လခွဲခန့်ကြာမြင့်ကြောင်း သိရှိရပါသည်။ ပဲစဉ်းငုံ(သီးညှပ်)သီးနှံသည် မိုးများစွာရွာသွန်းလျှင် အပင်မသန်၍ အထွက်နှုန်းနည်းကြောင်း၊ စတင်စိုက်ပျိုးချိန်တွင် မိုးအကြိမ်ရေများစွာ ရွာသွန်းခဲ့သော်လည်း အပွင့်ပွင့်ချိန်တွင် မိုးရွာသွန်းမှု နည်းပါးသွားသောကြောင့် အပွင့်မကြွေဘဲ အသီးတင်မှုများ၍ အထွက်နှုန်းမှာ အသင့်အတင့်ကောင်း မွန်ကြောင်း၊ မြေအနေအထားကွာခြားခြင်း စိုက်ပျိုးချိန်တွင် မြေအစိုဓာတ်ကွာခြားခြင်း၊ စိုက်ပျိုးပြီး အပင်ပြုပြင်မှုကွာခြားခြင်း၊ သွင်းအားစု သုံးစွဲပုံနှင့် ပိုးသတ်ဆေး၊ အားဆေးသုံးစွဲမှု ကွာခြားခြင်း၊ စိုက်ပျိုးမြေထွန်သွားကြောင်း အကျဲအစိပ် စိုက်ပျိုးမှုကွာခြားခြင်းတို့ကြောင့် ပဲစဉ်းငုံ(၁)ဧက စိုက်လျှင် အထွက်နှုန်းမှာ (၄)တင်းမှ (၁၀)တင်းအထိ အမျိုးမျိုးကွဲပြားထွက်ရှိကြကြောင်း ယခုနှစ် ပဲစဉ်းငုံစိုက် တောင်သူ ဦးမောင်ရွှေသည် တစ်ဧကလျှင်(၉)တင်းခန့် ထွက်ရှိကြောင်း၊ ယခုနှစ်တွင် အထွက်နှုန်း ကောင်းမွန်ကြောင်း သိရှိရပါသည်။ ဈေးနှုန်း/ဈေးကွက်အနေဖြင့် ယခုနှစ်တွင် ပဲစဉ်းငုံ(၁)တင်းလျှင် သီးနှံပေါ်စအချိန်၌ (၄၀,၀၀၀/-) ကျပ်ဖြင့်ရောင်းချရပြီး ယခင်နှစ်ဈေးနှုန်းမှာ (၂၄,၀၀၀/-)ကျပ် မှ (၂၅,၀၀၀/-)ကျပ်အထိသာ အမြင့်ဆုံး ဈေးနှုန်းအဖြစ် ရောင်းချခဲ့ရကြောင်း ပဲစဉ်းငုံစိုက်တောင်သူများအနေဖြင့် ယခင်နှစ်ထက် ဈေးနှုန်း ပိုမိုရရှိလျှက်ရှိကြောင်း၊ စိုက်ပျိုးထွက်ရှိသော ပဲစဉ်းငုံများကို ပခုက္ကူမြို့သို့ သွားရောက်ရောင်းချ လျက်ရှိပါကြောင်း သိရှိရပါသည်။ တစ်ဧကစိုက်ပျိုးလျှင် ကုန်ကျစရိတ်မှာ (၁၀၀,၀၀၀/-)ကျပ်ခန့်ကုန်ကျကြောင်း၊ မိသားစုဝင်များဖြင့် လုပ်ကိုင်သည့်အတွက်(၇၀,၀၀၀/-)ကျပ်ခန့်သာ ကုန်ကျကြောင်း သိရှိရပါသည်။ တစ်ဧကဝင်ငွေမှာ (၃၆၀,၀၀၀/-) ကျပ်ခန့်ရရှိ၍ (၂၀၀,၀၀၀/-)ကျပ်ခန့် အကျိုးအမြတ်ရရှိကြောင်း ပဲစဉ်းငုံစိုက် တောင်သူ ဦးမောင်ရွှေ၏ ပြောကြားချက်အရ လေ့လာသိရှိရပါသည်။ ပဲစဉ်းငုံစိုက်တောင်သူများသည် ပြည်တွင်းမှ စိုက်ပျိုးထွက်ရှိသည့်သီးနှံများကို ပြည်တွင်းသာမက ပြည်ပအထိ နှစ်စဉ်တင်ပို့ရောင်းချမှုပြုလုပ်ဆောင်ရွက်ပေးနိုင်ပါက ဈေးနှုန်း/ဈေးကွက်များပိုမို ကောင်းမွန်လာပြီး အကျိုးအမြတ်များစွာ ရရှိနိုင်မည်ဖြစ်ပါကြောင်း၊ ပဲစဉ်းငုံသီးနှံသည် စားသုံးသူ ပြည်သူများ နေ့စဉ်စားသုံးသင့်ပြီး ကျန်းမာရေးအတွက်များစွာ အထောက်အကူပြုသော သီးနှံတစ်မျိုးဖြစ်သောကြောင့် နှစ်စဉ်မပျက် စိုက်ပျိုးပေးသင့်ပါကြောင်း ပဲစိုက်တောင်သူထံမှတစ်ဆင့် သိရှိရပါသည်။ စားသုံးသူရေးရာဦးစီးဌာန မကွေးတိုင်းဒေသကြီး