ပြည်တွင်းကုန်သွယ်မှုသတင်း

ပဲခူးမြို့တွင် အိမ်ဆောက်ပစ္စည်းဆောက်လုပ်ရေးလုပ်ငန်းသုံး အရောင်းဆိုင်များတွင် ပုံမှန် ရောင်းဝယ်နေသော Double Rhino (ကြံနှစ်ကောင်အနီ)၊ Double Rhino (ကြံနှစ်ကောင်အစိမ်း)၊ Apache(အပါချီ)၊ SCG(ထိုင်းဆင်)၊ Max Cement(မတ်စ်) စသည့် ဘိလပ်မြေအမျိုးအစားများမှာ ပစ္စည်းပြတ်လတ်ခြင်း၊ ဈေးနှုန်းမြင့်တက်ခြင်းများဖြစ်ပေါ်နေကြောင်းသိရသည်။
လူကြိုက်များ၊ သုံးစွဲမှုများပြားသည့် တံဆိပ်များဖြစ်သည့် Double Rhino (ကြံနှစ်ကောင်) ဘိလပ်မြေသည် ဈေးနှုန်းများမြင့်တက်နေပြီး ဒီဇင်ဘာလ(ပထမ)အပတ်တွင် Double Rhino (ကြံနှစ်ကောင်အနီ) (၇၃၀၀)ကျပ် ၊ Double Rhino (ကြံနှစ်ကောင်အစိမ်း) (၇၈၀၀)ကျပ်မှ ဇန်နဝါရီလတွင် Double Rhino (ကြံနှစ်ကောင်အနီ) (၈၆၀၀)ကျပ် ၊ Double Rhino (ကြံနှစ်ကောင်အစိမ်း)သည် (၈၂၀၀)ကျပ်အထိ မြင့်တက်ခဲ့ကြောင်းသိရသည်။ အခြားဘိလပ်မြေ တံဆိပ်များဖြစ်သည့် Max Cement(မတ်စ်) ဘိလပ်မြေသည် ယခင်(၆၃၀၀)ကျပ်မှ ယခု (၈၃၀၀)ကျပ်သို့ လည်ကောင်း၊ Alpha(အယ်လ်ဖာ) ဘိလပ်မြေသည် ယခင်(၇၉၀၀)ကျပ်မှ ယခု(၈၅၀၀)ကျပ်သို့ လည်ကောင်း အသီးသီးဈေးနှုန်းမြင့်တက်ခဲ့ပြီး SCG(ထိုင်းဆင်) ဘိလပ်မြေ သည် ဈေးကွက်အတွင်း၌ ပစ္စည်းပြတ်လတ်မှုများဖြစ်ပေါ်နေကြောင်းသိရသည်။
ယခုကဲသို့ ဘိလပ်မြေများ ဈေးနှုန်းမြင့်တက်ခြင်း၊ ပစ္စည်းပြတ်လတ်ခြင်းများဖြစ်ပေါ်ရခြင်းမှာ ပွင့်လင်းရာသီဖြစ်သည်နှင့်အညီ အဆောက်အဦများတည်ဆောက်ခြင်း၊ လမ်း၊ တံတားများပြုပြင် တည်ဆောက်ခြင်းများကြောင့် ဘိလပ်မြေဝယ်လိုအားများပြားလာခြင်း၊ သယ်ယူပို့ဆောင်သည့် ကားခများဈေးနှုန်းမြင့်တက်ခြင်း၊ ကုမ္ပဏီများ၊ စက်ရုံများမှ ထုတ်လုပ်မှုနည်းပါးခြင်းတို့ကြောင့် ဖြစ်ကြောင်း သိရသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

ပြည်ပဲစျေးကွက်တွင် ပြည်ပပို့ကုန်ပဲသီးနှံများဖြစ်သော မတ်ပဲ၊ ပဲစင်းငုံသီးနှံများ နှစ်ဆန်းပိုင်းတွင် စျေးကွက်အတွင်း စျေးမြင့်တက်လျက်ရှိခဲ့ပါသည်။ အိန္ဒိယနိုင်ငံမှ ပဲလိုအပ်ချက် ပုံမှန်ရှိနေ သလို ပဲတင်သွင်းခွင့်သက်တမ်းတိုးခဲ့ပြီး ဒေါ်လာစျေးနှုန်းများမြင့်တက်လာမှုကြောင့် ပြည်တွင်း ပဲစျေးကွက်မှာ ပြည်ပပို့ကုန်ပဲသီးနှံများ ဇန်နဝါရီလဆန်းမှ စ၍ စျေးနှုန်းများ သိသိသာသာ မြင့်တက်လာခဲ့ပါသည်။ ပဲစင်းငုံသီးနှံအနေဖြင့် ၂၀၂၀ နှစ်ဆန်းပိုင်းကာလ ပဲသစ်ဝင်ချိန် တစ်တင်းလျှင် ၂၃၀၀၀ကျပ်နှင့် ၂၅၀၀၀ကျပ်ခန့်သာ စျေးဖွင့်ရောင်းဝယ်ခဲ့ပြီး ပဲအဝင်ပါးချိန်နှင့် စျေးကွက်အတွင်း ပဲလက်ကျန်လျော့နည်းသွားချိန်လောက်မှသာ စျေးမြင့်တက်လာခဲ့ကြသော်လည်း ပဲတစ်တင်း ၃သောင်း ကျပ်ခန့်အထိသာ ရရှိခဲ့ကြပါသည်။ ၂၀၂၀ခုနှစ်အတွင်းတွင် ပဲသစ်အဖွင့်စျေး တစ်တင်း ၂၆၀၀၀ ကျပ်ဖြင့် စျေးဖွင့်ခဲ့ပြီး ဇူလိုင်၊ သြဂုတ်လလောက်မှစ၍ ပဲစျေးအားလုံးလိုလို စျေးမြင့်တက်လာရာ ပဲစင်းငုံသီးနှံစျေးမှာလည်း တစ်တင်းကျပ် ၄သောင်းကျော်အထိ မြင့်တက်လာခဲ့ကြသည်ကို တွေ့ရှိရပါသည်။ လှောင်ပဲသမားများအနေဖြင့် စျေးမြင့်ရချိန်တွင် ထုတ်ရောင်းချမှုများ ရှိခဲ့သောကြောင့် အောက်တိုဘာလမှစ၍ စျေးကွက်မှာပဲစင်းငုံ အရောင်းအဝယ် မဖြစ်သလောက် ပဲလက်ကျန်ပြတ်သွားခဲ့ပါသည်။ ဒီဇင်ဘာလ ကုန်ပတ်တွင် ပြည်စျေးကွက်သို့ ပဲစင်းငုံသစ် အနည်းငယ်စတင်ဝင်ရောက်ခဲ့ပြီး ပဲစျေးမှာ ၄၀၀၀၀ ကျပ်ဖြင့် စျေးဖွင့်ခဲ့သော်လည်း ဇန်နဝါရီလဆန်းမှ စ၍ တစ်တင်း ၄၂၀၀၀ကျပ်ထိ မြင့်တက်လာခဲ့ပြီး ပဲအဝင်လှိုင်လာသလို ရန်ကုန်ဝယ်လက် အဓိကထားဝယ်ယူနေသောကြောင့် ပြည်ပဲစျေးကွက်အတွင်း အရောင်းအဝယ် သွက်နေသည့်အထဲတွင် ပဲစင်းငုံသီးနှံလည်းပါဝင်နေခဲ့ကြောင်း သိရှိရပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

         မွန်ပြည်နယ်၊ ကျိုက်မရောမြို့နယ်တွင် ဆောင်းသီးနှံပဲတီစိမ်းစိုက်ပျိုးသည့် တောင်သူ များအောင်မြင်ဖြစ်ထွန်း၍ စျေးကောင်းလည်းရသဖြင့် စိုက်ပျိုးသူတောင်သူများ အဆင်ပြေ လျက်ရှိကြောင်းသိရသည်။ကျိုက်မရောမြို့နယ် အတွင်းရှိ လက်ပံကျေးရွာ၊ ကျုံစိန်ကျေးရွာနှင့် ခရုံကျေးရွာများသည် စိုက်ပျိုးရေးဖြင့် အဓိကစီးပွားရေးလုပ်ကိုင်ကြပြီး ဆောင်းသီးနှံများ ဖြစ်သည့် ပဲတီစိမ်း၊ မြေပဲ၊ နှမ်းစသည့်ဆီထွက်သီးနှံများကို နိုဝင်ဘာလဆန်းပိုင်းမှ စတင်ကာ ကြဲပက်စိုက်ပျိုးကြပြီး တစ်လခန့်အကြာတွင် အဖူး၊ အပွင့်လေးများ စတင်ပွင့်ကာ အပွင့်ပွင့်ပြီးနောက် ဆယ့်ငါးရက်အကြာတွင် အသီးများဖြိုင်ဖြိုင်သီးလာကာ ရင့်မှည့်ချိန် ဖေဖော်ဝါရီ လကုန်တွင် ခူးဆွတ်အစေ့ထုတ်ကာ ရောင်းချနိုင်ပြီဖြစ်ကြောင်း လက်ပံကျေးရွာမှ ပဲတီစိမ်းစီးပွားဖြစ် စိုက်ပျိုးသူတောင်သူ ဦးအောင်ကိုမင်း ထံမှသိရသည်။ ယခုနှစ်တွင် ရာသီဥတုကောင်းမွန်ပြီး မိုးရွာသွန်းမှု ကောင်းမွန်ခြင်းကြောင့် ပဲတီစိမ်း စိုက်ခင်းများရှိ အပင်များသန်မာထွားကျိုင်းပြီး အသီးသီးနှုန်းလည်း အထူးကောင်းမွန်ကာ ပဲတီစိမ်းစေ့များ အောင်မြင်ကြောင်း၊ ပဲတီစိမ်းတစ်တင်းလျှင် ၄၀၀၀၀ ကျပ် ထိရောင်းချရ ကြောင်း ပဲတီစိမ်းစိုက်ပျိုးသည့် တောင်သူများအနေဖြင့် ယခုထက် ကောင်းသောစျေးနှုန်း ရရှိရန်မျှော်လင့်နေကြကြောင်း၊ ပဲတီစိမ်းဆွတ်ခူးရာတွင် အလုပ်သမားတစ်ဦး အတွက် တစ်ရက်လျှင် ၄၀၀၀ ကျပ်ပေးရပြီး တစ်ဧက စိုက်ခင်းတစ်ခင်းတွင် အလုပ်သမား ၁၀ ဦး မှ ၁၂ဦးထိငှား၍ ဆွတ်ခူးရကြောင်း၊ ယခုနှစ်တွင် ဆောင်းသီးနှံစိုက်ပျိုးရန် အတွက် မြန်မာ့ လယ်ယာဖွံ့ဖြိုးရေးဘဏ်မှ တစ်ဧကလျှင် ကျပ်တစ်သိန်းခွဲ ထုတ်ချေးပေးထားသဖြင့် တောင်သူများအနေဖြင့် စိုက်ပျိုးစရိတ်ချေးငွေများဖြင့် အဆင်ပြေစွာစိုက်ပျိုးနိုင်ကြကြောင်း ကိုလည်း ခရုံကျေးရွာမှ တောင်သူတစ်ဦးထံမှ သိရကာ ယခုနှစ်ပဲတီစိမ်းများ အထွက်နှုန်း ကောင်းမွန်ခြင်းကြောင့် စိုက်ပျိုးသူများအဆင်ပြေကြကြောင်းသိရသည်။

စားသုံးသူရေးရာဦးစီးဌာန(မွန်ပြည်နယ်)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ ပခုက္ကူခရိုင်ဦးစီးမှူးရုံးမှ  ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်စေရေးအတွက် တိုင်း/ခရိုင်ဦးစီးမှူးတို့၏လမ်းညွှန်မှုဖြင့် ဒုဦးစီးမှူး ဒေါ်မြင့်မြင့်သန်းသည် (၁၆.၁.၂၀၂၂)ရက်နေ့၊ နံနက်(၀၉:၀၀)နာရီအချိန်တွင် ဆိပ်ဖြူမြို့နှင့်(၃)မိုင်ခန့်အကွာအဝေးရှိသော အလုပ်အကိုင်အခွင့်အလမ်း များစွာဖန်တီးပေးလျှက်ရှိပြီး ဘိုးစဉ်ဘောင်ဆက်လုပ်ကိုင်လာခဲ့သော မြန်မာ့ရိုးရာလက်မှုပညာ ဝါးဖြင့်ပြုလုပ်သော စကော၊ စကာ၊ အုပ်ဆောင်းအမျိုးမျိုး ထုတ်လုပ်လျက်ရှိသော တဲကြီးကျေးရွာသို့  သွားရောက်၍ ကွင်းဆင်းလေ့လာခဲ့ပါသည်။

          ဆိပ်ဖြူမြို့သည် မြန်မာနိုင်ငံအလယ်ပိုင်း မကွေးတိုင်းဒေသကြီး၊ ပခုက္ကူခရိုင်အတွင်းတွင် တည်ရှိပြီး မြို့နယ်လူဦးရေနေထိုင်မှုမှာ(၁၁၃၇၈၅)ခန့်နေထိုင်ကြောင်း၊ ပူအိုက်စွတ်စိုသော ရာသီဥတု အနေအထားတွင်ရှိပြီး အရှေ့ဘက်တွင် ချောက်မြို့နယ်၊ အနောက်ဘက်တွင် ဆောမြို့နယ်၊ တောင်ဘက်တွင် စလင်းမြို့နယ်နှင့် မြောက်ဘက်တွင် ပခုက္ကူမြို့နယ်၊ ပေါက်မြို့နယ်တို့နှင့် ထိစပ် လျက်ရှိပြီး မြို့နယ်အနောက်ဘက်ရှိ တောင်တန်းများသည် ပုံတောင်ပုံညာတောင်တန်းများနှင့် ဆက်စပ်လျက်ရှိကြောင်း သိရှိရပါသည်။

          ဆိပ်ဖြူမြို့နယ်သည် စီးပွားရေးအချက်အခြာကျသော ဒေသတစ်ခုဖြစ်ပြီး မြို့နယ်အတွင်းရှိ ဒေသခံပြည်သူလူထုသည် စိုက်ပျိုးရေးလုပ်ငန်းကို အဓိကထား၍ လုပ်ကိုင်ဆောင်ရွက်ကြ ပြီး ကုန်းလမ်းရေလမ်းများဆုံရာ လမ်းမပေါ်တွင် တည်ရှိ၍ လမ်းပန်းဆက်သွယ်ရေး ကောင်းမွန် သော ဒေသဖြစ်ပါကြောင်း၊ ဆိပ်ဖြူမြို့နယ်၏ အဓိကထုတ်ကုန်မှာ ကြက်သွန်နီဖြစ်ပြီး အခြား ထွက်ကုန်များမှာ စပါး၊ မြေပဲ၊ နှမ်း၊ ပဲတီစိမ်း၊ ကုလားပဲ၊ ပဲစဉ်းငုံ၊ စားတော်ပဲတို့ဖြစ်ပါကြောင်း၊ ထွက်ကုန်များသည် အရည်အသွေးကောင်းမွန်၍ ရန်ကုန်တိုင်းဒေသကြီး ဘုရင့်နောင်ပွဲရုံသို့ အများဆုံးတင်ပို့ ရောင်းချရပါကြောင်း၊ မြို့နယ်တွင် စိုက်ပျိုးရေးလုပ်ငန်းအပြင် မွေးမြူရေးများ လည်း လုပ်ကိုင်ကြလျက်ရှိပြီး ကြက်သွန်ကြော်လုပ်ငန်း၊ ပဲကြော်လုပ်ငန်း၊ ပဲကြီးလှော်လုပ်ငန်း၊  မုန့်မျိုးစုံလုပ်ငန်း၊ ချည်ထည်ယက်လုပ်ခြင်းလုပ်ငန်း၊ ဝါးထရံယက်လုပ်ခြင်းလုပ်ငန်း၊ စကောစကာ၊ အုပ်စောင်း အမျိုးမျိုး ယက်လုပ်ခြင်းလုပ်ငန်းနှင့် မုန့်ဟင်းခါးဖတ် ထုတ်လုပ်ခြင်းလုပ်ငန်းများ လုပ်ကိုင်ကြ၍ မြို့နယ်အတွင်းရှိဒေသခံပြည်သူများသည် အလုပ်အကိုင်အခွင့်အလမ်းများစွာ ရရှိကြ ကြောင်း သိရှိရပါသည်။

                    တဲကြီးကျေးရွာသည် အိမ်ခြေ(၂၅၀)ခန့်ရှိပြီး လူဦးရေ(၁၀၀၀)ဝန်းကျင်ခန့် နေထိုင် ကြောင်း၊ ဝါးဖြင့်ပြုလုပ်သော ထုတ်ကုန်များကို ကျေးရွာအတွင်းရှိ အသက်(၁၀)နှစ်ကလေးအရွယ်မှ စ၍ တစ်ရွာလုံး အမျိုးသားအမျိုးသမီးမကျန် ယက်လုပ်တတ်ကြကြောင်း၊ ပစ္စည်းယက်လုပ် ရာတွင် အလုပ်သမားငှားရမ်းခြင်း မပြုလုပ်ရဘဲ အိမ်တိုင်းရှိ မိသားစုဝင်တိုင်း ယက်လုပ်ကြပြီး ထုတ်လုပ်ရောင်းချရာတွင် ချောမွေ့သေသပ်သောကြောင့် တဲကြီး စကော၊ စကာဟုဆိုလျှင် လူတိုင်း သိရှိ၍ ဈေးကွက်အတွင်းတွင်  နာမည်ရရှိပြီး  ဈေးကောင်းရရှိကြောင်း ၊ တစ်ဖက်တစ်လမ်းမှလည်း စိုက်ပျိုး ရေးအနေဖြင့် ကြက်သွန်၊ မြေပဲ၊ နှမ်းနှင့် သီးနှံမျိုးစုံ စိုက်ပျိုးပြီး မွေးမြူရေးအနေဖြင့်လည်း နွား၊ သိုး၊ ဆိတ်များ မွေးမြူလုပ်ကိုင်ကြ၍ ကျေးရွာအတွင်းရှိ ဒေသခံပြည်သူများသည် အလုပ်အကိုင် အခွင့်အလမ်းပေါများပြီး နေ့စဉ်ဝင်ငွေရရှိသောကြောင့် ဖွံ့ဖြိုးတိုးတက်သော ကျေးရွာဖြစ်ကြောင်း သိရှိရပါသည်။

          စိုက်ပျိုးတောင်သူများ၊ အိမ်ရှင်မများ မဖြစ်မနေအသုံးပြုရသော စကော၊ စကာ၊ အုပ်ဆောင်း အမျိုးမျိုး ယက်လုပ်ရာတွင် ကုန်ကြမ်းအဖြစ် ဝါးနှင့်ကြိမ်ကိုအသုံးပြုရပြီး ဝါးကို အဓိကထား သုံးကြောင်း၊ ဆိပ်ဖြူမြို့နှင့်ဆောမြို့အစပ်ရှိ ကန်စွန်းမတောင်ပေါ်မှ ဝါးကို ဝယ်ယူရကြောင်း၊  မြစ်ကြီးနားမြို့မှ ထွက်ရှိသော ကြိမ်ကို မန္တလေးမြို့မှတစ်ဆင့်ဆိပ်ဖြူမြို့ တဲကြီးကျေးရွာအထိ ကားတစ်စီးလုံးအပြတ်ငှားရမ်း၍ ယက်လုပ်သူများစုပေါင်းပြီး ဝယ်ယူသောကြောင့် ဈေးနှုန်းချိုသာ စွာရရှိကြောင်း၊ (၆)ပေ (၁၀)ချောင်းပါတစ်စည်းကို (၁၇၀၀)ကျပ် ဝယ်ယူရ၍ တစ်ချောင်းလျှင် (၁၇၀) ကျပ် ဈေးနှုန်းရှိကြောင်း သိရှိရပါသည်။ အဓိကကုန်ကြမ်းဖြစ်သော ဝါးကို ဝယ်ယူရာတွင် ဝါး ကုန်သည်များက တောင်ပေါ်မှ ကျေးရွာအထိ ကားဖြင့် လာရောက် ရောင်းချပေးကြောင်း၊ ကားတစ်စီးလုံးအပြည့် တင်ဆောင်လာပြီး ခွဲဝေယူကြကြောင်း၊ ဝါးတစ်လုံးလျှင် (၆၅၀)ကျပ် ပေးဝယ်ရကြောင်း၊ ကုန်ကြမ်းဖြစ်သော ဝါး၊ ကြိမ်တို့ကို ဝယ်ယူရာတွင် ပစ္စည်းပေါများ၍ ထုတ်လုပ်မှု ပြုလုပ်ရာတွင် အဆင်ပြေကြောင်းသိရှိရပါသည်။

          ပစ္စည်းထုတ်လုပ်မှုမှာ စကော၊ အုပ်ဆောင်း အကြီးအလတ်အသေးနှင့် စကာကို အစိပ်အကျဲ လိုက်၍ အမျိုးမျိုးကွဲပြားထုတ်လုပ်ကြောင်း၊ ဆိုဒ်ကြီးများကို ဝယ်ယူလိုပါက ကြိုတင်မှာယူမှသာ ယက်လုပ်ပေးကြောင်း၊ ယက်လုပ်ရာတွင်လည်း တောင်သူများ၊ အိမ်ရှင်မများအသုံးပြုသော ဆန်ချ စကာ၊ ဆန်ကွဲချစကာ၊ သီးနှံမျိုးစုံချစကာ၊ သဲချစကာ၊ မြေပဲဆံနှင့်အခြမ်းအသေးချစကာ အမျိုးမျိုး ယက်လုပ်ကြကြောင်း၊ အုပ်ဆောင်းများမှာလည်း ထမင်းစားပွဲ၊ ရေအိုးများတွင်ဖုံးအုပ်ရန် အရွယ် အစားအမျိုးမျိုးထုတ်လုပ်လျက်ရှိကြောင်း သိရှိရပါသည်။ ပစ္စည်းထုတ်လုပ်ရာတွင် လူတစ်ဦးလျှင် တစ်နေ့ဝါးတစ်လုံးခွဲစိပ်အချောသပ်ပြီး ယက်လုပ်ရာတွင် စကော၊ စကာ ပျမ်းမျှသုံးချပ်ခန့် ရရှိ ကြောင်း၊ တစ်လလျှင် ဝါးအလုံး(၃၀)ခန့်ပြီးစီးအောင် ယက်လုပ်နိုင်ကြကြောင်း၊ (၁၀)နှစ်ကလေးမှ စ၍ ယက်လုပ်တတ်သောကြောင့် ကျေးရွာအတွင်းရှိ အိမ်တိုင်း မိသားစုဝင် များလျှင်များသလို ပစ္စည်းများများ ထုတ်လုပ်ပြီးစီးနိုင်၍ နေ့စဉ်ဝင်ငွေ ရရှိလျက်ရှိကြောင်း သိရှိရပါသည်။

          ရောင်းချရသည့် ဈေးနှုန်းများအနေဖြင့် စကော၊ စကာအကြီး တစ်ချပ်လျှင် ယခင်နှစ် (၂၇၀၀) ကျပ်၊ ယခုနှစ်(၂၃၀၀)ကျပ်၊ အလတ်တစ်ချပ်လျှင် ယခင်နှစ် (၁၈၀၀) ကျပ်၊ ယခုနှစ်(၁၅၀၀)ကျပ်၊ အသေးတစ်ချပ်လျှင် ယခင်နှစ် (၁၂၀၀)ကျပ်၊ ယခုနှစ်(၁၀၀၀)ကျပ် ရောင်းချရပါကြောင်း၊ ယခင်နှစ် ထက်ယခုနှစ် ရောင်းဈေးနှုန်းများ ကျဆင်းသွားရခြင်း အကြောင်းမှာ ရောင်းဝယ်ဖောက်ကားမှု ပြုလုပ်ရာတွင် မိမိတို့ပြည်တွင်း၌ ကိုဗစ် ၁၉ ရောဂါကူးစက်ပြန့်ပွားနေမှုကြောင့် သယ်ယူပို့ဆောင် ရေး အခက်အခဲများနှင့်ကြုံတွေ့ရခြင်း၊ ဒေသတွင်းဈေးကွက်များ၌ ဝယ်လိုအားကျဆင်းနေခြင်းတို့

ကြောင့် အရောင်းအဝယ်မဖြစ်ဘဲ ပစ္စည်းဈေးနှုန်းများ ကျဆင်း၍ လုပ်ငန်းရှင်များ နေ့စဉ်ဝင်ငွေရရှိမှု နည်းသွားကြောင်းသိရှိရပါသည်။ လူတစ်ဦး စကော၊ စကာတစ်ချပ်ထုတ်လုပ်ရာတွင် ဝါး၊ ကြိမ် ဝယ်ယူခနှင့် ကိုယ်တိုင် ယက်လုပ်ကြ၍ အလုပ်သမားငှားရမ်းခမပါခြင်း၊ ဝယ်ယူရသောကုန်ကြမ်း ပစ္စည်းမှာ ပစ္စည်းပေါများပြီး ဈေးနှုန်း သင့်တင့်မျှတမှုရှိ၍ ကုန်ကျငွေမှာ (၅၀၀)ကျပ်ဝန်းကျင်ခန့် ရှိကြောင်း၊ ယခုနှစ်တွင် (၁၅၀၀)ကျပ် ဈေးနှုန်းခန့် ရောင်းချရပါသောကြောင့် တစ်ချပ်လျှင်(၁၀၀၀) ဝန်းကျင်ခန့် အကျိုးအမြတ်ရရှိကြောင်း၊ တစ်နေကုန် စကော၊ စကာ ယက်လုပ်ပါက စကော၊ စကာ (၃)ချပ်ခန့် ယက်လုပ်နိုင်ကြောင်း သိရှိရပါသည်။

          ဈေးကွက်အနေဖြင့် ဆိပ်ဖြူမြို့နယ် တဲကြီးကျေးရွာမှထွက်ရှိသော စကော၊ စကာ၊ အုပ်ဆောင်း အမျိုးမျိုးတို့ကို ဆိပ်ဖြူမြို့နယ် နေရာဒေသအနှံ့အပြားနှင့် မကွေးတိုင်းဒေသကြီး အတွင်းရှိ ချောက်၊ ကျောက်ပန်းတောင်း၊ မကွေး၊ ဆင်ဖြူ ကျွန်း၊ စလင်း၊ စလေ၊ တောင်တွင်းကြီး၊ နတ်မောက်၊ သရက်၊ မင်းဘူး၊ အောင်လံမြို့တို့ဖြစ်ပြီး ထုတ်ကုန် အများဆုံးကို အောင်လံမြို့သို့ အဓိကထား၍ ရောင်းချဖြန့်ဖြူးလျက်ရှိသည့်အပြင် (၁၂)လ ရာသီဘုရားပွဲတော် ဈေးများဖြစ်သော ဆိပ်ဖြူမြို့ မြောက်ယမကျေးရွာရှိ အလိုတော်ပေါက်ဘုရား ပွဲတော်၊ မန္တလေးတိုင်းဒေသကြီး ညောင်ဦးခရိုင်အတွင်းရှိ ပုဂံအာနန္ဒာဘုရားပွဲတော်၊ တညောင် ဘုရားပွဲတော်၊ စလေ သေခဲလှဘုရား ပွဲတော်၊ မကွေးမြသလွန်ဘုရားပွဲတော်အချိန်များတွင်လည်း သွားရောက်ပြီး ရောင်းချခြင်း၊ ဈေးသည်အချင်းချင်း ပစ္စည်းများ ဖလှယ်ခြင်းများပြုလုပ်ကြပါ ကြောင်း၊ နှစ်စဉ်မြို့နယ် အတွင်းရှိ နီးစပ်ရာဒေသများသို့လည်း ဆိုင်ကယ်များဖြင့် လှည့်လည် ရောင်းချခြင်းရှိ၍ နှစ်စဉ် မိမိတို့ ယက်လုပ်ပြီးသော ထုတ်ကုန်ပစ္စည်းများမှာ ယခင်နှစ်များတွင် လက်ကျန်မရှိ ရောင်းချခဲ့ရပါ သော်လည်း ယခု(၂)နှစ်အတွင်းတွင် သယ်ယူပို့ဆောင်ရေး ခက်ခဲမှု ကြောင့် ဝယ်လိုအား နည်းသွား၍ ထုတ်ကုန်ပစ္စည်းလက်ကျန်များကြောင်း၊ ရောင်းမကုန်၍ ကျန်ရှိ သောပစ္စည်းများကို  မိမိတို့အိမ်တွင် ထိန်းသိမ်းထားရှိရကြောင်း၊ တဲကြီးကျေးရွာဒေသတွင်းရှိ လုပ်ငန်းရှင်များအနေဖြင့် လမ်းပန်း ဆက်သွယ်ရေး ကောင်းမွန်လာပြီး ဘုရားပွဲတော်ဈေး (၁၂ ပွဲဈေး) များ ပြန်လည်ဖွင့်လှစ်လာပါက ထုတ်လုပ်သော ပစ္စည်းများ လက်ကျန်မရှိအောင် ရောင်းအားကောင်း၍ ဝင်ငွေပိုမိုရရှိလာမည် ဖြစ်ပြီး အလုပ်အကိုင်အခွင့်အလမ်းများလည်း ပေါများ၍ ပြည်တွင်း ကုန်သွယ်မှုကဏ္ဍ ပိုမိုဖွံ့ဖြိုး တိုးတက်လာမည်ဟု မျှော်လင့်နေကြပါကြောင်း သတင်းရရှိပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

သန်လျင်မြို့၊ ဇန်နဝါရီလ ( ၁၉ ) ရက်

          စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးအနေဖြင့် မိမိနိုင်ငံအတွင်း စားသုံးသူများအခွင့်အရေး(၈)ရပ်ကို ရရှိရေးအတွက် ဆောင်ရွက်ပေးနေသကဲ့သို့ တစ်ဖက်တွင်လည်း ပြည်တွင်းကုန်သွယ်မြှင့်တင်မှုဆိုင်ရာလုပ်ငန်းများအား ဒေသခံတောင်သူများ အကျိုးစီးပွားအတွက် သက်ဆိုင်ရာအသင်းအဖွဲ့၊ ဌာနများနှင့် ပေါင်းစပ်ညှိနှိုင်းဆောင်ရွက်ပေးလျက်ရှိပါသည်။ ရန်ကုန် တောင်ပိုင်းခရိုင် ကော့မှူးမြို့နယ်အတွင်းရှိ ကျေးရွာတချို့တွင် မိုးစပါးများရိတ်သိမ်းပြီးနောက် ဇန်နဝါရီလမှ စတင်၍ မှိုအနည်းငယ်စိုက်ပျိုးခဲ့ပြီး ထွက်ရှိနေပြီဖြစ်ကြောင်း၊ ကောက်ရိုးမှို၊ ဗေဒါမှို၊ ငွေနှင်းမှိုအမျိုးအစားများစိုက်ပျိုးလျက်ရှိကြောင်း မှိုစိုက်တောင်သူများထံမှ သိရှိရပါသည်။

          ကော့မှူးမြို့နယ်အတွင်း စတင်စိုက်ပျိုး ထွက်ရှိနေသည့် ကျေးရွာများမှာ နတ်စင်ကုန်း၊ ရွာတန်းရှည်၊ မဝန်း၊ မကျည်းကန်၊ ကြာကန်၊ ဘို့ဒင်၊ ကျူတောချောင်ကျေးရွာများဖြစ်ပြီး၊ မှိုမျိုးစေ့ ထုတ်လုပ်ဖြန့်ဖြူးသည့် လုပ်ငန်းရှင် (၇)ဦးသည် မှိုစိုက်တောင်သူများထံမှ မှိုအမျိုးအစား၊ အရွယ် အစားပေါ် မူတည်၍ ကောက်ရိုးမှိုတစ်ပိဿာလျှင် လက်ရှိဒိုင်ကောက်ဈေး (၅၀၀၀/ ၅၅၀၀) ကျပ်၊ ဗေဒါမှိုတစ်ပိဿာ (၄၅၀၀/၅၀၀၀)ကျပ်၊ ငွေနှင်းမှို တစ်ပိဿာ (၃၀၀၀/၃၅၀၀)ကျပ် ဈေးနှုန်းဖြင့် ဝယ်ယူကာရန်ကုန်မြို့ရှိသီရိမင်္ဂလာဈေး၊ ဒညင်းကုန်းဈေးများသို့တဆင့် ပြန်လည် ဖြန့်ဖြူးရောင်းချ လျက်ရှိပြီး အရောင်းအဝယ်ဖြစ်ထွန်းလျက်ရှိကြောင်း မှိုမျိုးစေ့ထုတ်လုပ်ဖြန့်ဖြူးသည့် လုပ်ငန်းရှင်များထံမှ သိရှိရသည်။

စားသုံးသူရေးရာဦးစီးဌာန(ရန်ကုန်တိုင်းဒေသကြီး)