ပြည်တွင်းကုန်သွယ်မှုသတင်း

            ပဲခူးတိုင်းဒေသကြီး၊ ပြည်ခရိုင်အတွင်းရှိ စားသုံးသူရေးရာဦးစီးဌာနမှ ရွှေတောင်မြို့နယ် တာဝန်ခံဦးအောင်နိုင်ဦးနှင့် အဖွဲ့သည် (၁၉.၁.၂၀၂၂)နေ့လည် (၁:၃၀)နာရီတွင် ရွှေတောင်မြို့နယ် ကွင်းယားကြီးအုပ်စုသို့ သွားရောက်၍ ဆောင်းမြေပဲစိုက်ပျိုးထုတ်လုပ်မှု၊ စျေးနှုန်းစျေးကွက် အခြေအနေများအား ကွင်းဆင်းလေ့လာခဲ့ပါသည်။

          ပြည်ခရိုင်အနေဖြင့် ၂၀၂၁-၂၀၂၂ ခုနှစ်တွင် ဆောင်းမြေပဲစိုက်ဧကမှာ ၄၂၇၄၉ ဧက စိုက်ပျိုး၍ ယနေ့အထိ ၄၆၀၃ ဧကခန့်နှုတ်သိမ်းပြီး တစ်ဧကလျှင် ၆၃တင်းခန့် ထွက်ရှိပါသည်။ ရွှေတောင်မြို့နယ်အနေဖြင့် ဆောင်းမြေပဲကို ၁၄၂၄၀ ဧကခန့် စိုက်ပျိုးပြီးဖြစ်ပါသည်။ ရွှေတောင်မြို့နယ်၊ ကွင်းယားကြီးအုပ်စုတွင် ဆောင်းမြေပဲကို ၆၆၈ ဧကစိုက်ပျိုးပြီး အထွက်နှုန်းအနေဖြင့် တစ်ဧကလျှင် ၆၅ တင်းခန့်ထွက်ရှိပါသည်။ ယခင်နှစ်တွင် တစ်ဧကလျှင် ၅၅ တင်းခန့်ထွက်ရှိသဖြင့် ယခုနှစ်မှာ အထွက်နှုန်းပိုလာကြောင်းသိရပါသည်။

          မြေပဲတစ်ဧကစိုက်ပျိုးထုတ်လုပ်ကုန်ကျစရိတ်အနေဖြင့် တစ်ဧကလျှင် ၄သိန်း ၅သိန်း ကျပ် ခန့် ကုန်ကျသော်လည်း အထွက်နှုန်းပိုလာသဖြင့် မြေပဲစိုက်တောင်သူများ တွက်ခြေကိုက်သောနှစ် ဖြစ်ပါသည်။ ယခုနှစ် ဇန်နဝါရီလအတွင်း မြေပဲဆန်စျေးများမှာ ဆီဆန် တစ်ပိဿာလျှင် ၂၈၀၀ ကျပ်၊ လုံးဆန် တစ်ပိဿာလျှင် ၃၀၀၀ ကျပ်နှင့် မြေပဲအခွံပါ အတောင့်တစ်တင်းလျှင် ၁၁၀၀၀ကျပ် စျေးဖြင့်ရောင်းဝယ်လျက်ရှိပါသည်။ ရွှေတောင်ဒေသထွက်မြေပဲဆန်များကို ဒေသတွင်းပွဲရုံများနှင့် ဆီစက်လုပ်ငန်းရှင်များက အဝယ်ရှိသလို ပြည်စျေးကွက်သို့လည်း နေ့စဉ်တင်ပို့ရောင်းချလျှက် ရှိပါသည်။ မြေပဲစိုက်တောင်သူများအနေဖြင့် ရာသီဥတုကောင်း၍ အထွက်နှုန်းပိုလာခြင်း၊ စျေးကောင်းများရရှိပြီး ကုန်ထုတ်လမ်းများ အခက်အခဲမရှိသွားလာနိုင်ခြင်းတို့ကြောင့် ပိုမိုတွက်ခြေကိုက်သဖြင့် နောက်လာမည့်နှစ်များလည်း မြေပဲကိုပိုမိုတိုးချဲ့စိုက်ပျိုးသွားမည်ဖြစ်ကြောင်း သိရှိရပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

             စားသုံးသူရေးရာဦးစီးဌာန၊ မိတ္ထီလာခရိုင်၊ မလှိုင်မြို့နယ် တာဝန်ခံဦးရဲမြင့်ဆန်းသည် (၁၉.၁.၂၀၂၂) ရက်နေ့ နံနက် (၁၀) နာရီ အချိန်၌ ရေကမိုးကျေးရွာ တောင်သူ ဦးအောင်ရွှေ ထော၊ပတ်ပဲ စိုက်ဧက (၃) ဧက စိုက်ပျိုးသူနှင့် တွေ့ဆုံပြီး တစ်ဧက ကုန်ကျစရိတ်၊ အကျိုးအမြတ်ရရှိမှုများအား တွေ့ဆုံမေးမြန်းခဲ့ ပါသည်။

            မလှိုင်မြို့နယ် တွင် ထောပတ်ပဲကို မိုးနှမ်းရိတ်သိမ်းပြီး ၊သြဂုတ်၊ စက်တင်ဘာလမှာ စတင်စိုက်ပျိုး၍ ဒီဇင်ဘာ၊ ဇန်နဝါရီတွင် ရိတ်သိမ်းထွက်ရှိကြောင်း ထောပတ်ပဲကို သီးညှပ်မစိုက်ဘဲ သီးသန့်စိုက်ပျိုးကြောင်း၊ ယခုနှစ်(၂၀၂၀-၂၀၂၁)ခုနှစ်တွင်ထောပတ်ပဲစိုက်ဧက ၃၇၉၉ ဧကရှိပြီး တစ်ဧကအထွက်နှုန်းမှာ(၅)တင်းဝန်းကျင် ထွက်ရှိကြောင်း၊ မြေပြင်ခြင်း၊ စိုက်ပျိုးခြင်းနှင့်ရိတ်သိမ်းခြင်းမှာ တစ်ဧက (၉၅၀၀၀) ကျပ်ဝန်းကျင်၊ သွင်းအားစု မှာ မျိုးအနေဖြင့် (၆)ပြည်သုံးပြီး၊ ကွန်ပေါင်း၊ ပိုးသတ်ဆေး၊နွားချေးတို့မှာ (၄၆၀၀၀) ကျပ်ဝန်းကျင်ကုန်ကျ ကြောင်း၊ စုစုပေါင်း တစ်ဧက ကုန်ကျစရိတ်မှာ (၁၄၀၀၀၀)ကျပ် ဝန်းကျင်ရှိပြီး တစ်တင်းရောင်းစျေးမှာ ယခု အပတ်စျေး (၄၁၀၀၀)ကျပ် ရရှိပြီး၊ တစ်ဧကအကျိုးအမြတ်အနေဖြင့် (၆၅၀၀၀)ကျပ်ရရှိကြောင်း၊  ယခင်နှစ် ရာသီဥတုအခြေအနေအရ အထွက်နှုန်းနည်းသလို တစ်တင်းရောင်းစျေးမှာလည်း (၂၈၀၀၀)ကျပ်ဖြင့် ရောင်းချခဲ့ ရတဲ့အတွက်အကျိုးအမြတ်မရရှိဘဲယခုနှစ်တွင်အထွက်နှုန်း၊ စျေးနှုန်းအသင့်အတင့်ကောင်းမွန်သောကြောင့် အကျိုးအမြတ်ရရှိကြောင်း သိရှိရပါသည်။

DOCA(မန္တလေး)

           မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ် ဧက(၃၅၀)ခန့်ကျယ်ဝန်းသည့် ဝက်သည်းကန် အတွင်း သဘာဝအလျှောက် ပေါက်ရောက်နေသည့် ပဒုမ္မာကြာတောကြီးမှ ကန်ပတ်လည်ကျေးရွာများ ဖြစ်သည့် ရှမ်းရွာကုန်းကျေးရွာ၊ အနောက်ကန်ဘောင်ကျေးရွာ၊ အောက်လှိုင်းကျေးရွာ၊ တမာချောင်းကျေးရွာ၊ ဆင်ကျုံးကျေးရွာနှင့် နယ်နမိတ်ထိစပ်လျက်ရှိသည့် ဒေသခံပြည်သူများ ကြာချည်အိမ်ထုတ်လုပ်သည့် လုပ်ငန်းဖြင့် ဝင်ငွေများ ရရှိနေကြောင်း သိရှိရပါသည်။

            အခုလို ကြာချည်ထုတ်လုပ်နိုင်ရန်အတွက် ကန်အတွင်းပေါက်ရောက်နေသည့် လေးပေအရှည် ပဒုမ္မာကြာရိုးများကို လှေပေါ်မှတစဉ်ဖြင့်ချိတ်ယူခူးဖြတ်ပြီး သုံးလက်မခန့်အပိုင်းများပိုင်းကာ ကြာရိုးမှ ထွက်ရှိလာသည့်အစေးများကို သစ်သားခုံပေါ်တင်၍ လက်ဖြင့်လိမ့်ကျစ်ပြီး ကြာချည်မျှင်ထုတ်လုပ်ရပါ ကြောင်း၊ စလင်းဝက်သည်းကန်မှ ထုတ်လုပ်သည့် ကြာချည်မှာကုန်ကြမ်းအဆင့်သာဖြစ်ပြီး ကြာရိုးမှ ထွက်ရှိသည့် ကြာချည်များကို ရှမ်းပြည်နယ်တောင်ပိုင်း၊ အင်းလေးဒေသသို့ တင်ပို့ရောင်းချပြီး ဈေးနှုန်းအနေနဲ့ ယခင်နှစ်က တစ်ကျပ်သားကို (3000)ကျပ်ထိ ရောင်းချခဲ့ရသော်လည်း ယခုနှစ်တွင် တစ်ကျပ်သားကို (2700)ကျပ်ဈေးသာရရှိကြောင်း၊ တစ်ရက်လျှင် တစ်ဦးကို (2-3)ကျပ်သားထိ လုပ်ဆောင်သည့်အတွက် လုပ်သားတစ်ဦးအနေနဲ့ တစ်ရက်ပျှမ်းမျှ(6000-7000)ကျပ် ဝန်းကျင်ဝင်ငွေရရှိကြောင်း သိရှိရပြီး တချို့အိမ်ထောင်စုများအနေဖြင့် (5-6)ကျပ်သားထိ လုပ်ဆောင်နိုင်သည့်အတွက် တစ်ရက်လျှင် (14000-15000)ကျပ်ထိ ပျှမ်းမျှဝင်ငွေ ရရှိကြောင်း သိရှိရပါသည်။ 

         စလင်းဒေသမှတင်ပို့ရောင်းချသည့် ကြာချည်ကုန်ကြမ်းများကို ကုန်ချောအဖြစ် ကြာတဘတ်၊ ကြာလွယ်အိတ်၊ ကြာပုဆိုး၊ ကြာအင်္ကျီ၊  ကြာသင်္ကန်း ထုတ်လုပ်ရာတွင် အသုံးပြုနိုင်ပြီး ကြာချည်မှ ထုတ်လုပ်သည့် ကြာသင်္ကန်းမှာ ရဟန်းတော်များအတွက် ရာသီဥတုနှင့်အထူးသင့်လျှော်သည့်အတွက် ဈေးကြီးမြင့်ကြောင်း၊ ကြာရွက်များကိုလည်းခူး၍ ထုတ်ပိုးရန်ရောင်းချရသေးကြောင်း၊ ရွက်ရေ(၂၅)ကို ငွေကျပ် (၁၀၀)နှုန်းဖြင့် ရောင်းချရကြောင်း သိရပါသည်။ရှေးယခင်က အစားအသောက်များကို အင်ဖက်၊ ကြာဖက်များဖြင့် ထုတ်ပိုး၍ ရောင်းချ ခဲ့သည့်အတွက် သဘာဝပတ်ဝန်းကျင်ထိခိုက်မှု မရှိခဲ့သော်လည်း နည်းပညာတိုးတက်လာ၍ ပလပ်စတစ်များကို အစားထိုးသုံးစွဲလာရာ သဘာဝပတ်ဝန်းကျင် ညစ်ညမ်းမှု များဖြစ်ပေါ်လာရသည့်အတွက် ယခုအခါ သဘာဝပစ္စည်းများဖြင့် ပြန်လည်အသုံးပြုလာရာ စလင်း ဝက်သည်းကန်မှထွက်ရှိသည့် ကြာဖက်များ သည်လည်းသဘာဝပတ်ဝန်းကျင်ထိန်းသိမ်းရေးကို တစ်ဖက် တစ်လမ်းမှ အထောက်အကူပြုလျှက်ရှိကြောင်း သိရှိရပါသည်။

         ကြာချည်ထုတ်လုပ်ရန် ကုန်ကြမ်းကြာရိုးအနေဖြင့် တစ်နှစ်ပတ်လုံးပြတ်လပ်မှုမရှိသော်လည်း နွေနှင့်ဆောင်းတွင် ကြာစေးထွက်နည်းပြီး မိုးတွင်းကာလတွင် ကန်ရေပြည့်၍ ကြာစေးအထွက်ကောင်း ကြောင်း၊ဝက်သည်ကန်ကိုမှီ၍ လှေပေါ်မှရေလုပ်ငန်းဖြင့် အသက်မွေးရသော်လည်း ကြာချည်ထုတ် လုပ်ငန်းမှာ ရဟန်းသံဃာများအတွက် ကြာသင်္ကန်းများယက်လုပ်ရန် ထုတ်လုပ်ရသည့် လုပ်ငန်းဖြစ်၍ ကုသိုလ်ရ ဝင်ငွေတိုးသည့် အသက်မွေးဝမ်းကြောင်း လုပ်ငန်းတစ်ခုဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)

          ပဲခူးတိုင်းဒေသကြီး၊ ပြည်ခရိုင်အတွင်းရှိ စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံ ဒေါ်သန်းသန်းအေးနှင့် အဖွဲ့သည် (၁၂.၁.၂၀၂၂)နေ့လည် (၂:၀၀)အချိန်တွင် ပန်းတောင်း မြို့၊ မင်းရပ်ရပ်ကွက်ရှိ ခရမ်းချဉ်စိုက်ပျိုးသော တောင်သူ ဦးအောင်မြင့်သန်း၏ ခရမ်းချဉ်စိုက်ကွင်းသို့ သွားရောက် ကွင်းဆင်းလေ့လာခဲ့ပါသည်။

          ထိုသို့သွားရောက်လေ့လာရာတွင် ခရမ်းချဉ်ပင်ကို သောင်ပြင်မြေနုကျွန်းများတွင် (၃)ဧက စိုက်ပျိုးထားပြီး စိုက်ပျိုးသည့်မျိုးများမှာ ထိုင်ဝမ်မျိုးနှင့် ကိုင်းခရမ်းချဉ်မျိုးတို့ဖြစ်ပါသည်။ တစ်ဧက လျှင် ခရမ်းချဉ်အပင် (၇၀၀၀)ခန့်စိုက်ပျိုးနိုင်ပြီး တစ်ပင်လျှင် အသီး (၃/၄) ပိဿာခန့်အထိ ထွက်ရှိ ကြောင်းသိရှိရပါသည်။  ခရမ်းချဉ်စိုက်ခင်းထဲတွင် ကြားညှပ်၍ မြွေစွယ်ငရုပ်သီးများ ကိုလည်း စိုက်ပျိုးထားကြောင်းသိရပါသည်။

          ခရမ်းချဉ်သီးကို စက်တင်ဘာလ စတုတ္ထပတ် မြစ်ရေကျချိန် သဲသောင်ပြင်များ ပေါ်တွင် စတင်စိုက်ပျိုးပြီး ဒီဇင်ဘာလကုန်နှင့် ဇန်နဝါရီလဆန်းပိုင်းတွင် စတင်ထွက်ပေါ်ပါသည်။ ခရမ်းချဉ်သီး  စျေးများမှာ ပေါ်ခါစတွင် အထွက်နည်းပြီး ဝယ်ယူစားသုံးမှုများသဖြင့် တစ်ပိဿာလျှင် ၂၈၀၀ကျပ်အထိ စျေးမြင့်ခဲ့ပြီး ယခုခရမ်းချဉ် အထွက်လှိုင်ချိန်ဖြစ်သဖြင့် စျေးမှာ တစ်ပိဿာလျှင် (၁၀၀၀)ကျပ်အထိကျဆင်းလာပါသည်။

          ပန်းတောင်းမြို့ရှိ ခရမ်းချဉ်သီးစျေးကွက်အနေဖြင့် ပန်းတောင်းစျေးသို့ သွားရောက် ရောင်းချ ကြပြီး စိုက်ခင်းထဲသို့လည်း ရွှေတောင်ဘက်မှ ခရမ်းချဉ်ကုန်သည်များ လာရောက်ဝယ်ယူ လျှက်ရှိကြောင်းသိရပါသည်။ ယခုနှစ်၌ ခရမ်းချဉ်သီးစျေးကောင်းရသလို နောင်လမည့်နှစ်များတွင် လည်း ခရမ်းချဉ်သီးကို စောစောစိုက်ပျိုးနိုင်မည်ဆိုလျှင် စျေးကောင်းရပြီး အကျိုးအမြတ်များ ဖြစ်ထွန်းမည်ဖြစ်ကြောင်း သိရှိရပါသည်။

စားသုံးသူရေးရာဦးစီးဌာန

ပြည်ခရိုင်

          ယင်းမာပင်ခရိုင်သည်  ပဲမျိုးစုံနှင့်ဆီထွက်သီးနှံများ အဓိက စိုက်ပျိုးထုတ်လုပ်သည့် ခရိုင်တစ်ခု ဖြစ်ပါသည်။ နှစ်စဉ်ပဲမျိုးစုံ စိုက်ဧက (၃)သိန်းကျော်နှင့် ဆီထွက်သီးနှံစိုက်ဧက (၄)သိန်းခန့် စိုက်ပျိုးထွက်ရှိကြောင်း သက်ဆိုင်ရာဌာနများ၏ စာရင်းဇယားအရ သိရှိရပါသည်။ ဆီထွက်သီးနှံများ အနက် နှမ်း၊ မြေပဲနှင့် နေကြာသီးနှံများကို အဓိက စိုက်ပျိးကြပြီး နေကြာသီးနှံမှာ ဆီထွက်သီးနှံ စုစုပေါင်း စိုက်ဧက၏( ၂၀%) ကျော်ခန့်ရှိကြောင်း လေ့လာသိရှိရပါသည်။

         ယင်းမာပင်ခရိုင်အတွင်းရှိ မြို့နယ်(၄)မြို့နယ်၌ နေကြာသီးနှံစိုက်ဧက (၉)သောင်းကျော် စိုက်ပျိုးထွက်ရှိပြီး မိုးနေကြာနှင့် ဆောင်းနေကြာဟူ၍ စိုက်ပျိုးကြောင်းသိရှိရပါသည်။ မိုးနေကြာကို မေ၊ ဇွန်လများတွင်လည်းကောင်း၊ ဆောင်းနေကြာကို စက်တင်ဘာလ၊အောက်တိုဘာလများတွင် လည်းကောင်း စိုက်ပျိုးကြကြောင်း ၊ဒေသမျိုးများနှင့် ရေဆင်း (၁)၊(၂) မျိုးများကို အဓိကစိုက်ပျိုးကြပြီး နေကြာသီးသန့်စိုက်ခင်းအဖြစ်လည်းကောင်း၊ ကုလားပဲ၊မြေပဲ စိုက်ခင်းများ၌ သီးညှပ်အဖြစ်လည်းကောင်း စိုက်ပျိုးလေ့ရှိကြောင်း ဒေသခံတောင်သူများထံမှ သိရှိရပါသည်။ ယခုနှစ်တွင် မိုးနေကြာစိုက် ဧက(၈)သောင်းကျော် စိုက်ပျိုးထားရှိပြီး ဒီဇင်ဘာလကုန်ပတ်မှစ၍ ဆောင်းနေကြာများ ရိတ်သိမ်းလျက်ရှိကြောင်း သိရှိရသည်။

       နေကြာသီးနှံသည် စိုက်ပျိုးရလွယ်ကူခြင်း၊ ဒေသ၏ ရေ၊မြေ၊ရာသီဥတုနှင့် ကိုက်ညီခြင်း၊စိုက်ပျိုးထုတ်လုပ်မှု ကုန်ကျစရိတ်သက်သာခြင်းနှင့် ဒေသတွင်း ဈေးကွက်ဝယ်လိုအားရှိခြင်းများကြောင့် တောင်သူများ နှစ်စဉ်ပုံမှန် စိုက်ပျိုးလျက်ရှိကြောင်း သိရှိရပါသည်။ ယခုနှစ်နေကြာတစ်ဧက စိုက်ပျိုး ထုတ်လုပ်မှုကုန်ကျစရိတ် ကျပ်(၂)သိန်း ဝန်းကျင်ကုန်ကျပြီး တစ်ဧက တင်း(၂၀) ဝန်းကျင်ထွက်ရှိကြောင်း၊ လက်ရှိဈေးကွက်အတွင်း နေကြာတစ်တင်း ကျပ်(၂)သောင်း  ပေါက်ဈေးရှိနေသည့်အတွက် တစ်ဧက ကျပ်(၂)သိန်းကျော်ခန့် အကျိုးအမြတ်ရှိကြောင်း ငမောင်းကျေးရွာတောင်သူ ဦးရွှေဝင်း၏ ပြောပြချက်အရ သိရှိရပါသည်။

      ယခုနှစ် စိုက်ပျိုးထွက်ရှိသည့် နေကြာသီးနှံသည် ရာသီဥတုကောင်းမွန်မျှတသည့်အတွက် အထွက်နှုန်း ကောင်းမွန်သလို ဆီထွက်နှုန်းလည်းကောင်းမွန်ကြောင်း၊ နေကြာတစ်တင်းကို ဆီကြိတ်ခွဲပါက နေကြာဆီ (၃.၅) ပိဿာနှင့် နေကြာဖတ် (၆) ပိဿာခန့် ထွက်ရှိကြောင်း၊ ဈေးကွက်အတွင်း၌ နေကြာဆီတစ်ပိဿာကို (၆၀၀၀) ကျပ်နှင့် နေကြာဖတ် တစ်ပိဿာကို (၈၉၀) ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခင်နှစ်ကာလတူနှင့် နှိုင်းယှဉ်ပါက နေကြာဆီ တစ်ပိဿာလျှင် (၅၀၀) ကျပ်မြင့်တက်ခဲ့ပြီး နေကြာဖတ်တစ်ပိဿာလျှင် (၂၀၀) ကျပ်မြင့်တက်ခဲ့ကြောင်း၊ ဒေသတွင်း ဆီစက်များနှင့် နေကြာစေ့လှော်လုပ်ငန်းရှင်များမှ ပုံမှန်ဝယ်ယူလျက်ရှိကြောင်း   ရွှေလှေကျေးရွာရှိ  ရွှေအိုးစည်ဆီစက်ပိုင်ရှင် ဦးဖိုးလုံး၏ ပြောပြချက်အရ သိရှိရပါသည်။

        ဒေသတွင်းစားသုံးဆီဈေးကွက်၌လည်း စားသုံးဆီများ ဈေးနှုန်းကွာဟမှု နည်းပါး လာခြင်းများကြောင့် ကျန်းမာရေးနှင့် ညီညွှတ်သည့် နေကြာဆီများကို ဝယ်ယူသုံးစွဲမှု ပိုမိုများပြားလာကြောင်း သိရှိရပါသည်။ဒေသတွင်း ဆီစက်လုပ်ငန်းရှင်များအနေဖြင့်လည်း  နဝလီ ကြိတ်ခွဲခြင်းဆီနေကြာများကို ဝယ်ယူကြိတ်ခွဲပြီး ထွက်ရှိလာသည့် နေကြာဆီများကို ဒေသတွင်း ဈေးကွက်နှင့် မုံ၇ွာ၊ မန္တလေးနှင့် ရန်ကုန်မြို့ကြီးများသို့ တင်ပို့ရောင်းချလျှက်ရှိကြောင်း သိရှိရပါသည်။

        နေကြာသီးနှံသည် တောင်သူများအတွက် စိုက်ပျိုးထုတ်လုပ်မှုကုန်ကျစရိတ်သက်သာပြီး ထိုက်သင့်သည့် အကျိုးအ မြတ်ရရှိကြောင်း၊ ယနေ့ခေတ်ကာလတွင် စားသုံးသူများအနေဖြင့် ကျန်းမာရေးရှုထောင့်အရ နေကြာဆီကို ရွေးချယ်ဝယ်ယူ အသုံးပြုမှု ပိုများလာကြောင်း၊ နေကြာဆီ စားသုံးမှု ပိုမိုမြင့်မားလာသည်နှင့်အမျှ နေကြာဆီဈေးကွက်မှာလည်း ပိုမိုကျယ်ပြန့်လာပြီး ဈေးကွက်ဈေးစုပိုမိုရရှိလာကြောင်း၊ စိုက်ပျိုးတောင်သူများတွက်ခြေကိုက်ပြီး အကျိုးအမြတ်ရရှိနေ့သည့် အတွက် နေကြာသီးနှံကို ယခုထက်ပိုမိုတိုးချဲ့စိုက်ပျိုးသင့်ပါကြောင်း တိုက်တွန်း‌ရေးသားဖော်ပြလိုက်ရပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး