ပြည်တွင်းကုန်သွယ်မှုသတင်း

             ကွမ်းသီးနှင့် သီဟိုများသည် မြန်မာနိုင်ငံတောင်ပိုင်း တနင်္သာရီတိုင်းဒေသကြီးနှင့် မွန်ပြည်နယ်တို့တွင် အများဆုံးစိုက်ပျိုးလျက်ရှိပါသည်။ ကွမ်းသီးတွင် ကွမ်းသီးအလုံးစျေးနှင့် ကွမ်းသီးခွဲခြမ်းစျေးဟူ၍ စျေးနှုန်း (၂)မျိုးရှိပြီး သီဟိုစေ့တွင် အခွံမချွတ်ရသေးသောအပင်မှ ဆွတ်ခူးသော အသီးအကြမ်းစျေးနှင့် အခြောက်လှန်းသန့်စင်ပြီး အချောစျေးဟူ၍ စျေးနှုန်း (၂)မျိုး ရှိကြောင်း သိရှိရပါသည်။

              တနင်္သာရီတိုင်းဒေသကြီး၊ ထားဝယ်မြို့ပေါ်ရှိ ယခုဖြစ်ပေါ်လျက်ရှိသော ကွမ်းသီးစျေးမှာ မေ ၆ ရက်တွင်  ကွမ်းသီးအလုံး(အခွံမပါ)တစ်ပိဿာလျှင် ကျေးရွာအတွင်း ဝယ်ယူသောစျေးမှာကျပ် ၅၀၀ဝ နှုန်းရှိပြီး ရန်ကုန်စျေးကွက်သို့ တင်ပို့သောရောင်းစျေးမှာ တစ်ပိဿာလျှင် ကျပ်၅၈၀၀နှုန်း စျေးရှိနေပြီး ကွမ်းသီးခွဲခြမ်း တစ်ပိဿာလျှင် ကျပ် ၅၅၀ဝ နှုန်း ပေါက်ဈေးရှိကြောင်း သိရှိရပါသည်။ သီဟိုစျေးနှုန်းမှာ သီဟိုစေ့အကြမ်း တစ်ပိဿာလျှင် ကျပ် ၃၄၀ဝ ရှိပြီး  သီဟိုစေ့အချောတစ်ပိဿာလျှင် ကျပ်၂၂၅၀ဝ ရှိကြောင်း သိရှိရသည်။

             ကွမ်းသီးနှင့် သီဟိုစေ့ဈေးနှုန်းများမှာ ယခင်အပတ်နှင့် ယခုပတ်နှိုင်းယှဉ်လျှင် ဈေးနှုန်းအနည်းငယ် မြင့်တက်လျက်ရှိကြောင်းနှင့် အရောင်းအဝယ်မှာ ပုံမှန်လည်ပတ်လျက်ရှိကြောင်း စုံစမ်းသိရှိရပါသည်။

DOCA(တနင်္သာရီ)

              မုံရွာခရိုင် စားအုန်းဆီတင်သွင်းရောင်းချသည့်ဆီလုပ်ငန်းရှင်(၅)ဦးနှင့် စားအုန်းဆီတင်သွင်း ရောင်းချသည့် ကုမ္ပဏီများပူးပေါင်း၍ မိမိဒေသတွင်း စားသုံးဆီပြတ်လပ်မှုမရှိစေရေး၊ စားသုံးဆီဖူလုံမှုရှိစေရေးနှင့် စားသုံးသူပြည်သူများဈေးနှုန်းသက်သာစွာဖြင့် ဝယ်ယူစားသုံးနိုင်စေရေး ရည်ရွယ် ၍ (၄.၅.၂၀၂၂) ရက်နေ့မှ(၆.၅.၂၀၂၂)နေ့အထိ စားအုန်းဆီများကို ဈေးနှုန်းသက်သာစွာဖြင့် ရောင်းချပေးခဲ့ကြောင်းသိရသည်။

                   မုံရွာမြို့ပေါ်ရှိ ရပ်ကွက်၊ ဈေး လက်လီဆိုင်များအား တစ်ဦးလျှင် ပေပါ(၁)လုံးနှုန်းဖြင့် ရောင်းချပေးသည့်အပြင် ခရိုင်အတွင်းစားသုံးသူပြည်သူများအား တစ်ဦးလျှင် အများဆုံး (၅)ပိဿာ အထိသာ ခွဲတမ်းအဖြစ်ရောင်းချပေးခြင်းဖြစ်ကြောင်း၊  လက်ရှိစားအုန်းဆီပြင်ပပေါက်ဈေးနှုန်းမှာ တစ်ပိဿာလျှင် (၆၉၀၀) ကျပ်ပေါက်ဈေးရှိသော်လည်း ယခုရောင်းချမှုမှာ တစ်ပိဿာလျှင် (၆၃၀၀) ကျပ်ဖြင့် ရောင်းချပေးနိုင်ခဲ့သောကြောင့် တစ်ပိဿာလျှင် (၁၀၀၀)ကျပ် သက်သာကြောင်း၊ ပြည်သူများအနေဖြင့်လည်း ဈေးနှုန်းသက်သာစွာရောင်းချပေးခြင်းအတွက် ဝမ်းသာကြကြောင်း၊ ခရိုင်အသင်း ဝင်ကျန်လုပ်ငန်းရှင်များအနေဖြင့်လည်း စားအုန်းဆီတင်သွင်းရောင်းချသည့်ကုမ္ပဏီများသို့ ကိုယ့်နည်းကိုယ့်ဟန်ဖြင့်ချိတ်ဆက်၍ သက်သာသောဈေးနှုန်းဖြင့် ရောင်းချပေးနိုင်ရေးစီစဉ်နေကြကြောင်း၊ လုပ်ငန်းရှင်တစ်ဦးလျှင် စားအုန်းဆီပေပါ (၁၅) လုံးမှ(၂၀) လုံးထိ နေ့စဉ်ရောင်းချပေးလျှက်ရှိကြောင်း စားအုန်းဆီတင်သွင်းရောင်းချသည့် ဆီလုပ်ငန်းရှင်တစ်ဦးထံမှ သိရှိရပါသည်။

DOCA(စစ်ကိုင်း)

              မြောင်မြို့နယ်သည် ဧရာဝတီမြစ်နှင့် ချင်းတွင်းမြစ် မြစ်နှစ်မြစ်ကြားတွင် တည်ရှိပြီး မြို့နယ်၏သုံးပုံတစ်ပုံမှာမြစ်ရေဝင်ဒေသများဖြစ်၍ ပဲမျိုးစုံနှင့်ဆီထွက်သီးနှံ အများဆုံးစိုက်ပျိုးသော မြို့တစ်မြို့ဖြစ်ပါသည်။၂၀၂၁-၂၀၂၂ ဘဏ္ဍာနှစ်မိုး/ဆောင်းသီးနှံစိုက်ဧက ၂ သောင်း ၃ ထောင်ကျော် ရှိပြီး မိုး/ဆောင်း မြေပဲစိုက်ဧက ၃၃၆၁၂ စိုက်ပျိုးပါသည်။

          မိုးမြေပဲကို ဇူလိုင်လ တတိယပတ်တွင် အများဆုံးစိုက်ပျိုးကြပြီး အောက်တိုဘာလနှင့် နိုဝင်ဘာလတို့တွင် စတင်ထွက်ပေါ်ပါသည်။ ဆောင်းမြေပဲကို အောက်တိုဘာလ၊ နိုဝင်ဘာလနှင့် ဒီဇင်ဘာလများတွင် စိုက်ပျိုးပြီး ဇန်နဝါရီလ၊ ဖေဖော်ဝါရီလနှင့် မတ်လများတွင် သီးနှံများ ထွက်ပေါ်ပါသည်။ မိုးမြေပဲစိုက်တောင်သူများအနေဖြင့် ပဲစဉ်းငုံသီးနှံကိုသီးညှပ်အဖြစ် စိုက်ပျိုးကြ၍  မြေပဲနှင့် ပဲစဉ်းငုံ စိုက်ပျိုးထုတ်လုပ်မှုကုန်ကျစရိတ်သည် ကျပ်၄၉၆၀၀ဝိ/- ကုန်ကျပြီး၊ တစ်ဧက အထွက်နှုန်းမှာ မိုးမြေပဲ (လုံးဆံ) ၁၃တင်းခန့်ထွက်ပြီး၊ ပဲစဉ်းငုံသီးနှံသည် တစ်ဧက ၈ တင်းခန့် ထွက်ရှိကြောင်း သိရှိရပါသည်။

          တစ်ဧကအကျိုးအမြတ်အနေဖြင့် မြေပဲဆံတစ်တင်းလျှင် သီးနှံစတင်ထွက်ပေါ်ချိန်တွင်  ၄၆ဝဝဝိ/- နှုန်းဖြင့် ၅၉၈ဝဝဝိ/-၊ ပဲစဉ်းငုံ တစ်တင်းလျှင် ၄၂ဝဝဝိ/-နှုန်းဖြင့် ၃၃၆ဝဝဝိ/-၊ စုစုပေါင်း ဝင်ငွေ ၉၃၄ဝဝဝိ/- ဝင်ငွေရရှိနိုင်သဖြင့် အသားတင်အကျိုးအမြတ် ၄၃၈ဝဝဝိ/-ရရှိနိုင်ပါသည်။ ဆောင်းမြေပဲသည် မိုးမြေပဲထက် တစ်ဧကကုန်ကျစရိတ်ပိုမိုကုန်ကျပြီး အထွက်နှုန်းပိုမိုထွက်ရှိ ပါသည်။ ဆောင်းမြေပဲ တစ်ဧကကုန်ကျစရိတ်သည် ၆၁၅ဝဝဝိ/-ခန့်ကုန်ကျပြီး၊ အထွက်နှုန်းမှာ မြေပဲ လုံးဆံ(ပျမ်းမျှ) ၂၅ တင်းခန့်ထွက်ရှိ၍ လက်ရှိသီးနှံပေါက်ဈေးမှာ တစ်တင်း ၅၇ဝဝဝိ/- ဖြစ်သောကြောင့်  ဝင်ငွေ ၁၄၂၅ဝဝဝိ/-ရရှိ၍ အသားတင်အကျိုးအမြတ် ၈၁ဝဝဝဝိ/-ရရှိနိုင်ပါသည်။

          ယခုနှစ်မြေပဲ၊ ပဲစဉ်းငုံစိုက်တောင်သူများအနေဖြင့် ယခင်နှစ်ထက် လုပ်အားခ၊ ပိုးသတ်ဆေး၊ ဓာတ်မြေဩဇာ၊ စက်သုံးဆီဈေးနှုန်းများ ကြီးမြင့်ခဲ့သော်လည်း သီးနှံထွက်ပေါ်ချိန်တွင် ဈေးကောင်းရသဖြင့်  ယခင်နှစ်ထက် အကျိုးအမြတ်ပိုမိုရရှိကြောင်း မရိုးကုန်းကျေးရွာရှိ တောင်သူ ဦးအောင်ဆန်းဦး၊ ဦးဆန်းထွန်းဦး၊ ဦးခင်ဝင်း၊ ဦးသန်းဇော်တို့ထံမှ သိရှိရပါသည်။

DOCA(စစ်ကိုင်း)

ဈေးကစားပါက အရေးယူမည်

နေပြည်တော် မေ 7

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီ အနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံ နှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်း တွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်း ဈေးနှုန်းကို ထုတ်ပြန်ပေးလျက်ရှိပါသည်။

              ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် စားအုန်းဆီ ဈေးနှုန်းများ တည်ငြိမ်နေပြီး တစ်ပတ်အတွင်း ဖြစ်ပေါ်ခဲ့သည့် FOB ဈေးနှုန်းများ အပေါ် အခြေခံ၍ တွက်ချက်မှုအရ ၂၀၂၂ ခုနှစ်၊ မေလ ၉ ရက်နေ့ မှ မေလ ၁၅ ရက်နေ့အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ ယခင်ရက်သတ္တပတ်နည်းတူ  စားအုန်းဆီ တစ်ပိဿာလျှင် ၆၀၂၅ ကျပ် ဖြစ်ကြောင်း ထုတ်ပြန်ကြေညာထားသည်။

              ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

              အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www .doca .gov .mm နှင့် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

သတင်းစဉ်

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း/ခရိုင်ဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ဌာနခွဲစာရေး ဒေါ်ဝါဝါကြည်သည် (၄.၅.၂၀၂၂)ရက်နေ့၊ နံနက်(၁၀:၀၀)နာရီအချိန်တွင် ပြည်တွင်းကုန်သွယ်မှု ဖွံ့ဖြိုးတိုးတတ်စေရေးအတွက် ပခုက္ကူမြို့နယ်၊ မြင်ဝင်းကျေးရွာ စိုက်တောင်သူ ဦးထွန်းဇော်ဝင်းအား ဆေးရွက်ကြီး စိုက်ပျိုးထွက်ရှိမှု အခြေအနေကို ကွင်းဆင်းလေ့လာမေးမြန်းခဲ့ပါသည်။

          စိုက်တောင်သူမှာ (၁)ဧကခန့်စိုက်ပျိုးထားရှိပြီး မိမိတို့အနေဖြင့် မိရိုးဖလာနှစ်စဉ်မပျက် စိုက်ပျိုးကြောင်း ဆေးရွက်ကြီးအား တော်သလင်းလတွင် စတင်စိုက်ပျိုးကြောင်း၊ စိုက်ပျိုးရာတွင် ရှေးဦးစွာ စိုက်ပျိုးမြေအား (၁)အိတ်လျှင် (၈၀၀၀၀)ကျပ်နှုန်း ဖြင့် မြေဆီ(၂)အိတ်နှင့် နွားချေး Faw ကား(၁)စီးလျှင် (၆၅၀၀၀)ကျပ်ဖြင့် နွားချေး(၂)စီးတို့အား ဝယ်ယူကျဲပက်ပြီး ထွန်စက်ဖြင့် တစ်နာရီ (၃၀၀၀၀)ကျပ်နှုန်းဖြင့် တစ်နာရီခွဲကြာ ခုတ်မောင်းရကြောင်း၊ စက်ခုတ်ပြီးမြေပေါ်တွင် နွားရှဉ်းဖြင့် (၁)မနက်လျှင်(၁၃၀၀၀)ကျပ်ဖြင့် (၃)မနက်ထွန်ရပြီး တန်ကြားပင်ကြား (၂)တောင်အကွာ မြောင်းများဆွဲ၍ ဆေးရွက်ကြီးပင် တစ်ပင်လျှင်(၁၀)ကျပ်ဖြင့် ပျိုးပင်(၇၀၀၀)ခန့်အား တစ်ဧကအတွက် စိုက်ပျိုးကြောင်း၊ ကွမ်းစားဆေး(ဗမာဆေး)ကိုသာ စိုက်ပျိုးကြောင်း သိရှိရပါသည်။

          စိုက်ပျိုးမြေမှာကုန်းပိုင်းဖြစ်၍ မိုးရွာသွန်းမှုအခြေအနေကိုလိုက်၍ ရေသွင်းရကြောင်း၊ ယခုနှစ်တွင် ရေ(၄)ကြိမ်သာသွင်းကြောင်း၊ ရေ(၁)ကြိမ်သွင်းလျှင် (၁)နာရီ(၆၀၀၀)ကျပ်နှုန်းဖြင့် (၈)နာရီသွင်းရပြီး အလုပ်သမား(၃)ဦးအား (၁)ဦးလျှင်(၆၀၀၀)ကျပ်နှုန်းဖြင့် ငှားရမ်းရကြောင်း၊ စိုက်ပျိုးပြီး ဆေးရွက်ကြီးပင်(၁)ပင်အား အရွက်(၉)ရွက်ခန့်သာထားရှိပြီး (၉)ရွက်ပြည့်လျှင် အရွက်သားများထူစေရန်နှင့် အရည်အသွေးပြည့်ဝစေရန်အတွက် ထိပ်ဖူးကိုချိုးနှိမ်ရကြောင်း၊ ဆေးရွက်ကြီးပင်အား စိုက်ပျိုးပြီး(၄)လပြည့်လျှင် ရိတ်သိမ်းကြောင်း၊ ရိတ်သိမ်းပြီးသော ဆေးရွက်များ၏ အလယ်ကျောရိုးအားထု၍ နေလှန်းရာတွင် ပြာသိုလတွင်လှန်းပါက(၃)ရက်၊ တပို့တွဲလတွင် လှန်းပါက(၄)ရက် နေလှန်းရကြောင်း၊ နေလှန်းပြီး ဆေးရွက်ခြောက်များအားထပ်ပြီး နှီးဖြင့်ယက်ထားသော ပုတ်များဖြင့်ထည့်၍ သိမ်းဆည်းထားကြောင်း၊ ယခုနှစ်တွင် ဆေးရွက်ကိုသာ ရိတ်သိမ်းပြီး ဆေးရိုး(၁)ပိဿာလျှင်(၃၀၀)ကျပ်သာ ဈေးနှုန်းရှိသောကြောင့် ဆေးရိုးခုတ်ရာတွင် ကုန်ကျစရိတ်များ၍ ဆေးရိုးများအား မခုတ်ဘဲ စိုက်ခင်းအတွင်းထားရှိပြီး မိုးဦးကျချိန်တွင် ထယ်ဖြင့် မြေလှန်၍ မြေဆွေးအဖြစ်ရရှိကြောင်း သိရှိရပါ သည်။

         ဆေးရွက်ကြီး(၁)ဧက၏ စိုက်ပျိုးကုန်ကျစရိတ်မှာ မြေပြုပြင်ရန် စက်ဖိုး၊ နွားရှဉ်းခ၊ သွင်းအားစုနှင့်နွားချေးဖိုး၊ ပိုးသတ်ဆေးဖိုး၊ အလုပ်သမားငှားရမ်းခစသည့် စုစုပေါင်းကုန်ကျစရိတ်မှာ (၉)သိန်းဝန်းကျင်ခန့်ရှိကြောင်း၊ယခင်နှစ်တွင် (၁)ပိဿာလျှင်(၁၆၅၀)ကျပ်ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခုနှစ်တွင် (၁)ပိဿာလျှင် ပျမ်းမျှ(၂၀၀၀)ကျပ်ဈေးနှုန်းဖြင့် ရောင်းချရမည်ဆိုလျှင် ဝင်ငွေအနေဖြင့် (၁)ဧကစိုက်ပျိုးလျှင် ပိဿာချိန်(၇၀၀)ထွက်ရှိ၍ ကျပ်(၁၄)သိန်းဝန်းကျင်ခန့်ရရှိပြီး အကျိုးအမြတ်အနေဖြင့် ကျပ်(၅)သိန်းခန့် ရရှိမည်ဖြစ်ကြောင်း၊ ကျွန်းမြေပေါ်တွင် စိုက်ပျိုးပါက (၁)ဧကလျှင် ပိဿာ(၉၀၀)ခန့်ထွက်ရှိပြီး အကျိုးအမြတ်ပိုမိုရရှိကြောင်း တောင်သူ၏ပြောကြားချက်အရ သိရပါသည်။ ယခုနှစ်တွင် ဆေးရွက်ကြီးများကို စိုက်တောင်သူမှ ရောင်းချခြင်းမရှိသေးဘဲ မိမိအိမ်တွင် သိုလှောင်သိမ်းဆည်းထားကြောင်း၊ ဆေးရွက်ကြီးများအား ပခုက္ကူမြို့ပေါ်ရှိဆေးလိပ်ခုံပိုင်ရှင် လုပ်ငန်းရှင်များမှ ကျေးရွာအထိ လာရောက်ဝယ်ယူခြင်းဖြစ်ကြောင်း သိရှိရပါသည်။

         ဆေးရွက်ကြီးသည် မြန်မာလူမျိုးများအနေဖြင့် သုံးစွဲမှုနည်းပါးသော်လည်း လူတိုင်းအတွက် အသုံးဝင်သော ကျန်းမာရေးဆေးဘက်ဝင်ပစ္စည်းတစ်မျိုးဖြစ်ကြောင်း၊ ပြည်တွင်းဆေးလိပ်ခုံလုပ်ငန်းတွင်လည်း သုံးစွဲမှုများကြောင်း၊ ခန္ဓာကိုယ်ယားယံခြင်းများဖြစ်ပေါ်ပါက ပိုးသတ်ဆေးအဖြစ် ဆေးရွက်ကြီးအရည်များကို သုတ်လိမ်းရာတွင်အသုံးပြုကြောင်း၊ ဆေးရွက်ကြီးကို နှစ်စဉ်မပျက် စိုက်ပျိုးခဲ့ရာတွင် ယခင်နှစ်များက ဆေးလိပ်စက်ရုံများလည်ပတ်ခြင်းရှိခဲ့၍ တောင်သူများမှထွက်ရှိသော ဆေးရွက်ကြီးနှင့်ဆေးရိုးများကို ဝယ်လိုအား၊ ရောင်းလိုအားကောင်း၍ ဈေးကောင်းရရှိခဲ့ပြီး ယခုနှစ်တွင် မိမိတို့ထွက်ကုန်များအား ဆေးလိပ်ခုံလုပ်ငန်းများနည်းပါးသွား၍ ကုန်ကြမ်းအဖြစ် သုံးစွဲမှုနည်းခြင်းကြောင့် ဝယ်လိုအားနည်း၍ ဈေးကွက်မရှိကြောင်း စိုက်တောင်သူများအနေဖြင့် ယခင်နှစ်များထက် စိုက်ဧကများလျော့နည်းသွားကြောင်း၊ မိမိတို့စိုက်ပျိုးထွက်ကုန် ဆေးရွက်ကြီးများကို ဝယ်ယူရောင်းချ ဖြန့်ဖြူးပေးမည့် ကုမ္ပဏီများ၊ လုပ်ငန်းရှင်များရှိပါက နှစ်စဉ်မပျက် တိုးချဲ့ စိုက်ပျိုးသွားမည်ဟု စိုက်တောင်သူ၏ ပြောကြားချက်အရ သိရှိရပါသည်။

DOCA(မကွေး)