ပြည်တွင်းကုန်သွယ်မှုသတင်း

         လွိုင်ကော်မြို့ ဈေးကွက်အတွင်းတွင် အခြားဒေသများမှ အများဆုံးဝင်ရောက်လာသော အခြေခံစားကုန်များနှင့် ဒေသထွက်ဟင်းသီးဟင်းရွက်များ ဈေးကွက်အတွင်း ရောင်းဝယ်ဖောက်ကားလျှက်ရှိရာ ဧပြီလ စတုတ္တပတ်အတွင်း အခြေခံစားကုန်ဖြစ်သည့်  ကြက်ဥဈေးနှုန်း မှာ အလုံးသေးတစ်လုံးလျှင် (၁၄၀)ကျပ်၊ အလုံးကြီးတစ်လုံးလျှင်(၁၅၀)ကျပ် ဖြစ်ပြီး မေလပထမပတ်တွင် ကြက်ဥဈေးအလုံးသေး တစ်လုံးလျှင်(၁၇၀)ကျပ် ၊အလုံးကြီးတစ်လုံးလျှင် (၁၈၀)ကျပ် ဈေးအထိမြှင့် တက်လျှက်ရှိရာ ယခင်အပတ်နှင့် ယခုအပတ်နှိုင်းယှဉ်လျှင် ကြက်ဥအလုံး သေးတစ်လုံးလျှင်  (၃၀)ကျပ်နှင့်  အလုံးကြီးတစ်လုံးလျှင် (၃၀)ကျပ်  နှုန်းပိုမို ဈေးနှုန်း မြှင့်တက်လာသည်ကိုတွေ့ရပြီး ထိုသို့ဈေးနှုန်း မြှင့်တက်ရခြင်းမှာ  လွိုင်ကော်ဈေးကွက် အတွင်းရှိ ကြက်ဥများမှာ တောင်ကြီးဘက်မှ ဝင်လာသော ကြက်ဥများဖြစ်ကြောင်း၊ လွိုင်ကော်ရှိ မွေးမြူရေးခြံများမှာ ကြက်စာဝယ်ယူမူ အခက်အခဲများကြောင့် ကြက်ခြံလုပ်ငန်းများ ရပ်ဆိုင်ထား၍ ဒေသအတွင်း ကြက်ဥထွက်ရှိမူမရှိသဖြင့်  ဈေးနှုန်းများ မြင့်တက်လာခြင်းဖြစ်သည်ဟု ကြက်မွေးမြူရေးနှင့် ကြက်ဥရောင်းဝယ်ရေး လုပ်ငန်းရှင်တစ်ဦးထံမှ သိရှိသည်။

DOCA(ကယား)

             မြန်မာနိုင်ငံသည် စိုက်ပျိုးရေးကိုအခြေခံသည့် နိုင်ငံဖြစ်သည်နှင့်အညီ နိုင်ငံတွင်းနေထိုင်ကြသော တိုင်းရင်းသားပြည်သူများအနေဖြင့် လယ်ယာမြေများတွင် သီးနှံသီးထပ်၊ သီးညှပ်စိုက်ပျိုးခြင်းဖြင့် အသက်မွေးဝမ်းကြောင်းပြုခြင်းကို အဓိကဆောင်ရွက်လျက်ရှိကြပါသည်။ ရှမ်းပြည်နယ် (အရှေ့ပိုင်း)၊  မိုင်းဆတ်ခရိုင်၊ မိုင်းတုံမြို့နယ်နှင့် ပုံပါကျင်မြို့နယ်ခွဲတို့တွင်လည်း မိုးရာသီကုန်ဆုံးချိန် စပါးရိတ်သိမ်းပြီးထား‌သော လယ်ယာမြေများပေါ်တွင် သီးနှံသီးထပ်၊ သီးညှပ်အနေဖြင့် ကြက်သွန်ဖြူ (ရှမ်းခွံနီ) ကို စိုက်ပျိုးကြပြီး နှစ်စဉ်မတ်လ၊ ဧပြီလတို့တွင် ရိတ်သိမ်းကြသည်။

            မြန်မာနိုင်ငံတွင်အများဆုံးစိုက်ပျိုးကြသော ကြက်သွန်ဖြူမျိုး (၃)မျိုးရှိသည်။ ၎င်းတို့မှာ ရှမ်းခွံနီမျိုး၊ ရှမ်းခွံဖြူမျိုးနှင့် တရုတ်မျိုး (ကြူကုတ်)တို့ ဖြစ်ကြသည်။ ရှမ်းပြည်နယ်(အရှေ့ပိုင်း)၊ မိုင်းတုံမြို့ နယ်နှင့် ပုံပါကျင်မြို့နယ်ခွဲတို့တွင် စိုက်ပျိုးသောကြက်သွန်နီမျိုးမှာ ရှမ်းခွံနီမျိုးဖြစ်သည်။ မိုင်းတုံမြို့ နယ်နှင့် ပုံပါကျင်မြို့နယ်ခွဲတို့သည် ယခုနှစ်တွင် ကြက်သွန်ဖြူစိုက်ဧကပေါင်း (၁၄၅၅)ဧကရှိခဲ့ပြီး ဧပြီလ တတိယပတ်အထိ (၁၄၀၀)ဧကရိတ်သိမ်းပြီး ဖြစ်ကြောင်းသိရပါသည်။

           ကြက်သွန်ဖြူ(ရှမ်းခွံနီ)ကို စပါးရိတ်သိမ်းပြီးသော လယ်မြေများတွင် မြေပြုပြင်၍ စိုက်ပျိုးကြသည်။ စပါးရိတ်သိမ်းပြီး မြေအစိုဓာတ်မပျောက်ခင် ရိုးပျက်များကို ခုတ်ဖြတ်ရပါသည်။ ထို့နောက် (၁၀)ပေခြား ရေသွင်းမြောင်းများတူးကာ ဘောင်ပြုလုပ်ပေးရသည်။ ပြုလုပ်ထားသော မြေဘောင်များကိုရေသွင်းကာ စက်ဖြင့်မြေဖွပေးပြီး ကြက်သွန်ဖြူအမွှာများကို ထိုးစိုက်ကာစိုက်ပျိုးကြသည်။ စိုက်ပျိုးပြီးသော မြေဘောင်များကို ကောက်ရိုးများဖြင့် မထူမပါးဖုံးအုပ်ပေးရသည်။

           စိုက်ပျိုးထားသော ကြက်သွန်ဖြူဘောင်များကို (၇)ရက်ခြား တစ်ကြိမ်ခန့် ရေသွင်းပေးရသည်။ အပင်ပေါက်များကြီးထွားလာပါက ရွက်ဖြန်းအားဆေးကို ရေသွင်းပြီးတစ်ပတ်တစ်ကြိမ် (သို့မဟုတ်) နှစ်ပတ်တစ်ကြိမ်အပင်၏ လိုအပ်ချက်အလိုက် ဖြန်းပေးရပါသည်။ ကြက်သွန်ဖြူ (ရှမ်းခွံနီ)တစ်ဧက၏ စိုက်ပျိုးကုန်ကျစရိတ်မှာ (၁၈)သိန်းခန့်ရှိပြီး အထွက်နှုန်းမှာတစ်ဧက (၁.၇၁၆)တန်ခန့် ထွက်ရှိသည်ဟု မိုင်းတုံမြို့နယ် စိုက်ပျိုးရေးဦးစီးဌာနမှ သိရှိရပါသည်။

           ယခုနှစ် တာချီလိတ်ကြက်သွန်ဖြူအဝယ်ဒိုင်များသည် ကြက်သွန်ဖြူ (ရှမ်းခွံနီ)အသစ် တစ်ကီလိုကို (၂၀၀၀)ကျပ်မှစတင်၍ ဈေးဖွင့်ဝယ်ယူနေပါသည်။ ယခင်နှစ်က ကြက်သွန်ဖြူ (ရှမ်းခွံနီ)အသစ် စပေါ်ချိန်တွင်တစ်ကီလို (၁၉၀၀)ကျပ်ဈေးရရှိပြီး နောက်ပိုင်းကာလများတွင် တစ်ကီလို (၂၁၀၀)ကျပ် အထိ ဈေးပေါက်ခဲ့ကြောင်း ဟောင်လိတ်ကြက်သွန်ဖြူအဝယ်ဒိုင် (တာချီလိတ်မြို့)မှ သိရှိရပါသည်။

          ယခုနှစ် ကြက်သွန်စိုက်တောင်သူများသည် စိုက်ပျိုးစရိတ်နှင့်သယ်ယူစရိတ်နုတ်ပြီး တစ်ဧကအကျိုး အမြတ် (၁၄)သိန်းခန့် ရရှိနေပါသည်။

          ရှမ်းပြည်နယ် (အရှေ့ပိုင်း)ဒေသထွက် ကြက်သွန်ဖြူများကို ဒေသတွင်း စားသုံးရန်နှင့် ထိုင်းနိုင်ငံသို့ တင်ပို့ရန် အဓိကထားစိုက်ပျိုးကြသည်။ တာချီလိတ်အဝယ်ဒိုင်များမှ ဝယ်ယူထားသော ကြက်သွန်ဖြူများကို ပြန်လည်သန့်စင်ပြီးမှ ထိုင်းနိုင်ငံသို့တင်ပို့ကြသည်။ ၂၀၂၀-၂၀၂၁ ဘဏ္ဍာနှစ်တွင် ထိုင်းနိုင်ငံသို့ တာချီလိတ် (မယ်ယန်း)ကုန်သွယ်ရေးစခန်းမှ တင်ပို့သော ကြက်သွန်ဖြူတန်ချိန် (၅၈၈၂)တန်တင်ပို့ခဲ့ပြီး တန်ဖိုးအမေရိကန်ဒေါ်လာ (၅.၁၈၁)သန်းရှိခဲ့သည်ဟု ကုန်သွယ်ရေးဦးစီးဌာနမှ သိရှိရပါသည်။

          ထိုကြောင့် ကြက်သွန်ဖြူစိုက်ပျိုးထုတ်လုပ်ခြင်းဖြင့်‌ တောင်သူများအနေနှင့် ဝင်ငွေရရှိကာ အဆင်ပြေနေပြီး နိုင်ငံတော်အနေနှင့်လည်း နိုင်ငံခြားငွေတဖက်တလမ်းမှရရှိနေပါသည်။ သို့ဖြင့်ပါ၍ ရှမ်းပြည်နယ်(အရှေ့ပိုင်း)၊ မိုင်းတုံမြို့နယ်နှင့် ပုံပါကျင်မြို့နယ်ခွဲဒေသရှိ ကြက်သွန်ဖြူစိုက်တောင်သူများသည် ယခုနှစ်ကြက်သွန်ဖြူ (ရှမ်းခွံနီ)စပေါ်ချိန်တွင် ဈေးကောင်းရရှိကာ အကျိုးအမြတ်များရရှိ နေပါကြောင်း ရေးသားလိုက်ရပါသည်။

DOCA(ရှမ်း)

            ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် ဧပြီလဆန်းပိုင်းတွင် စပါးဆန်ဈေးများငြိမ်နေပြီး ဧပြီလနောက်ဆုံးပတ်တွင် စပါးဈေးဆန်ဈေးများ အနည်းငယ် မြင့်တက်လာခဲ့ပါသည်။

        စပါး/ဆန်ဈေးနှုန်းများအနေဖြင့် ဧပြီလဆန်းပိုင်းတွင် ဧည့်မထ (ရိုးရိုး) (၄၆)ပေါင် တင်း(၁၀၀) လျှင် ၇၆၀၀၀၀ကျပ်၊ တောင်ပျံစပါး(၄၆)ပေါင် တင်း(၁၀၀)လျှင် ၁၁၀၀၀၀၀ကျပ်ဈေးဖြစ်ခဲ့ပြီး ဆန်ဈေး များမှာ ကရင်မဆန် တစ်အိတ်လျှင် ၂၄၅၀၀ကျပ်၊ အင်းမရဲဘော် တစ်အိတ်လျှင် ၂၉၅၀၀ ကျပ်၊ မှော်ဘီဆန် တစ်အိတ်လျှင် ၃၃၀၀၀ကျပ်၊ ရတနာတိုးဆန် တစ်အိတ်လျှင် ၂၆၅၀၀ကျပ်၊ မနောသုခ တစ်အိတ်လျှင် ၂၇၅၀၀ကျပ်၊ နတ်တလင်းတောင်ပျံတစ်အိတ်လျှင် ၅၁၀၀၀ကျပ်နှင့် ကျော်ဇေယျ ဆန်တစ်အိတ်လျှင် ၂၆၅၀၀ကျပ်ဖြင့် အရောင်းအဝယ်ဖြစ်ခဲ့ပါသည်။

        ဧပြီလနောက်ဆုံးပတ်တွင် ဧည့်မထ(ရိုးရိုး) (၄၆)ပေါင် တင်း(၁၀၀)လျှင် ၈၀၀၀၀၀ကျပ်ဖြင့် ဧပြီလဆန်းပိုင်းနှင့် နှိုင်းယှဉ်လျှင် ၂၀၀၀၀ကျပ်ခန့် ဈေးမြင့်လာခဲ့ပါသည်။ တောင်ပျံစပါးဈေးမှာ ၁၁၀၀၀၀၀ကျပ်ဖြင့် ယခင်ဧပြီလဆန်းပိုင်းကအတိုင်း ဈေးငြိမ်နေသည်ကို တွေ့ရပါသည်။ ဧပြီနောက် ဆုံးပတ်ရှိ ဆန်ဈေးများမှာ အင်းမရဲဘော်တစ်အိတ်လျှင် ၃၃၀၀၀ကျပ်၊ မှော်ဘီတစ်အိတ်လျှင် ၃၃၀၀၀ကျပ်၊ ကျော်ဇေယျဆန်တစ်အိတ်လျှင် ၂၇၀၀၀ကျပ်၊ ကရင်မဆန်တစ်အိတ်လျှင် ၂၆၂၀၀ကျပ် ဖြင့် ဈေးအနည်းငယ်မြင့်တက်လာသည်ကို တွေ့ရပါသည်။ ဆန်ဈေးနှုန်းများ မြင့်တက်လာရခြင်းမှာ မိုးစပါးလက်ကျန်နည်းပါးခြင်း၊ စိုက်ပျိုးရာတွင် ဓါတ်မြေဩဇာ ဈေးနှုန်းများ မြင့်တက်ခြင်းတို့ကြောင့် သွင်းအားစုများလျော့နည်း သုံးစွဲရသည့်အတွက်ယခင်နှစ်မိုးစပါးတွင်လည်း အထွက်နည်းခဲ့ခြင်း၊ ဆန်ထွက်အောက်တန်းမရရှိခြင်းနှင့် ယခုနွေစပါးများ စတင်ထွက်ပေါ်ပြီဖြစ်သော်လည်း အရည်အသွေး ကျဆင်းခြင်း၊ တိရိစ္ဆာန်အစာအဖြစ် ဆန်ကွဲနှင့် လုံးတီးဆန်များကို ပိုမိုဝယ်ယူ သုံးစွဲလာခြင်း ဆန်ကွဲ ဈေးနှုန်းမြင့်တက်လာခြင်းနှင့်အတူ ဆန်ဈေးလည်းမြင့်တက်လာခြင်း၊ မီးပြတ်လပ်သည့်အတွက် ဆန်ကြိတ်ထွက်မှုလျော့နည်းသွားခြင်း၊ Export ဆန်တင်ပို့မှု ရှိနေသည့်အတွက် အဝယ်လိုက်နေ ခြင်းကြောင့် ဝယ်လိုအားနှင့်ရောင်းလိုအား မမျှတသည့်အတွက် ဆန်ဈေးများ မြင့်တက် နေရခြင်း ဖြစ်ကြောင်းသိရပါသည်။ ဆန်စီးဆင်းမှု အနေဖြင့် ကရင်မဆန်နှင့် မနောသုခဆန်များကို အခြားတိုင်းများသို့ တင်ပို့မှု့ရှိပြီး အခြားဆန်များကို ခရိုင်အတွင်းရှိ စားသုံးရန်အတွက် ဖြန့်ဖြူး ရောင်းချမှုရှိကြောင်း သိရှိရပါသည်။

DOCA(ပဲခူး)

           ပြည်ကုန်စည်ဒိုင်တွင် ဧပြီလပထမပတ် မတ်ပဲတစ်တင်းလျှင် ၄၇၅၀၀၊ ၄၈၀၀၀ကျပ် ဈေးဖြင့် အရောင်းအဝယ်ဖြစ်လျှက်ရှိပြီး ရန်ကုန်အဝယ်နှင့် လှောင်သမားများ အဝယ်ရှိသဖြင့် တစ်ရက်လျှင် အိတ် ၃၀၀/၄၀၀ခန့် အရောင်းအဝယ်ဖြစ်လျှက် ရှိပါသည်။ ဒုတိယပတ်တွင်  ပဲတစ်တင်းကို ၄၈၀၀၀- ၄၈၇၀၀ကျပ်ဈေးဖြင့် အရောင်းအဝယ်ကောင်းလျှက်ရှိပြီး တစ်ရက်လျှင် အိတ်၄၀၀/၄၅၀ ခန့် ရန်ကုန် ဝယ်လက်အဝယ်ရှိပါသည်။ သင်္ကြန်ပြီးစကာလတွင် ပဲတစ်တင်းကို ၄၈၀၀၀၊ ၄၈၅၀၀၊ ၄၈၇၀၀ ကျပ်ဈေးဖြင့် အရောင်းအဝယ်အနည်းငယ်သာရှိပြီး တစ်ရက်အိတ် ၁၀၀/၂၀၀ ခန့်သာ အရောင်းအဝယ်  ဖြစ်ပါသည်။

          ပဲစင်းငုံသီးနှံမှာ ဧပြီလအစတွင်  ပိဿာ ၂၀ ဝင်ပဲတစ်တင်းကို ၄၅၀၀၀ကျပ်ဖြင့် အရောင်းအဝယ်ရှိပြီး ဧပြီလ ဒုတိယပတ်တွင် ပဲတစ်တင်း ၄၃၅၀၀ကျပ်ခန့် ဈေးကျလာပြီး တစ်ရက်ကို အိတ် ၂၀၀/၃၀၀ ခန့် ရန်ကုန်ဝယ်လက်အဝယ်ရှိခဲ့ပါသည်။ ပဲအဝင်လည်းနည်းလာပြီး လက်ကျန်ပဲများသာ အရောင်းအဝယ်ဖြစ်လျှက်ရှိပါသည်။ သင်္ကြန်ပြီးစတွင်  ပဲစင်းငုံဈေးကျလာပြီး ပဲတစ်တင်းကို ၄၂၅၀၀ ကျပ်ဖြင့် ပဲအဝယ်အနည်းငယ်သာရှိပါသည်။ အရောင်းအဝယ်ဖြစ်မှုမှာ တစ်ရက်လျှင် အိတ် ၁၀၀/၁၅၀ ခန့်သာ  အရောင်းအဝယ်ဖြစ်ခဲ့ပါသည်။

          ပြည်ကုန်စည်ဒိုင်၏ ကုလားပဲသီးနှံဈေးမှာ ဧပြီလပထမပတ်တွင်  ကုလားပဲ (HL) တစ်တင်းကို ၄၃၅၀၀ကျပ်၊ ကုလားပဲ (မြကြေးမှုံ)တစ်တင်းကို ၄၄၅၀၀ကျပ် ဖြင့် ခွဲစက်သမားနှင့် ရန်ကုန် အဝယ်ရှိပြီး တစ်ရက်ကိုအိတ် ၇၀၀/၈၀၀ ခန့် အဝယ်ရှိခဲ့ပါသည်။ ဒုတိယပတ်တွင်  ကုလားပဲ (HL) တစ်တင်းကို ၄၄၀၀၀ကျပ်၊ ကုလားပဲ (မြကြေးမှုံ)တစ်တင်းကို ၄၅၀၀၀ကျပ်ဖြင့် အရောင်းအဝယ်ရှိပြီး တစ်ရက်ကို အိတ် ၆၀၀/၇၀၀ခန့် ရန်ကုန်အဝယ်ရှိခဲ့ပါသည်။ ဧပြီလ တတိယပတ်တွင် ကုလားပဲဈေးမြင့်လာပြီး ကုလားပဲ (HL) တစ်တင်းကို ၄၅၅၀၀-၄၆၀၀၀ကျပ် ၊ ကုလားပဲ (မြကြေးမှုံ)တစ်တင်းကို ၄၆၂၀၀ကျပ် ဖြင့်အဝယ်ရှိခဲ့ပြီး တစ်ရက်ကိုအိတ် ၂၀၀/၃၀၀ခန့်သာ ခွဲစက်သမားများဖြင့် မြို့တွင်းရောင်းဝယ်မှု ရှိခဲ့ပါသည်။

          ပဲကြီးသီးနှံဈေးမှာ ဧပြီလ ပထမပတ်တွင် ပဲကြီး (ရွှေကျွန်း)တစ်တင်းကို ၆၀၀၀၀ကျပ်၊ ပဲကြီး (အာမဲ) တစ်တင်းကို ၅၅၀၀၀ကျပ် ဖြစ်ခဲ့ပြီး ပဲကြော်သမားများနှင့် ရန်ကုန်အဝယ်ရှိခဲ့ရာ တစ်ရက် ကိုအိတ် ၃၀၀/၄၀၀ခန့် အဝယ်ရှိခဲ့ပါသည်။ ဒုတိယပတ်တွင် ပထမပတ်အတိုင်း ပဲကြီးဈေး အေးလျှက် ရှိပါသည်။ ဧပြီလ တတိယပတ်တွင် ပဲကြီး (ရွှေကျွန်း)တစ်တင်းကို ၆၂၀၀၀ကျပ်၊ ပဲကြီး(ကမ်းနား) တစ်တင်းကို ၅၉၀၀၀ကျပ်ဖြင့် ဈေးမြင့်လာခဲ့ပြီး ပဲကြော်သမားနှင့် ရန်ကုန် အဝယ်ရှိသဖြင့် တစ်ရက်လျှင် အိတ် ၂၀၀/၃၀၀ခန့် အရောင်းအဝယ်ဖြစ်လျှက်ရှိပါသည်။

          ပြည်ကုန်စည်ဒိုင်၏ ဘိုကိတ်သီးနှံဈေးမှာ ဧပြီလပထမပတ်တွင် ၃၅၀၀၀၊ ၃၅၅၀၀ကျပ် ဈေးဖြင့် အရောင်းအဝယ်ရှိပြီး တစ်ရက်ကို အိတ် ၄၀/၅၀ခန့် ရန်ကုန်အဝယ်ရှိခဲ့ပါသည်။ ဒုတိယ ပတ်တွင် ဘိုကိတ်ဈေးအေးနေခဲ့ပါသည်။ ဧပြီလ သင်္ကြန်ပြီးစတွင် ပဲတစ်တင်းကို ၃၅၅၀၀ကျပ်ဖြင့် တစ်ရက်ကို အိတ် ၄၀/၅၀ခန့် အဝယ်ရှိခဲ့ပါသည်။

          စားတော်ပဲ (ကျွန်း)သီးနှံမှာ ဧပြီလအစတွင် ပဲတစ်တင်းကို ၈၅၀၀၀ကျပ်ဖြင့် အရောင်း အဝယ် ဖြစ်ခဲ့ပြီး၊ ဒုတိယပတ်တွင် ပဲတစ်တင်းကို ၈၃၀၀၀ကျပ် ဈေးဖြစ်ခဲ့ပါသည်။ တတိယပတ်တွင် ပဲတစ် တင်းကို ၈၆၀၀၀၊ ၈၇၀၀၀ကျပ်ဖြင့် ဈေးမြင့်လာခဲ့ပြီး အရောင်းအဝယ်မှာ တစ်ရက်ကို အိတ် ၂၀/၂၅သာ မြို့တွင်းရောင်းဝယ်မှုရှိခဲ့ပါသည်။

          ပြည်ကုန်စည်ဒိုင်၏  အရောင်းအဝယ်ဖြစ်မှုနှင့် ဈေးနှုန်းဈေးကွက်အခြေအနေမှာ သင်္ကြန်ပိတ်ရက်များကြောင့် အရောင်းအဝယ်မှာ အေးနေခဲ့ပြီး ဈေးနှုန်းအနေဖြင့် ယခင်လကဈေးမှာ ပိုကောင်းခဲ့ကြောင်း သိရှိရပါသည်။

DOCA(ပဲခူး)

၂၀၂၂ ခုနှစ်၊ မေလ ၂ ရက်နေ့ မှ မေလ ၈ ရက်နေ့ အထိ လက်ကားရည်ညွှန်းဈေးနှုန်းထုတ်ပြန်မှုအပေါ် ဒေသအလိုက် စားအုန်းဆီ တစ်ပိဿာ ကုန်ကျစရိတ် တွက်ချက်မှုစာရင်းအား အောက်ပါ .pdf file တွင် ဝင်‌ရောက်ဖတ်ရှုနိုင်ပါသည်-