ပြည်တွင်းကုန်သွယ်မှုသတင်း

        မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်း ဖွံ့ဖြိုးတိုးတက်အောင်ဆောင်ရွက်နေသော နိုင်ငံတစ်ခုဖြစ်သည်။ စစ်ကိုင်းတိုင်းဒေသကြီး၊ ကန့်ဘလူမြို့နယ် တွင်လည်း လယ်ယာစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များ၌လည်းကောင်း၊ နေအိမ်ခြံဝင်းများ၌လည်းကောင်း မိသားစုဝင်ငွေရရှိသည့်အတွက် စိုက်ပျိုးကြကြောင်းသိရသည်။

        ၂၀၂၄ခုနှစ်၊ အောက်တိုဘာလ ပထမပတ်တွင်ဖြစ်ပေါ်နေသော ကန့်ဘလူခရိုင်၏ ကွမ်းဈေးနှုန်းများအနေဖြင့် အရည်အသွေးပေါ်မူတည်၍ ကွမ်းရွက်(ရှယ်)တစ်ပိဿာလျှင် ငွေကျပ်၁၂၀၀၀ဖြင့်လည်းကောင်း၊ ကွမ်းရွက်(ကြီး)တစ်ပိဿာလျှင် ငွေကျပ်၅၀၀၀ဖြင့်လည်းကောင်း၊ ကွမ်းရွက်(သေး)တစ်ပိဿာလျှင် ငွေကျပ်၃၅၀၀ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့်   ကန့်ဘလူမြို့နယ်မှထွက်ရှိသည့် ကွမ်းရွက်များကို ကန့်ဘလူမြို့၊ ကျွန်းလှမြို့နှင့် မန္တလေးမြို့များသို့ တင်ပို့ရောင်းချလျက်ရှိပြီး စက်တင်ဘာလ နောက်ဆုံးပတ်တွင် အရောင်းအဝယ်ဖြစ်သည့်ဈေးနှုန်းများနှင့်နှိုင်ယှဉ်ပါက ယခုအပတ်တွင် ကွမ်းဈေးနှုန်းမြင့်တက်၍ အရောင်းအဝယ်ဖြစ်လျက်ရှိကြောင်း ကွမ်းရွက်ရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(ရန်ကုန်)

     မော်လမြိုင်မြို့နယ်၊ ချောင်းဆုံမြို့တွင် ပီလောပီနံဥ အများဆုံးစိုက်ပျိုးသည့် ဒေသဖြစ်သည်။ ၎င်းချောင်းဆုံမြို့နယ်ရှိ (ဘိုးနက်ကျေးရွာ၊ ကတောင်စိန်ကျေးရွာ၊ ခြံတန်းကျေးရွာ) တို့ဖြစ်သည်။ ယခုအခါ စက်တင်ဘာလ (စတုတ္တပတ်)တွင် ပီလောပီနံအပင်မှ ဥထွက်မှုသည် နည်းပါး၍လည်းကောင်း၊ ဥထွက်ရာသီချိန်ကုန်ဆုံး၍ လည်းကောင်း၊ ဈေးကွက်အတွင်း ပီလောပီနံဥ ရောင်းချမှုလည်း ရှားပါးလာခြင်းကြောင်း လည်းကောင်း၊ ယခင်လထက် ယခုလမှာ ဈေးနှုန်းမြင့်တက်မှုဖြစ်ကြောင်း စိုက်ပျိုးသူနှင့် ရောင်းချသူများထံမှသိရှိရသည်။

    ယခင် ဩဂုတ်လတွင် ပီလောပီနံဥ ဈေးနှုန်းများမှာ လက်လီတစ်ပိဿာလျှင် (၂၅၀၀)ကျပ်၊ လက်ကားတစ်ပိဿာလျှင်(၂၃၀၀)ကျပ် ဖြစ်သည်။ ယခုလစက်တင်ဘာလတွင် ပီလောပီနံဥ ဈေးနှုန်းများမှာ လက်လီတစ်ပိဿာလျှင် (၄၀၀၀)ကျပ်၊ လက်ကား တစ်ပိဿာလျှင်(၃၈၀၀)ကျပ်ဈေးနှုန်း မြင့်တက်လာသည်။ ယခုနှစ်အတွင်း အထွက်နှုန်း နှင့်ဈေးကောင်း ရရှိခဲ့သည်။

   ထို့ကြောင့် ချောင်းဆုံဒေသထွက် သဘာဝအစာအစားဖြစ်သော ပီလောပီနံကို ကြိုက်နှစ်သက်၍ ဝယ်ယူစားသောက်ကြရာ ပီလောပီနံဥအပြုတ်လည်းကောင်း၊ ပီလောပီနံပေါင်း၍လည်းကောင်း အမျိုးမျိုးပြုလုပ် စားသုံးကြကြောင်း သိရှိရသည်။

DOCA(မွန်)

     မကွေးတိုင်းဒေသကြီး၊ အထက်မင်းလှမြို့နယ်၊ ကုန်းကြီးကျေးရွာအုပ်စုရှိ ဂျင်ရဲမြောင်(စံပြ) ကျေးရွာသည် မြေပဲ၊ ကုလားပဲ၊ ကြက်သွန်နီ၊ ဝါ၊ နှမ်း၊ ပဲစဉ်းငုံ စသောသီးနှံများကို ရာသီအလိုက် စိုက်ပျိုးလျက်ရှိပြီး ၂၀၂၄ခုနှစ်၊ စက်တင်ဘာလ(စတုတ္ထပတ်)တွင် ကြက်သွန်နီ စိုက်ဧက(၄၀)ဧက ခန့်အား  တောင်သူ(၅၀)ဦးမှ စတင်စိုက်ပျိုးလျက်ရှိကြောင်း သိရသည်။

    ဂျင်ရဲမြောင်(စံပြ)ကျေးရွာနေ တောင်သူ ဦးတင်ဇော်ဌေးက ၎င်းအနေဖြင့် ကြက်သွန်နီ(၈) ဧကခန့် စိုက်ပျိုးထားကြောင်း၊ (၁)ဧကလျှင် မျိုးဥအကြီး၊ အသေးအလိုက် ပိဿာချိန်(၃၅၀ မှ ၄၀၀) ကြား ကုန်ကျကြောင်း၊ မျိုးဥကို စလင်း၊ ပွင့်ဖြူမြို့တို့မှ (၁)ပိဿာလျှင် ကျပ်(၄၀၀၀)ဖြင့် ဝယ်ယူစိုက်ပျိုးကြသလို ယခင်နှစ်မျိုးလက်ကျန်ကို ပြန်လည်အသုံးပြု၍လည်း စိုက်ပျိုးကြကြောင်း၊ ၎င်း အနေဖြင့် ယခင်နှစ်မျိုးလက်ကျန်ဖြင့် ပြန်လည်စိုက်ပျိုးခြင်းဖြစ်ကြောင်း၊ (၁)ဧက စိုက်ပျိုးကုန်ကျစရိတ်အနေဖြင့် မျိုးဖိုး၊ လုပ်အားခ၊ မြေပြုပြင်ခနှင့် အခြားသွင်းအားစု စရိတ်အပါအဝင် ကျပ်သိန်း (၂၀)ခန့်ကုန်ကျကြောင်း၊ စိုက်ပျိုးပြီး ရက်ပေါင်း(၉၀)အကြာတွင် တူးဖော်ရပြီး ဈေးကွက်အနေဖြင့် ရန်ကုန်မြို့၊ ဘုရင့်နောင်ပွဲရုံသို့ တိုက်ရိုက်တင်ပို့ရောင်းချကြောင်း၊ ယခင်နှစ်က အထွက်နှုန်းအနေဖြင့် (၁)ဧကလျှင် ပိဿာချိန်(၃၀၀၀)ထွက်ရှိခဲ့ပြီး (၁)ပိဿာလျှင် ကျပ်(၃၈၀၀-၄၀၀၀)ဈေးနှုန်းရရှိခဲ့ပြီး အကျိုးအမြတ်အနေဖြင့် ကျပ်သိန်း(၁၀၀)ခန့်ရရှိခဲ့ကြောင်း သိရှိရပါသည်။

DOCA(မကွေး)

       မကွေးတိုင်းဒေသကြီး၊ သရက်ခရိုင်၊ မင်းလှမြို့နယ်၊ ကံတုပ်ကျေးရွာသည် နှမ်း၊ ပဲစဉ်းငုံနှင့် ကုလားပဲတို့ကို အဓိကစိုက်ပျိုးပြီး နှံစားပြောင်းသီးနှံကိုလည်း စီးပွားဖြစ်စိုက်ပျိုးကာ ၂၀၂၄ ခုနှစ်တွင် စိုက်ဧက ၄၆ ဧကခန့် စိုက်ပျိုးထားရှိကြောင်း သိရသည်။

     ဇူလိုင်လတွင် စတင်စိုက်ပျိုးကြပြီး နိုဝင်ဘာလဆန်းတွင် ရိတ်သိမ်းရကြောင်း၊ မျိုးစေ့အနေဖြင့် ထွက်တိုး(နီ)နှင့် ထွက်တိုး(ဖြူ)မျိုးတို့ဖြစ်ပြီး ထွက်တိုး(နီ)မျိုးများကို အများဆုံးစိုက်ပျိုးကြကြောင်း၊ ထွန်ကြောင်းဆွဲ၍ ကြဲပက်စနစ်ဖြင့် တစ်ဧကလျှင် မျိုးစေ့  ၁.၅ တင်းခန့်ကုန်ကျ၍ စုစုပေါင်း ကုန်ကျစရိတ်အနေဖြင့် ငွေကျပ် ၃၀၀၀၀၀ ခန့်ကုန်ကျကြောင်း၊ ယခင်နှစ်ကအထွက်နှုန်းအနေဖြင့် တစ်ဧကလျှင် ၃၅-၄၃ တင်းခန့် ထွက်ရှိပြီး ဈေးနှုန်းမှာ နှံစားပြောင်းပေါ်စအချိန်တွင် တစ်တင်းလျှင် ငွေကျပ် ၃၀၀၀၀-၃၄၀၀၀ဖြင့် အရောင်းအဝယ်ဖြစ်ခဲ့ပြီး အကျိုးအမြတ်အနေဖြင့် ငွေကျပ် ၇၀၀၀၀၀ ကျော်ရရှိကြောင်း သိရသည်။

     ၂၀၂၄ ခုနှစ်၊ စက်တင်ဘာလ (စတုတ္ထပတ်)တွင် နှံစားပြောင်း တစ်တင်းလျှင် ငွေကျပ် ၃၅၀၀၀-၃၈၀၀၀ ဖြင့် ဈေးနှုန်းမြင့်တက်ကာ အရောင်းအဝယ်ဖြစ်လျက်ရှိပြီး ဈေးကွက်အနေဖြင့် မင်းလှမြို့ပေါ်ရှိ ပွဲရုံများသို့ ရောင်းချပြီး မင်းဘူးမြို့နှင့် မကွေးမြို့များသို့လည်း တင်ပို့ရောင်းချကြောင်း၊  နှံစားပြောင်း သီးနှံစိုက်ပျိုးခြင်းဖြင့် တိရိစ္ဆာန်အစာအတွက်လည်း ဖူလုံမှုရှိပြီး ဝင်ငွေရရှိသည့် သီးနှံဖြစ်သောကြောင့် နှစ်စဉ် စိုက်ပျိုးလျက်ရှိကြောင်း သိရသည်။

DOCA(မကွေး)

       ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာနကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန်အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ စက်တင်ဘာလ (၂၄) ရက်နေ့မှ စက်တင်ဘာလ (၃၀) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ မြင်းခြံ (ကံဆင့်၊ မုံရွာ၊ တောင်သာဒေသတို့မှ ကြက်သွန်နီ (၇၀၂၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့်ပြန်လည်စီးထွက်မှုရှိကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၂၈၀၈၀၀) ပိဿာကျန်ရှိကြောင်း ကုန်စည်ဒိုင်သတင်းအရသိရှိရသည်။ ဆိပ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၁၄၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊  မုံရွာ ကြက်သွန်နီ(အသစ်) အချောတစ်ပိဿာလျှင် ကျပ်၁၃၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊ မြင်းခြံကြက်သွန်နီ (အသစ်) အချောတစ်ပိဿာလျှင် ကျပ်၁၅၅၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊ မြင်းခြံ(ကံဆင့်) ကြက်သွန်နီ (အသစ်) အချောတစ်ပိဿာလျှင် ကျပ်၁၇၀၀၊ အသန့်မှာ တစ်ပိဿာလျှင် ကျပ်၂၂၀၀၊ အကြီးမှာ ကျပ်၂၆၀၀၊ ရှယ်မှာ ကျပ်၂၈၀၀၊ တောင်သာကြက်သွန်နီ(အသစ်) အချောတစ်ပိဿာလျှင် ကျပ်၁၂၀၀၊ အသန့်မှာ တစ်ပိဿာလျှင် ကျပ်၁၅၀၀၊ အကြီးမှာ ကျပ်၁၇၀၀၊ ရှယ်မှာ ကျပ်၂၂၀၀ ဈေးတို့အသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)