ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ပြီး သီးနှံစိုက်ပျိုးရာတွင် အထွက်နှုန်းများ ပိုမိုကောင်းမွန်စေရန်နှင့် ပန်းတိုင်အထွက်နှုန်းရရှိရေးအတွက် ကန့်ဘလူခရိုင်အတွင်းရှိ  သီးနှံစိုက်ပျိုးသူများက ဝယ်ယူအသုံးပြုလျက်ရှိကြောင်းသိရသည်။

      ကန့်ဘလူခရိုင်၏ စက်တင်ဘာလ တတိယပတ်အတွင်း စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးဈေးနှုန်းများမှာ ပန်းဖူး(50)kg တစ်အိတ်လျှင် (၁၄၅၀၀၀)ကျပ်၊ မြှားကမ္ဘာ(50)kg တစ်အိတ်လျှင် (၁၂၄၀၀၀)ကျပ်၊ အာမို၊ ကျွဲနက်တံဆိပ် (၁၅:၁၅:၁၅) ကွန်ပေါင်းဓာတ်မြေဩဇာ (50)kg တစ်အိတ်လျှင် (၂၂၀၀၀၀)ကျပ်၊ ရွှေတောနစ်(၅၀၀)စီစီတစ်ဘူးလျှင် (၁၄၅၀၀)ကျပ်၊ မိုရယ်လ်မုန်း အမြစ်ပွား၊ အသီးတင်၊ အပင်သန် ဟော်မုန်းဆေး (၅၀၀)စီစီတစ်ဘူးလျှင် (၄၁၀၀၀)ကျပ်၊ အေမင်း စူပါစပါးပေါင်းသတ်ဆေး (၁)လီတာတစ်ဘူးလျှင် (၃၈၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခုအပတ်အတွင်း ဓာတ်မြေဩဇာဈေးနှုန်းများ အနည်းငယ်မြင့်တက်လာကြောင်း  ဓာတ်မြေဩဇာနှင့်ပိုးသတ်ဆေးရောင်းချသည့် ဆိုင်များထံမှသိရပါသည်။ 

DOCA(စစ်ကိုင်း)

    တစ်နှစ်တွင် ပုံမှန် တစ်လ၊ နှစ်လသာ ရှားရှားပါးပါးပေါ်သော ရာသီစာကိုင်းဥကို ယခုလိုအချိန် မြစ်ကမ်းနားဘေးနားရှိ ကိုင်းပင်များတွင် တွေ့ရတတ်ပါသည်။ ကိုင်းဥဟုခေါ်ဆိုသော်လည်း ဥလည်း မဟုတ်သလို မှိုလည်းမဟုတ်၊ အသီးလည်းမဟုတ်ကြောင်း သိရပါသည်။ ကိုင်းပင်၏ပင်စည်မှ အစေးများစုပြီး ဥကဲ့သို့ဖြစ်တည်နေသော အစားအစာတစ်မျိုးဖြစ်ကြောင်း လေ့လာသိရှိရပါသည်။ အင်ဥကဲ့သို့ ချောမွေ့မှုမရှိဘဲ ကြမ်းတမ်းတမ်းရှိပြီး အရသာမှာဆိမ့်သောအရသာရှိပါသည်။ ကိုင်းဥကိုဆားနှင့် ငရုတ်ကောင်းဖြူး၍ ကင်စားကြသကဲ့သို့ အချို့မှာလည်း ကန်စွန်းရွက်နှင့်ရော၍ ကြော်စားတတ်ကြပါသည်။ ရာသီစာဖြစ်ပြီးလူကြိုက်များသော်လည်း ရှားပါးပြီး အနည်းငယ်သာထွက်ရှိသော ကြောင့် ဈေးကွက်အတွင်းတွင် အနည်းငယ်သာ တွေ့ရတတ်ပါသည်။

    ပြည်ဈေးကွက်တွင် ရောင်းချနေသော ကိုင်းဥဈေးနှုန်းများမှာ ယခင်နှစ်တွင် နို့ဆီဘူးတစ်ဘူးလျှင် ၃၅၀၀ကျပ်ဈေးရှိခဲ့ပြီး ယခုနှစ်တွင် နို့ဆီဘူးတစ်ဘူးလျှင် ၈၀၀၀ကျပ်ဈေးဖြင့်ရောင်းချသဖြင့် ယခုနှစ်တွင် ကိုင်းဥဈေးမှာ နို့ဆီဘူးတစ်ဘူးလျှင် ၄၅၀၀ကျပ်ခန့် ဈေးနှုန်းများမြင့်တက်လျက်ရှိ ကြောင်း လေ့လာသိရှိရပါသည်။

DOCA(ပဲခူး)

      ဧရာဝတီတိုင်းဒေသကြီး ဟင်္သာတခရိုင်၌ ၂၀၂၄ မိုးစပါးကို ဟင်္သာတမြို့နယ်တွင် (၆၆၆၅၄) ဧက၊ ဇလွန်မြို့နယ်တွင် (၃၀၅၄၆)ဧက နှင့် လေးမျက်နှာမြို့နယ်တွင် (၃၀၂၄၅)ဧက၊ စုစုပေါင်း (၁၂၇၄၄၅)ဧက စိုက်ပျိုးကြပြီး၊ သီးထပ်အဖြစ် မတ်ပဲ၊ပဲတီစိမ်းနှင့် နွေစပါးတို့ကို စိုက်ပျိုးကြပါသည်။  စိုက်ပျိုးသော စပါးမျိုးများမှာ ဆင်းသုခ၊ မနောသုခ၊ GW-11 ၊ GW-18 ၊  မှော်ဘီ ၃ ၊ ရက်(၉၀)၊ ရွှေဧရာ၊ ပခန်း   စသောမျိုးများကို အဓိကစိုက်ပျိုးကြပါသည်။

          ၂၀၂၄ ခုနှစ် မေလ နောက်ဆုံးပတ်က စိုက်ပျိုးသော မိုးစပါးများသည် ၂၀၂၄ ခုနှစ် စက်တင် ဘာလ ဒုတိယပတ်တွင် စတင်ထွက်ရှိလာကြပါသည်။ စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည်  (၂၄.၉.၂၀၂၄)နေ့တွင်  ၂၀၂၄  ခုနှစ်ထွက်  ကောက်စောမိုးစပါး ရိတ်သိမ်းသော ဟင်္သာတမြို့နယ်၊ စခန်းကြီးကျေးရွာအုပ်စု၊ အုန်းပင်စုကျေးရွာ(တောင်ပိုင်း)ရှိ၊ တောင်သူ ဦးသိန်းမြင့် ၏ GW-11 စပါးမျိုးစိုက်ပျိုးထားသော  လယ်(၄.၀၀)ဧကသို့  ကွင်းဆင်းလေ့လာခဲ့ပါသည်။ တစ်ဧကလျှင် ပျမ်းမျှအစိုဓါတ် ရာခိုင်နှုန်း(၂၄-၃၀)ကြားရှိပြီး  (၅၅)ပေါင် တင်း(၉၀)မှ(၉၅)တင်းကြား ထွက်ရှိကြောင်း သိရှိရပါသည်။ ကွင်းပေါက်ဈေးမှာ အစို(၅၅)ပေါင် တင်း(၁၀၀)လျှင် (၁၅ သိန်း ကျပ်) ဈေးဖြင့် ရောင်းချရပြီး တစ်ဧကလျှင်(၇ သိန်းကျပ်)ဝန်းကျင်ခန့် အကျိုးအမြတ်ရရှိကြောင်း တောင်သူဦးသိန်းမြင့်ထံမှ ပြောကြားပါသည်။

DOCA(ဧရာဝတီ)

     ၂၀၂၄ ခုနှစ်၊ မိုးရာသီ စက်တင်ဘာလတွင် ကရင်ပြည်နယ်၊ ဘားအံမြို့ ရေ‌ပေါ်ဈေးရှိ ကုန်စိမ်းသီးနှံ ဈေးနှုန်းအနည်းငယ်တက်နေသောလည်း  ဈေးကွက်အတွင်း အရောင်းအဝယ်ဖြစ် လျက်ရှိကြောင်း  သိရသည်။

     ဈေးနှုန်းအနေဖြင့် ခရမ်းသီး တစ်ပိဿလျှင် (၃၀၀၀၊၃၅၀၀) ကျပ်၊ ခရမ်းချဉ်သီး တစ်ပိဿာ လျှင် (၃၀၀၀)ကျပ်၊ ဂေါ်ဖီထုပ် တစ်ထုပ်လျှင် (၂၀၀၀၊၃၀၀၀)ကျပ်၊ ပန်းဂေါ်ဖီ တစ်ပွင့်လျှင် (၁၅၀၀၊၂၈၀၀) ကျပ်၊ ငရုတ်ပွ တစ်ပိဿလျှင် (၃၅၀၀)ကျပ်၊ ခဝဲသီးတစ်ပိဿလျှင် (၅၀၀၀)ကျပ်၊   ကြက်ဟင်းခါးသီး တစ်ပိဿလျှင် (၄၀၀၀)ကျပ်၊ ရုံးပတီသီး တစ်ပိဿာလျှင် (၈၀၀၀)ကျပ်၊ (ငရုတ်စိမ်းထောင့်ရှည် တစ်ပိဿလျှင် (၅၀၀၀)ကျပ်၊ ပဲတောင့်ရှည် အစည်းသေး (၁၀၀၀)ကျပ်၊ ကန်စွန်းရွက် တစ်စည်းလျှင် (၅၀၀)ကျပ်၊ ကင်းပွန်းချဥ်ရွက် တစ်စည်း လျှင်(၈၀၀)ကျပ်၊ ချဥ်ပေါင်ရွက်တစ်စည်းလျှင်(၅၀၀)ကျပ်၊ ဝါးပိုးမြစ်စိမ်း တစ်ပိဿာလျှင်(၁၀၀၀၀) ကျပ်၊ မြစ်ပြု တစ်ပိဿာလျှင် (၅၀၀၀)ကျပ်  တို့ဖြစ် ရောင်းဝယ်နေကြကြောင်း သိရသည်။

      ကရင်ပြည်နယ်ဒေသအတွင်း ယခုလို ဈေးနှုန်းအနည်းတက်နေရခြင်းမှာ စိုက်ခင်မှအသီးများ တုံးလာခြင်း၊ရေနစ်မြုပ်ခြင်းနှင့် စရိတ်များလာခြင်းတို့ကြောင့်ဖြစ်ကြောင်း သတင်းရရှိသည်။

DOCA(ကရင်)

    ရှမ်းပြည်နယ်(တောင်ပိုင်း)တွင် မုန်တိုင်းဒဏ်ရိုက်ခတ်မှုကြောင့် နေရာအနှံအပြား မိုးအဆက်မပြတ်ရွာသွန်းပြီး ရေကြီး/ရေလျှံမှုများဖြစ်ပေါ်ကာ လမ်းပန်းဆက်သွယ်ရေးများပြတ်တောက်၍ အိမ်တွင်းအခြေခံသုံးစားဖိုဆောင်ပစ္စည်းများ၊ မီးဖိုချောင်သုံးပစ္စည်းများ၊ ဟင်းသီးဟင်းရွက်များနှင့် အခြားဆက်စပ်ပစ္စည်းများ ပြတ်တောက်လျက်ရှိကြောင်း သိရှိရပါသည်။ ရေကြီး/ရေလျှံမှုကြောင့် စိုက်ပျိုးတောင်သူများလည်း နစ်နာဆုံးရုံးမှုများ ဖြစ်ပေါ်လျက်ရှိကြောင်း သိရှိရပါသည်။

    အထူးသဖြင့် ကလော၊ အောင်ပန်း၊ အင်းလေ၊ ညောင်ရွှေ၊ ရွှေညောင် စသည့်မြို့များတွင်လည်း ရေကြီးမှုများကြောင့် စိုက်ပျိုးထားသည့် ဟင်းသီးဟင်းရွက်များလည်း ပျက်ဆီးဆုံးရှုံးမှုများ ဖြစ်ပေါ်နေကြောင်း သိရှိရပါသည်။  

    ယခင်က ကလော၊ အောင်ပန်း၊ အင်းလေ၊ ညောင်ရွှေ၊ ရွှေညောင်တို့မှ အသားငါး၊ ဟင်းသီးဟင်းရွက်များကို တောင်ကြီးမြို့မဈေးသို့လည်းကောင်း (၅)ရက်တစ်ပတ်ဈေးသို့လည်းကောင်း ဈေးနှုန်းချိုသာစွာဖြင့် လာရောက်ရောင်းချကြသော်လည်း ယခုအခါ ရေကြီး/ရေလျှံမှုကြောင့် ဈေးနှုန်းများ မြင့်တက်လျက်ရှိကြောင်း သိရှိရပါသည်။

    အင်းလေးတွင် ရေကြီးမှုကြောင့် စိုက်ပျိုးထားသိုလှောင်ထားသည့် အင်းလေးခရမ်းချဉ်သီးများလည်း ပျက်ဆီးဆုံးရှုံးလျက်ရှိပါသည်။ အင်းလေးခရမ်းချဉ်သီးများကို နီးစပ်ရာအခြားမြို့များသို့ တင်ပို့ရောင်ချမှုများလည်း လျော့နည်းသွားကာ ရေကြီးမှုကြောင့် ခရမ်းချဉ်သီးရောင်းချသည့် ဒိုင်များတွင် အင်းလေးခရမ်းချဉ်သီး တစ်ပိဿာလျှင် အကြီးအသေးပေါ်မူတည်၍ (၁၀၀၀)ကျပ် မှ (၁၅၀၀) ကျပ် ဈေးသာပေးရကြောင်း သိရှိရပါသည်။

     ရှမ်းပြည်နယ်(တောင်ပိုင်း)တွင် မိုးရွာ/ရေကြီးမှုကြောင့် စိုက်ပျိုးတောင်သူများသာမက ဝယ်ယူစားသုံးသည့် ပြည်သူများပါ အခက်အခဲများ ဖြစ်ပေါ်နေကြာင်း သိရှိရပါသည်။

DOCA(ရှမ်း)